请选择 进入手机版 | 继续访问电脑版
设为首页收藏本站

僚人家园

 找回密码
 注册

QQ登录

只需一步,快速开始

点击进入授权页面

只需一步,快速开始

扫一扫,访问微社区

搜索
楼主: 路漫

《侬智高》(第一部壮文长篇历史小说)

[复制链接]

22

主题

2

听众

6971

积分

东灵神

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2013-10-4
注册时间
2004-7-31
发表于 2004-11-11 00:54:00 |显示全部楼层
很好的民族小说,出版了没有呢?

以前因为害怕错过了很多,现在越是害怕的事情我越要去做......
回复

使用道具 举报

223

主题

2

听众

8581

积分

贵宾

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2016-3-13
注册时间
2002-10-28
发表于 2004-11-28 17:30:00 |显示全部楼层
cibroek. Giuj Gaj Soengq Ciengq 十坴、巧嘎宋将
         Nungz Cigauh gung roengz Yunghcouh,lienzdaemh youh gung roengz gouj aen singz,hoenx humx daengz Gvangjcouh,vifung riuz doh daengx biengz,Soengqyinzcungh Cau Cinh haethaemh mbouj an,ninz mbouj ndaek,gwn mbouj van.Loeknyied co'ngeih,Cau Cinh baij Yiz Cing guh Huznanz Anhfujswj,doeklaeng youh hawj de swngguen,fung guh Gvangjnanzsihlu Anhfujswj,heuh de caeuq Yangz Denz,Lij Suh,Cinz Suj caez daiq bing bae dwk Nungz Cigauh.Cau Cinh lij mbouj cuengqsim,youh baij Sunh Menj guh Gvangjnanzsihlu Ginghhuz Anhfujswj,itheij caez bae.Soengqginh daihciengq Ciengj Gaih,Cangh Cungh daiq bing riengz bae.
        Bae daengz Danzcouh(neix Cangzsah Si)Sunh Menj cang bingh,louz roengzdaeuj deq yawj,caiq naemj bae roxnaeuz mbouj bae.
        Yiz Cing,Yangz Denz,Ciengj Gaih,Cangh Cungh daiq bing hai haeuj Gvangjdungh seiz,Nungzginh gaenq lizhai Gvangjcouh,doxhwnj gung roengz Cinghyenj,yiengq Yinghcouh hai bae.Yinghcouh couguen Suh Genz daiq miz bet cien bing,ndij dah souj maenh seiq cib lai leix,fuengzre Nungzginh doxhwnj.Nungz Cigauh daiq bingdoih heux byaij geij cib leix,gvaq dah doxhwnj,daj lingh mbiengj homh gung Soengqginh.Yangz Denz lauheiq Soengqginh deng humx,heuh Suh Genz ndekndak Yinghcouh,youh heuh Ciengj Gaih,Cangh Cungh coemh dangdieg haeuxliengz,ganjnaeuz mbouj hawj Nungzginh louz miz haeuxgwn,yienzhaeuh comz bing souj maenh Saucouh(neix Saugvanh).Nungzginh bik gaenh Saucouh,guh yiengh gyajcang gung singz.Nungz Cigauh cix heuh Vuj Hwzli,Hij Yenz daiq di bing cap youq rog singz,de cix daiq daihdoih bingmax hwnj baihsaebaek bae,riengjret hai coh Hocouh.Gvaq ndaej song ngoenz,Vuj Hwzli,Hij Yenz sou yingz hwnjdin,bae riengz Nungz Cigauh.Yiz Cing,Yangz Denz cij rox hwnjdangq,gipmuengz heuh  Ciengj Gaih,Cangh Cungh daeuj doxyaeng.
        Yangz Denz Cam:"Nungz Cigauh raen dienbing vunz lai,mbouj gamj caeuq raeuz doxhoenx,vuengmuengz deuz lo,neix dwg aen seizgei ndei ndeu,raeuz aeu cagaenj bae gyaep de,gaemh de hwnj Ging bae bauqgoeng,bouxlawz nyienh daj daeuzcaenh?"
          Cangh Cungh ciengj gonq naeuz:"Hawj gou cien bingmax he,gou nyienh daj daeuzcaenh,Gaemh dawz Nungz Cigauh!"
          Yangz Denz naeuz:"Cienghginh miz damjliengh,dwg boux daihciengq najrongh he.Hoeng,Nungz Cigauh cix mbouj genjdanh,mboujdanh goengfou ak,caemhcaiq miz geiq miz maeuz,siujsim cijndaej."
           Cangh Cungh bek aek naeuz:"Gou dangzdangz ciuzdingz daihciengq,cib bi gonq couh hoenxciengq laebgoeng,cax nangx mbouj gamj sieng gou saek dug bwndauz!Nungz Cigauh ndaek vunz neix,miz maz bonjsaeh?Mwngz gaej bungj caeg mied raeuz vifung!"
         Yangz Denz swnhbak haenh naeuz:"Ndei,vifung lij vuengh gvaq dangnienz!Mwngz couh daiq song cien bingmax byaij gonq,Ciengj cienghginh daiq sam cien bingmax riengzlaeng.gou daihdoih cieowngq."
         Ciengj Gaih ganjnaeuz bonjsaeh ak,mbouj gauhingq riengzlaeng,siengj ciengj daeuzgoeng,couh naeuz:"Gou daiq cien bing he bae gyaep Nungz Cigauh,Cangh cienghginh daj Lenzcouh gyaep bae,song mbiengj baez gab,Nungz Cigauh miz fwed nanz mbin!"
         Yangz Denz haenh naeuz:"Aen cawkeiq neix ndei,mwngz hix daiq song cien bing ba.Yiz dayinz,mwngz naeuz ne?"
         Yiz Cing ngaek gyaeuj naeuz:"Couh yienghneix banh ba.Gou bae Gvangjcouh guenj saeh,couh caj sou bauqheij lo!"
          Cangh Cungh naeuz:"Baez neix gaemh mbouj dawz Nungz Cigauh,gou riuj gyaeuj daeuj raen sou!"
          Ciengj Gaih engq gangj daihvah:"Gou mbouj yungh loenq saek dug bwndauz,couh aeu gyaeuj Nungz Cigauh bae Ging lingx ciengj!"
         Yienghneix,Cangh Cungh vaiqvi bae gyaep Nungzginh,youq gwnz loh,seiz mbouj seiz raen Nungzginh vut miz doxgaiq,Soengqginh raen le couh doxciengj aeu,bouxboux baufug yied daeuj yied naek.Cangh Cungh cosim ragraix,cij goq fad max baenaj,bouxbing buekmingh riengz gaenlaeng,bouxboux cungj baeg liux.Bae daengz Hocouh,Hocouh soujbing youh gyaeb haeujdaeuj,Cangh cungh engqgya guengz lo.Yawjraen Nungzginh itloh vut doxgaiq,Cangh Cungh lajfwngz bouxciengq Dungj Yi miz di simngeiz,couh daezsingj Cangh Cungh naeuz:"Nungz Cigauh itloh vut doxgaiq,lau ndaw neix miz fangz bw?"Cangh Cungh yawjsiuj Dungj Yi naeuz:"Mwngz dwg ndaw sim miz fangz ba?Faenmingz dwg Nungz Cigauh deng gyaep ndaej gaenj,lauheiq buet mbouj vaiq,cix vut doxgaiq deuz mingh hane!"
        Dungj Yi mbouj gamj gangj maz,ndaw sim cix gag ndonnde.
        Nungzginh itloh vut doxgaiq,caen dwg Nungz Cigauh aen geiqmaeuz ndeue aeu yien ndaeng Soengqginh byaij,sai rengz gyoengqde,ra aeu mizleih deihhingz,fad max doxdauq,siumied Soengqginh.
         Caiq gangj Nungzginh lizhai Saucouh ngoenz daihhaj banngaiz,byaij daengz Hocouh baihdoeng Mbanjnazhau,yawjraen miz goengq ndoi he lumj faj fwngz ndeu iet youq baihnaj,faexndoeng mwncupcup,daihloh heux dinndoi bae,laj ndoi miz benq nazmbwt ndeu,Nungz Cigauh raen le sim gig angq,de daengx max roengzdaeuj,aeu bienmax vix doengh naz doiq gyoengq bing riengzlaeng de naeuz:"Sou daj doengh naz neix cung gvaq bae!"
          Geij cib boux bing dingqnyi minghlingh,caezsing hat baez ndeu,doengzcaez diuq roengz naz bae,mbouj byaij ndaej geij yamq,cij dingqnyi boepbab boebbab yiengj,bouxboux loem roengz boengz laeg,boengz cungj mued daengz goekga,byaij mbouj doengh dem.Nungz Cigauh hat naeuz:"Cung Gvaq bae!Cung daengz dinndoi bae!Byawz hix mbouj ndaej dingz roengzdaeuj!"
        Gyoengq haenx youh buekmingh cung baenaj,bouxboux din fwngz caez yungh,boengz sinz byanbyan,boengz mued daengz gyang hwet,cijndaej rwenz aeu.Cung daengz din ndoi,bouxboux gyuek daengz cij raen song ceh da,doxyawj riu dungx in bae.Hoeng,Vangz Swhmi, Vangz Veij, Daxnungz cix mbouj riu,gyoengqde yawj ok neix dwg Nungz Cigauh naemj geiq sawq yawj hane.
          Nungz Cigauh bae daengz baihnaj gyoengq bing gyuekgyak haenx,haenh naeuz:"Sou guh ndaej ndei,sou laeb daihgoeng lo!Ndeindei bae swiq ndang,ngoenzneix caeuq gou caez gaj ma sai laeuj!"
             Yienzhaeuh,Nungz Cigauh doiq Daxnungz daengj vunz naeuz dajsuenq baenzneix baenzneix,gyoengqde dingq le cungj bek fwngz naeuz:"Ndei!"
             Nungz Cigauh heuh Vangz Veij daengj daiq daihdoih laebdaeb byaij doxbae,youq baihnaj haj cib leix cap yingz,de daiq sam cien bing yiet youq ndaw ndoeng neix,caj Vuj Hwzli yinx Cangh Cungh daeuj.
           Daihdoih hai bae foedfoed lo,hoeng Daxnungz lij naengh gwnz rin mbouj hwnj ndang,Nungz Cigauh raen le couh byaij hwnjbae cam:"Daxmeh miz maz yaek daengq lwi?"
            Daxnungz riu naeuz:"Mwngz mbouj dwg aeu gaj ma sai laeuj ma?Gou haujlai nanz mbouj ndaej gwn nohma lo,bak caemh ngah ne,gangj mbouj dingh gou ndaej son mwngz baenzlawz gaj ma li!"
            Nungz Cigauh dingq ok daxmeh ndaw vah miz vah,couh ngaek gyaeuj riu naeuz:"Cingj daxmeh louz roengzdaeuj son gou gaj ma ba!"
            Veiz Meijsenh ndwn youq henz ndang swngzgei naeuz:"Geiqyienz daxmeh louz roengz,gou caemh louz roengz buenx daxmeh!"
            Nungz Cigauh riuhaha naeuz:"Bouxcuengh mboujguenj sai mbwk,cungj dwg maij gwn nohma ha!"
            Caezgya cungj riu hwnjdaeuj.Daxnungz youh naeuz:"Yawj daeuj gaj duz ma ndeu mbouj gaeuq gwn,aeu gaj song duz."
            Yienghneix,Nungz Cigauh heuh Nungz Civei ganjvaiq bae caeuq Vuj Hwzli, Hij Yenz ciepdaeuz,heuh songde itdingh aeu yinx Cangh Cungh gvaq gizneix daeuj.Nungz Civei cacoemj hwnj max bae lo.
            Nungzginh louz roengzdaeuj haenx,youq bangx ndoi gud cauq cawj ngaiz.Miz doih bing he bae Mbanjnazhau ra ma daeuj gaj.Yaep he,bouxboux yien duz ma he dauqma,baez geq miz haj cib lai duz.Nungz Cigauh cam:"Cungj hawj cienz luma?"Miz cib lai boux naeuz:Hawj gvaq.Hoeng,daihbouhfaenh ngoemxngwd mbouj guhsing.
             Nungz Cigauh naeuz:"Duz lawz caengz hawj cienz,langh deuz!"
         Sam cib lai boux baez cuengq fwngz,sam cib lai duz ma couh ndangq cag geb rieng buet dauq mbanj bae lo.
         Daxnungz naeuz:"cib lai duz ma neix,louz song duz ceiq hung hawj gou,gou naeuz baenzlawz gaj couh baenzlawz gaj,gizyawz youz sou gaj."
          Bouxbing genj duz ndaem duz henj ceiq hung haenx yien bae baihnaj Daxbungz,cam:"Daiqhaeuh,song duz ma hung neix baenzlawz gaj?"
          Daxnungz naeuz:"duz ma ndaem neix,ciuq vah Nungzvuengz,rag daengz ndaw nazmbwt bae, faexmbaenq moeb dai!"
           Nungz Cigauh youq henz naeuz:"Duz ma ndaem neix couh dwg Cangh Cungh."
           Bouxbing couh rag ma ndaem bae nazmbwt moeb dai lo.
           Daxnungz vix duz ma henj naeuz:"Duz neix couh dwg Ciengj Gaih lo."
           Nungz Cigauh naeuz:"Cingj daxmeh son baenzlawz gaj duz neix?"
           Daxnungz naeuz:"Heuh bouxbing he gwih max dawz duz neix rag ndaej baeg dai baeg lix bae."
           Bouxbing he yien ma henj yat hwnj max,baez fad bien,ma henj couh deng rag bae,bae duenh loh he youh fad dauq,ma daengz baihnaj Daxnungz,ma henj bak gaenq ok fugfauz,boemz youq gwnz deih rauheiq fofo.Daxnungz heuh bouxbing cuengq cag,ma henj daenqlaeng song yamq,youh boemz roengzdaeuj rauheiq mbouj dingz.Daxnungz doiq song boux gaem faexmbaenq haenx naeuz:"Gaej hawj de rauheiq gvaqdaeuj,vaiq moeb!"
          Song bouxbing hwnjbae couh moeb,ma henj dangciengz ngunh gvaqbae,bouxbing he yut mid okdaeuj,mbongq haej hozlaemz ma henj,lwed fwt boq okdaeuj,bouxbing he aeu bat bae coux.
           Nungz Cigauh yawjraen baenzneix gaj ma le,doiq baenzlawz mied Ciengj Gaih ndaw sim cix miz daej lo.De soqlaiz boiqfug daxmeh suenqgeiq,mbatneix raen daxmeh aeu gaj ma daeuj son de,engq fug lo.
          Ma ndaem caeuq ma henj caeq aeuq guh rek ndeu,dawz daeuj ciudaih gyoengq bing rwenz gvaq nazmbwt haenx,Nungz Cigauh hawj gyoengqde caem laeuj.Gyoengqde gwn imq le,couh maizfug haeuj ndoeng bae,cij louz bouxdajcawj youq din ndoi guh ngaiz,caj Vuj Hwzli, Hij Yenz daiq bing daeuj daengz couh miz ngaiz gwn.
          Daxnungz caeuq Veiz Meijsenh caez maeuq youq ndaw ndoeng,gyoengq bing raen le saenqsim engq vuengh,roxnyinh ciengz neix itdingh ndaej hingz.
                (caj swnj)

