[原创]路漫文集：壮文的杂言小品

路漫

	Vahsug Doek roengz feiz mbouj coemh Doek roengz raemx mbouj caem   Goek mboq ok laj bya Hom baenz caz baenz laeuj   Vih raeuz duet hojnanz Van beij dangz duzrwi   Gaxgonq heuh Daegnanz Seizneix an Daegfouq   Cwngcwz roengz daengz laj Rin ndaw dah rox fouz   Vunz ngah cienz ngah ngaenz Gou ngah faenz ngah cih Gyaez faenz lumj gyaez meh Bek meh raemxda roengz   Bau bawx ok giuh,mbouj bau bawx gvaq ciuh. 包得媳妇过轿，包不得白头到老。 Boux mbaet liengx haeux,cungqvunz caez mbaet aeu cang coux. 一人省一两，众人省米仓满。 Lumh laep gwn maenz saz,gyaeuj maz cug cix gwn. 摸黑吃烤红薯，哪头软哪头熟。 Boux dwk bya in saeng,boux san raeng in duk. 打鱼的心疼鱼网，编筛的吝惜竹篾。 Bouxgaenx lau mbwn laep,bouxgik heiq ranz rongh. 勤者担忧天快黑，懒者恐怕没早亮。 Byaij loh gaej caemh din,cim va gaej ciuq vunz. 走路莫重别人步，绣花莫重别人模。 Bya mbouj liz raengz,naeng mbouj liz noh. 鱼离不开水，皮离不开肉。 Bya ndoj giz laeg,caeg ndoj giz laep. 鱼藏深水处，贼躲黑暗处。 Bawx gaem bak baenz ranz,yah gaem ndang gvan soh. 管好嘴巴的媳妇，家和谐；管好自身的妻子，夫诚实。 Biek gwn meh cix maj,lwg gwn meh cix gaj. 芋头吃母蔸长大，儿女吃母理当杀。 Vahsug (laux loh) 2002.03.13 Gvangjsih Minzcuz Bau

路漫

	Vahsug Vahbeij Duzgvej yaeuh duzgoep,duz saeq yoek duz hung. 小蛙骗大蛙，少见小欺大。 Aeu meuz daeuj dawz cae,suenq gou baezneix camj. 拿猫去犁田，算我最可怜。 Gyaeq mbouj did song gaeq,sim mbouj ndaej song yungh 一蛋不出双鸡，一心不得两用。 Baez ndeu dwg dawz,cien cawz dwg laih. 一回被抓着，回回被疑惑。 Bouxhuk gwn lai,bouxgvai gan siuj. 愚者多贪嘴，智者少弄鬼。 (Lij Faz soucomz gej Gun) 2001.12.19 Gvangjsih Minzcuz Bau

路漫

	3.Guh Ndei Naed Rinreq Ndeu Yawjraen gij laeuz sangvidvid,gij loh gvangqgumgum,mwngz ndaw sim cix siengj daengz:Cingsaenz,vifung,ligliengh doenghgij swz neix.Hoeng,mwngz siengj mbouj siengj daengz,cuk baenz gij laeuz gij loh neix noix mbouj ndaej doengh gij sa gij rinreq haenx ne? Daj neix,gou siengj daengz:Aen guekgya baenzlawz giengz,aen minzcuz baenzlawz hung,aen sevei baenzlawz vuengh,cungj noix mbouj ndaej youz bouxboux vunz gyoebbaenz. Leiz Fungh caengz okmingz seiz dwg boux vunz bujdungh ndeu,de vih canyouj vutmingh le,raeuz cij daj bonj ngoenzgeiq bujdungh de “fatyienh” cingsaenz,vifung,ligliengh gij swz yap rongh neix. Hawj vunz sim’angq dwg,youq seizneix guh caeg,bokloh,gaj vunz doengh gij anqgienh vunzrwix famhcoih neix haemq lai seiz,raeuz hix raen haujlai vunz bujbuj dunghdungh haenx mbouj lau dai,mbouj goq yungyiemj bae caeuq vunzrwix doxbuek,bae caeuq gij hingzveiz famhcoih guh doucwngh! Bya sang,danhaij,ndoi hung doengh gij dieg hawj vunz haengj bae lijyouz haenx,gizlawz mbouj dwg youz gij namh gij sa gij rinreq iqetet neix “cuk baenz” ne? Ndigah,boux vunz ndeu youq ndaw sevei,yienznaeuz gig bujdungh, gig iqetet,hoeng cijaeu bouxboux cungj fazveih ok gij sa gij rinreq cozyung,guekgya couh itdingh giengzak,minzcuz couh itdingh hwngvuengh,sevei couh itdingh fanzyungz! Nyiengh raeuz bouxboux guh ndei naed rinreq ndeu.

