花山的故事(3)

lozmingz

	[这个贴子最后由lozmingz在 2002/11/17 10:00am 编辑] GOJ BYARAIZ 花山的故事 　 　 3.FAG GIEMQ CAETSING Lungzcouh Yen diuz Dah Li’gyangh duenh laj miz aen dan he, bangx de miz goengq bya ndeu heuhguh Byacaetsing, gwnz dat veh miz haujlai dozsiengq, goj ciuhgeq cienz naeuz dwg bingmax Vangz Cauz. Youq gwnz Byacaetsing miz fag baujgiemq ndeu, gwnz de sieng miz baekdaeuj caet aen ndaundeiq, sojyij vunz couh heuhguh giemqcaetsing. Giemqcaetsing baek youq ndaw faekgiemq, bouxlawz beng de ndaej okdaeuj, de couh cijveih ndaej gwnz dat gij bing Vangz Cauz. Haujlai bi lo,vunz cungj siengj bae beng fag giemqcaetsing okdaeuj, daiq naek lai, cungj beng mbouj ndaej ok. Miz bi ndeu, daj Dah Li’gyangh miz gyoengq bingmanz* buh ndaem geiz ndaem gvaqdaeuj. Ndaek vuengz Banh Laujdoh dingqnyi gwnz bya miz fag giemqcaetsing, couh siengj beng okdaeuj, ndaej daiqlingx gwnz dat gij bingmax daeuj gaj vunz Cungguek. De daj Gyauhcij daiq bouxdauh ndeu daeuj, youq laj bya dap daiz guh caeq, caeq liux caet ngoenz caet hwnz, vanzseih beng mbouj ok. Doeklaeng, bouxdauh naemj ok diuz geiq doegsieb ndeu, naeuz cijaeu gaemh daeuj caetcaet seiq cib gouj boux vunz Cungguek, youq baihnaj giemqcaetsing raemj gyaeuj caeq giemq seiq cib gouj ngoenz le, couh beng ndaej faggiemq ok. Banh Laujdoh dingq le, couh daiq gyoengq bingmanz ndaem seiqcawq gaemh vunz, bouxsai mehmbwk, bouxlaux lwgnyez, itgungh seiq cib gouj boux deng gaj youq baihnaj giemqcaetsing. Gvaq liux seiq cib gouj ngoenz, Banh Laujdoh gwih ndaek max ndaem daeuj daengz gwnz Byacaetsing, cingq siengj beng aeu faggiemq, sawqmwh mbwn raemh deih laep, byajmig yagyag, rumz hung fwn raq, miz sing ndeu lumj byajraez nei hemq naeuz: “Neix seih caetsing baujgiemq Cungguek, manzvuengz mwngz gaej siengj aeu de! Cabcungj! Bouxcawj de couh yungh de gaj dai mwngz bae!” Banh Laujdoh dingq le, ging dwk saenzdegdeg. Liuq da mbat yawj, cij raen miz geu hoenz ndaem he daj laj bya cung hwnjdaeuj. Hoenz sanq le, raen miz goenglaux byoemmumh hausaksak ndeu, fwngz yaengx faexdwngx yaek moeb de, Banh Laujdoh simsaenz, hwnj max couh deuz. Daj seiz haenx hwnj, Banh Laujdoh engqgya haemz youq ndaw sim, ciengzseiz daiq gyoengq bing ndaem dauqcawq gaj vunz, coemh feiz, gaemh mehmbwk, ciengj doxgaiq, song bangx Dah Li’gyangh beksingq souh hoj souh nanh. Caiq gangj youq gyawj Byacaetsing miz aen mbanj Sangginh ndeu, ndaw mbanj miz boux hauxseng Bouxcuengh heuhguh Mungjgaj, de lumj duzciengh ityiengh miz rengz, vunz youh mbauqndei. Ngoenz he, de gwih duz max beg hung ndeu daj dieggyae hagfoux dauqma, ngamq haeuj daengz gyaeuj mbanj, couh dingqnyi daengxmbanj vunz cungj daejngaungau, seiqcawq cungj baij rim seihaiz. Caiq yawj, boh de hix ndang gyaeuj faenhai, ietbat youq gwnz namh, daxmeh de cingq boemz youq gwnz ndang boh de