《侬智高》（第一部壮文长篇历史小说）

Stoneman

	Caiq heijdongj (docih) Lohmanh Lauxsae. Lohmanh Lauxsae lwnh gou rox gij cih baihgwnz haenx dwg gij maz eiqsei lo, gou couh naemj hwnj miz saek di cih youq mbanj gou dwg baenzlawz naeuz: Sawcuengh Cuengh Mbanj Gou Sawgun gyangq gyengq 犟 gahoq gyaeujhoq 膝盖 nyaenj (gaemzgienz) nienj (gaemzgienz) 握紧(拳头） (meizda) nyaeuq (meizda) yaeuq (眉头) 绉 nywnx ywnx 腻、烦 rwenz ruenz 爬行 sangj suengj 爽 Bonj saw Lohmanh Lauxsae sij neix gou geibonj yawj ndaej rox, yiengznaeuz haujlai cih cungj dwg mbat daih’it yawjraen. Yienzaen ne gou naemj couh dwg aenvih gou dwg boux rox gangj Cuengh haenx. Danghnaeuz mwngz rox gangj Cuengh, youh haengj haeujsim bae hag bae geiq, Sawcuengh mbouj suenq nanz hag. Gou muengh gyoengq beixnuengx Bouxcuengh doeg gvaq saw haenx bouxboux cungj bae hag daeuj yungh Sawcuengh gonq. Baenzneix guh ne, raeuz couh daiq ndaej hwnj lai lai vunz cungj daeuj hag bae yungh Sawcuengh. Miz ngoenz ndeu Sawcuengh couh itdingh baenz saw daengx dieg Cuengh. Daengz seizhaenx Bouxcuengh raeuz gak dieg mbouj yungh Sawgun lij ityiengh aeu Sawcuengh daeuj doxgyaulouz ndaej. Gou maqmuengh ngoenz haenx daeujdaengz vaiq di. Gyoengq beixnuengx, raeuz lwglan aeu hag daxgoeng raeuz Nungz Cigauh, raeuz aeu bae roengzrengz cijndaej ha!!! [此贴子已经被作者于2004-8-13 8:22:27编辑过]

Stoneman

	Cingj Lohmanh Lauxsae caiq son'gyauq gou gij cih baihlaj dwg naeuz gijmz. Mwngz dwgrengz lo. Singgiz laeng caiq raen. Bet. Bakraeh Buek Gyauhcij 八、兡鋫驳交趾 boemz (diz mbouj luenz, boemz mbouj rox benj!): bop (linx cix hwnj bop naeuh bae): citgeiz (Mwngz citgeiz lai): cuengqlangh (mwngz daiq cuengqlangh!): dafeuh (mbouj lumj gyoengqde dafeuh ba?): dakdaih (mwngz aeu ndeindei dakdaih): dumdeng (Nungz Cigauh dumdeng ndwn hwnjdaeuj): foed (gijmaz rum foed cungj cimz gvaq): gaiq (yienzlaiz dwg song deb linxvaiz baenz gaiq): najhaemhwd (bouxboux najhaemhwd): ndau (ndau gijmaz gangj ndaej ok gijmaz): ndiengq (mbouj ngaem mbouj ndiengq): ngonz (ndeindei "ngonz" Nungz Cigauh hwnjdaeuj) riunyaen (Nungz Cigauh riunyaen naeuz): sawj (sawj Lij Dwzcwng naemj bae naemj dauq): vaek (Swnh Cwngzgvei deng vaek dwk da daengx liux):

Duhhenj

	hehe,gou caemh heuh 膝盖 guh "gyaeujhoq" ! heuh 脚踝 guh "duqbaeu"

路漫

	boemz (diz mbouj luenz, boemz mbouj rox benj!): 摔（捶不圆，摔不扁） bop (linx cix hwnj bop naeuh bae): 泡（舌头就起泡烂掉） citgeiz (Mwngz citgeiz lai): 出奇、稀罕（你有多稀罕） cuengqlangh (mwngz daiq cuengqlangh!): 放荡（你太放荡） dafeuh (mbouj lumj gyoengqde dafeuh ba?): 目光短浅（不像他们目光短浅吧？） dakdaih (mwngz aeu ndeindei dakdaih): 招待（你要好好招待） dumdeng (Nungz Cigauh dumdeng ndwn hwnjdaeuj): 突然（侬智高突然站起来） foed (gijmaz rum foed cungj cimz gvaq): 树枝、树叶（什么杂草树叶都尝过） gaiq (yienzlaiz dwg song deb linxvaiz baenz gaiq): 块（原来是两碟整块的牛舌） najhaemhwd (bouxboux najhaemhwd): 怒容、严肃状（人人脸上显出怒容） ndau (ndau gijmaz gangj ndaej ok gijmaz): 唠叨、倾谈（唠叨什么说出什么） ndiengq (mbouj ngaem mbouj ndiengq): 仰（不俯不仰——不亢不鄙） ngonz (ndeindei "ngonz" Nungz Cigauh hwnjdaeuj) 看守（好好把侬智高看管起来） riunyaen (Nungz Cigauh riunyaen naeuz): 冷笑（侬智高冷笑道） sawj (sawj Lij Dwzcwng naemj bae naemj dauq): 使（使李德政左思右想） vaek (Swnh Cwngzgvei deng vaek dwk da daengx liux):质问（孙承贵被质问得发呆了）

Stoneman

	以下是引用Duhhenj在2004-8-14 12:26:29的发言： hehe,gou caemh heuh 膝盖 guh "gyaeujhoq" ! heuh 脚踝 guh "duqbaeu" "脚踝" youq dieg gou heuh guh "dabaeu".

Stoneman

	Docih Lohmanh Lauxsae. Cingj mwngz ndaej hoengq caiq son gou gij cih baihlaj: Gouj. Soudauq Diegsaet 九、收辺坻失 cungda (ndaej daengz cungda ginhcingz): laeglemx (laeglemx ndonj haeuj singz Gvangjyenz): leuxcih (leuxcih cix dawz daeuj hawj lwgnyez uet caekhaex!): najbyak (feidau baek haeuj najbyak): nanq (nanq naeuz mbouj ndaej dauqma lo): nyaengqnyaen (sousib doxgaiq nyaengqnyaen): nyaih (sawj gyoengqde sim nyaih): singjgaeh (heuh soujbing singjgaeh Nungz Cigauh hengzdoengh):

红棉树

	Gou daeuj bang Loh Manh Lauxsae hoiz 86 laeuz ba. Gouj. Soudauq Diegsaet 九、收辺坻失 cungda (ndaej daengz cungda ginhcingz): 重大（得到重大军情） laeglemx (laeglemx ndonj haeuj singz Gvangjyenz): 悄悄地、偷偷地（悄悄地窜进了广源城） leuxcih (leuxcih cix dawz daeuj hawj lwgnyez uet caekhaex!): 然后（然后就拿来给小孩子擦屁眼） najbyak (feidau baek haeuj najbyak): 额头（飞刀扎入额头） nanq (nanq naeuz mbouj ndaej dauqma lo): 估计（估计说回不来了） nyaengqnyaen (sousib doxgaiq nyaengqnyaen): 匆忙、忙碌（匆忙收拾东西） nyaih (sawj gyoengqde sim nyaih): 瓦解、松散（令他们军心松懈） singjgaeh (heuh soujbing singjgaeh Nungz Cigauh hengzdoengh):警惕（叫守兵警惕侬智高行动）

