[原创]路漫文集：壮文的故事

路漫

	“人生七十古来稀”，当今社会上把这句话当做笑谈了，可以说七八十岁的比比皆是了。本人有幸跨进“古来稀”了，想想日后的日子不多了，应该把自己的文字拿出来“晒晒”，让贝侬们当做“文字”撩撩翻翻，也不失它的“价值”了。贝侬们翻过撩过，有什么话要说，尽量提出来，让我在“盖棺”之前有所了解。谢谢！ 这是的壮文故事部分——路漫文集：壮文的故事 1  GOJ  RIENG  VUNZ                Riuznaeuz,duzgaeng ngamq bienqbaenz bouxvunz seiz,caekhaex lij miz diuz rieng raezraez he. Diuz rieng neix lumj song fwngz bouxvunz seizneix nei gig lingzbienh,mboujdanh bin bya benz faex ndaej bang bouxvunz mbouj yungzheih byad,caemhcaiq lumj lai miz cik fwngz he nei vad nyungz baet nengz、hoenx bouxdig daeuj famh daengjdaengj,cibfaen mizyungh. Seizhaenx,ndaw ndoengfaex miz "ranz" vunz he,miz daxboh、daxmeh,lij miz daeglwg 、dahlwg he dem.             Ndaw ndoengfaex miz gijgwn gig lai,caen dwg mbouj yungh you gwn.Bingzseiz daihgya gwn imq le,couh dwg ra saeh guh'angq:Mizseiz aeu rieng doxngaeu daeuj dangguh "beng cag", mizseiz dawz rieng banq hwnj ngafaex bae caemz "bi nengq"------guhcaemz baeg le,dawz rieng venj ndang dwk gwnz gofaex,dauqdingq iet song fwngz roengz raemx bae lauz nyauh,roxnaeuz bae henz dah ndaw nywj gingz rieng fad duzdaek duzgvej.Daengx ranz vunz fouz you fouz heiq, cwxcaih dangqmaz. Ngoenz he,daeglwg caeuq dahlwg cingq lumj bingzseiz nei guh'angq cingq mizyinx,fwt yawjraen daxmeh boux dog he naiqniegnieg naengh dwk,najsaep nyaunyau,hoeng bingzseiz de cungj dwg nyaengq neix guh haenx mbouj sij yiet saek yaep ne.Daxboh geij ngoenz neix hix mbouj doengzyiengh,beizheiq gig gaenj,ciengzciengz gwn imq le couh ninz gik.Songde dauqdaej guh maz la? Dwg doxdwk roxnaeuz baenz bingh? Song beixnuengx lienzmuengz buet gvaqbae,doiq song bouxlaux cam neix cam haenx.Daxmeh danq gaemz heiq raezraez he,naeuz:“Lwg ha,meh mbouj lix ndaej geijlai ngoenz dem.”Daxboh youq henz dingqnyi le cix fatheiq,rongx naeuz:“Dai cix dai luve,danqheiq guh maz!” Song beixnuengx gig geizheih,cam bohmeh vih maz gangj gij vah mbouj ndeidingq neix.Daxmeh dawz rieng cihgeij iet okdaeuj,heuh lwg yawj,gej naeuz:“Meh lauxgeq lo,bwn gwnz rieng bienq ro bienq henj lo,neix dwg yaek dai hane,meh lix mbouj nanz dem.” Song beixnuengx dingq le gig simgaenj,couh hag bohmeh baeznaengz nei,dauqcawq bae mbaet aeu goyw ma,yaek hawj bohmeh yw rieng.Daxmeh raen le gikdoengh naeuz:“Lwg ha,gaej huk lai.Vunz geq le,bwn rieng couh aeu henj loenq,gijmaz yw hix yw mbouj ndei ha!”Daxboh youq henz youh rongx naeuz:“Dai couh dai luve,yw yw gijmaz!” Song beixnuengx mbouj fugheiq,songde naemj,yw mbouj ndaej raeuz couh cawz gij bwn henj gwnz rieng haih vunz neix bae! Ngoenz he,bohmeh ninz ndaek lo,diuz rieng dwgcaengz haenx iet youq henz ndang.Song beixnuengx doxyaeng ndei,caegcaeg buen daeuj haujlai haz sauj,cw hwnj gwnz rieng bohmeh bae,youh vanq hwnj mba iengcoengz,dawz feiz daeuj baez diemj,cij nyi “hu”sing he,bwn rieng bohmeh fwt coemh ndoq lo!Bohmeh rieng baez dot,hemq sing he couh yat hwnjdaeuj,hoeng gaenq mbouj gib lo,rieng ndoq le mbouj youqgaenj,rieng deng coemh remj le cix in dot dangqmaz,beij baenz bingh lij dwgrengz. Bohmeh rox lwg dwg simndei yaek gouq bohmeh,cix mbouj guhsing,doiq lwg mbouj ndaq hix mbouj hoenx.Song beixnuengx raen bohmeh in dot gig dwgrengz,simvueng lo,gipmuengz bae ra yw ma oep rieng bohmeh.Lij suenq ndei,mbouj geij ngoenz,rieng bohmeh couh giet gyaep ndei lo.Bwn rieng caiq mbouj raen hwnj lo,hoeng diuz rieng bienq ndongj lo,mbouj beij gaxgonq lingzbienh dem. Song beixnuengx gig ienqhoij,raen bohmeh diuz rieng gengget yaek naeuh mbouj naeuh haenx,songde youh doxyaeng hwnjdaeuj,naemj ok diuz“cawjeiq rwix”he daeuj:Songde caj bohmeh mbouj daih haeujsim,sawqmwh raemj goenq diuz rieng bohmeh bae!Bohmeh swenj dwk“nga”,cijraen song diuz rieng deng raemj goenq haenx menhmenh nod doengh hwnjdaeuj,yaep da he maj ok aen gyaeuj soemsi he daeuj,bienqbaenz duzngwz hung iet linx myadmyad, soh bongh coh song lwg“mbouj hauq”haenx bae!Song beixnuengx veq gyaeuj couh buet,lienzlienz heuh “gouqmingh ha,gouqmingh ha!” Lwg dauqdaej dwg noh simdaeuz bohmeh,bohmeh raen le hix simgip lo,yawjyawj duzngwz couh yaek haeb dawz rieng song boux lwg,lienzmuengz hemq naeuz:“Baet rieng bae,vaiq ndek rieng bae!” Song beixnuengx gipmuengz dawz rieng heux gaenj goek gofaex bae,haenqrengz baez ndengj,cungjsuenq dawz rieng beng goenq lo!Seizneix,song diuz rieng iq caemh menhmenh nod doengh hwnjdaeuj,menhmenh maj ok gyaeuj daeuj,seilwed baksieng vaqbaenz linx ndingndindi,yienghneix song duzngwz iq lingzloengz couh nod bae cimh duzngwz hung.Song duzngwz hung caeuq song duzngwz iq doxndiep yaep he,couh mbouj vueng mbouj muengz doxriengz nod haeuj ndoeng laeg bae lo. Daj neix hwnj,bouxvunz caiq mbouj miz rieng dem. Neix hix dwg vaq hux baenz fuk,bouxvunz mbouj miz rieng le,byaij loh couh engq lingzbienh lo,naengh gyawz hix couh fuengbienh lai lo,ndwn hwnjdaeuj couh beij gaxgonq engq soh engq cingsaenz lo. Duzngwz lumjbaenz mbouj muenx bouxvunz ndek rieng bae,doeklaeng seizseiz raen vunz couh haeb,ndigah vunz baez raen ngwz couh lau couh mbeiyup;vunz ne,laihnaeuz duzngwz yienzbonj dwg lwednoh gwnz ndang bouxvunz,seizneix fanj gvaqdaeuj cawqcawq yaep haeb vunz hix caen dwgcaengz,ndigah bouxvunz baez gaeb ndaej duzngwz,couh bok naeng gwn lwed gwn mbei gwn noh. Daengz laeng,vih ndoj duzngwz sienghaih,bouxvunz couh daj ndaw ndoengfaex buen okdaeuj,daengz henz dah roxnaeuz diegbingz dap diengz hwnj ranz,dingh youq roengzdaeuj. Aenvih gijgwn rog ndoeng beij ndaw ndoeng noix haujlai,yienghneix vunz cijndaej vuet nyaengq hai fwz,hag ndaem doenghgo.Ndaw ndoeng miz di doenghduz raen bouxvunz youq rog ndoeng gvaq saedceij haemq ndei,gyoengqde youh seizseiz deng duzngwz sienghaih,cix faenfaen deuz ok ndaw ndoeng,miz mbangj caemh caeuq bouxvunz buenx youq,neix couh dwg gij doihduz caeuq bitgaeq vunz ciengx haenx lo.