daej yaek maez bae. Mungjgaj sim’in daraiz, ceng di doek roengz max daeuj. Danhseih, de dwg boux vunz maenh’ak, nyaenx raemxda diuq roengz max fuz meh de hwnjdaeuj. Daxmeh raen lwg dauqma lo, doq daej doq lwnh naeuz: “Vuengzmanz Banh Laujdoh daiq gyoengq bing ndaem daeuj humx aen mbanj raeuz, ciengj doxgaiq, gaeb vunz dawz bae daengz Byacaetsing raemj gyaeuj caeq giemq. Boh mwngz caemh deng gyoengqde gaj lo, ngamq aeu seihaiz ma. Mungjgaj ha Mungjgaj, mwngz seih lwg Bouxcuengh raeuz, seih lwglan mbanj Sangginh raeuz, mwngz aeu vih boh mwngz caeuq gyoengq beixnuengx ndaw mbanj bauqcaeuz ha!” Mungjgaj beng fagcax bangx ndang okdaeuj, vix mbwn mieng naeuz: “Gou mbouj gaj dai Banh Laujdoh, nyienh deng byaj bag!” Gangj sat, diuq hwnj max, couh yaek buet coh yingzfuengz bingmanz. Ndaw mbanj miz goenglaux ndeu dangjlanz gyaeuj max, gienq de naeuz: “Mungjgaj ha Mungjgaj, bingmanz vunz lai lumj duzdak nei, mwngz dan cieng dog max baenzlawz hoenx ndaej hingz, cojgeq raeuz youq gwnz Byacaetsing louz roengz fag baujgiemq caetsing, mwngz bae beng de okdaeuj, couh ndaej daiqlingx gij bingmax Vangz Cauz bangx dat lo. Daengz seiz haenx, lij lau gij bingmanz mbouj deng gaj dai raemj raeg ha!” Mungjgaj dingq le, couh fad max vaiq buet, gaemz heiq ndeu couh buet daengz Byacaetsing lo. De raen fag giemqcaetsing baek youq song ngeuq rin hung dingqgyang maenhndaetndaet, gaenzgiemq lumj gangraemx baenz mbwk, gungjhwet roengzdaeuj, song fwngz got gaenj gaenzgiemq yungh rengz beng, beng liux geij baez, faggiemq mbouj doengh saek di. Mungjgaj heiq baegfwfw, yietnaiq yaep he, youh siengj caiq beng , sawqmwh, raen ndaw bya swng hwnj geu hoenz ndaem daeuj. Hoenz ndaem sanq le, couh raen miz goenglaux byoemmumh hausak ndeu, fwngz gaem faexdwngx, doiq Mungjgaj naeuz: “Mungjgaj ha Mungjgaj, fag giemqcaetsng neix baek youq ndaw faekgiemq, gaenq miz gouj cien lai bi lo. Seizneix, de cingq siengj okdaeuj raen seiqgyaiq, sawqsawq bak de raeh mbouj raeh. Ho, mwngz dingq.” Mungjgaj rwz dep youq gwnz gaenz giemq, caencingq dingqnyi miz sing yiengj “ieng’ieng”, lumj naeuz: “Mungjgaj ha, vaiq beng gou okdaeuj, gou caeuq mwngz bae gaj gij vunzyak vunzrwix haenx!” Goenglaux youh daengq naeuz: “Mwngz siengj beng faggiemq okdaeuj, couh sien benz hwnj goengq Byacwx bae, gip aeu dingj bya goyw lingzcih ceiq hung haenx gwn le, cij miz rengz beng giemq, mbouj guenj bungz daengz gijmaz huxnanh, mwngz cungj mbouj ndaej dauqlaeng, geiq ndei ho!” Mungjgaj dingq goenglaux gangj le, dex gungcienq, daiq ganliengz, gwih duzmax hau couh hwnj loh. Mungjgaj lienz hwnz lienz ngoenz ganj loh, fan gvaq bya goengq dem goengq, yaengq gvaq dah diuz youh diuz, byaij liux sam ngoenz sam hwnz, cij daeuj daengz Byacwx. Gwnz bya ndoengfaex sang daemx mbwn, fwj goemq mok geuj, guk rongx