1) Mbanjcuengh gou Vujmingz ,
Mingzsing riuz dien'yah ;
Bouxlawz daeuj cet gvaq ,
Mbouj ajbak haenhndei .
2) Bya heu raemxdah saw ,
Caemh dangq ndaw dozveh ;
Mbouj dwg raeuz gag cej ,
Hanz geq cungj mbouj caez .
3) Raemx saw bya ndoi geiz ,
Seiqseiz cungj haeuj veh ;
Mwngz naihhoz menh deq ,
Caj gou geq mwngz ngi .
4) Baihdoeng Daqmingzsanh(Byacwx) ,
Lumj duzlungz banh biengz ;
Raen gyaeuj mbouj raen rieng ,
Ciengzlwenx hen mbanjcuengh .
5) Baihsae raengz Lingzsuij ,
Liz singz mbouj geij gyae ;
Raemx saw gingj caemh ndei ,
Seiqseiz cungj ndaej caemx .
6) Baihbaek Mingzsiuqyenz ,
Sam henz raemxdah geuj ;
Sikseiq faex heuseux ,
Roeg heuh bya cix faengz .
7) Baihnamz dap Vwnzgyangh ,
Cap bangx Dahvujmingz ;
Vi caenh baenz mbiengj singz ,
Sang dingx mbwn daemx deih .
8) Lij miz gamj Yihlingj ,
Gij gingj de engq ndei ;
Bya gyaeu congh gya geiz ,
Seiqseiz hek mbouj duenh .
9) Lij miz Byavuengzdauh ,
Daj dauqlaux cix cienz ;
Gwnz bya de miz sien ,
Hek gouzciem cix raeuh .
10) Lij miz Lozbohdanz ,
Youq henz ranz laj mbanj ;
Vunz bae youz doxcanj ,
Caemh gangj naeuz de ndei .
11) Lij lw Gijfungqsanh ,
Yanghsanhhoz bangxbien ;
Gingj ndei gvaq dieg sien ,
Cien nienz vunz cungj haenh .
12) Raemx gyaeu bya cix geiz ,
Dieg ndei vunz akmaenh ;
Hanz geq cungj mbouj caenh ,
Mbouj saenq mwngz daeuj youz .
13) Goengloh doeng bet fueng ,
Hek ciengzseiz mbouj caenh ;
Huq lai bouxboux haenh ,
Dwg faenhgou Vujming .
-------- Daegdenz Ranzcung
| 欢迎光临 僚人家园 (http://bbs.rauz.net.cn/) | Powered by Discuz! X2.5 |