[原创]路漫文集：壮文的小说

路漫

	“人生七十古来稀”，当今社会上把这句话当做笑谈了，可以说七八十岁的比比皆是了。本人有幸跨进“古来稀”了，想想日后的日子不多了，应该把自己的文字拿出来“晒晒”，让贝侬们当做“文字”撩撩翻翻，也不失它的“价值”了。贝侬们翻过撩过，有什么话要说，尽量提出来，让我在“盖棺”之前有所了解。谢谢！ 这是壮文的小说部分——路漫文集：壮文的小说 1  MEHLAUX     CAEUQ   RANZHAZ  DE Ranzhaz cix ranzhaz       Goj miz va hai hoengh    Dieg rungh cix dieg rungh  Goj miz fungh mbin sang    Ma lajmbwn guh meh Doek ceh cix siengj  va Ranzhaz cix ranzhaz Goj miz va hai hoengh   Ciengx lwg muengh lwg gvai Ciengx vaiz muengh vaiz noengq Dieg rungh cix dieg rungh Goj miz fungh mbin sang                         Aen gungx rungh neix, dieg mbouj sam cik bingz,mbwn mbouj sam saux gvangq, hoeng cix miz ranz he ok caet boux gunghcwngzswh. Danhseih, aen ranz neix mbouj dwg ranz sang ranz laeuz, hix mbouj dwg ranz cien ranz vax, dauq dwg aen ranzhaz vaihvad daemqded.Aenvih bi'ndwen haemq raez, rumz dongj fwn rwed, bangx ciengz daz gij naez gyaux reb haenx gaenq loenq doekbyoeg, loh ok rinreq baenz benq, lumjbaenz naeng mou baenz nengz nei, sawj vunz mbouj gamj yawj. Seizneix, ndaw mbanj ranz cien ranz vax lumj rangzcin nei daengjsabsab, lij miz vunz hwnj laeuzsang dem. Vahsug naeuz, dahsau cibbet, ngoenz lek gvaq ngoenz. Cwngcwz ndei le, aen mbanj ndaw rungh hix lumj dahsau cibbet nei, ngoenz beij ngoenz lengj lo. Hoeng, “aen ranz gunghcwngzswh”lij nyaenx vaih ne, roxnaeuz gyoengq gunghcwngzswh gyonj senj haeuj singz bae, ndek ranz vut fwz ne? Mbouj dwg bw! Sou yawj, diuz roen doeng bae bakdou ranz gunghcwngzswh haenx lij seuqset wenjyub ne, ndaw hongh makdauz makndae lij mwncup hw, laj gomak baet ndaej dug mbaw mbouj miz, neix dwg ranz fwz ha? Dwg lo, ndaw ranz neix lij miz vunz. Seizneix boux he ai youq bangx dou, song da cingq muengh gizgyae, de couh dwg bouxcawjranz, daxmeh gyoengq gunghcwngzswh, bi-neix gaenq ndaej bet cib ngeih bi. Aenvih seizneix de henzndang mbouj miz lan buenx, mbouj hab heuh buz dah byawz daeg byawz, vunz  cijndei heuh de guh“mehlaux”. Mehlaux muengh gizgyae, cingq dwg de siengj lwglan ndaw singz de. Mehlaux miz haj daeg song dah. Vah bouxlaux naeuz,“haj daeg song dah, fuk rum fuk da(hung)”, de mingh ndei li! Haj daeg lwgsai de cungj dwg gunghcwngzswh, song dah lwgmbwk hix haq hawj gunghcwngzswh, caemhcaiq youq ndaw cangj dang“guen”dem, gak boux ndwenndwen ciuq seiz geiq hajcib maenz hawj de. Youq ndaw rungh, ndwen ndaej sam bak haj cib maenz, couh dwg gwn dungx dek bae hix gwn mbouj liux. Hajcib mingh gaet, caetcib mingh gyaeu, mehlaux gaenq betcib ngeih bi, ndigah, vunz ndaw mbanj cungj haenh mehlaux mingh fuk mingh ndei. Danhseih, hix miz vunz gangj vahrwix naeuz, Mehlaux youq ndaw rungj mbouj ndaej umj lan, ndaw vanj mbouj nohbya (youq ndaw gungx rungh,cawz byaekheu le, nohbya gig noix miz gai, miz ngaenz mbouj dieg yungh), lwnh ngoenz souj aen ranzhaz, suenq maz mingh ndei, suenq yiengj maz fuk! Aen ranzhaz vaihvad hoengqhangq Mehlaux, gungh miz roek nganx, suenq hwnjdaeuj cukgaeuq miz bak haj bingzfuengmaex. Neix dwg Mehlaux caeuq gvande uengjfeiq simgei guh baenz. Dangco, Menhlaux song gvanbaz cungj naemj naeuz, lwg hung le doegsaw、aeubawx、hwnjranz, yienghyiengh aeu causim, mbaet gwn mbaet yungh, guh dai guh laemx, couh vih hwnjranz diuz neix, aenvih sim hung rengz noix, cuk ndaej ciengz mbouj cienz cawx vax,cix ndei goemq haz, engq camj dwg, gvan de vih dwgrengz lai baenz binghnaek caeuxcaeux dai bae! Ngoenzneix, vunz bae ranz hoengq, Mehlaux roxnyinh gig siliengz.Yienznaeuz, byawz dang bohmeh mbouj muengh lwg baenz fungh baenz lungz, seizneix gyoengq  lwg baenz-caiz  lo, guh ndaej bae lo, mbin sang bae gyae lo, cix ndek aen ranz hoengq fwzfwd, hai, caen mbouj rox dwg mingh ndei naeuz mingh yak!                           Bya sang banngoenz dinj, daengngoenz ngamqngamq raeb bya, ndaw rungh gaenq fuemxfwd lo. Mwhlaux geij duz gaeq raizva haeuj rungz caemrwg lo. Mehlaux gven ndei dou rungz, bongxbongx fwngz, song da ciuqyiengh muengh ok gizgyae. Mbwn mongmod, ndaundeiq caengz raen ok, seiqlengq fuemxfi fuemxfub, yienznaeuz mbouj miz maz ndei-yawj, hoeng Mehlaux rox, laj dinmbwn baihhaenx, miz lwg de lan de ne! Muengh mbwq le, Mehlaux ma daengz ranzding, diemj rongh dang'youz. Aen daeng-youz neix, aeu faexbug guh gaq, deb guh daengbuenz,mbouj rox yungh gvaq geijlai ciuh, youz iemq hoenz loemh, gaenq ndaem ndaej lumj faexnduk ndaw homq. Geij bi gonq, ndaw rungh miz dienh yungh lo, Mehlaux cawx miz denfunghsan、densigih, couh dwg sij mbouj ndaej vut aen daeng'youz neix. Gyoengq bouxlaux ndaw mbanj naeuz, daj lij iq couh dingqnyi banlaux dwen aen daeng'youz neix lo. Mehlaux dawz daeng'youz cingqcingq cuengq youq laj ham, sijsijsaeqsaeq ut daeng-gaq seuqsat. Liuxle, cix hai densigih, dawz daengqgeg baij cingjcingjcaezcaez, gag bouxdog sohsoh naengh youq bakdou rug, song da cimyawj douhung. Mehlaux cix mbouj yawj densi! Aen densi dwg vih vunz ndaw mbanj cawx, Mehlaux cij aeu ndaw ranz nauhyied. Seizneix ndaw mbanj haujlai vunz gaenq miz cienz, hoeng cungj dwg rom daeuj hwnjranz, densigih lij mbouj sij cawx. Cunghyanghdaiz bo“sinhvwnz lenzbo”seiz, gyoengq vunz couh byaij daeuj rubrub, gangj riu sing sang gvaq sing, ndaw ranz Mehlaux couh gok hwnjdaeuj lo. Gyoengq lwgnyez caenx daengz baihnaj Mehlaux, ringx haeuj rungj de bae, caegcaeg oet gaem makndoi he haeuj daeh Mehlaux bae, yienzhaeuh bae ciengj aeu daengq. Gyoengq dahsau daeuj le, doxciengj bae hawj Mehlaux raix caz、roi gyaeuj、dub hwet.Gyoengqde lumj youq ranz swhgeij nei, caz、roi youq gyawz cungj sug dangqmaz. Gyoengq lwgmbauq daeuj seiz, cix lumj baizdoih nei ndwn youq henz, doq yawj densi, doq caegcaeg cez da yawj dahsau. “Gaej dangj daxbuz yawj densi ha!”Gyoengq baj liuz haeuj ranz, cungj angq youq dangnaj bouxcoz cangguh banlaux. Doeklaeng couh hawj Mehlaux“veibau”, ndaw mbanj byawz bae haw doek ngaenz, byawz ciengx gaeq dairaq…… “Daxsauj, gwn caengz?”neix dwg doengzban Mehlaux daeuj. Seizneix, gyoengq ban'oiq cungj gag nyiegh dieg, sanq bae ra daengq naengh. Doengzban Mehlaux daeuj cix mbouj dwg aeu yawj densi, dwg siengj buenx Mehlaux gangjgoj hane. Densi lenzsuzgi hai ciengz lo. Gyoengq lwgnyez hemqyaya. Bouxhung couh hongz couh ndaq. Boux lwgnyez manz haenx mbouj fug, couh dingj naeuz:“ Densi daxbuz, mbouj gven mwngz guenj!” Ndaw densi sau mbauq doxcup, lwgnyez couh swenj:“Yawj ha, doxdub hwnjdaeuj lo!”“Mbouj dwg ne, dwg doxhaeb hane!” Lwgmbauq dingq le cix riuhaha, lwgsau yawj le cix goemq naj riuhwhw. Mehlaux mbouj yawj densi, hoeng hix gaen riu hwnjdaeuj. Baenzneix simhai, bihaenx Mehlaux youq Sanghaij hix miz gvaq. Dahseiq de haq bae Sanghaij, lwggwiz giem guenj gilozbu, ciengzciengz daiq Mehlaux bae gizhaenx yawj densi, gyoengq gunghyinz hix nyaenx simhai nauhyied. Couh vih di neix, Mehlaux caen mbouj siengj liz Sanghaij. Danhseih, ranz Dahseiq daiq gaeb, song nganx ranz youq song gvanbaz(gyagoeng gyabuz hix caemh youq), song laeq lwg, gyahwnj Mehlaux, lienz naengh hix caekhaex nem caekhaex! Lwggwiz gej naeuz:“Sanghaij dieg bengz, miz cienz hix nanz hwnjranz li!”Mehlaux naeuz:“Daengz diegcoj dou bae, gaiq reih he hwnj ndaej aen ban-gunghlouz lumj duh sou!”Dahseiq miz heiq naeuz:“Lajmbwn hix gvaiq, ndaet cix ndengj ranz lak, soeng cix ndet ranz fwz!”Mehlaux dingqnyi naeuz“ndek ranz fwz”, heiq dwk bwt yaek fan, ngoenzlaeng couh nauh dai nauh lix dauqma Guengjsae. Seizneix raen dangqnaj gyoengq vunz angqyangzyangz, ndaw sim doengzyiengh angq-vauvau, ndawsim gag naeuz:“Byawz naeuz gou ndek ranz fwz, neix mbouj hix dwg ndengj ranz lak ha?” Lenzsuzgi sat le, gaujgau aen dam aen bo ok, gyoengq lwgnyez doxdaeuq guhcaemz, gyoengq bouxcoz cix cez da doxyawj, doxyex gangjriu, boux mbeihung haenx caeg lumh caekhaex dauhsau, dahsau najna haenx couh mbwt boiz daegmbauq, daengx ranz hoengh dwk lumj ndaw haw haemhndaep bae. Lumj doenghbaez nei, Mehlaux couh dawz aen daehman he okdaeuj, cug boux cug boux fat hawj dangznaed. Gyoengq vunz gwn dangz youh hom youh van, ndaw sim Meh-laux caemh youh hom youh van.                          Mbwn hwnz le, gyoengq vunz bouxboux rimhoz yaek dauq ranz, doxriengz caeuq Mehlaux doxbiek. Vunz bae le, ranz couh caem. Gyang ding daengqgeg luenhlab, ceijdangz、gyaeujien rim dieg, lij miz nyouh lwgnding dem. Mehlaux menhmenh ndwn hwnjdaeuj, dubdub hwet, couh nyaengq baet ranz. Raen gij riz nyouh, Mehlaux miz di mbouj sij ut. De lij geiq ndaej, cingq dwg mup gij heiq nyouh neix, de rungx ok haj boux gunghcwngzswh! Byawz gamj duenq naeuz, lwgnding raix nyouh youq gyang ding neix daengzcog mbouj baenz gunghcwngzswh ne! Baet seuq gyang ding le, Mehlaux gven dou ndei, dawz daeng'youz haeuj rug bae. Bonjlaiz, siengj ndat raemx swiqswiq naj, raeujraeuj din, hoeng de saedcaih naet lai lo. Seizneix, daeng-youz fwt yap baez he, duj vadaeng ndeiyawj he bauq okdaeuj. Mehlaux sim baez diuq, raninz mbouj miz lo. “A, vadaeng!”Duj vadaeng iqiq neix, sawj Menhlaux ngeix daengz bi'ndwen gyae'gyae haenx. Loeg caet cib bi gaxgonq, bouxsai caeuq mehmbwk lij lau doxgangj, couh dwg song gvanbaz, doengxngoenz hix lumj vunz najseng nei, mehmbwk cij caeuq mehmbwk gangj vah ndaw sim. Simjvaz, ciuq baizban dwg lwgbawx, hoeng de caeuq Mehlaux cix lumj cejnuengx. Songde boux he bi'gvaq haq daeuj,boux he bineix haq daengz, doengzcaez guh bawxmoq, couh ciengzseiz doxcomz youq laj daeng'youz guh dajnyib. “Yo, vadaeng!”Simjva baez raen vadaeng bauq, couh daeuq Mehlaux naeuz:“Haemh neix mwngz yaek miz heij lo!” Mehlaux mbwnj bak riu, ndaw sim caen muengh mizndang dahraix. Dwg ha, youq seiz-haenx, mehmbwk lawz haq vunz guh bawx, mbouj muengh lai seng geij boux lwg ne. Gangj daeuj hix lingz, couh youq ndwen haenx, mehlaux couh nywnx couh rueg, doeklaeng caen seng daeglwg haumbop bizbwd ndeu. Doengz yienghneix gangjriu baenz caen, ca mbouj lai bibi lingz, Mehlaux couh yienghneix seng ndaej haj daeg song dah. Mehlaux dauq ngeix daengz neix, yawjyawj daeng'youz, yiemhfeiz fwt baez diuq, couh ciemhciemh mumq roengzbae. Mehlaux baez anj, iet hoz bae yawj ndaw daengbuenz, youz yaek hawq lo! Mehlaux ndaw sim gag siliengz hwnjdaeuj, raemxda dumzsub, de yaek daej yaek daej. Feiz daeng yienznaeuz iq, hoeng dauqdaej dawz gij raeuj gij rongh vanq rim daengx ranz.Danhseih, daeng'youz saekseiz youz hawq daeng mon, daengx ranz couh laepfub, gijmaz caiq yawj mbouj raen dem.Vunz daeuj lajmbwn, caemh lumj daeng'youz nei, hix rox mon ne. Mehlaux daengx ndang hwnj naenggaeq, saenzdigdig bae hawj daeng dem youz. Feiz daeng youh menhmenh rongh hwnjdaeuj, vuengh hwnjdaeuj,sim Mehlaux youh rox-nyinh raeujrib. Aen daengbuenz neix lij dwg duh Simjvaz, Mehlaux mbouj rox lumz. Bihaenx, Daegdaih gauj hwnj daihhag, yaek bae Namzningz haeujhag, Namzningz liz mbanj miz geij bak leix gyae, aeu caeuxcaeux okdou, caeuxcaeux ganj daengz yienhsingz dap ci.Haemh haenx, daeng'youz dem sam baez youz, youh diemj hawq bae sam baez, ndaw bingzyouz caiq ndik mbouj ok youz lo. “Lwg ha, mwngz couh okbae ba, swnh seizneix daeng lij rongh.”Mehlaux mbouj naihhoz naeuz. De gangj“daeng lij rongh”cix mbouj gangj“daeng yaek ndaep”, coenz laeng mbouj gitleih. “Cej, mbouj ndaej nw.”Simjvaz bungj vanj youzcaz rimrwd ndeu haeuj ranz.De heuh Mehlaux guh cej, cix mbouj ciuq ban lwg de heuh daxbuz, hoeng Mehlaux angq dingq. “Gaeq ngamq haen sam, gaenj gijmaz!”Simjvaz naeuz. Raen Simjvaz dem youz le, youh dawz youz ndaw vanj guenq roengz bingzyouz hoengq bae, raemxda Mehlaux hix lumj youz nei ndik roengzdaeuj. Vunzmbanj miz caigeih, ndaw ranz miz vunz okdou bae gyae, ranzding mbouj ndaej ndaep daeng,caemhcaiq aeu rongh daengz daengngoenz hwnj, neix dwg hawj boux okdou baihnaj ronghsag. Simjvaz “ndaw laep soengq rongh”, Mehlaux baenzlawz mbouj gamjdoengh ne. “Daxmeh mwngz hawj gijmaz daiq bae?”Simjvaz bae diemj daehhung Daegdaih. De daj daehhung mbon ok geij aen maenz saz, riuhaha naeuz:“Cej, nohma ndei gwn hix mbouj hwnj daiz laeuj ha!”Gangj le, lumj sajbajheiq nei daj ndaw dox dawz ok seiq aen faengx haeuxyangzcid, oet haeuj daehhung bae,“youq baihnaj doengzhag, gwn gijneix.”youh dawz maenz saz cuengq dauq daehhung,“boih laeng doengzhag, gwn gijneix.” Gaeq haen gvaq haj sauh lo. Mehlaux rap daehhung byaij gonq, Daegdaih aemq daehsaw riengzlaeng, Simjvaz gingz daeng'youz doeklaeng, doxgaen okdou. Soengq bae ndaw mbanj boux daih'it daihhagseng,geij bi le baenz ndaw mbanj boux daih'it gunghcwngzswh. Daegdaih mbatneix bae, yied bae yied gyae, bizyez le faenboiq bae Doengbaek,caemh youq haenx aeuyah baenzranz. Bihaenx, Daegdaih miz lwg iq, coux Mehlaux bae yawj lan. Yaek bae seiz,vunzmbanj riu naeuz:“Doengbaek nit lai hw, dingq gangj oknyouh ret ndongj baenz nae, guh ndaej bien fad vaiz li.”Mehlaux bae daengz baez roengz hojceh, caen dahraix hw, rumzbaek lumj cax heh naj,dot dangqmaz.Mehlaux youq ndaw rungh seizbienh biq myaiz gvenq lo, youq gwnz gai ciuq biq, Daegdaih naeuz de, de vuengzmuengz aeu daejhaiz bae ut, hoeng myaiz gaenq ndongj baenz gingq, ut dai mbouj bae.Banhaemh, yienznaeuz mbonq miz heiqraeuj, hoeng cueng dou gven dwk gyaemzgywd, hoengheiq mwt ndaej yaek siengj rueg.Mehlaux cix daegbied naemj aen ranzhaz de, ranzhaz yienznaeuz doj, hoeng seizndat liengzsubsub,seiznit raeujrubrub. Yienghneix, Mehlaux youq Doengbaek couh lumj biengzbeih yaeg raemx, mbouj nanz couh dauq gungx rungh ranzhaz de lo.

