------------Youz Yienhsingz Denzyangz
Daj Denzdungh daengz denzyangz ,it loh roen caen simsangj , diuz roen song mbiengj raeh naz gvangq langh,aen aen ndoi cungj ndaem rim gak yiengh mak, miz maknganx,makdoengj ,mak mangh ,mak leiz ,mak leixcae,mak bizbaz, mak dauz ...... ,dieg raeh cawz liux miz di ndaem byaek le ,daih bouhfaenh cungj dwg ndaem oij , oij cwngqdwg seiz mwh raemj . Diemj lingz seizgan roxnginh yaep yet ndeu couh gvaq lo .
Daengz Denzyangz mbwn yaek laep lo ,ra lijseq gwn haeux le ,gou couh bae Vangjbah fat diep ,sij ngoenz neix bien daih it Baksaek youz geiq !
Sijsat youz geiq vaiq di haeuj lijse ninz ,ngoenz neix byaij mahhuz naet lo ,ngoenz cog lij miz hauj lai dieg yaek byai !
Ninz mbat singj ,yawj cung gaenq bet diemj lo ,Gou vaiq hwnj mbonq sauq bak swiq naj ,gaenjgaenj gibgib gwn vanj faenj le ,couh dap ci bae Byagamjcuengh lo , Byagamjcuengh gou bi 2004 gaenq daengz gvaq ,dwg gou rox Ranz Bouxraeuz le daih it baez cam gya vunzraeuz guh mbat daih it baez youzcet ,caemh dwg Byagamjcuengh hawj aen mbae gou dauq hwngfag hwnj daeuj ,diusingj gij siqbauh Sawcuengh gou ,hawj gou dauq ndaej aeu Sawcuengh daj sij ,mbouj miz Byagamjcuengh ,couh mbouj miz doengh bienx Sawcuengh neix lo !
Ci daengz henz mbanj Luzlenz,gou roengz ci , couh raen giz roengz ci hwnj aen miuh ndeu ,gou mbouj rox ndaw de cang gij maz , aen vih gou daeuj ndaej caeux ,aen miuh ngamq hwnj haenx gven dou dwk, gou naemj ,giz haenx wng dang hwnj ndaej hauj lai miuh ,dawz gyoengq vunzcuengh raeuz boux ingyungz gij minghhoenz comz daeuj giz neix cuengq ,guh baenz dieg geiq niemh bouxcuengh ingyungz giz cuengq mingh hoenz , seiq henz caiq caep hwnj ranz souj hoenz , caiq dawz gyoengq ingyungz gij saeh hungmbwk sij baenz fwen ging ,aeu di vunz bae ngoenz ngoengz niemh damq gij goenglauz gyoengq de ,mbouj hawj ingyung raeuz aen vih diuz mingh vih daengx gyoengq vunzcuengh guh saeh siu sat haeuh gij cingsaenz gaen bae siu sat ,yiengh haenx ndaej gujleix daih laeng vunzcuengh raeuz vih hongsaeh hungmbwk raeuz vunjmingh cungj mbouj rox in sik ,caiq guj leix vunzraeuz mbouj duenh ok hauj lai hauj lai bouxcuengh ingyungz ,dang naeuz guh ndaej daengz yiengh haenx ,caen dwg caux daih fuk Vunzcuengh raeuz lo .Gou youq giz haenx ndwn hauj lai nanz , cij menh menh byaij bae daengz goek Byagamjcuengh ,
Youq goek Byagamjcuengh ,saen dem aen yieng daiz ndeu ,aen yieng daiz haenx caen gouq hung daih , aiq miz seiq haj cien gaen naek, it mij lai gvangq , seiq haj mij raez , ndaw de douh yieng rim fwd , naep muenx yieng diuz , yieng hoenz lumj hoenz yiuz oenqcien ne ,cig fi hwnj mbwn hwnj fwj ,Gou caiqdem di yieng ,sax dah goeng : It baujyoux Vunzcuengh raeuz hwngvuengh fatdad ; Ngeih bauj youx diegcuengh raeuz noix ngaiz gyoengq vunzvaih hangz ciemq ; Sam bauj youx vunzcuengh vwnzvaq ndaej swnh leih cienz yiengz ,mbouj ngaiz vunzvaih gat duenh ; Seiq baujyoux gij Sawcuengh faenz cieng gou hawj vunz raeuz ndaej dem gya rengzrwd ,dem gya uk gvai ,dem lai cihsiz ,dem lai ging niemh ,guh gij maz ndaej beij vunz aen minzcuz wnq guh ndaej sug lienh vaiq vwd maenh ak !
Gou youq laj goek bya muengh yawj Byagamjcuengh , raen aen bya gwnz miz song diuz hoenzlungz dox geuj dox gunj, rumz menhmenh yoengx de , song diuz hoenzlungz doq geuj doq gunj hwnj gwnz fwjmbwn sangsang bae ,gou rox , Mbwn dwg ceiq goeng bingz , doiq moix it boux sim saed sim ndiep sim muengh cungj miz fuk doz !
Gou cawx liux song mbaw biuq hwnj bya , mbaw biuq lingh caemh dangq cawx hawj Boux Roxdoh daz gou hwnj bya youz ! Aen vih bi gvaq gou moengx loq raen Bouxroxdoh ,gou saenq Bouxrox doh it dingh youq henz ndang gou ,lij mbouj duengh gya rengz hawj gou !
Youq duz yousiengq Bouxroxdoh ,gou caiq hwnjyieng yazyed , caiq naemh dangq baujyoux !
Gou roengz bya , byaij daengz baj louzbaiz henz de ,raen hauj lai vunz hauxseng vunzgoeng ndaw mbanj Luzlenz homzdwk Geizciengh Cungguek , Gou couh youq henzde yawj, mizboux saw ok ma seiz , gou couh doq caenx hwnj bae ,caeuq gyoengq de hoed dwk Geizciengh , dwk daengz gyang ngoenz yaek 12 diemjcung , dungx yiek le cij naengh ci dauq ma Denzyangz ,cawx song aen Bolozbauh , Doq gwn doq youq henz roen vad ci naengh ci bae Baksaek .
Gou bae daengz aen ranz Lungz gou ,gaenq dwg sam diemj cung, gangj goj gwn haeux le couh gaenj gip ok ma bae vangjba sij diep lo !
Miz gyaqciz gij vwnzvaq cih siz cij miz vunz haengj hag de . Dawz di cienz daeuz haeuj saeh nieb vwnz vaq ,hawj lwg cuengh raeuz yawj ndaej daih caiq daih ,dang yienz dwg hangh hong daeuz swh ceiq canh ndeu !Gak daih Vunzcuengh cungj aeu rom caux di saehnieb vwnz vaq ,caux fuk daih laeng ! Gou sij gij [Youz Geiq ]neix lij mbouj caengz sij ndaej cib faenh ndei , gou cij muengh Vunzraeuz yawj le ,ndaej daj ndaw de yawj ok mbouj cuk ,yiengh haenx ndaej hawj vunz raeuz sij cungj faenz cieng neix seiz ,sij ndaej engq saed,engq gyaeu ndei ,engq hawj vunz nyaenx yawj ! Hawj vunz yawj le caemh dangq caen ndang bae cet youz it yiengh ! Gij faenz cieng haenx gou nyinh cij dwg ceiq ndei [Youz Geiq ]. Gou lij aeu roengz rengz !
| 欢迎光临 僚人家园 (http://bbs.rauz.net.cn/) | Powered by Discuz! X2.5 |