gaeng swenj, boux vunz dog gag byaij caen miz di ndang saenz. Mungjgaj riengz diuz loh dwk fwnz hwnj bya bae, byaij daengz caz hazem ndeu, sawqmwh, raen duzguk najbyak hau ndeu, song da lumj doengzlingz nei, coemj gvaqdaeuj coh de. Mungjgaj diuq roengz max, gaem cax hwnjbae caeuq duzguk doxbuek. Duzguk coemj sam mbat, Mungjgaj cungj bienq ndaej gvaqbae, duzguk coemj mbouj ndaej dawz, ndatheiq hemq ngaungau, yungh caenh rengz caiq coemj gvaqdaeuj. Mbatneix Mungjgaj mbouj bienq bae, de cap ndei max, gaem ndei cax, duzguk aj bak coemj daengz, de mbat cax ndaemq gvaq conghhoz duzguk bae, duzguk sangj liux geij mbat, couh iet hoz dai lo. Mungjgaj gvej aeu diuz ndok guk ndeu, youh gwih max hwnj bya bae. De gwq byaij gwq byaij, youh deng dat lingq dangj loh. De cij ndei cug max youq go faex- coengz, dajsuenq yungh fwngz benz hwnjbae. De ngamq byaij daengz laj dat, miz duznuem ndeu lumj ndaek saeumeh nei ninz vanglwet youq baihnaj, iet diuzlinx song nga okdaeuj, boq rumzfofo, caen dwglau. Hwnjbae ne, lij seih doiqlaeng? Goyw lingzcih lij aeu mbouj aeu? Hw, vihliux gaj dai bingmanz, hawj gyoengq beixnuengx ndaw mbanj ndaej an’onj, gou lienz duznuem lij lau, baenz ha! Naemj daengz neix, de sim maenh hwnjdaeuj, gaemgaenj fagcax, menhmenh byaij coh duznuem. Duznuem raen miz vunz daeuj gyawj, bak aj gvangq lumj aen bat nei, gyaeuj daengj fofo. Mungjgaj ciuq cinj aen gyaeuj duznuem couh raemj, bouxlawz rox, laj din mbat myag, ndang baez ngauz, fagcax “dwngj”raemj roengz ngauq rin bae. Duznuem swngzseiq cung gvaqdaeuj, geuj dawz Mungjgaj maenhmaenh, geuj dwk nyinz ndok yaek goenq bae. Mungjgaj nyaenx in, cengqrengz yiengq aen hoz duznuem mbat raemj, duznuem couh menhmenh unq roengzdaeuj lo. De couh dawz cax bok naeng duznuem, gat aeu diuz nyinz nuem ndeu, couh gaem diuz gaeu hung benz hwnjbae. De ngamq benz daengz byongh dat, diuz gaeu deng rinraeh nged goenq lo. De boegloeg laenh doek roengzdaeuj, daengx ndang cungjdeng rin ndaemq sieng, din fwngz unq lumj gomungz nei, ninz youq laj dat. Lij hwnjbae mbouj hwnjbae ne? De youh siengj daengz gij vah goenglaux: “Mbouj guenj bungz daengz gijmaz yungyiemj, cungj mbouj ndaej doiqlaeng.” Yienghneix, de youh cengq ndang hwnjdaeuj, gaem diuz gaeu lai hung haenx, caiq benz hwnj dat bae. Mungjgaj caiq byaij haujlai nanz, couh benz hwnj daengz gwnz dingj Byacwx lo. Miz duj lingzcih ndeu lumj fa lamz hung nei, ronghsagsag, de mbaet aeu go ndeu, cuengq haeuj bak mbat nyaij, roxnyinh cingsaenz hwnjdaeuj, daengx ndang miz rengz. Mungjgaj ganjvaiq roengz bya, ra raen duzmax hau, gwih hwnjbae couh bongh ma ranz. Mungjgaj byaij liux caet hwnz caet ngoenz, ma daengz Byacaetsing. De yungh ndaek ndok guk geuh fag baujgiemq honz le, caiq yungh diuz nyinz nuem cug gaenz giemq, okrengz youh beng youh rag, fag