路漫

	Gou muengh miz engq lai vunz daeuj caez sij sawcuenh moq,daihgya nauhnyied nauhnyied!

路漫

	12 Youq Sei2 Daenggeiq Haenx Lij Vaz caeuq Veiz Ginghyingh caez bae daengz ndaw yanghfuj,naengh youq henz daiz vwnzsuh,mbouj rox lau ne roxnaeuz angq lai.ndaw sim diuq hwnj diuq roengz,song doiq lwgda dinghdingh yawj dienz sij mbaw gezvunhcingq. “O,Lij Vaz,ra mwngz haujlai nanz lo!”Dangjcihsuh daj rog byaij haeujdaeuj,baez raen Lij Vaz couh haenq sing naeuz.De yamq raezrangh byaij daengz gyawj,cij raen Ginghyingh naengh youq henz Lij Vaz,youh raen vwnzsuh riunyumj,ndaw sim rox lo,couh naeuz:”Hoheij !”Lij Vaz dingq dangjcihsuh gangj vah mbouj doengz,couh cam:”Cihsuh,ra gou guh gijmaz saeh?” “Mbouj miz.ra mwngz gwn laeuj heij vei!”Cihsuh riu naeuz. Lij Vaz naj nding lo,rox cihsuh daeuj ra,itdingh miz maz saeh,youh cam:”Gangj saed di,saeh maz?”cihsuh ngonzngonz de,youh ngonzngonz Ginghyingh,riu naeuz:”Siengj heuh mwngz bae lienh diet.””Seizneix?”cihsuh nyaujngauj gyaeuj,yawj yaep he naeuzz:”Dwg.” Lij Vaz cienq ndang bae doiq vwnzsuh naeuz:”Mwngz gaej gaenj sij,caj gou lienh diet laeb goeng gonq caiq sij.”Youh doiq cihsuh naeuz :”Cihsuh,caeuq bouxlaw bae lai?”Cihsuh bekbek mbaq de gvensim naeuz:”Mwngz gaej gip,gezvwnh gonq,gvaq song ngoenz yaeng bae.” “Mbouj ndaej,daj ngoenzbonz mwngz gangj aeu daih gauj gangdiet,sim gou couh maengx raixcaix,sim siengj caeux bae couh ndei lo.Mwngz mbouj dwg gangj,gangdiet dwg dangqnaj yiengh hong daeuz,mbouj miz gangdiet couh mbouj miz seveicujyi ma?” Cihsuh dingq le,mbouj rox baenzlawz han,cij ngonz Ginghyingh riu.Ginghyingh naj nyaenq naeuz:”Hawj de bae,goj hawj gou bae dem.””Mwngz?gevwnh gonq……” “Danghnaeuz mbouj ndaej song mbaw ciengjcang couh mbouj caengz aeu song mbaw gezvwnhcingq neix!”Ginghyingh han naeuz. Cihsuh dingq le,doq riu doq ngaekngaek gyaeuj,gag siengj:Mbouj gvaiq de song boux dwg gungcingh donzyenz,ganging baenzneix hung.

路漫

	11 VA RANG MAK VAN Lajmbanj seizneix hingq gangj “ginghci gaihfang” Aumaenz mboujdanh ndaem naz guh reih ndaej ndei,lij guh faenj ciengx mourouh, ciemhciemh hwngvuengh fatcaiz lo.Bineix goekcin,Aumaenz youh bongx aek swngzbau aen suen mak ndeu.Danhseih Aumaenz dan rox lwgmak dijcienz,mbouj rox baenzlawz guenj ndei gomak.saeyienz ok haujlai rengz roengz geijlai bonj,doeklaeng,dan raen vadauz hai,mbouj raen makdauz giet,de mbouj naej mbouj fug,mbouj ndaej mbouj cuengq vah yaek cingj boux gisuzyenz daeuj bang guenj suen mak. Cunhveijvei cujyin Aumezsex daiq Daegliengz daeuj raen Aumaenz, gangj Daegliengz guenj suen mak gig sughangz.Aumaenz riu ndaej da hix laep. Cij vih cingj Daegliengz daeuj,cix yinx ok cit goj lajneix. (1) Bohmeh Daegliengz caeux gvaqseiq,ndek de guhgyax.Hoifuk doihengz Sawcuengh le,baihgwnz aeu ndaw yangh baij song vunz bae Vujmingz doeg saw.Haujlai vunz mbouj nyienh bae,naeuz:”Guh naz baengh goengrengz,mengz saw haeux hix maj,byawz nyienh hag couh bae.”Doeklaeng aenvih Daegliengz boux vunz dog,mbouj gaz ndaeng mbouj gaz rwz,ndaw yangh couh heuh de bae lo.Doeg ndaej baetyieb ma le,ndaw yangh lij caengz hai ban Sawcuengh,naz cwzyindenz youh mbouj baen louz hawj de,cij ndaej aeu henz dinndoi geij faen dieg go mak haenx hawj de bau guenj bau ciengx cihgeij.Yienghneix hix hab sim de,de ndet sim guenj ndei di gomak haenx,caiq semz ndaem duhnoh haeuxyangz maenzfaex.Danhseih,geij faen dieg mbouj geijlai hong, ndaej hoengq de cix cawx haujlai saw ma,itmienh yawj itmienh youq ndaw suen mak sawqniemh,miz maz loengh mbouj cingcuj roxnaeuz sawqniemh saetbaih,de couh bae cam Nungzgohsoj ndaw yienh,bae baiq gisuzyenz guh lauxsae,Nungzgohsoj dungzci raen de haengj hag,couh hawj de haeuj swhliusiz bae caz.Baez yamq haeuj swhliusiz ,da de couh byaengq lo.Yienzlaiz gij saw ndaem mak baenz dab baenz dab,miz Saw cuengh Sawgun,lij miz saw guekrog dem.Daj neix de gietsim hag ndei ndaem mak,vih gensez biengz Cuengh baenz aen suen mak bae roengz rengz. Neix Aumaenz cingj de daeuj bang guenj gomak,yawz mbouj hab sim de ne. Rog ranz caemrwgrwg,cij dingqnyi daekgaeuj swenj “giet giet      ”. Ronghndwen daj conghcueng rongh haeuj ranz daeuj gig seuq. Daegliengz ninz mbouj ndaek,de naemh hwnj song dahlwg Aumaenz, Dahndwen hau oiq mboeng lumj ngaeux,Dahreux lengj ndaej byaij gvaq hen daemz bya hix diuq,hai!Siengj neix guh maz,ok rog hongh bae langhlangh sim ba. Daegliengz ngamq cengj hwnj mbonq,goenglaux couh daengq naeuz:”Doengj nyouh youq gyaeuj congz.” Daegliengz siengj:Aen doengj nyouh baij youq gyaeuj congz goeng laux,gyae mbouj gaeuq hub,mbouj siujsim couh aeu set deng gyaeuj de,baenzlawz gamj ok ne?Daegliengz swnh bak han goeng laux: ”Mbouj dwg,gou okrog bae yawjyawj.” Daegliengz hai dou byaij ok hongh bae. Goenglaux daenj haiz moeggieg gaen ok dou daeuj,daj baihlaeng hat Daegliengz:”Mwngz ma ranz!” Goenglaux gaem diuz dwngx ndwn laj yiemhranz aegoekgoek, cuengq gaemz heiq,raen Daegliengz mbouj gangj hix mbouj doengh, youh naeuz:”Gou ciuhvunz caet bet cib bi,cij raen gomak gag maj gag gietaen,caengz raen goq vunz daeuj guenj gvaq.Mingh ndei mak baenz loz,mingh yak faex dai roz.coenz vah bouxlaux neix mwngz mbouj rox?Doeng lah sae lah yaeuh vunz gwn,giusevei gou raen lai lo,deuz ndaej gvaq lwgda gou?Mwngz haetcog gwn ngaiz le couh geb viz baema, ndeindei guh vunz!” Aumaenz caeuq Simjmaenz okdaeuj lo,youh gienq youh fuz goenglaux haeuj ranz bae.Dahndwen caeuq Dahreux hix okdaeuj,cien daengq fanh daengq Daegliengz gaej dawz haeujsim. “Goeng gou miz di moengjdoengj.”Dahndwen naeuz,”Liengz dungzci mwngz gaej leix de!” “Liengz gisuzyenz,mwngz gaej dawz haeuj sim.”Dahreux naeuz, ”goeng gou laux lo,bak saemzsez di,danhseih sim de ndei.” Dingq song dah baenzneix gangj,Daegliengz ndwnj gaemz heiq roengz dungx,mbouj guh sing lo. Song cejnuengx boux yawj boux,mbouj rox caiq gangj coenz lawz ndei. Aumaenz caeuz Simjmaenz fuz goenglaux haeuj ranz bae dauq okdaeuj,lumj mbouj miz saeh nei,heuh song dah de baema ninz,cienq naj daengq Simjmaen naeuz:”Nda mbonq Liengz gisuzyenz youq rog ding ba,mienxndaej goenglaux cauj de……”youh gangj vah’unq doiq Daegliengz:”Doiq mbouj cawh,ranz gaeb lai,gaeuj naj gou bae ba.” Aumaenz baenzneix caen sim,Simjmaenz youh baenzneix huzngaeh, Dahndwen caeuq Dahreux,hx baenzneix doeng dauhleix, Daegliengz sim hix roengz lo. (2) Ndoi laeng mbanj,lumj dahsien daengjhai ninz nei,gwnz aek de laeb miz song goengq moh,nduenndumj baenz doiq cij,vunz heuh de guh Ndoisiennawx.Gwnz de dauqcawq ndaem miz gomak,neix couh dwg Aumaenz swngbau aen suen mak haenx.Ndaw suen ndaem miz goleiz gogam,lij miz gobug,cungj dwg nga sengx mbaw henj,miz di deng nyaenh,bouxlawz raen bouxlawz cungj naeuz mbouj miz muengh lo. Seizneix,Daegliengz caeuq Dahndwen Dahreux cingq youq laj gomak ndai rum soeng namh,gyoengqde lienz guh geij ngoenz. Simjmaenz youq ranz moh mba naengj faenj ciengx mou mbouj daeuj ndaej.Aumaenz guh faenj hix mbouj ciengz daeuj,caenh ndaej hoengq couh daeuj suen mak bang fwngz,lienz yiengq Daegliengz hag gisuz. Daegliengz itmienh guh hong,itmienh cienz son daet ngeiq,sat yw gaj nengz,dwk bwnh doenghgij gisuz neix,son ndaej naihsim,gangj ndaej mingzbeg.De mbouj dwg gangjboq,it fuengmienh dwg de gyaez ndaem mak,hai bak couh miz vah;ngeih fuengmienh dwg de caen rox ndaem mak gisuz,mbouj dwg “yaeuh vunz gwn”. Soj miz gijneix,danghnaeuz Aumaenz youq henz,Dahndwen caeuq Dahreux couh ngaem gyaeuj gvak namh mbouj gushing,Aumaenz baez cienq ndang deuz,Dahndwen couh bakraeuz bakdeih,cam neix cam haenx,hix gangj saeh mbanj saeh ranz saeh wnq hawj Daegliengz dingq. Sawj Daegliengz rox daengzahndwen doeg gvaq sam bi siujhag,raen sawgun nanz hag lai,couh mbouj nyienh doeg lo.Dahreux baknaek di, gyaez dinghdingh yawj Daegliengz guhhong,dingq Daegliengz gangj vah.Miz seiz Daegliengz yawj de,de cix cienq yawj lingh giz.De lai doeg geij bi saw,aenvih ndaw ranz swngzbau cwzyindenz,youh guh faenj ciengx mou,hong gaenj vunz noix,cuhcungh caengz bizyez couh doiq hag ma ranz lo. De dingq gangj Daegliengz dwg daj Sawcuengh hag ndawj gisuz, itsim heuh Daegliengz son de hag Sawcuengh,ndei rox ndaem mak, danhseih itseiz hix mbouj ndei hai bak. Suen mak ndai rum caez lo,Daegliengz doiq Aumaenz naeuz, wnggai youq laj gomak ndaem miuz duh ndeu,mboujdanh ndaej sou duh,rag duh miz gwnhliuzgin,naengz caux ndaej danfeiz,dieg mak hix biz lo. Gijmaz gwnhliuzgin,Aumaenz lawz hix mbouj saenq,de dan ngaekngaek gyaeuj riunyumnyum,hix mbouj gangj ndaem,hix mbouj gangj mbouj ndaem. Daegliengz danq gaemz heiq ndeu,sim siengj:”Aeu miz gohyoz gisuz daeuj dajndaem,mbouj miz vwnzva caen nanz.” Daengz raed nyemak,nye lawz raed,nye lawz mbouj dang raed,gig aeu gangj gisuz,Aumaenz caeuq Dahreux baema guh hong ranz,dan ce Dahndwen bang Daegliengz. Daegliengz youq baihnaj raed,Dahndwen youq baihlaeng doq gip doq cug doq gangj:”Baez neix baema mbouj yungh bae dwk fwnz lo.” Daegliengz riu naeuz:”Raemj daengz goek bae ndaej fwnz engq lai hw!” Dahndwen riuhehe:”Raemj daengz goek raeuz couh mbouj miz heiq ciengq lo!”Daegliengz raen de gangj ndaej miz yinx,hix cienq laeng dauq yawj de riu.Dahndwen raen Daegliengz cim de riu,naj hix nding lo.Daegliengz raen Dahndwen naj hoengz,ndaw sim gag ngeix, Dahsau neix naj mbang lai,hix mbouj gamj gwq yawj de lo.Gvaq ndaej yaep ndeu,Dahndwen youh cam:”Siengj cam mwngz gienh saeh ndeu.” Daegliengz doq raed ngeiq doq han:”Gijmaz saeh?” “Siengj cam mwngz miz youx caengz?” Mbat neix lwn daengz Daegliengz naj hoengz lo,de sien danq gaemz heiq ndeu,naeuz:”Hai!Gou roek bi guhgyax,ranz mbouj riengh, reih mbouj naz,dah lawz yawj ndaej hwnj da.” “Gaej gangj yawj mbouj hwnj da,dah lawz seiqneix ndaej riengz mwngz guhciuh,gwn raemx sim hix van.” Daegliengz cienq naj yawj gvaqdaeuj,raen Dahndwen song da ronghliklik cingq cim naj de,Daegliengz naj youh hoengz lo. Song duz roeg douh gwnz dingj faex,yienzlaiz gigi gitgit hemq mbouj dingz,neix hix mbouj hemq lo.

