Lwgnyez mehlaeng
(后妈的孩子)
（自己练习写的，文章似乎有些贬义,特别是针对后妈的那部分，但也是生活中的真实写照，我只想记下自己的感受，当然这些感受包括美的和丑的，请指教!)
Dahbingz dwg nuengxsau ranzhenz gou, song ranz raeuz doxgyawj hix dwg beixnuengx, ciengzseiz doxbang doxcoengh. Lij iq seiz haenx, gou lij daz dahbingz guhcaemz. Hoeng meh dahbingz baenz bingh gvaqseiq le, bohde ceq aeu boux mehlaeng ndeu, doeklaeng daengxranz hix senj bae Namzningz liux lo.
Meh dahbingz daicaeux seizde, dahbingz ngamq ndaej caet bi lai, dahbingz lij miz daegnuengx sai riengzlaeng ndeu. Boh dahbingz dwg lauxsae, haet hwnq romh dauq haemh, aen yozyau sonsaw liz ranz de miz geij leix gyae. Ranzde mij geng reihnaz geijlai, bohde ngoenzsinghgiz caengj miz seizgan guenjleix, dahbingz youq ranz daz daegnungx ceq bang hong liemj. Hanznaeuz de ngamq ndaej caet bi lai, cix lumj bouxlaux nei buekrengz coengh ndaw ranz guh hong lo.
Dahbingz gwq ngoenz gwq majhung, yaepda yaek ndaej cib bi lai lo, caengj ndaej riengz gyoengqdoih bae yozyau hwnjhag. Lij ngaiz daz daegnuengx riengzlaeng youq henz ndang, vit de youq ranz maz hix mbouj cuengqsim, daegnuengx caemh gvai, youq rog gyausiz gag loengh gag guhcaemz. Dahbingz miz maz ndeigwn ndeicaj haenx cungj yo hwnj hawj daegnuengx de.
Bohdahbingz vunz sang noh hau, youq yozyau sonsaw cingzcik hix ndei, lij rox dwkgiuz ak daqmaz. Miz dahsau he ngamq faen daeuj dang lauxsae. Dahsau de raen bohdahbingz baenz gyaeu baenz gaenx hix simsoh, hongsaeh sonsaw hix mbouj loek, youq hongsaeh gwnz caemh bangcoengh de haujlai，song boux de youqnanz le menhmenh byaij gyawj lo, caemh gangj daengz caemhdoih baenzranz lo. Bohdahbingz naeuz de lij miz song boux lwg’iq riengzlaeng, caenh lau dahsau baezlaeng ienqhoij. Dahsau cix naeuz, banneix maengx ienq, baezlaeng menh gangj. Ndawranz dahsau bohmeh de cix hozndat yaek dai, ndaq de naeuz, laj biengz bouxsaindei baenzlai cungj mbouj ngah, dauq nyienh haq bae guh mehlaeng, bangvunz rumx lwg…
Vunz mbanj bouxboux cungj haenh mehlaeng neix simsoh、roxlaex, Bouxlaux daengq dahbingz caeuq nuengx de naeuz, sou ceq miz meh moq lo, yaek haibak heuh de guh meh bw. Mehlaeng ngamq haq gvaq daeuj baez daih’it doxraen seiz, dahbingz sim hix angq hix foengx, bohde coi de bae gingqcaz nyinh meh, dahbingz song fwngz gaem cenjcaz saenzroedroed, sing iq lumj duznengz mbin nei heuh naeuz meh ne gwnz caz…Bohde haep naeuz heuh haenq di mij ndaej ha? Dauq dwg mehlaeng sing gokrazraz naeuz ndei、ndaej, dingq ndaej nyi couh baenz lo. Bohde coi daegnuengx heuh meh, daegnuengx dauq buet ndoj haeuj goxdou bae, lumjnaeuz lau mehlaeng ne, bohde maenjgywdgywd rag de okdaeuj, yot diuz faexsaux iq faet caekhangx de, daegnuengx hix daej hix swenj naeuz, meh de senqsi cix dai lo! Mehlaeng yiuq mbouj roengz caengj gvaq daeuj ceg song boh lwg de, naeuz lwgnyez lij iq mbouj roxsoq couh suenq lo.
