Heuh Caegdaeuz Guh Boh
Youq fawxgonq bit dem gaeq duz ndi nemz duz ,duz ndi rox duz.miz ngoenz ndeu ,gaeq raen dieg bit ndei lai,cix yaek siengj cimq dieg bit,hauhneix ,bit dem gaeq cix dwkciengq lo .
Ndi rox geuq ndaej gijlai nanz ,hix ndi rox dai bae gijlai duz,cij rox bwn gaeq bwn bit mbinfoenfoen youq gyang mbwn,daengj daengngoenz guh mbwn lap bae,cij rox diuh dah raemxsaw de bienq nding liux ……
Bit saw lo,bit deng gaeq guenj ,bit cij ndaej guh lwgminz lo .
Ngoenz ciuq ngoenz lae,bi yiuq bi bae.
Nanz liux ,bit cix ndi rox de ok gijlawz daeuj,ndaej nyi duz naeuz gaeq dwg coengcoj bit ,bit hix saenq lo .
Miz ngoenz ndeu,miz duz bithau ndeu yawj duzgaeq dem de guhlawz gyonj ndi doxlumj,ngeixvaeg lai,cam naeuz:”Ndaej nyi naeuz saw gangj coengcoj duzbit cix dwg duzgaeq ,vihmaz rouj raeuz bak raeuz nyauj raeuz buh raeuz dem duz gaeq ndi doxlumj ne ?”
“a?!”gyoengq bit de dwksaet liux,ngeix mbouj doeng de guhlawz cam cungj vwndiz neix,gvaq yaepndeu ngeix dauq,vanghhuxhux ne ,”dwg ha,vihmazne ?”lwg lwg lumjnaeuz seizneix haet ngeixswhgeij ,boux boux caemzrwgrwg,gyonj siengj aeu gaiq hoiz ndeu .
Miz duz bit geq ndeu byaij ok daeuj,naeuz:”Duz gaeq ndaej dang guen miz mauh nding daenj rouj cix hoeng,ndaej dang guen liux bak caeuq gyauj cix som,hauhneix,dot haet ndaej ,saiq haet miz ,miz liux cix cawx huh lwenq daenj .raeuz ne cix dwg lwgminz,lwgminz dem guen coj ndi doxlumj ha .raeuz ndi miz mauh guen rouj cix ndi nding,ndi rox dot vunz bak cix mbej,ndi rox saiq ngaenz nyauj cix moux,ndi miz cienz cawx buh ndei cix deng daenj buh ndaem buh mong buh hau lo ,ndigah ,sou yaek huenqrengz bae guh ,ndaej dang guen liux cix lumj duz gaeq lo .”
“wn,gangj ndaej doiq!gangj ndaej doiq !”miz haujlai duzbit bongxfwng hemq ndei.
Lwg bit hau de ndi ndwet nauq,gau gau gyaeuj ,youh cam naeuz:”Vihmaz Vah raeuz dem Vah gaeq ndi miz nyiet ndeu doxnemz ne ?”
Lwgbit geq de naj cix bienq liux,hoz cix daengj hwnj daeuj ,hemq naeuz :”Guhlawz ndi dox nemz ?uk mwngz guhlawz naeuh hauqneix lai bae !De dwg boux vunz guen de cix gangj vah guen,raeuz dwg boux guhhong cix deng gangj vahdoj,ngoenzlawz raeuz ndaej dang guen liux raeuz doengzyiengh cij gangj vahguen,caiqlix seizneix lwgnye raeuz cungj ndi son gangj vahdoj,gvaq ndaej geij ciuh raeuz cix cungj gangj vah gaeq ,seizde,bouxboux gangj vah cix doxlumj lo !”
“Wn,gangj ndaej doiq !gangj ndaej doiq!”youh miz gaxlai duzbit hemqloxlox,lwg lwg ngeix naeuz lauxgoeng neix guhlawz uklingz hauhneix lai bae ne .
“Vihmaz raeuz dang guen liux yaek gangj vah guen ?gangj vah guen lwgminz raeuz mbouj rox nyi ha !Vihmaz raeuz ndi son lwglan raeuz hag vah raeuz,dauq gaemh lwglan raeuz bae hag vah gaeq ne ?”Gyoengq bit hemq caem liux,lwg bithau de ndi fuk,youh cam naeuz.
“O?!”lwgbit geq de ngeix ndi daengz duzbit neix lij cam dem,naj lwgfwt laepcup,dangq yaepciuq,naeuz:”Lwgbyai mwngz bak yawz lai hauhneix lai bae ?!Gijneix mwngz ndi rox cix gag bae ngeix !”Gangj liux de cix ciengqlaeng bae lo ,cij ndaej nyi de damzbyoedbyoed naeuz:”gaj! gaj! gaj!”
Gyoengq bit de duz duz ndi ndwet nauq,hwnj soengz youq gijde,di ndeu hix ndi ning,lumjnaeuz hoenz mbin bae liux ne …….
Gojgaeq bit dem gaeq cix daengz gijneix lo. Boux raiz doeklaeng gangj naeuz
aengcog loh bit guhlawz byaij,cix dwg ciemz bwn swhgeij ok ,gip bwn gaeq doek coq naeng ne roxnaeuz dwg ce bwn sehgeij laebdaeb ndaej bae youzraemx,gou hix ndi rox lo .ai,seiqgyaiq neix ha,heuh caegdaeuz guh boh !”
[此贴子已经被作者于2008-9-19 17:41:26编辑过]
发表于 2008-7-21 14:02:00
QQ空间
腾讯微博
腾讯朋友
微信
转播
淘帖
分享
收藏
支持
反对
发表于 2008-9-19 20:51:00
发表于 2008-7-22 16:14:00