giemqcaetsing couh ngaiz de beng honz lo. “Mungjgaj beng ndaej fag giemqcaetsing lo!” Laj Byacaetsing laenzgaenh vunz cungj angq dwk buet daeuj yawj, daxmeh Mungjgaj hix gaen gyoengq beixnuengx ndaw mbanj daeuj lo. Gij vunz humx youq henz giemqcaetsing caengz dam caengz, caez sing swenj hemq, hawj Mungjgaj cengq rengz. Mungjgaj raen daxmeh caeuq gyoengq beixnuengx caez haeujhoz, sim hoengz hwnjdaeuj, engqgya miz rengz. De got maenh gaenz giemq, gungj hwet capmax, roengz rengz mbat beng, dingqnyi yiengj “danghlangh” sing he, faggiemq couh beng okdaeuj lo. Sikhaek byajmig, seiqcawq ronghsag, yiengjhum lumj byaj maenj nei, raen ndaundeiq caetsing gwnz giemq “bingbingbwng- bwng” mbin okbae, youq gwnz gyaeuj gvaenxgvax geij cienq, couh mbin haeuj gyang mbwn bae mbouj raen leu, faggiemq mbouj daiq naek, hix mbouj daiq co lo.Mungjgaj gaem daeuj loengh geij mbat, gij dozsiengq bangx dat couh lumj mbaw faex loenq ityiengh sasa mbin roengzdaeuj, bienq baenz vunz caen, bouxboux hungsang maenghcwk, gaem cax aemq fouj, baiz doih dingq coengz Mungjgaj diuhdoengh. Mungjgaj daenj gyap gwih max, fwngz gaem giemqcaetsng, daiq gyoengq bing Vangz Cauz bae caeuq gyoengq bingmanz doxbungz lo, Banh Laujdoh gwih duzmax ndaem byaij doeklaeng. Mungjgaj baez raen vunzcaeuz, hozgaek fwdfwd, sikhaek fad max yinx bing yiengq Banh Laujdoh cung gvaqbae. Mungjgaj gwq vad fag giemqcaetsing, lumj buq gva cab byaek nei, gaj gij bingmanz daejngaungau, seihaiz vanglat. Banh Laujdoh raen hoenx mbouj hingz, cienq max couh deuz. Mungjgaj gyaep de mbouj cuengq, da raen gyaep dawz la, Banh Laujdoh gig gveijmaj, cienq gyaeuj nyingz Mungjgaj mbat cienq ndeu, Mungjgaj boemz baex mbouj gib, najaek ngaiz nyingz deng lo, gij lwed de lae roengz gwnz anmax cungj nding liux. Fag giemqcaetsng “ieng’ieng” yiengj mbouj dingz. Mungjgaj doiq baujgiemq naeuz: “Giemq ha giemq, mwngz mbin bae gaj dai Banh Laujdoh ba!” Gangj sat, caenh rengz gveng faggiemq gvaqbae. Giemqcaetsing yiengjfofo, lumj rumz ci byajyaep nei, ciuq cinj saihoz Banh Laujdoh raemj bae. Banh Laujdoh lumj duzmouduenh nei laemx roengz gwnz namh, ndaek gyaeuj ringx bae song sam ciengh gyae. Fag baujgiemqcaetsing lumj dienhyap ityiengh nap dawz Mungjgaj, mbouj rox mbin bae gizlawz lo. Mungjgaj guenj gij bing Vangz Cauz, mbouj miz giemqcaetsing cijveih, youh faenfaen mbin hwnj gwnz bya, nem youq bangx dat lo. Seizneix, vunz raeuz youq gwnz Byacaetsing cij yawjraen aen faek giemq. Fag giemqcaetsing bae gyawz liux ne? Miz vunz gangj, de dauq hwnj gwnzmbwn bae lo. Aen ndaundeiq caetsing ronghsagsag haenx, couh seih de yaep okdaeuj.(Vangz Yizcangh. Ciz Cibingz. Luz Dwngzgunh cingjleix)                                            ——————摘自[壮侗语言文化网]

vaiz

	过去把 州府 叫做 coufouj, 现在把 政府 叫做 cwngqfouj 应该是不错的吧？至少 fouj 这个词还有人在用。