Bohmeh ngoenznaengz youq yozyau sonsaw, roed daengz ngoenzsinghgiz roxnaeuz seiz cuengqgyaq, daengxranz caengj caemhcaez haeuj ndawlueg bae geng reihnaz. Caemhgya youq nanz le, daegnuengx caemh nyienh haibak heuh mehlaeng guh meh lo. Yienznaeuz de mbouj dwg mehcaen hoeng de daeuj gwn haemz gwn hoj, lwgnyez caemh yawj daengz yo youq ndawsim. Hoeng dahbingz caeuq daegnuengx de mij vuenyungz ndaej geij nanz, song bi gvaq le mehlaeng de seng ndaej daeg nuengx iq ndeu, daj miz daeg’iq daeuj le, de caeuq daegnuengx de cix mbouj ndei gvaq lo. Vahsug naeuz mehlaeng mbouj beij mehcaen ndiep. Mehlaeng de cix ungjcungh daeg’iq de lai lo, gijmaz hong ndaek hong gyuek cungj boenq dahbingz caeuq daegnuengx de bae guh, miz maz ndeigwn cungj hah hawj daeg’iq de, naeuz daeg’iq lij iq, lai gwn huq ndei caengj ndaej maj ndang.
Yienghneix gvaq le song sam bi, Bouxlawz rox guekgya givaswnghyuz gvidingh: Boux lauxsae mbouj ndaej cauhswngh, song bouxlwg doxhwnj ngaiz haicawz! Raq rumz neix caemh bik daengz aen yozyau bohmeh dahbingz. Bohmeh dahbingz song boux caen ngaiz bued ok yozyau lo. Daj mbatde le, mizseiz dingqnyi mehlaeng caeuq boh dahbingz doxceng, mizseiz lij dingqnyi mehlaeng hemq daz lwg’iq de bae gaijhaq. Aiq dwg song laux de cungj lot hongsaeh le saedceij hoj gvaq, ndawranz mbouj miz cienzngaenz souhaeuj, geng reihnaz ngamq gaeuq ciengx mingh, dwgrengz daengz le, cix dawz lwgnyez daeuj ok heiq. Boh dahbingz naemj yienghneix gvaq ndwenngoenz mbouj aiq doeng le, couh biek lwg biek yah bae ndaw singz Namzningz ra hong guh, vit sam boux lwg youq ranz riengz mehlaeng. Boh dahbingz bae ndaej bi lai, rox feiq geijlai goengrengz, caengj ndaej youq ndaw singz aen Minzbanhyozyau onjdingh roengzdaeuj. Mehlaeng mbouj nyienh youq lajmbanj geng reihnaz, hemq naeuz daz lwg’iq bae ndaw singz riengz boh dahbingz gvaq. Gvaq yauq le, bohdahbingz ndaej rag mehdahbingz haeuj aen yozyau de bae dang lauxsae, caemh ceq ndaej rag sam boux lwgnyez haeuj bae doegsaw. Daengxranz couh yienghneix buen bae Namzningz liux.
Dahbingz doeg cuhcungh sathag lo, cingzcik de gauj ndaej haemq ndei, hamj Vujmingzgauhcungh ngeihcib lai faen, hoeng mehlaeng eiqsae ne mbouj siengj hawj de doegsaw baenzlai, naeuz ndaw ranz hoj lai. Lij miz coenz yaek dingq he naeuz, lwgmbwk doegsaw baenzlai guh maz, baezlaeng caemh yaek haq bae ranz wnq, dahbingz dingqnyi le gag youq henz doekndaiq, gag naemj gag gikheiq, ndoj haeuj ndawrug bae daejsebseb. Deq simcaem roengzdaeuj le naemjnaemj mehlaeng de gangj ndaej caemh miz di leix, ciuq ranz de hoj yienghneix, de goq buek doegsaw le nuengx de cix aiq mbouj ndaej doeg lo.
