[原创] Youz Dwegcuengh Si Baekhaij [3]

08Ayingj

	Youz  Dwegcuengh Si Baekhaij           Bae daengz  henz  haij  roengz ci ,couh yawj raen aen  daemz hung gvangq ndeu  yiet hoi  youq baih naj , aen daemz hung    mbiengj baih  haenx  caeuq mbwn dox  swnjdam , rumz  haij ci hawj  naj vunz  seuq satsat , raemx langh  bub hamq , sing ruxlala  mbouj  dingz , giz neix couh dwg Baekhaij  hamq haij -Yinzdanh  !           Youq ngeih cib ngeih bi gonq ,couh dwg  bi 1986 ,gou couh  caeuq hauj lai hauxseng youq ngoenz [5.4 ] naengh ci daeuj neix youz langh gvaq ,mwh haenx  youq Yinzdanh cawz liux aen mbanj  [ Sa gyaeujguk ] le , couh mbouj miz gij maz ranz lo ,  hamq haij sa hau supsup ,ndongq myanmyan , daj gyae yawj caen dwg lumj anj ngaenz hau  ndeu ne , raemx haij caemh dwg seu satsat ,cingx dikdik lumj raemx mboq Lingzsij ne !  seiz hwngq daj haet daengz haemh ngoenz ngoenz cungj miz vunz cien vunz fanh  youq giz neix angq raemx angq haij !  Hoeng  seiz neix , henz haij  ranz louz bu muenx henz haij , sa hau mbouj raen lo , cij miz sa henj ndaem lo ,  raemx seuqcing  mbouj raen lo , henz haij  gij raemx langh  haemz ndaem haemz ndaem , roengz bae angq raemx  gij angqheiq  mbouj miz lo ,yamq roengz raemx bae ,aen  ndang hwnj haenz  hwnj rwd ,  Daengxbiengz daih it dan Yinzdanh bienq  lo !  Vunz daeuj angq raemx angq haij  caemh gig noix lo ,henz haij fwz meumeu  ! Yiengh gingj neix  Caen hawj gou doek saet raixcaix !            Diegcuengh  aen caw ndongq myanmyan haenx  doiq saek bienq baenz ndaem henj yak yawj le , lij dij gij maz  ne ?  Si Baekhaij  - Yinzdanh bienq haeu le , Baekhaij  lijyouz hongnieb souhaeuj diuz caizfouq neix couh yaek gat caw lo !          Vih maz youq gwnz ci diet  loh  caeuq gou caemh ci daeuj langh gyoengq vunz   gig noix ,  dangx aen ci hek mbouj rim bak vunz , seizneix gou rox dwg vih gij maz lo !           Gou ndij henz haij byaijbyaij , raemx haij liz hamq sam seiq cib mij gyae dox bae , raemx haij  lij loq cing ,gou giet dingh  naengh huz ok haij  ,bae ndaw haij  laeg bae  riuz raemx angq raemx !           Yiengh neix gou couh youq henz hamq co aen huz dengx ndeu  ok haij  bae langh  angq !