Fwen'heijdaeuz:
Va hai youq gwnz biengz ,
Mbaej ciengzlwenx hoengzmaeq ;
Hot fwen hab sim'eiq ,
Riuzcienz ndaej fanh bi .
( A = Lwgmbauq, B = Lwgsau )
A) Mbanjcuengh cin daengz vaiq ,
Muengh baihbaih cungj va ;
Seiqlengq baenz cumhcaz ,
Bu muenx bya muenx rungh .
B) Mbanjcuengh cin daengz vaiq ,
Muengh baihlawz mbouj va ;
Yawj ndaw rungh gwnz bya ,
Yaemj suenva baenq yiengh .
A) Rumznamz liengzseuxseux ,
Geuj gvaq ndeuq gvaq bya ;
Ci gvaq dieg neix ma ,
Raen rang va fwtfwt .
B) Rumznamz liengxseuxseux ,
Geuj gvaq ndeuq gvaq bya ;
Mup raen heiqrang va ,
Vunz ra fiz halo .
A) Rumznamz liengxseuxseux ,
Geuj gvaq ndeuq gvaq bya ;
Mup raen heiqrang va ,
Rox youq byalawz rongh .
B) Rumznamz liengxseuxseux ,
Geuj gvaq ndeuq gvaq bya ;
Cin dauq va cumhcaz ,
Ij byalawz mbouj rongh .
A) Ok ndoi daeuj raen va ,
Fwngz gaem ngaz cix euj ;
Byaij roen yangz lauxbiuj ,
Sien seux song coenz fwen .
B) Ok ndoi daeuj raen va ,
Dangq bya bungz raemxmoq ;
Eu fwen byaij gyang loh ,
Bak yiengh hoj cungj lumz .
A) Ngoenzneix daeuj guhfwen ,
Raen saulwnz gang liengj ;
Ngaem naj loh buenq mbiengj ,
Mbouj rox siengj gijmaz .
B) Roegfek raen roeggae ,
Mbin bae caez doiqnaj ;
Vavengj hai gwnz cah ,
Muengh rwi mbaj daeuj ciuz .
A) Samnyied hai vavengj ,
Roeghenj daeuh gwnz caz ;
Cam roegfek dingj bya ,
Vihmaz mbouj hai bak .
B) Cin dauq raemxmoq daengz ,
Bya daemzdaemz hwnjgyaeuj ;
Vunz daeuj raeuz caemh daeuj ,
Mbouj dwg naeuz canghfwen .
A) Roegfek hag eu fwen ,
Sing mbouj luenz yak dingq ;
Va'meiz cuenh gwnz dingj ,
Hai bakgim lo nuengx .
B) Gaeqmeh youq gwnz ciengz,
Daet rieng ma guh hangh ;
Vunz angq raeuz caemh angq ,
Mbouj dwg naeuz canghfwen .
A) Nuengx miz fwen mbouj guh ,
Hong lai nguh cix lumz ;
Cog haq bae ranzvunz ,
Lau cungj lumz bae liux .
B) Va hai youq gwnz biengz ,
Mbaej ciengzlwenx hoengzmaeq ;
Hot fwen hab sim'eiq ,
Riuzcienz ndaej fanh bi .
A) Fwen mbouj dwg cienzngaenz ,
Louz ngoenzlaeng menh sawj ;
Cog haq bae guh bawx ,
Lau gawqgawq cungj lumz .
B) Beix rox fwen daih'it ,
Dangq gaem bit sij saw ;
Nuengx youh huk youh ngawz ,
Baenzlawz doiq ndaej hwnj .
A) Gou ndaejngi vunz lwnh ,
Suenq saulwnz rox fwen ;
Gou ndaejngi vunz dwen ,
Nuengx guhfwen ceiq mengx .
B) Gangj guhfwen hwnjdaeuj ,
Raeuz mbouj rox geijlai ;
Miz saek boux vunzsai ,
Son baenz baiz cijndaej .
A) Siengj gwn bya soengq laeuj ,
Vax muengx couh roengz daemz ;
Siengj eu fwen guhcaemz ,
Gaen hangx laeng beix daeuj .
B) Ngah fwen dangq ngah dangz ,
Ngah fwen dangq ngah gemq ;
Mwnqlawz miz vunz hemq ,
Aeu cienz demh cungj bae .
A) Guhfwen ndaej gaij hoj ,
Vunz mbouj rox naeuz aeng ;
Guhfwen ndaej gaij haemz ,
Gwn raemxdaemz cungj feih .
B) Senj daengq ma coh daiz ,
Senj daiz ma coh eij ;
Guhfwen dangq lwnh leix ,
Ndaej vuen'heij guhcaemz .
A) Nuengx bak caen lingzleih ,
Eu fwenbeij daeuj nai ;
Gou cam mwngz va'mai ,
Saugvai daj lawz daeuj .
B) Vunz mbouj gyae mbouj gaenh ,
Youq henz haw Ngeihdangz ;
Sikseiq byaij doxyangzz ,
Beix dasang mbouj yiuq .
A) Roegfek youq gwnz bya ,
Nanz ndaej ma guh gaeq ;
Siengj euj va hoengzmaeq ,
Lau dwgsaeh hwnjndang .
B) Roegfek youq gwnz ndoi ,
Mwngz miz moiz cix doj ;
Ndaw suen va hoengzoq ,
Beix hozgyoh cix aeu .
A) Cauxfeiz caengz doekgyoq ,
Ij byoq cix lau hoenz ;
Siengj cam nuengx saek coenz ,
Lau mbouj doengz cawjeiq .
B) Lwg bouxsai yienghceij ,
Guenj daihsaeh dien'yah ;
Gonh haij naeuz bag bya ,
Youz mwngz nda cawjeiq .
A) Roegfek youq gwnz ndoi ,
Mbouj miz moiz baenz doj ;
Siengj caeuq nuegx gangjgoj ,
Mbouj rox coh baenz cam .
B) Seng daeuj doek gex rungh ,
Daiq coh cungj mbouj an ;
Cog byaij roen doxyangz ,
Heuh Dahsam ndaej lo .
A) Dahsam cix Dahsam ,
Daengj beix sawq cam gaeuj ;
Dahnuengx gvaq neix daeuj ,
Gyau baengzyoux ndaej lwi .
B) Guhfwen mbouj gapyoux ,
Cawj haeux mbouj baenz ngaiz ;
Dawh dog cuengq gwnz daiz ,
Hawj saugvai baenz sawj .
A) Daeuj daengz neix baez naengh ,
Raen ndaw raemx miz bya ;
Siengj cuengq bit roengz naz ,
Lau baih bya miz yiuh .
B) Haetneix gou okdaeuj ,
Gaeuj seiq henz bangx bya ;
Guenj cuengq bit roengz naz ,
Baih bya mbouj miz yiuh .
A) Seizneix nuengx baenzsau ,
Dangq va'dauz ndwenngeih ;
Beix raen sim cix maeh ,
Lau fukheiq mbouj daengz .
B) Duj va'nat bangx bya ,
Miz gijmaz ndeiraeuh ;
Dangh beix raen ndei gaeuj ,
Daiq rag daeuq maj ndaem .
A) Yawj raen va'maedleih ,
Ngamjeiq ndaw simdaeuz ;
Hoz yienz siengj bae aeu ,
Lau vunz naeuz mbouj haengj .
B) Bienq gvaq daemz va'ngaeux ,
Dauq daeuj haenh va'mai ;
Uengjfeiq mwngz lwgsai ,
Biq ndaej baenzlai huk .
A) Nuengx gvaq fueng neix ma ,
Lumj dujva baenz ndongq ;
Hoz siengj naeuz mbouj dongx ,
Sim bongh hwnj bongh roengz .
B) Beix mwngz bak caen gvai ,
Ndaej baenzlai rox gangj ;
Nuengx dangq aen mauhyangj ,
Mwngz dauq gangj naeuz ndei .
A) Gangjvah bak riunyumj ,
Lumj duzfungh gamz va ;
Nuengx haih beix baema ,
Ninz dai da mbouj laep .
B) Daj lizgyae yawj va ,
Daraiz raen mumjgyumq ;
Roegfek mbin roengz gumh ,
Beix laih fungh ciuz va .
A) Dujva nuengx caen ndongq ,
Rongh bae daengz Baekging ;
Baij youq gyang Namzningz ,
Canj baenz singz mauhdan .
B) Beix bak vad bak raeuz ,
Raeuz gvaq rieng byaleix ;
Yaeuh maxlaeuz roengz deih ,
Yaeuh ndaundeiq roengz doem .
A) Naeuz gou vad gou raeuz ,
Baenz ngoenz daeuq aeu vah ;
Dahlawz haengj guh yah ,
Gvihsax gvaq seiqvunz .
B) Diuz buh bak benq fong ,
Daenj mong lumj gaujvaq ;
Bae laeng beix guh yah ,
Lau vaih naj beixlungz . -------- Lij miz, deq ciep.
( ciep baihgwnz )
A) Gyau youx cix gyau sim ,
Byawz bae cim ndangdaenj ;
Naek cix naek cingzfaenh ,
Gaej bae haenh cienzngaenz .
B) Va mauhdan hoengzaeuj ,
Va sigloux hoengzsien ;
Beix siengj haeuj vayienz ,
Ij miz cienz cijndaej .