回复

使用道具 举报

223

主题

2

听众

8581

积分

贵宾

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2016-3-13
注册时间
2002-10-28
发表于 2004-12-5 17:05:00 |显示全部楼层
Betnyied ngoenz raez haemh dinj,mbwn aeng daengngoenz cik,maeuq youq ndaw faed,hanh roenx hanh sinz,byawz hix mbouj gamj doengh saek di.
        Daengngoenz veq le engq aeng engq cik lo,Vuj Hwzli daengj daiq bing daeuj daengz,Nungz Cigauh daj ndoengfaex okdaeuj coux.Vuj Hwzli bauqlwnh:"Daengxcungq cungj daeuj caez lo."
         Nungz Cigauh cam:"Cangh Cungh liz neix lij miz geijlai gyae?"
         Vuj Hwzli naeuz:"Daihgaiq miz caet bet leix."
         Nungz Cigauh naeuz:"Ndei!Sou lij miz seizgan gwn caeuz,gwn le couh yiet youq yienzdieg,mbangj ninz mbangj naengh,lumj gig baeg nei,hoeng yaek aeu seizseiz singjgaeh.Caj Cangh Cungh gyaep daengz,sou couh luenhyauyau buet deuz,cij dawz cax nangx,gizyawz doxgaiq cungj vut youq neix.Dingqnyi boq hauh,sou sikhaek nyeux gyaeuj hoenx dauqma,gyaep Soengqginh roengz nazmbwt bae,baeuh rin,nyingz naq dwk dai gyoengqde,rox lwi?"
        Vuj Hwzli naeuz:"Rox lo."
       Nungz Cigauh daengq ndei le,youh haeuj ndoengfaex bae.
       Gyoengq bing gwn caeuz imq le,couh ciuq Nungz Cigauh daengq haenx sanq youq dieg rum yietbaeg,lwgda cix mbouj gamj hup,dinghdingh yawj diuz roen Cangh Cungh yaek daeuj haenx.
         Mbouj geij nanz,Soengqginh gyaep daeuj daengz lo,mbaw geiz henj hung he gwnzde sij miz cih "Cangh",Cangh Cungh gwih max couh youq baihlaeng.Vuj Hwzli baez vad geiz,Nungzginh couh swenjrara,vuenluenh gip cax gip nangx couh "buet deuz".Soengqginh daeuj daengz,raen mued dieg vut miz doxgaiq,ndaw rek lij lw haeux byaek,bouxboux doxcoemj bae ciengj gwn ciengj doxgaiq.Cangh Cungh youq baihlaeng hat:"Vaiq gyaep!Mbouj cinj dingz!"Gyoengq bing de hix mbouj dingq,ciuq ciengj huhu.
          Cingq youq seizneix,ndaw ndoengfaex sing hauh baez yiengj,sam cien Nungzginh daj nfaw ndoengfaex yat okdaeuj,bouxboux daenj buhhoengz,lumjbaenz benq feiz he lag okdaeuj.Vuj Hwzli gyoengqde dingqnyi hauh yiengj,caemh cienq ndang hoenx doxdauq.Soengqginh song mbiengj deng gab,luenhyauyau mbouj baenz doih dem,mwngz gaex gou,gou dongj mwngz,baenzlawz dingj ndaej Nungzginh hoenx,faenfaen diuq roengz naz bae yaek deuz mingh.Byawz rox,sad diuq roengzbae couh loem roengz boengzlaeg,diem ga diem mbouj hwnj,baihlaeng caenh daeuj,deng caij dai youq ndaw boengz fouzsoq.Cangh Cungh gwih max caemh loem youq ndaw nazmbwt,boengz mued daengz gungx max,doenghdanh mbouj ndaej.Nungzginh lumj dajbaj nei,geij fag nangx couh baek de dai youq ndaw nazboengz.Soengqginh cienzbouh deng gyaep roengz nazmbwt,Nungzginh baizdoih youq haenznaz,dwk naq beng gung,boux naq boux naq,baenz song cien Soengqginh gyonj dai youq ndaw nazmbwt.
          Hingz baez neix le,Nungz Cigauh max mbouj dingz daez,youh nda'nduengq bae dwk Ciengj Gaih.Gvaq roek ngoenz,Nungzginh youq Gocouh Daiqbingz bungz daengz Ciengj Gaih.Nungz Cigauh baij Vuj Hwzli, Hij Yenz, Nungz Gencungh gag daiq song cien bingmax,doxlwnz bae hoenx Ciengj Gaih.Sien dwg Vuj Hwzli bae hoenx,Ciengj Gaih goengfou ak dahraix,Vuj Hwzli hoenx mbouj gvaq,cienq ndang couh deuz.Ciengj Gaih gaenjgaenj gyaep bae,gyaep ndaej sam cib leix,senq miz Hij Yenz youq gizhaenx caj de daeuj.Hij Yenz yied hwnj langzyazbang,Ciengj Gaih caxmbat vuet daeuj,song vunz hoenx daengz bet cib doengh,boux mbouj saw boux,hanh conh hanh roenx,hoz hawq bak sauj.Hij Yenz yawj hoenx daengz bouh neix,cix canggyaj hoenx saw,youh "yien ndaeng" Ciengj Gaih buet sam cib leix,daengz gizhaenx Nungz Gencungh caeux deq de daeuj lo.Ciengj Gaih ngamq daengz,Nungz Gencungh vangh fouj youh daeuj hoenx,cax fouj doxbungq,yap feiz myapmyap,hoenx daengz baenz bak fouj,mbouj faen sawhingz,Nungz Gencungh youh canggyaj baih deuz.Ciengj Gaih gyaep bae cib lai leix gyae,yawjraen Nungzginh ndonj haeuj aen gemh gaebgeb he bae,gwnz gemh song mbiengj ndoi geiz mbinfagfag.Ciengj Gaih laeg max mbouj gamj haeuj gemh,lauheiq deng Nungzginh maizfug.De nyeux gyaeuj baez yawj,hoenx gvaq sam ciengz,gaenq buet gvaq baenz bak leix,seizneix youh iek youh baeg,gyoengq bing de gaenq rauheiq fofo naiqnuegnueg lo.De cijndei daiq bing doxdauq,dajsuenq bae daiqbingz cap youq,ra ngaiz gwn gonq.
          Gizsaed gwnz gemh gaenbonj mbouj miz vunz,geij mbaw geiz couh hwk de gebviz deuz lo.
          Ginggvaq sam yien it hwk,Cinegj Gaih lauxlaux saedsaed hawj Nungz Cigauh "cin ndaeng" buet,ndang baeg rengz naiq daeuj daengz Daiqbingz.Ngamqngamq cap ndei bungzciengq,Daiqbingz beksingq couh yien yiengz ram mou, banh byaek banh laeuj daeuj veilauz Soengqginh,doq ndaq Nungzginh,doq haenh Soengqginh goenglauz hung.Ciengj Gaih ndawsim gig vuenheij.Mbwn ngamq laep,laeuj byaek ngamq hwnj daiz,Soengqginh bouxboux gwngaemz gwnguk,gijmaz cungj lumz seuqsat lo.Ciengj Gaih gag nda daiz he,geij boux beksingq hawj de gingq laeuj,sam boi laeuj roengz dungx,uk gaenq ngunhngubngub lo.Seizneix,Nungz Cigauh daiq sam cien bingmax gaenq laeglemx humx ndei Daiqbingz,Soengqginh di he mbouj rox.Sing bauq fwt yiengj,Nungzginh dumdeng cung haeujbae,cax raemj fouj bag,lwed boq rim daiz,gyaeuj doek muenx deih,miz di gyaeuj ringx gwnz deih,ndaw bak lij hamz nohbyaek.Nungz Cigauh cung haeuj bungzciengq,raen Ciengj gaih ndaw fwngz lij gaem gagaeq,Nungz Cigauh hat sing he,baujgiemq vuet gvaq hozlaemz,Ciengj Gaih ndang lij naengh dwk,gyaeuj gaenq doek roengz laj eij.
         Yienzlaiz,gyoengq beksingq hawj soengq byaek laeuj haenx cienz dwg Nungzginh cang baenz.
         Ngoenz daihngeih,aen gyaeuj Ciengj Gaih venj ok gwnz gai hawj vunzlai yawj,Nungzginh lizhai Daiqbingz,hai bae baihsaebaek lo.

回复

使用道具 举报

22

主题

1

听众

2735

积分

樟树精灵

Rank: 10Rank: 10Rank: 10Rank: 10Rank: 10Rank: 10Rank: 10Rank: 10Rank: 10Rank: 10

最后登录
2018-8-28
注册时间
2003-1-20
发表于 2004-12-5 19:18:00 |显示全部楼层

惭愧和感动!!

无比感谢尊敬的路漫老师!

惭愧是因为壮文都不会读,更别说写了,但一定从今天起加紧学习的。

感动包含很多复杂的情感,这一刹那,眼眶竟湿了。


=== See me fly....看我飛 ===
回复

使用道具 举报

59

主题

3

听众

1万

积分

版主

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2018-2-8
注册时间
2004-4-2
发表于 2004-12-10 11:06:00 |显示全部楼层
Lohmanh Lauxsae, docih mwngz.  Mwngz dwgrengz lo.  Caen muengh miz ngoenz ndaej dawz cik goj mwngz neix guh baenz dienz'ingj (movie) caeuq dienzsaeh (TV) ha.

回复

使用道具 举报

41

主题

2

听众

6738

积分

东灵神

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2015-7-24
注册时间
2004-12-9
发表于 2004-12-23 19:50:00 |显示全部楼层
Danghaeuz  ndaej  yaenq  baenz  bonjsaw  okdaeuj  fathengz  gya  ndei  lo.   (Siengj  ra  saek  bonj  saw  Sawcuengh  caen  nanz  raixcaix  hw.)