路漫

	2    Roek conq youzdiuz Ndaw faenjdiemq,dah iq ndeu dajgai youzdiuz.Goenggeq he byaij gvaqdaeuj cam:”Nuengx ha,diuz geijlai cienz?” Dah iq:”Cienz ngeih.” Goenggeq:”E,gou ndi cam gij naek,gou dwg cam geijlai cienzngaenz.” Dah iq:”Gou han mwngz goj dwg ngaenz go,it cienz cib faen,cienz ngeih dwg cib ngeih faen,cingq dwg gak ngeih ne.” Goenggeq:”O!------hawj gou cawx roek conq ba.” Dah iq:”Mwngz fatbag lu,cawx youzdiuz gangj geijlai ngaenz,ndi gangj geijlai raez,huk lai!” Goenggeq:”Doiq mbouj cawh la,gou gangj hix dwg ngaenz go,it conq cib faen,roek conq loeb cib faen,cingq dwg roek gak ne!” Dah iq dingq le,naj cix nyaenq mong seuq. [此贴子已经被作者于2009-11-17 22:55:02编辑过]

一知半解

	gij doihduz caeuq bitgaeq lau duzngwz haeb mbouj lau vunz gaj a? mbouj gvaq ni,aen goj neix miz yinx,ndei dingq raixcaix.

路漫

	3 Haeuxyangz Vihmaz Vahgun Heuh Yimij Youq Diegcuengh raeuz,cien bya fanh rungh,dieg sang raemx noix,ciuhciuh daihdaih cungj ndaem haeuxyangz.Baez daengz seizndat,souh haeuxyangz youh liengz youh van,dingj ndaej imq,siu ndaej hat,bouxboux cungj gyaez gwn. Haeuxyangz,vahgun heuhguh yimij,neix miz cit goj ndeu. Doenghbaez,miz boux vuengzdaeq ndeu,ngoenznaengz gwn raeng youq mbwq le,couh siengj bae youz bya lah rungh,langh aek langh sim. Ngoenz ndeu,de youz daengz diegcuengh raeuz,raenz gizgiz cungj faex mwn va rwenz,bya sang raemx saw,roeg heuh duzlingz diuq,rwi mbin mbungqmbaj foux,de yawj ndaej sim cungj maez bae. Seizhaenx cingq dwg ndwenloeg,daengngoenz hwnj sang le,ndit haenq lumj feiz,rumz ci gvaq naj lij hwngqfwgfwg.Vuengzdaeq yied byaij yied naiq,yaek siengj ra dieg yietyiet,hoeng byaij ha byaij ha,mbanj mbouj raen mbanj,ranz mbouj raen ranz,hanh hix doek,hoz hix hawq,ga hix naet,dungx hix iek,yamq din yaek mbouj doengh lo. “Aiya!”Vuengzdaeq gyangz gaemz ndeu,naenghyungq gwnz namh,hemq naeuz,”Gou yaek dai lo!” Gyoengq bouxgaen raen le cungj simvueng liux,vuengmuengz hawj vuengzdaeq dub hwet nyaenj ga,dwk beiz gemz sa,vuengzdaeq lij gyangz mbouj dingz:”Gou dwgrengz lai,dai bae cixbah!” Canghyw riengz daeuj haenx hawj vuengzdaeq dawz meg yawj saek,caz linx diemj ndang,hix dwg byongh hwnz gwn maenz naeuh,mbouj rox gyaeuj lawz haeu,caz mbouj ok vuengzdaeq fat gijmaz bingh. Cingq youq seizhaenx,miz boux buzgeq ndeu raek mbok souh bae reih,byaij gvaq gizneix,raen gyoengq vunz neix gaz loh,couh naeuz:”Nyapyaj laengz gyang dah,ma rwix naengh gyang roen.Sou youq neix guh maz?” Bangxrik miz vunz dingqnyi buzgeq gangjvah mbouj ndei dingq,cix haep naeuz:”Gaej bak raeh!Vuengzdaeq miz bingh gip,gangj loek dik mwngz dai!” Buzgeq dingqnyi naeuz “bingh gip”,hix mbouj guenj miz vunz haep,mbek hai gyoengq vunz haeujbae baez yawj,cij raen vuengzdaeq naj nding,da saw,bak rengj,gen ga unq,nyaenx mbouj ndaej haha naeuz:”Neix suenq gijmaz bingh,sou yawj gou!” Buzgeq gangj le,dawz mbok souh roengzdaeuj,raix vanj souhyangz ndeu ndenq hawj vuengzdaeq,vuengzdaeq raen vanj souhyangz neix mbouj saw mbouj hawq,youh hau youh rang,ngveih haeux lumj naednyawh,raemxreiz lumj dangzrwi,cacaemj cix ndoet cix gwn.Vanj souh ndeu roengz dungx le,vuengzdaeq lumjbaenz ndaej gwn siendan nei,bak hix gam,da hix raeh,gen ga hix ciemhciemh miz rengz lo. Yienzlaiz vuengzdaeq lawz miz gijmaz bingh!De cij dwg ngoenznaengz byaek daengz daiz ngaiz daengz bak,laeuj daengz naj caz daengz fwngz,ciuhvunz caengz rox gijmaz heuhguh dungx iek hoz hawq.Ngoenzneix benz bya gvaq rungh,ndit dak rumz ci,dungx youh iek,hoz youh hat,cij roxnyinh daengx ndang dwgrengz,gen ga unqnueg,couh laihnaeuz deng gijmaz bingh naek lo. Vuengzdaeq gwn gvaq souhyangz,mienhmienh dauq miz cingsaenz,couh laihnaeuz buzgeq dwg yahsien,lienzmuengz gvih roengzbae,ngaek gyaeuj docih naeuz:”Daihsien gouq mingh gou,ciuh neix mbouj lumz!” Buzgeq youh raix vanj souhyangz ndeu hawj vuengzdaeq,eu fwen naeuz: “Dou beksingq guh hong,     Haeuxyangz ndong gvaqseiq; Lwnh mwngz boux vuengzdaeq,     Yaek geiq ndaej lwgminz.” Vuengzdaeq youh cien docih fanh docih,vix vanj souhyangz cam:”Neix dwg gijmaz bauj?” Buzgeq dingq vahgun mbouj rox geijlai,laihnaeuz de yaek aeu souhyangz dem,naemj daengz vuengzdaeq ngamq dungx iek gvaq bouh,gwn gip lai lau saej dajgeuj,cix han naeuz:”Ndi miz.” Vuengzdaeq dawz vah “ndi miz” dingq baenz vahgun “yimij”, aenvih vahgun “yimij” eiqsei dwg “haeuxnyawh”,raen aen coh neix ndei,couh angq hemq naeuz:”Yimij,caen ndei!” Gvaqlaeng,bouxgun couh dawz haeuxyangz heuhguh yimij lo.      (Lij Faz soucomz) ------Gvangjsih minzcuz cuzbanjse 1989.1 [此贴子已经被作者于2009-11-18 22:37:09编辑过]

