FWEN BAZGOH 拔哥山歌

lwgyungh

	FWNGZ GAEM FWNGZ MBOUJ CUENGQ Dajdingh raemx dumh mbwn Fwngz gaem fwngz mbouj cuengq Doxgyaez lumj beixnuengx Rox guh yienghlawz lumz Guenyaem ndij saenzfuz(baed) Bux(boux) baengh bux guh vunz Dajdingh raemx dumh mbwn Fwngz gaem fwngz mbouj cuengq Lij nding goengh bau ien Doxyien(raen) mbouj gyaez cuengq Doxgyaez lumj beixnuengx Rox guh yienghlawz lumz

lwgyungh

	SONG RAEUZ VUENH SAENQ COQ NDAWHOZ Beix naeuz cinjdingh cix cinjdingh Song raeuz vuenh saenq coq ndawhoz Gaiq yungh uengjfeiq lwg bouxcoz Hot vah ndawhoz mbouj hawj lumz It daengq ngeih daengq duz nuengx bengz Coenz vah bouxhenz gaiq yungh saenq Beix naeuz cinjdingh cix cinjdingh Song raeuz vuenh saenq coq ndawhoz Go lumj lwgbya youq dahlaux Go lumj lwgnyauh ndaw raemx mboq Gaiq yungh uengjfeiq lwg bouxcoz Hot vah ndawhoz mbouj hawj lumz

lwgyungh

	BEH BEIX VID MEH CIX VID MWNGZ Beh beix vid(vut) namh cix vid mbwm Beh beix vid mwngz cix vid meh Song fwngz vix mbwn hawj mwngz deq(yawj) Song baih siuzsij(mieng) bet cib nienz Song raeuz raiz saw coq gyaeujhoq Youh raiz mingzcoh coq gyangfwngz Beh beix vid namh cix vid mbwm Beh beix vid mwngz cix vid meh Beix aih bae gyawj gyaemh bae gyae Yax lij gyaez mwngz lumj dez meh Song fwngz vix mbwn hawj mwngz deq Song baih siuzsij bet cib nienz

lwgyungh

	SONG RAEUZ DOXGOENGH SIUJ DEIHFUENG Song raeuz doxgoengh siuj deihfueng Doxliz gij ndwen mbouj raen naj Ndwen sam cib ngoenz dauq ndi gvaq Hot vah doxdaengq mbouj hawj lumz Mbouj un goengh canz(liengzdaiz) gyaemh goengh cangq(cuengq) Danh ndaej goengh mbanj gyaemh goengh biengz Song raeuz doxgoengh siuj deihfueng Doxliz gij ndwen mbouj raen naj Nuengx swh roeg'enq mbin gvaq bya Beix swh roegya mbin gvaq baq(ndoi) Ndwen sam cib ngoenz dauq ndi gvaq Hot vah doxdaengq mbouj hawj lumz

lwgyungh

	NUENGX SIM AEU DAWZ BINGZ Beix yaek bae hagdangz Nuengx manh dawz sim bingz Byaij Gyauzyenz* bae dingz Ngeix daengz mwngz goz nuengx Ndaem va coq gwnz singz Muengh rumz gim bae ganq Beix yaek bae hagdangz Nuengx manh dawz sim bingz It daengq ngeih youh daengq Youzcaih raemx faen bingz Byaij Gyauzyenz bae dingz Ngeix daengz mwngz goz nuengx ___________________ *mingz aenbya.

lwgyungh

	SIM LIJ VAN LIJ GYOH Beix ok rog bae nanz Sim lij van lij gyoh Roen gyae cien leix loh Gyoh geiq saenq nanz daengz Ngux nyied dauq baih neix Beix dingh dauq bae ranz Beix ok rog bae nanz Sim lij van lij gyoh Roen gyae loh youh gyae Beix gyaez mwngz mbouj rox Roen gyae cien leix loh Gyoh geiq saenq nanz daengz