回复

使用道具 举报

223

主题

2

听众

8581

积分

贵宾

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2016-3-13
注册时间
2002-10-28
发表于 2004-12-26 23:10:00 |显示全部楼层
cibcaet. Gaemh lix Yangz Vwnzgvangj 十七、擀赲杨文广
        Ciengj Gaih ,Cangh Cungh deng hoenx dai le,Soengqciuz vwnzvuj bak guen najheu najbienq,vuengzdaeq simyou bupbup,heiq ndaej mbouj rox yawz banh.De heuh bak guen gawj vunz bae dwk Nungz Cigauh,Miz vunz gawj Diz Cingh,boux neix dwg Suhmizyen fuswj,lumj seizneix fucungjcanhmouzcangj,beij Ciengj Gaih ,Cangh Cungh ak lai lo,mingzdaeuz caemh gig sang.Vuengzdaeq heuh de hwnj dienh,doxyaeng baenzlawz dwk Nungzginh.
         Vuengzdaeq naeuz:"Gou heuh mwngz daeuj,cij vih Nungz Cigauh youq Lingjnanz cauhfanj.Gou baij Sunh Menj ,Yiz Cing ,Yangz Denz bae dwk gvaq,geij ndwen gvaqbae lo,mbouj raen hingz cij raen saw,daihciengq Ciengj Gaih ,Cangh Cungh caemh deng gaj lo,ndaek Nungz Cigauh neix maqhuz guengz ha.Gou seizneix fung mwngz guh Lingjnanz dayenzsai,daiq bing bae dwk caeg."
         Diz Cingh baiq naeuz:"Ndaej vuengzsiengh yawjnaek,gou roxnyinh miznaj,docih vuengzaen."
         Vuengzdaeq cam:"Mwngz aeu daiq geijlai bingmax,geijlai boux ciengq?"
        Diz Cingh naeuz:"Cingj hawj fanh gizbingh he youz gou caulienh.Dingq gangj Nungz Cigauh baiq cungj caenh he,gaenj lumj singzciengz,saedsaeh nanz dwk,gou naemj,bubingh hoenx mbouj hinhz,gizbingh gojnaengz hoenx ndaej hingz."
        Vuengzdaeq naeuz:"Ndei ba,couh hawj mwngz fanh gizbingh he,bubingh lij aeu geijlai?"
       Diz Cingh naeuz:"Nungz Cigauh miz song fanh bingmax,gou hab miz ngeih cib fanh,cib boux dingj boux,itdingh ndaej hingz."
        Vuengzdaeq naeuz:"Gingsingz miz bet cib fanh bingmax,gak dieg caemh cap miz bingmax,youz mwngz diuh aeu ba."
        Diz Cingh naeuz:"Mbouj ndaej yungh bing baihbaek,vunz baihbaek bae baihnamz diegmanz,dingj mbouj ndaej hwngqndat,yungzheih lah bingh,caiqgangj roen gyae vunz baeg haeuxliengz yunghliengh daih,mbouj habsuenq.Ceiq ndei bae Huznanz diuh bing,gizhaenx dep soeng Gvangj,dienheiq ngamj."
         Vuengzdaeq naeuz:"Diuh bing genj ciengq,youz mwngz dingh ba.Bingmax gaxgonq baij bae dwk Nungz Cigauh haenx,cungj gyau mwngz guenj.Bae ba!"
        Diz Cingh lij gvih youq gwnz deih,mbouj haengj hwnj.
        Vuengzdaeq cam:"Mwngz lij miz maz saeh?"
        Diz Cingh naeuz:"Vuengzsiengh mbouj gvaiq coih gou,cij gamj gangj."
        Vuengzdaeq naeuz:"Gou mbouj gvaiq mwngz,gangj ba."
        Diz Cingh naeuz:"Doenghbaez okbing,cungj miz vuengzcaen guekcik gaen bae.Gou baez neix okbing,loh gyae,Nungz Cigauh youh haemq guengz,hoenxciengq itdingh gig haenq.Vih  neix,vuengzcaen guekcik couh gaej bae riengz lo,saeklaeuq miz byawz oksaeh,gou damqdang mbouj hwnj ha!"
        Vuengzdaeq riuriu naeuz:"Mwngz cuengqsim,gou mbouj cinj vuengzcaen guekcik bae nyau mwngz,hawj mwngz boux ndeu guhcawj,byawz mbouj dingq lingh,sien gaj caiq bauqlwnh."
        Diz Cingh docih ok dienh,youq Gingsingz geij ngoenz,genj aeu ciengq ak song bak lai vunz,yienzhaeuh daiq fanh gizbingh he ganj bae Danzcouh(neix Cangzsah Si),caeuq Siz Cenzbinh ,Sunh Menj ,Yiz Cing itheij diuh bing ngeih cib fanh,heuh Yangzgyahciengq Yangz Vwnzgvangj guh sienfung,Sunh Cez guh cojcienghginh,Gyaj Gveiz guh youcienghginh,Cangh Yi guh dezgiz cienghginh,dingh saedceij hai roengz Guengjsae.
        Seizhaenx,Nungzginh gaenq bae daengz Gveicouh(neix Gveilinz) baihnaek,Nungzginh song fanh caeuq Soengqginh ngeih cib fanh doiqdingj,binglig doxbeij cngca ndaej gyae.Nungz Cigauh heuh Vangz Swhmi ,Vangz Veij daeuj doxyaeng le,gietdingh swnh Soengqginh daihdoih liz Gveicouh lij gyae,yien sienfung Yangz Vwnzgvangj sien roengzdaeuj,yaeuh de liz daihdoih gyae bae,Yangz Vwnzgvangj bingmax mbouj gaeuq fanh he,Nungzginh cix miz song fanh,bienq nyieg baenz giengz,miz bajaek hoenx ndaej hingz Yangz Vwnzgvangj.
        1052 nienz ndwencib ndawcib,Nungzginh caeuq Soengqginh doxbungz.Haidaeuz,Vuj Hwzli hoenx Yangz Vwnzgvangj,song mbiengj hoenx gvaq haj cib doengh,mbouj faen saw hingz,gag roq gyong sou bing.Ngoenz daihngeih,Yangz Vwnzgvangj okbing daeuj ra,hoeng Nungzginh gaenq beuj yingz bae lo.Yangz Vwnzgvangj riu naeuz:"Gyoengq caeg neix mbei baenz iq,lienz haemh ndot deuz lo."
        Yangz Vwnzgvangj caeuq dahnuengx de Yangz Vwnzyenz(Yangz Betcej) daiq bing gyaep bae,gvaq Gveicouh caiq byaij ngeih cib leix,youq Ngeihdangz youh bungz raen Nungzginh,daj gyae yawj bae,Nungzginh yingzbuenz rangh dam rangh,benq lienz benq.Yangz Vwnzgvangj soqlaiz siujsim yungh bing,mbouj lumj Ciengj Gaih ,Cangh Cungh moegloet guengzgve.De heuh bingdoih cap maenh yingzbuenz,lai baij sauq geng,gaenjmaed bajsouj fuengzre Nungzginh daeuj guk.
        Yangz Vwnzgvangj caeuq Yangz Betcej benz hwnj aen ndoi iq he,daj gyae muengh yawj yingzbuenz Nungzginh,cij raen bungzciengq cingjcingj caezcaez lied baenz lied,hangz baenz hangz,ndaw yingz sauqbing baedauq mbouj duenh,daengx aen yingzbuenz couh dwg aen caenh he,baenaj gung ndaej,doiqlaeng souj ndaej.Yangz Vwnzgvangj danq gaemz heiq he naeuz:"Dangh ndaej Nungz Cigauh daeuj daeuz Soengq,fung de guh guen,yawz you bien'gyaiq mbouj onj?Nungz Cigauh geij baez hwnj saw soengq laex,iugouz gvihaeuj daih Soengq,ciuzdingz vih maz mbouj coengz,bik de fanj ne?"
        Yangz Betcej naeuz:"Mwngz dwg bingznamz sienfung,dwg daeuj dwk Nungz Cigauh,guh maz dauq bang de gangj vah ndei lune?"
         Yangz Vwnzgvangj naeuz:"Mingzhlingh mbouj ndaej mbouj coengz,dauhleix mbouj ndaej mbouj gangj.Raeuz Yangzgyah gvihaeuj daih Soengq,gwnzlaj cungj haenh ndei;ngoenzneix Nungz Cigauh siengj gvihaeuj daih Soengq cix mbouj ndaej,fanj deng dwk dem,baenzlawz doeng dauhleix ne?"
         Yangz Betcej naeuz:"Binggya doxhoenx,gag vih bouxcawj,byawz deng byawz loek,gven Yangzgyah gijmaz,mwngz naemj lailai lo."
       Yangz Vwnzgvangj naeuz:"Mwngz gangj deng dingz he.Raeuz Yangzgyahciengq mingzmuengh sang,sien dwg miz ngeihheiq,yienzhaeuh cij dwg goengfou ak miz geiqmaeuz.Guh vunz aeu gangj ngeihheiq daih'it."
         Yangz Betcej naeuz:"Mwngz gangj gij vah neix,hawj vunz dingqnyi,ciuzdingz gvaiq coih bw."
         Yangz Vwnzgvangj riumbwq naeuz:"Gou saenq mwngz mbouj lwnh vunz,cij gamj gangj ne.youq baihnaj vunzlai,louz vah naeuh ndaw dungx suenq lo."
         Seizhaenx,miz vunz hwnj ndoi daeuj bauq:Nungz Cigauh baij vunz soengq sawsaenq daeuj.
         Yangz Vwnzgvangj caeuq Yangz Betcej dauqma daengz ndaw yingz,ciep raen Nungzginh bouxsoengqsaenq Nungz Civei.Yangz Vwnzgvangj ciep aeu sawsaenq,mboujyouz doeg ok sing daeuj:"......ngoenzcog saenzseiz baij caenh diemj mingz doxhoenx,Nungzvuengzcej Veiz Sifung hoenx Yangz Betcej,Nungzvuengz Nungz Cigauh hoenx sienfung Yangz Vwnzgvangj......ranz Nungz cejnuengx lingxgyauq ranz Yangz gonuengx goengfou......"Yangz Vwnzgvangj ndawsim naemj:Sij ndaej maqhuz hekheiq.
         Yangz Vwnzgvangj yawj sawsaenq sat le,cam:"Veiz Sifung geiqyienz dwg Nungzvuengzcej,vih maz mbouj singq Nungz?"
        Nungz Civei naeuz:"Neix dwg baiqgeiq.Bouxcuengh fungsug,nyinh guh geiq le,beij caen beixnuengx lij caen."
        Yangz Vwnzgvangj ngaekngaek gyaeuj,dawz bit bae cih,gyau hawj Nungz Civei,caenndang soengq de baema.Yangz Vwnzgvangj dauqma ndaw yingz,ndaw sim hot saeh naemj mbouj doengingq vunz riu naeuz Nungz Cigauh dwg vunzmanz,mbouj gangj dauhleix,hoeng de roengz bingsaw iu doxhoenx,dauq lumj dwg daeuj hawsim gouzgyauq nei.Roxnaeuz,ndaw neix miz gijmaz geiqmaeuz......Yangz Vwnzgvangj guh vunz cungj siujsim sisi,naemj baenz byongh lai hwnz,dauqdaej naemj mbouj doeng,cijndei ndaep daeng ninz.
         Haemhneix,ndaw yingz Nungzginh,daeng ronghsagsag.Nungz Cigauh hawj gyoengq bouxciengq baenbaij ngoenzcog baenzlawz hoenxciengq:"Ranz Yangz yahmaiq gaeuq lai lo,ngoenzcog hoenxciengq gaej aeu gyaeuj Yangz Vwnzgvangj lo,mboujne,vunz lajmbwn couh ndaq raeuz mbouj miz liengzsim,Yangz Betcej bonjsaeh bingzbingz,dahcej dwk saw de mbouj nanz,cingj dahcej re bakcax di.ngoenzcog dwg beij vifung,dwk baih Yangzgyahciengq,Soengqginh couh simyup lo.Yangz Vwnzgvangj saw le itdingh mbouj fug,itdingh ra raeuz caiq hoenx,baezlaeng,couh ndaej yungh geiq gaemhlix de.dauqdaej baenzlawz gaemhlix,daiqhaeuh lingh miz geiqmaeuz ndei."
         Gyoengq ciengq cungj yawj coh Daxnungz,Daxnungz riu naeuz:"Raeuz naengj haeuxnaengj,danghnaeuz biengj fa caeux lai,haeuxnaengj couh ndaen.Baenzlawz gaemhlix Yangz Vwnzgvangj,daengz seiz caiq gangj ba.Sifung,byalwgnyez lij miz geijlai duz?"
        Veiz Sifung naeuz:"Lij miz sam duz."
       Daxnungz naeuz:"Haetcog cawj duz he hawj mwngz caeuq Cigauh gwn bae hoenxciengq.Lw song duz,duz he gaemhlix Yangz Vwnzgvangj le caiq gwn,duz he caj dwk baih Diz Cingh le cix gwn."
       Veiz Meijsenh nyaenx mbouj ndaej naeuz:"Haetcog hawj gou caeuq Nungzvuengz bae hoenx,song gvanbaz hoenx ranz Yangz song beixnuengx."
       Daxnungz naeuz:"Ciuq gangj mwngz bonjsaeh beij Sifung ak,hoeng lau mwngz loek sieng vunz mingh,lij dwg Sifung bae ba."
        Nungz Gencungh naeuz:"Nungzvuengz dwg bouxdaeuz,mbouj hab caenndang bae hoenx,hawj gou bae hoenx Yangz Vwnzgvangj ba."
        Nungz Cigauh naeuz:"Cejfou gaej you,gou danghnaeuz hoenx mbouj gvaq Yangz Vwnzgvangj,couh mbouj hab dang Nungzvuengz lo."
       Nungz Gencungh naeuz:"Gou mbouj dwg nyaenx gangj,gou dwg naeuz,daihvuengz bae hoenx Yangz Vwnzgvangj,dwg aeu naq nyingz nengznyaen,hawj Yangz Vwnzgvangj miznaj ne."
        Daxnungz riu naeuz:"Sou gaej ceng dem,yawj de dwg Yangzgyahciengq,couh hawj de baez naj he ba,lij dwg Cigauh bae.Caiq gangj naeuz roengz bingsaw gaenq gangj ndei,vuenh vunz bae hoenx couh mbouj miz saenqyungh."
       Haetlaeng romhromh,Nungzginh caeuq Soengqginh youq gwnz baq lied caenh doxdoiq,roq gyong rumrum,sing rwenz seiqlengq.Nungz Cigauh daenj mauhhang,daenj buhlungz,gaem caxmbat,fad max hwnjbae,heuh naeuz:"Cingj Yangz cienghginh daeuj vei!"
        Yangz Vwnzgvangj daenj buhgyapdiet mauhhangmong,gwih maxhau,dawz nangx okdaeuj naeuz:"Bingznamz sienfung Yangz Vwnzgvangj youq neix.Nungz Cigauh!Mwngz lij mbouj vaiq di douzyangz!"
       Nungz Cigauh riu naeuz:"Yangz cienghginh dwg dangdaih mingzciengq,baenzlawz yienghneix mbouj rox dauhleix?Gou sam baez haj baez hwnj saw gouz haeuj daih Soengq,cij dwg vuengzdaeq mbouj cinj,bik gou mbouj miz loh byaij,cijndaej cauhfanj!Ngoenzneix,gou lij mbouj bienqsim.Danghnaeuz mwngz ndaej bang gou bae bauqlwnh ciuzdingz,fung gou dang Yunghgvei cezdusij,gou couh banbing baema,mwngz gangj ndei mbouj ndei?"
        Yangz Vwnzgvangj itseiz mbouj rox han,de rox,bihaenx Siuh Gu vih bang Nungz Cigauh gouz ciuzdingz deng gwnvi gvaq.Seizneix danghnaeuz caiq bang de,haengjdingh hix deng gwnvi.Vuengzdaeq dwg heuh daeuj dwk,mbouj dwg heuh daeuj ciu,caeuq vuengzdaeq doiqdingj mbouj ndaej ha!Yangz Vwnzgvangj naemj daengz neix,couh hat naeuz:"Nungz Cigauh!Neix dwg hoenxciengq,mbouj dwg dajcux.Doxhoenx aeu nangx gangjvah,yawj nangx!"Gangj le fad max gingz nangx gvaqdaeuj.
        "Daeuj vei!"Nungz Cigauh dingiuj baez ndok maxhoengz,yaengx cax hwnjbae.Nungz Cigauh  daenj ndaem caeb ndaem,Yangz Vwnzgvangj daenj hau caeb hau,ndaem hau doxhoenx,daegbied yienjda.Boux neix yangx cax bae bag,hwnj rumz fwdfwd,boux haenx gingz nangx baez nyoeg,da yawj cungj va;cax nangx doxbungq,lwgfeiz yapmyub,song max doxsae,hap bya hap rungh.Hoenx ndaej sam cib doengh,Nungz Cigauh hoenx ndaej hwnjyinx,yied hoenx yied mangh;Yangz Vwnzgvangj goengfou suglienh,yied hoenx yied rengz.Haenq hoenx haj cib doengh,nanz faen saw hingz.
       Yangz Betcej lauheiq daeggo saw bae,lienzmuengz fad max hwnjbae bang hoenx.Veiz Sifung fad max bongh ok,yiet suengdau laengz Yangz Betcej.Song boux mehmbwk yinghyungz,caez yungh suengdau,cungj gwih maxhoengz,doengz daenj buhndaem,song mbiengj mwngz vaiq gou riengj,miz seiz caen yawj mbouj ok byawz dwg byawz.
        Song fueng sing gyong goksad,bouxboux bang hemq gokdum.Bya saenq deih doengh,sawj vunz rwznuk dava.Yangz Betcej caeuq Veiz Sifung goengfou cengca mbouj lai,bonjsaeh gag miz gag giengz.Hoenx daengz sam cib doengh,Veiz Sifung guj nanz ndaej hingz,daegdaengq cang saw buet deuz,Yangz Betcej fad max gyaep hwnj,Veiz Sifung yawj ndaej cingcuj,nyeux gyaeuj baeuh ok caghongx,Yangz Betcej baez doeksaet,vuengmuengz laeg cagmax,boemz ndang roengzdaeuj,caghongx hongx deng baihlaeng,danghnaeuz mbouj boemz gyaeuj,couh hongx dawz lo,caen yiemj ha.Yangz Betcej hwk ok ndang hanh he,sikhaek cienq max doxdauq.Veiz Sifung gaenjgaenj gyaep hwnj youh baeuh caghongx gvaqbae,Yangz Betcej simvueng fwngzluenh,buekmingh diuq roengz max,cij ndaej ndoj gvaq caghongx.Seizhaenx,Soengqginh bongh ok sam boux ciengq,henhoh Yangz Betcej buet deuz.Veiz Sifung cix sou caghongx,doiq Yangz Betcej naeuz:"Baezlaeng caiq daeuj vei!"Yangz Betcej youh huj youh nyaenq,haeb heuj naeuz:"Dahmanz!baezlaeng aeu gaj dai mwngz!"
       Baihneix gaenq faen saw hingz,baihhaenx lij hoenx ndaej nanz faen nanz gej.song duz max bal gaenq ok fugfauz,song boux ciengq lumj lij caengz gvaqyinx.Nungz Cigauh cingsaenz gvaekgvaek,caxmbat vuet hwnj bag roengz;Yangz Vwnzgvangj vifung mbouj gemj,foux nangx bienqvaq mbouj duenh.Baihneix Nungzginh boux vih Nungz Cigauh simdiuq,baihhaenx vunzvunz vih Yangz Vwnzgvangj conh hanh,Hoenx daengz baenz bak doengh,Nungz Cigauh daegdaengq cuengqsoeng,Yangz Vwnzgvangj gingz nangx fwt baek,Nungz Cigauh baez nyeng ndang,nangx cat gvaq lajeiq,Yangz Vwnzgvangj mbouj daezsuengz deng baek hoengq,max daiq vunz roemx gvaq henz ndang Nungz Cigauh.Nungz Cigauh da raeh fwngz riengj,iet fwngz beng dawz Yangz Vwnzgvangj buhbuengz,Yangz Vwnzgvangj mbei baez mboek,nyeux gyaeuj yawj dauqlaeng,Nungz Cigauh gaenq dawz buhbuengz de angqbupbup bae lo.Nungzginh angq hemq goksasa.
       Yangz Vwnzgvangj hemq naeuz:"Nungz Cigauh!Ngoenzcog caeuq mwngz giet saw hingz!"
       Nungz Cigauh han naeuz:"Mwngz gaej hozndat,ngoenzcog boiz buhbuengz hawj mwngz!"
       Yienghneix,song mbiengj sou bing dauq,a lo.
                    (caengz sat,caj swnj)

