[原创] Ingyungz Bouxcuengh _ Ayingj !

AAAAyingj

	Ayingj    纯壮文创作文集 (10 篇 )                                                            Ayingj   Ngvanh  Sij   Sawcuengh  Cophob  [ 10  bien ]                       Ayingj ---Dwg cih coh geij lai ndongqrongh ha , De aeu Vah vujmingz  sij   Sawcuengh sij ndaej hauj  lai bien faenz cieng,  seiz neix senj  cib bien ok daeuj  cop baenz   [ Saw   cop ] , hawj  Beixnuengx  Baengzyoux  yawj  !Cingj  sou daez ok  gij yigenq  dij    haenx   !                                                                                                    Bien   Dai    It                            Aeu Geiq  Roengz    Ma ...........                                                                      Geiq roengz  ma : Vunz minzcuz wnq baenzlawz yawj ngawz                                           Bouxdaeuz Bouxcuengh !        Yaek  hawj lizsij geiq raeu, raeuz caeuh aeu geiq  lizsi .Vunz Bouxcuengh caeuq  gak aen minzcuz  doengz it heij gwnyouq guh hongsaeh youq gwnz Diqgiuz, raeuz caemh miz nengz lig dawz gyoengq Bouxcuengh youq gwnz Diqgiu guh gak hongsaeh geiq roengz ma, hawj lwglan  Bouxcuengh ndaej rox moix it daih vunzcuengh guh liux gijmaz saeh,Daeg bied gyoengq  lingjdauj Bouxcuengh raeuz ,gyoengq de daiqbyauj Bouxcuengh  caeuq giz dah Guekgya gyau louz, guh laeb gvanheih cungj hongsaeh hung  haenx ,engq aeu daeg bieg geiq roengz ma .         Lumj  Boux daeuz Bouxcuengh  Loeg Bing mbat ok guek bae aen guek  Daih ,guek Yitbenj  guek  Hanz  cik saeh hung haenx ,Bouxcuengh  aeu dawz de  geiq saed geiq seiq  roengz ma.Loeg  Cujsiz de  caeuq Bouxlawz gangj vah, gangj gij maz vah, bae cazyawj giz lawz dieg, miz Boux lingdauj  aen minzcuz wnq yawj ndaej henj Bouxcuengh ,cungj aeu geiq roengz ma!  Aen vih Loeg  Bing dwg Vunz Bouxcuengh, Gvangjsih gak aen bauceij dwg Youz vunzgun gungjciq, yienghneix gyoengq de doiq Loeg Bing ok guek  fangjwen gienh saeh hung haenx  genhbwnj mbouj dawz yiengh hongsaeh yawj. Youq gak banj  bauqceij  Gvangjsih yawj mbouj raen Loeg Bing gij siusik. Loeg Bing dwg Boux daeuz Bouxcuengh ha! mbouj danh Vunz Hanqcuz  yawj mbouj henj  Boux daeuz Bouxcuengh,Lienz Gyoengq Bouxdaeuz Vaih guek caemh gen  yawj mbouj henj ha!Gyoengq de doiq Boux daeuz Bouxcuengh dawz ma guh gaujvaq yawj ha !  Mbouj miz saek goeng Yenzsouj ciep daih De , Yawj cuij Bouxcuengh ha! Guh it boux vunz cuengh, couh yiengh haenx ngaiz aen  mincuz wnq yawj  ngawz lu!          Raeuz caiq mbouj ndaej yawj ngawz vunz  bonjfaenh ha!          Gou genyij  [Sam yied Sam ]  aeu dawz  Loeg Bing bae vaih guek  cik saeh haenx guh Bien  lizsij swhliuq geiq roengz ma ! Gou siengj, Loeg cujsiz    itdingh boiq hab .Lingh vaih inggai dawz ciksaeh Gvangjsih gak aen bause mbouj yawj naek Boux daeuz Bouxcuengh ,mbouj baudauj boux daeuz Bouxcuengh okguek  hongsaeh  gij cingz gvangq haenx naeuz Loeg Bingh nyi!                                                                                         A.Cauyingj.Vangz                                                                                          Bi2004 \5 \28                                                    Bien Daiuh Ngeih                        Gyaez Gyoengq  Coj Ingyungz      Cieng  cujsiz  bien  faenzcieng  haigyaeuj  haenx,gouyawj  liux  song ngoenz .  Song ngoenz  daeuj, cik saeh  gyoengq cuenghcoj   it cig  mbouj  duenh  guh  doxgaep    caeuq  gyoengq  guen  ap bik Vunzcuengh    guh  doxbuek, gik doengh  aen sim  gou raixcaix. Gou vih miz yiengh haenx cojgoeng gamj daengz angqlangh  : Vunz  geiqding goeng  Vangz Gam ,gyoengq beixnuengx  Vujhuj ,au  Saeyenz Vangz  Cenzyauq, au Gih Cihfanq ,au Nuengx Cigau,au Veiz Ngaenzbauq , gyoengq beixnuengx  mbanjbet  gyoengq au Daibingzdenhgoz  ......ndaw sim  giggig   gyaez  gyoengq de ! Gou  miz cienz itdingh  bang gyoengq  de laeb bei,cuengq  youq henz dah goeng  Boux  roxdoh, hawj vunz gyoengq cuengh  lwg lan daih daih cungj bae sax de,bae yazyed de, hawj lwg cuengh  ngoenz laeng mbouj lumz dyoengq de !                                                                                                                                                                                         