花山的故事(7)

lozmingz

	[这个贴子最后由lozmingz在 2002/11/17 10:24am 编辑] GOJ BYARAIZ 花山的故事 　 　 7. MBAUQYW Doenghbaez, Valeiz dwg aen haw hung ndeu, miz haj roek bak ranz vunz, baihnaj miz diuz Dah cojgyangh riuz gvaq, gij ruzhek baedauq mbouj duenh. Gwnz haw miz bouqcabhuq bouqbaengz bouqfaenj hangzmou hangz gaeq……bungz ngoenzhaw, vunz daj seiqcawq daeuj ganj haw, hoengh dangqmaz. Youq doiqnaj dah goengq bya Valeiz, laj de miz aen suen hung he, ndaw suen ndaem miz gak cungj gak yiengh yw. Guenj aen suen yw neix seih goenglaux caeuq daeglan de, vunz cungj heuh goengaux guh Goengyw, heuh daeglan de guh Mbauqyw. Mbauqyw ndaej cib ngeih bi la, de daj nyaeq couh gaen goeng de ndaem yw, gij yw ndaw suen de cungj gangj ndaej ok mingzcoh. Goengyw vunz simsoh, gij yw ndaem ndaej youh ndei, gyaqcienz youh goengdauh, bouxhoj gyawz baenz bingh la, de couh hemq Mbauqyw cengj bez soengq yw daengz ranz bae. Yienghneix Mbauqyw caeuq vunz gwnzhaw gig doxndei. Bi haenx, dingq gangj gwnz haw Valeiz miz boux guh seng’eiq ndeu, de raen nohvaiz ndei gai, couh daj gizwnq buenq ruz nohvaiz he daeuj gai. Aenvih youq byonghloh ruz vaih, nguh liux geij ngoenz, caj yinh daengz gwnzhaw, nohvaiz cungj haeu caez, gai mbouj okbae, de couh vut ce gwnzhaw, youz gij nengznyaen daeuj byuz daeuj raih. Yienghneix, haw Valeiz couh fat raq lo. Mbouj geij ngoenz, daengx haw ranzranz miz vunz dai, hohhoh miz vunz daiqhauq. Haidaeuz, vunz gwnzhaw dauqcawq cingj canghyw. Canghyw cungj cingj caez lo, bouqyw gijmaz yw cungj cawx liux lo, ngoenzngoenz lij miz vunz dai; doeklaeng, youh bae cingj haujlai yahsien caeuq bouxdauh daeuj lienz hwnz lienz ngoenz guh caeq guh dauh, laihnaeuz yienghneix bingh couh ndei, bouxlawz rox lienz doengh boux yahsien bouxdauh caemh dai liux geij boux. Gwnzhaw boux miz cienz cungj doxceng deuz lo, lij lw doengh boux hoj buenq dai buenq lix bae mbouj ndaej. Miz ngoenz ndeu, Goengyw haetcaeux couh cang rim geij swx yw, hemq Mbauqyw vaij bez soengq gvaq dah bae. Baeznaengz, Daegbyai gwnzhaw cungj daeuj ciep yw, ngoenzneix Mbauqyw vaij bez gvaq dah le, baenzlawz mbouj raen daeuj? Mbauqyw lienzseiz bae ranz Daegbyai yawj, yienzlaiz, Daegbyai hix baenzbingh ninz youq gwnz congz, gangj mbouj ndaej vah lo. Mbauqyw simgaenj dwk naeuz: “Daegbyai, gou itdingh heuh goeng gou gip gij yw ceiq ndei daeuj hawj mwngz yw bingh.” Banhaemh, Mbauqyw najsaepsat caiq yinh yw ma ranz. De gangj: “Goeng ha, vunz gwnzhaw cungj bingh lo, gij yw raeuz yw mbouj ndaej ndei, vunz mbouj haengj aeu lo. Goeng, raeuz mbouj miz yw yw ndaej ndei cungj bingh neix ma?” Goengyw baenqbaenq gyaeuj, danqheiq naeuz: “Cungj bingh neix yungh gij yw lajmbwn raeuz cungj