回复

使用道具 举报

223

主题

2

听众

8581

积分

贵宾

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2016-3-13
注册时间
2002-10-28
发表于 2005-1-22 21:45:00 |显示全部楼层
Ngoenz daihngeih,Soengqginh okdaeuj baiz caenh,hoeng cix mbouj raen Nungzginh okdaeuj.Yangz Vwnzgvangj baij vunz bae damq,laxlawz Nungzginh gaenq deuz lo,ndek benq yingz hoengq ndeu.Laeng yingz,buhbuengz Yangz Vwnzgvangj venj youq gwnz dat,mbinyagyag lumj mbaw geizhau he.
       Yangz Vwnzgvangj heiq ndaej bwt yaek fan,haeb faenz haeb heuj naeuz:"Nungz Cigauh!couh suenq mwngz buet daengz dinmbwn bae,gou hix aeu gyaep dawz mwngz,mbouj gaemh mwngz mbouj gaij haemz!"
       Yangz Vwnzgvangj lienzseiz heuh buen yingz hwnjdin,ganjgaep bae gyaep Nungz Cigauh.
       Seizneix,Nungz Cigauh daihdoih bingmax gaenq baiz doih cingjcingj caezcaez hai roengz baihnamz.Byaij Yungjfuz,gvaq Luzcai,gung haeuj Liujcouh.Hai cang faen haeux,ok buengj lwnh beksingq:Nungzginh yaek youq Liujcouh caeuq Soengqginh buek saw hingz,hoenxciengq fouzcingz,caihux nanz liuh,muengh beksingq buen haeux buen doxgaiq bae lajmbanj ndoj,saek yiengh cungj gaej louz youq ndaw singz.Beksingq raen buengj le,lienzseiz gip doxgaiq daiq lwgyah,cienzbouh buen roengz lajmbanj,yienghneix,Liujcouh daengx singz hoengqhanghang,ra naed haeux he roengz rek hix mbouj miz.
       Liujcouh dieg neix gig ndei hoenxciengq,Liujgyangh lumj faj gung nei,heux gvaq singz sam mienh,aen singz couh youq gungx laeng gung,danghnaeuz daj baihbaek veh diuz sienq he,couh dwg faj gung he lo.
       Nungz Cigauh yawj ndei giz neix cap roengz bingmax,nda ndei caenh,cij caj Yangz Vwnzgvangj daeuj.Mbouj geij ngoenz,Yangz Vwnzgvangj daiq caet cien bingmax daeuj daengz rog singz,lij caengz ndaej ndwn maenh,sing bauq fwt rwenz hwnjdaeuj,seiqlengq bogfeiz hoenghfwd,Nungzginh daj seiqfueng betbaih hemq gaj huhu cung daeuj,lumj raemxrongz,lumj fai lak,byawz raen cungj saenz.Soengqginh dingj mbouj ndaej,cijndei baih haeuj singz bae ndoj.Yangz Vwnzgvangj raen dwg singz hoengq,cix rox hwnjdangq lo,deng Nungz Cigauh yaeuh roengz daeh lo.De heux singz byaij gien he,raen sam mienh dwg dahhung,cij miz baihbaek miz roen,hoeng youh hawj Nungz Cigauh souj maenh lo.Yangz Vwnzgvangj danqheiq naekgywd naeuz:"Dangnienz Cuhgoz Lieng yungh hoengsingzgeiq,cix naengz hwk Swhmaj Yij,mbouj caengz hawj de ciengq dai bing baih;ngoenzneix Nungz Cigauh yungh hoengsingzgeiq,cix hawj gou haeuj diegcied lo.Mbwn ha,gou Yangzgyahciengq soqlaiz caensim bauqguek,nanzdauh baez neix okbing miz loek,yaek fad gou ma?"
       Caet cien Soengqginh deng humx youq ndaw singz,naed haeux ndeu mbouj miz,baij vunz dauqcawq bae ra,ranzranz seuq dangq raemx riengx.
       Yangz Vwnzgvangj sim gip dangq feiz coemh,caet cien faj bak mbouj miz doxgaiq gwn,de coengzlaiz mbouj raen gvaq.De sikhaek roengzlingh,mboujguenj gijmaz,cijaeu gwn ndaej cungj gwn.De byaij okbae,heuh vunz yien duz max de daeuj,de sim naekgywdgywd bae lumj coengmax,ngeix daengz ciuhvunz neix duzmax buenx de mbouj rox hoenx gvaq geijlai cienghhaenq,roemx gvaq geijlai gvanyiemj,ngoenzneix......de menhmenh yut ok nangx,laep maenh song da,song fwngz saenzdigdig,sawqmwh,de simcieg hat sing ndeu,baknangx baek haeuj conghhoz duzmax bae,duzmax dinnaj baez bag,hepratrat sae sing ndeu,rub laemx roengz deih.Yangz Vwnzgvangj dawz nangx baez vid,baiqniegnieg gangj mbouj ok vah.
       Ngamq song ngoenz,Soengqginh dawz max gwn seuqsat lo.
       Seizneix baihnaj Soengqginh cijmiz sam diuz lohouzyangz,daiiek,cung okbae.
       Yangz Vwnzgvangj baenzlawz hix mbouj hawj douzyangz,daiiek hix mbouj simgam,cijmiz cung okbae.
       Yangz Vwnzgvangj daiq bing cung gvaq geij baez,hoeng  gyoengq bing bouxboux iek ndaej gyaeuj ngunh da raiz,baenzlawz miz rengz cung dem?
        Doeklaeng,miz goenggeq he daeuj lwnh Tangz Vwnzgvangj,naeuz miz conghgamj he doeng gvaq daejdah,ndaej bae daengz Byaanmax.Yangz Vwnzgvangj dingq le gig angq,couh riengz bouxgeq bae yawj bakgamj.Bakgamj gaenq deng fung gvaq,Yangz Vwnzgvangj heuh vunz geuh hai,cij raen ndaw gamj laepngaungau,couh heuh geij boux bing roengzbae damq.
        Bingdamq diemj bogfeiz roengz gamj,haidaeuz loh haemq ndei,dieg hix sauj,yied roengzbae dieg yied cumx,daihgaiq bae daengz daejdah,lajdin raemx dumx daengz gahengh,dingj gyaeuj raemx ndikswgswg,hamj gvaq raemx le,loh ciemhciemh lingq doxhwnj,dieg youh sauj lo,caiq byaij baenaj,couh raen rongh raen mbwn,caen daengz bakgamj lo.Bingdamq rwenz ok bakgamj,yawjyawj seiqlengq,mbouj raen miz Nungzginh,caiq muengh bae gyae,gek dah caen dwg singz Liujcouh dahraix.
      Gizsaed,ndaek bingdamq haenx ngamq loh ok bakgamj,couh hawj Nungzginh sauqbing yawjraen lo.
      Bingdamq dauqma le,dawz cingzgvang itit ngeihngeih lwnh hawj Yangz Vwnzgvangj.Yangz Vwnzgvangj dingq le angqbupbup bae,nyaenx mbouj ndaej hemq naeuz:"Mbwn bang gou ha!Saenz bang gou ha!"
       Yangz Vwnzgvangj caegcaeg roengzlingh,doengxhaemh ndonj gamj ok singz.
       Buenqhwnz samgeng,Yangz Vwnzgvangj daiqdaeuz roengz gamj,gyoengq bing riengz laeng boux gaen boux byaij.Miz bingdamq daiqloh,gig vaiq couh bae daengz Byaanmax lo.Byaij ok bakgamj,ngiengx gyaeuj baez yawj,gwnz mbwn ronghndwen ronghsagsag,seiqcawq caemrwgrwg.Yangz Vwnzgvangj byaengq da yawj seiqlengq,daengj rwz dingq betbaih,yaemj din ndij roen roengz bya.Gyoengq bing gaenjgaenj riengz de.Byaij daengz din bya,cijraen go faex sang he venj miz naj baengz ciengh lai raez he,gwnz baengz sij miz geij cih hung,daj gyae yawj mbouj congcuj;Yangz Vwnzgvangj yamq daengz gyawj,geij cih saw yienh haeuj lwgda:"Yangz Vwnzgvangj youq neix deng gaemh!"Mbwn ha,youh haeuj hongx Nungz Cigauh lo!Yangz Vwnzgvangj najheu mbeidoek,ngamqngamq hemq "doiq baema",song din lij caengz cienq gvaqbae,daj gwnz go faex vanq roengz fan muengx he daeuj,daj gyaeuj daengz din dawz de soemq hwnjdaeuj lo.Nungzginh faenfaen daj gwnz gofaex diuq roengzdaeuj,daj seiqlengq ndaw haz ndaw faed bongh okdaeuj,hemq gaj goenjdien,dawz Yangz Vwnzgvangj cug hwnjdaeuj.Byaij ok bakgamj bak lai boux Soengqginh hix deng gaeb lo.
    Vuj Hwzli gyaiq Yangz Vwnzgvangj bae raen Nungz Cigauh,Nungz Cigauh riu naeuz:"Ndei ha,cingj de haeujdaeuj ba,gou senq nda laeujnoh caj de ne!"
    Vuj Hwzli okbae daiq Yangz Vwnzgvangj.Nungz Cigauh doiq Daxnungz naeuz:"Daxmeh caen dwg liuh saeh lumj saenz,danghnaeuz Yangz Vwnzgvangj heuh vunz byaij doekgonq,raeuz couh gaemh mbouj ndaej de lo."
    Daxnungz naeuz:"Yangzgyahciengq soqlaiz haengj hawj baihlaj guhyiengh,daegbied youq youqgaenj gvandaeuz,de haengjdingh aeu byaij doekgonq."
    Yangz Vwnzgvangj gyaiq daeujdaengz le,Nungz Cigauh caenfwngz hawj de gej cag,boizlaex naeuz:"Cienghginh yienzliengh gou yienghneix cingj mwngz daeuj,song mbiengj doxdingj,saedsaeh mbouj ndaej mbouj yienghneix ha.Cingj naengh!"
    Yangz Vwnzgvangj mbouj naengh,riunyaen naeuz:"Meuz gaeb nou,hozbiet sien saj guhcaemz caiq gwn ni.Yaek gaj mwngz couh gaj ba!"
    Nungz Cigauh naeuz:"Gou danghnaeuz yaek gaj mwngz,hix mbouj caj daengz ngoenzneix,ngoenz haenx caeuq mwngz cax nangx doxhoenx,gou dued buhbuengz mwngz seizhaenx bonjlaiz couh ndaej mbat cax he raemj mwngz lo,hoeng gou mbouj raemj,mwngz rox dwg vih maz lwi?Ranz Yangz sou yahmaiq gaeuq lai lo,gou mbouj nyienh raen yah mwngz hix souj maiq.Gou gig gingqcungh Yangzgyahciengq.Gou mbouj siengj gaj mwngz,cix siengj cingj mwngz bang guh gienh saeh he,Soengqciuz gou cij saenq sou Yangzgyahciengq,bouxwnq caiq mbouj miz byawz saenq ndaej dem lo."
    Duenh vah neix gamjdoengh le Yangz Vwnzgvangj,de naengh roengzdaeuj ,cam:"Miz maz saeh heuh gou bang ha?"
    Nungz Cigauh naeuz:"Gienh saeh neix geij ngoenz gonq gou gaenq caeuq mwngz gangj gvaq lo,mwngz lij geiq ndaej lwi?"
    Yangz Vwnzgvangj cam:"Dwg gvihaeuj ciuzdingz gienh saeh haenx?"
    Nungz Cigauh naeuz:"Cingq dwg.Codaeuz gou gouq gvihaeuj ciuzdingz,ciuzdingz mbouj hawj,gou couh fanj lo.Daj hwnjbing daengz neix,gou caengz hoenx saw gvaq.Seizneix gou lij siengj gvi Soengq,saw senq hix sij ndei lo,mwngz siengj banhfap soengq bae daengz ndaw fwngz vuengzdaeq bae."
    Yangz Vwnzgvangj roxnyinh veiznanz,naeuz:"Mwngz geij baez gouz gvi Soengq,geij baez mboujdanh mbouj ndaej cinj,geij boux bang mwngz soengq saenq haenx dauq deng ceih coih dem,mwngz hozbiet heuh gou byaij lohgaeuq ne?"
    Daxnungz naeuz:"Baez neix mbouj doengz baez gonq,couh suenq dou dawz mwngz dangzguh vunzcaet,bik dahnuengx bae soengq saenq,yienghneix couh mbouj ngaih mingzmuengh sou ranz Yangz lo,yawzyiengh?"
    Yangz Vwnzgvangj naeuz:"Aen cawjeiq neix ndei,gou sij saenq heuh nuengx gou bae guh,dawz sawsaenq sou soengq hawj Diz yenzsai,caiq youz Diz yenzsai soengq bae hawj vuengzdaeq."
    Nungz Cigauh naeuz:"Ndei!Couh yienghneix banh!"
    Yangz Vwnzgvangj cam:"Danghnaeuz vuengzdaeq cinj le,gijmaz cungj ndei banh lo;danghnaeuz youh lumj gaxgonq nei mbouj cinj,yawz lu?"
    Nungz Cigauh naeuz:"Gizsaed gou hix liuh daengz,mbouj cinj cingzdoh lai dem.Hoeng neix dwg sim gou,youz daih laeng bae lwnh ba.Mwngz youq baihbaek,gou youq baihnamz;mwngz dwg Bouxgun,gou dwg Bouxcuengh,dwg ba?Mwngz gou minzcuz mbouj doengz,hoeng cungj dwg youq benq dieg neix,cungj dwg caemh aen guek he,cungj aeu doxbang doxbaengh,caen lumj aen ranz he,doengzcaez fanzyungz hwngvuengh cij baenz.Cau Cwnh mbouj hawj gou gvi Soengq,gou couh hawj de mazfanz,hawj de naengh vih mbouj onj.Gou gawjbing cauhfanj,hix dwg lwnh de rox,minzcuz yungzhab dwg cingqsoq,dwg daihsaeh.Dangh laihnaeuz gou cauhfanh dwg vih guh hak dang guen,neix couh loek lo.Dangh gou siengj dang hak,gou youq Co-Yougyangh laeb guek dang vuengz mbouj engq vifung ma,yawz bae gouzbaiq de Cau Cwnh?Danhseih,veh bya veh rungh,gag laeb gag fung,doiq Bouxcuengh hwngvuengh mbouj leih,doiq hen guek bauj gya mbouj leih.Gyauhcij fung gou guh Daibauj,dwg itbinj guen,suenq hung luba,hoeng gou mbouj dang,mboujne,couh dwg dawz cojcoeng caeuq dieg Bouxcuengh minzcuz doj saw bae lo.Baezneix dangh Cau Cwnh caiq mbouj cinj,de gamj gven dou laengz dangj minzcuz yungzhab,gou couh  gamj aeu gyaeuj bae dongj aen dou neix hai bae,Nungzginh cij miz aeu lwed daeuj hoenx daengzdaej,aeu lwed daeuj heuh singj sim vunz lajmbwn!Ngoenzneix ciuzdingz ndaq gou guh caeg,gou dajsuenq hawj gyoengqde ndaq cienfanh bi.Danhseih minzcuz gou mbouj ndaq gou,beksingq lajmbwn aeu dauhleix haenx mbouj ndaq gou,gou couh sim'an lo.Yangz cienghginh,doengh boux dang guen guh hak haenx,ciengzciengz lwgda hwnj youq najbyak,yawj mbouj raen baihlaj,yawz mbouj yawj loek famh loek ne!"
    Duenh vah ndaw sim neix,sawj Yangz Vwnzgvangj gig gamjdoengh,de ndwn hwnhdaeuj,sax fwngz naeuz:"Bouxdaeuz,ngoenzneix gou cij suenq rox sim mwngz.Gaxgonq cij dingq naeuz mwngz dwg......gaj vunz mbouj laep da----yiezliengh gou gangj vahsoh mbouj ndei dingq.Siengj mbouj daengz cix dwg boux vunz simgvangq aek langh ndeu,rox dauhleix,miz ngeihheiq,goengfou ak.Gou baezneix mbouj dai,suenq yiemq mwngz diuz mingh he,ngoenzlaeng itdingh aeu bauqdap."
    Daxnungz naeuz:"Yangz cienghginh,mwngz geij ngoenz mbouj ndaej gwn imq luba?haemhneix gou cingj mwngz gwn byalwgnyez."
    Yangz Vwnzgvangj naj fwt bienq:"Gijmaz?Cingj gou gwn noh lwgnyez?Bouxlaux!Ndaw Ging cij riuz naeuz mwngz ngoenzngoenz gaj laeq lwgbyez he gwn,dahraix ho.Haemhneix mwngz gingqyienz heuh gou buenx mwngz gwn noh vunz!"
    Daxnungz hix mbouj gvaiq de,riu naeuz:"Mwngz hix saenq cungj vah neix,laihnaeuz gou ngoenzngoenz gwn noh lwgnyez?"Daxnungz byaij bae henz daiz,gwenj fa hwnjdaeuj,vad fwngz heuh Yangz Vwnzgvangj.Yangz Vwnzgvangj byaij gvaq bae,Daxnungz vix byaek gwnz daiz naeuz:"Mwngz yawjyawj,neix dwg byalwgnyez,mbouj dwg noh lwgnyez hane."
    Yangz Vwnzgvangj yawj cingcuj le,cix riu naeuz:"Yienzlaiz dwg dawz byalwgnyez riuz baenz noh lwgnyez bae lo.Luenh vab,cienz dwg luenh vab!"Raen daiz byaek neix youh hom youh feih,Yangz Vwnzgvangj dungx iek ndaej heuh goggog lo.
    Nungz Cigauh naeuz:"Mwngz yawj cingcuj le,couh naengh gwn ngaiz ba!"
    Daxnungz ,Nungz Cigauh caez buenx Yangz Vwnzgvangj gwn ngaiz,Yangz Vwnzgvangj dungx iek lai,daiz byaek haenx ca mbouj lai hawj de gwn seuq lo......
      Gwn imq le,Yangz Vwnzgvangj couh hawj Yangz Betcej sij saenq,lienz doengz sawsaenq Nungz Cigauh itheij gyau hawj bouxlajfwngz Yangz Vwnzgvangj,heuh de ndonj gvaq congh gamj soengq bae ndaw singz,gyau hawj Yangz Betcej,youz de cienq bae hawj Diz Cingh,heuh Diz Cingh dawz cawjeiq.

