<< Rumz Sam Nyied >>
----- Ranzloeg Bohdahgez
Geij ngoenz gaxgonq, vadauz lij hai youq henz dah hoengzswgswg, seizneix gaenq cugciemh loenq yaek liux lo, limqva baenz benq baenz benq riengz rumzcin mbinfoenxfoenx doek roengz ndaw dah bae, caiq cimh raemxdah menhmenh lae baebengqbengq. Geij duz roegvaiqguhvaiqguz daj gwnz dingj gominz hai va hoengzswgswg haenx mbin gvaqdaeuj, doq mbin doq swenj:" vaiqguhvaiqguz—vaiqguhvaiqguz—" Sing sang sing daemq, nauhyied dangqmaz. Diuz Dahvadauz, raemxlangh fubfeb, menhmenh lae daengz gizgyae bae. Henz dah song doengh naz gvangqmyangxmyangx haenx, baenz benq baenz benq nazgyaj, gaenq maj dwk heuswdswd, oiqupup lo. Rumzcin liengzseuxseux, daengngoenz raeujrubrub, caiq gvaq song sam ngoenz dem, couh hab ndaemnaz lo. Seizneix, baenz buek baenz bang hauxseng, miz mbangj comz youq bakmbanj, miz mbangj naengh youq henz dah, miz mbangj ndwn youq gwnz daihloh, caezgya cungj ngiengx gyaeuj coh gizgyae muenghyawj. Yawj dwk da yaek va, muengh dwk hoz yaek lot.
Sawqmwh, miz vunz hemq naeuz, daeuj lo, daeuj lo, daeuj daengz lo!
Daeuj lo, daeuj lo! Rumzcin dawz sing fwen daj ndaw lueg ci daeuj lo!
Mbungqmbaj riengz sing fwen mbin daeuj lo!
Lwgsau Bouxcuengh daj ndaw fwj byaij roengzdaeuj lo!
Liengjva nizlungz mbinbengqbengq, sing riu sing fwen goksaxsax.
Youq benq diegnywj laj dinbya, seizneix nauhyied gvaq haw bae. Lwgsau Bouxcuengh daenj buhhoengz vinjlamz, gwnz gen raek goenhngaenz, naj riumbingqmbingq lumj vadauz, bouxboux baenzsau, dahdah gyaeundei, hawj gyoengq lwgmbauq Bouxgun daeuj cingj vunz banghong neix, cim dwk da mbouj yaep, yawj dwk simdaeuz diuq. Raen dahsau lawz habhoz le, couh daj ndaw daeh mbon aen gyaeqhoengz he okdaeuj, siujsim ndenq hawj dahsau: Nuengx ha, doenghnaz rauq bingz lo, gyaj cix maj sang lo, dou gaenq muengh mwngz haj hwnz haj ngoenz lo. Dahsau aeu liengj cw naj riumbingqmbingq, ciep aeu aen gyaeqhoengz daegmbauq soengq hawj neix le, couh suenq dapwngq banghong lo. Daegmbauq naengh hwnj mohdozceh, dap dahsau hai bae mbinfoxfox. Diuz roen bakmbanj bingz youh gvangq, swnh rumz buet bae singjsaenz sangj. Seizneix youq ndaw mbanj, gya'gya hohhoh, laeujlaeuj nohnoh gaenq baij hwnj daiz, dakdaih dahsau daj ndaw lueg daeuj. Laeuj rang cingzngeih naek, caengz ndoet haeuj bak sim gaenq fiz.
Diuz rijvadauz, daj ndaw lueg lae okdaeuj, ginggvaq gouj cib gouj van daeuj daengz gizneix, lae roengz Dahvadauz. Dahvadauz raemx sawrikrik, lumj diuz baengzcouz nei, geuj gvaq doenghnaz, gvaengx gvaq bakmbanj, lae daengz gizgyae bae. Seizcin va hai, seizcou giet mak, bibi ndwenndwen, dahvadauz mbouj rox hawj song hamq de daiq daeuj geijlai fungsou caeuq sing riu. Gaijgwz gaihfangq le, youq song henz dah, youh banh hwnj haujlai yanghcinq giqnez. Seizneix ndwen sam nyied, cingq dwg seiz hongnyaengq, gyoengq lwgsau Bouxcuengh, caiq daj ndaw bya okdaeuj banghong, beixnuengx Bouxgun baenzlawz mbouj gamjdoengh, mbouj docih ni?
Lwgsau bouxcuengh angqangq yangzyangz roengz doengh daeuj ndaemnaz lo, hawj song henz Dahvadauz, daj haet daengz haemh, dauqcawq sing fwen goksaxsax. Gyoengqde ciengq naeuz:
Hai bak eu hot fwen ,
Sing rwenz bae cien leix ;
Duzfungh mbin bingzdeih ,
Raen seiqlengq va hai .
Va hai youq gwnz biengz ,
Mbaej ciengxlwenx hoengzmaeq ;
Hot fwen hab sim’eiq ,
Riuzcienz ndaej fanh bi .
…….
Dingq lwgsau eu fwen, rumzcin engq van'diemz; dingq lwgsau eu fwen, va hai engq ronghsien; dingq lwgsau eu fwen, lwgmbauq guhhong engq miz rengz, gwnz mbaq rap bak gaen, byaij bae vaiq gvaq rumz.