路漫

	10.Ronghndwen Sangvidvid Seizhah,ndaw ran aengfwgfwg,nyungz goenjhuhu,vunzraeuz gwn caeuz gvaq le,cungj angq ok dou bae langh liengz.Doenghbaez,lajgoek goreiz bak mbanj,vunz humx baenz comz baenz comz,gangj goj,dwk geiz, damz roet lwnh haex,hihi haha,goenjhumhum.Ceiq gaenh miz di lingh yiengh,cij raen buzgeq hawj lan gangj goj yahvaiz,nyezrauh guh yahndoj, vunzhung dauq noix raen naj lo. Haemh neix,ronghndwen sangvidvid,lajdeih haucancan,rumznanz liengz susu, buzgeq daz lanz haeuj ranz lo,nyezrauh hix deuz caemrwg,haetcog gyoengqde lij aen bae hagdangz.Cij miz Daegmingz gaem bonj saw he, maeuq youq henz loh,ning hix mbouj ning,lumj ndaek sigsae bakmiuh nei. “Ho,baenzneix yunghgoeng ha!”Dahlouz byaij gvaqdaeuj dongx,de dwg sijhag lauxsae. “Louz Lauxsae,gaej riu lu,mwngz rox gou dwg cih ‘it’ laih faexdaet,cih ‘bwt’ naeuz daengqgeg.”Daegmingz naj hoengz rwz dit,de lij geiq daengz Louz lauxsae son de hag Sawgun,hag sam ngoenz mbouj rox sij singq cih ‘veiz’,gij vunz mbouj cingqging haenx cungj riu de ndongqda mbouj rox naj cih ‘x’. “Mbouj gangj riu,son Sawgun ha,doeg ‘gou’ gej naeuz ‘ma’,doeg ‘ma’ gej naeuz ndaij,gou caen mbouj nyienh son lo.”Louz lauxsae dingqnyi ndaw mbanj hai ban Sawcuengh,haemh neix de daegdaengq daeuj ra cunhcangj---boh Daegmingz,”Boh mwngz ne?” Daegmingz baez vix,Louz Lauxsae riengz fwngz yawj bae,raen gwnz bo haenx miz gyoengq vunz he naj doiq naj dwk bej,Louz lauxsae bibi gyaeuj,de geiq ndaej boh Daegmingz ceiq yinx dwk bej,miz vunz naeuz de,de han:”Vunz guhhong,buhvaq mong,gwn imq youq mbwq cix hwnj congz,lij guh maz dem?”Doiq de fouzfap. Louz lauxsae iu Daegmingz caez bae gwnz bo yawjyawj.Songde ngamq byaij daengz henz,gyoengq vunz haenx rubrub rabrab dawz bej sou seuqsat,naengh sohswd cang yiengh gangj goj.Raen Louz lauxsae daengz le,boh Daegmingz muengz hwnj ndang dongx naeuz:”Louz lauxsae,ndaej hoengq daeuj guhcaemz ha!”Gangj bak caengz hup,bizbiz bazbaz yiengj,bej daj ndaw rungj byod okdaeuj vanq rim gwnz deih. Louz lauxsae goz hwet gip ndaej geij mbaw baiz,baez yawj,angq dwk hemq hwnjdaeuj:”Sou caen cing!” “Hoho,hoho!”Boh Daegmingz riusogsog,najhoengz dwk gouz Louz lauxsae naeuz:”Louz lauxsae,dou huk lai lo,son dou ba!”Gangj le,couh dawz song mbaw “baiz” okdaeuj,gwnzde sij dwk “d” caeuq “b”,cam baenzlawz doeg. “Sou baiq saenz baiq deng rinbaenz lo,gou lij daeuj ra dou son ha!”Louz lauxsae youh yawj gij bej ndaw fwngz,gij neix cungj dwg aeu ceijhau nem guh,caiq sij hwnj cihmeh Sawcuengh,caen dwg cungj fatmingz ndei he. “Neix doeg ‘da’,haenx doeg ‘ba’.”Daegmingz gvaqbae vix song mbaw bej haenx naeuz. “Lwgnyez caengz ok bwn,rox gijmaz!”Boh Daegmingz ndatheiq lo,ndaq Daegmingz baklai.”Ndongqda mbouj rox cih ‘veiz’!” “Gou mbouj rox,lij dwg mwngz mbouj rox?”Daegmingz hix ndatheiq lo, dawz bonj GANBU GOBWNJ fan hai hawj daxboh yawj,”Gaej ndonj laj congz yawjraen vunz daemq!” Boh Daegmingz da’byaengq lo,gazgwdgwd naeuz:”Dou ngamq hag NUNGZMINZ,mwngz hag daengz GANBU la?Mwngz gangj cih ‘d’ caeuq cih ‘b’ baenzlawz nyinh?” “’da’ doed baihnaj,’ba’ doed baihlaeng!” “Hei!Caen dwg malwg bienq guk lo,liux mbouj hwnj!”Boh Daegmingz angq dwk bek mbaq lwg de,riunyumnyum rag de naeuz,”Daeuj,daeuj!Daeuj dang lauxsae dou!" Louz lauxsae hix gig gikdoengh,ndawsim naemj:Gaxgonq Daegmingz hag Sawgun,sam ngoenz geiq mbouj maenh cih “bwt”,seizneix de gag hag Sawcuengh,dauq ndaej dang lauxsae lo,geizheih,caen geizheih! Daegmingz hix mbouj guhhek,ndwn gvaq gizsang,langh sing naeuz: “Daihgya naengh roengzdaeuj seizneix hwnj dangz…… Ronghndwen sangvidvid,laj deih ronghsagsag….. ----Bauq Sawcuengh 1986 6 14

路漫

	9.GWIH Sau gwih vaiz,buz gwih ci,boux boh gwih boux meh.Lajmbwn gvangq langh,maz “gvaiq” mbouj miz? Mbanjgwnz gij saeh “gvaiq”aeu geijlai miz geijlai,neix dan gangj ranz Genyingh.Song ngoenz gonq,meh Genyingh aemq boh Genyingh gvaq dah,ndaw mbanj cauz dwk riuhuhu.Song gvanbaz neix seiq cib lai bi lo,vih maz lij doxaemq ne?Yienzlaiz dwg lingzniemh coenz vah meh Genyingh. Haj bi gonq,meh Genyingh gvaiq boh Genyingh ranz gungz,cix buet bae ranzdaiq youq.Boh Genyingh bae laengz de ma,de naeuz:”Caj mwngz ndaej fatcaiz,mwngz gwih gou gvaq dah!”Seizneix ranz Genyingh fouqmiz lo,meh Genyingh simfug lo,angqangq yangzyangz aemq boh Genyingh gvaq dah dauq ranz lo. Meh Genyingh ma ranz le,daengx ranz vunz doxgingq doxgyaez gvaq ndaej van.Ngoenzlwenz youh cienz ok gienh saeh “gvaiq” he----buz Genyingh hag gwih danci!Buz Genyingh loeg caet cib bi lo,caet laux bet laux lij hag ci,mwngz naeuz gvaiq mbouj gvaiq? Banringz gvaq,gyoengq vunz youq bak mbanj cingq lwnh gij saeh neix, buz Genyingh gangj daengz couh daengz,rag gaq ci “vujyangz” moq ndeu ok gyaeuj mbanj lo----boh Genyingh lij gaen youq baihlaeng dang “saefouh” ne! Buz Genyingh cingq yaek hwnj ci,fwt “mo----”sing ndeu,gyoengq vaizrouh bizbwdbwd he laengz youq baihnaj,dahlan de----Genyingh gwih duz vaizdaeg ndeu coh bak mbanj byaij daeuj. “Daxbuz ha,gwn gyawz bae hag ci gaij mbwq ha!”Genyingh raen daxbuz le,guh’angq daeuq de naeuz. “Gwn gyawz bae,hag ci couh hag ci,gwn gyawz bae!”Daxbuz caengz dahlan mbat he naeuz,ndawsim youh nyap youh angq. “Daxbuz,mwngz lij siengj gwih ci bae lauh hawfwen ha?”Dahlan riugekgek youh daeuq daxbuz. “Dah fangz neix,fatbag la?Lij lumj mwngz bae doxlienh ha?”Dxbuz fwt riu han dahlan. “Yienghneix,hag ci guh maz ne?”Dahlan youh faek. “Guh maz?Buzgeq hag ci miz maz gvaiq?Dahsau gwih vaiz cij geizheih ne!”Daxbuz mbouj siengj leixlangh dahlan,”Fw” hwnj ci lo. “Menh di----”Raen ci daxbuz ngauz bae ngauz dauq,Genyingh gwq swenj,hoeng,bak caengz dingz,daxbuz doq fan ci lo!Genyingh gipmuengz diuq roengz laeng vaiz bae fuz daxbuz. “Buzdaih ha,gou lau hag ci caengz bizyez,vunz cix sien ‘bizyez ‘ gonq bw!”Henz loh miz vunz gangjriu naeuz. Dingq gij vah neix mbouj “gitleih”,buz Genyingh badrad benz hwnjdaeuj, sim mbouj fug naeuz:”Vunz laux ndok genq,mbouj dai baenz caeux!Caj gou rox gwih le,gou lij aeu bae ra hong fatcaiz.”Gangj sat,youh yaek hwnj ci lo…… “Gaejbah!”Genyingh laengz daxbuz naeuz,”Gou gai rouh vaiz neix hawj mwngz cawx gyaq heiqci nyaenq,youz mwngz naengh youz mwngz hai!” Daxbuz baez yawj,gyoengq vaizrouh duz biz gvaq duz,ndaemndindi, lwenqmyigmyig,lumj bang cidoih hai haeuj mbanj bae. “Dahraix bw!”Daxbuz doq siengj daengz,mbouj aeu geij nanz,lajmbanj raeuz dingh aeu miz cidoih…… ----Bauq Sawcuengh 1985 11 2

路漫

	(4) Aumaenz cienz ranz vunz cungj vueng lo,Dahreux rag goenglaux haeuj hoq bae,Aumaenz,Simjmaenz,Dahndwen caez humx henz ndang Daegliengz,mwngz coenz gou coenz gienq de yawj hai di…… Gangj liengzsim,Aumaenz doiq Daegliengz cungj dangq baenz vunz ranz nei.Daegliengz mbouj ndei gangj gijmaz,soh naengh youq henz congz. “Yienghneix ba,”Aumaenz naeuz,”heuh daxgoeng bae ranz laj youq,mienxndaej caujfanz Liengz dungzci.” “Mbouj!”Daegliengz ganjmuengz naeuz.De rox ranz laj dwg ranz gaeuq,seizneix gaij guh riengh mou,cuengq fwnz haz,baenzlawz ndei heuh bouxlaux bae haenx youq ne?Gangj vah bonjsim,Daegliengz seiz neix hix mbouj nyienh deuz,suen mak ngamqngamq bienq yiengh,de lij siengj caen fwngz guh ndaej mak rim suen!De naemjnaemj le naeuz:”Yienghneix ndei mbouj ndei,gomak giet aen lo,ceiq ndei bae gwnz suen dap aen diengz,gou bae dawz suen,mienxndaej lwgnyez mbaet, roeg nyaen nyaux.” Dahndwen coengzlaiz cungj bang Daegliengz,hix swnhbak naeuz: ”Seih ha!Aeu dawz suen,mboujne couh ndaem vaih goengrengz lo.Go Liengz nyienh dawz couh hawj de bae ba!” Aumaenz mbouj miz vah gangj,couh doengzeiq lo. Daj neix hwnj Daeglieng gyang ngoenz guhhong,daengz donq ma gwn,haemh ronghrib mbin bae mbin dauq daeuj buenx de,nengz daek heuh gigi getget hix gig ndei dingq.Danhseih,siengj daengz bang vunz dawz suen,gangj ndei dingq heuh mwngz coenz “saefouh”,gangj yak dingq couh heuh mwngz guh “boux dawz suen” hai…… (5) Aen hoq ndeu aeu benj gek guh song bien,Dahreux song cej nuengx boux ninz mbiengqj.Haemh neix,Dahreux ninz dai hix mbouj ndaek,de siengj daengz Daegliengz boux vunz ndeu bae dawz suen mak, caen miz di cuengqsim mbouj roengz,lau Daegliengz youq mbouj gvenq, lau Daegliengz mbwq,hix siengj bae caeuq Daegliengz gangjgangj goj, hawj de sim’onj roengzdaeuj,hix ndei gouz de son sawcuengh,cienz gi suz. Danhseih hix yawj ok,Dahndwen miz sim coh Daegliengz,bae ra Daegliengz itdingh mbouj ndaej hawj Dahndwen rox,mienxndaej Dahndwen naeuz de bae caeuq dahcej “ciengj gwiz”,Dahreux noknok ciengzbenj,raen caemrwgrwg,nyinhdingh Dahndwen ninz caem lo,cij lejlej hwnj mbonq daeuj,youh lejlej byaij ok dou bae. Ronghndwen ronghsagsag,seiqlengq cingxrwgrwg.De youq laj ndwen bien byaij bien naemj,dahsau gyanghaemh bae ra daegmbauq, baenzlawz ndei hai bak?Coenz daih’it gangj gijmaz…… “Haetcwi!”Ndaejnyi sing ae cienz gvaqdaeuj,dingq sing gig sug, Dahreux baez yawj,raen boux vunz he byaij baenaj,laj daenj vaqndaem, gwnz daenj buhraiz gendonh,vunz daemq ndang biz gyaeuj duengq song diuz mengq dinj.Ya,dwg Dahndwen ha?De miz di doeksaet,couh suk ndoenq youq henz gomak bae yawj. Cij raen Dahndwen byaij daengz laj diengz Daegliengz naengh roengzdaeuj,song fwngz mbaet mbaw mak henz ndang,youh cuengq haeuj bak bae haeb…… Yaep ndeu couh dingqnyi Dahndwen eu fwen: Beijbaenz duz roegfek,haen dekdek ndaw haz; Mbwn raeuj rumzcin ma,cix aeu ra doxbuenx……. Gvaq haujlai nanz mbouj raen dap saek coenz fwen.Dahndwen caiq eu hix mbouj raen dap. Dahreux caen miz di vih dahcej naj hoengz,youh miz di hojlienz dahcej. (6) Haetneix,bakcauq caemrwgrwg,mbouj rox vih maz Dahndwen mbouj hwnjdaeuj cawj ngaizromh lo. Simjmaenz buet haeuj hoq bae,raen Dahndwen daengjhai gwnz congz da muengh ruzrip ngaezngwdngwd. Simjmaenz ndwn henz congz cam:”Haet neix lwnz daengz mwngz cawj romh,miz maz la?……ndang mbouj ndei loba.” Dahndwen mbouj gushing.Simjmaenz lumhlumh najbyak de: ”Mbouj ndat ha,dungx in la?” Dahndwen da yaepmyaebmyaeb,hix mbouj ngw mbouj han. “Baenz binghngoemx la?Hwnjdaeuj!”Simjmaenz miz di ndatheiq, roengz fwngz bae biengj denz. Dahndwen baez fan ndang,dawz denz duk ndang ndaetndaet bae. Dah fangz neix guh maz la?Simjmaenz simngeiz lo,swnhheiq cam naeuz:”Ndwen ha,miz maz saeh gangj hawj meh nyi.” Mbouj guenj baenzlawz lox,Dahndwen cungj mbouj leix,Simj maenz fwt siengj daengz gijmaz,danq gaemz heiq naeuz:”Hai!Lwgsau mbwk lo,simsaeh hix lai lo.” Dahndwen vih maz ninz mbouj hwnj heuh mbouj han. Ngoenzneix,Dahreux ndaw sim mingzbeg,de mbouj gangj vah, dawz hong Dahndwen dingj hwnjdaeuj. Daengz haemh gwn caeuz gvaq,Aumaenz sim mbouj vuen,naengh youq gyanghongh muengh ndaundeiq.”Yo,geij haemh neix ndaundeiq caen deih.”Simjmaenz cam:”Deih youh hauhlawz?””Ndaundei deih,naz bienq reih,mbwn rengx dingh lo.” Raen Daegliengz daiq Daegnyaeq bae suen mak guhcaemz, Simj maenz naeuz:”Lumj song beixnuengx nei,Daegliengz dwg vunz ranz couh ndei lo.” “W!”Aumaenz aeu ndaeng daeuj han. “Vei,gou cam mwngz,song dah lwg mwngz geijlai hung la?” Aumaenz yawjyawj Simjmaenz,hix mbouj gushing.Simjmaenz youh gangj:”Bi’gyai miz vunz daeuj cam Dahndwen,mwngz mbouj han, bineix de rim ngeih cib seiq lo.” Aumaenz hai bak lo:”Lwgmbwk dwg daxmeh guenj,miz gijmaz vah mwngz couh gangj ba.” “Gienh saeh neix,gou hix mbouj gamj gag guhcawj.Gou siengj, ranz raeuz hong lai vunz noix,Dahndwen hix mboouj saeq lo,Hawj Daegliengz daeuj hwnjranz …..” Aumaenz naeuz:”Mwngz dauq suenq ndaej raeh.” Simjmaenz naeuz:”Daegliengz dwg lwggyax,mwngz lau de mbouj nyienh?” “Ndei ba,mwngz sawqsawq yawj ba.” Gienh saeh neix couh baenz neix dingh lo.