回复

使用道具 举报

223

主题

2

听众

8581

积分

贵宾

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2016-3-13
注册时间
2002-10-28
发表于 2005-2-4 22:04:00 |显示全部楼层
cibbet. Meh Lwg Ging Yungh Bing 十八、姆勒啨用兵
    Diz Cingh ciep ndaej sawsaenq le,roxnyinh saeh youqgaenj,mbouj gamj guhcawj,ganjvaiq heuh vunz gip soengq bae hawj vuengzdaeq.Diz Cingh sikhaek minghlingh Soengqginh daihdoih ganj bae Liujcouh,swnh Nungz Cigauh caj vuengzdaeq hoizvah mbouj gamj luenh doengh seiz,sien hawj Liujcouh gaijveiz,gouq ok gyoengq bing deng humx haenx caeuq Yangz Vwnzgvangj doengh deng gaeb haenx.
     Diz Cingh suenq cai deng lo,Nungz Cigauh itcig caj vuengzdaeq hoizvah,doiq Liujcouh cij humx mbouj gung,daih Yangz Vwnzgvangj hix gig ndei,gwndaenj cungj miz vunz dakdaih ciuqgoq.
    Diz Cingh yungh bing gig miz geiqmaeuz,Soengqginh bik gaenh Liujcouh,bing faen song lohoh he cig bae gouq Yangz Vwnzgvangj;loh he gukhoenx doengh bing humx Liujcouh haenx,gouq ok Soengqginh.Soengqginh daeuj ndaej gig vaiq,vunz youh lai.Nungzginh bing noix dingj mbouj gvaq,cij ndaej doiq liz Liujcouh,doq hoenx doq doiq roengz baihnamz,itloh binglig mbouj sied,vifung mbouj gemj.Youq Binhcouh lij hoenx ndaej daih hingz.
    Nungzginh youq Binhcouh mbouj dingz,laebdaeb roengz baihnamz,byaij daengz Gunhlunzgvanh,Nungz Cigauh raen ndoi daengj gvan yiemj,couh louz Nungz Civei daiq ci bingmax he hensouj.Nungz Cigauh daiq daihdoih bingmax dauq daengz Yunghcouh.Seizhaenx souj Yunghcouh Soengqciengq dwg Sung Gwzlungz,de raen Nungzginh ma daengz,mbouj gamj dingj,lienz haemh daiq lwgyah buet deuz lo.Ndaek Sung Gwzlungz neix,sim gig rwix,Nungzginh liz Yunghcouh le de swngzgei daiq bing haeuj singz,luenh gaj beksingq,dawz gyaeuj beksingq dangguh gyaeuj "caeg" bauq hwnj baihgwnz lingx dajsiengj,beksingq haemz de yaek dai.
    Nungzginh dauq daengz Yunghcouh,cap youq singz baihdoeng.Ngoenz daihsam,bouxdamq daeuj bauq:Bingmax Diz Cingh gaenq daengz Binhcouh,dauqcawq ok buengj ndaq daihvuengz."
    Nungz Cigauh cam:"Dawz ndaej buengj ma lwi?"
    Bouxdamq ndenq mbaw buengj he okdaeuj,Nungz Cigauh ciep gvaqbae,cij raen sij naeuz:"......vuengzdaeq miz vah:Byawz gaemh ndaej Nungz Cigauh,fung guh cwngsisij,dajsiengj cienz sam cien gvanq,baengzcouz song cien bit;gaemh ndaej Daxnungz,fung guh cuhswhfusij,dajsiengj cienz sam cien gvanq;gaemh ndaej Vangz Swhmi ,Vangz veij,fung guh hak,dajsiengj cienz cien gvanq......"
    Nungz Cigauh yawj le riu naeuz:"Aen gyaeuj gou baenz dijcienz ha!Gizsaed gou mbouj miz maz citgeiz,dwg Cau Cwnh bungj gou sang lo."
    Nungz Cigauh sim rox,mbaw buengj neix couh dwg Cau Cwnh "hoizvah" lo.Seizneix baij youq baihnaj cij miz diuz loh ndeu:Caeuq Soengqginh buek dai!
    Nungz Cigauh byaij hwnj aen ndoi daemq he,nuengh raen mbawmbaw  geiz daengj laeblaeb,mbin vagvag,seizneix cingq dwg ndwencieng,Yunghcouh mbouj daih nit,rumz liengzsisi,hawj vunz uk singj sim sangj,laj ndoi diegbingz,Nungzginh cingq lied caenh caulienh,raqraq hemq gaj,hap ndoi saenq deih.Nungz Cigauh ndaw sim gag naemj:Aeu bubingh hoenx bubingh,Diz Cingh mbouj gaeuq gou hoenx,daenghnaeuz gou hix miz soih gizbingh he,couh dingj ndaej Diz Cingh doih gizbingh haenx lo.
    Yiet lienh seiz,Nungz Cigauh byaij roengz ndoi bae,gyoengq bing raen le cungj angq hemq:"Nungzvuengz fanh bi!"Nungz Cigauh doiq caezgya naeuz:"Yaek hoenx ciengqhaenq lo,daihgya ndeindei lienh,gwn ndei ninz ndei,rom cingsaenz cuk bae,dawz cax baenz raeh bae,cinjbei hoenx saw Diz Cingh!"
    Gyoengq bing yaengx nangx sangsang,caez hemq:"Gaen riengz Nungzvuengz,hoenx saw Diz Cingh!"
    Nungz Cigauh cam Nungz Gencungh:"Mwngz guj yawj,raeuz hoenx ndaej hingz lwi?"
    Nungz Gencungh naeuz:"Ndaej!Yienznaeuz Soengqginh miz ngeih cib fanh,hoeng hoenxciengq mbouj hojnaengz cienzbouh hwnjbae,song mbiengj doiqcaenh,cij ndaej hwnj it song fanh bing.Raeuz Nungzginh ceiqheiq vuengh,baiz caenh maenh,couh ndaej dawz bingmax Diz Cingh cug gaemz cug gaemz gwn seuq bae!"
    Nungz Cigauh naeuz:"Deng!sien gwn Diz Cingh cawjlig,caiq gwn song Gvangj bing hak."
     Nungz Cigauh dauqma daengz yingz,raen Vangz Swhmi ,Vangz Veij cingq et laeuj ging bingsaw.Raen Nungz Cigauh daeuj daengz,Vangz Veij dem aen vanj he,Vangz Swhmi caem rim laeuj,Nungz Cigauh gingz vanj couh ndoet seuqsat,cam:"Sou caem laeuj lwnh bing,lwnh ok maz geiq hoenx saw Diz Cingh lwi?"
    Vangz Veij fanj cam:"Mwngz dawz cawjeiq ndei la?"
    Nungz Cigauh naeuz:"Dawz ndei lo,caeuq de buek dailix vei!"
    Vangz Swhmi baez anj,lienzmuengz cam:"Mwngz caeuq daiqhaeuh yaeng gvaq lwi?"
    Nungz Cigauh naeuz:"Daxmeh song ngoenz neix dwgliengz,ndang mbouj daih onj,mbouj bae nyau de lo,cawjeiq dingh le,caiq bauqlwnh de ba.Sou naeuz ne?"
    Vangz Swhmi naeuz:"Ngoenzlwenz gou bae yawj daiqhaeuh,daiqhaeuh naeuz,doiqfouq Diz Cingh,doiq dwg ceiq ndei,souj hix maqhuz,hoenx cix mbouj ndei lo."
    Nungz Cigauh baez anj,muengz cam:"Daxmeh baenzlawz nyaenx gangj?"
    Vangz Swhmi naeuz:"Diz Cingh seiq cib fanh bing roemx daeuj fwdfwd,raeuz sien ndoj hai,doiq bae Coj-Yougyangh,souj maenh dieg gaeuq,danghnaeuz de caiq gyaep daeuj,raeuz gvenq youq dieg bya,baengh bya baengh rungh gizgiz maizfug,itdingh hoenx ndaej hingz.Danghnaeuz de mbouj gyaep,cap youq Yunghcouh,nanz le haeuxliengz gat,bingmax mbwq hoenxciengq,caj daengz seizhwngq daeuj le,nengz lai bingh lah,raeuz seizhaenx caiq gung Yunghcouh,haengjdingh daihhingz!"
    Nungz Cigauh youh cam:"Souj yawz dwg maqhuz?"
    Vangz Swhmi naeuz:"Raeuz cap maenh Yunghcouh,dem bing souj ndei Gunhlunzgvanh,cijaeu Gunhlunzgvanh dingj maenh,Yunghcouh couh bauj ndaej.Caj seizgan nanz le,Soengqginh haeuxliengz ciep mbouj hwnj,gag rox doiq deuz."
    Nungz Cigauh naeuz:"Gij neix cungj miz dauhleix,gou hix senq baenzneix naemj gvaq.Danhseih,hoenx hix mbouj dwg mbouj ndei ha?"
    Vangz Veij naeuz:"Dig lai raeuz noix,dig giengz raeuz nyieg,caiq gangj Soengqginh youh miz gizbingh,raeuz yaek hoenx hingz miz di nanz ho!"
    Nungz Cigauh cam:"Sou caeuq Daxmeh gou yawjfap ityiengh?"
    Vangz Veij naeuz:"Daiqhaeuh soqlaiz naemh ndaej laeg yawj ndaej gyae,raeuz cungj mbouj beij ndaej de ha!"
    Nungz Cigauh naengh mbouj an lo,Daxnungz sug rox bingfap,soqlaiz liuh saeh lumj saenz,de gangj vah gig miz dauhleix.Hoeng,Nungz Cigauh beizheiq soqlaiz gyangq mbouj haengj souj,engq mbouj nyienh doiq,couh dwg maij hoenx,caemhcaiq mbouj fug saw.Seizneix daxmeh heuh de doiqbing,de baenzlawz mbaet ndaej gaemz heiq neix?Danghnaeuz bouxwnq ok gij cawjeiq neix,de senq fok lo,bienbien neix dwg cawjeiq daxmeh!Youq ndaw sim de,daxmeh dwg daengngoenz,dwg ronghndwen,dwg mbwn dwg deih,byawz hix beij mbouj hwnj.Cijmiz minzcuz de,ndaej caeuq daxmeh doxha.Vuengzdaeq de mbouj dawz hwnj rwz,hoeng doiq daxmeh de cix gingq lumj saenz.Seizneix de nyaeuq meizda lo,Doiq?Souj?Roxnaeuz hoenx?De naemj bae naemj dauq,doeklaeng gietdingh bae raen daxmeh,hai cueng dawz vah gangj seuq cij ndaej.
    Daxnungz cingq naengh ring feiz,Veiz Meijsenh ,Veiz Sifung buenx youq rik.Nungz Cigauh biengj liemzdou haeujbae,gvih doiq daxmeh naeuz:"Daxmeh ndang ndei luba?"
    Daxnungz gig geizheih,doenghbaez Nungz Cigauh daeuj,cungj dwg ndwn dwk gangjvah,baez neix youh guh maz la?De lienzmuengz naeuz:"Cigauh,gaej hag guhhek lai,vaiq daeuj neix ring fwngz.Ndang gou mbouj miz maz,saekdi dwgliengz mbouj suenq bingh hago."
    "Nungz Cigauh lij gvih dwk naeuz:"Cingj daxmeh gaej gvaiq lwg mbouj hauq,gou miz vah cij gamj gangj."
    "Mwngz miz maz mbouj hauq?"Daxnungz naemjnaemj le,cam:"Mwngz dwg daj Vangz sienseng gizhaenx daeuj ba?"
    Nungz Cigauh naeuz:"Dwg ha."
    Daxnungz naeuz:"Gou rox lo.Doiq,souj mwngz cungj mbouj nyienh,couh siengj hoenx.Neix suenq maz mbouj hauq?Mwngz dwg bouxdaeuz,souj,doiq,hoenx hab youz mwngz dingh.Vaiq hwnjdaeuj ba,miz vah ndwn dwk gangj."
    Veiz Sifung caeuq Veiz Meijsenh fuz Nungz Cigauh hwnjdaeuj.
    Nungz Cigauh naeuz:"Daxmeh,doiq dauq Co-Yougyangh ,souj maenh dieg gaeuq,dangyienz miz bajaek hoenx hingz Diz Cingh.Danhseih,gou youh naemj,dwk hingz Diz Cingh youh yawz ne?Lij mbouj dwg lumj doenghbaez ityiengh,Bouxcuengh vanzlij youq dieg gaebgeb,doeklaeng Cunghyenz geij bak bi.Mwngz dajbeij naeuz gou nyi gvaq:'Raemxdah bongh ndaej gip,rinndaek hix wenq rongh;raemx gyaeng ndaw homq ndong,rin fat mong fat mez.' Danghnaeuz Bouxcuengh cungj maeuq youq rungh lueg uk caemh hwnj myaex fat mez ne.Cau Cwnh bik raeuz fanj lo,caiq mbouj hoenx,gyawz miz loh byaij dem!"
    Daxnungz naj loq hai,muengz cam:"Caeuq Diz Cingh haenq hoenx ciengz he,mwngz gangj ndei ne,mbouj ndei ne?"
    Nungz Cigauh doq naemj doq gangj:"Hoenx hwnjdaeuj,bubingh raeuz hingz ndaej,gizbingh couh mbouj itdingh lo.Gou nanq ceiq rwix dwg Namzdienguek deng loemq,gou mbouj ndaej dang vuengz,daxmeh hix mbouj ndaej guh daiqhaeuh,neix hix mbouj citgeiz.Youqgaenj dwg,raeuz yungh lwed nyumx hoengz mbawgeiz fanj Soengq,heuh singj raeuq Bouxcuengh,yienh ceiqheiq minzcuz raeuz,hawj Bouxcuengh byaij ok gok bya gungx lueg,caeuq Bouxgun doxgyau doxhab,hwngvuengh dieg Cuengh.Caiq gangj Soengqciuz gaenq nduknaeuh,ceizcaeux deng mied,gya hwnj raeuz baez neix fanj ndaej haenq,engq gya vaiq de miedmuengz,vuenh daeuj ciuzdaih moq,hix suenq lwed raeuz mbouj beg lae lo."
    Daxnungz haenh naeuz:"Liglaiz hoenxciengq cungj dwg gouz onj gouz hingz,couh mwngz aek gvangq dungx langh,cijaeu hawj daihlaeng miz leih,couhcinj hoenx baih dai cied hix mbouj heiq,saedsaeh da gvangq yawj ndaej langh.Gou rox mwngz yaek caeuq Diz Cingh hoenx ciengz sawhingz he,gou mbouj laengz mwngz."
    Nungz Cigauh ntaenhcaen naeuz:"Gou soqlaiz aeuei daxmeh,gou mbouj lumz daxmeh cingzngeih naekna.Gangj daengz souj roxnaeuz doiq,gou hix miz yawjfap,gangj okdaeuj cingj daxmeh son'gyauq.Doiq dauq Coj-Yougyangh,Nungzginh ndaej camhseiz baujlouz saedlig,hoeng hawj vunzdig hoenx daengz bakdou,lwgminz Bouxcuengh couh dai vunz engq lai,minzcuz raeuz couh engq nyieg lo.Souj ndei Gunhlunzgvanh,cij souj ndaej saek bi song bi,caj Soengqginh daj Gvangjcouh ndij dah gung daeuj,lij dwg deng hoenx.Seizneix Nungzginh bouxboux siengj hoenxciengq,caen lumj raemxrongz roengz dan,dangj hix dangj mbouj ndaej lo.Ciuh vunz byawz mbouj dai ne,raeuz couh goenjgoenj datdat hoenx ciengz he ba.Ciuq gou yawj,mboujlwnh Bouxgun Bouxcuengh,mboujguenj baihnamz baihbaek,hoenx bae hoenx dauq,byawz hingz guh vuengz,byawz saw byawz dang caeg;guh vuengz mbouj itdingh bouxboux cungj deng,dang caeg mbouj itdingh bouxboux cungj loek.Bouxguen bouxminz,yawjfap hix mbouj doxdoengz.Danhseih hoenx gvaq geij bak bi le,doeng sae namz baek,Cuengh Gun Manj Mungz cungj gapbaenz aen guek hung he.Daengz ngoenxhaenx,raeuz dai lajnamh hix sim'an lo,aenvih raeuz vih gijneix lae gvaq lwed,Bouxcuengh muengh miz aen guek hung neix!"
    Veiz Meijsenh naeuz:"Daxmeh,Cigauh ciengzciengz yawj saw,uk gvai da rongh gvaq dou ne."
    Daxnungz langh riu hwnjdaeuj,naeuz:"Ndei ba,yinghyungz mbouj caih sawhingz.Cigauh,mwngz ndeindei bae diuh bing,hoenx ciengz neix,mboujdanh aeu hoenx ok Nungzginh cingsaenz,lij aeu hoenx ok Nungzginh vifung daeuj!"
        (caengz sat,caj swnj)

回复

使用道具 举报

59

主题

3

听众

1万

积分

版主

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2018-2-8
注册时间
2004-4-2
发表于 2005-2-9 10:15:00 |显示全部楼层
以下是引用路漫在2005-2-4 22:04:36的发言: cibbet. Meh Lwg Ging Yungh Bing 十八、姆勒啨用兵 ... Vangz Swhmi naeuz:"Diz Cingh seiq cib fanh bing roemx daeuj fwdfwd,raeuz sien ndoj hai,doiq bae Coj-Yougyangh,souj maenh dieg gaeuq,danghnaeuz de caiq gyaep daeuj,raeuz gvenq youq dieg bya,baengh bya baengh rungh gizgiz maizfug,itdingh hoenx ndaej hingz.Danghnaeuz de mbouj gyaep,cap youq Yunghcouh,nanz le haeuxliengz gat,bingmax mbwq hoenxciengq,caj daengz seizhwngq daeuj le,nengz lai bingh lah,raeuz seizhaenx caiq gung Yunghcouh,haengjdingh daihhingz!" ...

Lohmanh Lauxsae, gou yiengq mwngz baiq nienz gonq. Hoh mwngz youq bi 2005 caeuq bi bi moq ngoenzlaeng ndang cangq sim sangj, daengx ranz bi vueng gvaq bi.

Mwngz nem bonj saw mwngz youq gizneix hawj vunzlai yawj, mwngz dwgrengz lo. Bonj saw mwngz gou bien bien saw cungj yawj gvaq geij baez, doeg daengz geij coenz baihgwnz, aen sim gou couh miz haujlai naemjfap. Danghnaeuz seizhaenx daxgoeng Nungz Cigauh ciuq aen gangjfap baihgwnz bae guh, roxnaeuz mbouj bae dwkhoenx Guengjcouh baenz vaiq, youq dieg Cuengh raeuz sien guh ndei, guh ak, guh maenh dieg Cuengh gonq, gou lau dieg Cuengh raeuz caeuq Bouxcuengh raeuz ngoenzneix couh mbouj lumj aen deihbouh ngoenzneix nei lo.