路漫

	6.Ra Simsangj Gaxgonq,miz boux vunzgik ndeu,ngoenz gwn raeng le,mbouj siengj guh saek yiengh,ninz lai hwet in,naengh lai ndang hix naet, ngoenzngoenz simfanz mbwqmbat,couh ok rog bae ra simsangj. Laj go’nganx,gyoengq lwgsau sing riu goksasa.De naemj:”Gizneix itdingh miz simsangj.”De couh bae daengz henz gyawj cam:”Sou baenzlawz ra ndaej gij simsangj neix ne?”Gyoengq lwgsau han naeuz:” Gij simsangj dou youq gwnz baengzva nei.”De dingq le,couh gouz gyoengq lwgsau son de ra simsangj.Gyoengq lwgsau couh dawz cim dawz mae daeuj hawj de,son de siuq va.De siuq ha siuq,siuq ndaej fwngz in da va,lij siuq mbouj baenz,couh raurumz baiqninz lo.Gyeongq lwgsau raen le,nyaenx mbouj ndaej riugakgak hwnjdaeuj.De ndatheiq naeuz:”Sinsangj hawj sou dawz bae liux lo,lij yaeuh gou.”Gangj le,ndek cim mae deuz bae lo. Ndaw hagdangz gyoengq lwgnyez angq dwk nauhnyied raixcaix.De naemj:”gizhaenx itdingh miz simsangj.”De youh bae daengz henzgyawj cam:”Sou baenzlawz ra ndaej simsangj,angq baenz yienghneix?”Gyeongq lwgnyez han naeuz:”Gij simsangj dou youq gwnz ceijhau neix!”De youh gouz lwgnyez son de ra simsangj.Gueongq lwgnyez couh dawz bit dawz maeg daeuj hawj de,son de sij cih.De sij ha sij ha,sij dwk fwngz naet da va,lij sij mbouj baenz,youh da naet baiqninz lo.Gyeongq lwghag raenz le cix baez hemq riu hwnjdaeuj.De ndatheiq naeuz:”Sou dawz simsangj bae seuq lo,lij yaeuh gou!”Gangj le,youh ndek bit maeg deuz lo. Laj dinbya,gyeongq vunzgoeng “hu—vei,hu--vei” hemq dwk goksasa.De naemj:”Gizhaenx itdingh miz simsangj.”Couh sikhaek buet bae cam:”Dingq gij sing hemq sou,itdingh dwg ra raen simsangj ba?” Goenggeq ndeu riunyumnyum han naeuz:”Mwngz gangj ndaej deng, simsangj youq gwnz dinghbya,dou cingq ram faexloz bae coh de ne,mwngz bae lwi?”Dingq naeuz simsangj youq dingjbya,de sim maengx raixcaix,couh riengz gyoengq vunzgoeng caez ram faexloz hwnj gwnz bya bae. “Hu—vei!”hwnj din lo,gyoengq vunz caez sing baez hat,coh dingjbya bae fwdfwd. Bin ha bin ha,yied bin roen yied lingq,yied bin bya yied sang,yied bin mbaq yied naet.De ienqhoij lo,nambumzbumz naeuz:”Ra simsangj baenzlai dwgrengz,deng sou swiqngaek gou liux,gou mbouj ram lo.” Goenggeq youq baihlaeng sikhaek haep de naeuz:”Ram faex mbouj caezsim,boux ndeu soeng mbaq cungqvunz laemx.Laj din dwg rij laeg,mwngz siengj vutmingh ha?”De mbouj miz banhfap,cij ndei haebheuj ram hwnjbae. Cungjsuenq ram daengz gwnz dingjbya lo,faexloz baez roengz mbaq,de heiq gip ndang naiq,dungx iek hoz hawq,boeknyoek naemgh laj gozreiz mbouj nyienh cangh lo.Goenggeq daek vanj souh saw hawj de,naeuz:”Gwn geij gaemz souh saw,yaep he couh raen simsangj lo.”De ndoet gwn geij gaemz souh,raq rumzliengz ci daeuj,cix roxnyinh bak gam,ndang liengz,rengz dauq,simsangj,de angq dwk hemq hwnjdaeuj: ”Sangj lai lo!”Goenggeq youq henz ndang ngaekngaek gyaeuj naeuz:”Deng lo,simsangj cuh yienghneix daeuj!Mbat laeng mwngz rox ra simsangj luba?” (goj ndawbiengz) (Lij Faz hoiz)