A) Seizcin bengz valup ,
Duzguk dij fan naeng ;
Gyau youx naek cingzaen ,
Gaej aeu ngaenz ma hanh .
B) Cib lwgfwngz caemh yiengh ,
Liengh mboujndaej doengzbingz ;
Bak gangj yienz miz cingz ,
Rox ndaw sim baenz siengj .
A) Dangq makgam baenz lip ,
Doq mbit hawj nuengx cimz ;
Dangh cax heh mbouj in ,
Buq sim hawj nuengx yiuq .
B) Go'deiz hoh dem hoh ,
Hoh lawz soh cij aeu ;
Beix ijsiengj gyau youx ,
Vunz soh gou cij haengj .
A) Faex mbouj siuq mbouj gon ,
Vunz mbouj son mbouj rox ;
Dangh nuengx haengj ciuqgoq ,
Beix bienq soh dangqmaz .
B) Bakmbanj miz goraeu ,
Ngaz ngaeu cungj gvaq laj ;
Lau moegciengh seih gyaj ,
Caengz roxnaj ekvaiz .
A) Beix dangq go dancoek ,
Daj goek soh daengz byai ;
Dauq heiq nuengx gofaiz ,
Daengz byai youh gungjseux .
B) Beix siengj nuengx caemh siengj ,
Dangq boux mbiengj simdaeuz ;
Faenhmwngz caemh dangq gou ,
Gaejngah naeuz lo beix .
A) Haeuxgok daem cix hau ,
Simsau nanz raen daej ;
Bak gangj riu coh beix ,
Sim rox ngeix daeglawz .
B) Lau beix miz lai sim ,
Lau gim miz lai eiq ;
Ciuq baenz nuengx simsaeh ,
Caenh gyaez beix boux ndeu .
A) Hwnz ninz sam ndiu singj ,
Raemxda gingj roengz swiz ;
Rox nuengx gyaez naeuz ndwi ,
Beix hatcwi cungj siengj .
B) Beix siengj nuengx caemh siengj ,
Caemh ityiengh doengzcaez ;
Beix gyaez nuengx caemh gyaez ,
Lwgraez doengz saj baenq .
A) Hwnz ninz da mbouj laep ,
Gag caeg hwnq cit ien ;
Mbouj raen naj doengznienz ,
Ok gyang dien bae muengh .
B) Hwnz ninz da mbouj laep ,
Gag caeg hwnq hai dou ;
Raen ndaundeiq baeyouz ,
Siengj beix gou youh daej .
A) Nuengx mwngz siengj cib faen ,
Beix siengj daengz cibseiq ;
Ndwen sam cib saedceij ,
Beix ngeix seiqcib ngoenz .
B) Beix mwngz siengj cib faen ,
Nuengx siengj daengz cibgaeuj ;
Hong mbouj guh cix youq ,
Caenh ndaej daeuj cix ndei .
-------- lij miz, deq ciep
------ ciep baihgwnz
A) Miz sim caez miz sim ,
Diem din daengz neix daeuj ;
Diuz hanz naengh boux gyaeuj ,
Lwnh cingzyoux van'diemz .
B) Oij caengz gauj baenz dangz ,
Haeux caengz rang heiqlaeuj ;
Beix heuh mbouj gamj daeuj ,
Lau ma raeuq vunz riu .
A) Mavangh raeuq ronghndwen ,
Luenh dwen vunz henzvah ;
Caih de gangj cixbah ,
Dangq rumz gvaq byai rwz .
B) Gaxgonq bouxlawz iu ,
Doemq giuz bae dangh raemx ;
Vaq mbaeq mbouj youqgaenj ,
Caenh lau vunz henzvah .
A) Caih de gangj cix gangj ,
Raeuz daihdamj gaej lau ;
Songraeuz baek diuz gau ,
Fanh vunz ngau mbouj doengh .
B) Ciuq congh bak beix gangj ,
Dajlamx seiq din mbwn ;
Ciuq congh bak beixlwnz ,
Dai vunz ceiq yungzheih .
A) Yamq din roengz dah laeg,
Bouxlawz aek mbouj diu(diuq) ;
Ndaej caeuq nuengx gangjriu ,
Raemj hoziu cungj naih .
B) Bohmeh mbouj doengzeiq ,
Mboujndaej okbae youz ;
Caengz laep cix gven dou ,
Mboujndaej louz gyang hongh .
A) Caenh aeu nuengx miz eiq ,
Gaejyungh heiq gven dou ;
Gyang'haemh mboujndaej youz ,
Doengxngoenz raeuz menh daeuj .
B) Siengj bae laeng mwngz langz ,
Ndoi sang roen mbouj gaenh ;
Hojsik hoz yienz haenh ,
Mbaej bae gaenh mwngz langz .
A) Danghnaeuz nuengx miz sim ,
Namzningz cungj naeuz gaenh ;
Caenh dangh nuengx mbouj haengj ,
Hongh gvaengh cungj naeuz gyae .
B) Haetneix daeuj mbouj roeb ,
Gyangngoenz doek cij bungz ;
Gukbeuq caeuq daihcungz ,
Nanz ndaej doengz guhdoih .
A) Haetneix daeuj doxyangz ,
Raemxrangz cawj nohgoep ;
Ngoenzneix daeuj doxroeb ,
Nohgoep cawj raemxrangz .
B) Nuengx dangq duj va'ngaeux ,
Ngaiz gyaeng youq daemzraez ;
Hojsik hoz yienz gyaez ,
Mboujndaej bae guhdoih .
A) Vunz gyaeng bit gyaeng gaeq ,
Byawz gyaeng ndaej lwgsau ;
Daengz seizmbauq seizsau ,
Gaejyungh lau bohmeh .
B) Beixlungz ha beixlungz ,
Naeuz mwngz aiq mbouj rox ;
Baez haeuj ranz cix doh ,
Caenh aeu noh ma laengz .
A) Mwngz gangj gawq yienghneix ,
Saedsaeh lo saugim ;
Doh haeuj noh nuengx in ,
Senz daengz sim beix daeuj .
B) Doengxhaemh byaij roenlaep ,
Gubgaeg mboujndaej bae ;
Faenhmwngz beix sim ndei ,
Diemj bogfeiz daeuj ciuq .
------ lij miz, deq ciep
------ ciep baihgwnz
A) Caen va mbouj caen va ,
Lau dawz moeggva'boux ;
Caen youx mbouj caen youx ,
Lau dawz boux gvaq roen .
B) Caen dwg makbizbaz ,
Caen dwg va hoengzaeuj ;
Caen dwg daeuj gapyoux ,
Mbouj dwg yaeuh guhcaemz .
A) Caen va mbouj caen va ,
Lau dawz moeggva'boux ;
Caen ngaeux mbouj caen ngaeux ,
Lau ngaiz yaeuh roengz daemz .
B) Miz sim daeuj euj va ,
Benz hwnj ngaz bae duengh ;
Miz sim daeuj buenx nuengx ,
Gaej baez muengh cix deuz .
A) Caen gyau mbouj caen gyau ,
Ceij bau naeuz vaj duk ;
Caenh lau ndip mbouj cug ,
Ngengh yuk beix hozhaenz .
B) Raeuz guh mbaj ciuz va ,
Gaej guh bya deuz mboq ;
Seiqvunz ndaej caemh loj ,
Caiq haemzhoj cungj diemz .
A) Caen gyau mbouj caen gyau ,
Ceij bau naeuz daeh caeux ;
Caenh dawz beix ma yaeuh ,
Byaj bag gyaeuj doxroengz .
B) Byaij daeuj daengz henz raemx ,
Mbouj caemx cungj swiq din ;
Daeuj daengz henz raemx ndwn ,
Mbouj gwn cungj riengx bak .
A) Daeuj daengz neix guhcaemz ,
Raen ndaw daemz byandoek ;
Gag diuq hwnj gag doek ,
Caen doeknaiq lo sou .
B) Lwg gizlawz gwnnya ,
Caeuq duzbya doxdaeuq ;
Daeuj daengz henzneix souj ,
Raeh gaeuj raeh dwgcaengz .
A) Fwng gaem gez lienz ndij ,
Gvihgvih le caiq gouz ;
Maih mboujndaej soulouz ,
Cix gaej naeuz baenz camj .
B) Beix caenh cam caenh cam ,
Mbouj han cix saetlaex ;
Naeuz mwngz ngi lo beix ,
Nuengx nienzgeij caengz miz .
A) Vunzraeuz dangq roegraeu ,
Ciengzseiz aeu baenz doiq ;
Mbouj caih naeuz geqoiq ,
Ndaej baenz doiq cix ndei .
B) Beix caenh cam caenh cam ,
Mbouj han cix saetlaex ;
Naeuz mwngz ngi lo beix ,
Nuengx cawjeiq caengz miz .
A) Nuengx cibbet bi cin ,
Gvaq ingyungz saedceij ;
Hauxseng mbouj vuen'heij ,
Gvaqseiq cix nanz gouz .
B) Faenhbeix rox guhfwen ,
Dwen bae gwnz dawz laj ;
Nuengx cix caengz guh gvaq ,
Gangjvah ndang lij saenz .
A) Beix dwen nuengx mbouj dwen ,
Caemh dangq ndwen haeuj fwj ;
Beix dwen mbwq dwen mbwq ,
Lumjbaenz fwj raemh mbwn .
