[原创]路漫文集：壮文的山歌

路漫

	51.Gou Dwg Boux Lauxsae Lij Faz Gou dwg boux lauxsae Sim gyaez hong Sawcuengh Sim lumj daengngoenz ndongq Soengq rongh ndat hawj vunz Nungzminz lae naed hanh Sim maez ganq miu sang Gou doek hanh byagbyag Vih lwghag rox saw Canghdajdeu sim genq Gaek rin bienq baenz va Gou sim ndongj(geng) gvaq faz(diet) Vih swva son hag Canghva hanh rwed va Suenva mwn youh ndongq Gou hanh doek dieg Cuengh Maqmuengh ok yinzcaiz Sawcuengh ndaej doigvangq Bouxcuengh angq daengz maez Gou dwg boux lauxsae Ndiep gyaez hong Sawcuengh ----Bauq Sawcuengh 1984.9.1

路漫

	49.Doek Hanh Vih Swva Lij Faz Naedhanh sawsiksik Ndikndik lumj nyawh baenz Naedhanh ndongq lumj ngaenz Miz gimngaenz nanz vuenh Seizcin raeuz caux goek Naedhanh doekbyoegbyoeg Muengh daengz neix ndwen loeg Henj ndaw doengh gyang ndoi Naedhanh vuenh naedhaeux Naedhaeux bengz gvaq gim Ngoenzneix cang haeux rim Raeuz simvuen ndaej fouq Genj naed hung naed fag Simndat dak gimsa Gai haeux hawj guekgya Vih swva ok hanh ----Bauq Sawcuengh 1984.8.11

路漫

	50.Goj Gangj Mbouj Rox Mbwq Lij Faz Ronghndwen ronghcangcang Ciuq gonganx henz laeuz Haemhnaengz gwn gvaq caeuz Doxiu daeuj gangj goj Mbouj cienz go duziu Mbouj riuz goj duzfangz Vahrwix raeuz mbouj gangj Vahbyangz raeuz mbouj dingq Dwen daengz dangj simvan Danq guekcoj hozmboeng Damz swva simhoengz Ciengq vuenyungz sim’angq Gangj ciuhgonq ciuhlaeng Yaeng gwnzmbwn ndawbiengz Haenh guekcoj fouqgiengz Siengj fatcaiz monzloh Mwngz gangj lawz yozsiz De lwnh di gingniemh Gou gangj lawz caux cienz Caez cienq haeuj lohfouq Haemh gangj mbouj rox mbwq Dauqcawq vunz ninz cingx Danghnaeuz lij siengj dingq Cingj haemhlaeng caiq daeuj ----Bauq Sawcuengh 1984.12.8

路漫

	54.Riengz Dangj Baefoedfoed Seizneix daengz “caetit” Cib ik vunz simhai Daj “Samcung” ciuhai Guek raeuz daih bienqyiengh Doihduz bizbwdbwd Raeux henjrwg gwnz bo Cidoih doh dem doh Ranz moq baiz lienz baiz Dangj ak guek couh giengz Guek rengz minz ndaej fouq Daengx guek angq goenjouj Bouxbiengz raeuz vuenyungz Ngoenzneix raeuz sim’angq Cienz baengh dangj daiq loh Gwn raemx gaej lumz mboq Vut hoj gaej lumz dangj Riengz dangj baefoedfoed Doxdax buet baenaj Netsim guh seiqvaq Hwnq Cunghvaz ndongqgywg ----Bauq Sawcuengh 1984 6 30