B20004 \ 6 \1                                           Bien Daih Sam                               Saw   Gauq   :                                                                                                                Cauz Bwzsinz Dem  Coih  Moq                                                                          Boux  guhgauq ; A .cauyingj.vangz caeuq gyoengq doih cuengh                    Boux ngaizgauq  :  Gihdangjveij cuhgiq Cauz bwzsinz                   Seizgan  :   Bi 2004.5-6    Boux guhgauq lijyouz:                              Genhgiq aen yenqfaz[ Cunghvaz Yinzminz Gungqhozgoz ] cieng dai it  diuz daih 4 ,Cienghdaih sam diuz 113,diuz 117,diuz118,diuz 119,diuz120,diuz 121 diuz 122 ; Genhgiq aen fapleix [Cunghvaz yinzminz gungqhozgoz dieg minzcuz gagguenj] cieng daih it diuz daih 6,diuz daih 8,diuz 10,diuz 15,diuz 16,diuz 17,diuz 18,diuz 21, diuz 22,diuz 23,diuz 24, diuz 25,diuz 26  gveidingh, nyinhweiz:Gvangjsih gih dangjveij cuhgiq Cauz Bwzsinz  famh miz yiengh neix coih:              1); Cauz bwzsinz  dwg it boux vunz Hanqcuz,de mbouj rox dieg Bouxcuengh saedsaeh cingzgvangq, cabfwngz dieg Bouxcuengh cwngqciq, leih yungh gij genz Cuhgiq lingjdauj Gak hangz gak yieb seiz,hawj daih liengh vunz Hanqcuz caenx ciemq gak gaep lingjdauj  aen vih , gaemguenj  liux daengx Gvangjsih ,bokdued Bouxcuengh gagguenj genz lig.sawj Gvangjsih Bouxcuengh ginghsiq,vwnzvaq fatcienq souh dingz doenq,laj mbanj Bouxcuengh guh raehnaz mbouj fouq, gij sanj binj moq  Bouxcuengh guh mbouj ok daeuj,gij guh ndaej ok daeuj  haenx  cwngqfuj mbouj bae gyamq dingq gij yunghcawq de caeuq gij gyaqciz de, gij sanjbinj siuloh mbouj guh ndaej swnh, Bouxcuengh laj mbanj hong vunzlai mbouj miz vunz bae guh,rox naeuz bae guh mbouj dij cienz, Sawcuengh vwnzva fatcienq souhdaengz hamhcaeh,daih bouhfaenh lwg ngyez mbouj ndaej hag bonj faenh minzcuz cihsaw vwnzva caeuq cuengh coj vwnzva!       2); Yungh dang cuhgiq genz lig mouzdued yinzdaq Cangzweijveiq Cujsiz  genz lig, aen veiqceq neix  genhgiq aen fap [Cunghvaz yinzminz  gunfqwhoz goz dieg gagguenj  fapleix ] cieng daih ngeih diuz 16 gvei dingh,wngdang youz Bouxcuengh dang!    3);  Cauz Bwzsinz  leih yungh dang cuhji genz lig,an baiz boux  hancuz Lij  Gimcauj cim Loeg Bing cujsiz ok guek rag hek daeuj  cam gya [Namzboz weiq]  seiz mouz dued liux [Namzboz veiq ] lingjdauj genz lig , [namzboz weiq]  guenjlij  Gizcangj ,mbouj miz gih Cujsiz doengz eiq couh dang lu,gijneix dwg gijmaz dauh leix ? Minz cuz gagguenj  genzlig baenz lawz ndaej ciep hengz ? Gij haenx dwg  mouz dued Bouxcueng gij cwngz goj  ha ! Vunz Hancuz itcig  youhcaq  Vunzcuengh ha !       4 );  ....(Beixnuengx bang gou sou comz yawj lij miz diuz lawz!)           Genhgiq gij saedsae gwnz haenx, gou yiengq Swqciqgih gaugaepj yinz        minz Fazyenq daez ok sangqgauq !                                   Bien  Daih Seiq                 Vwnz douq mbouj ndaej couh vujdouq          Vwnz Meijgoz  ciemq aeu gij Sizyouz  Yihlahgwz le,lij rox dawz gij Cwnggenz gag guenj gyau boiz hawj  Vunzgyoengq  Yihlahgwz   ,Boux Hanqcuz  cawz liux leih yungh  genzlig  dued  aeu gij Swhyenz  Bouxcuengh  le,  lij  baiq vunz gaem guenj  doengh aen buqmenz  youq gaenj haenx  ,mouzdued Bouxcuengh gagguenj gij  cwnggenz  , hawj  Boux  Hancuz  begsingq ciemq dieg  Bouxcuengh   guh ranz  youq  ,hix faen raehnaz guh .Leih  yungh  genzlig  ciemq aeu gij  caizfouq Bouxcuengh ! Gou Mbouj rox baenz lawz ndaej  hawj Bouxcuengh raeuz   fanndang guh cawj?            Cawz liux cujsiz vunz bae fanjgangq le, gou mbouj rox miz gij maz banhfap !          Cwngqciq gwnz baenz lawz gung,baenzlawz yungh  [Yenqfaz  ]   bae dued gaem gij genz gagguenj,dwg  bouh hong vwnzdouq  ndeu ! Vwnz douq caiq mbouj ndaej le, couh aeu vujdouq lo !          Bouxcuengh  ciengeiz  mbouj yungh bae  gag dox ciengj  gij genz bonjfaenh ha  ,yiengh haenx couh hawj boux hanqcuz  miz  caenx ciemq gij gih veiq lo !         