lwgyungh

	MANH GIET DIUZCINGZ MBOUJ HAWJ DUENH Beix ngoenz byaij gwnz youh byaij laj Dohse nuengxdaz hab guenyaem Youq ranz geij bi mbouj bienq sim Guhcaemz gouj cin mbouj hawj duenh Raeuz ndaej cib bet cix gangj cin Manh giet diuzcingz naek baenaj Beix ngoenz byaij gwnz youh byaij laj Dohse nuengxdaz hab guenyaem Nuengx ndaej daeuj goq cix daeuj goq Gaej guh dazfouh lanh daej bwnz Youq ranz geij bi mbouj bienq sim Guhcaemz gouj cin mbouj hawj duenh

lwgyungh

	NUENGX GAQ GIUZRIN HAWJ BEIX RAIH Nuengx gaq giuzrin hawj beix raih Haethaemh ndaej byaij cunz nuengx ranz Raemx lae roengz dah bya rongz dan Sim beix bonjsuenq daeuj boiq mwngz Yijgaiq sim gyoh hoz youh gyaez Siengj ndij nuengx bae doengz gip vaiq Nuengx gaq giuzrin hawj beix raih Haethaemh ndaej byaij cunz nuengx ranz Ndij nuengx doengz soengz gwnz giuzrin Song baih aencingz mbouj hawj sanq Raemx lae roengz dah bya rongz dan Sim beix bonjsuenq daeuj boiq mwngz

lwgyungh

	GAEUJ YOUH GAEUJ MBOUJ RAEN Gaeuj youh gaeuj mbouj raen Mwh lawz daengz liux nuengx Ce gaiqmaz gwq conq(niengh) Gwq muengh youh mbouj raen Ce gaiqmaz gwq ciuq(muengh) Heuh youh heuh mbouj daengz Gaeuj youh gaeuj mbouj raen Mwh lawz daengz liux nuengx Ce gaiqmaz gwq siengj Buenz muengh mwngz guh nuengx Ce gaiqmaz gwq conq Gwq muengh youh mbouj raen

lwgyungh

	BEIX NAENGH LAJ RIEP RAEMXDA ROENGZ Liz duz saihoz* ndaej cib ndwen Haethaemh baez dwen simdaeuz get Youh aeu coenz vah mwngz daeuj ndiep Beix naengh laj ndiep raemxda roengz Mbouj fug dauq bae hawj vunz guenj Youh lingh dauq suenq ndaej geij ndwen Liz duz saihoz ndaej cib ndwen Haethaemh baez dwen simdaeuz get Gyanghaemh baenzhwnz raen ndeigyaez Mbouj beij doengz gyaez sim yax net Youh aeu coenz vah mwngz daeuj ndiep Beix naengh laj ndiep raemxda roengz ____________________________ *Youq neix dwg naeuz maexyah dwggyaez de.

lwgyungh

	SWZSWZ NIENMH DAENGZ GAEJ YUNGH LUMZ Uengjfeiq bouqyah(gvanbaz) raeuz souhgvei Raeuz doengz hengz ndei hawj vunz haenh Ei gaiq coenz vah raeuz doxdaengq Swzswz niemh daengz gaej hawj lumz Raeuz gaej yungh saenq coenz bouxwnq Baih fwz hozhwn fwz cix si(gangj) Uengjfeiq bouqyah raeuz souhgvei Raeuz doengz hengz ndei hawj vunz haenh Mbouj miz mingzyi swh boux dai Daengq duz nuengxgvai dawz sim maenh Ei gaiq coenz vah raeuz doxdaengq Swzswz niemh daengz gaej hawj lumz

lwgyungh

	NDWENCIENG CO SAM BING CIX NDAEJ Ndwencieng co sam bing cix ndaej Yangzhau lij coi dawz bae gyaeng Ngeix gaiq baenznyaenx daiq goenq saem Nuengx bae ciengx nyungz gyaemh gwn namh Bouxcaeg vaijdaeuj raeuz hwnj bya Hwnj bae byalawz de hix laeh Ndwencieng co sam bing cix ndaej Yangzhau lij coi dawz bae gyaeng Bawx Cwnz Suswnh daeuj soengq souh Gyanggai miz boux lij dacaengz Ngeix gaiq baenznyaenx daiq goenq saem Nuengx bae ciengx nyungz gyaemh gwn namh                                       (sat)