yw mbouj ndei ha.” Mbauqyw cam: “Yungh gijmaz yw cij yw ndaej ndei ne?” Goengyw naeuz: “Cij miz go’nywjsien yw ndaej ndei.” Mbauqyw youh cam: “Gizlawz miz go’nywj neix ne?” Goengyw fwngz vix coh dingj Bya Valeiz naeuz: “Gwnz de miz, danhseih, bya daiq sang, gou laux lo, hwnjbae mbouj ndaej ha!” Mbauqyw dingq le, angq dwk naeuz: “Daxgoeng, Bya Valeiz gou hwnjbae ndaej. Gou bingzciengz bae dwk fwnz, gij bya beij Bya Valeiz lij sang gou cungj hwnjbae gvaq ne!” Goengyw naeuz: “Mwngz bae mbouj ndaej ……” Mbauqyw simgaenj naeuz: “Daxgoeng, gou bae ndaej. Mwngz lwnh gou, go’nywjsien baenzawz yiengh, caj gou bae gip aeu.” Goengyw vanzlij baenqbaenq gyaeuj: “Mwngz bae mbouj ndaej. Mwngz mbouj rox, go nywjsien neix dwg Yahguenyaem gwnzmbwn ndaem, de baij miz yahsien hensouj.Youq cib bi gonq, baihlaeng bya hix miz aen mbanj ndeu baenz bingh raq, daxboh daxmeh mwngz hix hwnj bya bae gip gvaq ywsien, bouxlawz rox, gyoengqde mbat bae couh mbouj raen dauqma lo. Mwngz dwg boux lwgdog, danghnaeuz miz maz saeh, ranz raeuz couh mbouj miz vunz dawz lozyieng lo.” Mbauqyw ngaeq naeuz: “Daxgoeng ha, Daegbyai Daegbengz daengj hix seih lwgdog, danghnaeuz gyoengqde bingh yw mbouj ndei, haujlai ranz caemh boek lozyieng ha. Daxgoeng, hawj gou bae la!” Goengyw naemjnaemj, ngaek gyaeuj naeuz: “Lan ha, gou ndaem baenzlai yw, couh siengj yw bingh gouq vunz, ngoenzneix gwnzhaw vunz bingh la, gou hix simgaenj ha. Mwngz yienznaeuz lij nyaeq, danhseih miz ceiqheiq, gou mbouj dangjlanz mwngz, mwngz bae ba. Mwngz itloh aeu siujsim, diuz loh neix gig yungyiemj, aeu doenggvaq sam aen gvan, daih’it gvan miz diuz lueg laeg mbouj raen daej, heuh Luegnuem, ndaw lueg miz duznuem, hung lumj aen doengj nei; daihngeih gvan dwg aen nguemz laep yawj mbouj raen fajfwngz, heuhguh Nguemz lungzmou, ndaw de miz duzlungzmou; daihsam gvan dwg aen gemh lingq, heuhguh Gemhlingzsien, gwnz de miz duzlingz sien, gyoengqde cungj dwg Yahguenyem baij daeuj henre nywjsien, mbouj hawj vunzbiengz bae gip aeu……” Mbauqyw bek aek naeuz: “Mwngz cuengqsim, gou miz banhfap doiqfouq.” Goengyw ciep gangj roengzbae: “Mwngz bae daengz dingj bya le, giz dieg ceiq sang miz gep rin ndeu, gwnz de miz go’nywj hai va hau, couh dwg go’nywjsien lo. Mwngz gip ndaej nywjsien le, couh ganjvaiq ma ranz, vunz bingh caj yungh ha.” Mbauqyw biek liux daxgoeng, daz duzdoq nyaeq hau de, couh hwnj bya bae lo. Bya Valeiz caen nanz benz ha! Bya sang rin raeh, din mbat caij hwnjbae couh deng coeg riuz lwed; dauqcawq dwg cazoen, fwngz mbat bungq, gat dwk youh sep youh haenz. Mbauqyw goq mbouj ndaej baenzlai, doq biengj cazoen doq beng gaeu benz hwnjbae. Benz ha benz ha, sawqmwh, baihnaj miz