黄胜祥

	期待更多作品出现~

路漫

	Caet Nyied Caet,Aeu Raemx Haet (minzcuz fungcingz) Youq dieg Cuengh,miz aen fungsug mizyinx he,couh dwg binaengz caetnyied cocaet,haet romhromh gaeq ngamq haen seiz,gyoengqvunz couh doxcanj bae henz dah henz mboq aeu raemx,aeu ma le yungh gangraemx coux ndei,heuhguh “raemx sueng caet”.Riuz naeuz haet neix,dahsien roengz lajbiengz daeuj dajswiq,gwn gij raemx dahsien dajswiq gvaq haenx ndaej yw bingh lai gyaeu.”Caetnyied caet,aeu raemx haet”,couh bienq baenz aen cietheiq riuzcienz roengzdaeuj lo. Gizsaed,youq guek raeuz gak dieg,cungj miz fungsug “caetnyied caet”,miz giz heuhguh”cizsiz”.Miz giz heuhguh “gizgyauj”.Aenvih cujyau dwg mehmbwk daeuj gvaq ciet,ndigah couh heuhguh”ciet mehmbwk”,”ciet dahsau”. Gij laizlig “caetnyied caet”,dwg aen goj Niuzlangz Ciznij daihgya cungj rox haenx,ndawde riuzcienz ceiq gvangq dwg: Niuzlangz dwg boux lwggyax gaenxhong,coengmingz he,deng beixsauj simdoeg mbouj goengbingz baenranz,cix caeuq duzvaiz geq mingh rengh mingh gvaq saedceij.Ciznij dwg dahlan vaihseng Vangzmuj niengzniengz,de caeuq roek dahcej cungj gig ak daemj baengz. Ngoenz he,caet dahsien neix roengz lajbiengz dajcaemx,duet buhvaq cuengq youq henz raengz.Vaiz geq raen le couh bang Niuzlangz dawz buhvaq dahcaet (couh dwg Ciznij) yo hwnjdaeuj,dahcaet mbouj miz banhfap baema gwnzmbwn lo,couh haq hawj Niuzlangz. songde baenzranz le saedceij gvaq ndaej gig ndei,lij seng miz doiq lwgsai lwdmbwk he.Mboujliuh,Yivangz Dadi rox gienh saeh neix lo,cix baij Vangzmuj niengzniengz roengzdaeuj gaemh dawz Dahcaet dauqbae gwnzmbwn.Niuzlangz gyaep bae,hoeng mbouj miz banhfap hwnj mbwn,simgip dangqmaz.Vaiz geq raen le,couh doiq Niuzlangz naeuz:”Gou dai le,mwngz dawz naeng gou guh baenz haiz,daenj gouh haiz neix couh ndaej naengh fwj hwnj mbwn lo.”Vaiz geq ngoenz haenx couh dai lo,Niuzlangz daenj hwnj gouh haiz aeu naeng vaiz geq guh baenz haenx,rap hwnj doiq lwg songde naengh fwj bae gyaep Dahcaet. Couh youq yaek gyaep hwnj seiz,Vangzmuj yot ok fag camgim gwnz gyaeuj,veh ok diuz Dahyinzhoz raemxlangh fanhuhu daeuj, Nizlangz caeu