花山的故事(6)

lozmingz

	GOJ BYARAIZ 花山的故事 　 6. BYACAW Dingq gangj doenghbaez gij vunz song henz Dah Mingzgyangh gaenx, moix ngoenz mbwn caengz rongh couh okhong, mbwn laep cij dauq, seizhah ndat lai, gyoengqde couh coemh feiz ciuq rongh guh hong, bungz daengz haemh miz ronghndwen, youh lienz hwnz ganj hong. Gyoengqde baenzlai gaenx, gamjdoengh liux Nyawhdaeq gwnzmbwn, de couh baij caizsaenz dawz naed caw he daeuj hawj gyoengqde ciuq rongh guh hong. Caizsaenz lau miz vunz damsim caeg aeu naedcaw bae, mbouj sikhaek dawz naedcaw daeuj hawj vunz ciuq rongh, de sien naemj geiq sawqsawq vunz sim ndei mboj ndei. Baez daih’it, de bienq baenz meh mou hau ndeu, daiq song duz moulwg daengz henz ranz mehmaiq daeuj ninz, song duz moulwg ceng gwn neq hemqekek. Mehmaiq dingqnyi okdaeuj mbat yawj, siengj daengz cihgeij hix daz song boux lwg soujmaiq, dij iek ngaiz nit, gig doengzcingz duzmou, couh dawz song bog fiengz bae hawj de guh moeg ninz. Haetlaeng, mehmaiq riuj gyangdoengj mok raeuj he daeuj gueng mou, mou mbouj raen lo, cij raen gwnz fiengz miz sam maenz ngaenz, maenz he lai hung, song maenz lai nyaeq. De ngeix: “dwg gij ngaenz bouxlawz ne? Dwg mbouj dwg duzmou bienqbaenz? Hai, guenj de baenzlai. Youh mbouj dwg ngaenz gou!” De lienz mo cungj mbouj mo, riuj doengj mok couh cienq ndang byaij lo. Baez daihngeih, caizsaenz bienqbaenz song duz gaeqboux bwn ndoq, hemq“gokgok” aj fwed buet haeuj aen ranzhaz bouxgyonh bae. Bouxgyonh dwg daj gizwnq deuz iek daeuj, de raen song duz gaeq bwn ndoq neix iek dwk saenzdegdeg, couh siengj daengz beixnuengx dai iek youq byonghloh. Siengj daengz neix, de cojgvaq song duz gaeq ndoq, ngamq lw seiq liengx haeuxsan, couh dawz dingz ndeu daeuj gueng gaeq. Mboujliuh song duz gaeq neix gwn haeux le, daengx ndang couh bienqbaenz gim henj ndongqsaksak. Bouxgyonh byaij gvaqbae mbat mo, youh myag youh geng, gaem hwnj fwngz daeuj, naekcaemcaem, de rox gijneix couh dwg song duz gaeq gim. De siengj, gou ndaej song duz gaeq gim neix couh fatcaiz lo. Ngamq dawz doiq gaeq gim byaij daengz bakdou, youh naemj daengz giyenz dwg song duz gaeq bouxwnq loeng haeuj ranz gou, bouxcawj itdingh caiq daeuj ra, gou baenzlawz damsim aeu gij doxgaiq bouxwnq ne? Yienghneix, de youh dawz doiq gaeq gim okbae cuengq youq haenz loh, caj bouxcawj daeuj ra. Caizsaenz sawq gvaq song baez, saenq gij vunz gizneix saedcaih simsoh, couh gietdingh cuengq naedcaw youq gwnz dingj bya, ciuq rongh hawj vunz guh hong. Haemh daengngoenz baez doek roengz congh, dingj bya couh ronghcancan, gyoengqvunz youh caiq ndaej cae naz、ciemz rum、 rap bwnh, seiqcawq dwg vunz eu fwen gangj riu, nauhnyied dangqmaz. Daj seiz haenx hwnj, vunz raeuz couh heuh aen bya neix guh Byacaw. Yaep da gvaq liux song bi, saedceij yied gvaq yied ndei. Caizsaenz siengj: Danghnaeuz gvaq sam bi, naed caw neix mbouj deng vunz caeg bae, de couh ciengxlwenx cuengq youq dingj bya, caiq mbouj sou baema lo. Mboujliuh daengz bi daihsam ndwenlab, miz ndaek guen ndeu dingqnyi gangj naed caw neix gig dijbauj, couh siengj dawz bae soengqhawj vuengzdaeq, siengj dang guen hung. De daiq bingmax daeuj ciengj caw. Gyoengqde ngamq dawz naedcaw byaij daengz byonghbya, caizsaenz gaem diuz faexdwngx mbat vix, naedcaw couh yiengj “hum” sing ndeu, lumj byajmeb nei, bouxguen caeuq gij bingmax de cungj deng bag dai lo, gij seihaiz gyoengqde couh nem youq bangx dat, boux ndeu hix deuz mbouj duet. Daj seiz haenx hwnj, Byacaw caiq mbouj miz caw rongh lo, seizneix raeuz yawjraen dozsiengq gwnz dat couh dwg seiz haenx bingmax ciengj caw. (Cwnz Vazgez、Luz Dwngzgunh cingjleix)                                            ——————摘自[壮侗语言文化网]