[原创]路漫文集：壮文的山歌

路漫

	37.Caez Danq Cwngcwz Ndei ------Hoh Cib Ngeih Da Lij Cungzsi Sanhcungh Cenzvei ndei, Angqlangh bae guh hong; Bouxboux yiengq naj bongh, Aen sim ndongq youh diemz. Mou biz biu hub lai, Bit gaeq gai mbouj dingz; Vunz gaenx namh bienq gim, Caez danq cwngcwz ndei. Gaenx hong mbouj famhfap, Fatcaiz lij mboengyungz; Minz fouq guekgya hoengh, Caeux daengz ngoenz swva. Sim’angq cix guh fwen, Simvuen cix diuq foux; Lwnh dungzci baengzyoux, Ngoenzneix raeuz ndei lai. Angq lai fwen baenz haij, Hoh hai cib Ngeih Da; Raeuz lumj go lwgraz, Yied hai va yied sang.

路漫

	46.Caez Vuenheij Daeuj Hoh Lij Faz Ngoenzseng dangj daeuj daengz Youh ngamq hai Yinzda Lwnh diegbingz diegbya Daengx Cunghvaz caez angq Roek Gaiq Yinzda ndei Caez vuenheij daeuj hoh Miz dangj daeuj daz loh Diemzangq doh lajmbwn Beijbaenz rwi caux dangz Va hai dangz diemzwk Gungcanjdangj hungmbwk Cib ik vunz ndaej van Beijbaenz go rangzndoek Ngoenz cix coek cix sang Guenkcoj ndaej fu’gyangz Cienz baengh dangj raeuz ak Cien dah lae coh haij Fanh va maij daengngoenz Raeuz gak cuz lwgminz Sim gyaez dangj fanh daih ----Bauq Sawcuengh 1983.7.2

jywei38

	Fwen langhsa: Haemh neix dou gwn caeuz, ndaej nyi roegraeu heuh, Heuh ngizngaeg ngizngaeuz, lwgnyez naeuz nax moq.

路漫

	47.Mwncupcup Hai Langh ------Yawj Vujmingz Dwzbauj Siujyoz Ban Sawcuengh Hagseng Youq Namzningz Veibau Lij Faz Gonq raeuz doeg Sawgun Sam ngoenz hag cih saw Gvaqlaeng fan daeuj yawj Baenzlawz doeg youh lumz Bouxcuengh miz sawfaenz Lumjbaenz max rox mbin Baezneix youq Namzningz Caen’da raen veibau Lwgnyez caet bet bi Hwnj daiz lij lau couj Sij cih lumj lungz foux Bouxboux bek fwngz haenh Mbaq ngamq bingz daiz sang Gangj vah lij nyaenqnyat Doeg saw raeuzradrad Vunzvunz (lag)angq ndawsim Sawcuengh lumj rumzcin Raeuz sim raeujruprup Lwgnye lumj valup Mwncupcup hai langh ----Bauq Sawcuengh 1983.9.10

jywei38

	Mwngz naeuz dou mbouj ndaek, Cam govaet daihluh, Vaet daihluh nemz ndang, Naek nangz hizde yiengh.

路漫

	48.De Hanh Ndik Henz Daiz Lij Faz Roeg ciengq gwnz goraeu Mbanj raeuz miz hek daeuj De mbouj riuj noh laeuj Gwed sawbouh haeuj ranz Caengz sij ndaej gwn caz Couh ra vunz gangjgoj Lwnh sai mbwk nuengx go Bouxboux cungj rox caez Ngoenz caez bae guh hong Haenh de muengzliklik Vunz caem gaeq haen it De hanh ndik henz daiz Fwen danq de mbouj liux Simseuq bouxboux gyaez Daeuj neix dang lauxsae Simmaez son Sawcuengh Gyaez Bouxcuengh lwgminz De haemh ninz mbouj onj Gwn ngaiz mbouj rox donq Vih son raeuz rox saw Raeuz ndaej rox sawcih Docih lauxsae ndei Laemxsim hag roengzbae Vih gaij ndei dieg Cuengh Bae naj ingj swva Caezgya ceng bae duengh Raeuz hag ndei Sawcuengh Swva rongh daengx biengz ----Bauq Sawcuengh 1983.7.16

路漫

	54.Riengz Dangj Baefoedfoed Seizneix daengz “caetit” Cib ik vunz simhai Daj “Samcung” ciuhai Guek raeuz daih bienqyiengh Doihduz bizbwdbwd Raeux henjrwg gwnz bo Cidoih doh dem doh Ranz moq baiz lienz baiz Dangj ak guek couh giengz Guek rengz minz ndaej fouq Daengx guek angq goenjouj Bouxbiengz raeuz vuenyungz Ngoenzneix raeuz sim’angq Cienz baengh dangj daiq loh Gwn raemx gaej lumz mboq Vut hoj gaej lumz dangj Riengz dangj baefoedfoed Doxdax buet baenaj Netsim guh seiqvaq Hwnq Cunghvaz ndongqgywg ----Bauq Sawcuengh 1984 6 30

