日志
Faen bya
热度 1
Hagdangz dwk daemz,youh ndaej faen bya lo,ndaw sim gou miz di angq,youh miz di damsim.Angq dwg aenvih youh ndaej gwn bya saensien lo,damsim dwg aenvih gou fwngzheiq mbouj gaeuq,mbat mbat cungj nyaep ndaej geij lwg bya'iq ,mbat mbat cungj da yawj boux wnq angqvauvau dwk riuj duz byahung he riugokgok ma ranz.
Ngoenz neix,daengngoenz daj baih sae okdaeuj lo.Cij raen gij bya baizlehleh youq gwnz dieg,cingq caj bouxcawj aeu gyoengqde ma ranz cawj ne.Seizneix gaenq miz geij boux lauxsae nyaep ciem lo,gou seizbienh nyaep song naed ciem,cek hai baez yawj,caen dwg lumj gip ndaej cienz yienghneix angq,mienh diuq mienh dawz mbaw ciem nem hwnj ndangbya byavanz hung bae,gou caiq cek yawj lingj mbaw ciem,hix dwg duz byalienz hung ndeu,gou riu ndaej bak cungj hup mbouj hwnjdaeuj lo.Hoeng,gou lij caengz angq ndaej sam faen cung,Veiz lauxsae fatyienh,bya faen ndaej faenhsoq mbouj gaeuq,itgungh 16 boux vunz,ngamq faen miz 14 faenh lo,yienghneix youh deng faen gvaq lo,youh deng nyaep gvaq ciem lo,gou begbeg angq lo.Bouxlawz rox caij yaep he vanzlij nyaep ndaej mbouj ndaej byahung lo.Haicij nyaep ciem lo,gou hawj gyoengq lauxsae sien nyaep,sim naemj:Doxgaiq ndei caem roengz daej,gangj mbouj dingh youh.......Gou youh genj song aen ciem,cek hai daih'it aen,ndaw sim mbouj siengj daengz nyaep ndaej byahung,couh menhmenh bae ra faenh bya gou.Caen dwg siengj mbouj daengz,mbat neix da gou cengq ndaej lumj doengzlingz,gou coengzlai mbouj gamj roq aen fangzhwnz gvaq,duz byaloz ceiq hung neix gingqyenz doek roengz gou daeuj,gou caiq cek hai daihngeih aen ciem,engq hawj gou doeksaet lo,youh dwg duz byalienz hung he,gou hemq hwnj daeuj:"A,haemh neix gou aeu cawx roekhabcaij cij ndaej,gou fwngzheiq daiq ndei lo.......
