日志
Doengh Geizhajceij
热度 1
Ngoenzlwenz ngamq cuengqhag ma daengz ranz,daeglwg gou couh heuh gou bae swiq byaek cawj byaek,de caeuq boh de gaj geij buenz geiz.
Gou mbouj sij ndaej bae guh hong,couh naengh roengzdaeuj guh bouxbuenq.Baez yaep da,gvan gou couh lienz saw seiq buenz,lienz de cihgeij dwg baenzlawz yiengh deng saw,de hix loengh mbouj cingcuj.Gvan gou gangj:"Ya,dauq deng saw hawj boux lwgnyez sam haet,sim mbouj fug bw!Gou couh mbouj saenq,de ak ndaej gvaq gou."Cij raen gvan gou gip ndei geizhau de,haeujsim sisi cimyawj buenzgeiz,boux lwg moix cuengq aen geiz,de cungj naemj aen geiz youq neix miz ma moegdik,gauj ma yaemmaeuz. Hoeng,daeglwg mbouj lwq de baenzlai,doengh ndaej gig vaiq,mwngz cuengq aen geiz,de hix ciep dwk cuengq aen geiz,lumj dwg mbouj miz ma naemjfap,cij dwg luenh doengh.Couh dwg yienghneix,daeglwg hingz ndaej soengsuemqsuemq,angq dwk riugakgak.Gvan gou saw ndaej naj nyouqyaujyauj,haeb bak haeb heuj sim mbouj fug.
Gou couh mbouj saenq daeglwg gou ndaej yienghneix ak,dawz byaek swiq seuq,couh byoengz gvan gou bae cawj byaek,hawj gou daeuj doiqfouq de.Gou wnggai beij gvan gou coengmingz di ba?Buenz daih'it ,gou mbouj cuengq ndaej geij aen geiz,couh sou hong lo,saw ndaej beij gvan gou engq camj.Ciep roengzdaeuj geij buenz,cungj dwg sam song baez couh deng lwg gou gaj daej loet raiz nyouh coenh,caeg deuz mbouj ndaej baenz vaiq.
Ai,caen dwg song boux vunzhung ak mbouj gvaq boux lwgnyez he lo,boux lwgnyez neix gaenq ndaej 7 bi ne,caen nyaenq dai vunz lo.