B) Faenhbeix rox guhfwen ,
Dwen bae gwnz dawz laj ;
Gangj lai cungj seih gyaj ,
Gangj saedvah cij baenz .
A) Bak beix gangj cix caen ,
Gimngaenz mbaej baenz naek ;
Soh gangj dangq dajmaeg ,
Cax faeg cungj mbouj liz .
B) Mbwn doek cib raq fwn ,
Mbouj raen dumz daengz laj ;
Beix gangj cib coenz vah ,
Mbouj miz haj coenz caen .
A) Vah beix dangq dok ding ,
Maenh gvaq rin nanz siuq ;
Mbouj dwg caemz saek ciuq ,
Vih baenz ciuh gvanbaz .
B) Gangj dwk rumz haeuj saej ,
Vih coenz neix sim ndat ;
Dangh beix mbouj ciuq bak ,
Hawj nuengx rap naeuz gonz .
A) Ngoenz muengh ngoenz cix gvaq ,
Mbouj doek raq fwn hung ;
Gvaqfwj caiq okrumz ,
Yawj mbwn cungj seih gyaj .
B) Duzngieg caeuq duzlungz ,
Doxbungz youq sokdah ;
Miz yienz cij raen naj ,
Mbouj beg gvaq seiqvunz .
A) Duz mouduenh gwnz bya ,
Siengj gaemh ma guh cungj ;
Baez saet geij cib rungh ,
Beg uengj yungh goengrengz .
B) Dien'yienz mbouj doxgap ,
Ndwq gag fat cij diemz ;
Gwih max mbouj yungh bien ,
Gag swhyienz cij ndaej .
A) Vunz ndaem duh ndaej duh ,
Gou ndaem duh ndaej gaeu ;
Vunz baeyoux doxaeu ,
Lw daeggou gag youq .
B) Gwnz raemx miz valienz ,
Laj swhyienz miz ngaeux ;
Naihhoz deq daengz gyaeuj ,
Couh ndaej youx ma ranz .
A) Laeu faex bae geng bya ,
Ngoenzmaz ndaej baenz reih ;
Dap canz do ndaundeiq ,
Mbouj yungzheih daengz fwngz .
B) Muz bakfouj guh cim ,
Saeqsim di cij ndaej ;
Raemxcaep ma dangq gaeq ,
Saeqnaeh di cij baenz .
A) Ndaem gofaex dai mbiengj ,
Ngeix yienghyiengh cungj gyae ;
Aeu meuz ma dawzcae ,
Aiq suenq baezneix camj .
B) Beixlungz ha beixlungz ,
Bakcae mwngz dingj raeh ;
Cae rinbya dauq ndaej ,
Cae boengzmbaeq mbouj roengz .
A) Duzrwi ra ndaej gw(gwn) ,
Caenh gag lw duzmbaj ;
Nuengx in beix gag gvaq ,
Doeng saek dah hawj raeuz .
B) Nuengx dangq duz moeg'you ,
Ndang lij fouz gyang dah ;
Goq swhgeij mbouj gvaq ,
Lawz miz naj gaq giuz . -------- lij miz, deq ciep
------ ciep baihgwnz
A) Cin daengz roeg cix swenj ,
Sing rwenz rungh rwen bya ;
Mbungqmbaj dai gwnz caz ,
Cix vih va lij lup .
B) Va'dauz ngamqngamq hai ,
Lau beixgvai hoj deq ;
Ijsiengj nuengx biek meh ,
Naih deq di cij baenz .
A) Faexndoek miz lai ngaz ,
Bizbaz miz lai ceh ;
Nuengx bae haq baenz meh ,
Yaeuh beix deq youqndwi .
B) Doengzcaez ndaem gofaex ,
Go beix sang youh mwn ;
Doengzcaez daeuj laj mbwn ,
Beix baenzvunz gaxgonq .
A) Beix dangq duz roegraeu ,
Cincou gwnz gofaex ;
Sing gangz sam sing daej ,
Biq naeuz ndaej baenzvunz .
B) Ndaw ranz dok youzcaq ,
Lij bae ngah youzlingz ;
Ok haw lij riuj bingz ,
Vaih diuz mingz lauxbanj .
A) Yienh gwn naiz duzguk ,
Mbouj gwn mug duzyaen ;
Yienh dawzrap bak gaen ,
Mbouj souh ngaenz coenz vah .
B) Daemzhung youq bakmbanj ,
Cuengq byavanx gwn biuz ;
Beix miz yah gangjriu ,
Lij iu nuengx youzlangh .
A) Beix nienz ndaej ngeih geij ,
Caengz raen heiq vunzbaz ;
Gaj gaeq gag gwn ga ,
Aeu raemxda ma soengq .
B) Beix naeuz mbouj miz baz ,
Vihmaz miz sing rok ;
Ngoenzbonz gou gvaq rog ,
Rok daemj gokcanzcanz .
A) Aen heng yiengjndogndog ,
Gou faeg ndok ga'mou ;
Faenhnuengx gvaq bakdou ,
Laihnaeuz vunz daemjrok .
B) Mwngz naeuz mbouj ndaem va ,
Rwi youh ma suen daeuh ;
Song aen swiz caemh gyaeuj ,
Byawz daeuj caeuq mwngz ninz .
A) Ndaw suen louz byaekceh ,
Go geq cix hai va ;
Lauxbiuj bae'mbanj ma ,
Ciengz daeuj ra gangjgoj .
B) Ok ndoi daeuj guh langz ,
Haeuj ranz maj guh boh ;
Lwgsai got gyaeujhoq ,
Lwgbaz goj hozlaem .
A) Nuengx mwngz bae'ma ranz ,
Lij miz gvan gangjgoj ;
Daeggou maj laneg boh ,
Dauq ngaiz hoqfwngz ding .
B) Beix miz lwg miz baz ,
Ndwet dangq laz ciengqheiq ;
Nuengx cix gya mbouj geiq ,
Youq neix dangq youq ranz .
A) Mwngz mbouj caeuq gou naengh ,
Biq rox daengh gou nden ;
Nuengx miz gvan demh gen ,
Beix simsenz gutgungq .
B) Mwngz naeuz gou miz gvan ,
Cingj bae ranz gou gaeuj ;
Mbouj raen dih seizhouh ,
Aeu beix daeuj dingjgaz .
A) Mwngz naeuz mbouj miz gvan ,
Ndaw ranz bwh song liengj ;
Beixyez raeuz caen siengq ,
Canj baenz mbiengj Hawlaz .
B) Mwngz naeuz dah(gou) miz gvan ,
Bae ranz gwh(gou) yawj gvaq ;
Cam bohlungz mehbaj ,
Gou dwg yah daeglawz .
A) Nuengx miz gvan hab'eiq ,
Fan riep doengzcaez gang ;
Haemh ma ninz doxcam ,
Ninz vang naeuz ninz raeh .
B) Doengzcaez ndaem gofaex ,
Go beix ndaej hwnq ranz ;
Beix miz lwg miz lan ,
Vut doengzban gag youq .
A) Mauhdan ha mauhdan ,
Vah luenh damz ndaej ha ;
Danghnaeuz beix miz yah ,
Dai byajcek guk dawz .
B) Beix dan nuengx caemh ndeu,
Song geu laenz diuz cag ;
Beix dog nuengx caemh gag ,
Cingq ndei gap gvanbaz .
A) Gou yawj mwngz dangq gim ,
Mwngz cim gou dangq diet ;
Beix ndiep nuengx mbouj ndiep ,
Baenzlawz giet gvanbaz .
B) Go'maenj caeuq go'dauz ,
Mbouj lau nanz gietboiq ;
Cin daengz biu nyod'oiq ,
Cix guhdoih hai va .
A) Gosuenq caeuq gocoeng ,
Ndaej doengzcaez caemh luengx ;
Gaeqboux caeuq funghvuengz ,
Nanz ndaej doengz guhdoih .
B) Roeg caux rongz ra doih ,
Vunz gietboiq caux gya ;
Aen rek haeuj aen fa ,
Lij miz maz mbouj ngamj .
A) Siengj caeuq nuengx caez naengh ,
Lau ga'daengq mbouj sang ;
Siengj aeu nuengx doengzban ,
Lau gyaranz mbouj daengh .
B) Miz ceiq mbouj lau gungz ,
Caenh aeu vunz doxhaengj ;
Haeuxgwn mbouj youqgaenj ,
Gwn raemxdaemz cungj fiz .
-------- lij miz, deq ciep
------ ciep baihgwnz
A) Ndaej coenz vah mwngz gim ,
Naengh byai cim cungj onj ;
Sam ngoenz mbouj gwn donq ,
Byaij gyang hongh lij riu .
B) Ndaej coenz vah mwngz gim ,
Naengh byai cim cungj net ;
Sam ngoenz mbouj gak rek ,
Din doxgvet caez riu .
A) Ndaej mwngz nuengx ciuqgoq ,
Caemh dangq boh caen seng ;
Ndaej caeuq nuengx caez ngeng ,
Dangq meh seng baez ngeih .
B) Ndaej mwngz beix ciuqgoq ,
Caemh dangq boh caen seng ;
Cibngeih nyied mij denz ,
Gen demh gen engq raeuj .