路漫

	11 VA RANG MAK VAN Lajmbanj seizneix hingq gangj “ginghci gaihfang” Aumaenz mboujdanh ndaem naz guh reih ndaej ndei,lij guh faenj ciengx mourouh, ciemhciemh hwngvuengh fatcaiz lo.Bineix goekcin,Aumaenz youh bongx aek swngzbau aen suen mak ndeu.Danhseih Aumaenz dan rox lwgmak dijcienz,mbouj rox baenzlawz guenj ndei gomak.saeyienz ok haujlai rengz roengz geijlai bonj,doeklaeng,dan raen vadauz hai,mbouj raen makdauz giet,de mbouj naej mbouj fug,mbouj ndaej mbouj cuengq vah yaek cingj boux gisuzyenz daeuj bang guenj suen mak. Cunhveijvei cujyin Aumezsex daiq Daegliengz daeuj raen Aumaenz, gangj Daegliengz guenj suen mak gig sughangz.Aumaenz riu ndaej da hix laep. Cij vih cingj Daegliengz daeuj,cix yinx ok cit goj lajneix. (1) Bohmeh Daegliengz caeux gvaqseiq,ndek de guhgyax.Hoifuk doihengz Sawcuengh le,baihgwnz aeu ndaw yangh baij song vunz bae Vujmingz doeg saw.Haujlai vunz mbouj nyienh bae,naeuz:”Guh naz baengh goengrengz,mengz saw haeux hix maj,byawz nyienh hag couh bae.”Doeklaeng aenvih Daegliengz boux vunz dog,mbouj gaz ndaeng mbouj gaz rwz,ndaw yangh couh heuh de bae lo.Doeg ndaej baetyieb ma le,ndaw yangh lij caengz hai ban Sawcuengh,naz cwzyindenz youh mbouj baen louz hawj de,cij ndaej aeu henz dinndoi geij faen dieg go mak haenx hawj de bau guenj bau ciengx cihgeij.Yienghneix hix hab sim de,de ndet sim guenj ndei di gomak haenx,caiq semz ndaem duhnoh haeuxyangz maenzfaex.Danhseih,geij faen dieg mbouj geijlai hong, ndaej hoengq de cix cawx haujlai saw ma,itmienh yawj itmienh youq ndaw suen mak sawqniemh,miz maz loengh mbouj cingcuj roxnaeuz sawqniemh saetbaih,de couh bae cam Nungzgohsoj ndaw yienh,bae baiq gisuzyenz guh lauxsae,Nungzgohsoj dungzci raen de haengj hag,couh hawj de haeuj swhliusiz bae caz.Baez yamq haeuj swhliusiz ,da de couh byaengq lo.Yienzlaiz gij saw ndaem mak baenz dab baenz dab,miz Saw cuengh Sawgun,lij miz saw guekrog dem.Daj neix de gietsim hag ndei ndaem mak,vih gensez biengz Cuengh baenz aen suen mak bae roengz rengz. Neix Aumaenz cingj de daeuj bang guenj gomak,yawz mbouj hab sim de ne. Rog ranz caemrwgrwg,cij dingqnyi daekgaeuj swenj “giet giet ”. Ronghndwen daj conghcueng rongh haeuj ranz daeuj gig seuq. Daegliengz ninz mbouj ndaek,de naemh hwnj song dahlwg Aumaenz, Dahndwen hau oiq mboeng lumj ngaeux,Dahreux lengj ndaej byaij gvaq hen daemz bya hix diuq,hai!Siengj neix guh maz,ok rog hongh bae langhlangh sim ba. Daegliengz ngamq cengj hwnj mbonq,goenglaux couh daengq naeuz:”Doengj nyouh youq gyaeuj congz.” Daegliengz siengj:Aen doengj nyouh baij youq gyaeuj congz goeng laux,gyae mbouj gaeuq hub,mbouj siujsim couh aeu set deng gyaeuj de,baenzlawz gamj ok ne?Daegliengz swnh bak han goeng laux: ”Mbouj dwg,gou okrog bae yawjyawj.” Daegliengz hai dou byaij ok hongh bae. Goenglaux daenj haiz moeggieg gaen ok dou daeuj,daj baihlaeng hat Daegliengz:”Mwngz ma ranz!” Goenglaux gaem diuz dwngx ndwn laj yiemhranz aegoekgoek, cuengq gaemz heiq,raen Daegliengz mbouj gangj hix mbouj doengh, youh naeuz:”Gou ciuhvunz caet bet cib bi,cij raen gomak gag maj gag gietaen,caengz raen goq vunz daeuj guenj gvaq.Mingh ndei mak baenz loz,mingh yak faex dai roz.coenz vah bouxlaux neix mwngz mbouj rox?Doeng lah sae lah yaeuh vunz gwn,giusevei gou raen lai lo,deuz ndaej gvaq lwgda gou?Mwngz haetcog gwn ngaiz le couh geb viz baema, ndeindei guh vunz!” Aumaenz caeuq Simjmaenz okdaeuj lo,youh gienq youh fuz goenglaux haeuj ranz bae.Dahndwen caeuq Dahreux hix okdaeuj,cien daengq fanh daengq Daegliengz gaej dawz haeujsim. “Goeng gou miz di moengjdoengj.”Dahndwen naeuz,”Liengz dungzci mwngz gaej leix de!” “Liengz gisuzyenz,mwngz gaej dawz haeuj sim.”Dahreux naeuz, ”goeng gou laux lo,bak saemzsez di,danhseih sim de ndei.” Dingq song dah baenzneix gangj,Daegliengz ndwnj gaemz heiq roengz dungx,mbouj guh sing lo. Song cejnuengx boux yawj boux,mbouj rox caiq gangj coenz lawz ndei. Aumaenz caeuz Simjmaenz fuz goenglaux haeuj ranz bae dauq okdaeuj,lumj mbouj miz saeh nei,heuh song dah de baema ninz,cienq naj daengq Simjmaen naeuz:”Nda mbonq Liengz gisuzyenz youq rog ding ba,mienxndaej goenglaux cauj de……”youh gangj vah’unq doiq Daegliengz:”Doiq mbouj cawh,ranz gaeb lai,gaeuj naj gou bae ba.” Aumaenz baenzneix caen sim,Simjmaenz youh baenzneix huzngaeh, Dahndwen caeuq Dahreux,hx baenzneix doeng dauhleix, Daegliengz sim hix roengz lo. (2) Ndoi laeng mbanj,lumj dahsien daengjhai ninz nei,gwnz aek de laeb miz song goengq moh,nduenndumj baenz doiq cij,vunz heuh de guh Ndoisiennawx.Gwnz de dauqcawq ndaem miz gomak,neix couh dwg Aumaenz swngbau aen suen mak haenx.Ndaw suen ndaem miz goleiz gogam,lij miz gobug,cungj dwg nga sengx mbaw henj,miz di deng nyaenh,bouxlawz raen bouxlawz cungj naeuz mbouj miz muengh lo. Seizneix,Daegliengz caeuq Dahndwen Dahreux cingq youq laj gomak ndai rum soeng namh,gyoengqde lienz guh geij ngoenz. Simjmaenz youq ranz moh mba naengj faenj ciengx mou mbouj daeuj ndaej.Aumaenz guh faenj hix mbouj ciengz daeuj,caenh ndaej hoengq couh daeuj suen mak bang fwngz,lienz yiengq Daegliengz hag gisuz. Daegliengz itmienh guh hong,itmienh cienz son daet ngeiq,sat yw gaj nengz,dwk bwnh doenghgij gisuz neix,son ndaej naihsim,gangj ndaej mingzbeg.De mbouj dwg gangjboq,it fuengmienh dwg de gyaez ndaem mak,hai bak couh miz vah;ngeih fuengmienh dwg de caen rox ndaem mak gisuz,mbouj dwg “yaeuh vunz gwn”. Soj miz gijneix,danghnaeuz Aumaenz youq henz,Dahndwen caeuq Dahreux couh ngaem gyaeuj gvak namh mbouj gushing,Aumaenz baez cienq ndang deuz,Dahndwen couh bakraeuz bakdeih,cam neix cam haenx,hix gangj saeh mbanj saeh ranz saeh wnq hawj Daegliengz dingq. Sawj Daegliengz rox daengzahndwen doeg gvaq sam bi siujhag,raen sawgun nanz hag lai,couh mbouj nyienh doeg lo.Dahreux baknaek di, gyaez dinghdingh yawj Daegliengz guhhong,dingq Daegliengz gangj vah.Miz seiz Daegliengz yawj de,de cix cienq yawj lingh giz.De lai doeg geij bi saw,aenvih ndaw ranz swngzbau cwzyindenz,youh guh faenj ciengx mou,hong gaenj vunz noix,cuhcungh caengz bizyez couh doiq hag ma ranz lo. De dingq gangj Daegliengz dwg daj Sawcuengh hag ndawj gisuz, itsim heuh Daegliengz son de hag Sawcuengh,ndei rox ndaem mak, danhseih itseiz hix mbouj ndei hai bak. Suen mak ndai rum caez lo,Daegliengz doiq Aumaenz naeuz, wnggai youq laj gomak ndaem miuz duh ndeu,mboujdanh ndaej sou duh,rag duh miz gwnhliuzgin,naengz caux ndaej danfeiz,dieg mak hix biz lo. Gijmaz gwnhliuzgin,Aumaenz lawz hix mbouj saenq,de dan ngaekngaek gyaeuj riunyumnyum,hix mbouj gangj ndaem,hix mbouj gangj mbouj ndaem. Daegliengz danq gaemz heiq ndeu,sim siengj:”Aeu miz gohyoz gisuz daeuj dajndaem,mbouj miz vwnzva caen nanz.” Daengz raed nyemak,nye lawz raed,nye lawz mbouj dang raed,gig aeu gangj gisuz,Aumaenz caeuq Dahreux baema guh hong ranz,dan ce Dahndwen bang Daegliengz. Daegliengz youq baihnaj raed,Dahndwen youq baihlaeng doq gip doq cug doq gangj:”Baez neix baema mbouj yungh bae dwk fwnz lo.” Daegliengz riu naeuz:”Raemj daengz goek bae ndaej fwnz engq lai hw!” Dahndwen riuhehe:”Raemj daengz goek raeuz couh mbouj miz heiq ciengq lo!”Daegliengz raen de gangj ndaej miz yinx,hix cienq laeng dauq yawj de riu.Dahndwen raen Daegliengz cim de riu,naj hix nding lo.Daegliengz raen Dahndwen naj hoengz,ndaw sim gag ngeix, Dahsau neix naj mbang lai,hix mbouj gamj gwq yawj de lo.Gvaq ndaej yaep ndeu,Dahndwen youh cam:”Siengj cam mwngz gienh saeh ndeu.” Daegliengz doq raed ngeiq doq han:”Gijmaz saeh?” “Siengj cam mwngz miz youx caengz?” Mbat neix lwn daengz Daegliengz naj hoengz lo,de sien danq gaemz heiq ndeu,naeuz:”Hai!Gou roek bi guhgyax,ranz mbouj riengh, reih mbouj naz,dah lawz yawj ndaej hwnj da.” “Gaej gangj yawj mbouj hwnj da,dah lawz seiqneix ndaej riengz mwngz guhciuh,gwn raemx sim hix van.” Daegliengz cienq naj yawj gvaqdaeuj,raen Dahndwen song da ronghliklik cingq cim naj de,Daegliengz naj youh hoengz lo. Song duz roeg douh gwnz dingj faex,yienzlaiz gigi gitgit hemq mbouj dingz,neix hix mbouj hemq lo. (3) Dahndwen daj rox Daegliengz caengz miz “baengzyoux” le,doiq de couh engqgya naeksim,danh aeu Daegliengz youq henz,guh gijmaz cungj daegbied ok rengz.Yienz dwg Simjmaenz hwnj caeux cawj ngaiz romh,neix dwg Dahndwen cawj lo.Aenvih youz de cawj le,couh ndaej lai dwk di youz roengz ndaw vanj Daegliengz bae.Miz haet ndeu, Dahndwen lij caegcaeg dumq song aen gyaeqgaeq,dawz bae gyaeuj swiz Daegliengz cuengq.Daegliengz gwn mbouj dwg,mbouj gwn hix mbouj dwg,geij ngoenz sim cungj mbouj net,baez raen Dahndwen couh naj hoengz. Youq baihnaj Daegliengz,Dahndwen riuriu angqangq,da baenq liklik;Dahreux mbouj swt mbouj ngw,lumj mbouj raen de nei.Dahreux mboujdanh guh hong naek,gueng mou baet ranz dak faenj,yienghyiengh cungj ciengj guh,youh daegbied gyaez goenglaux,ciengzciengz daek haeux ndenq daengz fwngz de bae,cam gwn gijmaz byaek,aeu raemx dang mbouj aeu.Sojyij goenglaux hix ceiq gyaez de,ciengzseiz ndaq naeuz:”Sou cungj deuz cied bae,couh louz Dahreux hawj gou…..” Cin daengz mbwn raeuj fwnraemx ma,gomak biu mbaw mwn cupcup,goleiz hai va haususu,rangrwtrwt.Vunz raen cungj naeuz:”Suen mak bienq lo,guh gijmaz cungj aeu gisuz,mbouj miz Liengz dungzci, senq dai roz liux lo.” Daegliengz sim’angq najhai,ngoenzngoenz nyaengq bae dwk bwnh dakleix,couh dangq suenmak cihgeij ityiengh. Geij ngoenz neix,denhgi yibau cungj naeuz gvaq cingmingz mbwn rengx,heuh gak dieg cunjbei ndei ganghan. Daegliengz cauq Aumaenz doxyaeng cawx couhsuijgih caeu raemx rwed gomak.Aumaenz siengj daengz cawx vafeiz,cawx liuh ciengx mou,lij aeu cawx denmo ma yungh dienh muh mba guh faenj….. De couh mbouj gushing lo. “Yienghneix ndei mbouj ndei,”Daegliengz ok cawjeiq naeuz,”bae ciq daigvanj,daengz sou mak gai ndaej cienz couh boiz.” “Ndei ndei,yawz mbouj ndei.”Aumaenz bak gangj ndei,sim gag ngeix:Suenmak sou cienz baenzlawz yiengh,bouxlawz gaem ndaej maenh, lauheiq “gai rek bae cawx gu” ne. Gienh saeh neix deng goenglaux rox le,de daih fat beizheiq,ndaq naeuz:”Baihgya!Ciuhvunz gou caengz raen gvaq caeu raemx rwed go mak! Naem haeux youz vunz,ndaem mak youz mbwn.Sou rox mbouj rox?Ciq caiq?----mbouj gwn gvaq lwgceu mbouj rox manh….” Goenglaux doq ndaq doq ae’gyo’gyo,Dahreux ganjmuengz gvaq bae bang de bongx baihlaeng. Daeglieng siengj gangj cingcuj,ngoenzneix mbouj doengz seiz gonq, ciq guekgya aeu daigvanj mbouj doengz gaxgonq ciq caizcawj aeu caiq.Danhseih,Dahndwen yiem goenglaux mbouj doeng leix,lau siengsim Daegliengz,ganjmuengz ciengj bak naeuz:”Goeng,mwngz couh siuj gangj song coenz ba!” Goenglaux engq ndatheiq lo,de ngeix daengz gaijfang gaxgonq, mbouj miz boux vunzgoq lawz caeuq caizcawj gungh diuz sim.Daeg liengz daeuj ranz de couh netsim la?Gangj mbouj dingh couh vih daeuj gaeuyinz song dah lan de ne!Gvaiq mbouj ndaej Dahndwen bang de gangjvah.Goenglaux yied siengj yied huj,aeu dwngx diemj Daegliengz ndaq naeuz:”Mwngz daeuj neix gwn duh gou,yungh duh gou,couh aeu lauxlaux saedsaed guh hong hawj gou,mbouj ne,couh geb viz deuz!” Daegliengz hozndat youh siengsim,cienq ndang couh bae gip doxgaiq gienj baufug……

