花山的故事(9)

lozmingz

	[这个贴子最后由lozmingz在 2002/11/17 10:27am 编辑] GOJ BYARAIZ 花山的故事 　 　 9. MGUEMZ BEGHAG Doenghbaez, youq haenz Dah Cojgyangh miz goengq bya he, laj de miz boux hauxseng heuhguh Daeggang. Youq gwnz dah aen ruzdwkbya miz dahsau heuhguh Dahlan. Daeggang caeuq Dahlan daj lij nyaeq couh haethaemh youq giz ndeu guhcaemz, gig doxndei. Moix ngoenz haetromh, Daeggang rap fwnz daengz haenz dah, cungj dwg Dahlan aeu ruz cauh de gvaqbae. Banhaemh, Daeggang gai fwnz dauqma, youh dwg Dahlan cauh ruz soengq de ma ranz. Daj seizcin daengz seizdoeng, ngoenz gvaq ngoenz, bi gvaq bi, cungj mbouj duenh gvaq. Doeklaeng, Daeggang baenz boux hauxseng gyaeu, Dahlan caemh baenz dahsau ndei lo. Miz haet ndeu, Daeggang rap fwnz daeuj daengz haenz dah. Dahlan caeux van ruz youq haenz dah caj de lo. Daeggang cauh ruz, raen de ndei lumj yahsien nei: naj hoengzmaeq lumj duj va moegmienz; da singjsak lumj conghmboq, ndang mbaeu ndeiyawj lumj go’ngaeux nei. Daeggang miz haujlai vah ndwnj youq ndaw dungx, hai bak siengj gangj, geij baez cungj gangj mbouj ok. Da raen ruz cauh daengz gyang dah, Daeggang simgaenj dangqmaz. Seizhaenx, dingqnyi gwnzmbwn miz sing hemq “gogo”. De ngiengx gyaeuj mbat yawj, raen miz bang roegbeghag daj gwnzmbwn mbin gvaq. Yaep he coemj roengz raemx dot bya, yaep he youh doxgyaep doxdot, mbin youq gwnzmbwn. Mbwn aeuj、fwj hau、bya heu、beghag, cungj ingj youq ndaw raemx, ndeiyawj lai lo. Daeggang ra daengz vahgoek lo, de vix coh gyoengq beghag mbin youq byongh dat haenx naeuz: “Dahlan ha, danghnaeuz raeuz hix lumj doiq roegbeghag ityiengh, ngoenzngoenz mbin youq giz ndeu, mbouj rox geijlai ndei ha. ” Dahlan cai ok sim Daeggang naj nding liux, de sawq Daeggang naeuz: “Mwngz bae gaeb doiq roeglwg beghag daeuj hawj gou ciengx, beghag mbin youq giz ndeu seiz, raeuz couh ndaej ngoenzngoenz youq giz ndeu lo.” Daeggang dingq le, sim’angq dangqmaz. Ngoenzlaeng banhaet, de couh benz hwnj goengq bya laeng ranz bae, siengj gaeb aeu doiq roeglwg beghag. Beghag douh youq byai faex, raen miz vunz daeuj, couh dop fwed “fwfw” mbin deuz lo. Daeggang raen byai faex miz haujlai rongz beghag, rongzrongz cungj miz gyaeq, de couh genj aeu song aen ceiq hung dawz ma soengq hawj Dahlan. Dahlan dawz song aen gyaeq beghag cuengq haeuj rongz gaeq bae, hawj mehgaeq raiz faeg, faeg ndaej ngeih cib it ngoenz, rouh gaeq faeg ok lo, beghag cungj caengz faeg ndaej, caiq faeg ngeih cib it ngoenz, rouh gaeqdaih ngeih youh faeg ndaej lo, beghag vanzlij caengz faeg ndaej, itloh faeg baenz roek cib sam ngoenz, beghag faeg okdaeuj lo. Doiq roegbeghag neix cuengq youq gwnz ruz Dahlan ciengx. Daeggang moix ngoenz hwnj bya dwkfwnz, mbouj guenj baenzlawz hoj, cungj aeu roengz rij bae gaeb di gungq di nyauh daeuj gueng lwg beghag. Dahlan ngoenzngoenz dwk bya, mbouj guenj ndaej lai ndaej noix, cungj aeu louz di gungq di bya daeuj gueng song lwg beghag nyaeq. Song boux yunghsim dajleix, mbouj geij nanz, beghag couh majhung lo. Mwngz yawj de, daengx ndang hausaksak, gwnz gyaeuj miz aen dingj nding he. Gyoengqde mizseiz iet hoz raezrangh, yungh bak daeuj saex bwn; mizseiz iet song ga sang vidvid, baenz yamq baenz yamq byaij youq gwnz sadan. Dahlan caen gyaez song lwg beghag nyaeq neix la. Haetromh, de cungj aeu fagroi de daeuj bang beghag roi bwn. Beghag hix gyaez de, raen de bae dwkbya, cungj riengz laeng de mbin bae mbin dauq. Mizseiz, de yawj beghag baenz sueng baenz doiq