Luciano Pavarotti Youq Ndaw Sim Gou
![](http://ent.cctv.com/special/C19319/20070906/images/1189057984749_1189057984749_r.jpg)
Geiq dai mwngz ! Luciano Pavarotti ! Geiq dai mwngz ! Luciano Pavarotti ! Geiq dai Mwngz ! Luciano Pavarotti !
Gou ndaej cib caet bi seiz ,youq Vujmingz yenq Yinhyoz beizcinq ban ,gou daih it beiz dingq au Denhhaengz gou hwnj dangz seiz ciengz raemh gij coh mwngz ,de raemh naeuz ,guh vunzsai hag ciengqgo ,couh aeu hag ' Pavarotti ' ! Gou dangseiz mbouj rox 'pavarotti ' dwg boux lawz ,hix mbouj rox boux vunz neix ciengq go ciengq ndaej baenz lawz yiengh ,hoeng ,gij coh de it cig naep youq aen sim gou laeglaeg ! Mbouj geij nanz ,boh gou cawx aen Denqcangqgih ndeu ,caiq mbouj rox bae gizlawz dawz ma geij baj diebbuenz ,ndaw de miz dieb ndeu dwg 'Pavarotti ' ,gou daih it mbat dingq gij sing de , gij sing ' Pavarotti' ciengq ok daeuj youh bongh youh rongh ,youh sang youh gok ,dingq hwnj daeuj hawj vunz rox nyinh lai singj saenz hauj lai , hawj vunz daengxndang lwed goenj foedfoed ! Caen dwg yied dingq yied nyaenx ,dingq bak mbat cien mbat cungj lij haengj dingq .Daeg bied dwg de couq Dohmingzgoh ,Gajleizlahswh Sam boux dox beij sing ciengq go ,'Pavarotti ' yungh de ceiq sang dingjgyouj danzsingz giqsuz yaz fug Dohmingzgoh caeuq Gajleizlahswh aen gingqdouz haenx ,hawj gou geiq ndaej laeglaeg ,daj mwh haenx ,gou moix ngoenz bae henz dah caemx ndang swiq ndang ,cungj haengj hemq song sing !
Pavarotti baenz lawz ndaej aeu dingjgyaeuj danzsing ok daeuj ne ?
Boux hag ciengq go cungj rox ,sing daiq dwg youq congh hoz ,fat sing wng dang dwg youq congh hoz fat ok daeuj cij deng ,hoeng 'Pavarotti 'gij sing dwg fat youq gwnz dingj gyauj ,hawj raeuz dingq hwnj daeuj ,aen gyaeuj bonjfaenh gij yinhyoz siqbauh cungh gag gaen gij sing de diudoengh hwnj daeuj ,gij neix couh dwg 'Pavarotti ' gij sing rengzak ,caen dwg cuenq sim cuenq gyaeuj , De baenz lawz guh ndaej hawj gij sing de bongh hwnj gwnz gyaeuj baenz sang baenz goq baenz rongh ne ?
Gou fan fuk bae dingq ,fan fuk bae gaen lienh ,daengz laeng ,gou caen dwg mingz beg lo ,Pavarotti fat sing mbouj dwg aeu congh hoz fat sing ,dwg aeu ngaxguan fat sing ,aeu aen dingj gyaeuj ma guh gungqmingz ! Yiengh neix ,gij sing de couh ndaej bongh ndaej youh sang youh gok youh rongh ! Caemh ndaej yiengh neix naeuz , 'Pavarotti ' ciengq go fat sing dwg mbouj aeu congh hoz fatsing ciengqgo ,dwg aeu gwnz ngaxguan fatsing ciengq go ! Gij fatsing fueng fap de gih gohyoz gig daegbied ,caeuq boux wnq mbouj doengz ! Daengx seiqgyaiq cij miz boux vunz dog yiengh neix ciengq go ! Caen dwg hungmwk coengmingz raixcaix a !
Luciano Pavarotti , Mwngz mbouj yaengx dai ,mwngz seizseiz cungj lij lix youq ndawsim gou !
Soengq souj fwen ndeu geiqniemh mwngz !
Fatsing gok myanzmyanz ,
Sepmanh cuenq dingjgyaeuj ;
Sing maenh yaz nguxcou ,
Luenzgyaeu gyet fouzbeij !
Ayingj
2007/9/7
![](static/image/smiley/comcom/em23.gif)
![](static/image/smiley/comcom/em23.gif)
![](static/image/smiley/comcom/em23.gif)
![](static/image/smiley/comcom/em23.gif)
![](static/image/smiley/comcom/em23.gif)
![](static/image/smiley/comcom/em23.gif)
![](static/image/smiley/comcom/em23.gif)
![](static/image/smiley/comcom/em23.gif)
![](static/image/smiley/comcom/em23.gif)
![](static/image/smiley/comcom/em23.gif)