路漫

	cibsam. Gaj Gaeq Gwn Laeujlwed 十三、嘎鳮哏溇淕         Bakdou gaenq gven maenhndwt,Nungz Cigauh gietsim gawj geiz fanj Soengq,aeu lwed daeuj gouz ndaej Bouxcuengh caencingq baenz aen minzcuz Cungguek minzcuz daih gyadingz he,mbouj hawj Soengqciuz Cau Cinh dawz dieg Cuengh ndek hawj guekwnq!           Nungz Cigauh sien dawz aen simsaeh neix lwnh hawj Daxnungz.Daxnungz yawj ndaej gyae ngonz ndaej gvangq,gig cihciz lwg de fanj Soengq,lij baij dauhleix hawj Nungz Cigauh guh mbei:"Gaxgonq Cinzsijvangz dungjit Cungguek,dieg guek gvangq daengz Lingjnanz,goenglauz mbwk ne.Hoeng,doeklaeng de nyoegnyamx beksingq,lwgminz souh hoh souh nanh,Cwnz Swng、Vuz Gvangj youh hwnj bing fanj de.Vuengzdaeq rwix couh hab fanj!Seizneix Soengqciuz ranz Cauz mbouj rox guh vuengzdaeq,mbouj aeu lwgminz,mbouj goz diegguek,beksingq souh hoj,mbouj fanj de couh gangj mbouj bae lo.Mwngz aeu geiq maenh,raeuz cauhfanj,mboujdan dwg vih Bouxcuengh,caemh vih gak minzcuz daengx dienyah,cienfanh gaej gag goq gag guh ha."            Nungz Cigauh goenggingq naeuz:"Gou rox lo,aeu heuh hwnj beksingq lajmbwn,caez fanj Soengqvuengz.Couhcinj gou dwk mbouj ndaej daengz Gingsingz,hix aeu hwk de ok ndang hanhheu he,hawj beksingq ndaej gvaq ndei di!"              Daxnungz angq naeuz:"Ndei!Mwngz dwg lwg ndei gou.vih saehnieb Bouxcuengh,gou ciuhneix sien soengq ok daxboh mwngz,couh dwg caiq ok mwngz,soengq ok daengx ranz vunz,soengq ok diuz mingh gou,gou hix mbouj ienq!Raeuz Bouxcuengh mbouj lau dai,guk dai raiz lij youq hw!"             Riengzlaeng,Nungz Cigauh couh caeuq Vangz Veij、Vangz Swhmi doengzcaez yaeng baenzlawz hwnjbing.Vangz Swhmi dawz ok deihdoz Yunghcouh,naeuz:"Mbathaenx veh ndaej mbaw doz he,seizneix miz yungh lo."          Nungz Cigauh naeuz:"Ndei ha!sou beij gou ngeix ndaej caeux ho!"          Vangz Veij naeuz:"Gienh saeh neix,mbouj ndaej gangj guh couh guh.Aeu sien guh ndei gak fuengmienh cunjbei.It aeu lienh ndei bing,naengz gung naengz souj,yienghyiengh sug hoenx;ngeih aeu bwh ndei cienz haeux cax nangx daengj doxgaiq,lij aeu an ndei beksingq;sam aeu siujsim,gaej hawj Soengqciuz guenhak simngeiz raeuz."           Yienghneix,Nungz Cigauh heuh Vangz Swhmi guenj cienz haeux cax nangx,Vangz Veij bang laeb bingdoih.Nungz Cigauh roengzlingh heuh gak giz bouxdaeuz daiq bouxcoz daeuj comz Anhdwzcouh lienh bing.Gyoengq bing comz haeuj ndaw ndoeng,Nungz Gencungh dang cungjgyaudouz,son'gyauq gak cungj goengfou.Nungz Cigauh caenndang daeuj nda caenh baizlienh,de heuh sam vunz guh cuj,vunz he dawz cax,song vunz dawz nangx,boiqhab gaj dig;geij cib cuj guh doih he,caez yamq gung baenaj,lumj faj ciengzdiet he senj bae sadsad,rengz ak fouzbeij,naengz comz naengz sanq,lingzvued dangqmaz,cungj caenhfap neix,ciuhlaux caengz raen gvaq.            Vangz Swhmi baij vunz seiqcawq bae cawx baengz ma nyumx hoengz,Veiz Meijsenh、Veiz Sifung daiq gyoengq bing lwgmbwk ganj nyib buhbing.Vuj Hwzli、Hij Yenz daiq cangdiet diz cax diz nangx.Vangz Soujlingz、Veiz lauxhoengz bwh haeux bwh max.Gak yiengh hong guh ndaej ndei youh maed.           Gvaq ndaej buenq bi he,yienghyiengh cungj guh ndei lo,Nungz Cigauh baij Vangz Veij daiq doih bing he cang baenz gaujvaq,itloh vaq gwn daengz Yunghcouh,bae daengz bakdou yaxmonz cingjgouz gouqcaeq,naeuz Bouxcuengh deng cainaek,mbouj miz haeux roengz rek,okdaeuj deuznanh.Couguen laihnaeuz dwg caen,riuhaha naeuz:"Ndei ha!Diegcuengh nauh cainanh,Nungz Cigauh mbouj dwg hix gag mied lo,mbwn bang gou ha!"          Vangz Veij daiq gyoengq "gaujvaq" haenx doeklaeng cix maizfug youq ndaw singz,deqcaj seizgei.          Vangz Veij youq Yunghcouh cazyawj ndwen he,cai hak cungj mbouj dawz gyoengqde haeuj rwz.Mboujliuh miz ngoenz he,Yunghcouh canhginh Gungj Cunghdan daeuj gwnz gai cazcam gaujvaq,raen de yupyup yiengyieng,Vangz Veij simngeiz lo.Daengz haemh,Vangz Veij bae ra Daegsam,hawj de cib liengx ngaenz,heuh de damqcaz Gungj Cunghdan yaek loengh maz fangz.Daegsam youq henz ndang couguen dangcai,ngoenzlaeng ndaejnyi Gungj Cunghdan daeuj ra couguen,de sikhaek caegcaeg bae lajcueng dingq songde gangjvah.            Cij dingqnyi Gungj Cunghdan naeuz:"Dayinz!Ndwen neix daeuj,gwnz gai miz geij bak gaujvaq Bouxcuengh,gou roxnyinh miz di geizgvaiq.Gou raen gyoengqde noh hoengz naj rongh,mbouj lumj doengh boux vaq gwn ne."           Couguen cam:"Mwngz ngeiz dwg Nungz Cigauh baij bouxcaegdamq daeuj?"           "Gou dwg yienghneix naemj,Nungz Cigauh soqlaiz gveijmaj,raeuz mbouj ndaej mbouj fuengz."           "Ndaw gaujvaq miz mbouj miz vunz naj henj ndang byom ne?"           "Miz,hoeng mbouj lai."           "Gou gangj ne,guh gaujvaq yinhheiq ndei cix dungx raeng,boihseiz cix dungx beb;boux gvai imq,boux huk cix iek.Gaujvaq miz ndang cangq ndang nyieg,neix mbouj geizgvaiq,mwngz simngeiz lai lo."            Gungj Cunghdan youh naeuz:"Ndwen neix daeuj,gou ciengz yawj mbwn,raen saenamz miz ndaundeiq caeg,youh raen ndaw coufuj mauh'ok mokhau,neix mbouj gitleih,lauheiq Nungz Cigauh yaek cauhfanj hw."             Couguen huj lo,naeuz:"Mwngz naeuz coufuj ok mokhau?Nanzdauh Nungz Cigauh yo youq ndaw yaxmonz! Roxnaeuz gou yaek deng cai?"         Gungj Cunghdan naeuz:"Mbouj dwg,mwngz gaej leunh cai."         Couguen naeuz:"Haemh neix mwngz couh youq neix,danghnaeuz raen miz mokhau,gou couh saenq mwngz,danghnaeuz mbouj miz,mwngz baenzlawz gangj dem?"          Gangj miz mokhau dwg Gungj Cunghdan vih gangjfug couguen luenh vap okdaeuj,seizneix raen couguen huj lo,cix naeuz:"Yawj gijneix mbouj dwg bouxboux ndaej raen,gou dwg caensim doiq ciuzdingz,cij lwnh mwngz ne."           Couguen engq huj l"Yo,mwngz dwg daihlaeng Gungjswj,rox yawj mbwn dwg lwi?Gou dwg vunzbiengz,mwngz gae gou damong dafangz ha?"            Gungj Cunghdan raen couguen nyap lo,mbouj gamj lai gangj,geb rieng deuz lo.            Daegsam dawz gij saeh neix lwnh hawj Vangz Veij,Vangz Veij angqdangqmaz,youh dajsiengj Daegsam haj liengx ngaenz.            Vangz Veij guj hwnjbing saedceij yaek daengz,couh daengq gyoengq "gaujvaq" siujsim deqcaj,Nungzginh hoenx daengz Yunghcouh,cij ndaej hengzdoengh.Saehcingz daengq ndei le,de couh lienzhaemh ganj baema Andwzcouh.         Vangz Veij ma daengz Anhdwzcouh,cingq bungz song yiengh heijsaehaxnungz haq Veiz Sifung hawj Nungz Gencungh,Nungz Cigauh dahlwgdaeuz hawj Vuj Hwzli.ndaw ranz rog ranz venj hoengz venj daengz,nauhnyied dangqmaz.Vangz Veij bauqlwnh Yunghcouh cingzgvang le,Nungz Cigauh gig angq,naeuz:"Mwngz sinhoj lo,seizneix yienghyiengh bwh ndei,cij caj ngoenzndei lo."            Haemh haenx banh laeuj cingj hek,bouxhek sanq le,Nungz Cigauh youh heuh lingh nda sam daiz laeuj,cingj Daxnungz、Vangz Veij、Vangz Swhmi naengh baihgwnz,de caeuq roek meh yah naengh cungqgyang,Nungz Gencungh、Vuj Hwzli caeuq bawxmoq naengh baihlaj.Gwn gvaq sam vanj laeuj le,Nungz Cigauh hemq naeuz:"Dawz gaeq daeuj!"          Lwgdaeuz de Nungz Gifungh ndenq duz gaeqboux he hawj de,de vax dawz fwed gaeq,yot giemq okdaeuj,youq gyaeujdaiq raemj goenq gyaeuj gaeq,dawz lwed gaeq ndik roengz huzlaeuj bae,lwed ndik liux le,dawz gaeq vid gvaq diencingj,hemq naeuz:"Gwn laeuj doengzsim,boux vanj!"            Nungz Cigauh caem laeuj,daj Daxnungz hwnj,cug daiz cug boux caem caez,daengx ranz caemrwgrwg,naengh sohswd caez muengh Nungz Cigauh.           Nungz Cigauh baez vad fwngz,Veiz Meijsenh youq gwnz daiz hoengq he bu ndei gouj cik baengzhau,Nungz Cigauh byaij gvaqbae,dawz bit yub maeg,lungz mbin fungh foux sij roengz bet cih saw:"Dai lix caezsim,doengz guh daihnieb!"Sij sat vut bit roengz deih,caeuq Veiz Meijsenh venj baengz hwnj ciengz bae.Leuxle gingz vanjlaeuj naeuz:"Raeuz ranz Nungz goetyiet ceiq caen,caez dawz hwnj laeuj doengzsim,coh mbwn guh mieng!"           Nungz Cigauh gvih youq naj baengz,Daxnungz riengzlaeng,gak boux ciuq baizban cug boux baiz youq baihlaeng.            Nungz Cigauh lingxdaeuz mieng:"Dai lix caezsim,doengz guh daihnieb!"            Nungz Cigauh gingz vanj,naeuz:"Gwn laeuj lwed!"De daiqdaeuz ndoet daengz daej.Daihgya hix faenfaen ndoet seuqsat.           "Bya!"Sing ndeu,Nungz Cigauh boemz vanj naeuz:"Ningz aeu nyawh soiq,mbouj guh vax cienz!"           Daxnungz hix boemz vanj naeuz:"Bouxcuengh mbouj lau dai,lau dai mbouj dwg Bouxcuengh!"           Vangz Veij boemz vanj hemq:"Seng vih Bouxcuengh seng,dai vih Bouxcuengh dai!"           Vangz Swhmi boemz vanj swenj naeuz:"Gou caeuq daihgya caemhsim!"           Nungz Gencungh caeuq Vuj Hwzli doengzcaez boemz vanj,caez gvih youq baihnaj Nungz Cigauh mieng:"Riengz Nungzvuengz daj dienyah daengz dai!"            Yah lwg Nungz Cigauh cungj boemz vanj caez,lienz dahlwg iq ngamq rox gangjvah haenx hix boemz lo.

Stoneman

	Docih Loh Manh Lauxsae. Cingj mwngz ndaej hoengq caiq son'gyauq gou gij cih lajneix: cib'it. Hwnj Saw Yunghcouh 十一、佷书邕州 cauxhux (Neix it ndaej siu de cauxhux): ciengxlwenx (bauj Nungz Cigauh ciengxlwenx mbouj cauhfanj): cunz (Gou ngamq bae cunz Yunghcouh ma): dij (ngaenz caiq lai hix dij): doz (haet byaij haemh doz): gej (Vangz Veij muengz gej naeuz): goenh (Vangz Veij cawx goenh caeuq soij): hangx (Gangj le cix cienq hangx okbae lo): hux (Gou nyinhnaeuz Cigauh dwg diuz hux ndeu): mbajmbwt naeuz: mued (raemx rim cix mued): mumjgyumq (da mumjgyumq naengh gwnz lungzdingz): ndongqgywg (ndaw hab coux soij ndongqgywg): net (Ndaw sim mbouj net): raurumz (lienzlienz raurumz): riuj (Vangz Veij riuj aen hab):

Stoneman

	Cingj Loh Manh Lauxsae ndaej hoengq caiq son'gyauq gou gij cih lajneix: cib. Sim Rongh Ceiqheiq Sang 十、心煷志气槡 byandoek (ndang lumj byandoek): coemj (De coemj gvaqbae): doxrengh doxnangq mbouj ndaej goenqduenh: fatbag (Nungz Cigauh angq ndaej yaek fatbag): gekhaed (yoengx hai faq doudiet minzcuz gekhaed neix): goenjfoed gyukhu (ai hix aeu dai ndaej goenjfoed gyukhu!): luenzbenj (gyaeuj luenzbenj): maeuq … nengz (beij maeuq youq ndaw haz gwn nengz gwn daek feihdauh lai hw): mboengj (mboengj daiz naeuz): mbwqmbwt (ndawsim mbwqmbwt): mieng (yienzhaeuh gingz laeuj doiq mbwn mieng naeuz): mong (laeng ndaem dungx mong): nanznanz (nanznanz cij bibi rieng): ngaiznyed (daihvuengz ngaiznyed mbouj gangj): nyuknyak (lauheiq gauj ok nyuknyak dem): rij, geh (Cungj bya neix youq ndaw rij geh dat): rom (lai rom haeuxliengz): roxyiuj (roxyiuj ciuzdingz gvigawj): vengq … ngut (vengq dieg he,loh gaeb roen ngut): yaeuj (yaeuj batdin coux byalwgnyez daeuj lo):

路漫

	byandoek (ndang lumj byandoek): 塘角鱼（应是bya'ndoek，该处少了个隔音符号）（身体形如塘角鱼状） coemj (De coemj gvaqbae): 捕、扑（他扑过去） doxrengh doxnangq mbouj ndaej goenqduenh:承接、相继（互相承接不要断折） fatbag (Nungz Cigauh angq ndaej yaek fatbag): 发疯（侬智高高兴得快要发疯了） gekhaed (yoengx hai faq doudiet minzcuz gekhaed neix): 隔阂（推开这一民族隔阂的铁门） goenjfoed gyukhu (ai hix aeu dai ndaej goenjfoed gyukhu!): 轰轰烈烈（死也要死得轰轰烈烈） luenzbenj (gyaeuj luenzbenj): 椭圆（椭圆形的头） maeuq … nengz (beij maeuq youq ndaw haz gwn nengz gwn daek feihdauh lai hw): 蹲……虫（比蹲在茅草里吃虫子、蚂蚱味道好多啰） mboengj (mboengj daiz naeuz): 拍打（拍桌子说） mbwqmbwt (ndawsim mbwqmbwt): 烦闷、忧郁（心里烦闷） mieng (yienzhaeuh gingz laeuj doiq mbwn mieng naeuz): 咒、发誓（然后举酒对天发誓道） mong (laeng ndaem dungx mong): 灰色（身背黑色肚皮灰色） nanznanz (nanznanz cij bibi rieng): 久久（久久才摇摇尾巴） ngaiznyed (daihvuengz ngaiznyed mbouj gangj): 拖延、不爽快（大王拖延不语） nyuknyak (lauheiq gauj ok nyuknyak dem): 乱子（恐怕搞出乱子来呢） rij, geh (Cungj bya neix youq ndaw rij geh dat): 溪，缝（这种鱼住在溪水的岩缝里） rom (lai rom haeuxliengz): 贮存、积累（多贮存粮食） roxyiuj (roxyiuj ciuzdingz gvigawj): 通晓（通晓朝廷规矩） vengq … ngut (vengq dieg he,loh gaeb roen ngut): 片……曲（一小片地，路窄道弯） yaeuj (yaeuj batdin coux byalwgnyez daeuj lo):提（提着脚盆盛着娃娃鱼来了）

