Gou Mbouj Rox

tengweichan

	[ 本帖最后由 tengweichan 于 2013-1-18 20:03 编辑 ]\n\n            Hagseng ban gou miz aen daegdiemj he,fanz dwg ndaw ban miz maz vaihsaeh,mwngz cam gyoengqde,boux boux cungj han naeuz:"Gou mbouj rox."Couh lumj aen daengq gwnz gangjdaiz gou deng nyoengx fan lo,mbouj miz vunz fuz hwnjdaeuj,gou cam:"Dwg boux lawz nyoengx fan couh hwnjdaeuj fuz cingq bae."Hoeng,ndaw ban mbouj miz saek boux vunz gangj dwg cihgeij nyoengx,boux boux cungj gangj:"Gou mbouj rox."Dieg ngamq baet seuq couh miz vunz gvengq ceij lo,cam dwg boux lawz?cungj han:"Gou mbouj rox.".......Gou cungj gangj ndaw ban miz fangz lo.                  Ngoenz neix,dwg Yinghyij gaujsiq,gou haeuj ndaw ban bae gangj gijliz gaujsiq.Ngamq gangj sat ma daengz bangunghsiz mbouj ndaej sam faen cung,gou youh dauq bae yawj,couh raen henz ndang Vangz Ruzcoj hoenz ngaungau.Gou byaij gvaq bae baez yawj,yienzlai dwg coemh saw.Gou heiq mbouj daj lengq he daeuj,hanq cam:"Dwg boux lawz coemh saw?Dwg mwngz lwi?Vangz Ruzcoj."Vangz Ruzcoj riuhehe han naeuz:"Mbouj dwg gou."Vangz Ruzcoj dwg ndaw ban boux ceiq ak haenx,mbouj dwg de youh dwg boux lawz.Yawj raen gij yakyiengh de,gou engq ndat lo,sing couh engq sang:"Mbouj dwg mwngz,dwg boux lawz?Caiq gangj dwg boux lawz aeu dajhojgih daeuj." Vangz Ruzcoj cij dwg mbouj gip mbouj muengz gangj:"Fanjcingq mbouj dwg gou,gou mbouj rox."Mwngz mbouj gangj,dwg lwi?Gou caiq cam boux daihngeih.Gou da lumj fag cim,yawj gvaq Lienghgauq bae cam:"Dwg mwngz lwi? Lienghgauq."Lienghgauq baez saenz:"Mbouj dwg gou,gou mbouj rox." Gou da doek roengz Swhmeiz gwnzndang,cij raen Swhmeiz da ronghsiksik,ndaw da daiq riu,baet fwngz ngwdngwd gangj:"Gou mbouj rox."Gou vangh da he daengx ban,boux boux cungj baet fwngz gangj:"Gou mbouj rox."                 Caiq cam hix cam mbouj ok gijmaz daeuj lo,gou couh gvengq gawq vah he:"Ndaej lo,caj gaujsiq sat le,boux boux cungj mbouj hawj ma ranz,cienz ban louz roengzdaeuj,gou couh yawj mwngz rox mbouj rox."                  Diemj  buenq cung gig vaiq couh gvaq bae lo,gou cix mbouj haeujsim gienh saeh neix geijlai lo.Mbouj caengz lwq daengz,couh miz geij boux hagseng daeuj baugau:"Lauxsae,dwg Dohsiuh aeu dajhojgih daeuj,de coemh feiz le couh dawz hojgih gvengq roengz feiz bae coemh lo.""Lauxsae,gou gangj le,ndaej ma ranz caengz?"Lingh boux hagseng cam.Gou riunyumnyum dwk naeuz:"Ndaej lo,cuengqhag couh ndaej ma lo."                    Hagseng angq dwk buet ok bangunghsiz,gou sim naemj:"Gou mbouj rox,gou couh yawj mwngz rox mbouj rox."

gangjdoj

	Mwngz dwg raiz sawgun gonq, cix ei de hoiz baenz sawraeuz?              (mwngz dwg mbouj dwg sien sij hansw gonq, caiq ciuq de sij baenz sawcuengh?) mwngz dwg canghsaw? lauxsae?

tengweichan

	Gou dwg boux lauxsae minzcuz siujyoz ,son saw 15 bi,son liux 15 bi sawcuengh caeuq sawgun.