路漫

	50.Goj Gangj Mbouj Rox Mbwq Lij Faz Ronghndwen ronghcangcang Ciuq gonganx henz laeuz Haemhnaengz gwn gvaq caeuz Doxiu daeuj gangj goj Mbouj cienz go duziu Mbouj riuz goj duzfangz Vahrwix raeuz mbouj gangj Vahbyangz raeuz mbouj dingq Dwen daengz dangj simvan Danq guekcoj hozmboeng Damz swva simhoengz Ciengq vuenyungz sim’angq Gangj ciuhgonq ciuhlaeng Yaeng gwnzmbwn ndawbiengz Haenh guekcoj fouqgiengz Siengj fatcaiz monzloh Mwngz gangj lawz yozsiz De lwnh di gingniemh Gou gangj lawz caux cienz Caez cienq haeuj lohfouq Haemh gangj mbouj rox mbwq Dauqcawq vunz ninz cingx Danghnaeuz lij siengj dingq Cingj haemhlaeng caiq daeuj ----Bauq Sawcuengh 1984.12.8

路漫

	49.Doek Hanh Vih Swva Lij Faz Naedhanh sawsiksik Ndikndik lumj nyawh baenz Naedhanh ndongq lumj ngaenz Miz gimngaenz nanz vuenh Seizcin raeuz caux goek Naedhanh doekbyoegbyoeg Muengh daengz neix ndwen loeg Henj ndaw doengh gyang ndoi Naedhanh vuenh naedhaeux Naedhaeux bengz gvaq gim Ngoenzneix cang haeux rim Raeuz simvuen ndaej fouq Genj naed hung naed fag Simndat dak gimsa Gai haeux hawj guekgya Vih swva ok hanh ----Bauq Sawcuengh 1984.8.11

路漫

	51.Gou Dwg Boux Lauxsae Lij Faz Gou dwg boux lauxsae Sim gyaez hong Sawcuengh Sim lumj daengngoenz ndongq Soengq rongh ndat hawj vunz Nungzminz lae naed hanh Sim maez ganq miu sang Gou doek hanh byagbyag Vih lwghag rox saw Canghdajdeu sim genq Gaek rin bienq baenz va Gou sim ndongj(geng) gvaq faz(diet) Vih swva son hag Canghva hanh rwed va Suenva mwn youh ndongq Gou hanh doek dieg Cuengh Maqmuengh ok yinzcaiz Sawcuengh ndaej doigvangq Bouxcuengh angq daengz maez Gou dwg boux lauxsae Ndiep gyaez hong Sawcuengh ----Bauq Sawcuengh 1984.9.1

路漫

	52.Raeuz simvuen cix ciengq ----Hoh Gozging Raeuz simvuen cix angq Reuz simlangh cix fwen Gozging sing go rwenz Raeuz simvuen cix ciengq Sam cib haj hopbi Daengx guek gizgiz hoengh(mwncup) Swva dwg miuz coek Lumj rangzndoek maj sang Dangj vix raeuz cauh fuk Gwndaenj cug ngoenz sang Gaen maenh dangjcunghyangh Raeuz sim’angq baenaj ----Bauq Sawcungh 1984.10.1

路漫

	53.Sim Raeujrub Lij Faz Raen it hauh vwnzgen* Seyenz angqlinlin Lumj daengngoenz seizcin Hawj sim vunz raeujrub Daengngoenz raeuj gwnz ndang Vah dangj raeuj ndawsim Ndit raeuj va cix nding Sim raeuj vunz cix angq Vwnzgen dwg dangdap Ronghsag ciuq ndaej gyae Lajmbanj daj neix bae Lumj max ndaej dem fwed Vwnzgen dwg vagim Hai rim dieg lajmbanj Gizgiz bauq cih “fanh” Ranzranz saiq fatcaiz Dangj caeuq minz doengzsim Miz gaen dangj caemh yamq Netsim haenqrengz ganq(guh) Fan it fan caeux daengz *It hauh vwnzgen couh dwg Cunghgung Cunghyangh bineix it hauh vwnzgen

路漫

	59.Danq Lauxsae Liuz Samcej rox fwen Ciengq sam ndwen hix byaiz Lauxsae goenglauz daih Fwen lai danq mbouj liux Laeuj ndei rang doh mbanj Dangz ndei van rim hoz Baengh lauxsae sinhoj Guekcoj ok yinzcaiz Ndit ndongq va cix rang Faex sang mak cix fag Baengh lauxsae sonhag Lwghag dungxcaiz gvai Guekcoj lumj suenva Baihnaj ndongq lumj man Baengh lauxsae doek hanh Ganq va cang seiqvaq Fwnz sauj feiz cix hoengh Namh mboeng faex cix mwn Baengh lauxsae roengzsim Yinzcaiz rim dienyah Fagbit lumj fagcae Mbaw ceij lumj nazdoengh Miux ndei haeux ndaej fung Baengh lauxsae roengz bonj ----Bauq Sawcuengh 1985 9 7