路漫

	cauxhux (Neix it ndaej siu de cauxhux): 造祸、酿成灾祸（这样一方面可以防止他造祸） ciengxlwenx (bauj Nungz Cigauh ciengxlwenx mbouj cauhfanj): 永远（保证侬智高永远不造反） cunz (Gou ngamq bae cunz Yunghcouh ma): 巡走（我刚刚走一趟邕州回来） dij (ngaenz caiq lai hix dij): 抵、值（钱再多也值得） doz (haet byaij haemh doz): 住宿（早行晚宿） gej (Vangz Veij muengz gej naeuz): 解释（黄伟连忙解释道） goenh (Vangz Veij cawx goenh caeuq soij): 手镯（黄伟买了手镯和耳环） hangx (Gangj le cix cienq hangx okbae lo): 屁股（说罢就转身出去了） hux (Gou nyinhnaeuz Cigauh dwg diuz hux ndeu): 祸（我认为智高是个祸根） mbajmbwt naeuz: 结巴（结结巴巴说） mued (raemx rim cix mued): 淹没（水满就溢） mumjgyumq (da mumjgyumq naengh gwnz lungzdingz): 模糊、隐约（眼睛模模糊糊坐在龙庭上） ndongqgywg (ndaw hab coux soij ndongqgywg): 闪亮、鲜亮（盒子里盛着闪亮的耳环） net (Ndaw sim mbouj net): 紧实、踏实（心中不踏实） raurumz (lienzlienz raurumz): 呵欠（连连打呵欠） riuj (Vangz Veij riuj aen hab):提、携（黄伟提着个盒子）