Yiengh le dahbingz couh ei bohde eiqsae bauqdoeg aen Namzningz Swhfamyozyau, doeg sam bi cix sathag lo, noix sawj di cienzngaenz, hix hag ndaej di gisuz. Sam bi de dahbingz roengzrengz doegsaw, gwn yaez gwn nyauq, sim’in faen ngaenz vunzlaux mbouj ngaih aeu, caenh lau vunzlaux naeuz de sawj ngaenz sak. Dahbingz doeg Swhfamyozyau sathag le, ngoenznaengz buet doeng gvaq sae bae ra hong guh, dauqma haeuj ranz lij dingqnyi mehlaeng de damzbyoedbyoed, bohde cix ngaem gyaeuj cit ien mbwqngaungau. Bohde naeuz ngoenzcog bae ra boux vunzsug dang ak haenx, gouz gyoengqde bangcoengh. Mehlaeng buek naeuz, caenh lau oetcienz soengqleix sat le vunz cungj coengh mbouj daengz, yiengh ni cix coem lai lo. Dahbingz dingq le gwncaeuz mij feih, coengq vanj coengq dawh deuz haeuj rog bae. Doeklaeng lij dwg dahbingz gag ra ndaej faenh hong youq Yourwzyenz daz lwgnyez haenx, hoeng ngaenzhong mij sang. Dahbingz naemjnaeuz swhgeij ngamq sathag ok daeuj, gaiq maz cungj mbouj rox, ra giz giz cungj ngaiz vunz yiem, camh guh faenh hong neix suenq lo. Ngoenzlaeng deq haglaeg roxlai le, menh caiq ra faenh hongndei wnq.
Dahbingz guh faenh hong haenx, hix dwgrengz hix mbouj ndaej ngaenz lai, cawzok gwndaenj caeuq gyau ngaenz ranzco le, cix mij lw geijlai bak lo. Mehlaeng de hanhdingh de it ndwen aeu geijlai maenz hawj ndaw ranz, naeuz song daegnuengx doegsaw yungh ngaenz haenq, dahbingz in gwn in daenj, gyoengq doihndei de bouxboux cawx huqmoq cangndang cangnaj, dahbingz cungj mij sij cawx. Mehgou bi de bae ndaw singz gwnlaeuj hoengz, lohgvaq giz dahbingz couh haeuj bae yawjyawj de. Dingjlingz roed daengz banringz, raen dahbingz youq ndaw rog yawjsaw caembyaizbyaiz. Mehgou cam gwnriengz caengz? Dahbingz han caengz gwn, lij deq dahcaemhsaeh de cawx byaek dauqma cawj. Mehgou ceq cam sou doxcaeuq cawjgwn lo ha? Dahbingz han naeuz dwg, ndwen neix lwnz daengz dahcaemhsaeh de lo. Mehgou yawj yaek gvaq banringz song diemj cung lo, lij caengz raen dahcaemhsaeh de dauqma, caengj coi dahbingz bae cawx byaek. dahbingz naj mbwngnyaujnyauj naeuz mij miz ngaenz lo, ndwen neix geiq ngaenz hawj ndaw ranz seuq lo. Mehgou dingq le caen doeksaet raixcaix, caengj yot song sam bak maenz hawj de sawj gonq, dahbingz lij euqrengx naeuz mbouj aeu. Doeklaeng mehgou naeuz swhgeij caemh lij caengz gwnriengz, vaiq bae cawx byaek dauq lo, dahbingz gij raemxda de fanfoedfoed, caengj ciep ngaenz le buet ok bae. Mehgou dauqma lwnh naeuz raeuz nyi baenzlawz hojlienz, raeuz dingq le raemxda yaek doek.