路漫

	4 Yahvaiz yw gyaeuj Ngoenz ndeu,Dahhaj youq ndaw lueg ciengx vaiz.Ndwenngeih nda gvaq,cingmingz caengz daengz,va cingq hai rwenz,nywj cingq maj mwn,duzvaiz cwxcwxcaihcaih gwn nywj.Ndit raeuj rumz liengz,Dahhaj naengh youq laj gofaex mbaen ndaij sat cag. Sawqmwh,Dahhaj dingqnyi sing heuh:”Nuengx ha,gwn ngaiz caengz?” Dahhaj ngeux gyaeuj baez yawj,naj cix bienq lo,cij raen meh yahvaiz ndeu naj reuqrat,gen bwnnyat,riuvaivai byaij gvaqdaeuj.Dahhaj rox deuz mbouj gib lo,hixnaengz naengh maenh mbouj leix de. Yahvaiz daeuj daengz gyawj,raen Dahhaj naj hoengzmaeq,noh hausek,ndang bizbwd,myaiz cix rwi roengzdaeuj.Duz ndaw hoz gag naemj:Ndaej gwn dah neix dai bae da hix laep lo. Yahvaiz iet fwngz bae couh dawz gen Dahhaj,Dahhaj baez hwnj ndang,da yawj gyaeuj yahvaiz,ndaw sim naemj ok diuz geiq ndeu,couh doq riu doq doiq yahvaiz gangj:”Gyaeuj mwngz miz raeu,byoem mwngz yungqnyat,gou bang mwngz ra raeu roi gyaeuj ba!” Yahvaiz naemjungx caengz iek geijlai,caih mwngz miz fwed hix mbin mbouj deuz,roi gyaeuj ndei le caiq gwn hix mbouj ceiz.Yienghneix duz couh han naeuz:”Mwngz caen gvai,vaiq roi ba!” Dahhaj heuh yahvaiz naengh youq laj goek gofaex,naeuz:”Mwngz naengh ndei,ing ganj faex bae,gou youq baihlaeng yaengyaeng roi.” Gangj le couh bang yahvaiz ra raeu,gaeu humz.Yahvaiz roxnyinh gig soengsup cwxcaih,couh menhmenh laep da bae.Dahhaj raen yahvaiz fwzfwzmwhmwh yaek ra ninz lo,couh caegcaeg dawz byoem duz cug geu cug geu lek hai,heux gvaq ganj faex,youh yungh ndaij cug dwk maenhndwt,couh sikhaek buet deuz. Yahvaiz dingqnyi sing yamq din,hai da ngeux gyaeuj yawj,byawz rox gyaeuj deng cug maenh youq ganj faex,cij rox hwnjdangq lo. Yahvaiz ndaq naeuz:”Mehma neix,gaeb dawz mwngz le guh gaemz ndeu gwn!”Hoeng Dahhaj gaenq yied buet yied gyae lo. Yahvaiz siengj ndwn ndwn mbouj hwnj,siengj ning ning mbouj doengh.Duz youh siengj daengz,danghnaeuz mbouj ganjvaiq deuz,     Dahhaj heuh vunz daeuj,couh deng moeb dai lo.Yahvaiz siengj yied lau,couh goq mbouj daengz get,haenq rengz rongx sing ndeu: ”Hei!”Baez ndengj ndeu,lienz byoem lienz naenggyaeuj cungj myonx bok lo,in dwk duz da ok feiz,lwed hix lae rim naj bae. “Gai gyu hw gai gyu!”Cingq youq seizneix,laj din ndoi miz vunz hemq.Yahvaiz mbouj sug vah vunz,dingq baenz “gai yw hw gai yw”,couh gipmunegz buet bae laj din ndoi.Yahvaiz raen boux gai gyu le couh cam:”Yw mwngz yw ndaej naenggyaeuj bok lwi?” Boux gai gyu yawjraen yahvaiz fwngz got gyaeuj,naj uq lwed,rox duz deng sieng lo,couh yaeuh naeuz:”Yw ndaej vei!” Yahvaiz angq raixcaix,couh cam de aeu yw. Boux gai yw couh daengq naeuz:”Hojlienz mwngz lai,soengq yw hawj mwngz mbouj aeu cienz.Hoeng gou mbouj bang mwngz dwk yw,mwngz gag bae henz vaengz ciuq yawj,raen giz sieng dawz yw moek roengzbae couh ndaej lo.”Gangj le couh gop gyu hawj duz. Yahvaiz ndaej gyu le,gipgip muengzmuengz buet bae henz vaengz,ciuq raen gi sieng le,sikhaek dawz gyu moek roengz diengjgyaeuj bae.Sawqmwh,yahvaiz aen gyaeuj youh sep youh manh,lumj deng cim camz cax heh nei.”Ai---ya!Get dwk gou yaek dai lo!”Yahvaiz dingj mbouj ndaej,diuq hwnj roux roengz,sawqmwh “doekgum” sing ndeu,yahvaiz doek roengz vaengz bae mued dai lo. (Lij    Faz soucomz)      ------Gvangjsih minzcuz cuzbanjse 1989.1 [此贴子已经被作者于2009-11-19 23:10:22编辑过]

伤疤好咯

	好象小时候听过。naemj ok diuz geiq ndeu----gaeh?gizgou gangj seih "gaeh" bw.

