——————Bae Dwzbauj Camgya Fwenhoih ——————
Gou yiengq Lijdangz fueng haenx soh byaij bae ,yaek daengz seiz ,gou muengh raen roen baih gvaz miz song dongq bya , dongq ndeu sot luenz ,lumj go rangz oiq ne , miz haj roek cib mij sang baenz neix ,lingh dongq caeuq dongq bya rangzoiq haenx dox gaenh , miz bak lingz mij sang ,gwnz de miz aen dingz .Gou naemj , byenz hwnj gwnz haenx bae aiq raen ndaej daengx singz Dwzbauj , yiengh haenx ,gou couh byaij gvaq bae youz yawj . Dongq bya lumj rangz oiq haenx coh heuh [ Yinzsanh ] , cih coh caeuq aen bya mbouj miz gij maz gvan haeh , bya dingj sotsaem , byenz mbouj ndaej hwnj bae ,caemh mbouj raen gwnz de miz gij maz fwj ! Lingh dongq bya coh heuh [ Haeuq lungz sanh ] . Gou couh ra roen iq byenz hwnj bae ,song sam faen cung ,gou couh byenz daengz gwnz aen dingz haenx lo . Yawj aen dingz haenx ,gouqgatgat ,vaihvadvad , aen cueng va diet ngaiz bouz lawz rag vaih yaek laet ok daeuj , diuz giuz mbaek max daeuz byenz hwnj dingz song henz mbouj miz gij lanz , byaij hwnj bae bouxvunz saenzdedded . Aen dingz yienz vaih ,hoeng, youq giz haenx caemh yawj ndaej raen byongh aen singz DwzBauj. Gou daj gwnz yawj gvaq baih gvaz bae ,aen singz Dwzbauj miz diuz raemx sai ndeu vut ngaeu gvaq singz cungq gan ,caen gyaeu ndei . Yawj gyae bae , ranz louz ,raeh naz ,roen gai ,ci buet ,vunzbyaij, cungj yawj ndaej gig cing cuj . Daj gwnz yawj gvaq baih swix , yawj raen dongq bya [ Yinzsanh ] saed mbouj dwg lumj rangzoiq , caen dwg lumj Vizmax yot gyeng ,daengj youq giz haenx , haha ! Yawj cingq baih naj , laj bya dwg aen yienh Cwngfuj ranz louz ,caiq bae couh dwg aen Lijdangz yienj heiq ,daj ndaw lij conz sing fwen ok daeuj . Daj gwnz yawj gvaq aen dingz baih laeng ,dwg dongq bya beij aen dingz neix lij sang geij cib mij ndeu ,dongq bya haenx caeuq giz laj din gou dox lienz ,hoeng mbouj miz roen byaij hwnj bae .dang naeuz ngoenz mbwn cingx ,aiq ndaej byenz hwnj bae ,seiz haenx mbwn lij miz di fwn myih ,byaij roen lau conj laemx , mbouj ndaej hwnj bae , dang naeuz ndaej byenz hwnj dongq bya dingj haenx bae ,couh ndaej yawj raen daengx singz Dwzbauj lo , dongq bya haenx cij dwg caen cingq dij bauj, dwg gig ndei lijyouz swhyenz , dang naeuz ndaej lumj singz Vuzcou siq ,dawz dongq bya haenx vat gyoeng ,ndaw de guh gai,hawj vunz gu daj hai cawx , caemh ndaej bienq baenz giz dieg fat caiz ndeu ! Yawj baenz Dwzbauj boux lingjdauj mbouj yawj naek diegcuengh Lijyouz swhyenz hai fat ,caen hoj sik lu ! Seiz haenx ,ndaw doiqmienh aen Lij dangz mbouj duenh miz sing lienh ciengq go mbwn hwnj bya daeuj ,yawj baenz gyoengq beixnuengx cingq lienh raixcaix .Gou youq gwnz caemh yungh rengz hemq HuHu geij sing, soengsoeng aen ndang gij ndok nginz , sup gwn heiqbya heiqciengh .Gou byenz moix aen bya cungj dwg yiengh haenx guh ,ndaej vuenhvuenh aen ndang heiq mwt , supsup heiq moq heiq bya .Byenz bya caemh dangq lienh ndang ,hix ndaej yawj gingjcaeq ! Yawj yaep ndeu lex , gou couh roengz bya ,bae Lijdangz ra Hungzmenzcu ,gou byaij haeuj ndaw Lij dangz ,aenx Lijdangz haenx gig gaeb, aiq caeux ndaej saek cien vunz , gou raen miz gyoengq vunz dawz gyoenglaz ndeu ,couh cam gyoengq de rox mbouj rox Hungzmenzcu ,gyoengq de naeuz mbouj rox ,seiz haenx ,miz dah sau ndeu gvaq daeuj naeuz ,de bae ma gwn haeux lo ,gou dang seiz couh aeu souj gih daj hawj Sahnamzmansenh ,yawj de daeuj daengz Dwzbauj caengz ,hoeng soujgih mbouj miz denq ,gij hauh de hix hai mbouj ok daeuj ,sat . Caen dwg : Vunzraeuz mbouj rox naj , Naj raeuz mbouj roxcoh ; Ok rog gyau baengzyoux, Seiz mbouj ngamj couh sat .
Wng dang dwg [ Youz Diegcuengh Baksaek (9) ] !
Miz giz loek cingj beixnuengx bang yinx ok !
Beixnuengx, gou gaenq bang mwngz gej baenz aen daih 9 lo.
Baezlaeng daeuj raen beixnuengx, itdingh aeu ceiq noix gvaqgonq ngoenz ndeu lienzhaeh hix ndaej bw! Daeuj daengz Dwzbauj cix dwk denva bae ranz gou, gou seizhaenx caen mbaj caen nyaengq, seizgan gwnhaeux goj mbouj miz ha! Baenzlawz ra ndaej raen gou?
Docih Hungzmenzcu ,Mwngz guh ndaej saeh hunghongh ,raeuz wng dang guh faenzcieng haenh mwngz ,guh fwen hoh mwngz cij deng , hawj vunzcuengh daih laeng conz gij guh fap mwngz ,conz gij coengmingz mwngz,hag mwngz gij guh cij deng , hoj sik gou goengfou mbouj daengz ranz , vunzhung mbei iq ,caemh mbouj ndaej bang mwngz !
| 欢迎光临 僚人家园 (http://bbs.rauz.net.cn/) | Powered by Discuz! X2.5 |