[分享]小学生的壮文作文：有趣的“双龙顶球”游戏

河谷幽兰

	“Song Lungz Dingj Giuz ” Mizyinx Raixcaix 有趣的“双龙顶球”游戏 贵港市覃塘区蒙公乡凌寺小学五（1）班     庾秋菊      Youq  henzndang gou  fatseng gvaq  haujlai saeh, ndawde mizdi hawj gou nanzlumz, mizdi hawj gou siengsim, mizdi  hawj gou…… Hoeng hawj gou ceiq lumz mbouj ndaej dwg gienh saeh fatseng youq gwnz godangz haenx.      Gienh saeh haenx fatseng youq “roek it” ngoenzhaenx, gou geiq ndaej ciet “roek it” ngoenzhaenx doekfwn, guh mbouj ndaej youzyenz hozdung, lauxsae daeuj daengz ndaw gyausiz doiq dou gangj :“Gyoengq doengzhag ndei, ngoenzneix dwg “roek it”  wzdungzcez, hoh sou vaiqvued, aenvih seizneix doekfwn mbouj ndaej ok rog guh hozdung, dou youq ndaw gyausiz guh’angq, daihgya siengj guh lwi?” Dou angq dwk dap：“Siengj.” Lauxsae raen dou gig angq, couh hawj dou youq ndaw gyausiz guh  “song lungz dingj giuz ”, de sien heuh dou dawz daiz caeuq eij gyod gvaq gyausiz song mbiengj, ciep dwk gangj guh’angq gveihcwz hawj dou,  aen  guh’angq neix aeu song boux  doengzhag  daeuj  itheij guh, couhdwg song boux doengzhag aeu najbyak daeuj dingj  aen  giuz byaij sienqloh, aengiuz mbouj ndaej doek roengzdaeuj, danghnaeuz byaij ndaej gvaqbae aengiuz youh mbouj doek roengzdaeuj couh ndaej gwn dangz roxnaeuz bingj, lauxsae cam dou mingzbeg gveihcwz  aen guh’angq neix  lwi?  Dou gangj rox lo,  lauxsae  heuh   dou gag ra boux baengzyoux  ndeu   daeuj   gyoeb baenz cuj guh. Lauxsae cam:“Song boux   doengzhag    lawz sien  guh？” Haidaeuz  cungj mboujmiz saek boux doengzhag gamj bae guh, lauheiq guh mbouj ndaej deng gyoengq doengzhag riu, lauxsae raen mboujmiz boux doengzhag lawz daeuj guh， couh diemj mingz heuh Siujlanz caeuq Siujmingz song boux doengzhag sien guh, lauxsae lwnh Siujlanz caeuq Siujmingz dawz aen giuz sien dingj ndei， caiq menhmenh byaij gvaqbae, doeklaeng song boux doengzhag neix dingj ndaej gvaqbae lo, lauxsae couh fat dangz caeuq bingj hawj songde. Gyoengq doengzhag raen le, cungj song boux song boux gyoeb baenz cuj daeuj dingj giuz, doeklaeng  lij faen cuj daeuj bijsai ne, gyoengq doengzhag cungj angq raixcaix, moix baez miz doengzhag dingj giuz, gyoengq doengzhag miz di hemq “gyayouz gyayouz”,  miz di hemq“saetbaih saetbaih……” Seizgan gvaq ndaej gig vaiq, yaepyet  couh  yaek guhsat lo.     Doeklaeng lauxsae  cungjgez naeuz, aen guh’angq neix dwg aeu song boux doengzhag daeuj doxbang guh, boux ndeu mbouj nyinhcaen mbouj siujsim cungj dingj mbouj ndaej gvaqbae, gyoengq doengzhag bingzseiz youq ndaw hagsib roxnaeuz swnghhoz, hix aeu lumj aen guh’angq neix, aeu doxbang cijndaej daihgya doengz cinbu. Neix couhdwg gienh saeh mizyinx fatseng youq gwnz godangz, daengz seizneix gou lij geiq ndaej cingcing cujcuj. (指导老师：庾万六)     原载《广西民族报》（壮文版）2011.3.23

Maenhak

	Miz seiz  gou aeu aen ingjsiengq bae luzingj hwnj daeuj ,boiq vah cuengh cuengq hawj caez gya yawj ! Siq Gvaeqgangj  Sawcuengh vwnzvaz cienzson guh ndaej ndei a !

贝侬楼

	惭愧，看不懂！

gangjdoj

	Caj(deq) gyoengqde laux(hung) le, mwngz caemh(cix) geq gvaq... [此贴子已经被作者于2011-3-26 11:31:39编辑过]

gangjdoj

	Boux beixnuengx 2 laeuz, mwngz ndei ha? Gou cingq deq(caj) mwngz fat aen ingjyaem hwnjdaeuj ni!! Vaiq di bw~~ [此贴子已经被作者于2011-3-26 8:57:52编辑过]

gangjdoj

	Bouxcawj aen laeuz neix dwgrengz lo, lienzdaemh fat le sam bien faenzcieng, gou cungj yawj sat lo!! Baezlaeng,danghnaeuz mwngz mbouj lau dwgrengz le cix lai dwk geij bien hwnjdaeuj ve!!

dong126888

	gou hix yawj sat lo,gyoengq hagseng neix,hung le ndaej aeu sawcuengh daeuj caeuq raeuz gangjgoj  hix ndei lai lo

河谷幽兰

	Gou ngoenzlaeng rox gingciengz fat gij faenzcieng neix hwnjdaeuj hawj daihgya yawj law.