Lwgsau eu gvaq le, couh iu gyoengq lwgmbauq doiqfwen:
Roeglaej hag eu fwen ,
Sing mbouj luenz yak dingq ;
Va’meiz cuenh gwnz dingj ,
Hai bak gim lo beix .
Fwen lwgsau daeuq dwk gyoengq lwgmbauq hozhaenz sim cix van, gyoengqde doxcomz caemciek yaep he le, couh hoiz fwen gvaqdaeuj lo:
Nuengx bak raeh ,
Nuengx bak raeh gvaq fag daeqdau ;
Geijlai dietsienq cungj gamj bauz ,
Beix lau caeuq mwngz beij bonjsaeh .
Lwgsau bouxcuengh cingqcaen bakraeh, gyoengq lwgmbauq ngamq eu sat, gyoengqde couh doq doiqfwen gvaqdaeuj:
Gangj bonjsaeh ,
Gangj daengz bonjsaeh beij beix ca ;
Daeh bwnh beix lumj guk roengz bya ,
Rauq naz beix lumj lungz gvaq haij .
Gyoengq lwgmbauq cix sikhaek eu fwen haenh dahsau:
Mbungqmbaj bingzbaiz mbin ndaw va ,
Yawj nuengx ndaemnaz caen lingzleih ;
Vaiq gvaq gaeqhangh dot haeuxraeh,
Doxbeij bonjsaeh beix fug saw.
......
Mwngz cam gou dap, eu hot dem hot, sing fwen mbouj dingz, sing riu mbouj duenh, eu dwk bangx bya va engq hoengz, eu dwk daengngoenz engq raeujrub.
Sing fwen caeuq rumzcin, dawz song doengh naz henz Dahvadauz yumx dwk heuheu loegloeg lo. Gizneix ndaemnaz sat le, ndaw lueg cix yaek hongnyaengq lo: haeuxmaex hab lumx lo, mbawcaz hab mbaet lo, raetnae wngdang sou lo, gyoengq lwgsau bouxcuengh couh yaek dauqma ndaw lueg lo. Boux cawjgya cien docih fanh docih, daengx ranz vunz soengq hek daengz bakmbanj. Mehbaj daj ndaw daehbuh mbon aen fungbau hoengz he okdaeuj, ndenq hawj dahsau: "Sau ha, mwngz daeuj bang ndaemnaz, sinhoj mwngz lai lo, mbouj miz noh miz bya, doiq mbouj gvaq mwngz nuengx! Mehbaj aeu geij maenz ngaenz hawj mwngz, cawx diuz sukbaq uetuet hanh!" Dahsau riumbingqmbingq, hai bak vah lingzleih:" Bohlungz caeuq mehbaj, dingq gou gangj song coenz, cienz gou mboujndaej aeu, cingzngeih gou lingx lo. Mwh yaek ok bakdou, bohmeh gou raengq gvaq, beixnuengx dox bangcoh, mboujndaej aeu cienzngaenz.” Dingqngi dahsau yienghneix gangj, bohlungz caeuq mehbaj cix mbouj rox baenzlawz guh cij ndei lo. Vanzlij dwg daegmbauq coengmingz, de vaiq ciep bak naeuz: "Nuengx ha, danghnaeuz mbouj aeu ngaenz, dou swnh mwngz cawjeiq, mwngz couh yaek dauqbae, gou soengq mwngz hwnj loh."
Song boux byaij bingzbaiz, dep mbaq caez yamq din, byaij daengz gwnz gyaeujgiuz, byaij daengz gwnz daihloh, byaij gvaq henz doenghnaz, daeuj daengz laj dinbya. Daeuj daengz laj dinbya le couh yaek faensouj doxbiek lo. Daegmbauq mbon aen soujbiuj he okdaeuj, soengq haeuj ndaw fwngz dahsau bae: "Nuengx ha, caen sim docih mwngz, cienz mbouj aeu cixbah, soengq aen soujbiuj neix hawj mwngz, hawj nuengx guh louzniemh." Soengq laex guh louzniemh, baenzlawz caiq doiswz? Dahsau ciep aeu aen soujbiuj, riumbingqmbingq doiq daegmbauq naeuz: "Soujbiuj geiq hwnzngoenz, saedceij bae ndaej vaiq, beix ha, daengz bi'moq sam nyied, raeuz caiq dauq doxraen."
Dwg ha, daengz bi'moq sam nyied, raeuz caiq dauq doxraen!
Gyoengq lwgsau Bouxcuengh, baenz bang baenz buek, lumj mbungqmbaj nei, doxgaen doxriengz, mbin dauqma ndaw bya lo, gyoengqde louz hawj song doenghnaz henz dah neix, dwg baenz benq baenz benq heuswdswd, mwncupcup, caeuq gij sing fwen van'diemz neix:
Daengz bi'moq sam nyied ,
Va’minz dauq hailangh ;
Go’gyaj roek conq sang ,
Caiq daeuj angq doenghnaz .
…….
------- Daj SAM NYIED SAM genj aeu daeuj
发表于 2007-9-9 08:56:00
QQ空间
腾讯微博
腾讯朋友
微信
转播
淘帖
分享
收藏
支持
反对
发表于 2007-9-9 11:24:00