路漫

	48.De Hanh Ndik Henz Daiz Lij Faz Roeg ciengq gwnz goraeu Mbanj raeuz miz hek daeuj De mbouj riuj noh laeuj Gwed sawbouh haeuj ranz Caengz sij ndaej gwn caz Couh ra vunz gangjgoj Lwnh sai mbwk nuengx go Bouxboux cungj rox caez Ngoenz caez bae guh hong Haenh de muengzliklik Vunz caem gaeq haen it De hanh ndik henz daiz Fwen danq de mbouj liux Simseuq bouxboux gyaez Daeuj neix dang lauxsae Simmaez son Sawcuengh Gyaez Bouxcuengh lwgminz De haemh ninz mbouj onj Gwn ngaiz mbouj rox donq Vih son raeuz rox saw Raeuz ndaej rox sawcih Docih lauxsae ndei Laemxsim hag roengzbae Vih gaij ndei dieg Cuengh Bae naj ingj swva Caezgya ceng bae duengh Raeuz hag ndei Sawcuengh Swva rongh daengx biengz ----Bauq Sawcuengh 1983.7.16

jywei38

	Mwngz naeuz dou mbouj ndaek, Cam govaet daihluh, Vaet daihluh nemz ndang, Naek nangz hizde yiengh.

路漫

	47.Mwncupcup Hai Langh ------Yawj Vujmingz Dwzbauj Siujyoz Ban Sawcuengh Hagseng Youq Namzningz Veibau Lij Faz Gonq raeuz doeg Sawgun Sam ngoenz hag cih saw Gvaqlaeng fan daeuj yawj Baenzlawz doeg youh lumz Bouxcuengh miz sawfaenz Lumjbaenz max rox mbin Baezneix youq Namzningz Caen’da raen veibau Lwgnyez caet bet bi Hwnj daiz lij lau couj Sij cih lumj lungz foux Bouxboux bek fwngz haenh Mbaq ngamq bingz daiz sang Gangj vah lij nyaenqnyat Doeg saw raeuzradrad Vunzvunz (lag)angq ndawsim Sawcuengh lumj rumzcin Raeuz sim raeujruprup Lwgnye lumj valup Mwncupcup hai langh ----Bauq Sawcuengh 1983.9.10

jywei38

	Fwen langhsa: Haemh neix dou gwn caeuz, ndaej nyi roegraeu heuh, Heuh ngizngaeg ngizngaeuz, lwgnyez naeuz nax moq.

路漫

	46.Caez Vuenheij Daeuj Hoh Lij Faz Ngoenzseng dangj daeuj daengz Youh ngamq hai Yinzda Lwnh diegbingz diegbya Daengx Cunghvaz caez angq Roek Gaiq Yinzda ndei Caez vuenheij daeuj hoh Miz dangj daeuj daz loh Diemzangq doh lajmbwn Beijbaenz rwi caux dangz Va hai dangz diemzwk Gungcanjdangj hungmbwk Cib ik vunz ndaej van Beijbaenz go rangzndoek Ngoenz cix coek cix sang Guenkcoj ndaej fu’gyangz Cienz baengh dangj raeuz ak Cien dah lae coh haij Fanh va maij daengngoenz Raeuz gak cuz lwgminz Sim gyaez dangj fanh daih ----Bauq Sawcuengh 1983.7.2

路漫

	37.Caez Danq Cwngcwz Ndei ------Hoh Cib Ngeih Da Lij Cungzsi Sanhcungh Cenzvei ndei, Angqlangh bae guh hong; Bouxboux yiengq naj bongh, Aen sim ndongq youh diemz. Mou biz biu hub lai, Bit gaeq gai mbouj dingz; Vunz gaenx namh bienq gim, Caez danq cwngcwz ndei. Gaenx hong mbouj famhfap, Fatcaiz lij mboengyungz; Minz fouq guekgya hoengh, Caeux daengz ngoenz swva. Sim’angq cix guh fwen, Simvuen cix diuq foux; Lwnh dungzci baengzyoux, Ngoenzneix raeuz ndei lai. Angq lai fwen baenz haij, Hoh hai cib Ngeih Da; Raeuz lumj go lwgraz, Yied hai va yied sang.