路漫

	7. Aungeih gai mou Cai linzsinh sij Lij Faz gaij hoiz Song bi neix daeuj,ranz Aungeih gaeq baenz bang,mou rim riengh,gwn ndei daenj moq,ngoenznaengz aj bak riu mbouj dingz. Hoeng,song ngoenz neix de simfanz najsaep,aenvih ndaw riengh miz seiq duz mou lwg oksiq,mbouj hawj gwn mbok. Sawqmwh,Aungeih siengj:Mou ngamq baenz bingh,lij yawj mbouj ok,ngoenzneix ngoenzhaw,dawz bae gai ba,mienx ndaej bingh dai lah riengh engq siedbonj lo.Dawz cawjeiq le,de couh gipgip muengzmuengz gaeb dawz seiq duz mou bingh hwnj hangz mou bae baij gai. Yaep he,miz dahsau rag gyaq ci doz aen gihsaegbuh ndeu byaij gvaqdaeuj,dingqnyi moulwg Aungeih hemq “iegieg”,cix dingz din cimyawj,riengzdaeuj couh hai bak cam naeuz:”Go he,moulwg neix gai roxnaeuz cawx?” Coenz vah dahsau ngamq dingz,Aungeih sikhaek naeuz:” Gai,gai,Gip aeu cienz yungh ne,gaen bak gak ngaenz,gai cienh lo!” Dahsau riujriuj songzmou,Cienzbouh gai hawj gou ba! Aungeih angqvauvau naeuz:”Mwngz dahsau caen rox ngonz mou,seiq duz mou neix ndang raez rwz duiq,bak coek bwn lwenq,ciengx maj vaiq!Seiq duz roek cib haj gaen naek,lingzdaeuz mbouj aeu,haj cib maenz ndaej lo,mwngz yawj baenz lwi?” Dahsau riunyumjnyumj mbon daeh aeu ngaenz,baez geq ngamq miz ngeih cib caet maenz caet.Aungeih raen le,sim liengz geij faen lo,hoeng,youh siengj daengz huq rwix nanz miz bouxcawx,sikhaek doiq dahsau naeuz:”Cienz mbouj gaeuq mbouj youqgaenj,gou riengz mwngz bae ranz aeu hix ndaej.” “Mazfanz go lubw!”Dahsau ngaekngaek gyaeuj naeuz. Aungeih bae daengz ranz dahsau,sim maqmuengh de vaiq hawj cienz couh deuz.Bouxlawz rox,aen gihsaegbuh iengj da vunz,ndaw mbanj saisai mbwkmbwk cungj buet daeuj humx dwk dahsau,cam neix cam haenx,angq baenz buenq ngoenz mbouj deuz. Caen mbouj yungzheih caj daengz cungqvunz angq sat sanq bae le,youh miz buzgeq ndeu daeuj ra dahsau,de danqheiq dwk doiq dahsau naeuz:”Saujseiq,gou caen boihseiz lo,ngamq daj gwnz haw cawx ndaej song duz moulwg,ma daengz ranz couh ngaebheiq mbouj cangh lo!” “Buzdaih,gaej gip,gou bae yawjyawj.”Saujseiq gangj le,sien dauj caz dawz ien,daengq Aungeih sien youq ranz naengh caj,yaep ndeu couh dauq. Saujseiq riengz Buzdaih okbae le,Aungeih lumjbaenz bouxngoemx gwn lwgndiq,bak haemz gangj mbouj ok,aen sim diuq hwnj diuq roengz,baenzlawz naengh ndaej onj?De yamq din byaij ok doulaeng,lad ranz caezcupcup ndeu ingj haeuj da de daeuj,gij ranz haenx gek baenz fungh baenz fungh hausagsag,ronghswgswg,ngeih sam cib duz mou hung baizladlad,duzduz hoengzmaeq bizbwd.Ndaw gungx lij miz fungh ranz ndeu,venj miz gep benq hau,gwnzde sij cih hoengz:”Ranz gekleiz”, ndaw de seiq duz mou,ga saenz rieng boeb,myaiz rihdigdig,cingq dwg moulwg Aungeih gai daeuj haenx! Aungeih baez yawj cingcuj,sim engq liengz lo,gag naeuz:”Dwg mbouj dwg dahsau neix yawj ok dwg mou bingh,youh gyajcang cawx ma ranz,mingzmingz dwg siengj dawz gou soengq bae sicangz guenjveij,aeu gou sij genjdauj fad cienz gou?Yiemj lai hw!Seizneix de caengz dauq ranz ganjvaiq gaeb mou deuz baema ba!” Aungeih cingq yaek gaeb moubingh de seiz,sawqmwh,dingqnyi sing Saujseiq caeuq buzdaih gangjvah,Buzdaih itmienh byaij haeuj ranz itmienh hozndat ndaq mbouj dingz:”Fangz dawz haenx gai mou,sim nduk sim naeuh!Gou rom baenz buenq bi gyaeqgaeq,de nyaenxsim gai mouraq hawj gou!Raemj gyaeuj neix,gwn cienz bouxlaux,hozfoeg hozgoenq!” Saujseiq yienq buzgeq naeuz:”Buzdaih,gaej ndaq lai,boux gai moubingh hix miz geij cungj vunz……”Aungeih dingq daengz neix, nyaenx mbouj ndaej dap naeuz:”Suenq gou loek ba,sou dawz gou bae sicangz guenjveij,fad cienz naengh lauz cungj ndaej!” Saujseiq lienzmuengz geq naeuz:”Go ha,mwngz gaej gvaiq loek vunz,moulwg mwngz gou caensim cawx dingh lo!” “Mwngz yaeuh vunz!Ranz mwngz ciengx mou ……” “Mbouj yaeuh mwngz!”Aungeih caengz gangj sat,Saujseiq cap bak naeuz:”Gangj saedcaih ba,gou yawj ok moulwg mwngz miz bingh, lauheiq bouxwnq cawx baema mbouj rox,mbouj ndaej gibseiz yw,dai le mbouj suenq,bingh lah baenz mbanj baenz rungh,saehcingz couh hung lo. Ndigah,gou couh cawx ma ranz gekliz daeuj yw.” “Gou caen huk ha!Gou doiq mbouj hwnj beixnuengx,doiq mbouj hwnj dangj!Dangj heuh raeuz gaenxhong fatcaiz,beixnuengx caez doxbang doxgyaez,dan gou dwg……”Aungeih najnyaenq raixcaix, ienqhoij cihgeij daiq seihsei,cix doiq Saujseiq naeuz:”Seiq duz moubingh haenx gou mbouj aeu cienz lo,mwngz bang gou yw,cienz yw gou ok.Yw ndei le,soengq hawj Buzdaih ciengx;yw mbouj lix,dai le suenq duh gou .gou bau dawz bae moek!” Buzdaih dingq le,gamjdoengh dwk raemxda cix iemq okdaeuj lo…… (Bauq Sawcuengh B.1983Nd.12 Ng.24)

路漫

	gangj ndaej deng,seizneix caiq mbouj miz saw gojgaeq ok lu.

勒丁布壮

	Gojgaeq yinx lai! Doeg gojgaeq,ngeix ciuhvunz ne! Hojsik, seizneix siengj ra bonj saw gojgaeq Sawcuengh ndeu, nanz guh lailai ha!