dahcaet cij ndei gek dah doiqnaj doek raemxda byoegbyoeg. Aen goj doxgyaez songde gamjdoengh le roeggacaek,baenz gyoengq baenz gyoengq roeggacaek mbin daeuj,gaq baenz diuz giuz he,hawj Niuzlangz caeuq Dahcaet ndaej doxraen lo.Vangzmuj mbouj miz banhfap,cij ndei dapwngq hawj songde moix bi caetnyied cocaet youq gwnz giuz roeggacaek gaq baenz haenx doxraen.Daj neix caetnyied cocaet couh baenz ciet “cizsiz” lo. Lingh miz aen goj dem naeuz:Ciznij caeuq Niuzlangz cungj dwg bouxsien gwnzmbwn,boux he youq baihdoeng Dahdenhhoz daemj fwj guh baengz,boux he youq baihsae Dahdenhhoz langh vaiz.Yidi gyoh songde,hawj songde giet baenz gvanbaz.Baenzranz le songde gaenx gwn gik guh,caiq mbouj daemj baengz lij mbouj langh vaiz dem,Yidi ndat heiq lo,couh dawz songde faenhai,caemhcaiq moix bi cij ndaej raennaj baez ndeu,ngoenzneix couh dwg caetnyied cocaet. Mboujguenj saenq cungj cienzgangj lawz,gvaq caetnyied cocaet cix dwg gak dieg aen fungsug caeqbaiq Niuzlangz ciznij ndeu. Caeqbaiq seiz,baij doh caz,laeuj,mak,haj naed(maknganx,makcauj, maklaeq,duhdoem,ngveihgva),vamoq daengj,hawj Ciznij daeuj yawj va,cimz mak,daeuj gouz de baujyouh mak gva fungsou.Mbangj dieg lij baij hwnj lozyieng nem gij vafaenj mehmbwk cat naj yngh haenx,Baij ndei doxgaiq le,daihgya doxlwnz youq naj daiz cit yieng caeqbaiq, monam simnyienh.Gyoengq mehmbwk mboujdanh gouz giuj,lij miz gouz lwg,gouz souh,gouz gyaeu,caeuq gouz youx.Hoeng moix bi cij ndaej gouz aen simnyienh ndeu,danghnaeuz “daiq damsim”,gouz gijmaz cienzbouh mbouj miz yungh.Caeqbaiq le,aeu dawz dingz doxgaiq caeqbaiq haenx vut hwnj dingjranz hawj Ciznij gwn yungh,lw roengzdaeuj hawj cihgeij gwn yungh.Gyoengqde saenq naeuz,caeuq Ciznij faen yungh gij doxgaiq cangndang haenx,ndaej nem Ciznij ityiengh gyaeundei.Doeklaeng,daihgya doq gwn mak,gwn caz gangjgoj, doq guhcaemz gouz giuj. Gouz giuj miz song cungj:Cungj he dwg “boekgvaq”,couh dwg doenggvaq boekgvaq cam cihgeij dwg giuj roxnaeuz dwg huk.lingh cungj dwg saiq giuj,couh dwg yawj byawz cin cim ndaej vaiq,byawz couh ndaej giuj. (Laux Loh) [mwngz gangj gou lwnh]