路漫

	cibseiq. Dwk Roengz Yunghcouh 十四、徳躘邕州            1052nienz seiqnyied coloeg,dwg Nungz Cigauh ciuhneix ngoenz ceiq ronghnaj ndeu!            Gaeq ngamq haen,Nungz Gencungh、Vuj Hwzli couh youq naj ranz gungdienh laeb hwnj diuz saux he,dingj saux venj hwnj mbaw baengz Nungz Cigauh sij miz “Dai Lix Caezsim,Doengz Guh Daihnieb”bet cih saw haenx,henz baengz aeu baengzhoengz nyib bien,mbinfwgfwg gig angjda.            Gyoengqvunz nyaengqnyat diemj doxgaiq,Nungz Cigauh daengq daengx ranz vunz,daj ngoenzneix hwnj,daengx ranz caez okbing.Soj miz daengx ranz caizcanj,diemj hawj bingdoih yungh.Nungz Cigauh roek meh yah,boux hawj duz maxdaemq he caeuq aen giuh he,maxdaemq doz doxgaiq,giuh naengh vunz.Veiz Meijsenh dwg bouxdaeuz bingdoih mehmbwk,gag naengh max sang.Daxnungz daiq yahhoiq he,yungh gyaq maxci he doz aen doengjraemx hung ndeu,ndaw doengj coux miz sam cib lai duz byalwgnyez,dajsuenq gung roengz aen singz he couh gaj duz byalwgnyez ndeu.             Daengngoenz ngamq hwnj,roq gyong humhum,ci hauh goenjdat,Nungz Gencungh、Vuj Hwzli、Hij Yenz gwih max hwnj ciengz,haj cien boux bing daenj buhhoengz caez hemq “Gaenriengz Nungzvuengz”riengzlaeng.Bingdoih bouxsai baihlaeng dwg bingdoih mehmbwk,haj bak bouxbing mehmbwk bouxboux rengzrwd cangqcwt,beij ndaej hwnj bouxsai bae.           Gum!Gum!Gum!……gouj sing bauq lienz yiengj,Nungz Cigauh daenj mauhhang buhhoengz,hwet naep baujgiemq,fwngz gaem caxmbat,byaij ok gungdienh,ginhswh Vangz Veij,fuginhswh Vangz Swhmi gaenj riengz song mbiengj.Nungz Cigauh yat hwnj maxhoengzgeq,cib boux bing ram mou duz hung he cuengq youq laj mbaw baengz “Dai Lix Caezsim,Doengz Guh Daihnieb”haenx,Nungz Cigauh fad max hwnjbae,Mbat cax raemj goenq gyaeuj mou,lwed mou byoq muenx deih.Nungz Cigauh mbat vix gungdienh naeuz:“Coemh!”             Geij cib boux bing gwed bogfeiz,buet haeuj gungdienh,yaep he,cijraen hoenz hwnj faenfaen,feiz dawz huhu,iengj ndaej mbwn hoengzoqoq,gungdienh bienqbaenz feizhaij,lienz daengngoenz cungj myox bae.            Nungz Cigauh gwih youq gwnz max,doiq gyoengq guen bing naeuz：“Ngoenzneix gou coemh ranz fanj Soengq,cungj dwg Cau Cinh ndaek vuengzdaeq naeuh neix bik okdaeuj!Gyoengq beixnuengx,byawz miz mbei couh riengz gou dwk bae Gingsingz,naengh dienh vuengzdaeq gwn laeuj!”           Gyoengq bing hemq sadsad:"Riengz Nungzvuengz cauhfanj!"           Nungz Cigauh vad giemq baez vix:"Hwnjdin!"           Vuj Hwzli、Hij Yenz guh senhfungh daiq bing gwed geizhung byaij baihnaj,Nungz Cigauh daiq daihdoih byaij cungqgyang,bingdoih mehmbwk riengz baihlaeng.Ceiq doeklaeng dwg haeuxliengz caeuq lwgyah ranz Nungz.          Bingdoih lumj duzlungz rengzrwd ndeu mbin bongh baenaj,itloh ndaej daengz beksingq angqcoux,soengq caz soengq gijwn.Haujlai bouxcoz ndek gvak ndek cae dawz cax dawz nangx gag nyienh caezfaenh hwnjbing.Bae daengz Hwngzsanhcai,bingdoih gaenq demgya daengz caet cien lai vunz. Nungzginh rub daeuj,Hwngzsanhcai bouxdaeuz Cangh Yizsinh hwk dwk cacoemj baij vunz bae heuh Yunghcouh duhsunzgenj Vuz Yangh daeuj taeng doiq dig, Caj song ndaek neix vuengzmuengz ganj daengz seiz,Nungzginh senhfungh Vuj Hwzli gaenq hoenx daengz.Sam ndaek hak neix ganj mbouj gib doxyaeng couh hwnj max daeuj dingj.Gyoengq binghak bingzseiz lanzsanj gvenq lo,baenzlawz ging ndaej hoenx,Nungzginh mbat cung,couh baij lumj ciengz yaij.Sam ndaek hak haenx raen mbouj doenggvan,cijgoq deuz mingh.Hoeng Vuj Hwzli caeuq Hij Yenz gaenq gyaep daengz,cij dingqnyi Vuj Hwzli hat sing ndeu,Cangh Yizsinh gaenq doek roengz max,Hij Yenz faexgyaengh mbat vengh,Gauh Sw'anh gaenq deng mbak bae mbiengj gyaeuj he.Seizneix Vuz Yangh swngzgei ndot deuz,ngamq buet mbouj gyae,cingq bungz bingdoih mehmbwk ganj daengz,Vuz Yangh fad max doxdauq,cingq yaek buet,mboujliuh Veiz Meijsenh baez yaengx fwngz,feidau vidvid biu ok,dingjlingz baek deng hozlaemz Vuz Yangh,Vuz Yangh doek max daindiengq.          Nungzginh daih hingz,vifung daih vuengh.Nungz Cigauh roengz lingh,mbouj ndaej nyaux beksingq,youh heuh hai canghaeux gouq caiminz,daengxcungq beksingq cungj angqbupbup bae.Youh miz haujlai bouxcoz sai mbwk camgya hwnjbing,bingdoih dem daengz gaenh fanh vunz.            Haemhhaenx,Daxnungz hemq loengh duz byalwgnyez he daeuj angqhoh.Bya loengh ndei le,gyoengq vunz miz goeng haenx comz daeuj,itmienh gwn bya ndoet laeuj,itmienh yaeng baenzlawz bae gung Yunghcouh.            Daxnungz naeuz:"Yunghcouh mbouj lumj Hwngzsanhcai,couguen yienznaeuz bou,hoeng hix rox di goengfou,caemhcaiq lajfwngz miz geij boux ak,bing hix lai.Yaek gung Yunghcouh,hab yungh ndaw rog boiqhab,cij ndaej gemj noix raeuz sieng dai."          Nungz Cigauh naeuz:"Meh gangj ndaej deng.Gou senq baij vunz cang gaujvaq haeuj singz bae lo,raeuz cingq naemj doxhab."             Vangz Veij naeuz:"Haemhneix gou lij genj aeu bak boux bing he,daenj hwnj buhbing Soengqciuz,cang baenz Hwngzsanhcai baih roengzdaeuj,cab haeuj ndaw cingz bae,sou guenj cuengqsim."           Gyanghwnz caemrwg,bak boux bing haenx vuenh buh daenj le,lienz haemh ganj bae Yunghcouh.           Nungzginh youq Hwngzsanhcai yiet geij ngoenz bing,ganj caux buek ruz he,yienzhaeuh faen sam loh hwnjdin,ndij Yunghgyangh swnh dah doxroengz,byaij gonq ndij baihswix henz dah byaij,cungqgyang ndij baihgvaz henz dah byaij,riengzlaeng cauh ruz byaij loh raemx,baenaj foedfoed,byawz hix mbouj gamj laengz.Nungz Cigauh daiq bing byaij cungqgyang,gig vaiq couh daengz Yungjningz(neix heuh Yunghningz,liz Yunghcouh ngeih cib leix),Yungjningz Vuz daisouj bohlwg sam boux vueng'vud daeuj dingj Nungzginh,deng Nungzginh homh hoenx,cienzbouh deng mied.Nungz Cigauh max mbouj dingz din,itcig gung daengz Yunghcouh (neix heuh Namzningz).Doengzseiz,lingh song loh Nungzginh hix caez gung daengz Yunghcouh,sam loh gyoeb homh.dawz Yunghcouh humx dwk ndaetndwtndwt,maet cungj nanz biq deuz.          Nungz Cigauh cap yingz le,roengzlingh:Cij hawj vunz haeuj singz,mbouj hawj vunz ok singz,bing Soengqciuz okdaeuj,caenhliengh gaemh lix.          Caiq gangj Yunghcouh couguen Cinz Gungj bonjlaiz hix miz di bonjsaeh,seizneix raen Nungzginh daenj buhhoengz humx ndaet rog singz,lumj feizhaij lag haz,sim gaenq yup raixcaix.De ganjmuengz itmienh baij bing lajfwngz de bae hen ndei dousingz,itmienh heuh vunz sij saenq soengq okbae ban gouqbing,hoeng sojmiz soengq saenq okbae haenx cungj deng Nungzginh gaeb dawz.           Dangseiz Guengjsae duhgen Cangh Liz cap youq Binhcouh,dingqnyi Yunghcouh deng humx,sikhaek daiq bing daeuj gouq.Miz bouxdamq daeuj lwnh aen siusik neix,Nungz Cigauh gig angq bek ga naeuz:"Cangh Liz daeuj ndaej ngamj,langh de haeuj singz!"Yienzhaeuh,de heuh Vuj Hwzli daiq sam bak boux bing,cienzbouh vuenh daenj buhbing Soengqciuz,swnh Cangh Liz daiq bing haeuj singz seiz,swngzgei gyaux haeuj singz bae,caeuq Vangz Veij ciepdaeuz,gawj geiz guh hauh,caez guh ndaw wngq.            Cangh Liz Daiq bing daengz le,Hij Yenz daiq bing cung bae,cingq youq hemq gaj luenhcabcab seiz,Vuj Hwzli gaenq daiq bing gyaux haeuj bing Soengqciuz bae,gwnz singz raen dwg geizhauh Cangh Liz,lienzmuengz hai dousing,Cangh Liz fouzsim caiq hoenx,sikhaek daiq bing nyoengx haeuj singz lo.            Ndaw singz luenh dangq ndaij nyungq,gwnz gai vunz goenjyauyau,lwgnyez swenj mwhmbwk daej,miz vunz buen doxgaiq,miz vunz fung bakdou,lij miz gyoengq bing swngzgeiz bueklungh,nauh dwk biengz yaek fan.Vuj Hwzli daiq sam bal boux bing ndonj haeuj singz haenx,hai haeuj sam aen hongh hung bae,dawz bouxcawj daengx ranz hung iq gven hwnjdaeuj,mbouj hawj laeuh siusik.Yienzhaeuh de daiq seiq boux lajfwngz bae ra Vangz Veij,doxyaeng baenzlawz hengzdoengh.            Vangz Veij naeuz:"Mwngz daeuj ndaej ngamj!Caj Daegsam damq siusik dauq,raeuz sikhaek hengzdoengh. Mwngz gung Ciuzdienmonz,gou gung Laizyienxmonz,yienghyiengh cungj bwh ndei lo.Ndaw singz beksingq sim cungj coh raeuz,mbouj noix vunz gaenq bwh ndei cax mid,camgya raeuz gung hoenx."            Vuj Hwzli naeuz:"Ndei!Gou dingq mwngz cijveih!"            Mbwn laep le,Daegsam dauqma lwnh aen siusik youqgaenj ndeu:Cinz Gungj haemhneix baij laeuj dajsiengj Cangh Liz gyoengq gouqbing haenx,gyoengq hak hung cungj daeuj hoh,daizlaeuj couh nda youq gwnz singslaeuz Ciuzdienmonz.Vangz Veij dingq le bek fwngz riu naeuz:"Mbwn bang raeuz ha!"De doq rwz Vuj Hwzli gangj aen geiqmaeuz he,Vuj Hwzli ngaek gyaeuj digdig.Vangz Veij youh doiq Daegsam naeuz:"Mwngz hawj Vuj cienghginh daiq loh,hwnj singzlaeuz Ciuzdienmonz bae,ciuq vah Vuj cienghginh bae guh,saeh baenz le,daihdaih dajsiengj!"           Daegsam naeuz:"Gou seizneix couh camgya Nungzginh,vuenh buhcai lo!"           Vangz Veij naeuz:"Gou sou mwngz dang Nungzginh,hoeng seizneix mwngz mbouj ndaej duet buhcai,caj gung roengz Yunghcouh caiq duet ba."           Vuj Hwzli caeuq Daegsam baema daiqlingx sam bak boux bing cang baenz bing Soengqciuz haenx,sikhaek bae Ciuzdienmonz.Bae daengz laj singzlaeuz,gwnz singz miz vunz raen le hat cam:"Sou daeuj gijmaz?"            Daegsam han:"Daeuj vuenh ban!Sou sinhoj lo,Cinz Dayinz cingj laeuj sou lij caengz ndaej gwn,vaiq bae sai laeuj ba."           Gyoengq bing gwnz singz cingq vih cigban mbouj ndaej sai laeuj naj nyaeuq ne,ndaejnyi nyaenx gangj,angq ndaej riu dwk bak mbeuj bae;caiqgangj gyoengqde cungj roxnaj Daegsam,couh saenq dahraix.gyau ban le doxcanj okbae ra laeuj sai lo.             