日志
Gij Saeh Lwgnyez Mizyinx
Gij Saeh Lwgnyez Mizyinx
Aen haggiz neix son hagseng sij gij saeh lwgnyez mizyinx,cij dauqngeiz
daengz gij saeh lwgnyez swhgeij,gag raen ndei riu,couh sij roengzdaeuj,gaij
gaij mbwq.
Bwnbit Vuenh Gvacij
Geiq ndaej doeg itniangaep seiz,ndaw ranz gungz,bi daengz haemh cungj
mbouj ndaej saek faen cienz bae cawx dangzgeuj gwn,couh suenq dwg faen
cienz he couh cawx ndaej aen dangzgeujgeng he hix mbouj miz cienz cawx.
Hoeng,youq byoenghroen gou bae hagdangz haenx,hai miz aen diemqbaeuq
ndeu,gou ngoenzngoenz bae hagdangz,cungj byaij gvaq gizhaenx,mbat daengz
raen bouxdoih mbouj dwg ndaej cawx gvacij couh dwg ndaej cawx fouhyiz
gwn,gou couh wnj naiz myadmyad,yaek cam vunz gwn youh miz di nyaenq,vunz
hix ngamq miz di he,faen liux hix mbouj miz geijlai lo,bouxdoih hix mbouj sij ndaej
hawj.
Doengz gou yienghhaenx hung neix hix miz geij boux doih,ranz de hix mbouj
miz cienz cawx doxgaiq gwn.Hix mbouj rox dwg bouxlawz cauxdouz,geij ngoenz
seizgan,lwgnyez ndaw mbanj bouxboux cungj rox gip bwnbit bae ndaw diemqbaeuq
vuenh ndaej gvacij gwn.Yienghneix,dawz liux bae doegsaw,ma daengz ndaw mbanj,
gij hong lwgnyez couh dwg ciz roen ciz mbanj bae gip bwnbit.Iq seiz,ranzranz cungj
dwg dawz bit ganj bae ndaw daemz gaeng,ciz roen loenq miz haujlai bwnbit,duz bit
hix gyaez youq laj goek faexcuk langhliengz,hix loenq miz haujlai bwnbit.Hoeng,
daengx mbanj lwgnyez cungj bae gip bwnbit,duzbit baenzlawz loenq ndaej baenzlai
bwn ok daeuj.Bwnbit ciemh daeuj ciemh noix,doeklaeng,youq gwnz roen,laj goek
faexcuk,cungj deng gip ndaej seuqsetset,mbouj gangj dwg bwnbit,mbawfaex hix
mbouj lai mbaw.
Gwnz roen mbouj miz bwnbit lo,bae lawz ra ne?Gvacij vanzlij siengj gwn ne.
Banhfap lwgnyez cungj dwg lai ne,baihrog mbouj miz couh ndoenj haeuj roengz
bit bae ra.Laj roengzbit haexbit na'nwtnwt,haeumijmij,diuz bwn nemz goeng haex.
Hoeng,vih liux gvacij,gou lwq mbouj ndaej baenz lai lo,bwn ciz nyauj,haex ciz nyauj,
haeu hix dwg hom.
Hoeng,mbouj gag gou mbouj raen haexbit haeu,gyoengq lwgnyez hix mbouj
raen haeu,boux boux cungj ciengj ndoenj haeuj bae nyauj,mbouj geij ngoenz,laj
roengzbit cix mbouj miz bwnbit lo.
Bwnbit mbouj miz lo,ndaw diemqbaeuq lij miz gvacij gai,ndaej gwn duenh
seizgan he lo,gij feihdauh gvacij youh hom youh diemz,bouxlawz nyaenx ndaej?
Banhfap dwg vunz naemj ok daeuj di,bwnbit mbouj loenq,couh bae gwn
ndang bit ciemz.
Ndaek saeh neix mbouj ndaej hawj vunzhung rox,hix mbouj ndaej hawj
bouxdoih bungzraen.Baez gaep duz bit seiz,duzbit hix swenj"yatyat",mbat
daengz bae gaep duzbit daeuj ciemz bwn,cungj sim diuq"Bungbung",lau dai
dangq maz.
Youh gvaq geijngoenz,lau deng vunzhung rox liux dwg moeb,couh mbouj
gamj caiq ciemz bwnbit lo,yaek gwn gvacij,cij ndaej gag naemj banhfap lo.