黄胜祥

	Baáu baü ǒrk gìu , baáu mèi ndai baü guǎ jǒrt.   包得媳妇过轿，包不得白头到老。 Oóng ndén mbàt kau , gèrn laái  ndén saǎng kau. 一人省一两，众人省米仓满。 Moó ndám geén sàü beeng , tú háü soòk jì geén.  摸黑吃烤红薯，哪头软哪头熟。 Gèrn dèrk bá ndén án vaàng , óong saán rérng gen pǒrk. 打鱼的心疼鱼网，编筛的吝惜竹篾。 Gèrn ràk yáu fa ndám , óong jaan laáu fa roongs. 勤者担忧天快黑，懒者恐怕没早亮。 Paai loos ngas caai deén , jeém vá ngas jǐu gèrn.   走路莫重别人步，绣花莫重别人模。 Bá mèi néi nam , nàng mèi lèi mbaǎi.  鱼离不开水，皮离不开肉。 Bá ndoo deis ndàk , làk ndoo deis ndám.  鱼藏深水处，贼躲黑暗处。     ~余见之有一定哲理，以南部土语片段摘之，莫见怪。。。 [此贴子已经被作者于2010-7-22 1:06:58编辑过]

路漫

	6.Canghfaex Simco Gaxgonq,miz boux canghfaex ndeu,de haeuj ndaw ndoengfaex bae raemj ndaej go faex hung ndeu,youh soh youh raez,sim’angq dangqmaz, dajsuenq dawz ma ranz guh faexloz. Ram faex ma daengz ranz le,de ngaem gyaeuj couh gawq.Gawq goenq le,baez rau cij roxnyinh gawq dinj lo,gag danqheiq naeuz: ”Hai, hojsik lai,cijndaej guh bakdou lo.” De youh dawz fagfouj daeuj,ngaem gyaeuj youh bag.Bag yaep he le,baez yawj,youh roxnyinh bag mbang lo,youh danqheiq naeuz:”Hai, daiq hojsik,cijndaej guh faexhanz lo.” De youh ra fagbauz daeuj,ngaem gyaeuj haenqrengz bauz.Bauz ha bauz ha,baez yawj,youh roxnyinh bauz saeq lo,caiq danqheiq naeuz: ”Hai, caen hojsik,cijndaej guh dawh lo.” De youh aeu cax daeuj,ngaem gyaeuj soek.Soek bae soek dauq, mbat yawj youh roxnyinh soek ringh lo,youhcaiq danqheiq naeuz:”Hai, hojsik ha,cijndaej guh ciemyaekheuj lo.” Gangj le,de daj daehbuh mbon fag mid’iq okdaeuj,ngaem gyaeuj gvet.Gvet hwnj gvet roengz,doeklaeng gvet baenz fag cim baenz saeq, vut bae hix hojsik,couh sawq dawz daeuj yaek heuj,mboujliuh,ngamq baez yaek,cix raek baenz song donh. Danjfanz guh gijmaz saeh,wngdang saeqsim naemj,haeujsim guh, simco lai couh guh mbouj baenz maz saeh. (Lij Faz) gojbeij Bauq Sawcuengh B.1984 Nd.7 Ng.28

路漫

	9.Dahsau Aeu Gijmaz “Funglouz” Dahsau oiqseksek,lumj roegfek haen cin,byawz raen mbouj hozhaenz ha?Danghnaeuz mwngz dwg dausau he,mwngz aeu gijmaz “funglouz”? “Funglouz” mbouj itdingh hawj vunz gyaez.Sawq cam dah he aennaj ndei,rox cangdaenj,hoeng cix bakhaeu leihhaih,reujfeuh langhbuengq, guh vunz oepsoep;dah he bingzbingz ciengzciengz,hoeng cix bakunq vahswnh,ndangmbaeu roxsoq,vunz seuq coengmingz,mwngz hozhaenz dah lawz ne? Raen nuengx mwngz roxsoq,fangzloq hix bae aeu;raen nuengx mwngz bakhaeu,gaemh gaeu hix mbouj nyienh,ndiep byawz mbwq byawz raen seuqsat. Ndigah,dahsau aeu guh daengz: Bak roxsoq.Gaej hai bak haep bak couh gwn ha,daenj ha,roxnaeuz ndaq meh vunz ha,cungj neix mbouj baenz sau.Gangj vah wngdang roxlaex, unqswnh,lai maengx gij angq,gij ndei,gij ndiep,cij ndaej vunz haengj dingq. Vunz cingqging.Gaej guhnyah cangnyaenq,guhmbenj,cangreuj, bak myeuq hangz vunz;aeu aeklangh sim ndat,najsangj,baksoh.Gaej hawj vunz naeuz raeuz mbouj dwg sau. Ndei guh vunz.Gaej ragraix,gaej ndaengndiengq,gaej ngaiznyed,gaej luenh han vunz;bang vunz aeu simndat mbouj simlai,guh hong aeu simnet mbouj simfouz,doeg saw aeu sim maez mbouj sim cit,gvaq ngoenz aeu simhai mbouj simnaiq. Rox cangndang.Buhdaenj aeu dag ndang,gaej cang baeuz duzfangz duziu nei,hawj vunz nyapda;aeu daenj habda,ndang seuq cingjcaez. Ndigah,aeu gijmaz funglouz,dag ndaej ok sim dahsau.Dahsau ha, muengh mwngz ndaej vunz dwggyaez! ------Bauq Sawcuengh 1986 2 15