diuz lueg laeg dangj loh, diuz lueg laeg dwk rin doek roengzbae mbouj nyi sing. Mbouj miz giuz, baenzlawz gvaq bae ne? Mbauqyw cingq simnyap, sawqmwh daj laj lueg miz geu rumz ci daeuj, raen duznuem ndeu lumj diuz saeumeh baenz hung, aj bak iet linx siengj gwn vunz. Mbauqyw cungj mbouj lau saek di, de byaij gvaq bae naeuz: “Nuem ha nuem, gwnzhaw vunz cungj bingh lo, caj gou aeu nywjsien baema gouq mingh ne. Cingj mwngz bang dap giuz hawj gou gvaqbae, vunz dou mbouj lumz cingzngeih mwngz. ” Duznuem dingq le, ngaekngaek gyaeuj, couh iet soh ndang vang youq gwnz lueg dang diuz giuz, Mbauqyw caeuq duzdoq hau menhmenh caij gwnz ndang de byaij gvaqbae. Mbauqyw caeuq duzdoq hau gvaq lueg le, laebdaeb ganj loh, mbouj geij nanz daeuj daengz bak nguemz, ndaw de laepngaungau, vunz haeujbae gijmaz cungj yawj mbouj raen. Baenzlawz guh ne? Mbauqyw nyapnyuk raixcaix, sawqmwh, dingqnyi yiengj “bubu” sing he, daj laj raengz miz duzlungzmou mbin okdaeuj, song aen lwgda lumj daengloengz nei, ciuq ndaej daengx nguemz hausaksak. Duzlungzmou nyingj faenz nyingj heuj, yaek coemj gvaqdaeuj haeb de. Mbauqyw ganjvaiq byaij coh de naeuz: “Lungzmou ha lungzmou, laj bya vunz cungj bingh caez lo, gou gip nywjsien dwg vihliux gouq vunz, mwngz bang gou ok di rengz, soengq gou gvaq congh nguemz bae lw!” Duzlungzmou dingq le, ngaekngaek gyaeuj, cienq ndang gvaqbae, yungh song aen da daengloengz de bang Mbauqyw anan yienzyienz gvaq liux congh nguemz. Ok Nguemzlungzmou le, Mbauqyw caeuq duzdoq hau byaij mbouj geijlai gyae, youh miz aen dat ndeu dangj loh. Aen dat neix lingq lumj bangxciengz nei, ndoq ndongj lienz faex caeuq haz hix mbouj hwnj. Baenzlawz hwnjbae ne? Mbauqyw mbouj miz banhfap lo. Seizneix, daj gwnz dat miz duz lingzsien ndeu“cutlut” diuq roengzdaeuj. De song da ndingndetndet, iet ok song fajfwngz siengj nyauj Mbauqyw. Mbauqyw song fwngz guh sax naeuz: “Lingzsien ha lingzsien, laj bya vunz cungj bingh yaek dai caez lo, gou gip nywjsien dwg vihliux gouq vungz ha, cingj mwngz bang di rengz, soengq dou hwnj dingj bya bae, dou mbouj lumz aen mwngz. ” Duzlingzsien dingq le, yaepyaep da, iet fwngz okdaeuj rag Mbauqyw caeuq duzdoq hau hwnj gwnz dat bae. Mbauqyw caeuq duzdoq hau youh byaij ha byaij ha, banringz daeuj daengz gwnz dingj Bya Valeiz. Ho! Youq giz ceiq sang haenx, miz gep rinyienh hung ndeu, gwnz de miz go’nywj heusisi, oiqcupcup, hai va hau, couh dwg nywjsien. Mbauqyw yawjraen nywjsen, angq raixcaix, de sikhaek buet gvaqbae, iet fwngz couh mbaet aeu. Fwngz de ngamq bungqdeng go’nywjsien, couh miz geu rumz he ci daeuj, raen dahsien daenj buh hau ndwn youq baihnaj de, doiq de naeuz: “Mbauqyw, go nywjsien neix