路漫

	(7) Ndit haenq bongx hwnj faenx,haeuxyangz mbaw cungj reuq lo, mbaw gomak hix yienghneix,banhaet miz raemxraiz lij raen heusub, banringz mbaw couh gienj baenz aen lwt nei,miz di mak reuq baenz aen makcauj,baenz dog couh loenq. Daegliengz raen yienghneix,sim’in lumj cax heh,caiq gangj hix gvaiq Aumaenz da mbouj gvangq,heuh cawx couhsuijgih de mbouj cawx, song ngoengz neix daengx ranz vunz ndek faenj mbouj guh bouxboux bae rap raemx rwed gomak,baeg ndaej bouxboux hanh sinz nyouh biu,riu hix mbouj ndaej,daej hix mbouj ok. Dahndwen hix daeuj rap raemx,danhseih mbouj lumj gaxgonq miz gangj miz riu,najbyak doxdaemj hix mbouj swt vunz,Daeglingz ngeix daengz haemh haenx mbouj dap fwen,hix mbouj ndei eiqsei lo.Lauxsaed gangj,dahndwen miz maz mbouj ndei ne?Dahndwen bingzseiz maij gangj maij riu,rox eu fwen,sing youh oiq youh rem, daegmbauq lawz mbouj simmaez.Daegliengz mwngz vih maz mbouj gyaez de,mwngz lij siengj gijmaz,fangz hwnj ndang mwngz la.De miz di ienqhoij mbouj gib lo. (8) Aumaenz daengx ranz vunz hwnz ngoenz rap raemx rwed gomak, seizneix suen mak youh fanj heu lo,lwgmak hix raen maj lo.Aumaenz sim soeng haujlai,baezneix de fug lo,siengj mak mwn mak giet,couh ndaej dingq vah Daegliengz.Yienghneix,Aumaenz mbouj caiq siengj lingh yeingh dem,gietdingh bae ngaenzhangz ciq cienz cawx couhsuijgih! Gvaq mbouj geij nanz couhsuijgih cawx ndaej ma lo,ancang seiz Daegliengz daegbied roengzrengz,mboujdanh doengh fwngz guh,lij naihsim son Dahndwen Dahreux baezlawz hai,miz mauzbingh baenzlawz coih,bingzseiz baenzlawz baujyangj. Mboujliuh,couhsuijgih ngamq cang ndaej,Daegliengz ndang fatsa, noh ndat baenz feiz.Dahndwen siengj mbouj leix,youh hojlienz de,ngeix daengz de boux lwggyax boux vunz ndeu daeuj bang raeuz guenj suen mak, vunz miz bingh,raeuz mbouj leix baenzlawz ndaej,de bae henz congz Daegliengz cam neix cam haenx,ra yw cienq yw,cawj gyaeq mad hanh,saeg vaq saeg buh,nyaengq haeuj nyaengq ok,yienghyiengh bau caez lo.Miz baez ndeu,Dahndwen soengq yw hawj Daegliengz gwn, ngamq gwn song gaemz couh deng rueg,rueg dwk heiq yaek mbaet. Dahndwen sim’in daejfwtfwt bae,Daegliengz raen le hix cibfaen gamjdoengh. Bingh ngamq loq ndei,Dahndwen couh engqgya gvensim de,lau de nit,lau de iek,lau de baeg.Yienghyiengh ciuqgoq beij gaxgonq leix ndei. (9) Daegliengz bingh ndei le,Dahreux dawz gouh haiz moq daeuj hawj Daegliengz,naeuz:”Dahcej gou raen mwngz mbouj miz haizbaengz, de guh ndaej gouh haiz hawj mwngz,mbouj rox hab mbouj hab din?” Daegliengz dingq le naj gwq hoengz,fwngz saenzdigdig ciep dawz, sikhaek daenj hwnj din bae,”hab,hab!”Dahreux raen le riuriri buet deuz lo.Bouxcuengh raeuz guh youx dinghcingz,hingq soengq haiz moq,Daeg liengz fwngz gaem gouh haiz haenx,naj engq hoengz sim engq ndat lo. Ngoenzhaenx youq ndaw suen mak,Daegliengz daj baihlaeng yawj Dahndwen,caen gyaeundei raixcaiz,lienz song diuz mengq duengq baihlaeng hix sawj vunz dwggyaez.Vah bouxlaux gangj mbouj loek, mwngz mbouj gyaez boux de,de ciengq go mwngz hix laihnaeuz de daej, daengz mwngz mbat gyaez de,de ae mwngz hix roxnyinh leix ndeidingq gvaq ciengq go,mwngz gangj gvaiq mbouj gvaiq? “Vei,nye mak neix raed mbouj raed?”Dahndwen nyeux gyaeuj cam de.De lienzmuengz byaij gvaqbae,naeuz:”Raed!”De ndwn youq henz ndang Dahndwen,raen ndang dahde rangrwtrwt,caen mbouj sij ndaej byaij deuz. “Daj seizneix hwnj,mwngz aeu ndeindei son gou,ndaej lwi?” “Ndaej ndaej!”Daegliengz lienzlienz ngaek gyaeuj han,raen Dah ndwen riunyumnyum,ndang ndok doq soeng liux. “Vei!”Dahndwen doenghbaez cungj heuh Daegliengz guh Liengz dungzci,seizneix mbouj baenzneix heuh lo,heuh “vei”,geizheih mbouj geizheih?Saehcingz couh dwg yienghneix,vunz baez rox sim le,gijmaz cungj siengj,Dahndwen naeuz:”Gou hix rox geij cih saw,vih maz yawj mbouj doeng saw mwngz ne?” “Mwngz naeuz Sawcuengh?” “Mbouj dwg,gou naeuz Sawgun.” “Sawgun aeu Vahgun daeuj sij,mwngz mbouj sug Vahgun,dang yienz nanz yawj ndaej rox.” “Danhseih,gou rox doeg ha!” “Ceiq youqgaenj couh aeu rox eiqsei de,beijgangj ba,’suij’ dwg raemx,’goj’ dwg mak,danhseih ‘suijgoj’ mbouj dwg ‘raemxmak’,cix dwg ‘lwgmak’.Youh lumj ‘hoj’ dwg feiz,’caiz’ dwg fwnz,danhseih “hojcaiz’ mbouj dwg ‘feizfwnz’,cix dwg ‘habfeiz’;’caizhoj’ mbouj dwg ‘fwnzfeiz’,cix dwg ‘fwnz’.Caiq lumj ‘fuh’ dwg fou,’fu’ dwg mbwk,’fuhfu’ mbouj dwg ‘foumbwk’cix dwg ‘gvanbaz’.” “Mwngz vaih!Hi…..”Dahndwen gaemq gyaeuj riu. “Sojyij gangj Bouxcuengh raeuz wngdang sien hag Sawcuengh, gou couh dwg aeu Sawcuengh daeuj gag hag Sawgun bw!” “Yienghneix,mwngz son gou hag Sawcuengh lo.” “Ndei ha!Seizneix couh hag.Gaen gou doeg:Ah----” “Ah-----”Dahndwen cim bak de ciuq doeg. “Bah-----”Daegliengz gig nyinhcaen son. “Bei!Najmong!Caengz gietvaen couh hemq vunz heuh ‘bah’…..” Dahndwen naj fwt hoengz,riugekgek siengj buet deuz hix mbouj gib lo. Yienzlaiz dwg ndaw mbanj doengzdoihahrang Dahva Dahgouj Dahfwnh …… “Sou miz maz saeh?”Daegliengz najhoengz cam. “Dangyienz miz lo.”Dahgouj caeux gyawj Daegliengz,”Gou naeuz mwngz hix swsih lai,dan son Cejndwen,mbouj son dou!” “Sou hix siengj hag Sawcuengh?” “Siengj mi!”Dahgouj ai haeuj ndang Dahndwen bae,guhmbenj naeuz:”Cejndwen,bang dou gangj song coenz vei!” Dahndwen riu naeuz:”Sou mbouj miz bak?Bak gou seih bak gim roxnaeuz bak ngaenz?” Dahfwnh riu naeuz:”Bak gim bak ngaenz miz maz citgeiz, bouxlawz heuh bak mwngz singq Liengz,mbouj gouz mwngz gouz bouxlawz,Ha,Cehndwen raeuz!” “Dahfwnh mwngz mbouj doeng dauhleix,vunz ciengz gangjwg bang boh,maex bang gvan.Cehndwen raeuz yienznaeuz caengz haq gvaqbae, seizneix mboujdanh bak singq Liengz,dungx hix singq Liengz lo.”Dahva doq gangj loq lex yawj Daegliengz.Dahndwen caeuq Daeg- liengz naj doq hoengz lo.Gyoengq vunz riu ndaej diengz cix yaek loemq. Daegliengz naeuz:”Ndei ba!Raeuz sij mingzcoh hwnjdaeuj, haemhcog hai ban hag.” Yienghneix,Dahndwen dawz bit dawz ceij okdaeuj,cug boux cug boux sij mingzcoh. “Dah fangz mwngz!Baenzlawz sij gou guh Dahgouj?”Dahgouj rax mbwt goekga Dahndwen. Yienzlaiz Dahndwen aeu Sawgun geiq coh,dawz Dahgouj sij baenz ‘ma hung’.Gyoengq doih doeg gvaq geij bi siujyoz,yawj ok geij cih Sawgun,hix riu hwnjdaeuj. Dahndwen na doq hoengz,lienzmuengz naeuz:”Gou mbouj dwg miz sim luenh sij,dwg gou mbouj rox sij Sawcungh gwnvi lo!” Mbouj rox bouxlawz ciep vah naeuz :”Caeklaiq dwg Cejndwen sij,danghnaeuz dwg daegmbauq sij,daengz cog bouxlawz leix gamj daeuj cam duz ‘ma hung’ mwngz guh baz!” Gyoengq doih baez dingq couh riu goenjdat,hoengh dwk ndaw suen mak geij doiq roeg mbinhuhu. Raq rumzliengz ci daeuj,heiq mak rangrwtrwt.Mak gaenq ndaej mbaet lo,mak rang mak van,duengq dwk nyefaex cungj duiq liux,youq laj ronghngwen ingjyamyam.

路漫

	8.Coit Saeh Moq Haemhndaep,Lij Sungh gwn caeuz gvaq couh okbae,meh de laihnaeuz de bae ngonz denyingj,mbouj cam de.Meh Lij Sungh gonq souh liux buenq seiq haemzhoj,seizneix gwndaenj bienq ndei,hix rox haujlai dauhleix.Danhseih,couh seih ndaw uk lij miz di swhsiengj gaeuq,lumj de ngeix:Ngoenzcog dwg nienz coit,wngdang hawj Lij Sungh gwn ndei daenj moq,gitleih gitleih,bimoq swnghhoz couh engqgya ndei. Baenzneix,de dawz gouh haiz moq daeuj,cunjbei hawj Lij Sungh ma daenj.Caj ha caj,vunz ngonz denyingj cungj ma caez lo,goj caengz raen Lij Sungh ma.”Roxnaeuz de bae haihoih ne?”Meh Lij Sungh siengj. Youh caiq naengh caj,gaeq haen it lo,lij caengz raen ma.”Daihgauq dwg bae caeuq bouxlawz ninz loba.”De baenzneix siengj couh roengz ninz lo. Nienz coit,meh Lij Sungh daihcaeux couh hwnj congz,nda rek cawj cadangz,caj Lij Sungh ma gwn.De siengj:”Hainienz raen diemz ma!” Ngamq cawj goenj,Lij Sungh ma daengz lo.Meh de baez yawj.Lij Sungh duet din ga uq namh,buhvaq goj gyuek lumj vaiz rouh nei,youh sim gyaez youh hozndat.Sim gyaez de baenzneix gaenx hong,hozndat de daihnienz coit baenzneix ndang gyuek!Danhseih,youh mbouj ndei nauh de. “Mwngz haemhlwenz bae gizlawz?”Meh sim dingh heiq swnh cam. “Haeuj yiuz vei!”Lij Sungh riuhihi han.”Gisiengdaiz bauq naeuz ndawco miz fwn,yiuz haeuj caengz caez,haemhlwenz dou lienz hwnz bae haeuj caez fung ndei,mboujni fwn doek roengzdaeuj cien couh vaih lo.” Meh de dingq le,rox daengz cibfaen miz dauhleih,roxnyinh daengz haemhlwenz siengjfap loek lo.Aeu swnghhoz gvaq ndaej ndei,cijnaengz buq laeh gaeuq,daiqdaeuz gauj ndei swnghcanj,caeuq nienz coit daenj moq gwn ndei miz maz gvanhaeh ne! Baenzneix de caiq mbouj ndatheiq lo,caemhcaiq gyaez lwg de lo. Gvaq co’ngeih,mbwn roengz fwn lo,ndaw doih seyenz sim’angq haenh naeuz:”Lij Sungh gyoengq binz yacunghnungz cinghnenz neix caen ndei!”Meh Lij Sungh dingq le sim hix angq.