路漫

	38.Gangj Laexmauh Lij Laz Dingqnyi gyong rwenz sim angqyangz Dingq ndaej vah diemz lumj hamz dangz Bungz vunz daix hek laexmauh ndei Vuenheij ciep vunz sim hailangh Va bungz cin raeuj dujduj nding Bya ndaej raemx moq diuqlinlin Heuh vunz bangcoh gangj sing “cingj’ Doiq vunz yezcingz bouxboux gingq Mboujlwnh laux iq rox hauxseng Bouxwnq bungz nanh haengj bang rengz Ndaej vunz bangcoh aeu “docih’ Naengh miz maz ceng sien doxnyiengh Hekheiq gangj sing “mazfanz mwngz” Guh hek okma daengq “ndei naengh’ Nyangz vunz haibak heuh “dungzci” Hojgeiq doxbiek angq gaem fwngz Sai mbwk laux coz caeuq lwgnyez Cungj lumj beixnuengx caeuq bohmeh Caez gangj laexmauh gyaez vwnzmingz Cunghvaz lwgminz hoengh fanh bi 1983.4.9

路漫

	36.Fad Max Riengz Dangj Byaij Lij Faz Va bungz cin cix ndongq Vunz maengx rongh Ngoenz guh hong sasa Raeuz hag Cib Ngeih Da Riuhaha Raen baihnaj ronghsag Gonq gig “coj” haih vunz Guh saehcingz Cungj hat sing cang ak Haex max wenj gvaq rog Baez duet byak Baih ndaw gog nywjnyungz Neix raeuz dangjcunghyangh Ndwn ndaej sang Banhsaeh gangj saedsaeh Vih lwgminz baenz ndei Lai siemgjngeix Gensez ndei guekgya Daj “sanhcungh”daengz neix Ndei fouzbeij Daengx guek ndaej vuenyungz Haeux lai gaeq rim rungz Gwndaenj soeng Cienz baengh gungcanjdangj Youz cuk daeng engq rongh Raeuz mizmuengh Lij aeu bongh baenaj Hag ndei Cib Ngeih Da Vih swva Fad max riengz dangj byaij

路漫

	35.Gaej Diemj Feiz Coemh Ndang Lij Faz Roek ik yinzminz Doxgiet gaenjmaenh baenz gang Meijdi gamj hangz Gyaeqroeg gyawz dangj ndaej ci Aeu vunz miz vunz Aeu haeux aeu ngaenz daihbaj Gang diet baenz bya Daengx guenk bingmax gig ak Gaijfang Daizvanh Bouxboux cungj lanz mbouj ndaej Meijdi gukceij Gaej gag diemj feiz coemh ndang

路漫

	34.Laeb Daih Ceiq Yungzsinh Gaij Dieg Gungz Bienq Fouq Lij Faz Seizgonq bungz mbwnrengx, Haeux rozrengj saetsou; Gozminzdangj cingqfouj, Lij gya sou “goengliengz”. Mbwnrengx saek ndwen lingz, Beksingq mbouj miz gwn; Bouxhoj dai gyang roen, Dicuj gwn laeuj noh. Gozminzdangj haih raeuz, Louz hawj raeuz dieg gungz; Dah hawq bya mbouj fwnz Lienz rum cungj ndi hwnj. Dangj caeuq Mauz cujsiz, Seih vunzgungz mehboh; Gaijfang raeuz bouxhoj, Lohloh vih yinzminz. Gaijfang cib roek cin, Gunghseva daengz neix; Gizgiz bienq yiengh ndei, Bya vuenheij raemx angq. Yinzminz gunghse ndei, Fanh saeh cungj naengz banh; Guh suijli ganghan, Ciengfanh vunz cunghwnj. Hag Daicai cingsaenz, Gaij dieg rin guh naz; Guenj mwngz haij rox bya, Dienz bingz ma ndaem haeux. Hag Yizgungh senj bya, Maz nanz cungj mbouj lau; Gaij dieg gungz menmau, Caih raeuz gyauj anbaiz. Hwnj bya ra raemxgoek, Haeuj gamj yok raemxmboq; Bag bya yinx raemxloh, Laengz dah guh suijgu. Dah lumj muengx baenz saeng, Raengz laeg aen dem aen; Couhsuijgih suijbung, Baenq lulu byoq raemx. Caiq rengx buenqbi ba, Raemx naz rimfeifei; Gohaeux ngeiq daeb ngeiq, Reih sang goj sou haeux, Roengzrengz song sam bi, Suijliva saedyienh; Vunz gaem guenj liux dien, Mbwnrengx caiq mbouj lau. Miz raemx bak yiengh ndei, Bya biz hajnieb mwn; Giet mak duengq mak hung, Bit hanq nyaengq daemz dah. Miz raemx ndaej fazden, Mbanj lienz mbanj ronghsag; Daem haeux mbouj yungh sak, Bak yiengh miz gihgi Byaij seveicujyi, Gauq swlizgwnghswngh; Laeb daih ceiq yungzsinh, Gaij dieg gungz bienq fouq.