路漫

	58.Guh Maz Angq Baenz Haw boh meh cam: Sing riu yaek biengj ranz Guh maz angq baenz haw Yaemj din caeg bae yawj Raen lwg bawx dwk baiz Vunz bae hong goenjoj Doxsaiq guh rwenzcingz Songmwngz mbouj cukcingz Miz simcingz guh’angq Lwg bawx han: Boh meh ndeiriu lai Daraiz yawj loek liux Songdou geq ceijbiuq Sou luenh riuz dwk baiz Gonq gungz ranz seuqsat Simnyap cix dwk baiz Neix guh hong fatcaiz Raen cienz lai cix angq ----Bauq Sawcuengh 1985 10 26

路漫

	57.Sam Daih Vunz Buz gou mwh lwgdah(lwgsau) Ciengx vaiz laj dinbya Mbaw ngaeux gang guh liengj Cagfiengz guh saivaq Haethaemh siengj youh genx Hwnzngoenz ndwnj raemxda Hawj vunz dang vaizhoiq Hoj lai yaek diuq dah Meh gou mwh lwgdah Ciengx vaiz youq doenghnaz Liengjbaengz gang liengzsub Ndang daenj buh raizva Doengzdoih caez guh’angq Eu fwen goksasa Neix gou mwh lwgdah Ciengx vaiz henz suenva Liengjnizlungz rox gag haihaep Souhluzgih dwg song lazbah Daenj vunj dwk beizhaiz Gaem saw doeg denda Biengz ndei raeuz cix faengz Simmaengx hwnq seiqvaq ----Bauq Sawcuengh 1985 12 7

路漫

	56.Caez Caemh Loh Bae Hag Saia muengh coh baihnaj Gijmaz yaepmigmig Dwg ndaundeiq ronghgywg Dwg ronghrib guh haw Mbwk:Mbouj ndaundeiq ronghgywg Mbouj ronghrib guh haw Dwg vunz bae doeg saw Dawz dienhdoengz ronghsag Sai:Banh gijmaz hagdangz Vunz baenzneix angq hag Doeg le ndaej guh hak Roxnaeuz fat faenzsan Mbwk:Uk mwngz gaej hukhak Bak mwngz gaej luenh raeuq Banh ban Sawcuengh raeuz Bouxboux ceng bae hag Sai:Angq rox son Sawcuengh Gou simvuen ndawhoz Naengh nuengx mbouj ndek go Caez caemh loh bae hag Mbwk:Sawcuengh dwg bokfeiz Beij ndaundeiq lij ndongq Beix miz sim bae duengh Raeuz guh song caez byaij ----Bauq Sawcuengh 1986 1 25

路漫

	55.Siengj…… Miz cienz cawx ndaej saw Cihsiz cawx mbouj ndaej Siengj uk gvai da raeh Roengzsim bae hagsib Miz cienz cawx ndaej gwn Ganjcingz cawx mbouj ndaej Siengj hawj vunz ndiepgyaez Lai bae guh saeh ndei Miz cienz cawx ndaej daenj Fukfaenh mbouj miz gai Siengj gya hwng fatcaiz Riengz dangj byaij cij ndaej

路漫

	60.Cungh Lai Fanj Haih Lwg Byawz miz lwg mbouj gyaez Byawz baenz baez mbouj in Daengq bohmeh lajmbwn Ndiep lwg sim gaej hah Haethaemh ung nohbya Buhvaq caenh genj ndei Mbouj hag gvai son leix Gyangq baenz gaeq guenj gyok Doegsaw hag mbouj ndaej Lauxsae daeuj cunz ranz Mbouj son lwg gaij manz Fanj gvaiq lauxsae rwix Daj saeq langhbuengq saj Guenj gijmaz iucing Haidaeuz loek bak cim Daengz hung sim cix yej Cib sam hag caeg gaeq Cib seiq hag guh doj Cib caet bae bokloh Cib bet rox vetranz Ciengx lwg muengh baenz lungz Cungh lai fanj haih lwg Daengz gungh’anh daeuj gaeb Coegdungx ienq mbouj dauq ……Bauq Sawcuengh 1986 3 29

伤疤好咯

	seisaw neix ndei vw!lwg mbouj gyauq dwg boh coq.bouxlaux mbouj ndaej coengzcez lwg lai ,aeu son lwg douhleix guhvunz

路漫

	61.Gvaq Dwngj Gaej Lumz So Ngoenzneix ciet lauxsae Biengz ndei sim cix angq Faex mwn va engq rang Mbwn sang fwj cix moq Lauxsae raeuz ndeiraeuh Bouxboux cungj gingqgyaez Vih hawj lwghag ndei Simgei de yungh caenh Vih son hagseng gvai Deng geijlai causim Ngoenzlwenz gyaeuj lij ndaem Ngoenzneix byoem hausak Lwghag ndaej baenz caiz Sai geijlai hanhraemx Raeuz ciengzseiz geiq maenh Gvaq dwngj gaej lumz so ……----Gvangjsih Minzcuz Bau 1986 9 10