Vuj Hwzli daiq sam bak bing haenx laeglemx couh hwnj gwnz singz,dawz singzlaeuz humx hwnjdaeuj.Ndaw singzlaeuz daiz laeuj he nyoemnyainyai,Cinz Gungj、Cangh Liz daengj gyoengq hakhung naengh youq seiqhenz,cingq gingz boilaeuj angqhoh goenjdat,di he mbouj rox cih dai yaek daengz najbyak lo.Cinz Gungj gingz boi naeuz:"Muengh daihgya caezsim caemhrengz,dwk hingz vunzdig,bauqdap ciuzdingz……"           Vah caengz gangj sat,fwt roemx haeujdaeuj gyoengq bing he,ndaekndaek hakhung lij gingz boi dwk,cax gaenq ngad daengz hozlaemz lo.          Vuj Hwzli hat naeuz:"Gyonj cug hwnjdaeuj!"          Caet ndaek hakhung cungj deng cug hwnjdaeuj,yaek doengh mbouj ndaej,lij mbouj rox dwg maz saeh.Cinz Gungj yawjyawj cungj dwg bing Soengqciuz,ndatheiq ndaq naeuz:"Meh sou!Sou yaek cauhfanj ha?"           Vuj Hwzli mbat fak Cinz Gungj,riunyaen naeuz:"Dou senq cauhfanj lo,mwngz cengq da yawj gou dwg byawz?"De duet roengz buhbing Soengqciuz,loh ok buhbing Nungzginh hoengzfwgfwg daeuj.          Daegsam naeuz:"Cinz lauxyez,neix dwg Nungzginh Vuj cienghginh!"          Cinz Gungj fatheiq naeuz:"Daegsam!Gou doiq mwngz baenz ndei,mwngz yawz daiq caeg daeuj haih gou?Duz naraq mwngz!"          Daegsam naeuz:"Mwngz lwnhngoenz heuh gou daek haeux raix caz,lij sawj gou bae hawj yah mwngz dauj nyouh,dawz gou dang hoiq sawj,lij naeuz doiq gou ndeine!Mwngz caj ba,beksingq cingq deq caeuq mwngz suenqsoq hw!"           Vuj Hwzli dawz gyoengq hak haenx gyaeng hwnjdaeuj,couh diemj feiz coemh singzlaeuz,caemh hailangh dousingz.Rog singz Nungz Cigauh raen feiz hwnj le,sikhaek boq hauh,gyoengq Nungzginh baenz cuj baenz cuj doxcanj cung haeuj dousingz,ndaw singz lienzseiz hemq gaj goksad,Nungzginh daenj buh hoengzfwgfwg,lanh hoenx dangqmaz,gyoengq bing Soengqciuz mbouj miz vunz cijveih,lumj raemx dongj fai lak,deuz mingh mbouj gib,yawz gamj dingj dem.           Byonghhwnz sam geng.Vangz Veij cijveih gyoengq bing "gauhvaq" haenx gung roengz lingh song aen dousingz,yienzhaeuh caeuq Nungzginh daihdoih gyoeb youq itheij,gig vaiq couh gung roengz couhfuj.          Haemhhaenx,Nungzginh gaj dai Soengqginh cien lai vunz,gaemh lix geij cien vunz.Haetlaeng,1052 nienz lauxlig nguxnyied coit,banngaiz,Nungz Cigauh dawz Couhfuj gaij guh Namzdienguek gungdienh,gag fung guh Yinzvei vuengzdaeq,gaij nienzhauh guh Heijlig,fung Daxnungz guh vuengzdaiqhaeuh,lwgdaeuz Nungz Gifungh guh daiswj,fung Vangz Veij、Vangz Swhmi guh canhcwng(vih lumj caijsiengq),baihlaj gag boux daiq bing haenx cungj fung guh daihcienghginh,Daegsam cix ndaej fung guh ginginh duhvei.Nungz Cigauh heuh Vangz Swhmi ok buengj an minz,hai cang fat haeux,heuh beksingq hwnjdaeuj cawz hak ngawz,fanj Soengqciuz,dingj Gyaujcij bauj bingzningz.Buengj baez ok,beksingq hemq wngq,faenfaen daeuj camgya Nungzginh,geij ngoenz seizgan,Nungzginh couh dem daengz gaenh song fanh vunz,singseiq daih vuengh,gak giz Soengqginh simyup mbeidek,gangj daengz Nungzginh couh najheu najbienq.          Ngoenz he,diemjcaz ndaw couhfuj doxgaiq,fatyienh bi haenx hwnjsaw heuh couguen soengq hawj ciuzdingz doengh gij saenq caeuq gimdiuz haenx lij youq,Nungz Cigauh gig ndatheiq,mboengj daiq hemq:"Dawz couguen Cinz Gungj daeuj saemj!"Cinz Gungj gyaiq daeuj dingdangz,Nungz Cigauh hat cam:"Hak naeuh!Bi haenx gou baij vunz dawz sawsaenq caeuq gimdiuz daeuj,heuh mwngz bauq soengq ciuzdingz,mwngz vih maz gaeu roengzdaeuj?"          Cinz Gungj ndang saenz foegfoeg,gvih naeuz:"Nyiuz coih!Sawsaenq mwngz dwg saw gin maeg bauj,gou siengj louz roengzdaeuj dang baujboiq……"           Nungz Cigauh bek daiz naeuz:"Luenh raeuq!Doenq gimdiuz gou,lij miz naj daeuj huloengh gou dem!"           Cinz Gungj boemz gyaeuj naeuz:"Gou baenzlawz gamj huzloengh mwngz!Mwngz heuh gou banh gienh saeh haenx,gou gaenq lingh sij saw bauqlwnh ciuzdingz lo,hoeng deng baihgwnz gaeu roengzdaeuj,gou hix fouzfap ha."            Nungz Cigauh cam:"Mwngz dangcaen lingh sij gvaq?"            Cinz Dungj auqmanz naeuz:"Caen sij lo."            Nungz Cigauh naeuz:"Soqlaiz hawj vuengzdaeq hwnjsaw cungj aeu louz miz daej,mwngz rox diuz gvigawj neix lwi?"         Cinz Dungj ngaek gyaeuj naeu:"Rox."         Nungz Cigauh hemq:"Daiq de bae ra sawdaej daeuj hawj gou!"         Miz vunz daiq de roengzbae,yaek he youh daiq de hwnjdaeuj.Cinz Gungj youq gyang ding rub gvih roengzdaeuj,mbouj gamj guhsing.          Nungz Cigauh cam:"Sawdaej ne?"          Cinz Gungj boemz gyaeuj babbab naeuz:"Gou hab dai!Gou saedsaeh caengz sij gvaq,gou yaeuh vuengzdaeq,muengh vuengzdaeq haiaen,louz diuz mingh he hawj gou,gou nyienh dub uk heh sim daeuj bauqdap!"          Nungz Cigauh naeuz:"Mwngz ndaek vunz neix ciengz gangj vahbyangz,haet gangj sam haemh gangj seiq,louz mwngz miz maz yungh?Dawz bae gaj!"           Bouxgajfamh rag Cinz Gungj okbae,Cinz Gungj gaenq hwk dwk maez bae.         Nungz Cigauh cam henzndang naeuz:"Gaemh ndaej gyoengq hak haenx,miz byawz mbeilaux di,gamj ndaq gou lwi?"          Miz vunz han naeuz:"Miz song ndaek ndaq raeuz dwg caeg."          Nungz Cigauh yinxdaeuz lo,cam:"Byawz gamj ndaq gou dwg caeg?"          Boux he han naeuz:"Cangh Liz caeuq Gungj Cunghdan."          Nungz Cigauh baez vad fwngz:"Hawj gou cingj songde daeuj."          Yaep he,song ndaek haenx gyaiq daengz gyangding,bouxboux ngiengx gyaeuj ndwn sohswd.Bouxbing heuh songde roengz gvih,songde mbouj leix.Bouxbing yaek doengh fwngz,Nungz Cigauh baetbaet fwngz,heuh bouxbing deuz.          Nungz Cigauh cam:"Song vih daeuj daengz baihnajvuengzdaeq,vih maz mbouj gvih,daiq mbouj rox gvigawj luba?"           Cangh Liz najhaen naeuz:"Mwngz gag fung guh vuengzdaeq,saedsaeh dwg caeg,yawz hawj mwngz roengz gvih?"            Gungj Cunghdan hix naeuz:"Gou cij nyinh Soengq Yinzcungh vuengzdaeq,mbouj nyinh mwngz gijmaz Yinzvei vuengzdaeq!"           Nungz Cigauh mbouj huj,dauq riu naeuz:"Raen sou baenxneix miz goetheiq,gou cingj sou naengh."           Bouxbing dawz song aen eij daeuj,hawj songde gej cag bae,Cangh liz, Gungj Cunghdan cix daihmuz daihyiengh naengh roengzdaeuj.           Nungz Cigauh sien cam Cangh Liz:"Cangh Cienghginh!Mwngz naeuz gou gag fung guh vuengzdaeq,cingj cam,ciuz lawz vuengzdaeq mbouj dwg gag fung?Cinzsijvangz dwg gag fung,Dangzciuz Lij Yenh, Lij Siminz hix dwg gag fung.Soengqciuz Cau Gvanghyinj youq Cinzgyauzyiz hwnjbing,haemh he couh gaij daenj buh vuengzdaeq,nanzdauh mbouj dwg gag fung?Yawj daeuj Cangh cienghginh gig sug lizsij,cingj mwngz son gou,mwngz baenzlawz daeuj yawj song cih 'gag fung' neix?"           Cangh Liz ngoemx lo,mbouj rox baenzlawz han.           Nungz Cigauh youh naeuz:"Mwngz naeuz gou dwg caeg,hix mbouj geizgvaiq,gwn ngaiz ranz lawz bang ranz lawz gangjvah.Mwngz daihgaiq caemh rox,gou sam baez hwnjsaw cingjgouz gvihaeuj Soengqciuz,danhseih vuengzdaeq Soengqciuz hukhak haenx couh seih mbouj cinj.De dawz Bouxcuengh sengloh fung cied lo!Lij siengj ndek diegcuengh hawj Gyauhcij,ndaek vuengzdaeq Yinzcungh sou hoenqciengq mbouj hoenqciengq?mbouj fanj ndaek vuengzdaeq naeuh neix lij ndaej ma?Cangh cienghginh,cingj mwngz ndwn hwnjdaeuj!"           Cangh Liz ndang mbouj youz geij ndwn hwnjdaeuj.           Nungz Cigauh hix ndwn hwnjdaeuj,naeuz:"Gou cam mwngz,danghnaeuz mwngz dwg gou,mwngz fanj mbouj fanj ndaek vuengzdaeq naeuh neix?"          Cangh Liz naeuz:"Gou gwn haeuxliengz ciuzdingz,fouzfap doxbeij."          Nungz Cigauh naeuz:"Yienzlaiz mwngz hix mbouj dwg bouxvunz cingqcig he,mbouj gamj gangj vahcaen,mwngz naengh ba."          Cangh Liz ngoemxngwd naengh roengz,naj miz di mong.          Nungz Cigauh hix naengh roengz,cienq naj doiq Gungj Cunghdan naeuz:"Dingq gangj mwngz rox yawj mbwn,raen ndaw couhfuj miz mokhau,liuh daengz gou yaek cauhfanj,mwngz caen ndaej rox gonq gvaq vunz ho!Danghnaeuz Cinz Gungj saenq mwngz gangj,lauheiq seizneix gou lij caengz ndaej youq neix ne!"           Gungj Cunghdan danq gaemz heiq he naeuz:"Vah gou mbouj miz vunz saenq,bienzngeiz mwngz lo.gou vih ciuzdingz guh hak,dai hix mbouj ienq!"         Nungz Cigauh naeuz:"Mwngz caen lauxsaed daengz huk bae,daiq hojsik.Seizneix Soengqciuz nduknaeuh daengz bouh neix,haujlai saehcingz banh ndaej sawj vunz lajmbwn dwgcaengz,caen mbouj rox Cau Cinh baenzlawz lij miz naj dang vuengzdaeq!Soengqciuz cungj miz saek ngoenz deng mied!Mwngz mboujyawz riengz gou cauhfanj,cawz raeg gij nduknaeuh lajmbwn,louz mingz cien daih fanh ciuh!"          Gungj Cunghdan naeuz:"Boux cungsim mbouj vih song vuengz,mwngz gaej siengj heuh gou fug mwngz!"          Nungz Cigauh naemjnaemj le,youh naeuz:"Mwngz mbouj fug gou hix ndaej,gou langh mwngz caeuq Cangh cienghginh baema,cingj sou bang gou bae Ging hwnjsaw,cijaeu cinj gou gvihaeuj Soengqciuz,gou sikhaek doiq ok Yunghcouh,baenzlawz yiengh?"          Gungj Cunghdan fatheiq naeuz:"Gou deng mwngz gaemh lix,gaenq famh coihdai,mwngz lij heuh gou bae Ging dang bouxbaklai,mbouj dwg gya coih sawj gou deng mied goujcug ma?Mwngz gaej siengj ciq cax haih gou,yaek gaj couh gaj gou boux ndeu ndaej lo,gaej haih vunz ndaw ranz gou dem!"           Nungz Cigauh gig yawjnaek Gungj Cunghdan cungj goetheiq neix,doeklaeng,de hawj daeglwg ngeih de gaij mingz guh Nungz Cunghdan.          Gyoengq hak deng gaemh haenx cungj deng gaj lo,Nungz Cigauh daengq naeuz,hawj Gungj Cunghdan fouq guencaiz ceiq ndei he ndeindei roengz cangq,cix dawz seihaiz Cinz Gungj vut roengz dah bae viq bya.          Gung roengz Yunghcouh le,Daxnungz gig angq,ngoenzngoenz gaj duz byalwgnyez ndeu,cingj boux miz goeng he daeuj caeuq de caez nyaemq,byawz ndaej daeuj couh dwg ceiq sang dajsiengj lo.