A) Ndaej aeu nuengx gou ma ,
Ndai naz doxcaemh liengj ;
Go'haeux ndai boux mbiengj ,
Fwngz doxduengh caez riu .
B) Ndaej haq laeng mwngz langz ,
Cungj mbouj gangz dungx iek ;
Sam ngoenz caemh aen biek ,
Aeu cax mued doxfaen .
A) Ndaej aeu nuengx guh yah ,
Cungj mbouj ndaq coenz haemz ;
Guh gaiq maz mbouj baenz ,
Da baez caengz cix sat .
B) Ndaej haq laeng mwngz beix ,
Lwnh seiq mbouj doxceng ;
Guh gaiq maz mbouj deng ,
Ma laj denz menh lwnh .
A) Ndaej aeu nuengx guh baz ,
Dangq bya bungz raen raemx ;
Hong naek mbaeu doxcaemh ,
Haethaemh caez doxbang .
B)Raen beix gag aeu raemx ,
Byaij yamq daemq yamq sang ;
Ndaej caeuq beix caemh ranz ,
Nuengx dawz hanz lawh mbaq .
A) Gyaez hu gyaez ,
Gyaez dangq ceiz nemz ndoengj ;
Gyaez bohmeh gyaez hoengq ,
Gyaez nuengx doengh daengz sim .
B) Aen suen youq bakmbanj ,
Vunz doxcanj ndaem gve ;
Ndaej beix guh goyez ,
Daiq lwgngez cungj angq .
A) Gyaez hu gyaez ,
Gyaez dangq ceiz nemz lad ;
Gyaez bohmeh gyaez sat ,
Gyaez nuengx ndat haeuj sim .
B) Benz hwnj gwnz bya sang ,
Muengh raen gyang daihhaij ;
Ndaej gaem gen beix byaij ,
Seiqneix daih vuen'yungz .
------ lij miz, deq ciep
------ ciep baihgwnz
A) Suenq songraeuz miz fuk ,
Sim caezcup doxgyaez ;
Song aen sim caemh maez ,
Ndaej doxndei gvaq ciuh .
B) Daengngoenz doek roengz bya ,
Bae'ma lo lauxbiuj ;
Vahdaeuz gangj mbouj liux ,
Menh diuhcuengq ngoenzlaeng .
A) Song duz roegyenhyangh ,
Caez angq raemx laj giuz ;
Bak gangj song bak riu ,
Baenzlawz iu doxbiek .
B) Va hai youq gwnz biengz ,
Mbaej ciengzlwenx hoengzmaeq ;
Bae'ma ranz lo beix ,
Vunz biek sim mbouj liz .
A) Dawzcae lij caengz liux ,
Doq hamj ceux la cwz ;
Gangjvah caengz doxgw(doxgwn) ,
Doq gauqswz lo nuengx .
B) Mbouj biek caez mbouj biek ,
Caez youq dieg neix dai ;
Guk dawz mou lij haiz ,
Fwngz gaem sai mbouj cuengq .
A) Maizmingz gwn maksaep ,
Ging haeb le gaej haiz ;
Gou caeuq mwngz nuengxgvai ,
Daengz ngoenzdai menh duenh .
B) Dai cix doengzcaez dai ,
Sei'haiz doxcaemh moh ;
Dawz bae cuengq gyang loh ,
Vunz naeuz moh Inghdaiz .
A) Caencaen sij mboujndaej ,
Dangq Sambek Inghdaiz ;
Dajdingh naeuz doq dai ,
Lij ra gvai guhdoih .
B) Mbouj maj(bae'ma) roen cix gyae ,
Hanz gyaez mboujndaej youq ;
Bae'ma ranz lo youx ,
Vunz biek sim mbouj liz .
A) Bae'ma cix bae'ma ,
Hot go'haz neix geiq ;
Ngoenzcog ban doiqseiz ,
Dauq daeuj neix doxraen .
B) Nuengx biek beix bae'ma ,
Raemxda roengzveihveih ;
Rumz ci gvaq byai faex ,
Ngoenzmaz ndaej dauqraen .
A) Dangq vaizlwg biek meh ,
Swenjngehngeh mbouj dingz ;
Beix biek mwngz saugim ,
Daej da'nding oklwed .
B) Baez dwen naeuz doxbiek ,
Unqriegrieg dangq coeng ;
Vaiz biek meh cix mboeng ,
Doengz biek doengz cix daej .
A) Beix biek nuengx bae'ma ,
Raemxda roengzsadsad ;
Aeu genbuh ma mad ,
Ndaej baenz bat swiq din .
B) Haemz duzgaeq neix haen ,
Ndaenq duzgaeq neix heuh ;
Raeuz goj gangj caengz liux ,
Haenndeujndeuj ndaw rongz .
A) Dangh nuengx caen siengj maj(bae'ma) ,
Beix ij hah cix nanz ;
Dangq raemxdah roengz dan ,
Song fwngz lanz mbouj dauq .
B) Vih nga dah neix raez ,
Raeuz doengzcaez gwn raemx ;
Vih goengq bya neix raemh ,
Raeuz haethaemh mbouj raen .
A) Goq vunz daeuj hai loz ,
Diz fagso fagsiuq ;
Buen goengq bya neix liux ,
Raeuz doxyiuq cix raen .
B) Gangjvah aeu suenqsoq ,
Gaej naeuz lox guhcaemz ;
Lau goq vunz daeuj daengz ,
Beix youh lumz bae liux .
A) Fwengz gaem fwengz okhanh ,
Fanh daih cungj mbouj lumz ;
Seiq dip benj roengz gumz ,
Cungj mbouj lumz ndaej nuengx .
B) Gag youq gyangngoenz raez ,
Doengzcaez gyangngoenz dinj ;
Mboujndaej gangj donq imq ,
Yienh haeb linx daimaez .
A) Lau nuengx miz lai sim ,
Lau gim miz lai eiq ;
Miz sim gyau youxngeih ,
Lwnh seiq ndaej guhcaemz .
B) Beix miz yienghneix sim ,
Saugim caemh miz eiq ;
MIz sim gyau youxngeih ,
Lwnh seiq ndaej guhcaemz .
Hab) Miz sim gyau youxngeih ,
Lwnh seiq ndaej guhcaemz .
------ sat
Fwen Daegdenz ranzcung ,
Miz goenglauz deng haenh;
Hawj raeuz yawj donq nyaenx ,
Miz ngaenz cawx mbouj ma .
guh fwen cix mbouj lau vunz haenh,lau nyaenq mbouj cix guh fwenyoux
写得太多了吧，都没心情看了，也看不动。嘻嘻~~~~~
我敢说这里没几个人看得懂壮语，你发帖子不就
是让人看的吗
我敢说这里没几个人看得懂壮语，你发帖子不就
是让人看的吗
Miz vunz yawj ndaej rox ha. Mwngz yawj ndaej mbouj rox mbouj dangq vunzwnq mbouj rox ha. Mwngz yaek yawj ndaej rox baihgwnz dwg gangj gijmaz, mwngz couh bae hag ndei Sawcuengh bae ma, yienghneix mwngz couh yawj ndaej rox luba.
Daegdenz beixnuengx, gou yawj sat gij fwen mwngz lo, geibonj yawj ndaej rox caez. Cijdwg miz saek di cih gou lau vah gou caeuq vah mwngz doengz yaem mbouj doengz eiqsei. Mazfanz mwngz ndaej hoengq seiz aeu Sawgun daeuj gejnaeuz gij cih naem lajneix dwg gijmaz eiqsei. Danghnaeuz aen cih lawz dwg fanghyenz, cingj mwngz sij baenz Byaucunjyij Sawcuengh bae. Docih mwngz.