Bouxcuengh   sam vunz aeu guh dox bang,ndaej gij leih ik aeu dox fen,doxfen ndaw de aeu  doxyiengh ,vaiq faen vaiq guh cij ndaej vaiq fat cienq !                                                                                           Bi 2004.6.5                                     Bien  Daih  Haj          Coih fuk  Gvangjsih  Sawcuengh  Yozyao Conhyez Sonhag  Sawcuengh Vahcuengh  Gij Nengzlig !                 [Gvangjsih Sawcuengh yozyau ] daj ngoenz guhbaenz  Vunzcuengh  raeuz doihengz  Sawcuengh Vahcuengh  aen gihdiq   haenx henj ,itcig  dwg vunz Hanqcuz  yaek  muedgaj  aen muzbyiuh . Gyoengq  de leih yungh  mouzdued ndaej gij genz  Gih Dangjveij ,gungjciq ndaej gij genz Gih Yinzminz cwngqfuj le, couh baij Vunzgun bae doiq  Bouxcuengh gak hangz gak yieb  saedhengz gungjciq, Leih yungh gij vwnzvaq gyoengq de gungdwk Bouxcuengh ganqbuq, baizcawz Bouxcuengh ganqbuq, Sawj Boux hag Sawcuengh gij cihsiz youq dieg cuengh  mbouj miz lengq sawj yungh .Doengzseiz Bouxgun leih yungh doihengz  Hanq vwnzvaq cihsiz , youq ndaw  Gvangjsih Sawcuengh  yozyauq  sonhag  sawgun , caiq sonhag  vah Bujdungh ,yiengh neix  Sawgun cihsiz caeuq  vah Bujdungh couh caenx  ndaej  aen veiqceq sonhhag  Sawcuengh Vahcuengh ,lingh vaih Bouxgun doiq Bouxcuengh hag Sawgun bizyez haenx  guh di ciuq guq,caux baenz gij yiengh  hag Sawgun beij hag Sawcuengh ndei ,hoenx dwk Bouxcuengh hag Sawcuengh  gij  angqheiq  , Sawj Sawcuengh son hag souhdaengz mbok gyaeuj ,[ Gvangjsih   Sawcuengh yozyauq  ]  conhyez  sonhag  Sawcuengh Vahcuengh gij  gunghnengz couh ngaiz yienghhaenx dwk vaih  !         Vunz  Bouxcuengh  vih maz  ngaiz  roxnginh  hag Sawcuengh  mbouj miz yungh  couh dwg  yiengh neix ok daeuj lo !          Aen vih  Bouxcuengh raeuz  gij  ginghsiq  caeuq cih Sawcuengh  mbouj  miz daepnem,gij sanjbinj  Bouxcuengh  mbouj ndaej nem cih sawcuengh it heij bae  doisiu, yiengh neix couh cauxbaenz  cih Sawcuengh,gij sanjbinj  Bouxcuengh  doengzcaez mbouj dij cienz,  cih Sawcuengh vunz raeuz couh  mbouj haengj hag,  gij doxgaiq  Bouxcuengh  aen vih mbouj hamz miz gohgiq vwnzvaq gyaciz, yiengh haenx baij henj gai, vunz couh yawj mbouj henj gij de, swhyienz couh mbouj dij cienz lo, gij sanjbinj Bouxcuengh  ngoenz  ciemh ngoenz lak, vunz cuengh couh ngoenz  ciemh ngoenz  gungz .Hong cuengh couh ngoenz ciemh ngoenz mbouj dij cienz !         Bouxcuengh  bouxdaeuz raeuz  aeu dawz  guh ok  gij Sawcuengh caeuq sanjbinj  giet  hab itheij bae siu cik hongsaeh ,guh baenz yiengh  fatcienq  Bouxcuengh  Gvangjsih  ginghsiq  hangh hong  naek ndeu ,dawz gij sanjbinj  Bouxcuengh  daez henj it aen dangjveiq, sien dawz ok vaihguek gai,caiq dawz bae dieg  gun gai ,vunz couh yawj ndaej henj  gij sanj binh raeuz ,aen vih seiqgyaiq  doiq  saw lahdingh sanjbinj dwg doxbang  siu cawx,cij  aeu gij sanjbinj miz yungh !ndei yawj  ! couh miz vunz cawx yungh gij de ! yiengh haenx guh, Bouxcuengh couh ndaej guh ngoenz beij ngoenz fouq !         Sanjbinj  caeuq vwnz vaq giethab, sanjbinj  dij cienz ,cih Sawcuengh vwnzvaq hix dij cienz, minzcuz Bouxcuengh hix ndaej hwng vuengh ! Danh saeh Bouxcuengh aeu  cuyiq  guh laeb  Bouxcuengh [ Baujhoh cujsiz gihgouq] ,baujhoh gij cwngzgoj Bouxcuengh mbouj ngaiz  vunz  duedciengj !                                                        A.Cauyingj.Vangz                                                       Bi2004 \6 \6                                                       Bien   Daih   Roek                                        YAWJ VUNZGUN  BAENZLAWZ DOIQ VUNZCUENGH  SAEDHENGZ  GAT  GYAEUJ CWNGQSWZ !                                   Swcigih  cujsiz  ciuqsaed  couh dwg  boux  gyaeuj  Vunzcuengh raeuz . Vunzgun itcig  yungh  seizgan  vwnzva   gvaegveiz gungjci Vunzcuengh boux Cujsiz . ( Seizgan  vwnzva  couh dwg  vunz  gun  guh hongsaeh seiz  dawz  cihsaw  hamz eiq couq seizgan  giethab  hwnj daeuj, yiengh neix ndaej  fencing  Vunzgun couq vunz minzcuz wnq cungj fuengfap ndeu !  Bouxlawz mbouj ciuq yiengh haenx guh ,gyoengq de couh nginh naeuz dwg  vunz vaihcungj, dwg  boux ngaiz  baizcawz !) , Vunzcuengh aen vih caengz ndaej miz bonjfaenh vwnzva ,youh  lau ngaiz baizcawz , hauj lai vunz itcig ciuq yiengh haenx guh.Aenvih Vunzcuengh  hag cih Sawgun  yungh cih Sawgun  mbouj ndaej beij vunz gun ak, yiengh haenx Vunzcuengh couh lauxlaux saedsaed ngaiz vunzgun baenq gyaeuj !           