路漫

	8.Song Ndik Raemxfwn (goj lwgnyez) Mae cien mae fanh,doek roengz namh mbouj raen. Coenz vahduenz neix cai raemxfwn.Raeuz couh daeuj gangj aen goj song ndik raemxfwn ba. Daegdiemjiq caeuq diemjdaeg’iq dwg ndei baengzyoux,songde daj lij saeq couh maengx daengzcog hung le guh saeh mbwk.Youq gyang mbwn,rumz dwg mbuk,mok dwg cij,songde yied ngoenz yied hung lo. Ngoenz he,raq rumz ndeu,Daegdiemjiq caeuq Diemjdaeg’iq caez doek roengz lajnamh daeuj.Daegdiemjiq doek daengz gwnz loh gonq,lij caengz ndwn maenh couh deng gij faenx nanwk haenx dawz humx lo.”Aiyu!Dwglau lai!”Diemjdaeg’iq raen le baez hemq,simyupyup riengz rumz buet deuz lo.Daegdiemjiq mbouj lau,haenqrengz baez ndengj,dawz gij faenx dongj dwk lakhuhu.Faenx yienznaeuz mbang, hoeng doiq Daegdiemjiq baenz saeq,hix deng benq diegsa gvangqlanghlangh.Daegdiemjiq mbouj simnaiq,de hatrengz roux gvaq gwnz faenx,coh baihnaj ruenz bae ruenz bae…… Seizhaenx,Diemjdaeg’iq riengz rumz mbin ha mbin,doeklaeng doek youq duj va’ngaeuz ndongqmoq ndeu.De ninz youq gwnz lumqva, daekeiq vauvau riu Daegdiemjiq naeuz:”Mwngz huk lai ho,lawz sinsin hojhoj bang vunz dongj faenx ne!Mwngz yawj gou,vamoq caeuq gou doxbuenx,rumzliengz hawj gou vad beiz……” Daegdiemjiq mbouj leixlangh de,cijguenj ngaem gyaeuj baenaj. Cungjsuenq dawz gij faenx dongj seuq lo,Daegdiemjiq angqyangzyangz lae roengz dahhung bae. Fwn gvaq ndit ok,daengngoenz dak gwnz deih ndatyanyan. Raemxnaz mboek lo,namhnaz deng hawq bak dekaq.Raemxdah lae haeuj naz bae,Daegdiemjiq hix caez lae daeuj,de ndatsim dawz daengx ndang bae nyinh namhnaz…… “Daegdiemjiq,docih sou lo!”Namhnaz simhai naeuz. “Gaej cih!Gouq gohaeux youqgaenj!”Daegdiemjiq nyaengqlinzlinz lae bae lae dauq,vih dingj rengx lai ok di rengz.Seizneix,de fwt geiq daengz Diemjdaeg’iq,hai da muengh bae,cij raen youq laj daengngoenz, duj va’ngaeux haenx gaenq reuq dwk duiqduddud,Diemjdaeg’iq hix deng fwi bae,mbouj raen ingj mbouj raen riz.

路漫

	9.Hozhanq Gaeuyiengz Roegyaemyieng Bouxlawz singqcingz numqnumq nwtnwt,vunz dongx de,de mbouj swt mbouj leix,cungj vunz neix deng vahsug naeuz guh “hozhanq raezrwt, mbouj swt mbouj leix”.Bouxlawz singqcingz nyengjgeng mbouj haengj gap vunz,vahsug couh naeuz guh “gaeuyiengz gyujgywd,guhdog guh dan”.Bouxlawz ndangdaenj moqsup,vahsug couh heuhguh “yaemyieng ndongqgywd,buh loeg buh va”.Hoeng,mwngz rox lwi?Gij vahsug neix lij miz aen goj mizyinx ndeu ne. Doenghbaez,Yingdaiz caeuq Sanbek youq ndaw sawguenj doxndei, hoeng,Yingzdaiz deng ranz max aeu nienzmingh bae,Sanbek aeuqheiq raixcaix,couh deuz okrog bae.Yingdaiz rox le,simgip dangqmaz, gipmuengz okbae ra de.Yingdaiz byaij ha byaij ha,cungj mbouj raen saek vunz.Youq byongh loh,de nyangz duzhanq he,couh cam naeuz: ”Hanq ha,mwngz raen Sanbek gou lwi?”Duzhanq mbouj swt mbouj leix,yaep naih he cij heuh fwen naeuz: “Ngoenz ngah lai,ai gou laux;ra bae youh ra dauq,coq dungx laux mbouj rim.Ngoenz lauh laj lauh gwnz,byawz rox mwngz ndwet youx?” Yingzdaiz raen duzhanq baenzneix fouzgyauq fouzlaih,haemq ndatheiq, cix eu fwen naeuz de: “Hanq ha hanq,ngoenz youz dah lajmbanj;benq bak mbouj rox gangj, manz gijmaz dauhleix?Mwngz hozbiet simrwix,baenz yienghneix fouzcingz!” “Ok—at!”Duzhanq baez hemq,naeuz:”Mwngz ndat mwngz cix ndat,gou gikgyak bae dingq!”Yingdaiz nyapnyuk lo,baez vax dawz hoz hanq, duzhanq bae ndengj,aen hoz de couh deng nod raez lo.Daengz seizneix,hozhanq couh daegbied raez. Yingdaiz youh byaij baenaj,nyangz duzyiengz he,couh cam:”Yiengz ha,mwngz raen sanbek gou lwi?”Duzyiengz ndiengqndiengq mumh,eu naeuz:”Ngoenz gou youq bangx bya,ra nywj gwn mbouj imq;ngoenz gou youq bangx lingq,mbouj nyinh mwngz bouxlawz,bae gyawz raen mwngz youx?” Yingdaiz raen duzyiengz baenzneix mbouj nyienh leixlangh vunz,gig hozndat,couh eu naeuz:”Yiengz ha yiengz,lieb biengz gwn mbaw faex, lawz ndang dog baenzneix,mbouj rox leix baengzyoux” “Mbe---“ Duzyiengz mbouj naihfanz dingq,nyeng gaeu yaek deuz,Yingdaiz fwngz riengj vax dawz gaeu de,duzyiengz nyengjgengz baez fid,aenvih Yingdaiz gaem ndaet lai,gaeu yiengz cix deng niuj gyuj lo.Daj neix le gaeu yiengz cungj seih gyujgywd. Yingdaiz byaij bae daengz henz dah,raen doiq roegyaemyieng he youq ndaw dah youz raemx,couh cam naeuz:”Yaemyieng ha,mwngz raen sanbek gou lwi?” Yaemyieng dingqnyi le,gipmuengz youz gvaqdaeuj lwnh:”Youq sam ngoenz gaxgonq,dou romh daeuj you cet;raen bouxcoz gvaigvet,yetyet gvaq dah bae;cam de miz maz saeh,danqheiq dwen Yingdaiz.” Yingdaiz dingqnyi le,angq raixcaix,gamjcih yaemyieng simndei rox laex,couh daj ndaw baufug mbon song geu buh couzva okdaeuj,soengq hawj doiq roegyaemyieng haenx,lij eu naeuz:”Yaemyieng caen simndei, soengq buhsei hawj mwngz;caih ngoenz ndit ngoenz fwn,mbouj lau dumz daengz ndaw.” Yienzlaiz roegyaemyieng bwn mongmo,mbouj daih ndeiyawj,daj daenj buh couzva Yingdaiz soengq hawj haenx le,couh bienqbaenz gij roeg ceiq gyaeundei lo.Seizneix,bouxlawz mbouj gyaez gij saekdauh gwnz ndang yaemyieng ha!

