Fung Saenq Cang Miz Saenqfung Caeuq Youzbyau Haenx

河谷幽兰

	Fung Saenq Cang Miz Saenqfung Caeuq Youzbyau Haenx 一封装有信封与邮票的信 上林县大丰镇皇周小学四年级一班   黄文荣     Geizgonq yozyau cujciz hozdung, yauhgiuz raeuz sij fung saenq、gien bonj saw ndeu hawj siujyoz lajmbanj. Gyoengq doengzhag cungj cizgiz yangjying,    dawz   《Govai    Yezduz》《Gohou Lensiz》daengj haujlai saw gien okdaeuj, banhcujyin hawj moix boux doengzhag fat cieng ceijdiuz ndeu, gwnzde miz lienzheih dicij, gou aeu sij saenq hawj Vangz Bingzbingz doengzhag.     Sij ndaej saenq nem youzbyau geiq okbae le，gyoengq doengzhag cungj muengh sou ndaej hoiz saenq. Miz ngoenz ndeu banhcujyin gaem dab saenq ndeu byaij haeuj gyausiz, gyoengq doengzhag cungj angq dwk doeg gij hoizsaenq cihgeij. Gou gaem fungh hoiz saenq gou, fatyienh gwnzde mbouj nem youzbiu, cij youq gwnz saenqfung yaenq aen yaenq.     Cuengqhag ma ranz, gou cam daxboh：“Neix dwg vih gijmaz？”Daxboh lwnh gou：“Gojnaengz dwg yozyau baihhaenx dungjyiz geiq saenq okdaeuj, yozyau fucwz ok cienz.”     Gou naeuz：“Danghnaeuz yozyau mbouj caiq dungjyiz cujciz lo, dwg mbouj dwg doengzhag  cihgeij couh gag ok cienz cawx saenqfung caeuq youzbyau lo？”Daxboh naeuz：“Dwg ha, mboujmiz youzbyau, saenq baenz- lawz geiq okbae ne？”     Ndaw sim gou gag ngeix：“Lauxsae naeuz hagdangz lajmbanj miz mbangj lwgnyez ndaw ranz gig gunnanz, lienz ra geij maenz ngaenz cawx saw cungj mboujmiz, seizneix geiq saenq aeu 2 maenz ngaenz, danghnaeuz aeu sij saenq lienzheih, yienghneix va cienz hix lai ha, baenzlawz banh ne……”     Hoiz saenq seiz, gou cawx aen saenqfung hung ndeu, youh lai cawx 10 cieng youzbiu caeuq saenqfung, cienzbouh cuengq youq ndawde, nem youzbyau le couh geiq okbae lo.     Bohmeh rox le angq dwk byaujyangz gou. Gvaq geij ngoenz le, banhcujyin gaem aen saenqfung byaij haeuj gyausiz naeuz：“Vangz Vwnz- yungz, neix dwg saenq mwngz.”     Yawj gij saenqfung baihgvaz miz gij mingzcoh“Vangz Bingzbingz”, yawj gij youzbyau  caeuq saenqfung gig sug haenx, gou lij caengz hainduj doeg saenq ndaw sim gaenq lumj oij yub  dangz  nei  diemzsisi  bae. （指导老师：潘月梅）                   原载《广西民族报》壮文版2003.01.30

执行长

	壮文，真是自愧不如啊

土人香草

	多一些小朋友来学，我们的壮文就有希望了。