路漫

	4CAWX BIUQ Liuz Samcej sangoh leizdaizsai yaek youq yienhsingz hai,Daeggang angq ndaej geij ngoenz ninz mbouj naek. Ngoenzlwenz dwg couhmoz,cuengqhag le Daeggang couh caeuq doengzdoih youq cauhcangz hagdangz hag vunzhung doxdax eu fwen,mizyinx dangqmaz. Daihgya sien eu fwen,fwen gig vaiq couh eu“mbouj miz”lo,youh gaij ciengq liuzhingz gohgiz,mwngz hot gou hot,gou eu sat le mwngz daeuj swnj,nauhyied raixcaix,itcig eu daengz daengngoenz doek bya,mbwn fuemx le cij sanq. Daeggang dauqma daengz ranz,youh iek youh baeg,gwn caeuz gvaq couh siengj ninz. Haemh neix,Daeggang gyaeuj ngam dog swiz,couh ninznaek lo,ninz ndaej gig hom gig hom.Byonghhwnz,de loq fangzhwnz mbat doeksaet couh ndiu gvaqdaeuj,de loq raene bae yawj Liuz Samcej sanhgoh leizdaizsai dauqma, deng daxmeh gyaeng youq ndaw rug boih Yinghyij danh swz…… De ndiu gvaqdaeuj caiq hix ninz mbouj naek dem,yawj yawj cung,haj diemj ngeih cib faen.Baeznaengz,daxmeh cingq youq duenh neix hwnj congz hawj de cawj ngaiz romh ne. 　 Daxboh bae gyae mbouj youq ranz,ndaw ranz hongranz hongrog cungj dwg daxmeh dwgrengz causim,caen sinhoj hw!Ngoenzneix mbouj bae hag,wngdang hawj daxmeh ndeindei yietnaiq cijndaej. Liuz Samcej sanhgoh leizdaizsai ngoenzneix hai daiz,gihvei nanz bungz hw, itdingh hawj daxmeh bae yawjyawj,angq mbat he. Daeggang caegcaeg hwnj congz,caegcaeg daenj buh,caegcaeg ndonj haeuj bakcauq,caeg caeg swiq gva cit feiz…… “Daeggang,mwngz guh gijmaz ha?” Daxmeh dauqdaej dwg daxmeh,daeglwg miz saek didi yiengj doengh cungj yien sim de. “Meh,mwngz ndeindei ninz faenh mwngz,ngoenzneix mwngz hab yietnaiq lune.” Insik gij gyaez daxmeh,couh aeu lai hawj daxmeh faenh gyaez he. “Aiyo,lwg baujboiq gou!Gij hong neix lawz dwg mwngz guh ha!” Daxmeh dauqdaej dwg daxmeh,de mbouj nyienh raen daeglwg guhhong,couhcinj didi hong gig mbaeu gig mbaeu,hix mbouj nyaenx sim hawj lwg guh. “Meh,mwngz yawj gou!”Daeggang bekbek aen aek noh lij caengz na haenx,doiq daxmeh naeuz,“gou youq hagdangz lij vat dieg ndaem va ne.” Daxmeh caenciet dwk yawjyawj lwg,ndawsim naeuz: O,caen bw,lwg caeuq meh sang bingz gyaeuj lune! 　 “Maj hung dahraix lo!”Daxmeh angq riu lo,hoeng cix mbouj citgeiz lwg vat dieg roxnaeuz ndaem va,youh naeuz,“caiq hung,caiq sang,mwngz lij dwg lwg daxmeh! Miz vunz naeuz,ceiq lijgaij lwg dwg daxmeh;hoeng ceiq mbouj lijgaij lwg caemh dwg daxmeh. Daxmeh mbouj leixlangh gij simcingz Daeggang, nyengh dawz de “cingj”ok bakcauq,naeuz: “Dingq gangj, mbouj siengj ninz couh bae yawj saw faenh mwngz ba!” 　 Daxmeh cawj ndei ngaizromh,mbwn gaenq rongh lo.De byaij ok bakcauq,cingq yaek heuh lwg daeuj gwn,cix raen lwg cingq bang swhgeij coih danci,caen miz di haemz diet mbouj baenz gang lo,hemqyaya naeuz:“Aiyaya!Byawz heuh mwngz guh gij neix, mwngz hab bae……” “Mwngz hab bae doeg gauhcungh,hwnj dayoz,daengz cog bae guekrog……” Daeggang gaenq dawz gij vah daxmeh boih sug boih raeuz lo. 　“Mwngz rox couh ndei,mwngz rox couh ndei!” 　“Danhseih mwngz cix mbouj rox,aen sabci mwngz yaek vaih lo,caiq mbouj coih,caj mwngz gwih ci roengz lingq yaek sab ci,goulau……” 　“Gaej gangj vah rwix!”Daxmeh mbouj angq dingq gij vah mbouj ndeidingq haenx,sikhaek mbouj haengj Daeg gang gangj roengzbae. De gvaqbae napnap aen sabci,riu lo.Hoeng de ndawsim cix mbouj muenxeiq:“Byawz heuh mwngz cau faenh sim neix ha?Saek maenz ngaenz,daxmeh rox bae henz gai cingj vunz coih hane.” 　“Daxboh mbouj youq ranz,ndaw ranz gou couh dwg bouxsai!”Daeggang sawqmwh hag yiengh vunzhung hwnj daeuj,siengj heuh daxmeh hix dingq de mbat ndeu.De cingj daxmeh ndwn gvaq mbiengj bae:“Mwngz gaej gaenj,miz aen lozding he lij caengz niuj maenh li.” 　Coih danci,daxmeh saedsaeh dwg vaihhangz,de mbouj ndaej mbouj dingqvah ndwn gvaq mbiengj bae. “Coih ndei lo!”Daeggang daekeiq dwk yawjyawj dax meh, yaengxyaengx fwngz hag vunzhung nei naeuz;“Cingj ba!” Danhseih,Daeggang hag guh “bouxsai”“vunzhung”cij ndaej yaep he,daxmeh couh rag dawz song fwngz uqyag de,lumjbaenz rag lwgnyez song sam bi nei,rag bae henz raemx aeu genj daeuj swiq mbat youh mbat,cig swiq ndaej mbouj miz saek di riz uq. Daxmeh dauqdaej dwg daxmeh.Youq ndaw sim daxmeh lwg caiq hung hix ciengxlwenx dwg lwgnyez. 　Daxmeh doi danci hamj ok bakdou,ngeux gyaeuj doiq Daeg gang riunyumj naeuz:“Gwn ngaizromh le youq ranz yawj saw caj gou,daxmeh yaep he couh ma.” 　　Daxmeh aen sim he mbek guh song,mbiengj he daiq ok dou bae,mbiengj he louz youq ranz buenx lwg. 　　 Daeggang baelaw miz simgei gwn haeuxromh,engq mbouj hab caj daxmeh dauqma,gangj mbouj dingh de dauqma le caen dawz lwg gyaeng youq ndaw rug boih Yinghyij danhswz,baenzneix couh boihseiz lo.Aeu vaiq di bae cawx biuq cijndaej. 　 Daeggang sikhaek dawz hab rom ngaenz okdaeuj, ngaenz lingzyungh de gyonj rom youq ndawde,bingzseiz mbouj sij ndaej cawx saejdaeuz gwn,cungj rom ngaenz bwh saekseiz gip yungh. Dawz ngaenz daeuj geqgeq,lij miz haemq lai bw!Daxmeh、Cangh daxbuz、Cau daxheiz、 Dahgien……gyoengqde baeznaengz cungj doiq Daeggang gig ndei,miz maz cungj haengj faen hawj Daeggang faenh he,mbat neix bae yawj Liuz Samcej sanhgoh leizdaizsai,hix itdingh aeu cingj gyoengqde caez bae.Deng lo,aeu daez gonq bae lwnh,mboujne miz byawz nyaengq bae gyawz le, biuq beg cawx mbouj gangj,loek gvaq gihvei cij hojsik ni! 　Vunz gaenj mbwn ndi gaenj,Daeggang bae lwnh geij boux neix,cukcuk sai bae song aen cungdaeuz seizgan! “Mbouj rox biuq ndei mbouj ndei cawx,dingqgangj vunz cawx biuq hoengh ne.”Daeggang lwnh vunz caez le,gipgip muengzmuengz couh buet ma ranz,dawz ndei ngaenz,doi hwnj danci cingq yaek okdou,dingjlingz dax meh hix roemx haeuj ranz daeuj! 　 Yawz banh lu?Daxmeh hoed mbouj hoed naeuz bae yawj eu fwen dwg“langfei ginhswz nenzvaz””damnguh vangzginh seizdaih”ne?Bonjlaiz,ngoenzneix hix siengj heuh daxmeh bae,dwg dajsuenq sien yaeuh de naeuz bae yawj Yinghyij yienjgangj(doengh cungj hozdung neix daxmeh dwg ceiq angq cihciz lo),caj bae daengz yencangz, raen daengz ciengzmienh yienghhaenx nauhyied、 goksat,caemhcaiq miz Cangh daxbuz daengj daeuj dox buenx,daxmeh itdingh mbouj gamj hoed dem.Danhseih, seizneix biuq lij caengz cawx ndaej hw…… 　 Daeggang cingq naemj daengz neix,Cangh daxbuz doq dub hwet doq byaij haeuj ranz daeuj,hai bak couh doiq daxmeh naeuz:“Daeglwg mwngz caen rox guh hw,gij fungh’ohmeiz gou mbouj yungh gou buen dem!” 　　“Daeggang?”Daxmeh baez anj,laihnaeuz lwg de saj manz nyex hux lo,“de loengh meiz mwngz vaih bae ha?” 　“Mbouj,mbouj dwg.”Cangh daxbuz aj bak heujvauq de riuhoho,“cungj baengh de li,buen hwnj haj laeuz bw,nanzvi de,ngamq cib lingz bi lwgnyez hw!” 　 “Yawz mbouj dwg ne,didi hung lwgnyez,dinfwngz ak hane!”Cangh daxbuz bak ngamq dingz, Cau daxheiz vunz daeuj sing daengz. 　 Daxmeh youh baez anj,boizlaex riuriu,naeuz:“Lwg gou mbouj roxsoq,hawj sou dem mazfanz lo.” 　“Yawz gangj gij vah neix!”Cau daxheiz angqriu hwnjdaeuj,“conghheuq ranz gou deng saek lo,gou bae gyongz haih daengx ndang mij liux,lij gyongz mbouj doeng.Daeggang baez gyongz couh doeng lo,dwg saefouh iq ho!” 　 “Daxheiz,cingj mwngz bang gou hawj go Gang!”Dahgien buet haeuj ranz,dawz hab dangz he oet haeuj fwngz daxmeh Daeggang, cienq ndang youh buet ok ranz. 　 “Dahgien,Dahgien,mwngz……” 　 Daxmeh Dahgien riengz dwk gaen haeuj ranz,doiq daxmeh Daeggang naeuz:“Sim’eiq lwgnyez,mwngz couh gaej yiemz dem lo!” 　 Ndaw ranz sawqmwh nauhyied hwnjdaeuj,Daeggang youq henz siengj gej song coenz,hix capvah mbouj ndaej. Daeggang engq simgip lo,youq ndaw sim amqamq gouz gyoengq ranzrik:Sou gaej dawz gij saeh bae yawj eu fwen haenx laeuh okdaeuj hw,danghnaeuz hawj daxmeh gou rox le,gangj mbouj dingh daihgya cungj dwg“duzmeuz haeb ve vaiz----angq ndwi”hw! Daxbaenh,Daeggang bae daengq ranzrik,ranzranz cungj miz hong nyaengq guh,vihliux hawj daihgya ndaej cuengqsim bae yawj eu fwen,Daeggang cix cug ranz bang guh di hong swhgeij guh ndaej daengz haenx.Couh gangj Dahgien ba,yienznaeuz dah mbouj miz maz saeh,hoeng ndaw ranz vunzhung nyaengq hong mbouj ndaej leix de,de cingq daejfetfet ne,caeklaiq Daeggang bae daengz,daeuq Dahgien guh’angq,Dahgien cij caem daej…… Doengh gij saeh neix,daxmeh naengz lijgaij lwi? Daxmeh haengj Daeggang bae cawx biuq lwi? Biuq!Biuq!Caiq mbouj bae couh cawx mbouj ndaej lo!Daeg gang gip ndaej lumj feiz yaek remj caekhaex,sien yaeuh daxmeh ndaej duet ndang ok dou ba…… 　 Danhseih,mbouj caj Daeggang hai bak gangjvah, daxmeh lumj seiziq nei umj hwnj Daeggang bae naengh gwnz daengq,dawz hab dangz Dahgien soengq haenx oet hawj de,naeuz: “Yawj mwngz yaek lumj duzmeuz ndaw cauq,daengx ndang mij caez lo,vaiq rieg buh ba!” 　 Daeggang fwt ndwn hwnjdaeuj,hag yiengh bouxsai hung,euj hoh fwngz gwggwg yiengj. Daxmeh dauqdaej dwg daxmeh,lwg caiq rox cang yiengh,youq ndaw sim daxmeh,lwg caiq hung hix ciengx lwenx dwg lwgnyez. Daxmeh iet fwngz bae bang Daeggang gej gaetbuh rieg buh. 　 Daeggang siengj laengz daxmeh,hoeng laengz mbouj ndaej.Saeg buh,dwg daxmeh guhcawj. 　 Cangh daxbuz gyoengq ranzrik raen yienghneix cix riusasa bae. 　 “Biuq!Biuq!Gyeongqde cingq caj gou aeu biuq li!” Daeggang sim baez gip,mboujyouz lot bak naeuz:“Meh,gou yaek aeu bae cawx biuq nw.” 　 Vah baez ok bak,Daeggang couh ienqhoij lo,cix caj daxmeh hongz donq he lo. 　 “Gaej gaenj!”Mboujliuh,daxmeh angqvauvau daj ndaw daeh mbon ok daeb biuq he okdaeuj, naeuz:“Daxmeh romh romh okbae, baizdoih song aen cungdaeuz,hauj mbouj yungzheih cij cawx ndaej hane.Mwngz ha,gyaez fwen lumj gyaez mingh bae,mbouj hawj mwngz bae baenzlawz ndaej ansim yawj saw……” 　 “Meh,geijlai mbaw?”Daeggang lauheiq daxmeh cawx noix lo,lienzmuengz cam. 　 “Gouj mbaw.” 　 “Gouj mbaw?”Daihgya geizheih dwk caemhbak naeuz. 　 “Dwg ha!”Daxmeh riuhaha naeuz,“Samcej,Samcej,sam sam ndaej gouj vei!” Daeggang coemj haeuj ndaw rungj daxmeh,yaek daej yaek riu,lumj laeq lwgnyez lij ngah gwn cij nei.

路漫

	7 Saeh Moq Lajmbanj Gyaeprongfaiz Daxmeh bae ndaw singz yawj dahlwg de,dahlwg de youq inhgvanj guh fuzvuyenz.Youq bakdou binhgvanj,dahlwg raen daxmeh daenj aen gyaep rongfaiz he,naj baez nyaeuq,naeuz:”Meh,mwngz daenj aen gyaep nyaenx doj,mbouj lau vutnaj Bouxcuengh raeuz ha?” Daxmeh mbouj rox sim dahlwg,ngeizvaeg cam:”Mwngz gangj gijmaz?Aen gyaep neix lij moqsak ne,baenzlawz youh vutnaj?” Song mehlwg cingq gangjvah,geij boux laujvai humx gvaqdaeuj, angqbuepbuep vix gyaep gwnz gyaeuj daxmeh,mbouj rox gangj gijmaz. Daxmeh bibi gyaeuj,naj awwt. Boux laujvai he mbe hai haj lwg fwngz,”gijlij gukluk” hemqyaya. Henz ndang miz vunz fanhoiz naeuz:”De gangj,haj cib meijyenz yaek cawx aen gyaep mwngz ne.” Daxmeh riu lo,fwngz doq duet gyaep roengzdaeuj,doq gangj doq ndenq gyaep gvaqbae:”De caen haengjheiq,soengq hawj de,mbouj ngah cienz.” Laujvai coux dawz aen gyaep,angq dwk diuq hwnjdaeuj. Daxlwg raen le,aen naj fwt hoengz,ndaw sim cix angq. Boux Riengzlaeng Sicangj roengz lajmbanj genjcaz gunghcoz,dauqbae seiz bae Namzningz veibau. Lajmbnaj coih miz haujlai diuz roen moq,bouxhaici mbouj rox byaij diuz lawz gyawj di.Daegmingz gag bek aek naeuz guh daiqloh, hoeng iugouz dawz de dang boux riengzlaeng sicangj. Bae daengz Namzningz,haeuj binhgvanj seiz,fuzvuyenz raen dwg sicangj,lienzmuengz angqyangz ciepdaih,anbaiz dauq rug ceiq ndei he hawj sicangj,cix lingh hai fungh fuengz he hawj Daegmingz caeuq boux haici caemh ninz. Sicangj vad fwngz naeuz:”Mbouj lo,sam vunz gyonj niz dauq rug gou ba.” Daegmingz cix naeuz:”Mbouj gauxca lingjdauj lo,hix hawj gou hai dauq rug lumj sicangh haenx ba.” Fuzvuyenz veiznanz lo,gaeu gyaeuj yawjyawj sicangj. Sicangj doiq Daegmingz riu naeuz:”Rug duh mwngz mbouj ndaej bauqsiu bw.” Daegmingz hix riu naeuz:”Mbouj youqgaenj,gou gag ok ngaenz.” Sicangj geizheih lo,cam:”Mwngz neix dwg……” Daegmingz daekeiq digdig,naeuz:”Mbouj muenz mwngz,gou guh hongnaz baenz byongh ciuz vunz ,seizneix yienghyiengh cungj gvaqyinx gvaq lo,cix caengz cimz gvaq dang lingjdauj dwg maz feihdauh,ndigah couh riengz mwngz daeuj gvaq baez yinx he!” Fatyienh Banhaemh,ndaw singz,daeng rongh yaepmigmig,vava loegloeg, nauhyied dangqmaz. Vunzlai lumj vaizrouh byaij gwnz gai,ndawde miz dahsau he daenj vunj lienz buh,youq laj daeng rongh daegbied iengjda. Daegmbauq he lumj fatyienh maz nei,song cik da dinghdingh cim gwnz ndang dahsau. Dahsau dingz roengzdaeuj,cienq caekhaex coh daegmbauq. Daegmbauq lienzmuengz yut bit ceij okdaeuj,fwngz riengjret veh gijmaz. “Mwngz!”Dahsau cienq naj gvaqdaeuj,caengz de,cingq yaek ndaq,aen bak hai le cix mbouj rox hup lo. “Aiyu,dwg mwngz ha,laux doengzhag!”Daegmbauq angq hemq hwnjdaeuj,”Gou youq mbanj dou fuzcanghcangj guh sezgiyenz,dauq vunj mwngz caen lengj,hawj gou maez lo……”gangj le youh dingz roengzdaeuj cim dahsau,”Aiya,doengh bi haenx buh hong seizneix bienqbaenz vunjva vunjmoq,gou cix yawj mbouj roxnaj lo!” “Ce!Lij lumj gaxgonq ityiengh vad!”Dahsau hix cimyawj daegmbauq hwnjdaeuj,”Yu,dangnienz hwnjdangz caeg veh ma veh meuz,seizneix guh sezgi hwnjdaeuj lubw!” Song vunz baez angq,yaengx fwngz doxbek,langh sing riuhaha hwnjdaeuj,nyex ndaej vunz daengx gai cungj nyeux gyaeuj gvaqdaeuj …… Homvan Baez neix bae lajmbanj,dingqgangj faengx noh mouhom gig ndei gwn,gou couh bae cimzcimz. “Ndei gwn lwi?”Gou ngamq gwn gaemz ndeu,couh miz sing unq- nemnem he cam. “Hom,van!”Gou ngiengx gyaeuj baez yawj,ngawz lo.Yo,dwg dah de! Geijlai bi gaxgonq,caemh youq gizneix,gou gaem aen manzdouz he cingq gwn dwk,dahsau iq byombyet he song da dinghdingh cimyawj aen manzdouz gou,gou cix mbek dip he faen hawj de,de ciep gvaqbae couh oet haeuj bak,lumjbaenz iek gvaq geij ngoenz……”Ndei gwn lwi?” Seizhaenx gou hix yienghneix cam de.”Hom,van!”De ndaw bak hamz manzdouz,hamzhuz han gou,youh ngaek gyaeuj deihdeih.”Ndaw singz gijgwn hom van lailai ne.Majhung le,couh haq bae ndaw singz, yawz- yiengh?”Gou seizbienh gangj coenz vahriu he. Seizneix gou cix lau de hix cam gou:”Seizneix lajmbanj gijgwn hom van lailai ne,mwngz yawz mbouj daeuj neix hwnjdou?” Caeklaiq de nyinh mbouj ok gou daj ndaw singz daeuj,aenvih seizneix ndangdaej lajmbanj beij gij ndangdaenj ndaw singz mbouj miz maz doxca lo. (Lij Faz) (Gvangjsih Minzcuz Bau 2003.10.22)

路漫

	Cien Raek “Byala”sing he，ndaek cien raek ndeu，biek cien doih lo，doek roengz gwnz maxloh bae. “Hai——”De danq gaemz heiq ndeu，gig hojlienz dwk muengh yawj cingq daengj hwnj dabdab laeuz sang. Gwnz maxloh，vunz bae ci dauq，damrengh mboujduenh.Vunzraeuz cingq nyaengq gangjvah，nyaengq ganj loh，byawz hix mbouj yawj saek baez cien raek. De vih deng vunz ndek cix ndatheiq，cix ndaq vunz.Hojsik mbouj miz vunz roxnaj de，dingq rox vah de.De citcangcang dwk yawjyawj bonjfaenh，siengsim danq naeuz：“Byawz heuh gou mbouj miz gok ne？Byawz heuh gou hoij mbouj hwnj giengh ne？……” Doiq youx he menhmenh byaij daeuj.Dahde cij goq cim yawj naj daegde，fwt “gadaek”sing ndeu，giuj haiz sangsang haenx caij deng laeng hoz cien raek，dahde cix aiyo aiyo dwk guh’unj，yienghneix daegde yungh rengz dik cien raek baez ndeu. Cien raek muengh doiq vunzyoux neix bae gyae，yienznaeuz deng dik loqloq rox in，hoeng ndawsim cix roxnyinh miz cungj angqyangz ndeu：Dauqdaej mbouj ndaej mbouj yawjraen de youq neix！ Mbat dik neix dik cien raek bae giz dieg moq ndeu. Neix dwg diuz loh iq ndeu，mbouj faen ci vaiq ci menh、ci byaij vunz byaij gijneix，fanjcingq baedauq swyouz，mbouj daemj naj daemj ndaeng couh baenz. Seizneix cien raek gig yienjda lo.Hoeng vunz bae ci dauq，laebdaeb mbouj duenh，yingzlij mbouj miz byawz yawj de saek baez. De vih cungj mbouj miz vunz leixlangh neix gamj daengz nanzgvaq. Gyaq danci he cung gvaqbae，byala sing he，dawz de sinz daengz loh cunggyang，boux gwihci vet coenz vahhaeu yakdingq ndeu，lij mbouj nyienh ngeux gyaeuj yawj de saek baez. Gyaq mohdozceh ndeu hai gvaqbae，caekhaex baez diuq，baeuh de gvaq henz loh.Mohdozceh gawqyienz mbouj numq saekdi，hai bae gyae huhu. Baenz ngoenz sinz gvaqdaeuj baeuh gvaqbae，mbouj rox cungzfuk geijlai baez.“Mbouj yungh geijlai nanz，gou couh deng nienj baenz mba baenz faenx gwnz loh，caiq mbouj ndaej heuhguh cien aen mingzcoh neix lo！”Cien raek dwgrengz dwk gag naemj. Doeklaeng miz ngoenz ndeu，gyaq cihung ndeu hai gvaqbae，meh lunzgau hungmbwk baeuh de roengz ndaw mieng henz loh bae.De cix deng dumh lo，daj neix sup mbouj daengz hoengheiq，yawj mbouj raen ndit，caiq hix mbouj yungh nyaenxheiq vunz mbouj leixlangh roxnaeuz song da vunz yakyawj haenx dem lo. Ngoenz daihngeih，gwnz maxloh raemx dumh baenz benq，raemx uq baenz dah，vunz byaij loh deng duet haiz mad，ci iq ci hung deng hai menh，vunzyoux deng bik yienj “Cuh Bazgai aemq bawx”. “Haengjdingh dwg gaiq cien raek haenx saek le guenj baiz raemx.” Dauqdaej miz vunz ngeix hwnj gwnz loh neix miz gaiq cien raek ndeu.

