北路壮剧《梁山伯与祝英台（选段）》
第五场
十八相送
土俗字编剧：黄志元
布依文转写：黄保华
[山伯、英台、四九、银心同上
Sis bux (camh weanl) :
Ndaangldoh os basdul,
ndaanglgvaail os xoftangf(raanzsel).
Yingldaaiz:
Jol liangfxungy ndiabtjaiz,
daaizdinl dauc songs nuangx.
Xanghbeeg:
Sancruangx(goljoic) camh deeuz saml ,
naanz lumz an nuangxgaus.
Yingldaaiz:
Liangfxungy ha,
mengz dazngoonz ndanlbol baaihgenz deel.
Xanghbeeg:
O,deengl jaaucyah feax aul fenz ndee.
yingldaaiz:
Xaxnauz nacnuangx deengl baz mengz ,
bix hax baangl miz baanel aul fenz ni?
Xanghbeeg:
Gocsiz nacnuangx deengl buxsaail,
mizxix bixgvaail xezxez yuans ndee.
Rauz byaaic mos ha.
Yingldaaiz:
Deengl ha.
wenzlaail(camh weanl):
Yaams diab yaams rauz bail ,
ronl jail rauz gaanc yaams.
Yingldaaiz:
Rauz yauh byaaic dangz bol fungqhuangfxany,
doh bol doh baanz riml walndingl ho.
Xanghbeeg:
Lacdih ndilximl walmoujdany,
mizyih(daangs) haec rauz bail beedt deel
jic nyiangs ndeeul dauc baanx fengz ha.
Yingldaaiz:
Raanz nuangx walmoujdany lix laail,
dees mengz bixgvaail gah dauc leeh.
Xanghbeeg:
Dangz ngonz bix dohsel daausbail deel,
lengcxih daaizdinl bail neenh nuangx.
Rauz byaaic mos ha.
Yingldaaiz:
Deengl ha.
(Camh weanl):
Miz byaaic yauh ronl jail,
miz bail goj labt hamh
Yingldaaiz:
Liangfxungy ha,
mengz dazngoonz jaangl dah deel.
Xanghbeeg:
O,soongl duez byalrianglndingl,
duez singl duez bail goons.
Yingldaaiz:
Dungxdoih gvas jeeh meez,
xinl naanz liez naanz byah.
Xanghbeeg:
Rauz goj dungxlenh leeux la,
rauz byaaic mos ha.
Yingldaaiz:
Deengl ha.
(Camh weanl):
Gvasdah leeux rauz bail,
daaizdinl rauz camh yaams
Yingldaaiz:
Liangfxungy ha,
rauz yauh byaaic dangz jeeuzfaixdoh mos la.
Xanghbeeg:
Deengl ha,
liez ndaix saaml ndanl bil,
ndil daaus raaih baiz mos ha.
Yingldaaiz:
Liez ndeax gaabt liez naanz,
ndaanglnaangz naanz ndaix raaih(gvas).
Xanghbeeg:
Nuangx ha,
gaaismengz saaml bil dohsel xinl yianywangj,
tangftangf buxsaail heeuh ndaanglgaus gueh maixnaangz ni.
Yingldaaiz:
Nacnuangx maaic gaangcreeul,
ndaixbeeul bix leg gvaais ha.
Xanghbeeg:
Nuangx ha,dangcnix xih dauc bix gamljeenl mengz
gvas jeeuz goons ha.
Yingldaaiz:
Jolmbaais liangfxungy.
[haec xanghbeeg ruz gvas jeeuz]
Liangfxungy ha,
niuflangf zifnij gyus mbenl saangl,
xeznix bixgvaangl daangs niuflangf,
zifnij meahnix deengl bix gaml,
ndaelsaml nacbix guehlaez neh?
Xanghbeeg:
Niuflangf zifnij jaaucyah sianl,
xianl bil goj naanz ndaix dungxgaabt.
Rauz byaaic mos ha.
Yingldaaiz:
Deengl ha.
(Camh weanl):
Lamxleedt gvas jeeuz saangl,
ndaanglgvaail rauz gaanc yaams
Yingldaaiz:
Liangfxungy ha,
rauz yauh byaaic dangz heenz ndanlmbos ramxsael la,
haec rauz gvasbail ngoonz mbaadtndeeul mos ha.
Xanghbeeg:
Bixnuangx xih dungxjaiz,
bail laez saml lix neh.