Loeg Bing  mbat bae Baekging  guh  lwnh hongsaeh  " Namzboz veiq "cingzgvangq , vunz Baekging  an cih coh  ndeu heuh guh '  Canj  souj  hingzdung '  ,  Couh dwg  doiq Vunz cuengh boux gyaeuj saed hengz gat gyaeuj , gungjciq couq yawj ngawz Vunzcuengh !                    Yawj gyoengq de baenz lawz guh ?                    Souj sien  aeu vunz gun an baiz youq  seiq henz  Loeg Bing, gat  raek  Loeg  Bing caeuq  Vunzcuengh itciet  hongsaeh gvan haeh , sawj Loeg Bing doiq hong saeh vunz cuengh mbouj miz banhfap  guh  saed  guenj leix  , Loeg Bing itciet hong saeh ,vunz  seiqhenz de  haengjheiq couh saedhengz ,mbouj ngamj gyoengq de couh mbouj saed hengz .  Aen vih duenh seiz gan neix Vunzcuengh raeuz yungh [ Yenfaz ] gij leix ma ceng  aeu gij genz gagguenj , gyoengq de doiq Vunzcuengh  couh saed hengz gat gyaeuj cwngqswz , hawj  gyoengq vunz gun henz ndang Loeg Bing  bauveiz Loeg Bing , ap bik Loeg Bing  bae yiengq  Vuz Yiz veiqbau ,  ciuq  [Yenfaz]  wngdang dwg yiengq  Cungjlij rox naeuz dwg gvuekgya boux cujsiz  guh gangjlwnh hongsaeh .Yiengq Vuz yiz  lwnh hong saeh dwg  roengz gek  di ! Mbouj miz yungh di , aen vih gyoengq vunzgun  mbouj dwg nginh Vuz Yiz  guhcawj  !                   Vunzgun caen yawj ngawz Bouxcuengh ha !                                                              A.Cauyingj Vangz                                                                  Bi2004.7.18                                               Bien    Daih   Caet                                             Gwn !                                                                                Bit  youzcauq   guhfap                 Byaekliuh :   Diuz bit cengh ( gaj ndei , miqfwn ,cawz dungx ) .                 Boiqliuh   :    Youz   song gaen .Dangz meg  song liengx                Guh fap  :     Dawz  diuzbit  cengh   aeu raemx  goenj  rih gvaq dangq ndeu ,yienz haeuh aeu   dangz  meg ( mwzyaz dangz )  heuz raemx  goenj  rih   gvaq  sam dangq ,rih  doh le  ,dawz duz bit  rak  song aen cung  daeuz ,  rak daengz  neng bit  hawqsak . Ndaej le , couh  dwk youz roengz rek ndat,   youz  ndat  180  doh baenz neix ( youz goenj  hai va dingz saek di ),couh dawz duz bit dwk roengz  bae cauq ,  cauq daengz hawj duz bit neng hoengz set, cug  daengz ndaw couh ndaej hwnj  rek lo ! roenq  baenz gaiq  cang deb couh ndaej hwnj daiz !            Haengj heiq  aeu makgiz guh di diemz saemj liuh rih hwnj bae ,engq ndeigwn !                                          Bya seng  guh  fap              Byaseng  ,  dwg  yiengh byaek Vunzcuengh  haengjhaengj gwn   ndeu  ,  youq daengx seiq gyaiq,  aen minzcuz gwn bya seng gig noix .              Dieg cuengh raeuz gak dieg miz gak dieg guh fap . Danh saeh , mbouj  guenj yiengh guh fap lawz , cax ,heng   aeu  guh seuq ,ceiq ndei dwg aeu raemx goenj   swiq gva ! ceij vuet bya aeu gij ceiq cengh haenx .                              Byaekliuh :  Diuz  byavanx   songgaen naek  baenz neix               Boiq liuh :   gieng,louj  ,begdangz ,gyu dwg gihbaenj liuh , youzduhdok , ningz mungq songaen, mak saemjmeiz roek aen (gij cimq gvaq ),ciengq makmoed byongh bingz ,raemx saemj ciengq youz aeu ngamj ,byaek  sijsu, byaek gyaemq byaek rang  aeu ngamj ,  youz lwgraz  .               Loengh fap :   Dawz duz byavanx  vetgyaep cawzdungxsaej cawz saih swiqcengh,yienzhaeuh aeu cax sekheh  gij noh bya ok daeuj ,aeu ceijcengh vuetseuq , swk hawq . Swiq cengh  hengcax haeuh dawz nohbya roenq baenz gaiq mbangmbet cuengq roengz deb ,  roenq gyieng   sei  bu youq gwnz noh, caiq  dwkvanq di beg dangz, didi gyu guh diemz, yienz haeuh raix youzduh dok roengz bae ,couh ndaej  deb noh byaseng lo !     Miz bya seng lij aeu guh gij boiq liuh caemj gwn cij ndei gwn ,gou gaiq cauq yiengh guh fap ndeu :       Ningzmungq, mak saemjmeiz roenq yungz,byaek rang,byaek sijsu ,byaekgyaemq swiqcengh  roenq seiq, cuengq roengz vanj, gya  raemxsaemj, ciengqmakmoed ,dangz, ciengqyouz, youz lwgraz, boiq ndei  diemz saemj, roengzrek baez goenj ,aeu douqfaenj  diuz ndei  cukgwd ,daek hwnj rek rih di youz lwgraz ,gij liuh caemj noh  byaseng couh guh baenz lo !  