附柳州市选手(柳城县小学老师,咸茂红)的壮文稿子(使用标准语演讲):
Ranzmbanj Dwggyaez Gou ——Liujcwngz
◆Hanz Mouhungz (Yienh Liujcwngz)
LiuhCouh Gvangjsih dieg youq baihnamz Cungguek, hix dwg gaiq dieg gyaeundei Bouxcuengh comzyouq ndeu. Gou gyaez ranzmbanj Bouxcuengh dwggyaez gou. Aenvih dieg neix bya heu raemx loeg, namh biz vunz naengzganq. Gaiq dieg Bouxcuengh raeuz gag ok haujlai huqdoj, gijde mboujdanh sawj vunz bonjdieg najrongh, caemh hawj Bouxcuengh swhgeij ndwenngoenz demgya saekcaij gyaeundei.
Gangj daengz Liujcouh, couh mbouj ndaej mbouj daez daengz Liujcwngz, Byaij haeuj mbanjcuengh Liujcwngz, cawz byalengj raemxndei sawj vunz simmaez, lij miz gakcungj gakyiengh huqdoj bonjdieg——lumj dwg “Gij haeux Yangzmeiz、faenj Majsanh、oij Luzdangz、makgam Daibingz，makdoengj Liengzsuijsanh”, ndawde mingzheiq ceiq yiengj vanzlij suenq makdoengj lo.
Baez daengz mboengq seizcou, youq Lungzdouz, Daibingz, Dunghcenz, Sahbu, Majsanh gij dieg Liujcwngz lajmbanj gvangqlangh neix, makdoengj hoengzgywg, daegbied youq Liengzsuijsanh Nungzcangz, lueglueg byabya, gwnzreih ndawsuen, dauqcawq ndaej raen makdoengj rim nye. nyenye mak cungj naekgywggywg caemrwgrwg, miz nye sam seiq aen, miz nye haj roek aen, nye ndeu giet caet aen、bet aen cungj mbouj geizheih. mizmbangj mak lij baizladlad youq gwnz nye, mizmbangj youh gietgyug duengh gyaeuj nye——baenzbo baengzbyoengh, ndeiyawj dangqmaz, moix aen mak cungj youh nding youh wenj, sawj vunz raen le myaiz yaek doek, ngah dai vunz bae! nyaenx mbouj ndaej mbaet roengzdaeuj couh sauz de song sam gaen cix gvaqyinx nw!
Baenzlai Makdoengj gai bae gyawz ne? Gaej you’heiq! Bi’naengz gij makdoengj Liujcwngz mboujdanh gai daengz rogsengj——Gveicouh, Cungzging caeuq Sanghaij daengj dieg, lij hamq guek Yeznanz, Daigoz, Feihlizbinh daengj guekgya dunghnanzya. Aenvih mak Liujcwngz van, lohgai ndei, lij gai ndaej baenzcienz, ndigah makdoengj souhaeuj mboujdanh ndaej cauhfuk vunzlai ranzmbanj, lij hom daengz rogsengj caeuq rogguek, makdoengj Liujcwngz couhdwg yienghneix ndaej mingz hane. Yienh Liujcwngz caemh ndaej aen mingzdaeuz “aen yienh makdoengj Cungguek” dem. Ngoenzneix Liujcwngz yied bienq yied fouq, vunz Bouxcuengh ndwenngoenz cix yied gvaq sim yied van, cungjdaeujgangj goenglauz lij dwg gvi youq lingjdauj mizfap, gij cwngcwz dangj raeuz ndei.
Lajneix gou ciengq diuz go daeuj biujdad Bouxcuengh raeuz doiq dangj gij cingzngeih ba. (ciengq geij coenz go daeuj haenhdanq dangj)
Gak boux lingjdauj, lauxsae, gyoengq beixnuengx Bouxcuengh, youq 12 nyied Gihgagguenj Bouxcuengh Guengjsae raeuz laebbaenz 50 hopbi daeujdaengz seiz, Liujcwngz dou hix coux daeuj Aen Ciet Makdoengj Gaiq Daihsam hungmbwk he, sou siengj gwn makdoengj lwi? Sou siengj daeuj “aen yienh makdoengj Cunguek” youz lwi? Dou beixnuengx Bouxcuengh Liujcwngz angqcoux mwngz, beixnuengx Liujcouh angqcoux mwngz daeuj youz bw!
[此贴子已经被作者于2008-10-1 15:33:15编辑过]
发表于 2008-10-1 15:10:00