伤疤好咯

	hoeng cix bakhaeu leihhaih,reujfeuh langhbuengq -------------------------------------------------------------- reujfeuh听过这个词，langhbuengq很陌生。 gij gou maij gangj baenz "ndauq,hauz,fungsaj,fungbouh" 或者是lienhyienh(练样） [此贴子已经被作者于2010-8-23 23:23:28编辑过]

伤疤好咯

	这才是真正的壮族文学！感谢楼主的作品。

路漫

	7.”Mauzsenj” Rongh Ndawsim Vunz Laux Sim Mbouj Laux Lij Faz Yizsanj Yen Sanjbwz Gunghse Hwzcunh daih sam doih,Miz haj boux vunzlaux,cungj dwg 60 bi doxhwnj,geij bi daeuj,gyoengqde youq ranz dawz lan,mbouj canhgyah guhhong ndaw doih lo.Bineix(1966) 2 nyied 8 hauh,gyoengqde hag “Veiz Yinzminz Fuzvu” daengj faenzcieng le,sim siengj:”Mauz cujsi naeuz,vunz bouxlawz cungj dwg aeu dai,danhseih boux dai yiyi miz naek mbaeu mbouj doengz,vih yinzminz leih’ik dai,yiyi couh beij Daisanh lij naek,bang boux fazsihswh ok rengz,bang boux bozsoz atbik yinzminz dih vunz ok rengz,dai couh beij bwn hanq lij mbaeu,raeuz suihyenz mbouj dwg bang fazsihswh ok rengz, danhseih,raeuz ngamq ndaej 60 lai bi,couh mbouj guhhong cizdij, naengh ranz caj dai,yienghneix dai naengz suenq dwg vih yinzminz dai ma?Mbouj seih!Seizneix,raeuz lij miz di rengz,inggai vih yinzminz lai guh di hong,gvaqlaeng dai le,yiyi cij naek.”baenz neix,gyoengqde couh heuh ndaw doih baij hong hawj gyoengqde. Daih ngeih ngoenz haet caeux,gyoengqde caen ok hong lo.Coz Swz bae cae naz,Vangz Siufwnh caeuq meh Dahngeih bae gip bwnh,daxboh Siulanz bae dwk raemxnaz,Goengsam bae cingj dieg gyaj.caen seih: “Mauzsenj” rongh ndaw sim,vunz laux sim mbouj laux;gungcanjdangj lingjdauj,bouxlaux dangq bouxcoz.

路漫

	8.Doiq Ranzranz gaenx hong baenz fouq Daihdaih riengz dangj ndaej van Ranzranz fatcaiz mbanjmbanj moq Cawqcawq hwngvuengh bouxboux vuen Cin daengz lajmbanj ndoibya loeg Fuk muenx ndaw ranz lwglan ndei Fwen rwenz caez danq bi’gvaq ndei Bauq yiengj youh muengh bineix hoengh Cin raeuj bya heu roeg heuh Dangj ndei mbanj hoengh minz riu Ndaej gohyoz guh bauj ranzranz fouq Baengh cwngcwz doiq loh bibi giengz Gwnz biengz anningz lwgminz angq Guekgya fouqgiengz saedceij van Va coh daengngoenz dah coh haij Lwg gyaez bohmeh minz gyaez dangj Minzcuz doxgiet guek fouqgiengz Beixnuengx caezsim ranz vuenyungz Lai guh lai ndaej ranzranz fouq Miz gwn miz daenj bouxboux riu Bibi bauq gok bibi angq Gizgiz fwen rwenz gizgiz vuen Sim angq vunz ndaej gyaeu Cin raeuj va mbouj byaiz