[原创] Youz Diegcuengh Baksaek (8)

AAAAAyingj

	-----------------------Bae Dwz Bauj  Camgya  Fwenhoih---------------------    Ci daengz Dwzbauj ,gwnz ci couh mizvunz laeng Swhgih cengaeu cienz saethoenz , Swhgih it boux hawj seiq maenz cienz le ,gyoengq de cij deuz , aen vih gou guh bang  rag goeng  Swhgih ok ci ,yiengh haenx goeng Swhgih heuh gou bae gwn haeux ,gou do cih de, naeuz mbouj bae lo ,yiengh haenx de couh doiq boiz gij cienz ci hawj gou .       Gou gwn vanj faenj le, aen vih mbwn doek di fwn ,byaij youz caemh buh mbeiq , yiengh haenx gou couh bae Vangjbah sij gij youzgeiq gou ,it cig sij daengz sam diemj lai cung caj fwn dingz di le cij youz gai Dwz Bauj .     Aen singz DwzBauj diuz gai gig  gancengh , ranz louz mbouj suenq sang ,gou doq youz gai seiz ,daj denq vaq 0776-3829627 giz Fwen hoih  lienzheih ,yaek ra biuq ,hoeng miz dah sau ndeu ciep ,naeuz mbouj miz biuq lo ,yaep ndeu caiq daj mbat daih ngeih , miz meh nangz ndeu ciep ,gou naeuz ra  Hungzmenzcu , mehnangz naeuz :Hungzmenzcu bae  Lijdangz  yaengq saeh lo ,yiengh haenx gou couh bae  Lijdangz ,yaek ra Hungzmenzcu  yawj ,swnh bienh ra biuq .Caeuq beixnuengx dox nginh caemh dwg hangh ndei  saeh,sug vahgangj ,lai boux baengzyoux  lai diuz loh .                 Gou doq youz gai , doq ra roen Lijdangz ,byaijbyaij le , dingq miz sing ndaek gyoeng  laz  ,gou naemj ,gij haenx it dingh dwg lienh cietmoeg yaek haemh neix yienj , gou swnh sing ra bae , youq hangz hai buhvaq haenx miz gyoengq vunz beixnuengx  hauxseng , doxcom lienh diuq foux , diuq dwk gig miz singjsaenz ,gou youq henz yawj can he  lex  ,couh byaij ok ma ,youq diuz hangq gai iq ndeu ,miz hauj lai vunz homz youq aen bouq iq ndeu ,aen bouq iq neix gwnz baj dou baiz hauh sij : DwzBauj Lijse .  youq bak dou ,gyoengq de cingq hai heiqcuengh swzdaiq , heiq cuengh baj ceb  ,aen caijdenq cingq cuengq heiqcuengh ,gou couh laeng boux hai  aeu  aen daengq ndeu naengh youq henz de dingq ;  Dingq boux hai gangj ,gij heiqcuengh neix dwg Vunzcuengh raeuz  gag  aeu  Sawndip sij ,gag baiz gag yienj , gag ingj gag luz , dwg Dwzbauj vwnzvaq dujdwz sanj ,aen vih gou aeu vah Vuj mingz cam , de caemh aeu vahcuengh Dwzbauj gangj  . Caensaed , Vah Dwzbauj caeuq vah Vujmingz miz di mbouj doengz  , gouq cij dingq rox byongh dingz , de yiengq gou gangj liux hauj lai nanz ,gou cij dwg ngaek gyaeuj caeuq wx,wx , de gangj  lengq cih swz yinx dwk vunz hen gou riu ,hoeng gou mbouj rox caez dwg gij maz ei sei ,caemh gaen riu hehe ,gou youh cam : Riu gij maz  ? Goeng  hai haenx  couh mbouj gangj lo ,naeuz ,ne ,dawz bae ma menh menh dingq , gou cam geij lai cienz ,  it yiengh aeu itj baj . Cungj gungh aeu  liux haj cib maenz cienz  doxgaiq , ndaej byoengh daeh swzdaiq caeuq  baj diep . Gou couh byaij ok   aen hangz gai haenx ,ok daengz bak hangq , bak hangq haenx ngamq miz song mij lai gvangq ,caeuq diuz gai hung dox ciep ,gou ndwn youq giz haenx yawj hwnj daeuj  gig mbouj  swnh da ,  ciuq Sawgun mbefat doengh diuz gai haenx , mbe fat  ndaej  hunghunggvangqgvangq , ciuq bonj dieg vwnzvaq guh mbefat ,diuz roen youh gaeb youh  iq ! Gou caen vih Vunzcuengh vwnzvaq you sim , song cungj vwnzvaq aen vih mbe fat douz swh fueng yiengq mbouj doengz ,couh ok song cungj mbouj doengz gij yiengh !Cwngqfuj diegfueng mbouj dwg aen vunz bonj dieg   , de cij dwg gaep baih gwnz  Cwngfuj  aen gihgouq lwg ndeu ,vunz Cwngfuj cij  vih baih gwnz guh hongsaeh  ,mbouj dwg vih vunzgyoengq baih laj guh saeh !  Dangh naeuz gaep baih gwnz Cwngfuj dwg youz Vunz aen mizcuz wnq guh daeuz , gij vwnzvaq raeuz engq gya mbouj miz vunz bae cing daeuz bae  guh bae daeuzcienz  bae cihciz lo !     Gou youh coh aen lijdangz fuengyiengq byaj bae ,youq henz gai miz aen bouq hai buh [ Gingbaq nanzcangh ] ndeu  ,gwnz de miz hangz Sawcuengh gouq ndeu ,hawj gou gig lumj rox yaeb ndaej gim ne ,gwnz de dwg sij : Dwzbauj Beiqfuzcangj ,laj de dwg hangz sawgun . Gij haenx couh dwg  vwnzvaq gujciz vunz raeuz ha ! Goudaj hag Sawcuengh daengz seiz neix ,yawj raen cih Sawcuengj ndaej hawj vunz  raeuz sawjyungh gig noix , caemh mbouj raen gvaq cih Sawcuengh gouq sij ndaej baenz neix hung gvaq ,seizneix yawj raen Sawcuengh gouq  youq haj cib nienz daih gaenq yungh ma sij hauh cohbaiz aen cangj .Geij cih Saw haenx ndaej naeuz gou  ngyi ,Sawcuengh youq doengh baez  gaenq dwk roengz haeuj Sim vunzcuengh  laeglaeg , vunzraeuz gaenq ndaej yungh de ma  hai cangj guh seng eiq lo  !  DwzBauj  Sawcuengh vwnzvaq  sawjyungh beij Vujmingz ,beij gak dieg lij hwng vuengh ! Gvaiq mbouj ndaej   Dwzbauj ok baenz lai vunzraeuz vwnzvaq bouxcaiz !     Dwzbauj gwnz gai lengqlengq gangj cuengh , vunz gangj  Begvah  gig noix , gou haeuj bouq aeu Begvah cam gyaq ,dingq ndaej rox gig noix ,gou naemj , doeng baez Yezbing gung dwk Gvangjsih seiz ,it dingh dwg doengh aen byarauh  henz  daih roen haenx dangj liux gyoengq de, sawj gyoengq de dwk mbouj haeuj  Dwzbauj , yiengh neix Dwzbauj mbouj souh daengz Begvah  ingjyangj ,Cingjsih caemh wng dang dwg yiengh haenx , Dwzbauj Cingjsih song aen yienh singz it dingh gig noix miz Vunzhek !  Hoeng gou caen mbouj rox vah Bujdungh dwg baenz lawz byaij haeuj  Dwzbauj Cingjsih di ne ?     Gou coh aen Lijdangz caiq byaij bae .....