mbin, cuh naemj simsaeh, lienz muengx hix lumz sat lo. De caegcaeg doiq beghag naeuz: “Beghag ha beghag, sou song duz ngoenzngoenz youq giz ndeu, gou caeuq Daeggang ngoenzlawz cij ndaej youq giz ndeu ne?” Haet ndeu, Dahlan youh cauh ruz bae dwk bya. Duz beghag he“gogo” hemq, couh mbin coh sadan bae, yungh bak yiengq ndaw raemx mbat dot, dot ndaej duz byaleix lumj fajfwngz hung nei hwnjdaeuj, mbin dauq cuengq youq gwnz ruz. Lingh duz beghag mbin daengz haenz dah ndaek rin hung, daj ndaw dungx gyapbangx gamz ndaej naed caw ndongqliklik, mbin dauq cuengq roengz gwnz fajfwngz Dahlan. Mbouj daengz buenq ngoenz, Dahlan couh dwk ndaej song rieng bya caeuq haujlai naed caw. Dahlan ce caw roengzdaeuj, dawz byaleix hwnj haw bae gai. Miz ndaek hakdoj byaij gvaqdaeuj, yawjraen song rieng byaleix hung diuqbobbob, yiuq dwk da mbouj yaep. Caiq raen Dahlan gyaeundei, engqgya ngah ndaej myaiz rih sam cik raez. De byaij gyawj Dahlan, riuhehe naeuz: “Gou seiz duzmeuz, gig ngah gwn cauz(sing). Song rieng bya mwngz gou cungj aeu caez!” Gangj sat, couh heuh Dahlan soengq bya daengz ranz de bae. Dahlan ngamq doiq ok bakdou, hakdoj couh ep de naeuz: “Ngoenzcog mwngz caiq soengq baenzlai bya daeuj hawj gou, duz he mbouj ndaej noix! Danghnaeuz noix ne, gou aeu mwngz ra vunz daeuj dingj!” Dahlan ma le, sikhaek cauh ruz bae dwk bya. De doq cauh ruz raemxda doq rih. Danghnaeuz dwk mbouj gaeuq soq baenzlawz banh ne? Ndaek hakdoj neix dwg mbouj cuengq gvaq gou dih. Song duz beghag lumjbaenz rox gij simsaeh de ityiengh, youq haenz ndang de cienq bae cienq dauq, bak“apap” heuh, lumj naeuz heuh de gaej heiq. De cij menhmenh cuengqsim roengzdaeuj. Ngoenzlaeng, Dahlan gojyenz youh rap song rieng bya daengz ranz hakdoj bae. Mbouj lai mbouj noix, mbouj hung mbouj nyaeq, caeuq ngoenzlwenz ityiengh. Laebdaeb geij ngoenz, cungj dwg yienghneix. Ndaek hakdoj simgeiz, couh caegcaeg baij boux guenjgya bae damq Dahlan dwk bya. Boux guenjgya daeuj daengz haenz dah, raen doiq beghag neix dwg aen bauj, dauqma mbat gangj, hakdoj gig angq, mbat dub goekga couh naeuz: “Hw, dahdwkbya ciengx liux song duz beghag sien, gaemh song duz beghag neix daengz fwngz, siengj gwn daep bya daep lungz cungj miz caez lo!” Ngoenz he banhaemh, ndaek hakdoj daiq guenjgya caeuq gyading daeuj daengz haenz dah, Dahlan cingq youq gyang dah dwk bya. Hakdoj hozhaenz dwk youh nyau rwz youh rub hangz, daemh din hemq naeuz: “Dahdwkbya, vaiq cauh ruz gvaqdaeuj!” Dahlan mbouj rox miz maz saeh, ganjvaiq cauh ruz haeuj haenz daeuj. Bouxguenjgya naeuz: “Mwngz dingq ndei: Lauxyez dou yaek cawx aeu song duz beghag mwngz!” Dahlan naeuz: “Beghag dwg baengxyoux gou, mbouj gai!” Hakdoj riunyaen naeuz: “Gou dawz song duz mou hung caeuq mwngz vuenh ndaej luba?” Dahlan naeuz: “Mwngz dawz meuzgim moungaenz daeuj gou hix mbouj vuenh!” Hakdoj mbouj ndaej naj, hozndat hemq naeuz: “Ndei ha, mbouj vuenh beghag, gou couh aeu vunz!” Gangj sat, couh hemq naeuz: “Guenjgya, cug de hwnjdaeuj! ” Guenjgya daiq song ndaek gyading diuq hwnj ruz bae couh gaemh Dahlan, Dahlan raen boux dog dingj mbouj gvaq vunz lai, hemq liux geij sing “Daeggang, Danggang”, couh diuq roengz dah bae lo. Hakdoj diuq hwnj ruz bae, gaeb dawz beghag le, riuhaha naeuz: “Daj seizneix hwnj, diuz dah neix bya cungj dwg gya gou la, guenjgya, mwngz cauh ruz dwk bya, yawjyawj gij fukheiq gou!” Bouxguenjgya cauh ruz daengz gyang dah, hakdoj gaem duzbeghag he naeuz: “Beghag ha