[原创] Youz diegcuengh Baksaek9(1)

AAAAAyingj

	Youz Yienh Singz Bingzgoj     Haemh ndaep  daengxgya comz ,     Co it  homz dox baiq ,     Ce daeuj co  ngeih daih ,     Cosam byaij ok youz .     Bak saek dwg dieg cuengh Vunzraeu  dox comz youq gig lai giz dieg fueng , gangj gij vah caeuq vah Vujmingz mbouj ceng geij lai ,yawz bienh ndaej dox damz vah ,Denzyangz lij dwg Cojgoeng Bouxroxdoh sengyouq dieg fueng ,ciuq leix gangj ,gou lij dwg dauq ma  dieg coj youzcet !     Cim ciet cieng ndaej hoengq ,gou byaij geij ngoenz  Baksaek youzet .     Ban ngoenz cib it diemj cung ,gou cij ok daeu caj ci . Daj Vujmingz bae  Baksaek ,canq daih it dwg Yienh Bingzgoj .Bae bingzgoj ci loq noix ,gou cij ndaej sien dap ci bae daengz Vujmingz Lingz max ,caiq daj Lingzmax dap ci daengz Bingzgoj lo !     Daj Vujmingz daengz Lingzmax 40 Goengleix ,tiemj cung ndeu couh daengz ,baez roengz ci ,couh miz ci mienqbauh caj gou  bae Bingzgoj .Daj Lingzmax daengz Bingz goj ,caemh miz 40 goengleix baenz neix , aen cungdaeuz ndeu couh daengz , It loh roen , faex lij heuswdswd ,dang naeuz mbouj dwg tien heiq nit ,caen mbouj rox nyinh dwg seiz doeng ,diuz loh song henz ,mbanj  cuengh ,dieg raeh dieg naz ,suen mak suen byaek ,bya ndoi ,daemz raemx , cungj hawj gou rox nyinh sim sangj raixcaix ! Ngoenz neix youq henz loh caj ci vunz gig lai, caemh dwg ngoenz   vunz raeuz dox byaij caen cik ,dox yawj beixnuengx, lwgsau  bae ma yawj Bohmeh ngoenz ciet naek ndeu ha !    Ci hai daengz Bingzgoj Seiqdangz ,aen ci boux hai biuq naeuz raeuz ngyi , Daengxguek cwngyez  boux Fucujsiz Lij Cauqcoz aen ranz coj de couh youq Seiqdangz mbanj  Loegmboeg ,Gou byaij diuz roen haenx lij dwg sam gaep roen, diuz roen lij gaebged ,dang naeuz Lij Caucoz ma ranz ,diuz roen caen dwg mbouj ndei byaij ,de dang Cujsiz seiz ,guh liux hauj lai diuz daih roen   ,mbouj caengz ndaej vih aen mbanj bonj faenh coih roen hung ,caen dwg boux guen ndei ha !     Mbouj geij nanz ,couh daengz yienhsingz Bingz goj lo ,Gou Youq gwnz gai yawj raen mbaw  gvangjgauq ndeu ,caen hawj gou angqheiq ,gwnz de sij :      Cieng co caet ,(goenz 15 hauh)youq yienh Bingzgoj  cin Gojva mbanj  Byayingz  guh  hai Ciet Minzgo hozdungq , cingj gak dieng Fwenvuengz bae eu fwen dwk Laezdaiz ,caemh caiq cingj yienh Gohvuj donz bae yienj heiqcuengh !     Gou naemj ,mbanj cuengh hwng guh Ciet Minzgo ,saeh moq ha ,caen miz doigvang  jiaciz ,dangh naeuz diegcuengh raeuz  mbanj mbanj hai ,caen dwg hwngvuengh ha !Dang naeuz   Sawcuengh doi hengz ndaej ndei ,aen mbanj Byayingz miz boux rox sij  Sawcuengh ,couh ndaej dawz doengh boux  fwenvuengz caux gij Fwen gyaet haenx cug bi  geiq roengz daeuj ,bien naenz fwenrom , couh ndaej hawj lwg lan mbanj de rox dah goeng de guh liux gij maz hong saeh ,ngvanh gvaq gij maz hong saeh ,yiengh neix ,Vunzcuengh raeuz couh ndaej daih beij daih cing ,daih beij daih coengmingz !Guh vunz daih beij daih miz cinbuq ! Muengh mbanjmbanj lumj mbanj  Byayingz it yiengh ,hai guh  ciet Moinzgo ,hwng vuengh  Vunzcuengh vwnzvaq !     Gou youq gai Bingzgoj byaijbyaij le ,raen henz singz miz aen bya ndeu gwnz dingj miz aen dap moq ndeu ,couh byaij hwnj bae ,yaek yawj aen dap moq haenx youh  swnh bienh yawjyawj  daengx singz Bingzgoj baenz lawz yiengh ,mbouj liuh hawj gou  raeb daengz cik saeh  Vunzcuengh  ngaizdeng raeb   vwnzvaq cai nanh ndeu ,hawj gou gig ndat heiq !Cik vwnzvaq cai nanh haenx hawj mbanjcuengh mbanj Hwnjmaxdaeuz   miz hauj lai boux ngaiz Gunghanh gaeb bae gyaeng !       mbouj ndaej lo ,ngoenzcog menh sij ! Gou aeu vaiq di bae ra gwn ,yaep ndeu lau dwg  mbouj miz gwn !                                              2005.cieng co sam