Dahbingz roxnaj bouxsai laux gvaq de geij bi ndeu. Bouxsai raen de roxleix、dwggyaez, hix ciem miz di hojlienz, doq ndang mbouj ciuq sim gyaez hwnj de lo. Dahbingz aiq dwg lij iq lot gyaez mbouj miz meh insik le, roeb dawz bouxsai neix baenz in baenz ndiep de, simdoengh hix simcuk lo. Bouxsai laeng de dwg youq lajmbanj, mij fouqmiz lumj vunz, couh dwg aenvih yienghneix, bohmeh dahbingz cix mij haengj geijlai lo, naeuz ranz bonjfaenh hoj cixbah lo ceq bae ra bouxhoj liemj, baihlaeng guh lawz ciuqgoq daengz song daegnuengx ne. Dahbingz gaiqnaeuz song vunz doxgyaez cix ndaej caemhyouq, mbouj leix vunzranz roxnaeuz vunzrog gangj maz cungj ndaej, hoeng ciuhvunz gvaq ndwenngoenz ne mij baenzlai yungzheih. Bouxsai de youq henz Yourwzyenz ra faenh hong he, daeuj caeuq dahbingz caemhgwn caemhyouq, deq dahbingz mizndang le, song boux caengj gaenjgip gangj daengz baenzranz, dahbingz nyinhnaeuz laengde ranzhoj cix hoj, miz sim cix baenz, bouxlawz rox ngoenzcog saedceij mbouj bienq ndei ha.Yiengh le, dahbingz couh daz bouxsai de maranz raen bohmeh. Bouxlawz rox bohmeh de raen mij habhoz, naeuz de dwg vunz lajmbanj, laengde gyadaej mbouj ndei hix hoj lai, hongsaeh hix mbouj baenz. Dahbingz naemjnaeuz banneix hix miz ndang lo, ndei mbouj ndei cungj ngaiz haq lo, bohmeh de ndaq cix ndaq lo. Hoeng dauqma ranzco le, bouxsai de sim ndaeksaezsaez, youq miz ngoenz ndeu bouxsai de bae hwnjban le, caiq mij raen dauqma, dahbingz dwk dienhvah hix mbouj doeng, cam ndawranz lajmban de hix naeuz mij rox, gvaq liux geij ngoenz dahbingz ciep ndaej fung saenq bouxsai dwk daeuj haenx, naeuz de saetmuengh lai, doiq mbouj hwnj dahbingz, de deuzdak bae gyae mbouj caiq dauqma, heuh dahbingz mboujngah caiq ra de lo, bae dawz bouxlwg ndaw dungx ok bae, baihlaeng ra bouxsai engq ndei he, lij naeuz lajmoeg yo miz song sam cien maenz hawj dahbingz gouqgaenj. Dahbingz yawj sat siksak fungsaenq haenx daejnyaznyaz… Doeksat, lij dwg boh dahbingz fokdengzdengz daz de bae yihyen “gvetlwg”, dahbingz ndangnaiq le geij ndwen, ndangdaej ndij simcingz de caengj menhmenh ndei hwnjdaeuj. Gienh saeh neix sat le dahbingz guhhong hix mbouj mij cingsaenz, ngoenznaengz guh noix cix ngeix lai.
Dingjlingz dah doengzhag youq aen singz Sinhcin, heuh de roengz bae ra hong. Dahbingz naemj caemh gaej louzlienh youq aen dieg siengsim neix lai lo, caiqnaeuz laj Gvangjdoeng ngaenzhong beij mbanjranz lai di. Geij bi neix rom mbouj ndei ngaenz, caemh dwg ngaenzhong daemq lai, ok bae song daeg nuengx doeg daengz gauhcungh lo, swhgeij caemh gwq bi gwq laux lo, seizneix cungj goq mbouj hwnj faenhndang, ceq naeuz guh lawz goq ndawranz. Dahbingz couh aemq hwnj doxgaiq deuz bae Sinhcin baengh dah doengzhag de lo. Bouxlawz rox dahbingz ngamq youq giz doengzhag de cib lai ngoenz, dah doengzhag couh ngaiz diuh bae aen singz wnq guhhong lo. Youq mbanjrog mbouj miz beixnuengx, ra