mgw5_05

	支持路漫beixnuengx。很好的文章。

路漫

	11 Guh Gyaj doek Hoengq Doiqnaj swnghhozgih henz gwnzgai,Ndaekgyaeujhung hai aen diemq gai ienlaeuj he.Ndaekgyaeujhung gyaeuj mbouj hung, hoeng aen uk miz “fangz“lai,ndigah vunzraeuz cungj heuh de guh  “ndaekgyaeujhung’. Gangj “fangz”,cix dwg miz di saeh vunzraeuz naemj mbouj daengz,decungj naemj daengz caemhcaiq guh daengz haenx. De ngamj yienghneix guh,hix dwg “seiqhenz guh baenz”.Naj diemq de miz go reiz hung ndeu,laj goreiz miz gij daiz daengq de cuengq haenx,cienmonz hawj vunz gwn caz,ndoet bizciuj.Mwngz naemj, ndaw swnghhozgih youq vunz maz,banhaemh riuj laex naek daeuj neix youh dwg vunz maz,gij vunz neix ciengzciengz daeuj daengz laj goreiz naj diemq yietnaiq,ginggvaq yawj naj yawj laeng naemjnaemj gvaq le,cij caegcaeg ndonj haeuj dou hung swnghhozgih bae. Ndaekgyaeujhung rox,gij vunz neix gig yawj naek “laex”,”saeh” gyoengqde banh ndaej miz di raemhngaeuz le,couh aeu gya naek “laex”,sien dwg cingj “swiq din”,”dajcaemx”gvaqlaeng couh…...yienghneix,Ngaekgyaeujhung “seng’eiq” couh daeuj lo------De rox hawj boux gwn “set” haenx mbouj miz saek di yousim caemhcaiq bae “yiengjsouh” cungj “swnghhoz” raen mbouj ndaej vunz haenx. Cawz neix le,Ndaekgyaeujhung gai ienlaeuj “fangz” de hix daegbied lai.Daihgya cungj rox,seizneix soengq laex noix mbouj ndaej ien laeuj,lij dwg ien bengz laeuj ndei,aen swnghhozgih neix, boux sou laex gwn yungh “mbouj liux” haenx,ciengzciengz dawz daeuj “gai” hawj Ndaekgyaeujhung;gij bingz hoengq caeuq gij hab hoengq haenx,hix ciengzciengz dawz daeuj “doiq” hawj Ndaekgyaeujhung. Yienghneix,diemq ienlaeuj Ndaekgyaeujhung couh baenz le ien bengz laeuj ndei “diemq cien gai”.Haujlai vunz baez daih’it soengq laex,ciengzciengz fwngz byouq daeuj,sien youq naj diemq Ndaekgyaeujhung yawjyawj cingzgvang,（Miz seiz lij ndaej Ndaekgyaeujhung “sonyinx”）cij laeng Ndaekgyaeujhung cawx ien awx laeuj le yienzhaeuh bae soengq laex.Aenvih ien bengz laeuj ndei “seng’eiq”daegbied ndei,dan guh swnghhozgiih sengq’eiq huq gaenq mbouj gaeuq gai,yienghneix Ndaekgyaeuj hung gij “fangz” de youh miz yungh lo.De dawz gij bingz hoengq ,hab hoengq ndaw swnghhozgih “doiq” hawj de haenx cang moq,dwk haeuj gij ien laeuj bingzciengz,mauhbaiz ien bengz laeuj ndeidaeuj gai.Dangyienz de doiq gij vunz daeuj cawx ien laeuj haenx yawj vunz dingq yaem,huq gyaj gai hawj byawz mbouj gai hawj byawz,ndawsim de miz soq,ndigah ciengzciengz ndaej cw gvaq da vunz mbouj doekhoengq gvaq. Saeh lajmbwn ciengzciengz dwg,mboujlau itfanh,cijlau fanh’it. Ngoenzhaenx,daeg mbauq he daeuj cawx ien laeuj,naeuz aeu cawx ceiq bengz ceiq ndei haenx.Ndaekgyaeujhung yawjyawj ndangdaenj daegmbauq,dingqdingq vahyaem daegmbauq,couh gai huq gyaj hawj de. Mboujliuh daeg mbauq haenx dwg nuengxbiuj Liuz gohcangj, Liuz baez raen nuengxbiuj cawx ma huq gyaj,ndatheiq dangq maz,dawz bae ra Ndaekgyaeujhung.Ndaekgyaeujhung baez raen ganjvaiq ngaek gyaeuj gungj hwet daeuj boizlaex,hoeng Liuz gohcangj mbouj yungz mbouj nyiuz,aeu rag Ndaekgyaeujhung bae gunghsanghgiz.Ndaekgyaeujhung unq lo,nyienh ciuq sam boix daeuj boiz. Doeklaeng,Ndaekgyaeujhung vih bauj “seng’eiq”,baez raen Liuz gohcangj couh coh de ngaek gyaeuj cam ndei,oet geij bau ien bengz nden bingz lawuj ndei……De gannaeuz yienghneix couh ndaej bauj seng’eiq aen diemq de bingzan guh roengzbae.Hoeng vaihsaeh guh daiq laid eng vunz haemz,aen diemq neix gai huq gyaj deng vunz gauq daengz gunghsanghgiz,yingjyangj gig rwix. Mbouj geij nanz aen diemq de deng gunghsanghgiz fung,huq ndaw diemq hix deng gyausou. Cingqcaen dwg guh vunz aeu guh vunz cingqging,guh gyaj daengz laeng cix doekhoengq.