mwngz mbouj ndaej mbaet ha.” Mbauqyw roxnyinh geizheih, cam naeuz: “Guxsien ha, gou gip nywjsien dwg vihliux gouq vunz, mwngz yungzcingz mbat neix ba.” Dahsien naeuz: “Go nywjsien neix dwg gwnzmbwn Yahvuengzguenyaem ndaem, de laeb miz baenzneix gveigawj: Danghnaeuz bouxlawz mbaet aeu go nywjsien neix, couh fad de bienqbaenz go’nywjsien. Ngoenzneix mwngz gip aeu de, hix lumj daxboh daxmeh mwngz ityiengh, dentg fad baenz go’nywjsien, ciengxlwenx mbouj ndaej ma ranz lo.” Mbauqyw dingq le, di he mbouj ceizngeiz, naeuz: “Guxsien ha, seizneix youq laj bya miz haujlai vunz caj go’nywjsien daeuj gouq mingh ne, vihliux yw ndei caezgya, gou cingznyienh bienq baenz go’nywjsen.” Mbauqyw gangj sat, couh mbaet aeu go’nywjsien. De gaem go’nywjsien doiq yahsien naeuz: “Guxsien ha, youq gou yaek bienqbaenz go’nywjsien doekgonq, cingj mwngz bang soengq go’nywjsien hawj goeng gou, hawj de bae yw ndei gij vunz bingh ba. ” Dahsien ngaekngaek gyaeuj, mbat baet genbuh, cij raen miz geu rumz fefe ci daeuj, duzdoq hau sikhaek bienqbaenz duzroeg hau, gamz go’nywjsien mbin roengz bya bae. Mbin ha mbin ha, itcig mbin daengz ranzhaz Goengyw. Mbauqyw ndwn youq dingj bya, yawjraen daxgoeng ndaej nywjsien le, sim’angq dwk riu hwnjdaeuj, hamj hwnj gwnz gep rinyienh bae mbat ndwn, couh bienqbaenz go’nywjsien heusisi、oiqcupcup lo. Goengyw ndaej nywjsien le, sikhaek aeu aen rekvaiz daeuj cawj yw, dawz bae faen hawj caezgya ndoet. Caezgya gwn raemx nywjsien le, bingh couh ndei lo. Doeklaeng, daihgya roxdaengz Mbauqyw vih vunzlai vut ndang gip nywjsien gienh saeh neix le, cungj gig gamjdoengh, lumj vunzcin ityiengh daeuj fugsaeh Goengyw. Goengyw sim vaiqvued, itcig souh daengz bak bi. Miz haemh ndeu, ronghndwen ronghsagsag, Goengyw sawqmwh mbouj raen lo. Ngoenzlaeng, vunz raen gwnz dat Bya Valeiz yienhok song aen siengq nding, boux hung boux nyaeq, lij miz duzroeg hau dem youq gwnz dat mbin bae mbin dauq. Vunz cungj gangj: song aen siengq vunz neix, couh dwg Goengyw caeuq Mbauqyw bienqvbaenz la. Aenvih dahsien mbouj nyaenxsim goenglaux simsoh lan de youq gwnz dat Bya Valeiz yienh siengq okdaeuj, hawj vunz raeuz seiqseiq daihdaih cungj ndaej raen gyoengqde, geiqniemh gyoengqde. Duzroeg nyaeq dwg duzdoq hau bienqbaenz, mbouj yungh gangj, de itdingh gaen youq henz ndang Mbauqyw lo. Vunz lij gangj: goengyw caeuq Mbauqyw yienznaeuz bienqbaenz siengqveh, danhseih song boux de lij gig gvansim gij vunz baenz bingh, cij aeu daengz goek Bya Valeiz bae ra, cungj ra ndaej haujlai yiengh yw, gij yw neix, yw bingh daegbied lingz. (Fungz Cinglinz、Vangz Caizswnh、Luz Dwngzgunh cingjleix)                                              ——————摘自[壮侗语言文化网]