Miz mbangj boux  gij ningzmungq mak saemj meiz  byaek rang mbouj yungh dwk roengzcawj gvaq ,danh saeh aeu swiq cengh !                                                                                      2004.7.23.                                                                                       Bien    Dai     Bet                                                                                      Vunz Raeuz Aeu Rox Dox Bang !            Vunzcuengh raeuz mbouj dwg mbouj haengj dox bang , dwg mbouj rox dox bang !Daj miz vunzcuengh raeuz ,Beinuengx dox bang couh dwg vunzraeuz it cungj gihbwnj sujsiz hingzsik ,danh dwg cungj hingzsik neix  fatcienq roengzbae couh dwg ndaej dawz vunzcuengh guh  baenz aen mbanj hung ,aen mbanj hung miz geij cien vunz ,aen mbanj iq miz geij bak vunz, vunz raeuz youq laj mbanj dox bang guh gwn guh youq guh caemz guh lienh guh daenj guh angq guh heiq guh fwen !Vunz sai vunz baz gwnz congz dox gyawx ! Seng lwg seng lan !           Danh dwg, Beixnuengx dox bang cungj hingzsik haenx  gij leih  gig gaeb ,guh mbouj ndaej louzsang, guh mbouj ndaej guek gya,guh mbouj ndaej laj mbwn !Miz gij maz banfap dawz  vunz cuengh raeuz gij rengz doxcop hwnj daeuj ,it heij sawj yungh, sawj vunz raeuz bouxboux ndaej miz hong guh,ndaej miz gwn daenj ,guh gij hong miz gyaciz ,couh ndaej hwngvuengh vunzraeuz ne ?-----Gij ban fap haenx couh dwg aeu miz Vunzak Vunz cing lingjdauj sujsiz gihgouq !----- Couh dwg miz aen gih gouq senj aen minzcuz de boux ceiq miz cihsiz ceiq miz bonj saeh ,youh ceiq ndaej daibyauj vunzraeuz boux haenx  guh bouxdaeuz raeuz ,daiq yinx vunzraeuz   guh hong cwngqciq raeuz ! hong ginghsiq raeuz ! hong vwnzvaq raeuz ! dwk hoenx  giz lawz , hen souj giz lawz vunzraeuz bouxboux cungj aeu rox cingcuj !                                                                                                                                      A.cauyingj.Vangz                                                                                                              2004.8.5                                                   Bien   Daih  Gouj                                           Mwh Haenx Hag Sawcuengh             Bien  [Dauq yawjhag Sawcuengh]  haenx  hawj gou siengj daengz doengh baez mwh hag  Sawcuengh , hawj  gou  mbouj ndaeuj mbouj sij ok daeuj :                       Bi  1982 ,Gou youq ndaw mbanj it mienh guh  Youzca dok youz itmienh guh  siujyoz Lauxsae, song faenh hong hawj gou guh dwk yungjfoed , caiq gya ndaw ranz  guh  Ngauzlouj , gyadingz  ginghsiq guh ndaej bae foedfoed !  Dang seiz gou dingq nyi naeuz  ndaw yienh  hai  Sawcuengh  doihengz   son hag, gij hong  haenx gou  doi caez sat, gyau  50 maenz  le couh hag liux song ndwen  Sawcuengh . Youq  ndaw ban, gou raen gyoengq yozyenz  fat cienz faen cienz,gou caen geiz heih , cam gyoengq de dwg gij maz cienz ? Gyoengq de naeuz gou nyi :Gyoengq de dwg ndaw yangh baiq daeuj hag Sawcuengh,hag sat guh Bujdauj yenz, gij cienz haenx dwg cienz hong  boujdiep . Gou dang seiz rox gyoengq de  hag Sawcuengh  lij ndaej cienz, gou hag Sawcuengh aeu gyau cienz ,Caek laiq gou dang seiz mbouj  dwg gungz,mbouj ne caen dwg yaek daej yaek riu lo !  Hoeng , gou dingq goeng Yaucangj  youq naj daengxgyoengq  Yozyenz  rongx naeuz : Gyoengq yozyenz  raeuz aeu roengzrengz hag ha, Sawcuengh it dingh miz muengh!  Doengh gyoengq lauxbanj lij ok cienz daeuj hag Sawcuengh, sou miz gijmaz lijyouz mbouj roengz rengz hag  ne ?  haha ,Gou dangseiz Sim lij diemz subsub !                                                          2004.9.6                                            Bien       Daih   Cib                                           Sawcuengh  Aeu   Mbefat     Cihsaw yunghcawq dwg aeu ma geiq saeh geiq gingniemh geiq roengz Bouxcuengh raeuz youq gwnz seiqgyaiq guh gij hong Cwngqci hong Ginghsi hong Vwnzva  hong  Hoenxciengq .Caemh ndaej geiq roengzdaengx seiqgyaiq vunz soj guh dih it ciet ,geiq roengz  gwnz digiuz  gvaengxmbwn soj miz dih doxgaiq.  