路漫

	5CIM IU Cim iu,“iu”,hix couh dwg “it”.“111”dwg Yangh Lajbya guh ginghci fazcanj gveihva aen cijbyauh he :Couh dwg moix bi moix vunz aeu miz 1 cien gaen haeux,10 duz mou,100 duz gaeq.Vih saedyienh aen muzbyauh neix, yangh cwngfuj daegdaengq laebbaenz "111" yihyen,cienmonz vih haeuxnaz、mou、gaeq fuengz bingh yw bingh.Cawjguenj "111" yihyen dwg boux canghyw doj he,de yw bingh coengzlaiz mbouj heuh gwn yw,baebae dauqdauq dw fag cim ndeu.Yw vunz dwg fag cim neix, yw doihduz dwg fag cim neix, yw loegcak caemh dwg fag cim neix. Couh gangj yw doenghgo mbouj dawz aen ba,danghnaeuz haeuxyangz、gaeugva cij hai vaboux mbouj dawz aen,de aeu fag cim de camz geij baez,mbouj geij ngoenz couh hai vameh rim go bae.Yienghneix, vunzraeuz couh heuh de guh “cangh cim”.Daj de guenj “111”yihyen le, fag cim de lumj saj bajheiq nei loengh dwk vunzraeuz mbouj mingzbeg cix heuh fag cim de guh “cim iu”, cih “iu” neix mbouj dwg “it” dem,eiqsei cix dwg “iucing、iugvaiq” hane. Gizsaed,“cim iu”cix mbouj “iu” ne, aenvih canghcim youq lajmbanj guh canghyw gaenq miz sam cib lai bi, dawz cim yw bingh gaenq gig sug, ciengzciengz guh ndaej daengz baez camz bingh couh ndei. Gangj daengz hawj doenghgo camz cim, gwnz bauganh gaenq baudauj gvaq, mbouj dwg de fatmingz ne. Aeu gangj caencingq saenzgeiz lij dwg de hawj soujfuz dohlahgih dajcim “yw bingh” gienh saeh neix lo. Goj lij dwg daj “111” yihyen gangj hwnj. Seizneix dwg sicangz ginghci nienzdaih, guh gijmaz cungj noix mbouj ndaej cienz. Hoeng yangh cwngfuj itseiz youh dawz mbouj ok baenzlai cienz daeuj banh yihyen, cijndaej ciuq vunz soq daeuj dan sou “gujginh”. Ndaw yangh miz boux he heuh Daegsan, geij bi neix cawx ndaej soujfuz dohlahgih guh dajyinh, cix dawz nazreih cienj bau hawj bouxwnq, de swhgeij caiq mbouj guh hongnaz, hix mbouj ciengx mou gaeq dem,ciuq gangj de caeuq “111”yihyen gaenq mbouj miz gvanhaeh lo. Danhseih, de lij dwg nungzyez hugouj, “111”yihyen “gujginh” dwg ciuq nungzyez hugouj daeuj faendan, de dangyienz hix mienx mbouj ndaej.Yienhguen mbouj ak gvaq yienh guenj, Daegsan swhyienz mbouj gamj mbouj gyau “gujginh”, hoeng ndaw sim de itcig mbouj fug, cungj siengj ra gihvei ciemq ndaej saekdi leihik. Geij ngoenz neix, aen soujdoh Daegsan laux ok mauzbingh, swgheij coih bae coih dauq cungj mbouj dingj saeh, cijndei doz ndaej couh doz, rag ndaejcouh rag, max bingh dangguh max ndei gwih. Ngoenzneix, Daegsan hai soujdoh youh okdou lo, bae daengz byonghloh youh deng monfeiz.De heux soujdoh benz hwnj benz roengz, lumh baenz buenq ngoenz, lij dwg coih mbouj ndei.Cingq famh nanz seiz, mboujliuh ngeux gyaeuj baez yawj, mbouj gyae mbouj gyawj cingq bauhmauz youq bakdou “111”yihyen! Daegsan cehda baez cienq, siengj daengz ndaw yihyen neix swhgeij miz gujginh ne, bingh gaep luenh ra yw, yawz mbouj bae ra yihyen bang coih,danghnaeuz yihyen mbouj coengz coih, couh heuh gyoengqde hawj gou ok “cienz yw”! Siengj daengz neix, Daegsan couh gipgip muengzmuengz buet haeuj yihyen bae, raen daengz canghcim couh hemq:“Vaiq di, aen gih gou miz bingh lo!”Canghcim dawz “gih” dingq guh “gaeq”, muengz cam:“Youq gyawz?”Daegsan han:“Youq rog dou.” Songde buet ok dou bae, canghcim daengz henz soujdoh baez yawj, ndaw dohdouj hoengqhanghang, cix ndaq Daegsan luenh yaeuh vunz. Daegsan naeuz:“Dohlahgih miz bingh,mwngz mbouj yw?”Canghcim naeuz:“Luenh raeuq! Gou cij yw gaeq lix, mbouj yw gih dai!” Daegsan naeuz:“Aen gih gou mbouj dai hane, haxbaenh lij buet ndaej guengzliklik.”Canghcim ndatheiq lo, naeuz:“Roet ma! Gou cij yw gaeq noh, mbouj yw gih diet, rox caengz?” Yienghneix, songde mwngz coenz gou coenz, yied ceng sing yied sang, yinx ndaej haujlai vunz daeuj humx yawj. Ciemhciemh, vunzlai dingq rox songde ceng gijmaz lo, couh yaengswgswg hwnjdaeuj, miz di naeuz Daegsan manz gyangq mbouj gangj leix, miz di naeuz “111”yihyen luenh faendan gujginh hix mbouj deng. Daegsan dingqnyi miz vunz bang swhgeij gangjvah, sim engq vuengh lo, gangj sing engq hung hwnjdaeuj:“Mwngz mbouj yw, couh doiq gujginh hawj gou, mboujne, couh aeu cienz hawj gou bae coih.” Canghcim ndaw sim gag ngeix,baenzneix doxceng roengzbae yingjyangj mbouj ndei, mbouj yawz sien bang de yawjyawj,hixnaengz ndaej yawj ok mauzbingh daeuj. Yienghneix, canghcim mbouj caiq gangj gijmaz, gag benz hwnj soujdoh bae, gizneix cimcim, gizhaenx lumhlumh, yaep he, daj gwnz soujdoh diuq roengzdaeuj, doiq Daegsan naeuz:“Gou hawj aen gih mwngz daj song cim yawjyawj, ndei mbouj ndei?” Dingq daengz canghcim yaek hawj soujdoh dajcim, gyoengq vunz bouxboux da daengx bae,miz vunz geizheih, miz vunz simngeiz, haujlai vunz cungj caenh gvaqdaeuj, siengj caen da yawjyawj baenzlawz yungh “cim iu”hawj soujdoh yw bingh. Yaep ndeu, canghcim dawz daeuj sam ci cim hung, daihgya rox cungj cim neix dwg yungh daeuj hawj vaiz daj cim cungj haenx, cici cim gaenq dwk rim raemxyw. Miz vunz hemq naeuz:“Mbouj dwg ‘cim iu’ne, dwg cim raemx.”Canghcim riunyumnyum dawz sam ci cim cingjcingj caezcaez baij youq gwnz daengq gyasijsiz, ngeux gyaeuj cam daihgya:“Neix lumj gijmaz?”Gyoengq vunz mbouj rox canghcim loengh gijmaz fangz, mbouj miz byawz gamj guhsing. Canghcim couh gag gangj gag naeuz:“Neix cij caencingq dwg ‘cim iu’ne. Sou yawj,sam ci cim baij youq neix,‘111’, lumj mbouj lumj?”Gyoengq vunz raen sam ci cim lumj sam cih “1” dahraix,couh riu goksadsad hwnjdaeuj. “Menh daeuj!”Daegsan fwt hwnjbae laengz canghcim hwnjdaeuj,“gou mbouj caeuq mwngz gangjriu, danghnaeuz mwngz loengh aen gih gou vaih ne, couh boiz aen moq hawj gou!” “Dangyienz, yihyen dou fuzvu gunghyoz miz diuz neix:Yw dai bae boiz moq.”canghcim mbouj vueng mbouj muengz dawz cim haeuj fwngz, cingqging cam Daegsan,“danghnaeuz gou yw soujdoh ndaej ndei ne?” Daegsan han ndaej hix sangjsak:“Gou mbouj caiq doiq gujginh,caemhcaiq soengq mwngz gaiq baiz he:Fanh Faed Saenz Ei.”“Ndei ha, gangj dingh lo?”“W,gangj dingh!” Canghcim duet roengz gunghcozfuz gaemq hwnj gihdouz, couh boemz hwnjbae lo. Daegsan siengj yawj de baenzlawz loengh, de mbouj hawj, naeuz:“Hawj bouxbingh dajcim, bouxwnq ndei eiqei bae yawj caekhaex de ha?” Coenz vah neix caen lingz, Daegsan caeuq gyoengq vunz baez dingq cungj gag rox daenq dauqlaeng, lau deng gangj mbouj rox gangj vwnzmingz. Daihgaiq gvaq le cib faencung, canghcim cij soengz hwnjdaeuj, soucib ndei sam ci cim, cix doiq Daegsan naeuz:“Bae, sawqsawq yawj!”Daegsan ceizngeiz yaep he, cij diuq hwnj gyasijsiz, fwngz baez ning din baez caij,“bung!bung!bung!”caen geizheih, soujdoh fatdoengh ndaej hwnj dahraix! Haha! Gyoengq vunz riu ndaej caez bek gagoek, doengz sing caemh bak caez haenh canghcim soujngeih geizmiux fouzbeij, lajmbwn mbouj miz byawz miz gij goengfou neix! Dauqdaej miz vunz yawj ok di mingzdangz, nyinhnaeuz dohlahgih Daegsan mauzbingh dwg bwnyouzceij deng saek, canghcim cij mbouj gvaq dwg aeu cusegi daeuj coeg swiq bwnyouzceij hane. Hoeng boux vunz neix itcig mbouj gamj hix mbouj nyienh gangj ok aen dauhleix neix,aenvih canghcim soujngeih saedcaih daiq saenzgeiz, byawz gamj haengjdingh canghcim dwg coeg swiq cix mbouj dwg dajcim ne? Ndigah, canghcim hawj soujfuz dohlahgih dajcim yw bingh aen siusik neix yied cienz yied gyae, de miz “cim iu” gij riuzgangj neix hix dwg lwgnyez mehmbwk bouxboux cungj rox lo.