路漫

	31 Fwen Daeuq Sau Lij Faz Raemxdah laenengqnengq 河水流去亮晶晶， Raemx cienj rox raemx caem 不知是浅还是深； Fwngz baeuh roengz ndaek rin 丢块石头试深浅， Sawq sim nuengx song gawq 唱句山歌试妹心。 Youq mbwq cix eu fwen 走在路上心烦多， Sim vuen lumj ndaej yah 唱句山歌当老婆； Bouxcoz angq guh saj 青年谁个不爱耍， Nuengx gaej ndaq beix fouz 妹莫骂我轻浮哥。 Naz biz mbouj doek gyaj 好好的田不种禾， Cawz gvaq miuz nanz heu 过了夏至禾苗枯！ Baenz sau fwen mbouj eu 好好的妹不唱歌； Naj reuq eu cix ceiz 脸皱后悔变老婆！ Seizcoz fwen mbouj eu 年轻时候不唱歌， Hwnj deu song ga naet 爬坳两腿也哆嗦； Seizcoz mbouj doxnaek 年轻时候不交情， Uengjfeiq daek gvaq cou 过秋蚂蚱叹零落！ Raen va sim cix angq 见到鲜花心飞飞， Raen doengzbangh simhai 见到同龄喜开怀； Hing oiq cauj nohvaiz 牛肉要有嫩姜炒， Ndei soengq ngaiz fouzbeij 吃起饭来胃口开！ Eu fwen ndaej gaij mbwq 唱句山歌把愁解， Gwn ndwq lawz baenz fiz 酒糟难醉哥心怀； Eu fwen daeuq nuengx nyi 声声山歌来逗妹， Dangh miz sim cix dap 有心就请唱过来！ Eu fwen mbouj dwg bag 唱歌不是人发癫， Miz bak byawz mbouj fwen 人人崇拜老歌仙； Raen va hai henz suen 花开园边谁不爱， Byawz mbouj vuen bae mbaet 随手采来藏心间！ Eu fwen lai hozhawq 嘴巴唱多喉咙焦， Da yawj lai simfanz 眼睛看多心情糟； Raen nuengx bak mbouj han 只因阿妹不搭理， Sim mbouj gam dahraix 心中不甘唱通宵！ Sing fwen yienznaeuz unq 乍听歌声软绵绵， Caemh rox naemq simdaeuz 若碰石头也冒烟； Coenzcoenz fwen nyaenx naeuz 句句真诚声声唤， Siengj gouz nuengx hai bak 只求听到妹开言！ Eu fwen mbouj ndei yiet 唱歌不让歌声断， Laeuj dep mbouj ndei dingz 喝酒不给酒壶干； Laeuj hawq lij miz bingz 酒壶干了瓶还在， Fwen dingz cix nanz swnj 歌声断了就难还！ Gouz nuengx saedsaeh nanz 求妹唱歌实在难， Gouz sam youh gouz seiq 求一求二又求三； Vunz ciq cienz cix ndaej 向人借钱还容易， Baeq ciq bak nyaenx nanz 怎借歌声这样难？ Miz fwen mwngz mbouj ciengq 有歌不唱妹收藏， Miz buh cuengq haeuj loengx 有衣不穿放笼箱； Gvaqlaeng comda rungq 待到眼角松弛了， Buhvaq byoengq baenz saeng 新衣烂成网一张！ ——Gvangjsih Minzcuz Bau 20020403