Doengzseiz Sawcuengh caemh ndaej guh benz doxgiet Bouxcuengh mbefat Bouxcuengh lienz dem Bouxcuengh di it cungj honggaiq......Vunz Yinghgwzlanz caeuq vunz Meijgoz couh dwg yiengh neix guh,gyoengq de yungh it cunghj vwnzsw hidungj ma geiq roengz daengx seiqgyaiq dih it ciet .Yaek couq giz dah minz cuz gyauhliuz couh doeng gvaq Boux hoizvah ma guh dox rox.. Bouxcuengh raeuz seiz neix daih bouhfaenh  mbouj ndaej aeu Sawcuengh ma son gyauq lwg nyez, lwg nyez raeuz youq yozyauq ngaiz aeu sam cungj vwnzsw vwnzva ma hag doxgaiq ,caux benz lwg nyez ukgyaeuj luenhnyaeb mbouj miz gag rox ngvanh,gah rox   sij,gag rox hag, gag rox guh gij nengzlig…..Lwg nyez raeuz youq ranz youq mbanj gangj vahcuengh ,youq Yozyau hag Sawgun ,gauj dayoz aeu hag Yinghvwnz .Langqfeiq goeng-rengz langqfeiq cienzcaiz .Doengzseiz hag doxgaiq hag ndaej mbouj laeg,mbouj gvangq,mbouj vaiq. Lwg nyez Bouxcuengh daih bouhfaenh mbouj ndaej hag bonjfaenh minzcuz gij lizsij ,cihsaw caeuq cuenghcoj  sawfwen.Cojgoeng vih raeuz guh gijmaz goenglauz daih laeng mbouj rox, raeuz vih lwg lan guh gij  hong saeh, daih laeng mbouj ndaej ciep bae guh !Daih ciemh daih lak !Mbouj ndaej cix mbouj rox vih Bouxcuengh vwnzva mbefat guh goeng rengz.Doengzseiz Bouxcuengh doeg saw ngaiz caeuq Vunzgun dox ciengj dox beij ,Ciengj mbouj gvaq beij mbouj gvaq, gij lingjdauj aen vih, gij hong ganqbuq Couh ngaiz Bouxgun yungh gij vwnzvaq de ciemh ciemh caenx ciemq ; Gij swhyienz Bouxcuengh  caeuq Gij caizfuq Bouxcuengh caeuq gij leihik Bouxcuengh couh ciemhciemh ngaiz Bouxgun Caenxciemq ! Benz lawz aeu cungj vwnzsw vwnzva ndeu hag seuq seigyai it ciet doxgaiq ne ? Souj sien aeu guh laeb gohyoz cienz miemh gij gaiqniemh cihsiz hiqdungj! Couh dwg naeuz doiq seiqgyaiq gwnz it ciet doxgaiq aeu Saw-cuengh gaiqniemh byauj si ok daeuj.  Aeu gaiqniemh byaujsiq seiz aeu miz gveihliz miz daep nem. Lumjbenz : An coh hawj doih duz haenx,Bouxcuengh coj raeuz an de heuh duz guk duz nyaen duz ma duz meuz caeuhmiz gveihliz ,youh ndei geiq, aeu duz gijmaz gaiqniemh yidungj ma an coh hawj doih duz mbin doih duz byaij haenx caeuh gig gohyoz., Cungj byaujsi fuengfap neix caemh ndaej yungh ma geiq roengz seigyaiq gwnz dih it ciet . Dangyienz Sawcuengh gaiqniemh yiqdungj guh laeb aeu miz cienvunz bae guh , aeu cienvunz bae laeb , aeu cienvunz baengvanh.Ngvanh,gangj,sij guh,ngvanhgangj,ngvanhsij ngvanhguh dwg lwgcuengh raeuz aeu daj iq couh aeu lienh gi bonjsaeh .Lumj baenz aen ‘car’ ci lingzgienq gaiq niemh hidungj aeu Sawcuengh ma byauj siq ,aeu vah cuengh ma heuh de,baenz lawz heuh ndaej ndei youh ndei geiq ?Ngamj Bouxcuengh raeuz yungh.?Lumj benz  dieg mingzcoh gaiq niemh hidungj ,vunz ndaw     ndang daej dox gai gaiqniemh hidungj ,guh ranzlouz gaiqniemh cihsiz dijhiq,yawj bingh yw bingh gingniemh cihsiz dijhi, guh gak yiengh gunghcwngz gohyoz    gainiemh cihsiz dijhi,ciuq vunz  Yinghgoz Meijgoz heuh dwg ceiq gohyoz ,ciuq vah Bouxcuengh raeuz heuh,baenz lawz heuh ndaej ndei?Heuh ndaej ngamj?Aeu cih Saw seiqfueng heuh  mbouj gohyoz dwg seiqgyai yawjfap. Aen vih Sawg seiqfueng dih gainiemh dijhi  mbouj  miz gveihliz, mbouj vanzcwngj. lingh vaih saw seiqfueng hidungj cih saw moq gig noix ,caemh hoj caux cih de,bungq daengz gainiemh moq cij ndaej aeu cihsaw gouq ma dingj, yienghneix guh dwg mbouj gohyoz dih,yungz heih caux benz gaiqniemh dox gyonx ,lumj benz youq dauq  Sawgun  ndaw de, mbangj cih saw daibyauj haujlai  gaiqniemh hamz eiq,rox naeuz doengz it cih saw lai cungj yungh fap ,rox naeuz mbangj cih saw youq mbouj doengz deih fueng yungh couh daiq byauj mbouj doengz hamzeiq.dwngj., raeuz dawz Sawgun hoiz benz Sawcuengh seiz aeu cuyi diuz neix.mienx ndaej caux benz gaiq niemh dox gyonx. Sawcuengh aeu fat cienq ,couh aeu hawj de miz giengzdaih mbefat naengz lig ,couh aeu miz  gohyoz dih gaiq niemh hidungj  caeuq cienz miemh di cihsiz dijhi guh demhdaej, yienghneix sawcuengh cij ndaej mbefat gvangqlangh . cij ndaej guh maenh guh ak,cij ndaej hawj Bouxcuengh lwg lan raeuz yungh de hag de ,.dawz gak aen cihsizdijyi guh benz cijdauj Bouxcuengh guh laeb gak hangz