Yingldaaiz:
Xingc nacbix ngoonz sael,
dalmbael lumc maixnaangz.
Xanghbeeg:
Aaiya, gaaismengz nacnuangx huangytangf laail,
gaamc aul bixgvaail daangs maixnaangz.
Mengz zaiq nauz xonz ndeeul deeml,
bix xih miz songs mengz la.
Yingldaaiz:
Aaiya,deengl nuangx ndaix longl,
deengl nuangx ndaix longl,
xingc bix yianfliangq.
Rauz byaaic mos ha.
Xanghbeeg:
Deengl ha.
(Camh weanl):
Ngoonz mbos leeux rauz bail,ronl jail rauz gaanc yaams.
Yingldaaiz:
Liangfxungy ha,mengz dazyiamh(dazneenh),
genz ronl lix gol masbug xic,
heenz ric miz gol masngueh ndingl.
Xiz bix dal ximl ranl hozsaml,
nuangx yuans gaml fengz bix bail ngood.
Xanghbeeg:
Nuangx ha ,
masbug ndanl ndingl lix bux daez,
masngueh ndanl yaez(ndiljaiz) lix bux hah.
Hoxrauz osroh dohselsal,
dangzyiangh buxyal(buxens) aul mizbanz ndee.
Rauz byaaic mos ha.
Yingldaaiz:
Deengl ha.
(Camh weanl)
Yaams diab yaams rauz bail,
daaizdinl rauz camh yaams.
Yingldaaiz:
Liangfxungy ha,
baaihdeel lix ndanl raanzmeeuh ndeeul,
xingc bix camh bail baais Guanlyaml(guanyyiny) goons.
Xanghbeeg:
Deengl ha.
(soonl bux camh baais)
Aaiya, nuangx ha,
baais Guanlyaml deel deengl jaaucyah gvaanlbaz.
Hoxrauz soongl bixnuangx buxsaail goj(yej) baais guanlyaml,
banz mboonglreeul xeeuhreeuz feax la.
Rauz byaaic mos ha.
Yingldaaiz:
Deengl ha.(camh weanl)
Ronl gvas baanz daaml baanz,
byaaic dangz ndanl liangfdingf.
Xanghbeeg:
Byaaic dangz liangfdingf la,
haec rauz haucbail iadtnaais goons.
Yingldaaiz:
Deengl ha.
[hauc liangfdingf bail nangh]
Yingldaaiz:
Liangfxungy ha,
ngonzxez lumc ramx lail,
bilndianl bail miz daaus.
Fih ndaix hams bix ndil,
dingh baz ndil laez fih?
Xanghbeeg:
Dohsel saaml ndanl bil,
baz ndil fih ndaix hams.
Dees dohsel daausbail,
nacbix zaiq dajsuanq ndee.
Yingldaaiz:
Liangfxungy ha,
wois lix bux nuangx ndeeul,
meeh wois ul camh ngonz.
Xiz bix miz xianhxaz,
gaml gueh baz dungxgaabt,
nuangx ndalraabt byaaicjaangl,
bixgvaangl haauhlaez neh?
Xanghbeeg:
Jol nuangxdoh lix saml,
gaml nuangx haec bixgoy.
Raanz bix hoc lianz riangz(ndosndingl),
laaul hal beengz miz ndaix.
Yingldaaiz:
Xingc bixdoh cuanglsaml,
nuangx qyus langl cenfqianf.
Xanghbeeg:
Dangcnix xih jolmbaais nacnuangx miz leeux la.
Dees bix daausbail dangz,aanglfangz bail ranl nuangx.
Nuangx ha,meahtnix rauz xix dungxbyah goons la.
Yingldaaiz:
Bix ha,feax nauz,
ramx naanz ndaix byah waail,
waaiz naanz ndaix byah rungh,
xeznix nuangxgvaail naanz byah mengz ha.
Xanghbeeg:
Nuangx ha,ramx byah waail lix dumh,
waaiz byah rungh lix riz,
ngongzlangl bix lix daaus ndee.
Yingldaaiz:
Liangfxungy ndil byaaic.
Xanghbeeg:
Nacnuangx ngonzlangl ranl mos.
Yingldaaiz:
Ngonzlangl ranl mos.
[soonl bux naanz liez naanz byah,rongz]
[此贴子已经被作者于2008-8-8 9:38:59编辑过]
发表于 2008-8-7 15:35:00
QQ空间
腾讯微博
腾讯朋友
微信
转播
淘帖
分享
收藏
支持
反对