Mbaej ciengzlwenx hoengzmaeq
Seiqlengq baenz cumhcaz
Yaemj suenva baenq yiengh
Geuj gvaq ndeuq gvaq bya
Raen rang va fwtfwt
Mup raen heiqrang va
Vunz ra fiz halo
Ij byalawz mbouj rongh
Fwenz gaem ngaz cix euj
Dangq bya bungz raemxmoq
Bak yiengh hoj cungj lumz
Raen saulwnz gang liengj
Roegfek raen reggae
Vavengj hai gwnz cah
Muengh rwi mbaj daeuj ciuz
Roeghenj daeuh gwnz caz
Sing mbouj luenz yak dingq
Va'meiz cuenh gwnz dingj
Daet rieng ma guh hangh
Gou ndaejngi vunz lwnh
Gou ndaejngi vunz dwen
Nuengx guhfwen ceiq mengx
Vax muengx couh roengz daemz
Siengj eu fwen guhcaemz
Gaen hangx laeng beix daeuj
Ngah fwen dangq ngah gemq
Mwnqlawz miz vunz hemq
Aeu cienz demh cungj bae
Vunz mbouj rox naeuz aeng
Senj daengq ma coh daiz
Eu fwenbeij daeuj nai
Gou cam mwngz va'mai
Lau dwgsaeh hwnjndang
Ndaw suen va hoengzoq
Beix hozgyoh cix aeu
Gonh haij naeuz bag bya
Youz mwngz nda cawjeiq
Seng daeuj doek gex rungh
Daiq coh cungj mbouj an
Daengj beix sawq cam gaeuj
Dawh dog cuengq gwnz daiz
Hawj saugvai baenz sawj
Beix raen sim cix maeh
Duj va'nat bangx bya
Miz gijmaz ndeiraeuh
Daiq rag daeuq maj ndaem
Biq ndaej baenzlai huk
Lumj dujva baenz ndongq
Hoz siengj naeuz mbouj dongx
Lumj duzfungh gamz va
Daraiz raen mumjgyumq
Roegfek mbin roengz gumh
Beix laih fungh ciuz va
Canj baenz singz mauhdan
Yaeuh ndaundeiq roengz doem
Daenj mong lumj gaujvaq
Va mauhdan hoengzaeuj
Va sigloux hoengzsien
Seizcin bengz valup
Gaej aeu ngaenz ma hanh
Dangq makgam baenz lip
Buq sim hawj nuengx yiuq
Go'deiz hoh dem hoh
Beix ijsiengj gyau youx
Faex mbouj siuq mbouj gon
Beix bienq soh dangqmaz
Bakmbanj miz goraeu
Ngaz ngaeu cungj gvaq laj
Lau moegciengh seih gyaj
Caengz roxnaj ekvaiz
Beix dangq go dancoek
Dauq heiq nuengx gofaiz
Hwnz ninz sam ndiu singj
Raemxda gingj roengz swiz
Rox nuengx gyaez naeuz ndwi
Beix hatcwi cungj siengj
Lwgraez doengz saj baenq
Nuengx siengj daengz cibgaeuj
Mavangh raeuq ronghndwen
Doemq giuz bae dangh raemx
Vaq mbaeq mbouj youqgaenj
Songraeuz baek diuz gau
Dajlamx seiq din mbwn
Ciuq congh bak beixlwnz
Raemj hoziu cungj naih
Doengxngoenz raeuz menh daeuj
Siengj bae laeng mwngz langz
Hongh gvaengh cungj naeuz gyae
Haetneix daeuj mbouj roeb
Gukbeuq caeuq daihcungz
Ngaiz gyaeng youq daemzraez
Hojsik hoz yienz gyaez
Naeuz mwngz aiq mbouj rox
Baez haeuj ranz cix doh
Gubgaeg mboujndaej bae
Diemj bogfeiz daeuj ciuq
Benz hwnj ngaz bae duengh
Ceij bau naeuz vaj duk
Ngengh yuk beix hozhaenz
Seiqvunz ndaej caemh loj
Daeuj daengz henz raemx ndwn
Caen doeknaiq lo sou
Lwg gizlawz gwnnya
Caeuq duzbya doxdaeuq
Raeh gaeuj raeh dwgcaengz
Fwng gaem gez lienz ndij
Maih mboujndaej soulouz
Cix gaej naeuz baenz camj
Vunzraeuz dangq roegraeu
Mbouj caih naeuz geqoiq
Beix dwen mbwq dwen mbwq
Lumjbaenz fwj raemh mbwn
Soh gangj dangq dajmaeg
Cax faeg cungj mbouj liz
Vah beix dangq dok ding
Maenh gvaq rin nanz siuq
Mbouj dwg caemz saek ciuq
Hawj nuengx rap naeuz gonz
Duzngieg caeuq duzlungz
Doxbungz youq sokdah
Duz mouduenh gwnz bya
Dien'yienz mbouj doxgap
Gou ndaem duh ndaej gaeu
Dap canz do ndaundeiq
Raemxcaep ma dangq gaeq
Saeqnaeh di cij baenz
Aiq suenq baezneix camj
Cae boengzmbaeq mbouj roengz
Nuengx dangq duz moeg'you
Cin daengz roeg cix swenj
Sing rwenz rungh rwen bya
Mbungqmbaj dai gwnz caz
Cix vih va lij lup
Yaeuh beix deq youqndwi
Sing gangz sam sing daej
Biq naeuz ndaej baenzvunz
Ndaw ranz dok youzcaq
Lij bae ngah youzlingz
Ok haw lij riuj bingz
Cuengq byavanx gwn biuz
Lwgbaz goj hozlaem
Dauq ngaiz hoqfwngz ding
Ndwet dangq laz ciengqheiq
Beix simsenz gutgungq
Biq rox daengh gou nden
Cingj bae ranz gou gaeuj
Aeu beix daeuj dingjgaz
Canj baenz mbiengj Hawlaz
Fan riep doengzcaez gang
Ninz vang naeuz ninz raeh
Dai byajcek guk dawz
Song geu laenz diuz cag
Go'maenj caeuq go'dauz
Cin daengz biu nyod'oiq
Gosuenq caeuq gocoeng
Ndaej doengzcaez caemh luengx
Naengh byai cim cungj net
Din doxgvet caez riu
Ndaej caeuq nuengx caez ngeng
Gyaez dangq ceiz nemz ndoengj
Vunz doxcanj ndaem gve
Gyaez dangq ceiz nemz lad
Doq hamj ceux la cwz
Maizmingz gwn maksaep
Unqriegrieg dangq coeng
Vaiz biek meh cix mboeng
Ndaenq duzgaeq neix heuh
Vih goengq bya neix raemh
Seiq dip benj roengz gumz
Mbaej ciengzlwenx hoengzmaeq （mbaej=mboujndaej;hoengzmaeq=粉红）
Seiqlengq baenz cumhcaz （seiqlengq=四处； cumhcaz=丛）
Yaemj suenva baenq yiengh （yaemj=lumj; baenqyiengh=那样）
Geuj gvaq ndeuq gvaq bya (geuj=ci;吹； ndeuq=山坳）
Raen rang va fwtfwt （rang=hom香；）
Mup raen heiqrang va （mup=嗅；heiqrang=香气）
Vunz ra fiz halo （fiz=醉；halo=了了）
Ij byalawz mbouj rongh （ij=yaek)
Fwenz gaem ngaz cix euj (fwenz=fwngz; ngaz= 枝桠）
Dangq bya bungz raemxmoq （ dangq=象）
Bak yiengh hoj cungj lumz （hoj=苦）
Raen saulwnz gang liengj （saulwnz=姑娘；gang=撑）
Roegfek raen reggae （roegfek=鹧鸪；roeggae=野鸡）
Vavengj hai gwnz cah （vavengj=金樱花；cah=oen刺）
Muengh rwi mbaj daeuj ciuz （mbaj=mbungqmbaj蝴蝶；ciuz=聚集）
Roeghenj daeuh gwnz caz (roeghenj=黄莺；daeuh=逗留）
Sing mbouj luenz yak dingq （luenz=圆，圆润）
Va'meiz cuenh gwnz dingj （ cuenh=盘旋）
Daet rieng ma guh hangh （daet=剪；hangh=gaeqhangh项鸡）
Gou ndaejngi vunz lwnh （ndaejngi=ndaejnyi听见）
Gou ndaejngi vunz dwen （dwen=提，说）
Nuengx guhfwen ceiq mengx （mengx=厉害）
Vax muengx couh roengz daemz （vax=抓，捞）
Siengj eu fwen guhcaemz （guhcaemz=玩耍）
Gaen hangx laeng beix daeuj （hangx=屁股）
Ngah fwen dangq ngah gemq （gemq=猪油渣）
Mwnqlawz miz vunz hemq （mwnqlawz=gizlawz哪里）
Aeu cienz demh cungj bae （demh=垫）
Vunz mbouj rox naeuz aeng （aeng=angq高兴）
Senj daengq ma coh daiz （senj=搬，移；coh=向）
Eu fwenbeij daeuj nai （nai=安慰）
Gou cam mwngz va'mai （va'mai=黄饭花）
Lau dwgsaeh hwnjndang （ dwgsaeh=惹事）
Ndaw suen va hoengzoq （hoengzoq=鲜红）
Beix hozgyoh cix aeu （hozgyoh=心爱，喜爱）
Gonh haij naeuz bag bya （gonh=戽水）
Youz mwngz nda cawjeiq （nda=摆布）
Seng daeuj doek gex rungh （gex=角落）
Daiq coh cungj mbouj an （daiq=连；coh=名字；an=安名）