路漫

	33.Geijlai Saeh Ndei Ciengq Baenz Loz Lij Faz Ronghndwen hwnjdaeuj sang youh sang Ciuq ndaej diegdangz ronghcangcang Haex bo lumjbaenz gongq byagim Itbo engq beij itbo sang Goenglaux ngonz haeux riuhoho Seyenz iu youx caez ciengq go Geijlai sim’angq ciengq mbouj liux Geijlai saeh ndei ciengq baenz loz Ciengq ndaej ronghndwen mbouj sij deuz Ciengq ndaej raemxdah hai sing riu Ciengq ndaej ndaundeiq yaep da dingq Ciengq ndaej sing go fanh leix riuz It ciengq fungsou cienz baengh Dangj Caiq ciengq gunghse ligliengh giengz Sam ciengq binzya byaij doekgonq Seiq ciengq seyenz sim doxlienz Sing go yied ciengq sing yied sang Fwen go yied ciengq sim yied van Miuz neix fungsou dem ganging Dued aeu haenxlaeng fan it fan

路漫

	32. Lienh Ndei Bonjsaeh Dang Ciepban Lij Faz Daengngoenz hwnjdaeuj hoengz youh hoengz, Ciuq raeuj bak va hai baenz gyoengq; Cujsiz swhsiengj dwg daengngoenz, Vangz Gez dwg dujva gim ndongq. Seizcin va hai doxsaiq hoengz, Gyoengqraeuz doxsaiq hag yinghyungz; Yozsiz Vangz Gez ceiqheiq genq, Vihliux gwzming gamj vutmingh. Gaej guh va hai ndaw gyangranz, Aeu guh va hai gwnz dat sang; Souh ndaej fwn rumz caeuq mwi daj, Gwzming mbouj lau haemz soemj manh. Gamj guh bing nyit bongh gvaq dah, Gamj gwn vunzdig gaw bauq max; Aeu guh gwzming faenceh ndei, Doek youq gizlawz cungj mwn maj. Itsimiteiq vih gwzming, Byaj bag cax raemj sim mbouj saenz; Cujsiz lawz gangj gou lawz guh, Dangj heuh cungfung gou gamj cung. Vih cihgeij dai cienh dangq ma, Vih yinzminz dai naek gvaq bya; Gamj buek gamj daeuq nauh gwzming, Mbouj cuengq cih dai youq naj da. Bak doeg Mauzsenj diemz lumj dangz, Haglienh couh yungh rengz rim ndang; Yozsiz Vangz Gez ndang aeu guh, Lienh geng bonjsaeh dang ciepban.

路漫

	43.Seizcin Bengz Lij Faz Byajraez ndaw cieng co Naz gwnz bo ndaej raeq Roeggeuq ciengq gwnz ngeiq Bineix yaek fungsou Hwnj ranz dajgiek maenh Cien ngoenz gaenj maenhndaet It ngoenz yawj gyanghaet It bi yawj haicin Cawzcin seizgan bengz Aeu roengz rengz ganj hong Ca it dingj ndaej song Hongloh ciengj baenaj Cawzcin ndwenngoenz gvaq Lumj naq yaep da deuz Nguh hong bae ngoenz ndeu Ndek miuz ndeu sied sou Cin raeuj va ceng ndongq Raeuz guh hong doxsaiq Beij boux lawz fouq vaiq Fatcaiz dang lauzmoz ---Bauq Sawcuengh 1983.3.5

路漫

	谢谢jywei38 MM, 我的作品都是创作的，请多多指教！

路漫

	45.Hoh Gozging Lij Faz Bya faengz gungq hix diuq Rwi iu mbaj angq coux Haenh ndei youh danq fouq Coux gozging daeuj daengz Langh Vangzhoz angqyangz Dah Cangzgyangh ciengq go Cib ik vunz angqhoh Gvaq gozging ngoenz neix Haenh goekcoj fanh gyaeu Danq raeuz dangj lingjdauj Daengx sai mbwk coz laux Angqvau byaij loh moq ----Bauq Sawcuengh 1983.10.1