Stoneman

	以下是引用AAAAAyingj在2005-2-11 20:43:54的发言： Youz Yienh Singz Bingzgoj ...,mbouj liuh hawj gou raeb daengz cik saeh Vunzcuengh ngaizdeng raeb vwnzvaq cai nanh ndeu ,hawj gou gig ndat heiq !Cik vwnzvaq cai nanh haenx hawj mbanjcuengh mbanj Hwnjmaxdaeuz miz hauj lai boux ngaiz Gunghanh gaeb bae gyaeng ! .... Ayingj, goeng'heij sin'nienz mwngz. Mwngz baihgwnz naeuz gij saeh neix dwg saeh maz? Gij vunz haenx vihmaz ngaiz Gunghanh gaeb bae gyaeng ha? Gunghanh dwg gij maz eiqsei? Caemhcaiq, mwngz youq aen haw Bingzgoj caeuq gij vunz gizhaenx dwg aeu vah maz daeuj gangjvah? Lumjbaenz, mwngz bae ra gwn, haeuj aen diemq bae gwn caeuz, mwngz dwg aeu Vahgun, Begvah, Bingzvah, cixnaeuz Vahcuengh daeuj cam ha?

AAAAAyingj

	Gunghanh couh dwg Gunghanh Giz Boux Gingjcaz . Gou it loh daeuj ,cawx biuq ci ,naenghci, youq Lijse ,gwn haeux , cungj dwg aeu Vahcuengh cam vah ,gou caeuq Beixnuengx Bingzgoj Denzdungh ,Denzyangz gangj vah guh gyau louz ,caemh dwg aeu Vahcuengh Vujmingz ,hauj lai vunz lij dingq ndaej ok yaem vah gou dwg vahcuengh Vujmingz ,Vah gyoengq de 95 % dox hwnj gou dingq rox liux , gij vah mbouj ciengz gangj cungz fuk song sam baez le, gyoengq de caemh ndaej rox gou gangj gij maz lo ! vah ciengz yungh gih benj dox rox ! Youq Yienhsingz Bingzgoj ,Denzdungh ,Denzyangz ,guh sengeiq daih bouh faenh dwg Vunzcuengh ,rox gangjcuengh ,hoeng gyoengq de haengj heiq aeu Begvah caeuq Vunz guh gangj ,gyoengq de gangj vahcuengh gig swh yienz ,mbouj miz lau gangj rox naeuz mbouj haengj gangj cuengh cungj cingzgvangq haenx ! Youq ndaw siq Baksaek ,gangj cuengh gig noix ,ra boux gangjcuengh caen mbouj yungz heih ,ra deng boux de, de caemh mbouj haengj gangj geij lai ,caen dwg vanzgingj bienq ndaej vunz ha ! Docih mwngz ngvan sim ! Gouz seiz neix ngamq daj ndaw gya lungz gou ok ma ,youq ndaw Siq Baksaek aen vangjbah ndeu daj saw !