Daengj beix sawq cam gaeuj （gaeuj=看）
Dawh dog cuengq gwnz daiz （dog=独）
Hawj saugvai baenz sawj （sawj=sawjyungh使用）
Beix raen sim cix maeh (maeh=迷）
Duj va'nat bangx bya （va'nat=野牡丹；bangxbya=山边，山脚）
Miz gijmaz ndeiraeuh （ndeiraeuh=好多少，好什么）
Daiq rag daeuq maj ndaem （daeuq=挖）
Biq ndaej baenzlai huk (biq=怎么）
Lumj dujva baenz ndongq （ndongq=rongh亮）
Hoz siengj naeuz mbouj dongx （dongx=打招呼）
Lumj duzfungh gamz va （gamz=叼，衔）
Daraiz raen mumjgyumq （mumjgyumq=模糊，朦胧）
Roegfek mbin roengz gumh （gumh=凹地）
Beix laih fungh ciuz va （laih=赖，以为）
Canj baenz singz mauhdan （canj=比下去）
Yaeuh ndaundeiq roengz doem （doem=namh土，地面）
Daenj mong lumj gaujvaq （mong=灰，这里指烂）
Va mauhdan hoengzaeuj （hoengzaeuj=紫红）
Va sigloux hoengzsien （hoengzsien=鲜红）
Seizcin bengz valup （bengz=贵；valup=花苞，含苞待放的花）
Gaej aeu ngaenz ma hanh （hanh=限制）
Dangq makgam baenz lip （lip=瓣）
Buq sim hawj nuengx yiuq （buq=破开；yiuq=看）
Go'deiz hoh dem hoh （go'deiz=苦竹；hoh=节）
Beix ijsiengj gyau youx （ijsiengj=yaeksiengj想要）
Faex mbouj siuq mbouj gon （siuq=凿；gon=穿洞，漏洞）
Beix bienq soh dangqmaz （dangqmaz=象什么一样）
Bakmbanj miz goraeu （goraeu=枫树）
Ngaz ngaeu cungj gvaq laj （ngaeu=勾，弯曲）
Lau moegciengh seih gyaj （seihgyaj=是假）
Caengz roxnaj ekvaiz （ekvaiz=轭，牛轭）
Beix dangq go dancoek （dancoek=单竹）
Dauq heiq nuengx gofaiz （gofaiz=甜竹）
Hwnz ninz sam ndiu singj （ndiu=醒一次叫ndiu)
Raemxda gingj roengz swiz (swiz=枕头）
Rox nuengx gyaez naeuz ndwi （ndwi=hoengq空）
Beix hatcwi cungj siengj （hatcwi=打喷嚏）
Lwgraez doengz saj baenq （lwgraez=纱轴；saj=纺车带；baenq=转）
Nuengx siengj daengz cibgaeuj （cibgaeuj=十九）
Mavangh raeuq ronghndwen （mavangh=疯狗）
Doemq giuz bae dangh raemx （doemq=倒塌）
Vaq mbaeq mbouj youqgaenj （mbaeq=湿）
Songraeuz baek diuz gau （baek=插；gau=竹篙）
Dajlamx seiq din mbwn （dajlamx=包揽）
Ciuq congh bak beixlwnz （beixlwnz=阿哥）
Raemj hoziu cungj naih （hoziu=颈项；naih=奈何？）
Doengxngoenz raeuz menh daeuj （doengxngoenz=白天）
Siengj bae laeng mwngz langz （langz=郎，情郎）
Hongh gvaengh cungj naeuz gyae （honghgvaengh=街巷，小巷）
Haetneix daeuj mbouj roeb （roeb=碰到）
Gukbeuq caeuq daihcungz （gukbeuq=豹子）
Ngaiz gyaeng youq daemzraez （daemzraez=长塘）
Hojsik hoz yienz gyaez （hoz=心里；yienz=虽然；gyaez=爱，想，爱慕）
Naeuz mwngz aiq mbouj rox （aiq=可能，大概，大约）
Baez haeuj ranz cix doh （doh=doebhoenx打）
Gubgaeg mboujndaej bae （gubgaeg=凹凸不平）
Diemj bogfeiz daeuj ciuq （bogfeiz=火把）
Benz hwnj ngaz bae duengh （duengh=往下拉）
Ceij bau naeuz vaj duk （vaj=布，烂布；duk=suk包）
Ngengh yuk beix hozhaenz （ngengh=硬是；yuk=惹，引诱）
Seiqvunz ndaej caemh loj （loj=loh?=路）
Daeuj daengz henz raemx ndwn （ndwm=站）
Caen doeknaiq lo sou （doeknaiq=气馁，丧气）
Lwg gizlawz gwnnya （gwnnya=gwnguk=狼吞虎咽？）
Caeuq duzbya doxdaeuq （doxdaeuq=相斗）
Raeh gaeuj raeh dwgcaengz （raeh=ciemh=渐渐；dwgcaengz=讨厌）
Fwng gaem gez lienz ndij （gez=小竹筐；ndij=大竹筐）
Maih mboujndaej soulouz （maih=就算）
Cix gaej naeuz baenz camj （camj=惨）
Vunzraeuz dangq roegraeu （roegraeu=斑鸠）
Mbouj caih naeuz geqoiq （geq=老；oiq=嫩；geqoiq=老少）
Beix dwen mbwq dwen mbwq （dwen=提起；mbwq=烦闷）
Lumjbaenz fwj raemh mbwn （lumjbaenz=好象，就象，犹如；raemh=荫蔽）
Soh gangj dangq dajmaeg （dajmaeg=墨斗打线）
Cax faeg cungj mbouj liz （faeg=faenz砍）
Vah beix dangq dok ding （dok=锤打，钉钉；ding=钉子）
Maenh gvaq rin nanz siuq （nanz=难；siuq=凿）
Mbouj dwg caemz saek ciuq （caemz=逗弄，玩耍；saekciuq=一下子）
Hawj nuengx rap naeuz gonz （gonz=挑，挑子的一头）
Duzngieg caeuq duzlungz （duzngieg=鳄鱼，蛟龙）
Doxbungz youq sokdah （sokdah=码头）
Duz mouduenh gwnz bya （mouduenh=野猪）
Dien'yienz mbouj doxgap （doxgap=相合，相交）
Gou ndaem duh ndaej gaeu （gaeu=藤）
Dap canz do ndaundeiq （canz=栈台；do=在底下等要东西）
Raemxcaep ma dangq gaeq （raemxcaep=冷水）
Saeqnaeh di cij baenz （saeqnaeh=细腻，细心）
Aiq suenq baezneix camj （aiq=可能；camj=惨）
Cae boengzmbaeq mbouj roengz （boengzmbaeq=湿泥，烂泥）
Nuengx dangq duz moeg'you （moeg'you=木头菩萨）
Cin daengz roeg cix swenj （swenj=鸣叫，喊叫）
Sing rwenz rungh rwenz bya (rwenz=声音震动传播）
Mbungqmbaj dai gwnz caz （mbungqmbaj=蝴蝶）
Cix vih va lij lup （lup=合，没开。比如valup,byaeklup)
Yaeuh beix deq youqndwi (deq youqndwi=空等，白等）
Sing gangz sam sing daej （gangz=呻吟）
Biq naeuz ndaej baenzvunz （biq=怎么）
Ndaw ranz dok youzcaq （dok=打，钉钉，这里是榨油）
Lij bae ngah youzlingz （youzlingz=零售的油）
Ok haw lij riuj bingz （riuj=提；bingz=瓶子）
Cuengq byavanx gwn biuz （biuz=浮萍）
Lwgbaz goj hozlaem （hozlaem=后脖颈，后背）
Dauq ngaiz hoqfwngz ding （hoqfwngz=手指关节）
Ndwet dangq laz ciengqheiq （ndwet=热闹，喧闹；laz=锣）
Beix simsenz gutgungq （gutgungq=弯曲，蜷缩）
Biq rox daengh gou nden （daengh?=daengq=凳子；nden=有东西搁，坐、睡不舒服？）
Cingj bae ranz gou gaeuj （gaeuj=看）
Aeu beix daeuj dingjgaz （dingj=顶；gaz=卡；dingjgaz=顶替，替换）
Canj baenz mbiengj Hawlaz （Hawlaz=地名，锣圩）
Fan riep doengzcaez gang （riep=帐子，蚊帐）
Ninz vang naeuz ninz raeh （vang = 横）
Dai byajcek guk dawz （byajcek=byajbag=雷劈）
Song geu laenz diuz cag （laenz=捻线）
Go'maenj caeuq go'dauz （go'maenj=李树）
Cin daengz biu nyod'oiq （nyod'oiq=嫩芽）
Gosuenq caeuq gocoeng （gosuenq=go'ho=蒜）
Ndaej doengzcaez caemh luengx （luengx=垄，行）
Naengh byai cim cungj net （本意是“实”，这里当“onj”，就是稳。）
Din doxgvet caez riu （din doxgvet=脚互相踢）
Ndaej caeuq nuengx caez ngeng （ngeng=本意侧身，这里当睡觉）
Gyaez dangq ceiz nemz ndoengj （nemz=粘；ndoengj=簸箕）
Vunz doxcanj ndaem gve （gve=gva=西瓜）
Gyaez dangq ceiz nemz lad （lad=筛子）
Doq hamj ceux la cwz （hamj=跨过；ceux=cagceux=牛绳）
Maizmingz gwn maksaep （maksaep=没成熟的果，很涩，叫maksaep)
Unqriegrieg dangq coeng (unqriegrieg=软绵绵；coeng=葱）
Vaiz biek meh cix mboeng （mboeng=soeng 松，这里指长得茁壮）
Ndaenq duzgaeq neix heuh （ndaenq=haemz=haenq=恨）
Vih goengq bya neix raemh （raemh=荫蔽）
Seiq dip benj roengz gumz（dip=块；benj=木版）
Daegdenz beixnuengx, docih mwngz sai baenz lai seizgan daeuj son gou. Gou hix dwg gag hag Sawcuengh. Dangqnaj gou hong lai, ndaej hoengq caiq dauqma caeuq mwngz ging gij cih naem baihgwnz. Coenz (Vah) gou miz di caeuq coenz mwngz mbouj doxdoengz.
Ngoenz gvaq cienfanh roeg ,
Mbouj raen doek diuz bwn ;
Ngoenz gvaq cienfanh vunz ,
Mbouj raen lwnz oknaj .