回复

使用道具 举报

223

主题

2

听众

8581

积分

贵宾

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2016-3-13
注册时间
2002-10-28
发表于 2005-2-25 15:52:00 |显示全部楼层
cibgouj.Haenq Hoenx Gveihyinzbuj 十九、鞎掍归仁铺
    Diz cingh siujsim digdig,daiq bingdoih hai roengz baihnamz.Ngoenz byaij mboujgvaq hajcib leix,baez daengz haw singz,couh yietnaiq ngoenz he.Banhaemh doz yingz,cuengqsauq deihmaedmaed.Youq dieg ninz Diz cingh,caengzcaengz gingjvei,lij cap bing cangq ciengq ak youq song henz,daezfuengz Nungzginh daeuj guk.De lij roengz lingh,mbouj ndaej de cinj,mbouj hawj caeuq Nungzginh doxhoenx,byawz famh couh gaj!
     Yangz Vwnzgvangj deng Nungzginh gaeb gvaq,mbouj hawj dang sienfung dem,baij bae yinh haeuxliengz,de gig simnyap,cix mbouj naihhoz.
     Gvangjsih Conjyinsij Sunh Gang rox Diz Cingh mbouj cinj caeuq Nungzginh doxhoenx le,gwnz naj riunyaen,ndaw sim naemj ok diuz geiq he.De sikhaek heuh Gvangjsih Ginzyaz Cwnz Suj daeuj.Yienzlaiz Cwnz Suj caeuq Sunh Gang miz seicaeuz,song vunz vih ceng dahndauq he doxdwk gvaq.Cwnz Suj sien roengz fwngz,dued ndaej dahndauq haenx,Sunh Gang doekhoengq,yawz mbouj nyapnyuk.Seizneix Sunh Gang couh siengj ciq cax Diz Cingh daeuj gaj Cwnz Suj lo.
     Cwnz Suj yienznaeuz mbouj haengj bae raen Sunh Gang,hoeng Sunh Gang guen beij de hung,cix mbouj ndaej mbouj bae.De raek giemq bae raen Sunh Gang,cam:"Dayinz miz maz saeh?"
     Sunh Gang naengh dwk sohswd,najriu naeuz:"Cwnz cienghginh!Diz yenzsai daihdoih yaek daengz Binhcouh lo,mwngz sikhaek daiq bing bae ciemq Gunhlunzgvanh,angqcoux Diz yenzsai!"
     Cwnz Suj dingq le hwk dwk najheu najbienq,saenzdigdig naeuz:"Gou ngamq bet cien bingmax,yawz gamj caeuq Nungz Cigauh hoenx?Yangz Vwnzgvangj geijlai ak,lij deng Nungzginh gaeb ne!"
     Sunh Gang naj baez haen,naeuz:"Mwngz gamj dingj lingh?Ciengx bing cien ngoenz,yungh youq it caenh.Yungh mwngz mwngz mbouj bae,ciengx mwngz miz maz yungh?Doiqdingj minghlingh,ginhfap cawqceq bw!"
     Cwnz Suj mbouj gamj guhsing dem,cijndei ngaek gyaeuj doiq okdaeuj.
     Cwnz Suj mbouj gamj ngaiznged,sikhaek daiq bet cien bingmax,ganj bae Gunhlunzgvanh.
     Nungz Cigauh damq rox Cwnz Suj hengzdoengh,cix minghlingh Nungz Gencungh:"Mwngz hix daiq bet cien bingmax,bae laengz Cwnz Suj,mbouj hawj de gaenh Gunhlunzgvanh,youq byonghloh cawz de bae."
     Nungz Gencungh caeuq Vuj Hwzli daiq bing couh hwnjdin lo.
     Nungzginh caeuq Soengqginh youq byonghloh doxbungz,Vuj Hwzli fad max hwnjbae,cap haeuj Soengqginh ndaw gyang bae,song mbiengj ganj mbouj gib baij caenh couh hoenx hwnjdaeuj lo.
     Nungzginh bouxboux lanh cung lanh hoenx,Soengqginh vuengluenh baihdeuz,hoenx ndaej yaep he,Soengginh gaenq dai vunz baenz benq,bet cien bingmax,cij lw Cwnz Suj caeuq geij boux henz ndang de gwih max buet deuz,Nungzginh daihhingz.
     Hoenx hingz mbat neix,Nungzginh singheiq daih vuengh,Nungz Cigauh hix engq miz saenqsim caeuq Diz Cingh haenq hoenx ciengq he lo.Daxnungz heuh gaj duz byalwgnyez he,dajsiengj hawj Nungz Gencungh  ,Vuj Hwzli gwn,Daxnungz bakcit,de mbouj gwn,caemhcaiq dajsuenq gvaqlaeng caiq mbouj gwn byalwgnyez dem.
     Diz Cingh daeuj daengz Binhcouh,rox Cwnz Suj hoenx saw gvaq Nungzginh,gig ndatheiq.Yiz Cing ,Sunh Menj ,Sunh Gang ,Cwnz Suj daengj daeuj gouzraen,Diz Cingh hix daep dou mbouj raen.
     Haet daihngeih,Diz Cingh swngdangz,sam bak lai boux Soengqciengq baiz youq song henz,cijraen Diz Cingh naj caemcwd,fwt bek daiz hat cam:"Dwg byawz roengz lingh bae hoenx Nungzginh?"
     Cwnz Suj yawjyawj Sunh Gang,Sunh Gang gvih roengzdaeuj naeuz:"Lwnh yenzsai:Gou cienz lingh naeuz,yenzsai mbouj cinj gag bae hoenx Nungzginh.Cwnz Suj cienghginh cix gangj vahguengz,aeu daiq bing bae ciemq Gunhlunzgvanh,angqcoux yenzsai,gou gienq de geij baez,de nyengh mbouj dingq,lij gangj vah rwix dingq dem,gou mbouj gamj lwnh."
     Diz Cingh hat sing he:"Gaej gangj lai!"
     Sunh Gang sikhaek dingz bak,hanh lae hanh roenx.
     Diz Cingh youh hat naeuz:"Byawz hoenx gvaq Nungzginh,ndwn okdaeuj!"
     Cwnz Suj daengj sam cib lai boux Soengqciengq ngaem gyaeuj saenzdigdig ndwn okbae.
     Diz Cingh ndwn hwnjdaeuj,gveng gaiq linghbaiz he,hat naeuz:"Famh lingh gag bae hoenxciengq,hoenx saw lo,gyonj hawj gou raemj gyaeuj!"
     Sam cib geij boux haenx sikhaek deng gaex ok bakdou,Cwnz Suj lienzlienz hemq "ienuengj".Diz Cingh cix mbouj dingq.Yaep he,sam cib geij ndaek gyaeujvunz couh deng raemj doek lo.
     Gyoengqvunz boux yawj boux,caemrwgrwg najheu simdiuq.
     Gvaq yaep he,Yiz Cing naeuz:"Diz dayinz,gou gaenq baij vunz bae caeuq Gyauhcij doxduenq,baihde nyienh baij bing daeuj caez gung hoenx Nungz Cigauh,yienghneix......"
     Diz Cingh daengxda fatheiq naeuz:"Heuh guekrog daeuj bang bingz luenh,danghnaeuz hoenx hingz le,mwngz aeu gijmaz daeuj docih Gyauhcij?Cij lau cingj hek yungzheih soengq hek nanz hw!Gaej ok gij cawjeiq naeuh neix!"
     Yiz Cing naj fwt heumik,mbouj gamj w lo.
     Diz Cingh daihsing fat lingh,youq Binhcouh bwh haeuxliengz haj ngoenz,daengxcungq yietnaiq haj ngoenz,caiq gung hoenx Gunhlunzgvanh.
     Ngamq gvaq ngoenz he,Diz Cingh youh fat lingh,youq Binhcouh yiet haj ngoenz,ngoenzcog dwg ndwencieng cibngux,daengxcungq cuengq gyaj gvaq ciet.
     Nungzginh bouxdamq rox ndaej aen siusik neix,sikhaek dauq Gunhlunzgvanh bauqlwnh Nungz Civei.Nungz Civei riu naeuz:"Soengqginh gvaq ciet,raeuz hix aeu gvaq ciet.Gyoengq beixnuengx,gvaq ciet mbouj miz laeuj mbouj baenz,baij geij boux bae lajmbanj cawx laeuj byaek ma!Hojsik mbwn mbouj ndei,seizneix youh rumz youh fwn,mboujne,haemhneix couh ndaej yawj ronghndwen lo."
       "Cij aeu miz laeuj,doek fwn engq ndei sai laeuj ne!"Miz vunz naeuz.
     Nungz Civei naeuz:"Haemhneix daihgya gej saivaq sai laeuj gwn noh,cib ngoenz le Soengqginh daeuj gung gvan,couh mbouj miz seizgan sai laeuj lo."
     Haemhhaenx,souj gvan Nungzginh nda daiz daih gwn daih ndoet,yiednauh dangqmaz.Gwn gvaq geij boi laeuj le,Nungz Civei fwt ngeix daengz aeu baema Yunghcouh yawj daxmeh,ndaw cieng ranz lawz mbouj comz youq itheij gvaq ciet ne!De daengq baihlaj le,daiq geij boux veisw,couh fad max bae Yunghcouh lo.
     Nungz Civei dauq daengz Yunghcouh,gaenq dwg ndwencieng cibroek banngaiz lo,de roengz max le couh bae raen Nungz Cigauh.
      Nungz Cigauh seizneix cingq lienh giemq,raen Nungz Civei byaij daeuj,de gig geizheih,muengz cam:"Civei,mwngz dauqma guh maz?"
     Nungz Civei naeuz:"Daeuj hawj daxmeh baiqnienz ha!"
     Nungz Cigauh nyaeuq meizda cam:"Gunhlunzgvanh miz maz siusik moq?"
     Nungz Civei naeuz:"Mbouj miz saeh!Soengqginh bwh liengz cib ngoenz,cingq youq Binhcouh venj hoengz venj loeg nyaengq gvaq ndwencieng cibngux ne!"
     Nungz Cigauh fwt fak Nungz Civei,fok naeuz:"Duzraq mwngz!Mwngz deng Diz Cingh yaeuh lo!Vaiq baema,Gunhlunzgvanh deng saetsouj,mwngz ruj gyaeuj daeuj raen gou!"
     Nungz Civei deng fak singj lo,lienzmuengz hwnj max dauq bae Gunhlunzgvanh.
     Nungz Cigauh yawj Nungz Civei bae le,sim rox hix ganj mbouj gib dem,Diz Cingh gyajcang yiet bing gvaq ciet,gangj mbouj dingh couh youq cibngux haemhneix gung ciemq Gunhlunzgvanh,seizneix gaenq hamj gvan roemx daeuj Yunghcouh lo.De sikhaek baij vunz bae damq cingzbauq,youh roengz lingh daengx ginh sikhaek hengzdoengh,guh ndei cinjbei hoenx daihciengq.
     Nungz Cigauh daenj ndei buhdiet mauhhang,bae gak yingzbuenz cunzyawj,gujli daengxcungq doengzsim caemhrengz,caeuq Soengqginh hoenx ok sawhingz.De youh heuh gyoengq ciengq daeuj,anbaiz nda caenh,Nungz Gencungh youq baihgvaz,Vuj Hwzli ,Hij Yenz youq baihswix,de youq cungqgyang,Veiz Meijsenh ,Veiz Sifung riengz de,Vangz Swhmi ,Vangz Veij dep laeng.
    Nungz Cigauh anbaiz ndei le,cix bae raen Daxnungz,gvih naeuz:"Daxmeh,yaek hoenx daihciengq lo,mwngz bouxlaux miz maz daengqvah dem?"
     Daxnungz sax fwngz nam naeuz:"Muengh mbwn baujyouh!hoenx gvaq baenzlawz,youz daihlaeng bae bingzlwnh ba!"
     Nungz Cigauh naeuz:"Gou dajsuenq heuh vunz soengq mwngz bae Dwzmodau,yawzyiengh?"
     Daxnungz naeuz:"Ciengeiz gaej yienghneix,gou youq neix ndaej hawj gyoengq bing sim'an,saenqsim lai cuk,hix suenq gou ndaej ok rengz lo.Caiq gangj bae roxnaeuz doiq,gou gag miz cawjeiq,mwngz mbouj yungh yousim,caenhguenj daiq bing bae hoenxciengq.Civei deng geiq Diz Cingh,gou naemj Soengqginh seizneix hamj gvaq Gunhlunzgvanh gvaqdaeuj lo,mwngz vaiq bae ba!"
     Nungz Cigauh naeuz:"Daeuj couh daeuj ba,gou cingq muengh ngoenzneix ne!"
     1053 nienz ndwencieng cibcaet banhaet,bouxdamq daeuj bauq Nungz Cigauh,naeuz Soengqginh gaenq gung roengz Gunhlunzgvanh,souj gvan Nungzginh cienzbouh hoenx dai,Soengqginh daihdoih bingmax gaenq hamj gvan gvaqdaeuj,byaij gonq haenx gaenq daengz Gveihyinzbuj.Nungz Cigauh mbouj gamj soengheiq,boq hauh sikhaek hai bae Gveihyinzbuj,mbwnrongh seiz caeuq Soengqginh doxbungz.
             (caengz sat,caj swnj)

回复

使用道具 举报

223

主题

2

听众

8581

积分

贵宾

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2016-3-13
注册时间
2002-10-28
发表于 2005-3-16 11:10:00 |显示全部楼层
(swnj baihgwnz)
        Gveihyinzbuj youq Yunghcouh baihdoengbaek,liz singz ngeih cib lai leix gyae,seiqhenz dwg ndoi,cungqgyang dwg doengh reih bingzbwd,cingq hab hoenxcingq.Soengqginh sien daengz,ciemq gonq dieg ndoi,youq dieg bingz nda caenh caj.Diz Cingh caemh nda gonq laeng gvaz swix gyang haj yiengh caenh.Doekgonq sam cien bingmax,gvaz swix gak haj cien bingmax,cungqgyang fanh bingmax he,baihlaeng sam cien bingmax,doeklaeng lij miz haj cien gizbingh,gyonj suenq yaek daengz seiq fanh bingmax,cienzbouh genj aeu bouxcangq bouxrengz bouxak.
        Nungzginh song fanh bingmax ca mbouj lai cienzbouh daeuj lo,gip ganj seiq cib lai leix roen,yungh bae buenq aen seizsaenz,doq byaij doq eu fwen:
                    Raeuz ndok ndongj gvaq diet,
                    Cax nangx lwed raen lai;
                    Bouxcuengh mbouj lau dai,
                     Uk hai(dek) dangq va langh.
        Sing fwen goksa goksat,hap bya hap rungh,vifung dangqmaz.Daihdoih byaij bae rwdrwd,bouxboux daenj buhhoengz,lumj feizndoeng lag bae huhu,haenq ndaej mbouj miz dangj.
        Nungz Cigauh fad max gyaep hwnj Vuj Hwzli ,Hij Yenz,sam boux doengzcaez gwih max bae yawj deihhingz,yawj vunzdig yawz nda caenh,naemj banhfap baenzlawz buq caenh.De yawj gvaq benq dieg bingz haenx,hoenx hingz miz haj cingz bajaek lo.Danghnaeuz bubingh doiq bubingh,Nungz Cigauh miz cib cingz hoenx ndaej hingz.Danghnaeuz Soengqginh bubingh gizbingh caez daeuj hoenx,Nungzginh buekmingh buekdai,hix gojnaengz ndaej hingz.
        Nungzginh bae daengz Gveihyinzbuj,mbwn gaenq rongh seuq,seizhaenx daihgya fwt raen Daxnungz hix daeuj lo.Daxnungz yienzbonj gwih maxdaemq,duk daeuzgaen,cij loh da caeuq ndaeng,laeglemx riengz daihdoih byaij.Haxbaenh hot fwen haenx couh dwg de son eu.Daxnungz hwnj cancangz,cij miz Veiz Meijsenh caeuq Veiz Sifung rox,lienz Nungz Cigauh hix muenx lo.Daxnungz daeuj aen siusik neix boux cienz boux,gig vaiq couh cienz doh daengx ginh."Daiqhaeuh caenndang daeuj cancangz,raeuz aeu lanh hoenx Soengqginh ha!""gyaeuj doek lumj daet gva,aen he vuenh song aen,hawj daiqhaeuh canh aen ndeu!"Gyoengq bing ceiqheiq daih vuengh,bouxboux hat gaj maenj hoenx,lienz Nungz Cigauh daengx ndang hix roxnyinh lwed goenj rengz haenq.
        Nungz Cigauh byaij youq baihnaj,daiq daihdoih cung hwnj dieg bingz.Seizneix Soengqginh gaenq nda ndei caenh deq caj.Nungz Cigauh dawz geiz baez vad,aen samsoemcaenh he couh baij hai lo.Yaepyet caenh couh nda ndei,itseiz sing hauh sing gyong caez yiengj,gok dien goenj deih,Soengginh raen Nungzginh heiqseiq sang,hoengzgywggywg baenz benq baenz benq,caengz hoenx gaenq sien yup lo.Yiz Cing ceiq lau dai,vuengmuengz ndoj haeuj bingdoih Sunh Menj bae,Sunh Menj ndatheiq ndaq naeuz:"Fangzmbeiiq mwngz!Caengz hai hoenx couh ndoj daeuj gou neix,siengj yinx Nungz Cigauh daeuj ra gou ma?Mwngz lau dai,byawz youh nyienh dai?"
        Yiz Cing najhoengz rwzdit,najhaemz naeuz:"Sunh dayinz,bing mwngz dwg cingqmaekbaiz,bing  gou dwg cabbaiz,youq mwngz gizneix baujyiemj di."
        Sunh Menj huj lo,fok de:"Laenz caenh liz doih,ginhfap mbouj nyiuz,lij mbouj vaiq bae!"
        Yiz Cing cijndei guh nanggyaeuj ndongj,najmongmud liz bae.
        Song mbiengj doiqcaenh,hab dwg cawjcingq sien doiqvah,hoeng seizneix Diz Cingh ndoj youq ndaw gyang,lau deng naq nyingz;Nungz Cigauh yienznaeuz dang gangj caemh gangj gvaq lo,mbouj nyinh sai saenzheiq hai bak dem.Yienghneix,song mbiengj cungj mbouj guhsing,cihguenj boq hauh roq gyong.Nungz Cigauh vangh cax fad max,daiq doih cung gvaqbae,Soengqginh daihciengq Sunh Cez fad max daeuj dingj.Sunh Cez dwg Ginveiginh swhling cangjgvanh,soqlaiz yawj mbouj hwnj vunz,de loengh ca gig miz goengfou,ndaej vunz haenh guh "saenzca",hoeng cix dangj mbouj ndaej Nungz Cigauh fag caxbangh haenx!hoenx mbouj daengz cib doengh,Nungz Cigauh dawz cax haenq vuet,fag ca Sunh Cez cix baet bae donh he lo.Sunh Cez doeksaetyaet hemq hwnjdaeuj:"Leihhaih!"Nungz Cigauh hat naeuz:"Mwngz ngamq rox gou leihhaih ha!"Gangj le youh vuet gvaqbae.Sunh Cez gipmuengz aeu ganjca daeuj dangj,"dang" sing ndeu,lwgfeiz sinzbyanz,gangjca gaenq deng euj gungj lo.Sunh Cez ndaw sim gig lau,youh mbouj nyienh hoenx saw vutnaj,cijndaej daiq bingdoih de bae ciemq mizleih deihhingz,Nungz Cigauh gaenj gyaep mbouj ndek.
        Nungzginh daihdoih swngzgei cung hwnjbae,nangx baet cax vuet,lumj vuet hazgut,hemq gaj saenq mbwn.Soengginh baiz baihnaj haenx bing baih lumj fai lak,deng gaj dai muenx deih,lwed lae baenz mieng.Sunh Cez deuz bae deuz dauq lij deuz mbouj ok Nungz Cigauh gyaep.De fwt raen baihhaenx miz doih  bing mehmbwk he,laihnaeuz mehmbwk ndei hangz,siengj cung ok diuz loh he deuzmingh,byawz rox,dingjlingz bungz "gukbeuqmeh" Veiz Meijsenh.Veiz Meijsenh ndaw fwngz feidau bak fat bak deng,lij liz ciengh lai gyae,"gukbeuqmeh" baez yaengx fwngz,feidau fwdfwd mbin bae,baek haeuj laj hoz Sunz Cez,dangciengz doek max dai lo.Soengqginh caenh doekgonq hoenx saw lo,gipmuengz deuz haeuj caenh cungqgyang bae.
        Sunh Cez dai le,Nungz Cigauh daiq daihdoih cung haeuj Soengqginh cungqgyang bae.Diz Cingh hwk dwk bajheu liux,gipmuengz minghlingh gyoengq ciengq bae dangj,de cix caeuq Sunh Menj ,Yiz Cing doiq hwnj ndoi bae.De danqheiq naeuz:"Nungz Cigauh bubingh leihhaih dahraix,gvaiq mbouj ndaej Ciengj Gaih ,Cangh Cungh dig mbouj gvaq de,seizneix Sunh Cez youh dai lo,tawj daeuj dan yungh bubingh nanz hingz ndaej de ha!"
       Couh youq Nungz Cigauh hoenx Sunh Cez seizhaenx,Vuj Hwzli ,Hij Yenz caeuq Nungz Gencungh caemh faendaeuz bae dwk Soengqginh gvaz swix song aen caenh haenx.Song mbiengj bing doiq bing,ciengq doiq ciengq,hoenx ndaej mbwn fuemx deih laep,ndoi saenq deih doengh.Nungzginh yungh hwnj byauhciengh,fanh ci caez fat,Soengqginh dai ,sieng nanz geq ndaej cing.
        Diz Cingh youq gwnz ndoi yawj le,simyou bupbup.Cijraen Soengqginh dangj mbouj ndaej Nungzginh,baih roengzma yiedyied.Hoenx ndaej song aen seizsaenz,Soengqginh dai ,sieng gig camj,Nungzginh cix heiqseiq mbouj gemj.Diz Cingh haebhaeb heuj,gietsim hai "vangzbaiz" de okdaeuj,de gingz geiz baez vad,haj cien gizbingh daj song mbiengj geh ndoi bongh okdaeuj,cig cung haeuj ndaw caenh Nungzginh bae.Gizbingh heiqseiq gig vuengh,max sang youh guengz,Nungzginh deng cung luenh lo.Nungz Cigauh vad doengh linghgeiz,heuh Nungzginh aeu baihlaeng doxing,haenq dingj gizbingh.Nungzginh buekmingh dingj hoenx,gizbingh bongh bae bongh dauq,lwnzfan gung hoenx,Nungzginh lumj ciengz lak nei deng cung sanq lo,gak boux goq gak boux,heiqseiq daih gemj.Soengqginh bubingh cienq ndang dauq daeuj,Nungzginh dingj mbouj ndaej lo,baih deuz yiedyied.Nungz Gencungh buekmingh luenh cung,lienz gaj Soengq ciengq cib geij boux,doeklaeng deng naq nyingz dai.Nungz Cigauh vuet diuz loh he cung okdaeuj,daiq bingdoih doiqdeuz.Vangz Swhmi ,Vangz Veij daiq bing dingjdangj Soengqginh,cix vih noix nanz dig lai,Vangz Veij haenq hoenx vutmingh,Vangz Swhmi deng humx nanz ndot,yut giemq gaggaj.Veiz Meijsenh ,Veiz Sifung henhoh Daxnungz doiq baema Yunghcouh.
        Hoenx mbat neix,Nungzginh dai ,sieng dingzlai,deng dwk sanq mbouj rox geijlai.Nungz Cigauh dauq daengz Yunghcouh,diemj soq lw mbouj daengz sam cien vunz.
                caengz sat,caj swnj)