路漫

	3DAHSAU MAKGYAMJ Gou haemz dah de daengz yaek gwn mbei bae! Danghnaeuz gaemh ndaej dawz dah de, gou mbouj dub yungz de cij gvaiq ne! Dah de caen simdoeg! Bak gangj vanvan, naj riu hix vanvan,cienmonz cang yiengh yaeuh vunz, hw…… “Mwngz, guh yawz ha?”Raen gou heiqndat dwk naj cik hoz bongz, goenggeq he cix cam gou. “Vunz boihseiz, raem baenz baez, deng vunz ngaek lo.” Gou huj ndaej ndaq ok vahhaeu. Bonjlaiz, mbaw biuq denyingj he, mbouj dij geij aen gyaeqgaeq, suenq gijmaz. Danhseih, ciuh vunz baez daih’it youq gyang haw deng gaex ok denyingjyen, vutnaj lai hw! Hix gvaiq swhgeij dam saj, yienznaeuz yaek naengh hojceh bae Namzningz, liz ci daeuj lij miz sam diemj cung, couh siengj bae yawj ciengz denyingj he. Dah de maj ndaej baenz lengj, vih dam geij maenz ngaenz doiq biuq gyaj hawj gou, meh naj de baenz na, bouxvunz de baenz cienh! “O,mwngz gangj dah de dwg gai makgyamj, dwg lwi?” Goenggeq dingq gou gej le,sikhaek vix hawj gou, “vaiq bae gyaep, de ngamqngamq van gvaq gaicibcih.” Gou lienzmuengz cuengq roengz daehriuj, heuh Dahgenh roek bi gou naengh hwnjbae, youq gyaenx caj gou. Gou gipmuengz gyaep gvaqbae, ndaw sim gag naeuz, haidaeuz caeg cim, daengz laeng caeg gim, aeu sonson dah de donq he cij ndaej. Bae daengz gaicibcih, vunzhaw ndaet lumj dawh ndaw gyok, gyawz raen ngaeuz dah de dem?Youh cienq gvaq geij hangz gai, gizgiz vunzhaw cungj lumj duzmoed banh rongz, siengj youq gyaenx ra raen dah de, caen beij daj ndaw rwi mbin hoengh ra nengznyaen lij nanz. Dauqma daengz najdou denyingjyen, Dahgenh naengh gyaenx gaenq hoengqvangvang. Gou sim baez ndaet, cuengqsing hemq:"Dahgenh!" Mbouj nyi han, liux lo! Ndaw da baez ndat, gou ca di couh daej ok sing. “Dahniq daenj buhhoengz he, gwnz gyaeuj cug song duz mbungqmbaj baengzhenj?”Daxbuz he cam gou. Gou ngaekngaek gyaeuj. “Haxbaenh lij youq neix daej ne. Doeklaeng miz dahsau he gvaqdaeuj, caeuq de gangj gijmaz, couh rag de bae lo.” “Dahsau, maz yiengh?”Aen sim gou diuqbubbub. “Cib roek caet bi, daenj geu buh raizgek he, riuj lamz makgyamj ndeu.” “Gwnz mengq de lij cap duj va ceijhoengz he,.” Miz vunz youq henz capvah naeuz. “Va ceijhoengz?”Daxbuz dingq nyaenx naeuz le naj cungj heu bae, “mbouj dwg vunz ndei nw! Doengh dahsau neix, cien yaeuh bouxsai, ciengeiz gaej bae nem de, vaiq bae bauq baicuzsoj!” Gou daengx ndang ok hanhheu lo, sim yaek diuq ok bak daeuj. Gou lumjbaenz rox daengz, Dahgenh gou deng duz iucing dawz bae lo……Gyoengq vunz cungj dawz gou humx hwnjdaeuj, lumjbaenz gou dwg daj gwnzmbwn doek roengzdaeuj nei.Hoeng, gyoengqde cungj dwg vunzndei ha, miz di coi gou vaiq bae baicuzsoj, miz di cam gou Dahgenh ndaej geijlai bi,miz di cam gou daj gyawz daeuj……Danhseih gou gaenq ngawz liux lo, coenz vah he hix gangj mbouj ok. “Veiz Vancingh dungzci! Veiz Vancingh dungzci!” Sawqmwh, denyingjyen gvangjbo fwt heuh coh gou,“cingj mwngz vaiq bae cicamh, cingj mwngz vaiq bae cicamh!” Geiz lo! Mbouj miz vunz yaek caeuq gou bae Namzningz ha, miz byawz rox gou aeu naengh ci ne? Mbouj caj gou lai naemj, gvangjbo youh naeuz:“Dahlwg mwngz youq cicamh caj mwngz, dahlwg mwngz youq cicamh caj mwngz!” “Dahgenh!” Gou angq ndaej diuq hwnjdaeuj, “Dahgenh gou!” “Daeuj, naengh hwnj ci gou daeuj, vaiq!”Ndaw gyoengq vunz miz daegmbauq he rag gou hwnj cisamlwnz de bae. Daegmbauq caij ci ga lumj baenq saj, fuengx dwk de diemheiq fofo, gig vaiq couh daengz cicamh. “Daxboh!” Dahgenh gvangh coh gou, naed raemxda he daj gokda de ringx roengzdaeuj, hoeng, de cix riu lo. “Lwg gvai gou!”Gou got Dahgenh ndaetndaet bae, dawz mumh gangh gou yaengyaeng nu faj naj hoengzfefe de. De angq dwk nyaenx dwk, cij rox mbe bak riu ijij. “Daxboh, yawj, biuq denyingj!”Dahgenh ngeux naj gvaqdaeuj, cup najbyak gou baez he naeuz. “Ne, lijmiz cienz!” Dahgenh menhmenh hai song aen gaemzgienz de, cik he gaem mbaw biuq denyingj ndeu, cik he gaem mbaw ngaenz haj maenz ndeu. “A?” Ndaw sim gou baez caem, ceizngeiz dwk yawjyawj seiqhenz: Gyeongq vunz baebae dauqdauq, mbouj miz byawz haeujsim dou song bohlwg, daegmbauq caij cisamlwnz haenx hix mbouj rox seizlawz gaenq mbouj youq lo. “Daj gyawz ndaej daeuj?”Gou youh siengj hwnj dah “iucing” haenx, caem naj roengzdaeuj cam Dahgenh. “Lijmiz, yiengh doxgaiq mwngz ceiq haengj he—— duenzdeunz yawj!”Dahgenh gaenbonj mbouj leix saeknaj gou, aeu fwngz iq de baenq naj gou coh bakdou cicamh, mbouj caj gou duenz,cix vix gwnz daengqraez henz bakdou haenx,“yawj, makgyamj, youq gyaenx!” Gwnz daengqraez cuengq aen daehriuj gou, bangxhenz mbaw soujgaen va Dahgenh cuengq doi makgyamj he. Dah minzgingj he ndwn youq gizhaenx,cingq coh dou song bohlwg riunyumnyum. “O!”Gou cuengq gaemz heiq raezraez he, sim naemj: Dah “iucing” haenx deng “Sunhvuzgungh” gaemh dawz lo, bemx lai hw! Wnggai docih Gyoengq cianh veisw neix! Gou umj hwnj Dahgenh, gipmuengz bae coh dah minzgingj:“Dungzci, dwgrengz lo, docihmwngz!” Dah minzgingj mbouj haeujsim gou gangj gijmaz, daj ndaw rungj gou umj Dahgenh gvaqbae, naeuz:“Vaiq, ci yaek daengz lo.” Gangj le, umj Dahgenh byaij gonq haeuj mehlwg houcehsiz. De ra ndei dieg naengh, cuengq roengz Dahgenh, riunyumnyum lumhlumh aen naj biz Dahgenh, cam:“Haengj naengh hojceh lwi?—— Dahheiz baema lo, caiqraen!” Dah minzgingj cienq ndang doiq gou riuriu, couh byaij lo. Gou simgip yaek rox dah “iucing” haenx yawzyiengh, mbouj goq laex mbouj laex rag dawz genbuh dah minzgingj,cam:“Dungzci, dah mengq iucing haenx ne?” Dah minzgingj baez anj, geizheih dangqmaz, miz di mbouj angq caengz gou:“Gijmaz mengq?” “Gou rox, daxboh cam, dahcej gai makgyamj.”Dahgenh angqbupbup loengh fwngz beij veh,“diuz mengq ndaemndindi, lij baek duj va ceijhoengz he.” “O.” Dah minzgingj roxsingj lo, riuriu naeuz,“de naeuz de nyaengq, bae gonq lo. Dahniq dwg de gyau hawj dou, naeuz mwngz hixnaengz youq denyingjyen. Raen dou daj dienhvah daengq denyingjyen gvangjbo ra mwngz, de cij bae lo. Dahniq gig dingqvah, mbouj daej gvaq, caen gvai.” Dahgenh hag vah dah minzgingj, naeuz:“Minzgingj dahheiz caen gvai, dahcej makgyamj hix caen gvai!” “Ling……” Yiengj lingz lo, hojceh rauheiq fofo haeuj camh lo. Yaep he, gou daiq Dahgenh gaenq naengh hwnj gwnz ci. Naengh ndei le, gou couh “saemj” Dahgenh:“Mwngz yawz rox daeuj cicamh?” “Mwngz bae ra dahcej makgyamj le, gou lau, couh daej.” “Doeklaeng ne?” “Doeklaeng, dahcej makgyamj gvaqdaeuj, cam gou. Gou naeuz,daxboh bae cicamh ra mwngz lo,gou hix siengj bae.” “De couh daiq mwngz daeuj?” “Mbouj dwg, de dwg umj gou daeuj hane.”Dahgenh riuhehe geq naeuz, lumj dwg bae raen daxdaiq dauqma nyaenx angq,“Dahcej youh aeu umj gou, youh aeu riuj makgyamj, byaij yaep he, yiet yaep he, makgyamj deng dog doek bae haujlai haujlai.” “Haujlai haujlai?” “W, nyaenx lai.”Dahgenh gop fwngz bizbed de guh beij naeuz,“cungj gvaiq aen daehriuj mwngz, dimz gwnz makgyamj cungj mbouj maenh, baez rod makgyamj couh doekbyoeg.” Gou sim baez ndum, fwt geiq daengz ndaw daehriuj yo miz song cien maenz ngaenz. “Aen daehriuj mwngz,dahcej makgyamj mbouj hawj gou dawz, baez daengz cicamh,de couh gyau hawj dahheiz minzgingj, lumj dwg de gip ndaej hane.” Dahgenh mbwnjbak miz di mbouj angq naeuz. Gou hai daeh daeuj yawj, yienghyiengh doxgaiq cungj caez, song cien maenz ngaenz lij cingjcingj caezcaez yo youq gok daeh. Gou soeng gaemz heiq he, ndaw sim raeujrub gamjdoengh dangqmaz. “Dahcej makgyamj daengq naeuz, heuh mwngz lingh cawx biuq denyingj.”Dahgenh dawz ndaw fwngz mbaw haj maenz he oet hawj gou,“de lij naeuz, hawj boh mwngz boizlaex, dwg gou loek lo, loeng hawj biuq gaeuq boh mwngz lo.” Gou dawz mbaw biuq ndaw fwngz Dahgenh daeuj yawj, a, dwg biuq moq. Gou mingzbeg lo, dah de mbouj dwg daegdaengq gai biuq gyaj hawj gou…… “Makgyamj,gai makgyamj!”Seizneix, sing byoiq dahsau he daj rog cueng cienz daeuj. Gou iet hoz bae yawj:O, mengq ndaemndetndet, va ceij hoengzfefe, neix mbouj dwg de ma? “Vei, dahnuengx……dungzci!”Gou vad fwngz heuh de gvaqdaeuj. De daeuj daengz naj cueng, gou dawz mbaw haj maenz haenx ndenq hawj de, cix mbouj rox baenzlawz gejgangj cij ngamj. De mbouj haeujsim yawj gou, ciep aeu ngaenz, sikhaek ndenq makgyamj daeuj, naeuz:“Dungzci, cingj mwngz coux ndei!” “Ndi……, mbouj……”Cicamh youh yiengj lingz lo, hojceh couh yaek hai, gou simgip ndaej mbouj rox gangjvah lo. De siengj loeng lo, laihnaeuz gou yaek gag genj aeu makgyamj,cix dawz rwz lamz oet haeuj fwngz gou daeuj:“Hix ndei, cingj mwngz gag genj ba.” “Hunglung——”Hojceh baez rongx, cicamh minzgingj sikhaek dawz bouxsoengqhek caeuq bouxgaihuq laengz deuz. Couh youq seizneix, “gunggaeng”sing ndeu, aen ci baez saenq, “sa……”, aen lamz byod fwngz lo, makgyamj henjrigrig vanq rim gwnz dieg…… Hai! Simndei guh baenz saeh rwix, gou yak youq dangqmaz, diuqgah raixcaix.“Mbouj youqgaenj nw, mwngz ndei bae. Ci byaij le, gou menh gip.”Dah de unqswnh naeuz, mbouj miz saekdi beizheiq. Gou najnyaenq, gou ienqhoij. Gou fwt naemj yaek boizcingz hawj dah de, cix daj ndaw daeh mbon ok mbaw haj cib maenz he, baeuh hawj dah de:“Dungzci, coux ndei bw!” Rumz daj gyaeuj ci bongj daeuj, ngaenz dingjlingz mbin haeuj rungj de bae, de gaem maenh mbaw ngaenz, coh aen cueng gou buet daeuj. Danhseih, hojceh gaenq yied hai yied vaiq lo. De mbouj naihhoz cuengq menh yamqdin, yaengx fwngz hwnjdaeuj vad fwngz caeuq gou “caiqraen”. Gou ndaw sim soeng haujlai, hix coh de vad fwngz“caiqraen”. Hojceh baez van loh, aen ranz iq he baex da gou lo. Gou cingq hojsik, aen ngaeuz de youh daj ranz iq lingh mbiengj yaeb okdaeuj, dahseih, gou saetmuengh lo:Cij raen de dawz ngaenz ndenq hawj minzgingj. Minzgingj coh de gingqlaex, dawz ngaenz ciep gvaqbae…… Aen ngaeuz de yied bae yied iq lo, hoeng bouxvunz de youq ndaw sim gou cix yied daeuj yied sang, yied daeuj yied lengjlek…… Dahgenh lumjbaenz dawz gijneix yawj ndaej cingcing cujcuj, fwt dawz makgyamj suek youq soujgaen haenx gaeuh haeuj ndaw rungj gou, “nga”daej hwnjdaeuj:“Mwngz rwix, mwngz boiz makgyamj hawj dahcej !” Gou naiqnuek danq gaemz heiq he, unqniengnieng naengh roengzdaeuj. Mboujliuh caekhaex baez ndaemq, aeu fwngz lumh daeuj baez yawj:A, dwg mbaw ngaenz haj maenz he, suek aen makgyamj he lwenqmig lwenqmig, lumj naed caw maez vunz gyaez ndeu…… Gou sawqmwh naj hoengz rwz dit, ndaw sim hoengqhanghang bae……

路漫

	“Hai!”Mehlaux gyangznaek sing he,bid genbuh gvangqlangh de hwnjdaeuj,“sou mbouj buen gou buen!”De goz roengz diuz hwet gaenq loq goz haenx,nda song gen bae umj doi ndoengj daeb baenz cik lai sang haenx…… “Mbouj ha!”Daegvaz gipmuengz byaij gvaqbae. “Cej!”Simjvaz daj baihlaeng bae got Mehlaux,vah gangj mbouj ok,raemxda sien lae. Dang Daegsam caeuq yah de vih daxmeh fatheiq deuz okbae boux gvaiq boux seiz,Mehlaux byaij gonq,Daegvaz rap ndoengj non gaenlaeng,Simjvaz riengz laeng,yamq hung byaij haeuj ranz. “Nonsei baujboiq!”Daegniq raen nonsei hauseksek angq dwk hemqyaya. Mehlaux umj lan hwnjdaeuj,coh Daegsam minghlingh naeuz:“Mwngz haemhneix ninz ranz ding,aen rug haenx cuengq nonsei!” Simjvaz veiznanz dwk bengbeng dinbuh Mehlaux,doq rwz naeuz:“Cej,lij dwg……” “Lij dwg gijmaz?Ranz hoengq ndwi mbouj yungh,dauq hawj duznou……”Mehlaux bonjlaiz siengj aeu vah Daegsam daeuj boizhaemz de,hoeng baez daez daengz duznou,heiq youh hwnj,cix ndwnj vah roengz dungx. “Daxbuz,cij gvaiq gou mbouj bonjsaeh.Gij non neix mbouj rox lix ndaej dauq geijlai,fanj-cingq mbouj miz cienz cawx non moq dem,ciengx di neix mbouj maz mingzdangz,hixnaengz dawz bae gueng gaeq suenq lo.”Daegvaz veiznanz dangqmaz naeuz. “O?”Mehlaux ceizngeiz yaep he,couh byaij haeuj rug bae,caemh dawz dou rug haep ndei. Daihgya boux yawj boux,cai mbouj rox Mehlaux yaek guh maz. Daegvaz yawjyawj meh de,naeuz:“Meh,suenq luba?” Simjvaz ngaekngaek gyaeuj,han:“Suenq lu!” “Suenq,aeu suenq!”Mehlaux fwt gaex dou okdaeuj,ndaw fwngz dawz daeb ngaenz mbaw cib maenz nanwt he,“Daegvaz,gou caeuq mwngz gapfaenh ciengx nonsei,neix dwg cienzbonj gou.Ranz ciengx non couh cuengq youq ranzding,densigih senj bae aen ranz hoengq haenx!” Daihgya cungj anj liux,itseiz uk cienq mbouj gvaqdaeuj,lumj moegyou nei ngaezngwd,mbouj rox gangj maz ndei.Cijmiz bawxsam song da cim daeb ngaenz ndaw fwngz Mehlaux,ndaw uk yienh'ok aenaen vwnhauoengz gij cienz neix,de dauqdaej lij miz geijlai?

路漫

	“Hojlienz ha,cauxcoih ha,danghnaeuz meh duzde yawjraen……”Mehlaux doq gip dox hongz. Daegvaz mehlwg mbouj ndaej mbouj riengz bae gip nonsei,hoeng cix mbouj w saek sing. Gip ndaej daengz cungj gip liux lo,lij miz haujlai doek ndaw geh dat,aeu nga faex diu okdaeuj hix dwg non dai,couh “cangq” gyoengqde youq gizneix ba. “Lix ndaej gvaqdaeuj lwi?”Mehlaux vix non ndaw ndoengj cam Daegvaz. Daegvaz mehlwg ngaezngwdngwd yawj haeuj ndoengj,lwgda daengxdwd. “Hai!”Mehlaux gyangznaek sing he,bid genbuh gvangqlangh de hwnjdaeuj,“sou mbouj buen gou buen!”De goz roengz diuz hwet gaenq loq goz haenx,nda song gen bae umj doi ndoengj daeb baenz cik lai sang haenx…… “Mbouj ha!”Daegvaz gipmuengz byaij gvaqbae. “Cej!”Simjvaz daj baihlaeng bae got Mehlaux,vah gangj mbouj ok,raemxda sien lae. Dang Daegsam caeuq yah de vih daxmeh fatheiq deuz okbae boux gvaiq boux seiz,Mehlaux byaij gonq,Daegvaz rap ndoengj non gaenlaeng,Simjvaz riengz laeng,yamq hung byaij haeuj ranz.

路漫

	Mehlaux roxnyinh daengz,ndaw gamj mboujdanh laep,caemhcaiq dumz,lauheiq gij mok baenz ngoenz mbouj sanq ndaej bae.Dieg neix duzfangz cij hab youq!Mbouj naeuz ciengx nonsei,couh dwg vunz baenz ngoenz ut youq,ndok lauheiq cungj aeu aemq nduk! “Daegvaz!”Mehlaux hemq hwnjdaeuj,sing hap ndaw gamj yiengj humhum,“dawz nonsei buen okbae,senj bae ranz gou!”Mehlaux mboujguenj Daegvaz Simjvaz coengz mbouj coengz,gag goz hwet bae baez duz baez duz gip nonsei,cuengq haeuj ndoengj bae. Nonsei daihgaiq yaek gyaengj lo,duzduz gienj hwnjdaeuj,youq ndaw ndoengj ning hix mbouj ning,lumj naednaed duhhau deng raemx cimq yaek naeuh nei.

路漫

	“Daxbuz,menh yamq di ho!”Daegvaz sawqmwh hemq hwnjdaeuj. Mehlaux fwt dingz din,yawjyawj lajdeih,baenz benq haumomo.Dwg gijmaz?Mehlaux maeuq roengzdaeuj,sijsaeq bae yawjaxlawz dwg nonsei. Mehlaux menhmenh byaengq da muengh gvaqbae,cib geij aen ndoengj boek neix fan haenx,nonsei lwg haunyonyo rim dieg cungj dwg,lumjbaenz ndaundeiq deihnyaennyaen.Aen loz coux mbaw sangh hix boek lo,mbaw sangh heuswdswd vanq rim geh dat,giz daemq lumj haz heu,giz sang lumj faex loeg,muengh gvaqbae lumjbaenz fuk veh youzva he. “Gijneix……”Mehlaux mbouj rox ok maz saeh lo. “Duznou ndoeng dwgcaengz haenx!”Daegvaz hujdengdeng naeuz. “Banhaemh mbouj miz vunz daeuj souj yawj?” “Daeuj la.Mbwn buemxsuemj gou baema heuh daxmeh daeuj lawh,couh……” “Daegvaz,gaej dwen dem.”Simjvaz ndwn hwnjdaeuj,aeu mbengqbuh ut raemxda.

路漫

	Byongh bya,ndaw gamj cienz ok sing daej siliengz dangqmaz. Mok gyuemluemz bak gamj,lumj goemq caengz baengzriep he,engq sawj vunz roxnyinh dwglau.Daengngoenz ndoj ndaw fwjndaem,mbanj bya daegbied yaemywd,lumjbaenz cimq youq ndaw raemxdai nei. Raemxraiz rwed dumz gavaq Mehlaux,sawj de roxnyinh saenznit,de haenqrengz benz hwnj bak gamj.Bae daengz bak gamj,de aeu genbuh bongx gij mok deuz. Ndaw gamj miz aen daeng'youz mumqmwt,ciuq ndaej mok engq raen na.Simjvaz maeuq youq gwnz dat,song fwngz got aen gyaeuj byombet de.Genbuh gvangqlangh de cw roengzdaeuj,goemq song cik ga rozred,lumj duzfangz daenj buhraez ndaem nei. Daegvaz goz hwet,fwngz gvaz bang meh de dub hwet,fwngz swix hawj meh de ut raemxda. Mehlaux da raen cingz seng,siengj hwnj haxbaenh Daegsam siengsim de,danqheiq naemj naeuz:“Lij dwg lwgdog ndei ha!Lwg gaej aeu lai,lwg lai lwg mbouj gvai!” “Nuengx ha.”Mehlaux saemxsax byaij haeuj ndaw gamj.