路漫

	Roet Oenq Dungx Ma Doenghbaez,haeux mbouj gaeuq gwn,ciengzciengz aeu lwgmaenz daeuj lawh haeux guh donq。Vunz ciengz naeuz,gaen maenz sam mbung roet. Haemh he,gyoengq vunz naengh youq gyanghongh daj rongq,,cingq faengz ndaej nauhnyied seiz,sawqmwh miz duz malwg he buet haeuj ndaw gyoengqvunz daeuj,baet rieng deihdigdig,caemhcaiq “w___w___”hemq mbouj dingz------ Gyoengqvunz roxnyinh geizheih,couh mwngz coenz gou coenz doxcam hwnjdaeuj,”Duzma daeuj ra dwzvu luba?” “Byawz daiq duznyaen daeujj?””Byawz ok haex dwk vaq?” Ndaek vunz he fwt riuhaha naeuz:”Mbouj!Dwg gou ok roet!” Doeklaeng,couh cienz roengz coenz vah he:Hoet oenq dungx duzma,duz swenj nga swenj ngwngq.

路漫

	Gwn Faengx Gik Gej Cag Doenghbaez,miz ndaek vunz he gik daengq mou,haeux soenq daengz bak cij hai bak gwn.Yah de cawj souh de gwn souh,cawj ngaiz de gwn ngaiz.Danghnaeuz miz saek baez mbouj ndaej hoengq cawj,de hix mbouj gwn,ningz nyienh gak dungx. Yienznaeuz yienghneix,hoeng yah de caemh in de,cawj maenz bang de mbek naeng,gwn gyaeqdumq bang de mbek byuk,miz seiz de lij yiemz yah de guh ndaej menh, fatheiq dengdeng dem. Bi he haemhndaep,yah de nyaengq yaek dai,de lij ninz mbouj hwnq,Yah de huj dangqmaz,naeuz de de cang ninzndaek,ndaq de de cang rwznduk,yah de saedsaeh yawj mbouj roengzbae lo,couh hawj de guh mbat haemz he. Dwkcuengq hawj mangh(cojgoeng)gvaq he,yah de dawz noh bya gaeq daengjdaengj baij youq gwnz daiz,daegdaengq mbouj ronq,couh heuh de daeuj gwn caeuz.De daeuj daengz baez yawj:Gaeq baenz duz,bya hix baenz duz,noh baenz ndaek……De ndatheiq lo,naeuz gou mbouj gwn byaek,gou gwn haeux ndwi! Yienghneix de couh dawz vanj bae daek haeux,byawz rox,mbouj miz haeuxngaiz,dandan miz faengx!De dawz aen faengx he fan hwnj fan roengz mbouj rox baenzlawz gwn,yah de youq henz naeuz:”Gej cag mbek rong couh ndaej gwn lo.”De naeuz:”Lij aeu gej cag ha,caen dwg duet vaq ok roet!”Ndigah haemhndaep de ijndei gak dungx lo. Doeklaeng vunzraeuz dajbeij vunzgik naeuz：Gwn faengx gik gej cag.

路漫

	Mwngz Cam San De Han Seiq Doenghbaez,miz song boohlwg youq mbwq le,couh dox cam guhcaemz,daxboh naeuz”Daegniq ha,gou cam mwngz, mwngz rox mbouj rox ne?” Daeglwg han:”Mwngz lij caengz cam,baenzlawz naeuz gou mbouj rox ne?” “Lwg gvai gou,mwngz caen rox gangj.”Daxboh riu naeuz,Gou cam mwngz,mwngz rox mbouj rox,fajdin vunz vihmaz coh baihnaj maj ne?” “Hukhak!”Daeglwg ngeix hix mbouj ngeix,couh han lo” baiihlaeng bouxvunz mbouj miz lwgda,yawj mbouj raen roen,ndigah cijnaengz maj youq baihnaj.” Daxboh bibi gyaeuj naeuz”Mbouj dwg hane.danghnaeuz fajdin maj youq baihlaeng,vunz buet seiz,boux buet baih laeng couh yungzheih caij deng,rox lwi?” Daeglwg ngeixngeix le,lij naemj mbouj dong,youh cam: ”Baenzneix gangj,gou youh cam mwngzujrez vihmaz duj he maj youq baihswix duj he maj youq baihgvaz?Mbouj maj youq giz ndeu ne?” “Hukngawz lai lo.”Daxboh dingq le riusogsog,han naeuz: ”danghnaeuz maj youq giz ndeu,couh yungzheih doxhoenx,couh lumj mwngz caeuq daegbeix mwngz nei,rox mbouj rox?” Daeglwg dingq le yaep da dupdup,lienzmuengz youh cam:”Mwngz gangj yienghneix,gou dauq cam mwngz: Dujrwz gou caeuq dujrwz mwngz mbouj maj youq giz ndeu ha,vinmaz mwngz youh ciengzciengz hoenx gou ne?” Daxboh mbouj rox han lo…….

路漫

	Mbouj Lau Fangz Miz ndaek caeg he banhaemh cang fangz bae guhcaeg. Mboujliuh,deng bouxcawj fatyienh le,couh swenj miz caeg haeuj ranz lo,miz caeg haeuj ranz lo. Ndaek caeg buet mbouj gib,couh boemz haeuj gungxdou ndoj hwnjdaeuj. Bouxcawj diemj daeng ok dou daeuj rongh yawj,cix mbouj raen miz maz,yienghneix couh gag gangj gag naeuz:”Caen dwg doengxngoenz raen fangz lo.” Ndaek caeg dingq le,hwk dwk yaek dai,menhmenh nu da, raen rongh daeng laihnaeuz dwg rongh ndit,doq danqheiq gag naeuz :”Mbwn cungj rongh lo,gvaiq mbouj ndaej de mbouj lau fangz ne!” Bouxcawj ra mbouj raen caeg,gven dou couh haeuj ranz lo,ndaek caeg neix fouznaih cijndei byaij deuz lo. Ndaek caeg neix byaij ha byaij ha,couh byaij daengz benq dieg moh he.Seizneix de youh dungxiek youh hoz hawq,fwt mup daengz raq heiq laeuj he,dingz din roengz daeuj baez yawj,laxlawz dwg gyoengq fangz he ceng gwn faenh caeq ndeu. Ndaej raen miz laeuj youh miz noh,de goq mbouj ndaej dwg fangz mbouj dwg fangz,hix caenx haejvae caez ciengj gwn. Gyoengq fangz nyouq ok gwnz ndang de miz hanh,rox de mbouj dwg fangz,couh yaek gyaep de deuz:”Gijgwn neix dwg hawj duzfangz gwn hane,mwngz mbouj dwg fangz,geb viz mwngz deuz ba!” Ndaek caeg neix dingq le,ndatheiq lo,rongx naeuz: ”Byawz naeuz gou mbouj dwg fangz?vunz heuh gou guh fangziek,fangzngah,fangzguhcaeg hane!” Baez dingq de naeuz baenzlai fangz,gyoengq fangz deng hwk dwk cungj buet deuz lo.