boux baengh mbouj miz, hix caengz ra ndaej hong, Sinhcin aen singz neix doxgaiq yienghyiengh beng, gwnyouq cungj hojbauj. Mbouj miz banhfap lo, dahbing couh bae aen Gyahcwngfuzvu gunghswh deq hong. Gizde miz gwn miz youq hoeng mbouj miz ngaenzhong, deq miz vunz daeuj cingj de hwnj ranz sonsaw le caengj faen miz ngaenzhong, itbaez faen ndaej geijlai cix mij rox lo, cienzngaenz youq ndaw fwngz vunz, ak mij ndaej. Hoeng gizde yaek ciem habdoengz, yaek aeu guhhong bi ndeu doxhwnj, mboujmiz cix ngaiz fad ngaenz lo. Dahbingz hix guhhong hix dajsuenq ngoenzlaeng baenzlawz guh. Laegfwngh miz ngoenz ndeu, miz dah sauiq he youq bakdou gunghswh guhcaemz, dah sauiq dwg vunz guekwnq, gij byoem de hix henj hix gut, lwgda hix ndaem hix hung, yawj raen dwggyaez raixcaix. Dahbingz yaengyaeng byaij gvaq bae daeuq de, aeu vahgun cam de daeuj neix guhmaz? Dah sauiq mbwtmbwt mbwjmbwj han naeuz daeuj neix ra lauxsae son sawgun, dahbingz dingq ok de mij rox gangjgun geijlai, ceq cam bohmeh mwngz ni? Dah sauiq fwngz yinx haeuj bakdou Gyahcwnggunghswh bae, caemhcaiq raen miz song boux vunzguekwnq maj sangradrad he byaij gvaq daeuj, heuh dah sauiq baema lo, hoeng dah sauiq rag gij fwngz dahbingz mij cuengq. Bohmeh de raen baenzneix geizheih, caengj aeu gij vahgun gangj mbouj bienz haenx cam dahbingz, naeuz dahbingz dwg mbouj dwg lauxsae, dahbingz han naeuz dwg vei, cingq youq neix deq vunz daeuj cingj. Boh sauiq naeuz cingj dahbingz hwnj ranz son sawgun caeuq daz lwgnyez baenz lwi? Dahbingz sim’angq han naeuz baenz. Meh sauiq naeuz gaxbaenh gaenq cingj bouxwnq lo ha? Boh sauiq naeuz mbouj youqgaenj, dauq haeujbae caeuq bouxguenj haenx gangjgangj.
Dahbingz bae ranz guekwnq sonsaw geij ngoenz le, caengj rox ranz de miz song boux lwgnyez. Bouxdaeuz dwg lwgsai, ndaej caet bi, boux ngeih couh dwg dah sauiq haenx. Ranz de daengxranz daeuj daengz Sinhcin haicangj. Bohde dwg vunz Meijguek, mehde dwg vunz Fapguek, song bouxlaux maqmuengh song boux lwgnyez de hag baenz vahgun. Dahbingz sonsaw song boux nyez de, itngoenz ndaej hoengq le cix gaenx gag hag inghyij. Aenvih dahbingz nyinhnaeuz hagrox haglaeg ingyij doiq faenhndang miz ik, caiqnaeuz ranz guekwnq neix song bouxlaux bingzseiz caemh dwg gangj ingjyij lai, miz vunz gyauhliuz nanz le mbouj rox ha? Ranzde rox dahbingz gag hag inghyij le engq angq lo, gyoengqde son dahbingz gangj inghyij, dahbingz bau son gyoengqde vahgun. Ranzde couh heuh dahbingz gaej bae ranz Gyahcwnggunghswh lo, caenhsim daeuj ranzde son gyoengqde, danghnaeuz son ndaej ndei, itcig son song boux lwgnyez daengz cib bi doxbae. Dahbingz angq raixcaix, hoeng cungj caeuq Gyahcwnggunghswh ciem habdoengz lo. Ranz guekwnq naeuz mbouj youqgaenj, gyoengqde nyienh boiz ngaenz hawj Gyahcwnggunghswh. Dahbingz dwg roeb dawz hekgviq lo, cungj dwg song boux lwgnyez gyaez de lai, mbouj miz ne ranz de cix doiq swhgeij baenz ndei la?