越色僚人

	Ayingj beixnuengx ha, mwngz vihmaz mbouj caeuq 沙南曼森 beixnuengx lienzhaeh ni? Danghnaeuz mwngz caeuq de lienzhaeh, mwngz itdingh aeu ndaej biuq haeujbae Lijdang Dwzbauj yawj aen Hoigo Beixnuengx Dwzbauj Cingsih Ndwencieng 2005 bi. Hojsik ha!

AAAAAyingj

	Mbouj hoj sik law ,Ndaej youz ndaej dieg  DwzBauj ,gou cungj rox muenx cuk raixcaix lu ! Yawj gij diep gyoengq de guh ndaej baenz nauhyied ,gij neix couh dwg naeuz hawj vunz raeuz rox : Vunz beixnuengx DwzBauj gaenq rox yungh gij coengmingz  caeuq gij vwnzvaq bonj faen ma yiengq daengx seiq gyaiq guh canjlanj ,guh guh ok mingz lex , bae gak dieg cuengh youz yienj .Vwnzvaq caemh ndaej bienq  baenz  caizbauj ha !

Stoneman

	以下是引用越色僚人在2005-2-18 15:45:14的发言： Ayingj beixnuengx ha, mwngz vihmaz mbouj caeuq 沙南曼森 beixnuengx lienzhaeh ni? Danghnaeuz mwngz caeuq de lienzhaeh, mwngz itdingh aeu ndaej biuq haeujbae Lijdang Dwzbauj yawj aen Hoigo Beixnuengx Dwzbauj Cingsih Ndwencieng 2005 bi. Hojsik ha! Vihmaz youq Dwzbauj dwg gangj "2005 bi", mbouj dwg gangj "bi 2005"? Youq mbanj gou haenx dou dwg gangj "bi" geijlai, roxnaeuz geijlai "nienz", lumjbaenz "bi 2005" (bi ngeih lingzlingz haj" roxnaeuz "2005 nienz" (ngeih lingzlingz haj nienz). "2005 bi" youq dieg gou dwg "song cien lingz haj bi": daj seizhaenx daengz seizneix gaenq miz 2005 bi lo.

AAAAAyingj

	Doi mbouj hwnj ,gou cingj leix  gij youz geiq gou ,cij raen bien gwnz beix nuengx cam vah haenx , seiz neix cij ndaej dap fuk mwngz : Dang seiz  Soujgih gou mbouj miz denq lu , gij hauh dawz mbouj ok daeuj !

越色僚人

	以下是引用Stoneman在2005-2-23 3:36:46的发言： Vihmaz youq Dwzbauj dwg gangj "2005 bi", mbouj dwg gangj "bi 2005"? Youq mbanj gou haenx dou dwg gangj "bi" geijlai, roxnaeuz geijlai "nienz", lumjbaenz "bi 2005" (bi ngeih lingzlingz haj" roxnaeuz "2005 nienz" (ngeih lingzlingz haj nienz). "2005 bi" youq dieg gou dwg "song cien lingz haj bi": daj seizhaenx daengz seizneix gaenq miz 2005 bi lo. 我的看法是：2005 bi 是从记数的方式去算的，即从公元开始已经是两千零五年了。也就是说，2005 nienz ＝ 2005年， 2005 bi ＝ 两千零五年。