路漫

	cibhaj. Humx Gung Gvangjcouh 十吓、阍攻广州         Nungzginh gung roengz Yunghcouh le,swnh tiet geij ngoenz,bwh ndaej bak lai aen ruz,ciuq yienzbonj dingh ndei haenx,ndij dah Yunghgyangh hai coh baihdoeng.Song fanh Nungzginh byaij bae foedfoed,geiz mbinfagfag,gyong yiengjhumhum,daengz gyawz gung gyawz,gung gyawz hingz gyawz,bing Soengqciuz buet mbouj ndaej deuz cix deng siumied.         Nguxnyied cogouj,Nungzginh bae daengz Hwngzcouh,guenbing buet dai deuz mingh,Nungzginh mbouj yungh doengh fwngz couh ciemq ndaej Hwngzcouh,hai cang faen liengz,beksingq angqyangz.Nguxnyied cibngeih,Nungzginh bae daengz Gveicouh(neix heuh Gveigangj),caemh mbouj yungh rengz couh haeuj singz lo.Couh yienghneix swnhswnh leihleih ciemq ndaej Sunzcouh(neix heuh Gveibingz)、Yungzcouh(neix heuh Yungzyen)、Gunghcouh(neix Bingznanz)、Dwnghcouh(neix Dwngzyen)、Vuzcouh daengj,daj cogouj daengz cibcaet,ngamq aeu gouj ngoenz couh ciemq ndaej roek aen singz,byaij doh it cien lai leix.         Daengz Vuzcouh seiz,Daxnungz youq gwnz ruz muengh dauqlaeng,naj saepsangq doiq Nungz Cigauh naeuz:"Lwg ha,raeuz ndij dah doxroengz,yienznaeuz dwk roengz roek aen singz,hoeng neix lumj maxlaeuz gip haeuxyangz nei,gip aen vut aen,yienghneix guh mbouj ndaej bw!"         Nungz Cigauh naeuz:"Daxmeh gangj miz dauhleix.Danhseih,danghnaeuz raeuz dwk ndaej aen singz couh louz vunz souj youq aen singz,bingmax couh faensanq lo,mboujyawz comz bing dwk doxbae,caeuq daihdoih bingmax Soengqciuz hoenx ciengz he,mied de geij fanh bing,beij faen bing souj singz lij lai giengz bw."         Daxnungz roxnyinh neix hix miz dauhleix,hoeng lij mbouj cuengqsim,youh daezsingj naeuz:"Baenzneix byaij gyae gung singz,vunz baeg bing naiq,raeuz aeu siujsim naemj ndei,byaij yamq he ngeix daengz sam yamq,cij byaij ndaej onjdangq nw."          Nungz Cigauh naeuz:"Daxmeh daj iq son gou doeg bingsaw,gou baenzlawz mbouj rox.Soengqciuz dawz bing comz youq Gingsingz,Lingjnanz baihneix mbouj miz geijlai bing,raeuz sien lieb dwk Gvangjnanz mbiengj neix gvaengx he,caiq hat bing dwk baihbaek,Soengqciuz itdingh baij daihdoih bingmax daeuj,raeuz couh ndei caeuq gyoengqde hoenx ciengz he lo.Danghnaeuz hoenx ndaej hingz,couh dwk doxbae,danghnaeuz dwk mbouj gvaq,couh doiq dauq Yunghcouh,yaeuh Soengqciuz gyaep daeuj,youq ndaw bya ndaw rungh siumied gyoengqde.Meh,diuz gaeq neix baenzlawz yiengh?"         Daxnungz naj loq hai di,naeuz:"Mwngz gaenq naemj ndeindwt lo,couh yienghneix guh ba."         Yienghneix,Nungzginh laebdaeb roemx bae,dwk daengz Funghcouh.Funghcouh couguen Cauz Ginj ngamq comz ndaej bak lai boux bingcai,caemh daeuj caeuq Nungzginh song fanh lai bing doiqdingj,Nungz Cigauh raen ndaek vunz neix miz mbei,couh daengq lajfwngz gaej sieng de,cij aeu gaemh lix.Veiz Sifung naeuz:"Hawj gou sawq daeuj hongx de!"De bek max bae coh Cauz Ginj,Cauz Ginj raen dwg mehmbwk,cix mbouj dawz haeujrwz. Lij caengz ndaej doxhoenx,Veiz Sifung fad max couh deuz,ndaq naeuz:"Ndaek ma mwngz!Mbouj lau dai couh daeuj vei!"Cauz Ginj daih huj,fad max gyaep bae.Veiz Sifung hat sing ndeu:"Daeuj ba!"Swnh fwngz baeuj ok caghongx,duzmax Cauz Ginj baez ging,ndiengq hwnj ganaj,caghongx hongx mbouj deng Cauz Ginj,cix hongx dawz daezmax ganaj.Veiz Sifung baez rag,duzmax rub laemx,Cauz Ginj deng boek roengzdaeuj,seiq guengq coh mbwn.Geij boux Nungzginh cung hwnjbae,dawz Cauz Ginj cug ndaetndwt,gyaiq hwnj ruz bae.         Nungz Cigauh daeuj yawj Cauz Ginj,heuh vunz hawj de soeng cag,aeu laeuj noh daih de,de mbouj gwn.Nungz Cigauh naeuz:"Cauz Cienghginh,gou raen mwngz haemq miz damjliengh,mwngz riengz gou bae dwk Soengqciuz,gou hawj mwngz daiq ci bing he,guh mbouj guh?"          Cauz Ginj naeuz:"Gou dwg bouxguen ciuzdingz,yawz ndaej gaen mwngz cauhfanj?Seizneix gou deng mwngz gaemh lo,mbouj miz maj raen vunz dem,mwngz vaiq gaj dai gou ba!"         Nungz Cigauh naeuz:"Baenzlawz couh gangj dai ne?dienyah dwg daihgya dienyah,yawz ndaej dandan gvi Soengqciuz singq Cau ?Soengqciuz nduknaeuh,mbouj yungh gou gangj,mwngz beij gou engq rox.Mwngz hozbiet vih gyoengqde dai ne?"           Cauz Ginj mbouj guhsing.Nungz Cigauh hix mbouj bik de,louz de youq ndaw ruz song ngoenz,de mbouj gwn mbouj ndoet,cij nyienh ra dai.Nungz Cigauh danqheiq naeuz:"Gaej sieng de,youz de gag dai ba!"           Bouxbing daeuj hawj Cauz Ginj vuenh daenj buh ndei,heuh de diuq dah gag dai,yienzhaeuh lauz sei hwnjdaeuj cangq youq bangxdah.          Nguxnyied cibbet,Nungzgibh gung daengz Ganghcouh(neix Gvangjdungh Dwzging Yen),damq rox couguen Cau Swhdan ngamq hwnjnyaemh ngoenz he,Nungz Cigauh couh baij vunz bae gienq de douzyangz.Cau Swhdan cwzlwg mbouj rox naj guk,dawz bouxsawj haenx gaj bae.Nungz Cigauh huj dangqmaz,sikhaek hat sing gung singz.Cau Swhdan ngamq miz sam bak boux bing,caen dwg aeu mbawmungz dangj cax,baez hoenx couh deng raemj gyaeuj doek.         Nungzginh gung roengz Ganghcouh le,mbouj yiet cix ganj bae Donhcouh(neix Gauhyau Yen).Ruz hai daengz aen gemh he,song mbiengj ndoi bya daengjlaeb,faex mwncupcup,raenxdah goksoso,yungyiemj dangqmaz.Danghnaeuz youq neix maizfug bingmax,ruz daeuj deng hoenx,bae mbouj ndaej,doiq mbouj dauq,baenzlawz mbouj yiemj?Nungz Cigauh dingz ruz roengzdaeuj,heuh vunz bae damq.Bouxdamq dauqma naeuz mbouj raen miz maizfug.Nungz Cigauh langhsing riu naeuz:"Soengqginh mbouj miz vunz rox bingfap,baenz ndei deihhingz mbouj rox yungh,Soengqciuz uengjfeiq ciengx gyoengqde lo!"         Yienghneix,Nungzginh couh gag vaiq ciemq daengz Donhcouh.          Daj Donhcouh daengz Gvangjcouh cij bak lai leix gyae.Gvangjcouh couguen Cung Genj rox Nungzginh ciemq Donhcouh le,gipmuengz ciu lajfwngz Vangz Gaih 、Vangz Siningz daeuj,minghlingh songde daiq bing bae soudauq Donhcouh.Vangz Gaih damq rox Nungzginh gag ak,bae daengz byonghloh couh dingz roengzdaeuj,sij saenq hawj Cung Genj,iugouz dauqma caez souj singz.Cung Genj ndaq de mbeisiuj,naeuz mbouj dingq minghlingh couh raemj gyaeuj.Vangz Gaih mbouj leixlangh,ciuqyiengh ban bing dauq Gvangjcouh,caemh ep Vangz Siningz daiq doih haeuj singz.Vangz Siningz mbouj coengz,dauq ndaq de lau dai deuz mingh.Vangz Gaih gig nyapnyuk,naeuz Vangz Siningz mbouj dingq minghlingh,dangciengz gaj bae.         Nguxnyied ngeihcib'it,Nungzginh bae daengz Sanhsuij,bungz deng fwnraq rumzhwx,cij ndaej yiet caj sam ngoenz.Ruzhwx dingz le,caiq hai ruz hwnjdin.Nguxnyied ngeihcibroek,Nungzginh hai daengz Gvangjcouh,anyingz capsaih,dawz singz humx ndaetndwt.Nungz Cigauh gwih hwnj maxhoengz,daiq Vangz Swhmi daengj geij boux ciengq,heux rog singz yawj deihhingz.Vangz Swhmi dwg vunz Gvangjcouh,sug dieg sug loh,sijsaeq hawj Nungz Cigauh gejgangj.Gvangjcouh ciengzsingz sang youh na,din singz vat miz miengdah henhoh,ndaw singz miz bing lai ciengq rengz souj youq,yaek dwk roengz gig mbouj yungzheih.Nungz Cigauh naemj gvaq le,gietdingh comz bingmax hwnjdaeuj,gung hoenx saemonz.De dauqma le couh swngciengq fatlingh:heuh Nungz Gencungh  cob vunz ganj caux moegci 、laefaex caeuq bauqfeiz,nda'nduengq gung singz;heuh Hij Yenz daiq cien bingmax he,lieb yawj seiqcawq,siumied daj gag dieg daeuj gij gouqbing haenx;heuh Vuj hwzli daiq cien bing he,dienz maenh gij raemxloh doeng haeuj singz bae haenx,gakduenh ndaw singz yungh raemx;Heuh Veiz Laujhungz daengj hen ndei haeuxliengz,daezfuengz bing Soengqciuz daeuj guk……         Caiq gangj Cung Genj,ndaek couguen neix simdoeg youh hukhak.De hwnj singz bae baez muengh,cijraen Nungzginh cap yingz caezcingj,geiz mbinfagfag,bingmax cingsaenz gvaekgvaek,ndaw sim gig yup.Seizhaenx miz vunz daeuj caegbauq,naeuz Nungz Cigauh ginhswh Vangz Swhmi dwg vunz Gvangjcouh,bohmeh de lij youq ndaw singz.Cung Genj yakdoeg naeuz:"Lwglan guh caeg,bohmeh miz coih."De cam bouxcaegbauq Vangz Laujvuj naeuz:"Mwngz rox bohmeh de youq gyawz lwi?"         Vangz Laujvuj naeuz:"Rox vei,songde couh youq ranz caencik de,caeuq ranz gou dwg gekliz."         Cung Genj sikhaek heuh lajfwngz de:"Sou hawj gou bae gaeb bohmeh Vangz Swhmi,dangciengz raemj gyaeuj,dawz gyaeuj ma venj hwnj gwnz singz bae,hawj nungz Cigauh、Vangz Swhmi gyoengq caeg haenx yawjyawj!"         Vangz Laujvuj daiq bingcai bae mbouj geij nanz,couh dawz song ndaek gyaeujvunz lwedsaensaeng ma.Cung Genj baez vad fwngz:"Venj hwnj singz bae,lwnh Nungz Cigauh gyoengqde,neix dwg gyaeuj bohmeh Vangz Swhmi!"         Gyaeujvunz venj okbae le,Vangz Laujvuj gvih cam Cung Genj:"Lauxyez,gou miz goeng,mbouj dajsiengj ha?"          Cung Genj geizheih ndaek vunz neix naj baenz na,gamj gag cam aeu dajsiengj,cix Cam:"Mwngz roxnaj Vangz Swhmi lwi?"           "Roxbaj vei."Vangz Laujvuj naeuz.           Gou guj gyaeujvunz venj okbae le,Vangz Swhmi itdingh daeuj yawj,mwngz danghnaeuz gienq ndaej de daeuj douyangz gou,gou hawj mwngz dang guen,"Cung Genj naeuz.            Vangz Laujvuj fatngunh lo,gaj bohmeh vunz,youh gienq vunz daeuj douzyangz,cungj saeh neix yawz banh ndaej daengz ne?Hoeng de dingqnaeuz ndaej dang guen,couh lienzsing han naeuz:"Ndei!Gou gienqgienq de,gangj mbouj dingh gienq ndaej."            Seizhaenx,bingcai roq laz coh rog singz hemq:"Gyoengq caeg dingq lo,neix dwg gyaeuj bohmeh Vangz Swhmi,byawz gamj cauhfanj,gaj goujdaih!"          Nungzginh ganjvaiq bae bauqlwnh Nungz Cigauh caeuq Vangz Swhmi.Nungz Cigauh sikhaek buenx Vangz Swhmi daeuj daengz laj singz,aeu vunz henhoh,saeq yawj dauqdaej dwg mbouj dwg.Vangz Swhmi mumjgyumq yawj ok fajnaj bohmeh,laetseiz rongx sing daej hwnjdaeuj,rub gvih gwnz deih,baiq gvaq gouj mbat,mieng naeuz:"Bohmeh hoenzlingz youq gwnz,lwg mbouj hauq lienzlih sou lo!Sou ienuengj,lwg daeuj bauq!Gou riengz Nungzvuengz cauhfanj daengz daej,caeuq guenhak buekmingh daengz dai!"           Nungz Cigauh heuh vunz nda'nduengq samseng,daj gyae baij youq gwnz deih,coh gyaeujvunz gwnz singz caeq baiq.Nungz Cigauh caeuq Vangz Swhmi doengzcaez diemj yieng,rwed laeuj.Nungz Cigauh gvih roengzdaeuj,raemxda ndik rim buh,euj raek ci naq he mieng  naeuz:"Bohlungz mehbaj!Sou dai da mbouj laep,gou itdingh vih sou bauqcaeuz!"           Gyoengq bing doengzcaez gvih roengzdaeuj,siu yieng caez baiq.           Seizhaenx,Vangz Laujvuj daj gwnz singz loh naj okdaeuj,hemq naeuz:"Vangz Swhmi!Mwngz roxnaj gou lwi?"          Vangz Swhmi roxnaj de,cix cam:"Mwngz yaek guh gijmaz?"          Vangz Laujvuj hemq naeuz:"Mwngz dwg boux vunz rox saw rox leix he,vih maz bae gaen caeg cauhfanj?Ngoenzneix lienzlih bohmeh,mwngz wnggai roxsingj cij ndaej,mboujne,gou lij aeu daiq vunz bae gaeb ranz mwngz goujdaih,cug boux gaj raeg bae!"           