回复

使用道具 举报

223

主题

2

听众

8581

积分

贵宾

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2016-3-13
注册时间
2002-10-28
发表于 2005-3-25 09:15:00 |显示全部楼层
ngeihcib. Vahlwnh Doeklaeng 二十、话論趃踜
    Dauq daengz Yunghcouh,Nungz Cigauh sikhaek roengzlingh coemh yingzbuenz bae,gak boux ndangmbaeu hwnjdin,faen song loh doiq deuzoh he ndij Cojgyangh byaij,youz lwg de Nungz cunghdan ,nuengx Nungz civei ,lwggwiz Vuj Hwzli caeuq daihciengq Hij Yenz daiqlingx;loh he ndij Yougyangh byaij,youz de caebndang daiqlingx,henhoh Daxnungz bae Dwzmodau.
    Boux veisw he bang Nungz Cigauh gip doxgaiq seiz,fwt naemj ok diuz  cawjeiq he,dawz geu buhlungz Nungz Cigauh okdaeuj,daenj hawj bouxbing yaek dai he,boux neix siengqmauh miz di lumj Nungz Cigauh.Nungz Cigauh raen le,bi gyaeuj naeuz:"Yienghneix cij camhseiz yaeuh ndaej bouxwnq,hoeng yaeuh mbouj ndaej Diz Cingh.Gou yawz dai ndaej mbouj mingz mbouj beg ne!"
    Veisw naeuz:"Yaeuh ndaej bouxwnq hix ndei ha!"
    Nungz Ciguah naeuz:"Hix ndaej,hawj Soengqginh hoengq angq baez he ba!"
    Ndwencieng cibcaet banhaemh,Nungzginh deuz liz Yunghcouh,dam feiz he coemh yingzbuenz bae.Feiz lij caengz ndaep,Soengqginh daihdoih gaenq daengz laj singz.Haemh haenx,Soengqginh ciq naeuz saeuj caeg,boemz dou dauqcawq bok ranz,gim ngaenz cienz haeux,yienghyiengh ciengj doh.Beksingq miz byawz gamj w,couh deng dang "caeg" gaj dai;miz byawz najsaek mbouj ndei,hix deng gaemh hwnjdaeuj;raen boux yawj mbouj swnhda haenx,caemh deng gyaeng hwnjdaeuj.Haemh he,fanh hoh beksingq he couh gaemh bae caet cien lai vunz.Soengqginh bouxboux dawz beksingq dang guh "caeg" bae bauqgoeng.Diz Cingh mingz rox ndawde miz gyaj,cij vih hoenx hingz lo,hix doengzyiengh suenq soq bauq hwnj baihgwnz lingx goeng.
    Diz Cingh ciemq Yunghcouh le,couh baij bing bae gyaep Nungzginh.Nungzginh doq hoenx doq doiq,lienzlienz hoenx gvaq geij baez.Ndij Yougyangh byaij ci Nungzginh neix,youq Denzlinz Ndoiguenyaem cuk baujleij,ringx rinndaek nyingz naq dwk dai mbouj noix Soengqginh.
    Nungzginh doiq daengz Dwzmo(neix Yinznanz Vwnzsanh),yiet cib ngoenz.Nungz Cigauh anbaiz ndei Daxnungz,louz lwg de Gifungh ,nuengx Nungz Ci'gvangh caeuq Veiz Sifung souj Dwzmo,de dajsuenq bae Daihleixguek ciq bing.
    Nungz Cigauh biek daxmeh seiz naeuz:"Soengq Cau Cwnh itdingh aeu gyaeuj ranz Nungz raeuz,raeuz mbouj ndaej seizbienh hawj de aeu,hix aeu de dawz gyaeuj daeuj vuenh.Gou bae Daihleix ciq daxau aeu bing,dauqma caeuq ranz Cau vuengzdaeq buekmingh ciengz he,cijaeu gou mbouj dai,Cau Cwnh couh mbouj siengj anningz."
    Daxnungz naeuz:"Mwngz cuengqsim bae ba,gizneix youz gou dajleix.Baez neix bae mbouj rox seizlawz ndaej dauq,gou mbouj raen mwngz ndaw sim couh fouz.Mwngz louz aen mauh mwngz roengzdaeuj hawj gou,gou ndaej ngoenzngoenz lumh de,couh dangq ndaej raen mwngz lo."
    Nungz Cigauh song ga gvih roengzdaeuj,song fwngz duet mauh gingz hawj daxmeh,soqlaiz cij nyienh lae lwed mbouj nyienh lae raemxda ndaek bouxsai neix,seizneix raemxda ndik lumj fwn doek,de vah mbouj baenz coenz naeuz:"Meh......ngoenzlaeng......cingj gag......goqhoh."
    Daxnungz coux aeu mauh caemh raemxda lae rim naj,hoz genx naeuz:"Gou miz mwngz laeq lwg neix,ciuh neix hix rimhoz lo.Lwg gou mbouj yungh nanzgvaq,ngoenzlaeng mboujguenj yawzyiengh,gou cungj simvuen,cungj mbouj ienqhoij."
    Nungz Cigauh lienzlienz baiq Daxnungz naeuz:"Daxmeh aen naek gvaq bya,cingz laeg gvaq haij,lwg ciengxlwenx mbouj lumz."
    Daxnungz naeuz:"Gou hwnj cancangz daenj geu buh caeuq diuz daeuzgaen haenx,mwngz daiq bae ba,gvaqlaeng raen doxgaiq lumj ndaej raen vunz.------Sifung,dawz daeuj."
     Veiz Sifung ndenq aen baufug iq he hawj Nungz Cigauh,daengq naeuz:"Nuengx gou gwnzloh siujsim,gaej hawj daxmeh ruj sim cij ndei."
    Nungz Cigauh naeuz:"Cej,ciuqgoq daxmeh cienz baengh mwngz lo."
    Veiz Sifung naeuz:"Mwngz cuengqsim.Bae daengz Daihleix le heuh vunz daiq saenq ma ha."
    Nungz Cigauh roek boux yah caeuq geij laeq  lwg caez daeuj biek Daxnungz,riengz Nungz Cigauh itheij bae Daihleixguek.Daxnungz ,Veiz Sifung daengj soengq daengz cib leix lai gyae,cij vad fwngz doxbiek,raemxda doek byoegbyoeg......
    Gvan moq Daxnungz dwg Dwzmodau Bouxcuengh bouxdaeuz,ndaej dangdieg Bouxcuengh daeuj bang,Daxnungz youq Dwzmo cap roengzdaeuj lo,ciu ndaej sam cien lai boux bing,sonlienh gizbingh,souh maenh gizyiemj,dingj hoenx bing hak.Soengqciuz geij baez baij bing daeuj dwk,Nungzginh haenqsim dingjhoenx,gaenj lumj rinranx.Yangz Vwnzgvangj hix daiq bing daeuj dwk gvaq,doeklaeng hoenx saw,lij deng sieng naek dem,ndoj youq ndaw faed,gwn haeux cauj ciengx mingh,mbouj gamj coemh feiz cawj haeux,lau Nungzginh raen hoenz ra deng.Yawjyawj bak sieng foeg naeuh,gyoengq bing cix aeu gaeu ram de ma Denzcouh,ra ywdoj  daeuj yw,cij gip ndaej diuz mingh de.
    Soengqginh daeuj dwk baenz bi,cungj dwk mbouj roengz,Yiz Cing gig simfanz.Vuengzdaeq geij baez baij vunz daeuj coi,Yiz Cing mbouj rox baenzlawz gyaucai.De naemj uk yaek dek,hix naemj mbouj ok banhfap.Doeklaengz,miz ndaek saeyez he hawj de ok gaeq,de ngaek gyaeuj naeuz:"Mwngz laeglemx bae banh ba,ciengeiz gaej laeuh siusik."
    1045 nienzco,Cojgyangh miz ndaek Bouxcuengh he heuh Vangz Saugi,daiq cib geij boux vunz daeuj Dwzmo,naeuz mbanj de deng Soengqginh dwk,gyoengqde gaj dai Soengqginh,Soengqginh yaek dawz gyoengqde,aenvih mbouj miz dieg ndoj,cijndaej haeuj Dwzmo daeuj.Daxnungz raen Vangz Saugi naj haenhwd,song da lamzlwd,siengqmauh lumj bouxrwix nei,codaeuz hix daezfuengz de.Doeklaeng baij de bae hoenx gvaq Soengqginh song baez,cungj raen de saedsaeh mbouj lau dai,daj lohgengz cung youq baihnaj,gaj dai cib geij boux Soengqginh,yienghneix couh mbouj ngeiz de lo.Mbouj nanz,Yiz Cing youh baij geij cien bing daeuj dwk Dwzmo,haenq hoenx cib geij ngoenz,Soengginh dai ,sieng gig camj,Tiz cing lienzlienz dem bing,yied gung yied haenq.Nungzginh hwnzngoenz dingj hoenx,dai ,sieng hix haemq lai.Haemh he gyanghwnz,Soengqginh youh daeuj gung,cingq hoenx ndaej haenq seiz,ndaw mbanj fwt seiqlengq hwnj feiz,Vangz Saugi caeuq doengzdoih de diuq okdaeuj lo,yienzlaiz gyoengqde dwg Yiz Cing aeu gimngaenz goq gyoengqde daeuj guh bouxgan.Coemh feiz le,Vangz Saugi couh daiq doengzdoih de cung hwnj bauqlaeuz bae,gaemh dawz Daxnungz.Dangseiz Veiz Sifung caemh youq gwnz laeuz,de caeuq Vangz Saugi buekhoenx,deng raemj goenq cik fwngz he,de lij haeb dawz cik dujrwz Vangz Saugi,yungh cik fwngz dog got dawz Vangz saugi,diuq roengz laeuz bae,song vunz doengzseiz vutmingh.
    Nungzginh saet bae bouxdaeuz,feiz seiqcawq dawz huhu,Soengqginh swngzgei dwk roengz Dwzmo lo.Daxmeh Nungz Cigauh,lwgdaeuz Nungz Gifungh,nuengx Nungz Ci'gvangh cungj deng gaemh.Mbanj Dwzmo deng Soengqginh dwk ndaej gep vax mbouj lw.
    Sam gyaq moegci gyaeng dawz Daxnungz ,Nungz Gifungh ,Nungz Ci'gvangh,daj Dwzmo gvaq Denzcouh,gyaiq daengz Yunghcouh,gwnz gai haujlai vunz dingz din iet hoz bae yawj,miz vunz ginggeiz,miz vunz angq,miz vunz mbouj leixlangh,hoeng engq lai vunz mazmwnh moegmoed.Daxnungz itloh baiqninz,haeuj singz le de cij raurumz ndiu gvaqdaeuj,de hai da yawj gyoengq vunz henz gai yawj de haenx,yienznaeuz boux ndeu hix mbouj roxnaj,hoeng youh lumj gaenq caeuq gyoengqde doxyouq gvaq haujlai nanz nei.De siengjsaenq,song bi gonq Nungzginh dwk roengz Yunghcouh hai cang faen haeux seiz,gyoengq neix mbouj noix vunz faen ndaej haeux gvaq.Naemj daengz gizneix,de loq riunyumj yawj gyoengqde.De sangyienz rox,gyoengqde mbouj rox de vih maz riunyumj,de hix mbouj muengh miz byawz daeuj  bauqdap de,doengzcingz de,hix mbouj vih mbouj miz vunz leix de cix siengsim danqheiq.
                 (caengz sat,caj swnj)