gak yieb , hawj Bouxcuengh  faen hong faen hangz faen yieb caux guh hong saeh.Yinxbyaij Bouxcuengh seqvei mbefat . Hag Sawcuengh caemh ndaej ok Gohyoz- gyah.ok gak conhyez cihsiz Boux Conhgyah.Bouxcuengh aeu gaijgiet gij gohyoz  gaiqniemh hidungj gig lai.seizneix senj  geij gienh gihbaenj gaiqniemh dijhi ma beijgangj:  1 );Dieg mingzcoh gainiemh hidungj. Lumj benz ,roen gijmaz dijhi : Roen Suengjgyiuz , roen baksaek ,roen doeng namznihgz ,roen doeng liujcouh. Bya gijmaz gaiqniemh dijhi,lumj bya cwx , byameuh dwngj .Aeu [ roen + dieg mingzcoh] [ roendoeng +dieg mingzcoh ] byaujsiq diuz roen ndaej leih lwglan hag geiq,youh miz gveihliz miz daepnem miz fueng yiengq.  2).Vunz Bouxcuengh mingzcoh an coh dijhi : Aeu Sawcuengh an coh benzlawz an cij ndaej hawj Bouxcuengh caeuq vunz Hancuz miz faen biet,doengz seiz byaujmingz raeuz dwg it boux sauj suq minz cuz  (byauj mingz mwngz dwg sauj suq minzcuz ndei cawq dwg : Raeuz gangj vah  bujdungh  caeuq boux Hancuz gyauh liuz seiz gangj ndaej mbouj byauhcinj vunz ndaej lijgaij mwngz,mbouj dwg mwngz mbouj coengmingz,dwg gangj mbouj gvenq ) ,doengzseiz,Bouxcuengh an  cih coh hamz eiq aeu gek ndaej cih sawgun,gij neix dwg Bouxcuengh raeuz daih daih  aeu ngvanh gij  saeh cinghz, youq  Sawgun gaemguenj it ciet aen seigyaiq neix ,an coh dwg  it hangh saeh naek .an ndaej mbouj ndei,benz seiq yukyap.aeu guhlaeb Bouxcuengh ancoh dijhiq,an coh guh fap miz haujlai cungj,lumj benz ieg seng cih sawmeh gonq gya mingz coh an fap .Lumj gou seng youq mbanj Gizmauz an coh gun heuh Luz dwzsanh  ancoh Bouxcuengh couh heuh : G. Dwzsanh Loeg,yienghneix ancoh,caeuq sawgun miz faenbiet youh miz doxdem,cojgoeng cih singq ndaej baujlouz.lij ndaej swnh daengx seiqgyaiq boux yungh cih sawmeh  lahdingh gij funghsug.Bouxcuengh aeu Sawgun ancoh ,gijneix bonj laiz couh dwg it cungj minzcuz yawj ngawz cwngswz gya hawj Bouxcuengh dih it cungj byaujyenq,aenvih doenghbaez Bouxcuengh mbouj miz   bonjfaenh cih saw,hauj lai gainiemh ngaiz aeu Saw seiqfueng byaujsiq,giz saenh,doengz itaen gaiqniemh,aeu Yinghvwnz byauj siq engq gya gohyoz, Bouxcuengh raeuz boux rox Yinghvwnz mbouj dawz de hoiz ok daeuj,raeuz couh ngaiz aeu Sawgun byauj siq,ciqcihSawgunmaguhBouxcuenghSawcuenghgaiqniemh,yienghnei guh raeuz  lij lau deng  mbouj gohyoz  ha !  3) : Lij miz doeng go gijmaz an coh gaiqniemh dijhi, ndaw raemx doih duz an coh gainiemh dijhi ,ciuq vunz Yinghgoz Meijgoz an gij gohyoz gaiq niemh dijhi,ciuq vunz boux gun an dih dieg mingzcoh gainiemh dijhi dwngj.Yinghgoz gij vwnzva   gaiqniemh hidungj ceiq cienzmiemh,ceiq gohyoz ,mbangj aen gai niemh aeu vunz mingh bae vuenh cij ndaej cih de !mbangj aen gainiemh bae ngaenz cien ngaenz fanh cij ndaej ok cih de .vih liux Yinghvwnz cihsiz gij siencinq ,gohyoz caeuq yienz muenx, sawj gwnz seiqgyaiq soj miz dox gai,hag Yinghvwnz ndaej rox set,vunz Yinghgoz douz roengz ngaenz cien ik fanh ik bae guh gak cungj gak yiengh gainiemh cihsiz dijhi, dwk roengz aen ‘computer’ baj debbuenz, hawj daengx seiqgyai vunz lumj fatfung ne bae hag de,yiengh neix gij vwnz va de couh  gig dijcienz.Lumj benz binghdoeg gaiq niemh dijhi, Cungguek raeuz couh mbouj miz gij de rox naeuz miz gij de mbouj cienzmiemh.,miz gij binghdoeg youq gwnz seiq ,hag  Sawgun couh mbouj rox gij binghdoeg mingzcoh de caeuq gij yw fap gaij fap de.vunz Yinghgoz douz roengz ngaenz cien ik, dawz gwnz Digiuz soj miz binghdoeg couq vunz caux  bingh doeg guh benz Binghdoeg an coh gainienh cisiz dijyi ,mbouj lwnh gij maz binghdoeg,rox it yeingh couh an it aen coh hawj de,doengzseiz doiq saen binghdoeg,mbouj insik douz cienz  ngaenz bae yenzgiuq de.hawj aen minzcuz de mbouj lau binghdoeg haih dai. Youq gwnz seigyaiq, CawzliuxYinghgozMeijgozlijmizFazgoz,Dwzgoz,Sihbanhyaz,Itbenj,geij aen guek gya haenx,gyoengq de youq cwngqciq gwnz baenz lawz gung baenz lawz souj,ginghsiq gwnz baenz lawz guh baenz lawz fouq,vwnzva gwnz baenz lawz bien baenz lawz yienj ,baenz law aeu cihsaw dox giet aen minzcuz de ,baenzlawz guh ndaej daez sang aen minzcuz de youq gwnz seiqgyaiqz  dieg vih,doengh gij neix gyoengq de guh ndaej gig ndei.Guh ndei