Vangz Swhmi haeb heuj haeb faenz,ndaq naeuz:"Duz fangzraq mwngz!Caj Nungzginh gung roengz Gvangjcouh,gou caen fwngz gaj mwngz,hawj bohmeh bauqcaeuz gej haemz!"          Nungz Cigauh beng gung dwk naq,da riengj fwngz riengj,ci naq mbin bae,cingq nyingz deng faj bak Vangz Laujvuj aj yaek gangj gijmaz haenx.Vangz Laujvuj gamz naq laemx roengz,caiq mbouj siengj ndaej dajsiengj lo.           Bing Soengqciuz daj gwnz singz nyingz naq roengzdaeuj,gyoengq bing sikhaek baujhoh Nungz Cigauh caeuq Vangz Swhmi doiq roengzdaeuj.            Cung Genj laihnaeuz gaj bohmeh Vangz Swhmi le,ndaej gaj gaeq hawj duzlingz yawj,yup Nungzginh baez he,byawz rox ngamjngamj doxfanj.Seizneix Nungzginh bouxboux gikheiq,vunzvunz haeb heuj haeb faenz,ndaq Cung Genj yaek gwn daep de bae,haemz mbouj ndaej sikhaek hoenx haeuj singz bae raemj gyaeuj de.          Nungz Cigauh guj Cung Genj "gaj gaeq" hwk mbouj doengh "duzlingz" le,itdingh baij bing ok singz.Yienghneix,de heuh Nungz Gencungh daiq sam cien bingmax cap youq saemonz,doiqfouq vunzdig okdaeuj;youh heuh Nungz Civei daiq sam bak bouxbing mbeihung haenx,aeu mijrek daz naj,boemz youq henz dah ndaw ruz,it ndaej hen haeuxliengz,ngeih ndaej guk vunzdig.           Nungz Cigauh liuh deng lo,Cung Genj caen hai saemonz dahraix,de caenndang daiq haj cien bingmax hoenx okdaeuj.Nungzginh nda caenh doxdoiq,sam vunz baenz cuj,doxboiq doxhab,baenz baiz baenz rad,caezcingj gaenjrwd.Cung Genj caengz raen cungj caenh neix gvaq,ndaw sim gag yup,dingz max giomuengz heuh nda caenh.Gyoengq bing de luenhyauyau,haemq nanz cij baij ok aen caenh he daeuj.Cung Genj youq gwnz max hemq:"Daihsoengq dienbing dienciengq daeuj neix,gyoengq sou bouxcaeg bouxmanz gamj daeuj famh Gvangjcouh,ngoenz neix sou yaek ra dai!"           Nungz Cigauh naengh gwnz maxhoengz,yaengx giemq vix Cung Genj hat naeuz:"Cung Genj!Mwngz beij guk langz lij yakdoeg cib boix,luenh gaj lwgminz,lwedcaiq aeu yungh lwed daeuj boiz.Byawz hawj gou gaemh duzma neix!"           "Cung Genj!Yawj fouj raemj gyaeujma mwngz!"Nungz Gencungh hat sing ndeu,yaengx hwnj fouj gaenqraez,fad max cung gvaqbae.Cung Genj fad max foux cax daeuj hoenx,"dang" sing ndeu,fagfouj Nungz Gencungh bag deng fagcax Cung Genj,saenq dwk Cung Genj gen fwngz mazmwnh bae,fagcax rub sinz ok fwngz.Nungz Gencungh vengh fouj youh bag daeuj,Cung Genj raen mbouj doenggvan,vuengzmuengz got gyaeuj couh buet.Nungz Gencungh gaenjgaenj gyaep bae,seixhaenx Soengqginh miz song boux ciengq yaengx nangx daeuj dingj,Cung Genj cij ndaej duet yiemj.Song ndaek Soengq ciengq haenx boux he heuh Vuj Yizsenh,boux he heuh Veiz Cwngzyen,cungj haemq miz goengfou.Nungz Gencungh boux he hoenx song boux,yied hoex yied rengz,fagfouj haenx vengh bae vuet dauq,hoenx gvaq cib geij fouj,daih hat sing ndeu,mbat fouj dawz Vuj Yizsenh bag roengz max daeuj.Veiz Cwngzyen simyup lo,cingq yaek buet deuz,byawz rox duzmax Nungz Gencungh gig riengj,bongh gvaqbae laengz naj,Veiz Cwngzyen cijndaej nyengh dingj,iet nangx bae nyoeg Nungz Gencungh,Nungz Gencungh baez veq ndang,Veiz Cwngzyen bae doekhoengq,ndang boemjgoep bae naj,Nungz Gencungh baez hat,swnhfwngz bag roengz laeng hwet de bae,hwet raek ndok soiq,Veiz Cwngzyen doek max dai bae raen nyaemzvuengz lo.         Nungz Gencungh lienz gaj song ciengq,Nungzginh saenzheiq daih vuengh.Nungz Cigauh dawz linghgeiz baez vad,daengxcungq gyonglaz rwenz goksad,Nungzginh caez yamq cung baebaj rwdrwd.Soengqginh raen le,fwngz saenz najbienq,luenh baenz moed boek rongz,Soengq ciengq yaengx bien luenh fad,gyoengq bing cijndaej haen naenggyaeuj daeuj dingj.Nungzginh cingsaenz gvaekgvaek,cung gvaqbae gaj vunz lumj vuet haz,Soengqginh seihaiz muenx deih,lwed lae baenz dah.         Nungz Cigauh yawj cinj seizgei,caiq vad linghgeiz,cij dingqnyi sing bauq he "hum" yiengj,daj henz dah gwnz ruz fwt yat ok sam bak naj mijrek haenx daeuj,yaengx cax raemj haeuj ndaw yingz Soengqginh.Soengqginh raen le,laihnaeuz dwg gveijgvaq fangzyak,hwk dwk mbei dek hoenz doek,bouxboux buet dai deuzmingh,baih lumj fai lak.Cung Genj daiq di canz bing baih ciengq,ndoj haeuj ndaw singz,gven dou maenhndwt,caiq mbouj gamj ok singz.          Nungzginh daih hingz,heiqseiq daih vuengh,daengxcungq angqyangz guh ndei gung singz cinjbei.Mbouj daengz cib ngoenz,Nungzginh guh baenz bak gyaq lae ndeu,geij bak aen cifaex,geij cib aen bauqrin,lij guh baenz aen ci dap lae geij caengz laeuz sang he.Aen cilae neix hung youh giuj,lajdaej doq miz bak aen loekci,cug caengz cug caengz daeb hwnjdaeuj,caengz beij caengz lai iq di,lumj aen dapsoem sang ndeu,baihnaj aeu cib boux vunz rag,baihlaeng aeu geij cib boux vunz gaex,loekci baenqlulu,cilaeuz couh baenaj roemroem,vifung dangqmaz,naengh youq gwnz dingj muengh bae,daengx Gvanghcouh cungj raen yienhsag.          Ngoenzneix,Vuj Hwzli daeuj lwnh Nungz Cigauh:Raemx haeuj singz gaenq gat duenh,ndaw singz mbouj miz raemx yungh lo.Nungz Cigauh dingq le angq naeuz:"Cilaeuz ngoenzneix ndaej yungh lo."            Nungz Cigauh ,Vangz Swhmi ,Nungz Gencungh ,Vuj Hwzli benz hwnj gwnz cilaeuz,ndwn hwnj dingj bae,gyoengq bing he baihnaj rag baihlaeng gaex,ndij dahhaenzsingz heux singz byaij bae.Nungz Cigauh muengh haeuj ndaw singz,cijraen ndaw singz nyaengqnywtnywt,diuzdiuz gai cungj miz vunz vat cingjraemx,Soengqginh luenhcabcab buet bae buet dauq,miz di caeuq beksingq ciengj raemx,miz di haeuj diemq bae ciengj doxgaiq,muenx gai goenjhuhu lumjbaen z rwi doek rongz.Bingsoujsingz youq gwnz singz yawjraen cilaeuz,bouxboux da byaengq da daengx.Miz vunz nyingz naq daeuj,naq venj youq gwnz hazraep,ci he mbouj ngaihsaeh.Heux singz buenq gien he,Nungz Cigauh gaenq roengz gietsim:Sikhaek gung singz!          Nungz Cigauh ndwn youq gwnz dingj ci,linghgeiz baez vad,cijraen:          Nungzginh bouxboux gingz aendangjnaq,soemh gij naq daj gwnz singz nyingz roengzdaeuj lumj fwnraq haenx cung hwnjbae,hwnz ngoenz mbouj dingz aeu ci rag namh,dien bingz gij gij mieng gij dah haenz singz.Dah mieng dienz bingz le,youh rag namh bae cuk dinsingz,ginggvaq haujlai baez fanfoek cung hoenx,laj dinsingz couh cuk baenz aenaen ndoinamh.         Yienzbonj singzciengz sangsu haenx bienq daemq lo.         Nungzginh nda ndei geij cib aen daihbauq,dwk ndei siu caeuq rin,baez cit yinx,humhum yiengj goksat,rinbauq bongh hwnj singz bae,baez caq rinsoiq sinzbyanz,ciengz vauq vunz laemx,bingsoujsingz dai sieng fouzsoq.Baez nyi bauq yiengj,Soengqginh bouxboux gaeb gyaeuj boemz deih,cijmiz caj dai.          Bauq yiengj gvaq le,Nungzginh baenz doih baenz doih cung hwnjbae,aeu ci rag hazsauj daeb hwnj gwnz ndoinamh,baenz ci baenz ci daeb hwnjbae,ndoinamh youh bienqbaenz ndoihaz lo,ndoihaz yied daeb yied sang,yaek caeuq singzciengz doxbingz le,couh rwed hwnj youzgyaeuq,feiz baez cit,feizmbaw dawzhuhu,hoenz geuj rim mbwn,lag hwnj gwnz singzlaeuz,saeu lak vax loenq.Soengqginh goemq gyaeuj buet dai deuz mingh.Nungzginh swngzgei gwed lae baenz doih baenz doih cung hwnjbae,dap lae benz hwnj ciengz.Vuj Hwzli daiq haj bak boux sien cung daengz,danhseih meh mbwn guh yak,fwt ci hwnj rumznamz,feizmbaw lag doxdauq,Nungzginh fouzfap hwnj singz,fanj deng feiz loemh.Rumzhung gvaq le youh doek fwnraq,feiz deng rwed mon lo,Soengqginh caiq dauq hen singz,Vuj Hwzli fouzfap,cijndaej daiq bing doiq dauq.          Nungzginh doengxngoenz gung singz mbouj roengz,youh gaij youq doengxhaemh gung.Baez he,Hij Yenz daiq sam bak boux gwed lae caegcaeg hwnjbae,laeglemx benz hwnj singz,cingq yaek hamj gvaqbae,fwt deng Soengqginh yawjraen,yaepyet sing laz rwenz hwnjdaeuj,naq nyingz daeuj lumj fwnraq,Hij yenz cijndei doiq roengzdaeuj.           Soengqginh deng humx deng gung,hwnzngoenz mbouj anningz,seizseiz ruj sim ruj mbei,bouxboux doeknaiq dangqmaz.Miz mbangj Soengqginh caegcaeg aeu cag duengq ok rog singz,daeuz haeuj Nungzginh.Cung Genj rox le,roengzlingh naeuz:"Byawz bae haeuj caeg,gaj bohmeh lwgyah!"Gyoengq bing gig saenz,mbouj gamj doenghdanh,hoj gvaq saedceij,           Nungzginh gung singz haj cib ngoenz,yienznaeuz gaj dai haujlai Soengqginh,hoeng lij gung singz mbouj roengz.           Baenz nanz gung singz mbouj roengz,Daxnungz simgip dangq feiz coemh.Ngoenz he banhaemh,de heuh Nungz Cigauh buenx de hwnj cilaeuz,cazyawj ndaw singz yawz yiengh,cij raen ndaw singz ranzranz hoenz hwnj yeuyeu,gwnz gai cingjraemx haujlai vunz bae rap raemx,vunz bae vunz dauq,mbouj miz saek di vuengluenh.Daxnungz naeuz:"Seizneix ndaw singz haeux mbouj gat,raemx mbouj noix,baenzneix nanznanz gung mbouj roengz,mbouj ndei banh ha.Yawj hwnjdaeuj,Soengqginh ciemq dienseiz deihlaih,raeuz cij ndaej vunz huz,gizneix mbouj ndei dingz nanz hw."           Nungz Cigauh naeuz:"Caiq humx singz duenh seizgan he,caj ndaw singz haeux gat,Gvangjcouh mbouj gung hix gag baih lo."           Daxnungz nyaeuq meizda naeuz:"Mbouj ndaej caj lu,daengz Soengqginh miz gouqbing daeuj,raeuz couh deuz mbouj gib lo."         Nungz Cigauh sij mbouj ndaej guh saeh daengz byongh couh vut,couh euq naeuz:"Miz gouqbing daeuj,gou hix mbouj lau,gou cingq siengj caeuq gyoengqde hoenx ciengz gvaqyinx he ne.Ndaek Cung Genj neix ndoj youq ndaw singz,mbouj gamj loh naj,yaek hoenx mbouj ndaej hoenx,simnyap hw!"        Daxnungz sing sang naeuz:"Cigauh!Mwngz dwg bouxdaeuz,mbouj ndaej baengh beizheiq guh saeh!Mwngz youh famh beizheiq lwgnyez lo!"        Nungz Cigauh gipmuengz ngaem gyaeuj naeuz:"Daxmeh gaej ndatheiq,gou cij roxnyinh,hoenx daengz seizneix mbouj saw mbouj hingz,saedsaeh nanz souh."     Daxnungz naeuz:"Yawj saeh mbouj ndaej gujbanj lai.Raeuz daj Yunghcouh hoenx daengz Gvangjcouh,neix suenq ndaej hingz lo.Youq Gvangjcouh hoenx haj cib geij ngoenz,raeuz hix haemq vifung,Soengqginh sim diuq mbei yup,raeuz cix mbouj sieng saek di,dauqfanj demlai geij cien vunz,neix hix dwg hingz ha;danghnaeuz mwngz ndaej ancienz daiq daengx ginh Gvangjcouh,mbouj hawj Soengqginh louz miz saek di rizlaeuh,caemh dwg hingz gyoengqde lo.Hingz mbouj hingz mbouj caih gung roengz aen singz he."     Nungz Cigauh sim fug lo,naeuz:"Daxmeh gangj gig deng,gou ciuq banh."     Gvaq geij ngoenz le,gak dieg faenfaen daeuj bauqoeng sae namz baek cungj miz geij cien geij cien Soengqginh gouqbing hai daeuj……     Soengqginh gouqbing labdaeb daeuj daengz,lij caengz cap maenh,Nungz Cigauh senq roengz lingh,cek yingz hwnjdin,hai bae foedfoed,yiengq Yinghcouh byaij bae……