回复

使用道具 举报

223

主题

2

听众

8581

积分

贵宾

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2016-3-13
注册时间
2002-10-28
发表于 2005-4-30 16:20:00 |显示全部楼层
Youq Yunghcouh,Yiz Cing saemj gvaq Daxnungz bae he.
     Yiz Cing cam:"Mwngz couh dwg Daxnungz ma?"
     Daxnungz naeuz:"Gou couh dwg Daxnungz."De yawjyawj Yiz Cing,"O,mwngz dwg Yiz Cing,gou raen mwngz gvaq."
    Yiz Cing baez anj,youh ndatheiq naeuz:"Luenh vab!Gou dangzdangz hakguen ciuzdingz,seizlawz caeuq mwngz raennaj gvaq?"
    Daxnungz riuriu:"Mwngz gaej lau,gou mbouj dwg siengj lienzlih mwngz.Gou saedsaeh raen gvaq mwngz.Ngoenzhaenx youq Gveihyinzbuj,lij caengz hoenx seiz,gou couh raen mwngz ndoj haeuj baihlaeng bae,deng Sunh dayinz fok can he,dwg mbouj dwg ni?"
     Yiz Cing naj fwt cik,mbat mboengj daiz,youh nyaenq youh huj:"Daiq cuengqlangh!hawj gou dawz yahcaeg neix sien moeb it bak banj!"
     Daxnungz di he mbouj lau,sing sang hat naeuz:"Youq goengdangz moeb mehmbwk,danghnaeuz moeb vaq vaih loh noh,mwngz suenq gijmaz hakguen ciuzdingz?Naj vunz sim ma!Mwngz aeu rox,Cau Cwnh aeu gou lix bae raen de,danghnaeuz mwngz gamj doengh gou diuz bwndauz he,gou couh daemj gyaeuj dai,yawj mwngz baenzlawz gyaucai!"
     Yiz Cing baetbaet fwngz,haeuh gij cai gaem faexmbaenq haenx doiq roengzbae,ndaw sim gag huj gag nyap:"Yahcaeg neix leihhaih,gamj youq gwnz goengdangz dingj gou!"
     Yiz Cing nyaenxheiq dwk,sing loq daemq cam:"Mwngz rox mwngz famh gijmaz coih lwi?"
     Daxnungz naeuz:"Lajmbwn bouxboux cungj rox,gou caeuq lwg gou daiq geij fanh Nungzginh,lienzdaemh gung roengz cib ngeih aen singz,humx Gvangjcouh,gaj Cangh Cungh,raemj gyaeuj Ciengj Gaih,gaemh lix Yangz Vwnzgvangj,hoenx saw Cinz Suj,youq Gveihyinzbuj Soengqginh hingz lo,hoeng hingz ndaej mbouj bienzngeiz,daihciengq Sunh Cez vutmingh,bing dai hwnj cien baenz fanh.Ranz Cau dienyah deng ranz Nungz nyauz mbat neix,gvaqlaeng mied engq vaiq lo......"
     Yiz Cing dingq mbouj roengzbae,hat naeuz:"Daihdamj!Youq gwnz goengdangz,yawz ndaej hawj mwngz luenh vab luenh gangj!"
     Daxnungz naeuz:"Mwngz cam gou rox coih lwi,gou cix ciuq saed daeuj gangj,danghnaeuz ranz Nungz dou guh gij saeh doiq Soengqciuz ndei,lij famh coih ma?"
     Yiz Cing itseiz mbouj miz vah gangj,haeb heuj haeb faenz,doeklaeng cij geq naeuz:"Sou song mehlwg gawj bing cauhfanj,gag fung guh vuengzdaeq,gag laeb guh guek,coih hung daemx mbwn,hab raemj gyaeuj,mied goujcug,mwngz rox lwi?"
     Daxnungz naeuz:"Gou rox,hoeng youh loengh mbouj mingzbeg,daj ciuhlaux daengz neix,daj sam vuengz haj daeq,Ya ,Sangh ,Couh ,Cinz ,Han ,Samguek ,song Cin ,Namzbaekciuz ,Dangz ,Hajdaih ,itcig daengz ngoenz neix Soengqciuz,ranz singq vuengzdaeq vuenh bae vuenh dauq,cix miz maz ne?Danghnaeuz gangj vuengzdaeq cungj fanj mbouj ndaej,youh baenzlawz vuenh ciuz vuenh daih?Danghnaeuz fanj vuengzdaeq cungj heb dai,ciuz lawz vuengzdaeq mbouj dwg fanj ciuz gonq vuengzdaeq le cij ndaej dang ne?Roznaeuz gangj hai ciuz vuengzdaeq boux daih'it cungj hab dai lu?Gou dwg Bouxmanz mehmbwk huk,mwngz dang hak doegsaw lai,cingj mwngz son gou!"
     Yiz Cing mbouj  rox baenzlawz han,heiq ndaej bwt yaek fan:"Mwngz yaek dai lij guh bakgeng,yawz miz cungj vunz neix!"
     Daxnungz naeuz:"Gou vangsoh hawj sou gaj lo,dai cungj mbouj lau,gou lij lau gijmaz dem?Ngoenzneix gou gangj gijneix,mwngz cungj geiq roengzdaeuj dangguh coihcingq ba,ngoenzlaeng mwngz gaj gou couh miz baengzcingq lo."
     Yiz cing liuh mbouj daengz nyangz boux mehmbwk baenzneix mbouj lau dai,ienqhoij hai saemj Daxnungz lo.Seizneix gwih guk nanz roengz,youh mbouj ndei rubrab souciengz.Vih liux dinghdingh simzsaenz,de heuh vunz aeu raemxdang ywbouj daeuj.
     Seizhaenx miz vunz soengq dangyinzswnh daeuj,de ndoet gwn geij gaemz le,cij doiq Daxnungz naeuz:"Mwngz Bouxmanz mehmbwk he,seng youq gungx lueg,maj youq goz rungh,hix siengj dang vuengzdaeq?Hix siengj fung vuengzdaiqhaeuh?Caen dwg duzmoed mbouj raen gvaq haij.Vuengzdaeq dwg duzlungz gwnzmbwn doekseiq,mbouj dwg byawz siengj dang couh ndaej dang.Sou Bouxmanz fanhdaih hix mbouj ok ndaej vuengzdaeq!"
     Daxnungz naeuz:"Mwngz dawz vuengzdaeq yawj guh saenz,gou naeuz vuengzdaeq hix dwg vunz,de dwg vunz seng,aeu gwn aeu ninz,hix ok nyouh ok haex,vuengzdaeq miz boux ndei,hiz miz bouxrwix,bouxndei bang beksingq banhsaeh,bouxrwix hawj beksingq daiq daeuj caihux.Vih maz gaij ciuz vuenh daih,couh dwg aenvih ok liux vuengzdaeq rwix.Byawz gamj fanj vuengzdaeq rwix,fanj hingz le couh ndaej naengh dienh,mboujguenj Bouxgun Bouxcuengh,baihbaek baihnamz,caemh youq guek neix,bouxndei couh ndaej dang vuengz.Soengqciuz dienyah dwg yaeuh ndaej daeuj,ranz Cau mbouj miz bouxak,daih beij  daih huk,dou ranz Nungz fanj vuengzdaeq huk,fanj ndaej miz leix!"
     Yiz Cing daihhuj:"Haep bak naeuh mwngz!Mwngz gamj youq goengdangz ndaq vuengzdaeq,coih naek sam boix!"
    Daxnungz riuriu:"Gou caeuq lwg gou senq youq song bi gonq couh gamj gawj geiz fanj vuengzdaeq lo,ngoenzneix gou caiq ndaq Cau Cwnh can he,youh suenq gijmaz ne!Mwngz caiq hawj gou gya coih cib boix,gou hiz cij miz aen gyaeuj ndeu.Seizbienh mwngz ba!"
     "Mwngz mwngz......"Yiz Cing heiq ndaej ndang saenz bae,myaiz saek conghhoz,gangj mbouj baenz vah.De youh ndoet geij gaemz raemxdang,"sou cauhfanj,yinxhwnj bingcai caeghux,beksingq souh nanh,gwnz cancangz gyaeuj vunz mued deih,fangzsieng rim biengz,cungj dwg mwngz caeuq lwg mwngz cauxbaenz hux!Mwngz dai le,ndaw yaem lij miz haujlai fangzdaiien daeuj ra mwngz suenqsoq,rag mwngz bae raen nyaemzvuengz,heuh nyaemzvuengz dem coih hawj mwngz!"
    Daxnungz yienzbonj ngut ga naengh gwnz deih,seizneix de fwt ndengj ndwn hwnjdaeuj,danqheiq naeuz:"Yiz Cing!Dangco lwg gou sam baez hwnjsaw soengqlaex,caensim gvihaeuj Soengqciuz,cungj deng sou gatcied,sou lau daekcoih Gyauhcij,siengj dawz Coj-Yougyangh Bouxcuengh gat okbae.Dangco,cijaeu Cau Cwnh coenz vah he,cinj dou Bouxcuengh gvihaeuj Soengqciuz,ciengz hoenxciengq neix couh mbouj fatseng lo.Byawz rox Cau Cwnh huk daengq haex,ningznyienh rub hangx Gyauhcij,mbouj lau diegguek saet bae,mbouj goq Bouxcuengh dai lix.Guen bik minz fanj,minz mbouj ndaej mbouj fanj!(Yiz Cing bek daiz:"Hup bak!")Mwngz Yiz Cing hix mbouj dwg vunz,mwngz hix caeuq Gyauhcij doxngaeu,siengj heuh Gyauhcij okbing dwk Nungzginh,cij dwg Diz Cingh mbouj ngaek gyaeuj,cix banh mbouj baenz.(Yiz Cing caiq bek daiz:"Luenh vab!") Byawz miz coih,byawz mbouj miz coih,hawj daihlaeng daeuj bingz.Seizneix lij dwg ranz Cau dienyah,hawj boux miz coih daeuj saemj boux ndi miz coih,caen dwg ndaem hau doxfanj lo.Mwngz lwnh Cau Cwnh rox,gou youq lajyaem caj de,geij fanh Nungzginh fangzdaiien youq lajyaem caj de,yiengzgan suenqsoq mbouj seuq,bae lajyaem suenq seuq bae!"
     Yiz Cing baez daihsam bek daiz,ndatheiq fofo naeuz :"Daihdamj!Cienz dwg vahbyangz vahbag!Gou senq dingq gangj,mwngz ngoenz gwn laeq lwgnyez he.ngoenzngoenz gwn noh lwgnyez,nanzgvaiq mbouj rox doengcingz,luenh gangj luenh guh !"
    Daxnungz cam:"Gou gwn byalwgnyez,guh maz mbouj ndaej!"
     Yiz Cing fok naeuz:"Gwn noh lwgnyez,lij cam guh maz mbouj ndaej,manz hw!"
     Daxnungz naeuz:"Mwngz dwg gwn dangsimvunz ba?"
    Yiz Cing naeuz:"Gou gwn dangyinzsinh,miz maz geizheih?"
     Daxnungz riuhaha naeuz:"Hakguen vat simvunz daeuj cawj dang gwn,lij naeuz miz maz geizheih!Sou dwg duzguk,dwg duznyaen!"
     Yiz Cing heiq ndaej yaek fatbag bae,muengz hat naeuz:"Rag de roengzbae,gaej hawj de luenh raeuq dem!"
     Daxnungz deng rag roengzbae,lij daih riu daih hemq:"Hakguen gwn dangsimvunz,vuengzdaeq ngoenzngoenz gwn boh vunz......hahah......"
     Gvaqlaeng,Yiz Cing heiq ndaej baenz bingh sam ngoenz,doeklaeng caiq mbouj gamj saemj Daxnungz dem.De cijndaej ganjvaiq gyaiq Daxnungz ,Nungz Gifung ,Nungz Ci'gvangh hwnj Ging bae gyaucai.
     Daxnungz youq ndaw Ging gyaeng baenz buenq bi lai,mbouj miz vunz gamj saemj de,lau de caiq nauh goengdangz.Baez he,miz vunz daeuj gienq de sij saenq hawj Nungz Cigauh,heuh lwg daeuj Ging douzyangz.Daxnungz riunyaen naeuz:"Dangco lwg gou gag nyienh daeuj gvi Soengq,sou vih maz mbouj cinj?Seizneix sou siengj heuh de gag dawz gyaeuj daeuj,cawz sou guh daengz gienh saeh he."
     Bouxhaenx cam:"Banh gijmaz saeh?"
     Daxnungz naeuz:"Gienh saeh neix mwngz banh mbouj daengz!"
     "Mwngz gangj ba,gou itdingh banh ndaej daengz."
     Daxnungz riu naeuz:"Daengjgyaq doxvuenh,yiengh he vuenh yiengh he,aeu gyaeuj Cau Cwnh daeuj vuenh gyaeuj lwg gou!"
     Ndaek vunz haenx heiq ndaej da hau bae,baet gen deuz lo.
     1054 nienz goujnyied,Daxnungz ,Nungz Gifung ,Nungz Ci'gvangh doengzseiz deng gaj.
     Geij ndwen le siusik cienz daengz Daihleixguek,Nungz Cigauh simcieg dangqmaz.De lumh gij doxgaiq daxmeh soengq hawj de haenx,raemxda lumj mboq.De hawj daxmeh nda lingzdaiz,aeu buh daxmeh dang ndang meh,daiq roek boux yah caet laeq lwg,daih caeq daxmeh sam ngoenz.
     Daihleixguek guekvuengz Wnhlenz caemh caenndang daeuj caeq.
     De nai Nungz Cigauh naeuz:"Mwngz gaej siengsim lai,aeu ngeix daengz gyae di.Cij vih geij bi neix guek gou mbouj hwng,mbouj ndaej bang mwngz,gou gvaqeiq mbouj bae."
     Nungz Cigauh lienzlienz docih naeuz:"Geij bi neix daxau ndaej ciuqgoq gou,gou ciengxlwenx mbouj lumz.Gou ciuh vunz cij guh song gienh saehingj Gyaucij,gouz gvi Soengq.Fanj Soengq mbouj dwg yienzbonj sim gou,cij vih gvihaeuj mbouj ndaej,cix aeu hwnjbing daeuj gouz gvihaeuj.Ngoenzneix Gvangjyenzcouh gaenq deng Soengqciuz  gaij baenz  Suncouh,Bouxcuengh  gou   caencingq gvihaeuj Saenzcouh Daihguek,gou dai da hix laep lo."
     Wnhlenz naeuz:"Mwngz ciuh neix guh ndaej goenjhuhu,mbwn deih cungj raen.Cij vih caw deng faenx cw,vunz yawj mbouj cingcuj hane,ndwenngoenz nanz le,daihlaeng rox duenq goengdauh."
     Nungz Cigauh naeuz:"Gou lij miz gienh saeh he,gvaqlaeng  daxau ciuq eiqsei gou bae guh."
     Wnhlenz naeuz:"Miz saeh caenhguenj gangj,gou itdingh ciuqbanh."
     Nungz Cigauh naeuz:"Geij bi neix mwngz ciuqgoq gou,gou mbouj ndaej bauqdap,daengz gou dai le,mwngz dawz gyaeuj gou soengq bae Ging,couh naeuz dwg mwngz cawz gou,sawj ciuzdingz mbouj ndaej gvaiq mwngz."
     Wnhlenz lienzlienz baet fwngz:"Mbouj ndaej,mbouj ndaej!Mwngz baenzneix gangj ngeihheiq,gou yawz mbouj ndaej mbouj gangj cingzngeih ne!"
     Nungz Cigauh caensim caiq baiq naeuz:"Neix dwg gou nyienh.Vunz dai le cix mbouj miz yungh lo,hoeng gou dai le gyaeuj lij miz yungh,neix dwg mbwn goq gou.Mwngz couh ciuq mbwn banh ba,caemh dwg hawj gou aeunaj ha."
     Wnhlenz danqheiq raezrangh,naeuz:"Cixbah,cixbah!Gou lingx faenh sim'eiq naekna mwngz.Vunz dai le bonjlaiz couh liux lo,mwngz dai le cix vih bouxwnq gaij you,lajmbwn noix miz,daj ciuhgoek daeuj hix noix raen."
     Nungz Cigauh youq henz Wjhaij haem buh hawj daxmeh guh moh,caemh youq haenx dap diengz soujhauq ndwen he.
     1055 nienz seiqnyied,Nungz Cigauh youq Daihleix bingh dai.Wnhlenz baij vunz dawz gyaeuj Nungz Cigauh soengq bae Ging.Nungz Cigauh dai gaxgonq daeq mumh gvaq,caj gyaeuj soengq daengz Ging,mumh gingqyienz maj ok sam conq lai raez.              (sat)

回复

使用道具 举报

933

主题

9

听众

5万

积分

管理员

Rank: 15Rank: 15Rank: 15Rank: 15Rank: 15Rank: 15Rank: 15Rank: 15Rank: 15Rank: 15Rank: 15Rank: 15Rank: 15Rank: 15Rank: 15

最后登录
2020-1-10
注册时间
2002-5-6
发表于 2005-6-23 10:55:00 |显示全部楼层

这部小说是以《三月三》壮文版连载的形式来出版的,希望以后有机会将之装订成单册出版。


Gin kauj ndip naz, Gin bya ndip dah(僚人民谚:吃饭惜田,食鱼爱河)
回复

使用道具 举报

75

主题

1

听众

6751

积分

东灵神

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2012-10-9
注册时间
2005-1-1
发表于 2005-6-23 12:08:00 |显示全部楼层

Nungz Cigau gangj : [ Gou ciuh vunz cij guh song gienh saehingj Gyaucij,gouz gvi Soengq.Fanj Soengq mbouj dwg yienzbonj sim gou,cij vih gvihaeuj mbouj ndaej,cix aeu hwnjbing daeuj gouz gvihaeuj.Ngoenzneix Gvangjyenzcouh gaenq deng Soengqciuz gaij baenz Suncouh,Bouxcuengh gou caencingq gvihaeuj Saenzcouh Daihguek,gou dai da hix laep lo." ]

Loh manh laux sae ?

Vunzcuengh raeuz dangh seiz mbouj rox soengqciuz naeuh nduk ? Lij siengh gvi soengq ?


回复

使用道具 举报

1

主题

1

听众

490

积分

水精灵

Rank: 4Rank: 4Rank: 4Rank: 4

最后登录
2005-12-1
注册时间
2005-9-17
发表于 2005-9-30 22:18:00 |显示全部楼层
风水轮回转,侬智高的后代又在越南当皇帝了,

回复

使用道具 举报

5

主题

0

听众

2628

积分

贵宾

Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12Rank: 12

最后登录
2009-7-16
注册时间
2005-3-15
发表于 2006-3-13 14:54:00 |显示全部楼层

哇,好長的一堂壯文教學課程。

請問路漫老師,可否簡單說明一下這本小說創作的過程,例如您與韋先生如何合作?是先有中文還是先有壯文?當初怎麼會想要寫這本小說?參考了哪一些書籍?

因為韋一凡的《壯族英雄儂智高》是以中文的方式在1994年出版,你們的創作是在1993-1995年中間,我對了一下壯文與中文的目錄,基本上是類似的,也就是中翻壯或者壯翻中,除了最後兩章之外。然後我又回頭找了一下中文版裡面相對應到紅棉樹非常傳神翻譯的那一段(四十樓的翻譯),大概就在中文《壯族英雄儂智高》42頁。中文是用很含蓄的方式表達,很不過癮啊。

另外,這本書成書出版了嗎?


回复

使用道具 举报

0

主题

0

听众

488

积分

新来贝侬

Rank: 1

最后登录
2009-7-27
注册时间
2006-9-27
发表于 2006-9-28 18:04:00 |显示全部楼层
要好好的学壮文了 好读懂她

永远爱我们的壮乡 爱我们的壮族文化
回复

使用道具 举报

87

主题

4

听众

7627

积分

九头龙

Rank: 13Rank: 13Rank: 13Rank: 13Rank: 13Rank: 13Rank: 13Rank: 13Rank: 13Rank: 13Rank: 13Rank: 13Rank: 13

最后登录
2018-8-23
注册时间
2006-9-9
发表于 2006-9-28 18:15:00 |显示全部楼层
记住民族英雄,发扬民族精神.

回复

使用道具 举报

您需要登录后才可以回帖 登录 | 注册  

允许回帖同步到新浪微博  

Archiver|手机版|壮族在线    

GMT+8, 2024-7-13 17:34 , Processed in 0.257566 second(s), 47 queries .

Powered by Discuz! X2.5

© 2001-2012 Comsenz Inc.

回顶部