Mbaej ciengzlwenx hoengzmaeq （mbaej=mboujndaej;hoengzmaeq=粉红）[mbouj doengz]
Seiqlengq baenz cumhcaz （seiqlengq=四处； cumhcaz=丛) [seiqvaj=四处； cumhcaz=丛 doxdoengz]
Yaemj suenva baenq yiengh （yaemj=lumj; baenqyiengh=那样）[swj = lumj, yiengh haenx = 那样]
Geuj gvaq ndeuq gvaq bya (geuj=ci;吹； ndeuq=山坳）[geuj=ci;吹, doxdoengz, ndeuq = 山, mbouj miz "bya = 山", cijmiz "bya=fish"]
Raen rang va fwtfwt （rang=hom香；） [mij miz "rang", "hom" doxdoengz]
Mup raen heiqrang va （mup=嗅；heiqrang=香气） [mij miz "mup", dou gangj "ywq"; mij miz "heiqrang", dou gangj "heiqhom"]
Vunz ra fiz halo （fiz=醉；halo=了了） [mij miz "fiz", dou gangj "maeuz"-de gwn laeuj maeuz lo=de gwn laeuj fiz lo; mij miz "halo", dou gangj "lo"]
Ij byalawz mbouj rongh （ij=yaek) [mbouj doxdoengz. "ij" youq dieg gou dwg "mbouj, mij"; mij miz "yaek", dou gangj "nwek"]
Fwenz gaem ngaz cix euj (fwenz=fwngz; ngaz= 枝桠）[mij miz "fwenz", dou gangj "fwngz"; "ngaz" doxdoengz, faex ngaz]
Dangq bya bungz raemxmoq （ dangq=象）[doxdoengz]
Bak yiengh hoj cungj lumz （hoj=苦）[mij miz "hoj", dou gangj "haemz"]
Raen saulwnz gang liengj （saulwnz=姑娘；gang=撑） [mij miz "saulwnz", dou gangj "sau, lwgsau, dahsau"; "gang", dou gangj "gangz liengj"]
Roegfek raen reggae （roegfek=鹧鸪；roeggae=野鸡） [doegfap doxdoengz, cij dwg dou gangj duz "roegfek" dwg duz roeg iq, bwn heu, rox ra bya gwn haenx; duz roeggae dwg duz roeg youq youq dah haenx]
Vavengj hai gwnz cah （vavengj=金樱花；cah=oen刺） [mbouj geiq ndaej "vavengj" lo; cah=oen, doxdoengz]
Muengh rwi mbaj daeuj ciuz （mbaj=mbungqmbaj蝴蝶；ciuz=聚集） [mbouj geiq ndaej "mbungqmbaj" lo; mij miz "ciuz", dou gangj "comz"]
Roeghenj daeuh gwnz caz (roeghenj=黄莺；daeuh=逗留）[dou miz gangj roeghenj, hoeng, mbouj geiq ndaej dwg gangj roeg maz lo; "daeuh" vah gou mbouj dwg "逗留", dwg "baeu haz baenz daeuh"]
Sing mbouj luenz yak dingq （luenz=圆，圆润））[mij miz "luenz", dou gangj "guenz"]
Va'meiz cuenh gwnz dingj （ cuenh=盘旋） [doxdoengz]
Daet rieng ma guh hangh （daet=剪；hangh=gaeqhangh项鸡）[doxdoengz]
Gou ndaejngi vunz lwnh （ndaejngi=ndaejnyi听见）[mij miz "ndaejngi", dou gangj "ndaejdingq"]
Gou ndaejngi vunz dwen （dwen=提，说） [mij miz "dwen", dou gangj "naeuz/gangj"-gou ndaej dingq vunz naeuz/gangj]
Nuengx guhfwen ceiq mengx （mengx=厉害） [doxdoengz]
Vax muengx couh roengz daemz （vax=抓，捞）[mij miz "vax", dou gangj "gaem muengx", "cug muengx"]
Siengj eu fwen guhcaemz （guhcaemz=玩耍）[mij miz "guhcaemz", dou gangj "guh langh", "guh angq"]
Gaen hangx laeng beix daeuj （hangx=屁股）[mij miz "hangx", dou gangj "doek caekhaex", "laeng caekhaex"]
Ngah fwen dangq ngah gemq （gemq=猪油渣）[mij miz "gemq", dou gangj "youjcaz", honqvah lo]
Mwnqlawz miz vunz hemq （mwnqlawz=gizlawz哪里）[mij miz "mwnqlawz", dou gangj "denhlawz"]
Aeu cienz demh cungj bae （demh=垫）[doxdoengz]
Vunz mbouj rox naeuz aeng （aeng=angq高兴）[mij miz "aeng, angq", dou gangj "yoengx"]
Senj daengq ma coh daiz （senj=搬，移；coh=向）[mij miz "senj", dou gangj "buen"; mij miz "coh"]
Eu fwenbeij daeuj nai （nai=安慰）[mij miz "nai"]
Gou cam mwngz va'mai （va'mai=黄饭花）[mij geiq ndaej baenzlawz gangj lo]
Lau dwgsaeh hwnjndang （ dwgsaeh=惹事）[mij miz ]
Ndaw suen va hoengzoq （hoengzoq=鲜红）[doxdoengz]
Beix hozgyoh cix aeu （hozgyoh=心爱，喜爱）[mij miz "hozgyoh", dou gangj "hoq"]
Gonh haij naeuz bag bya （gonh=戽水）[doxdoengz]
Youz mwngz nda cawjeiq （nda=摆布）[mij miz]
Seng daeuj doek gex rungh （gex=角落）[mij miz "gex", dou gangj "gak"]
Daiq coh cungj mbouj an （daiq=连；coh=名字；an=安名）[mij miz "coh", dou gangj "mingz". "coh" youq dieg gou dwg gangj duz meh mbouj miz gvaq lwg haenx-vaizcoh; gizwnq doxdoengz]
Daengj beix sawq cam gaeuj （gaeuj=看）[mij miz "gaeuj", dou gangj "yawj", "deq"]
Dawh dog cuengq gwnz daiz （dog=独）[doxdoengz]
Hawj saugvai baenz sawj （sawj=sawjyungh使用）[mij miz]
Beix raen sim cix maeh (maeh=迷）[dou gangj "maez"]
Duj va'nat bangx bya （va'nat=野牡丹；bangxbya=山边，山脚）[mbouj rox gangj "va'nat=野牡丹"mij miz "bangxbya", dou gangj "dinndeuq"]
Miz gijmaz ndeiraeuh （ndeiraeuh=好多少，好什么）[mij miz]
Daiq rag daeuq maj ndaem （daeuq=挖）[mij miz "daeuq", dou gangj "vet"]
Biq ndaej baenzlai huk (biq=怎么）[mij miz]
Lumj dujva baenz ndongq （ndongq=rongh亮）[mij miz]
Hoz siengj naeuz mbouj dongx （dongx=打招呼）[doxdoengz; vah gou heijdongx=docih, mij miz "docih"]
Lumj duzfungh gamz va （gamz=叼，衔）[doxdoengz]
Daraiz raen mumjgyumq （mumjgyumq=模糊，朦胧）[mij miz]
Roegfek mbin roengz gumh （gumh=凹地）[dou gangj "gumz", "gumh" dwg linghyiengh doxgaiq]
Beix laih fungh ciuz va （laih=赖，以为）[doxdoengz]
Canj baenz singz mauhdan （canj=比下去）[mij miz ]
Yaeuh ndaundeiq roengz doem （doem=namh土，地面）[mij miz "doem", dou cij gangj "namh"]
Daenj mong lumj gaujvaq （mong=灰，这里指烂）[doxdoengz]
Va mauhdan hoengzaeuj （hoengzaeuj=紫红） [mij miz "hoengzaeuj", dou cij rox gangj "hoengzfaq"]
Va sigloux hoengzsien （hoengzsien=鲜红）[mij miz "hoengzsien", dou cij rox gangj "hoengzfaq"]
Seizcin bengz valup （bengz=贵；valup=花苞，含苞待放的花）["bengz"-doxdoengz; mij miz "valup", gou mbouj rox baenzlawz gangj "花苞，含苞待放的花"]
Gaej aeu ngaenz ma hanh （hanh=限制）[doxdoengz]
Dangq makgam baenz lip （lip=瓣））[doxdoengz]
Buq sim hawj nuengx yiuq （buq=破开；yiuq=看）["Buq"-doxdoengz; mij miz "yiuq", gou cij gangj "yawj"]
Go'deiz hoh dem hoh （go'deiz=苦竹；hoh=节）["hoh"-doxdoengz; mij miz "Go'deiz"]
Beix ijsiengj gyau youx （ijsiengj=yaeksiengj想要）[mij miz "ijsiengj", dou gangj "nwek aeu"]
Faex mbouj siuq mbouj gon （siuq=凿；gon=穿洞，漏洞））["siuq"-doxdoengz; mij miz "gon", dou gangj "goeng"]
Beix bienq soh dangqmaz （dangqmaz=象什么一样）[mij miz ]
Bakmbanj miz goraeu （goraeu=枫树）[dou gangj "go faexlaeu", mbouj rox dwg mbouj dwg gangj doxdoengz go faex]