Stoneman

	Cingj Loh Manh Lauxsae caiq son gou gij cih lajneix: cibngeih. Gven Dou Maenhndaet 十二、毌閗鍆埿 auqmanz (Gak vunz gak cawjeiq, mbouj auqmanz de): cet (ndawsingz rogsingz dauqcawq cet): fub (gwnz ndoi fouzsoq feizbog fub dawz): gaex (Mwngz dawz Bouxcuengh gaex deuz): goek (daj goek daengz byai): gyaiq (Hij Yenz cix gyaiq Giz Yinh bae Anhdwzcouh raen Nungz Cigauh): heiqgoenj gaetgaet (Nungz Cigauh heiqgoenj gaetgaet): mbaet (yienznaeuz huj dwk heiq yaek mbaet bae): nyapnyuk (Nungz Cigauh gig nyapnyuk): sienh (ma haeuj ranz mbouj sienh): sonyinx (gou lij miz saeh cingj cienghginh sonyinx ne): voenqciengq: cibsam. Gaj Gaeq Gwn Laeujlwed 十三、嘎鳮哏溇淕 beb (boihseiz cix dungx beb): gae (mwngz gae gou damong dafangz ha?): ngonz (Daxnungz yawj ndaej gyae ngonz ndaej gvangq): youq neix “ngonz” = yawj? raeng (guh gaujvaq yinhheiq ndei cix dungx raeng): cibseiq. Dwk Roengz Yunghcouh 十四、徳躘邕州 biq (maet cungj nanz biq deuz): bou (couguen yienznaeuz bou): cacoemj (Cangh Yizsinh hwk dwk cacoemj baij vunz bae): daindiengq (Vuz Yangh doek max daindiengq): doxcanj (gyau ban le doxcanj okbae ra laeuj sai lo): dwgcaengz (haujlai saehcingz banh ndaej sawj vunz lajmbwn dwgcaengz): faexgyaengh (Hij Yenz faexgyaengh mbat vengh): goenjdat (cingq gingz boilaeuj angqhoh goenjdat): gyaiq (Cinz Gungj gyaiq daeuj dingdangz): gyonj (Gyonj cug hwnjdaeuj!"): heh (gou nyienh dub uk heh sim daeuj bauqdap!): hozlaemz (dingjlingz baek deng hozlaemz Vuz Yangh): lag (lumj feizhaij lag haz): mauhhang (Nungz Cigauh daenj mauhhang buhhoengz): mid (mbouj noix vunz gaenq bwh ndei cax mid): myox (lienz daengngoenz cungj myox bae): naraq (Duz naraq mwngz!): ndaij, nyungq (Ndaw singz luenh dangq ndaij nyungq): ngad (cax gaenq ngad daengz hozlaemz lo): nyoem, nyoemnyainyai (Ndaw singzlaeuz daiz laeuj he nyoemnyainyai): raeg (cawz raeg gij nduknaeuh lajmbwn): rub (Nungzginh rub daeuj): vahbyangz (Mwngz ndaek vunz neix ciengz gangj vahbyangz): wngq (beksingq hemq wngq): yinxdaeuz (Nungz Cigauh yinxdaeuz lo): yup (sim gaenq yup raixcaix):

卜丁

	auqmanz (Gak vunz gak cawjeiq, mbouj auqmanz de): 强迫别人接受某种意见（或者强迫别人做某事） cet (ndawsingz rogsingz dauqcawq cet): 散步、到处走走 fub (gwnz ndoi fouzsoq feizbog fub dawz):（形容）忽然的、猛的 gaex (Mwngz dawz Bouxcuengh gaex deuz): 撵 goek (daj goek daengz byai): 根（从头到尾） gyaiq (Hij Yenz cix gyaiq Giz Yinh bae Anhdwzcouh raen Nungz Cigauh): 押解 heiqgoenj gaetgaet (Nungz Cigauh heiqgoenj gaetgaet): 气愤填膺 mbaet (yienznaeuz huj dwk heiq yaek mbaet bae): 断（息） nyapnyuk (Nungz Cigauh gig nyapnyuk): 烦恼、烦乱 sienh (ma haeuj ranz mbouj sienh): sonyinx (gou lij miz saeh cingj cienghginh sonyinx ne)指引、指教 voenqciengq: 打仗 cibsam. Gaj Gaeq Gwn Laeujlwed 十三、嘎鳮哏溇淕 beb (boihseiz cix dungx beb): 瘪 gae (mwngz gae gou damong dafangz ha?): 欺负 ngonz (Daxnungz yawj ndaej gyae ngonz ndaej gvangq): youq neix “ngonz” = yawj?远望的意思 raeng (guh gaujvaq yinhheiq ndei cix dungx raeng):胀（肚子胀，指吃的饱） cibseiq. Dwk Roengz Yunghcouh 十四、徳躘邕州 biq (maet cungj nanz biq deuz): 逃 bou (couguen yienznaeuz bou): cacoemj (Cangh Yizsinh hwk dwk cacoemj baij vunz bae): daindiengq (Vuz Yangh doek max daindiengq): 死翘翘 doxcanj (gyau ban le doxcanj okbae ra laeuj sai lo):互相扶着 dwgcaengz (haujlai saehcingz banh ndaej sawj vunz lajmbwn dwgcaengz): 看不起、起怨 faexgyaengh (Hij Yenz faexgyaengh mbat vengh):粗木棒 goenjdat (cingq gingz boilaeuj angqhoh goenjdat): gyaiq (Cinz Gungj gyaiq daeuj dingdangz): gyonj (Gyonj cug hwnjdaeuj!"): 集中、一起、都（都绑起来） heh (gou nyienh dub uk heh sim daeuj bauqdap!): 割 hozlaemz (dingjlingz baek deng hozlaemz Vuz Yangh): 脖子 lag (lumj feizhaij lag haz): mauhhang (Nungz Cigauh daenj mauhhang buhhoengz): 头盔 mid (mbouj noix vunz gaenq bwh ndei cax mid): 匕首 myox (lienz daengngoenz cungj myox bae): naraq (Duz naraq mwngz!):是否应为 maraq 疯狗 ndaij, nyungq (Ndaw singz luenh dangq ndaij nyungq): ndaij绳 nyungq乱ndaij nyungq乱绳一团 ngad (cax gaenq ngad daengz hozlaemz lo): 擦边碰到 nyoem, nyoemnyainyai (Ndaw singzlaeuz daiz laeuj he nyoemnyainyai): raeg (cawz raeg gij nduknaeuh lajmbwn): 尽 rub (Nungzginh rub daeuj): 围扑 vahbyangz (Mwngz ndaek vunz neix ciengz gangj vahbyangz):吹牛的话、大话？ wngq (beksingq hemq wngq): 回应 yinxdaeuz (Nungz Cigauh yinxdaeuz lo): 起兴、来兴趣了 yup (sim gaenq yup raixcaix):烦恼 见nyapyup gwnzneix gejgangj,mbouj itdingh doiq,cingj Lohmanh lauxsae boujcingq!

路漫

	原注：卜丁    我认可的就不再注解了，破折号后面是我的补充： auqmanz (Gak vunz gak cawjeiq, mbouj auqmanz de): 强迫别人接受某种意见（或者强迫别人做某事）——勉强（各人有各人的主意，不要勉强他） cet (ndawsingz rogsingz dauqcawq cet): 散步、到处走走——（城外城内到处走走） fub (gwnz ndoi fouzsoq feizbog fub dawz):（形容）忽然的、猛的 ——（山上无数的火把突然燃起） gaex (Mwngz dawz Bouxcuengh gaex deuz): 撵——推、搡（你把壮族推开不要） goek (daj goek daengz byai): 根（从头到尾） gyaiq (Hij Yenz cix gyaiq Giz Yinh bae Anhdwzcouh raen Nungz Cigauh): 押解——（许然押解亓[Yinh 上“斌”下“贝”结构的字，我电脑字库中找不到]去到安德州见侬智高） heiqgoenj gaetgaet (Nungz Cigauh heiqgoenj gaetgaet): 气愤填膺——（侬智高气愤填膺） mbaet (yienznaeuz huj dwk heiq yaek mbaet bae): 断（息）——窒息（虽然火得呼吸都要窒息） nyapnyuk (Nungz Cigauh gig nyapnyuk): 烦恼、烦乱——恼火（侬智高非常恼火） sienh (ma haeuj ranz mbouj sienh): ——善良（狗进家没有善意） sonyinx (gou lij miz saeh cingj cienghginh sonyinx ne)指引、指教——（我还有事情请将军指教呢） voenqciengq: 打仗——混账 cibsam. Gaj Gaeq Gwn Laeujlwed 十三、嘎鳮哏溇淕 beb (boihseiz cix dungx beb): 瘪——（背时就挨饿） gae (mwngz gae gou damong dafangz ha?): 欺负——讽刺、讥笑（你讽刺我双目不明呀？） ngonz (Daxnungz yawj ndaej gyae ngonz ndaej gvangq): youq neix “ngonz” = yawj?远望的意思 ——（妲侬看得远视得宽） raeng (guh gaujvaq yinhheiq ndei cix dungx raeng):胀（肚子胀，指吃的饱） ——（做叫花运气好才吃得饱） cibseiq. Dwk Roengz Yunghcouh 十四、徳躘邕州 biq (maet cungj nanz biq deuz): 逃——逃脱（跳蚤都难得逃脱） bou (couguen yienznaeuz bou): ——无能、无用（州官虽然无能） cacoemj (Cangh Yizsinh hwk dwk cacoemj baij vunz bae): ——赶紧、急忙（张日新吓得急忙派人去） daindiengq (Vuz Yangh doek max daindiengq): 死翘翘——（吴香落马死亡） doxcanj (gyau ban le doxcanj okbae ra laeuj sai lo):互相扶着 ——竞相（交班后竞相出去找酒喝了） dwgcaengz (haujlai saehcingz banh ndaej sawj vunz lajmbwn dwgcaengz): 看不起、起怨——可恶、可恨（好多事情办得让天下人怨恨） faexgyaengh (Hij Yenz faexgyaengh mbat vengh):粗木棒 ——（许然木棍一扫） goenjdat (cingq gingz boilaeuj angqhoh goenjdat): ——热闹（正举起酒杯热烈祝贺） gyaiq (Cinz Gungj gyaiq daeuj dingdangz): ——押解（陈珙押解到正堂） gyonj (Gyonj cug hwnjdaeuj!"): 集中、一起、都（都绑起来） heh (gou nyienh dub uk heh sim daeuj bauqdap!): 割——（我愿意打破头剖开心来报答） hozlaemz (dingjlingz baek deng hozlaemz Vuz Yangh): 脖子——后颈窝（恰巧插中吴香的后颈窝） lag (lumj feizhaij lag haz): ——燎（仿佛火海燎茅草） mauhhang (Nungz Cigauh daenj mauhhang buhhoengz): 头盔——（侬智高戴头盔穿着红衣） mid (mbouj noix vunz gaenq bwh ndei cax mid): 匕首——（不少人已经备好刀子、匕首） myox (lienz daengngoenz cungj myox bae): ——灰暗色（连太阳也变灰暗了） naraq (Duz naraq mwngz!):是否应为 maraq 疯狗——瘟狗（你这只瘟狗！） ndaij, nyungq (Ndaw singz luenh dangq ndaij nyungq): ndaij绳 nyungq乱ndaij nyungq乱绳一团——（城中乱得有似一团乱麻） ngad (cax gaenq ngad daengz hozlaemz lo): 擦边碰到——（刀已经触到后颈窝了） nyoem, nyoemnyainyai (Ndaw singzlaeuz daiz laeuj he nyoemnyainyai): ——丰盛，十分丰盛（多指餐桌上的菜肴）（城楼内一桌丰盛的菜肴） raeg (cawz raeg gij nduknaeuh lajmbwn): 尽——（除尽天下腐败） rub (Nungzginh rub daeuj): 围扑——突然（侬智高突然来到） vahbyangz (Mwngz ndaek vunz neix ciengz gangj vahbyangz):吹牛的话、大话？ ——谎话（你这人经常说谎） wngq (beksingq hemq wngq): 回应——（百姓呼应） yinxdaeuz (Nungz Cigauh yinxdaeuz lo): 起兴、来兴趣了——（侬智高来兴趣了） yup (sim gaenq yup raixcaix):烦恼 见nyapyup——胆怯（心中已经十分怯怕） gwnzneix gejgangj,mbouj itdingh doiq,cingj Lohmanh lauxsae boujcingq!——docih 卜丁gejgangj,gej ndaej gig ndei!

Stoneman

	Docih 卜丁 Beixnuengx caeuq Lohmanh Lauxsae.  Daj sou youh hag ndaej haujlai cih Cuengh, cijdwg miz saek di cih youh mbanj gou gaenq mij miz vunz yungh lo. [此贴子已经被作者于2004-9-23 3:48:46编辑过]

Stoneman

	Lohmanh Lauxsae, seizlawz caiq daeuj gangj cit goj neix hawj dou dingq ha? Gou siengj rox Daxgoeng Nungz Cigauh yiengq Yinghcouh byaij bae lo de doeklaeng youh hoenx bae daengz gizlawz, youh baenzlawz hoenx saw lo, deuz ok dieg Cuengh ......

路漫

	duenh seizgan neix nyaengq,gvaq geij ngoenz dem ceng'aeu caiq cau diep okdaeuj.docih mwngz causim daengz.