Dahbingz dawz ngaenz bae boiz ranz Gyahcwnggunghswh, siksak nbaw habdoengz haenx, ndaw sim soeng le gaemz heiq ndeu. Gienh saeh neix gvaq le, dahbingz engq roengzrengz sonsaw caeuq haeujsim hag inghyij. Saedceij couh yiengh neix gvaq ndaej song bi lai, dahbingz moix ndwen ciuqseiz geiq ngaenz baeranz, noix ndwen lawz geiq nguh di nei, cix ngaiz bohmeh de youq ndaw dienhvah gangj sam gangj seiq lo. Miz ngoenz ndeu, dahbingz daz song boux lwgnyez bae haw youz. Miz mbanjranz beixnuengx dwk dienhvah gvaq daeuj, dahbingz ciep dienhvah le caeuq baihde gangj vahdoj hwnjdaeuj. Dingjlingz miz bouxsai byaij gvaq henzndang daengx roengzdaeuj, doiq dahbingz cimmyaumyau. Dahbingz gaiqnaeuz dwg bouxcaeg, ndawsim naemj miz di dwglau. Hoeng bouxsai deq dahbingz gangj daengx dienhvah le, doq angqfwngfwng yamq gvaq daeuj, haibak gangjdoj cam dahbingz dwg vunz gizlawz, guhlawz caeuq de gangj ndaej baenzlai doxlumj. Dahbingz laegfwngh dingqnyi bouxsai haenx caeuq de gangjdoj, doeksaet hwnjdaeuj. Geij bi neix cawz le dajdienh baema caeuq vunz mbanjranz gangjdoj, youq ndaw singz neix ra boux beixnuengx gangjdoj cungj hoj. Dahbingz riugaekgaek naeuz, mij dwg doxlumj dwg doxdoengz liux lo, bouxsai riunyumjnyumj hwnjdaeuj. Youq mbanjrog nyangz vunz mbanjranz, mbouj dwg hoenyienz couh dwg cingz. Dahbingz couh yienghneix roxnaj bouxsai haenx lo.
Bouxsai caemh dwg vunz lajmbanj, dwg vunz henz mbanjranz dahbingz. Bouxsai laux gvaq dahbingz roek、caet bi, hoengz caengz ra ndaej dahyoux. Doenghbaez bae dangbing dauqma le, baengzyoux de heuh daeuj sinhcin coengh hong, youq ndaw denswjcangj dang bouxguenj. Beixnuengx youq rog ra doxbaengh, dahbingz dawz de dang baenz boux baengzyoux nemsim ndeu. Doxraen doxcaemz geijbaez le, bouxsai caemh rox gij gojsaeh dahbingz lo, hoeng bouxsai mij yiem de, gya siengj gyaep dahbingz guhyoux liemj. Dahbingz doenghbaez vih cingz siengsim siengndang gvaq, doiq bouxsai laux gvaq swhgeij geij bi haenx cungj gyaez mbouj hwnqdaeuj. Dahbingz hoiz bouxsai naeuz, guh baengzyoux ndaej guhyoux mij ndaej. Bouxsai sim mbouj laemx, lij ngoenzngoenz soengq va dwk dienhvah hawj dahbingz, dahbingz gangj vahsoh naeuz gyaez mij hwnj de, bouxsai naeuz swhgeij gyaez hwnj dahbingz couh ndaej lo. Dahbingz mij di doenghsim, geij bi neix goq buek hagsib, ndawsim hix muengh miz ngoenz ndeu roed dawz bouxsai ndei, hoeng banneix roed dawz le ceq mij gamj ciepsouh. Geu mae hoj rau, vunz sim nanz dag. Miz ngoenz ndeu, bouxsai ceq umj bog va rang daeuj gouz dahbingz dapwngq. Dahbingz mij hai dou hawj de haeuj ranz, naeuz song bouxraeuz mij baenz le, heuh de vaiq baema lo. Dahbingz caemh simndangj nyinhnaeuz in raez mboujyawx in dinj, yaepiq de mbouj deuz gvaq lawz bae? Hoeng