cienz mienh couq wanzcwngj dauq Sawcuengh gaiqniemh dijhi dwg Sawcuengh fat cienq it dingh souj sien guh gij daihsaeh,mbouj miz yiengh ,Saw cuengh couh bienqbenz  dauq mbouj miz yungh  ,youh doek laeng vunz  youh  mbouj dijcienz gij labsab haenx .Miz liux vanzcwngh dih gainiemh dijhi cij ndaej guh ok vanzcwngj dih cihsiz dijhi,Sawcuengh miz liux van cwngj di cihsiz dijhi,couh dwg Bouxcuengh it bit caizbauj,bit caizbauj neix mbouj danh ndaej hawj Bouxcuengh raeuz fouq,lij ndaej hawj Bouxcuengh raeuz giengzdaih,coengmingz.Aeu guh laeb ndaej byauj si  daengx seiqgyaiq soj miz doxgai dauq Sawcuengh gainiemh cihsiz dijhi,Couh aeu guh laeb Sawcuengh cisiz baujguq.aeu guh laeb Sawcuengh cisiz bauj guq,caeuh aeu daengx Bouxcuengh raeuz it heij bae guh,boux rox Sawgun caeuh aeu gij Sawgun cihsiz haenx hoiz baenz Sawcuengh cihsiz, boux rox Yinghvwnz ,couh aeu Yinghvwnz hag rox gij cihsiz haenx hoiz baenz Sawcuengh ,yiengh  neix ,boux guh boux rom,it daih gya it daih, gya lai Sawcuengh  cihsiz dijhi ,hawj lwg lan raeuz doenggvaq hag Sawcuengh hag rox daengx seigyai cihsiz.Vunz Hanzgoz caemh dwg yiengh neix guh,gyongq de vunz dieg couq Bouxcuengh raeuz ca mbouj geij lai,hoeng mbefat ndaej gig vaiq,vih gijmaz?Gyoengq de couh dwg yiengh neix guh,seizneix cingcaih guh.Sawgun  dwg ging gvaq geij cien bi cij ndaej guh daengz yiengh neix ,gohyoz lij doek laeng vaihguek baenz seiq haj cib bi.Youq gwnz seiqgyaiq,daih bouhfaenh vunz nyinh naeuz Saw gun dwg mbouj gohyoz ,mbouj ndei sawj yungh .Lumj benz  lwgnyez gou daj sam bi haeuj hag doeg saw ,daengz siuj yoz doeg sat ok yoz yauq,gungh hag liux 9 bi Sawgun..,lij mbouj rox yungh vah bujdungh  caeuq bohmeh gyauliuz,sij mbouj benz bien 200 cih saw ngoenz geiq .yungh vah bujdungh  gangj bonj faenh soj hag gij cihsiz ,gangj mbouj daengz 5 faen cung,biuj daz nwngzlig  gig  ca.Lwg gvai bienq lwg ngawz.  Yiengh neix Lwg raeuz couq lwg Meijgoz lwg Yinghgwzlanz lwg Itbenj,lwg Hanzgoz lwg dwz goz  couh ceng ndaej gyae lo-----. Aenvih Sawgun dwg guek gya caezgya yungh gij vwnzva Lwgngez mbouj hag mbouj ndaej , gag gou fanj duiq mbouj miz yungh ,. aeu Saw- gun ma hag cihsiz, dwg gig menh ,gij neix couh dwg Cungguek gohgi  mbefat beij seiqgyaiq doeklaeng gij yenzyinh,caemh dwg Gvangj sih sevei, cwngci, vwnzva, ginghsi mbefat beij fatdad guekgya doeklaeng ,beij daengx guek doek laeng gij yenzyinh.Aen vih Bouxcuengh raeuz aeu Sawgun hag doxgaiq beij vun Hancuz  engq  gya dwg  rengz.Lingh vaih vunz Hancuz doiq vunz saujsu minzcuz sonhag  guh bauj souj,de it dingh miz gauhcungh,cij ndaej hawj mwngz miz siujyoz,de itdingh miz bozsw,cij ndaej hawj mwngz miz gauh cungh,de it dingh beij mwngz sang geij gaep,gyoengq de cij ndaej hawj mwngz hag gij de! Boux cuengh aeu mbefat ,Souj sien guh ndei Bouxcuengh cujsiz cwngqci dijyiq,.miz liux sujsiz baujcwng,cij ndaej bae rom cienz ngaenz,gauj ginghsi yienz haeuh cij ndaej guh vwnzva,yienz haeuh caiq yungh ceiq siencin gij  vwnzva ma bangcoh  mbefat Bouxcuengh cwngci  ,guh giengz guh maenh Bouxcuengh cujsiz.yienz haeuh cij ndaej  gya vaiq  mbefatBouxcuengh ginghsiq,guh gij doxgai hawj vunz Bouxcueng youq ndaej an onj ,gwn ndaej gij ndei,maj ndaej swhyienz haenx. Cwngci ginghsiq vwnva hoenxciengq dwg nem youq it heij,youh dox bang youh dox dam. noix yiengh mbouj benz saeh.guh ndei le,Bouxcuengh seqvei couh ndaej mbefat langhlangh .Bouxcuengh couhndaej youq gwnz digiuz miz vengqdieg gwnyouq Aen mincuz raeuz couh  miz  muengh  hwnghuengh foqfoq!                                                                                                                                          A.Cauyingj.Vangz  Ngvanhsij                                  Bi  20004 \ 5                                                                                                                                                                                                  Ayingj  Dwg Bouxcuengh   sawj yungh Sawcuengh Boux mahuz  suglienh ndeu , dang naeuz moix it boux Vunzcuengh  cungj  ndaej lumj de yiengh haenx , aen minzcuz  raeuz dwg geij lai  hung mbwk ha !

AAAAyingj

	谢谢越色僚人指点!这次好一点了!