beghag, vaiqvaiq bang gou dot duz byaleix hung he daeuj!” Gangj sat, couh cuengq duzbeghag mbin bae. Beghag youq gwnz dah mbin liux geij gvaengx, het coemj roengz raemx bae, gamz ndaej duz gijmaz raezrangrang yiengq hakdoj mbin daeuj. Hakdoj angq dwk hemq hwnjdaeuj: “Caen caijsoq lo, begheg gamz duzbyalae hung he hawj gou lu!” Beghag mbin daengz gwnz ruz, cuengq duz de youq gwnz fajfwngz hakdoj. Duz de aj bak iet linx couh yaek haeb hakdoj, hakdoj saenz dwk hemqyaya. Nyuenzlaiz dwg duz ngwzboengz. Hakdoj simging deuz mingh, couh “gwboem” doek roengz dah bae lo, guenjgya cauq gyading caet ga bet fwngz, yungh haujlai rengz cij rag ndaek mou hung neix hwnjdaeuj. Ndaek hakdoj saenzdigdig ninz youq gwnz ruz, vah cungj gangj mbouj cing lo. Guenjgya cauh ruz dep haenz, heuh song ndaek gyading ram hakdoj ma ranz. Hakdoj gaetfaenz gaetheuj doiq gyading naeuz: “Vaiq boemz dai song duz roeg fangz bae! Moeb vaih aen ruz bae!” Seizneix, song duz beghag hemq“gog”geij sing, canj gvaq naj dah, mbin hwnj gwnz mbwn bae ra Dahlan. Hojsik aen ruz deng moeb vaih caem roengz laj dah bae lo. Caiq gangj ngoenz haenx banhaemh, Daeggang youq goengq bya bangx dah dwkfwnz, sawq- mwh dingqnyi miz vunz hemq: “Daeggang, Daeggang”, de sikhaek buet roengz bya, daeujdaengz haenz dah. Raen doiq beghag baenqcienq mbin youq najdah, najraemx miz boux vunz ndeu youz coh de daeuj. De yawj ndaej ok dwg Dahlan, lienzseiz diuq roengz raemx bae gouq de hwnj haenz, Dahlan ninz youq ndaw baeuz (rungj )Daeggang, hai da baez yawj raen Daeggang, naj nding liux, ganjvaiq laep da, Daeggang aemq Dahlan daengz laj bya aen ranzhaz de bae youq. Ndaek hakdoj rox Daeggang soulouz Dahlan hwnjdaeuj, sikhaek daiq gyoengq gyading daeuj humx ranz Daeggang, hai bak aeu gaeb dah ciengx roegfangz bae fad coih. Gyoengq gyading ngamq gvaq ndaej dah, Daeggang raen saehcingz mbouj ndei, couh yien Dahlan deuz haeuj laeng ranz lueg bya bae. Song vunz ndonj gvaq ndoeng faexndoek, youq byongh bya miz aen nguemz he, song boux couh beng gaeu benz hwnj nguemz daeuj. Ndaek hakdoj raen Daeggang caeuq Dahlan haeuj nguemz bae le, couh baij vunz humx bya, ep gyading haeuj nguemz gaeb vunz. Song ndaek gyading menhmenh beng gaeu yaek daengz bak nguemz, Daeggang gaem cax raemj goenq diuzgaeu, gyading lumj song aen gva nei ringx roengz dat bae lo. Hakdoj youh ep geij ndaek gyading benz hwnjbae, caj gyoengqde benz daengz byongh bya, Daeggang caeuq Dahlan couh doengzcaez ringx rin, moeb dwk gyoengqde hemqyaya, doek roengz dat bae raen Yenzlozvangz lo. Ndaek hakdoj ndatheiq hemq naeuz: “Cit feiz! Dawz song boux de coemh dai bae!” Gyoengq gyading youq goek bya cit feiz hwnjdaeuj, lij yungh gung cienq dawz baenz baj baenz baj feiz nyingz haeuj nguemz bae. Yaepyet he, gij faex haz gwnz bya cungj dawz feiz liux, feizmbaw biu geij ciengh sang, byongh mbwn cungj nding lo. Ndaek hakdoj angq dwk hemq naeuz: “Dahlan ha Dahlan, gou yawj mwngz miz fwed hix nanz mbin lo!” Vah caengz gangj sat, sawqmwh daj ndaw nguemz miz song diuz feizhau yap okdaeuj, cung gvaq hoenz feiz, cig mbin hwnj mbwn bae. Hakdoj ngaengh(moengh) liux, lienz nono(uet ) da sijsaeq yawj, nyuenzlaiz dwg song duz beghag doz Daeggang caeuq Dahlan mbin bae lo. Doeklaeng, caezgya couh heuh aen bya neix guh Bya Beghag, dawz aen nguemz byonghbya neix heuhguh Nguemzbeghag. (Vangz Yizcangh、Ciz Cibingz、Luz Dwngzgunh cingjleix)                          ——————摘自[壮侗语言文化网]