bouxsai mij deuz, youq bakdou citien foedfoed hix byaij bae byaij dauq, deq daengz mbwn laep le lij caengz baema. Bouxsai hix ceq nanz dahbingz sim hix naek, ndawsim lumjnaeuz miz haujlai vah yaek gangj, hoeng mij rox yienghlawz gangj okbak. Dahbingz sim’unq lo hai dou ciepsouh bog va de, bouxsai riunyumjnyumj, dahbingz couh suenq ciepsouh faenh cingzeiq bouxsai lo. Ngamq gyauhvangj gvaq yauq he lo, bouxsai doq gyaep dahbingz baenzranz lo, naeuz ranz de bouxlaux boenq, de swhgeij caemh nienzlaux lo. Dahbingz naemj vunz laux le baenzbaenz cungj ngaiz baenzranz, couh dapwngq haq lo. Dahbingz dwkdienh baeranz lwnh naeuz bohmeh nyi, hoeng mehlaeng ceq mij hawj. Naeuz song daegnuengx cingq doeg gauhcungh, baezlaeng lij yaek doeg daihhag liemj, dahbingz baenzneix cix haq le, ngoenzlaeng ndaej coengh daengz ndawranz leha? Boh dahbingz cix haemq habhoz lo, raen daegyoux dahbingz miz faenh hong ndei, vunz hix swnh hix soh, caeuq de gangjgoj hix dawzbanj, nienzgeij laux di cungj mbouj caz. Seizhaenx, aen yozyau bohmeh dahbingz cingq ribngaenz habhwnq ranzlaeuzmoq, bohmeh de cam dahbingz aeu haemq lai ngaenz, dahbingz sim ndaeksaezsaez. Daegyoux de rox lo couh coengh dahbingz ok lo, naeuz suenq dwg ngaenzlaex ba, baezlaeng mbouj yungh boiz lo, daj mbat de le mehlaeng dahbingz cix mijmiz maz vahyakdingq gangj lo, caemh suenq ngaekgyaeuj gij saeh gyoengqde lo. Bihaenx ndwencieng dahbingz daiq daegyoux de dauq Namzningz le, cingj bohmeh de caeuq gij lauxsae yauyoz haenx gwn donq haeux le, couh suenq cingjlaeuj lo.
Dahbingz youq ranz guekwnq sonsaw sam bi lai, hoeng ranz guekwnq aen gunghcangj he sawqmwh senj bae Daizvanj lo, dahbingz couh ngaiz dauq ra faenh hong wnq. Dahbingz youq ranz guekwnq haenx hagbaenz inghyij le, ra hong couh ngaih haujlai, seizneix youq aen Cungh’inghvwnz yozyau sonsaw. Yauqgonq dingqnaeuz dahbingz ceq mizndang lo, bi’neix ndwen bet hwnjroengz cix senglwg lo, raeuz beixnuengx seiqlengq rox lo, cungj vih de sim’angq.
Gij roen dahbingz gou yawj de byaij gvaq daeuj, gij gojsaeh de gou hix rox lai, aenvih de dwg nuengxsau ranzhenz gou. Yienznaeuz de cib lai bi cix buen ok mbanjranz lo, hoeng de miz maz saeh cungj gyaez dwkdienh lwnh gou nyi. Geij bi neix gou caemh youq Gvangjdoeng neix dajhong, dieghong raeuz haemq doxgyawj, raeuz beixnuengx youq rog doxbang doxcuengh. Lwgmbwk hung le cix haq lo, gag miz aen ranziq youq baihrog le, vunzlaux caemh mij guenj daengz geijlai, lwgnyez caeuq mehlaeng lumjnaeuz mbouj miz maz daepnengq baenzlai lo. Hoeng daegnuengx dahbingz lij cingq gaendaeuj byaij, byaij ga loh dahbingz ngamq yaek byaij daengz gyaeuj neix.
[此贴子已经被作者于2011-5-19 10:04:16编辑过]
发表于 2011-5-19 10:00:00
QQ空间
腾讯微博
腾讯朋友
微信
转播
淘帖
分享
收藏
支持
反对