Ngaz ngaeu cungj gvaq laj （ngaeu=勾，弯曲）[doxdoengz]
Lau moegciengh seih gyaj （seihgyaj=是假）[doxdoengz]
Caengz roxnaj ekvaiz （ekvaiz=轭，牛轭）[doxdoengz]
Beix dangq go dancoek （dancoek=单竹）[mij miz "dancoek", dou gangj "duk"]
Dauq heiq nuengx gofaiz （gofaiz=甜竹）[mij miz "gofaiz"]
Hwnz ninz sam ndiu singj （ndiu=醒一次叫ndiu) ["niu" youq dieg gou dwg gangj "lix"]
Raemxda gingj roengz swiz (swiz=枕头）[mij miz]
Rox nuengx gyaez naeuz ndwi （ndwi=hoengq空）[mij miz]
Beix hatcwi cungj siengj （hatcwi=打喷嚏）[mij miz "hatcwi", dou gangj "baenxcwi"]
Lwgraez doengz saj baenq （lwgraez=纱轴；saj=纺车带；baenq=转））[gou mbouj rox "lwgraez" caeuq "saj", "baenq" doxdoengz]
Nuengx siengj daengz cibgaeuj （cibgaeuj=十九）[dou gangj "cibgiuj"]
Mavangh raeuq ronghndwen （mavangh=疯狗）[mij miz "mavangh", dou gangj "maraq"]
Doemq giuz bae dangh raemx （doemq=倒塌）[mij miz ]
Vaq mbaeq mbouj youqgaenj （mbaeq=湿）[mij miz "mbaeq", dou gangj "dumz"]
Songraeuz baek diuz gau （baek=插；gau=竹篙）["baek" doxdoengz; mij miz "gau", dou gangj "saux"]
Dajlamx seiq din mbwn （dajlamx=包揽））[mij miz ]
Ciuq congh bak beixlwnz （beixlwnz=阿哥））[mij miz]
Raemj hoziu cungj naih （hoziu=颈项；naih=奈何？））[mij miz]
Doengxngoenz raeuz menh daeuj （doengxngoenz=白天））[mij miz "doengxngoenz", dou gangj "gyangngoenz"]
Siengj bae laeng mwngz langz （langz=郎，情郎））[mij miz ]
Hongh gvaengh cungj naeuz gyae （honghgvaengh=街巷，小巷））[mij miz ]
Haetneix daeuj mbouj roeb （roeb=碰到））[mij miz]
Gukbeuq caeuq daihcungz （gukbeuq=豹子））[mij miz, dou gangj "duz bauq"]
Ngaiz gyaeng youq daemzraez （daemzraez=长塘））[doxdoengz]
Hojsik hoz yienz gyaez （hoz=心里；yienz=虽然；gyaez=爱，想，爱慕）[mij miz]
Naeuz mwngz aiq mbouj rox （aiq=可能，大概，大约）[mij miz ]
Baez haeuj ranz cix doh （doh=doebhoenx打））[doxdoengz]
Gubgaeg mboujndaej bae （gubgaeg=凹凸不平）[mij miz]
Diemj bogfeiz daeuj ciuq （bogfeiz=火把）[mij miz, "feiz" doxdoengz]
Benz hwnj ngaz bae duengh （duengh=往下拉））[doxdoengz]
Ceij bau naeuz vaj duk （vaj=布，烂布；duk=suk包））["vaj" doxdoengz]
Ngengh yuk beix hozhaenz （ngengh=硬是；yuk=惹，引诱））[doxdoengz]
Seiqvunz ndaej caemh loj （loj=loh?=路））[mij miz "loh", dou cij gangj "roen"]
Daeuj daengz henz raemx ndwn （ndwm=站）[doxdoengz]
Caen doeknaiq lo sou （doeknaiq=气馁，丧气）[mij miz "doeknaiq", dou cij gangj "naiq"]
Lwg gizlawz gwnnya （gwnnya=gwnguk=狼吞虎咽？）[mij miz ]
Caeuq duzbya doxdaeuq （doxdaeuq=相斗）[mij miz "doxdaeuq", dou cij gangj "doxhoenx"]
Raeh gaeuj raeh dwgcaengz （raeh=ciemh=渐渐；dwgcaengz=讨厌）[mij miz ]
Fwng gaem gez lienz ndij （gez=小竹筐；ndij=大竹筐）[mij miz ]
Maih mboujndaej soulouz （maih=就算）[mij miz ]
Cix gaej naeuz baenz camj （camj=惨）[mij miz]
Vunzraeuz dangq roegraeu （roegraeu=斑鸠）[doxdoengz]
Mbouj caih naeuz geqoiq （geq=老；oiq=嫩；geqoiq=老少）["geq" doxdoengz; mij miz "oiq", dou cij gangj "nomj"]
Beix dwen mbwq dwen mbwq （dwen=提起；mbwq=烦闷）["mbwq" doxdoengz]
Lumjbaenz fwj raemh mbwn （lumjbaenz=好象，就象，犹如；raemh=荫蔽）[mij miz ]
Soh gangj dangq dajmaeg （dajmaeg=墨斗打线）[doxdoengz]
Cax faeg cungj mbouj liz （faeg=faenz砍）[doxdoengz]
Vah beix dangq dok ding （dok=锤打，钉钉；ding=钉子）["ding" doxdoengz]
Maenh gvaq rin nanz siuq （nanz=难；siuq=凿）[doxdoengz]
Mbouj dwg caemz saek ciuq （caemz=逗弄，玩耍；saekciuq=一下子）[mij miz]
Hawj nuengx rap naeuz gonz （gonz=挑，挑子的一头）[mij miz]
Duzngieg caeuq duzlungz （duzngieg=鳄鱼，蛟龙）[mij miz]
Doxbungz youq sokdah （sokdah=码头）[mij miz]
Duz mouduenh gwnz bya （mouduenh=野猪）[mij miz]
Dien'yienz mbouj doxgap （doxgap=相合，相交）[doxdoengz]
Gou ndaem duh ndaej gaeu （gaeu=藤）[mij miz, dou gangj "ceux"]
Dap canz do ndaundeiq （canz=栈台；do=在底下等要东西）[mij miz]
Raemxcaep ma dangq gaeq （raemxcaep=冷水）[mij miz, dou gangj "raemxcengx"]
Saeqnaeh di cij baenz （saeqnaeh=细腻，细心）[mij miz]
Aiq suenq baezneix camj （aiq=可能；camj=惨）[mij miz]
Cae boengzmbaeq mbouj roengz （boengzmbaeq=湿泥，烂泥）[doxdoengz]
Nuengx dangq duz moeg'you （moeg'you=木头菩萨）[dou gangj "moeghaeu"]
Cin daengz roeg cix swenj （swenj=鸣叫，喊叫）[mij miz]
Sing rwenz rungh rwenz bya (rwenz=声音震动传播）[mij miz]
Mbungqmbaj dai gwnz caz （mbungqmbaj=蝴蝶）[gou mbouj geiq ndaej lo]
Cix vih va lij lup （lup=合，没开。比如valup,byaeklup)[mij miz]
Yaeuh beix deq youqndwi (deq youqndwi=空等，白等）[mij miz]
Sing gangz sam sing daej （gangz=呻吟）[dou gangj "cangz"]
Biq naeuz ndaej baenzvunz （biq=怎么）[mij miz]
Ndaw ranz dok youzcaq （dok=打，钉钉，这里是榨油）[mij miz]
Lij bae ngah youzlingz （youzlingz=零售的油）[mij miz]
Ok haw lij riuj bingz （riuj=提；bingz=瓶子）[mij miz, dou gangj "ning caen"]
Cuengq byavanx gwn biuz （biuz=浮萍）[mij miz]
Lwgbaz goj hozlaem （hozlaem=后脖颈，后背）[mij miz]
Dauq ngaiz hoqfwngz ding （hoqfwngz=手指关节）[doxdoengz]
Ndwet dangq laz ciengqheiq （ndwet=热闹，喧闹；laz=锣）[mij miz]
Beix simsenz gutgungq （gutgungq=弯曲，蜷缩）[doxdoengz]
Biq rox daengh gou nden （daengh?=daengq=凳子；nden=有东西搁，坐、睡不舒服？）["daengq" doxdoengz; mij miz "nden"]
Cingj bae ranz gou gaeuj （gaeuj=看）[mij miz]
Aeu beix daeuj dingjgaz （dingj=顶；gaz=卡；dingjgaz=顶替，替换）[doxdoengz]
Canj baenz mbiengj Hawlaz （Hawlaz=地名，锣圩）[mij miz]
Fan riep doengzcaez gang （riep=帐子，蚊帐）[mij miz]
Ninz vang naeuz ninz raeh （vang = 横）[doxdoengz]
Dai byajcek guk dawz （byajcek=byajbag=雷劈）[doxdoengz]
Song geu laenz diuz cag （laenz=捻线）[dou gangj "naenj mbaw"]
Go'maenj caeuq go'dauz （go'maenj=李树）[mij miz]
Cin daengz biu nyod'oiq （nyod'oiq=嫩芽）[mij miz]
Gosuenq caeuq gocoeng （gosuenq=go'ho=蒜）[doxdoengz]
Ndaej doengzcaez caemh luengx （luengx=垄，行）[doxdoengz]
Naengh byai cim cungj net （本意是“实”，这里当“onj”，就是稳。）[mij miz; "onj" doxdoengz]
Din doxgvet caez riu （din doxgvet=脚互相踢）[mij miz]
Ndaej caeuq nuengx caez ngeng （ngeng=本意侧身，这里当睡觉）[mij miz]
Gyaez dangq ceiz nemz ndoengj （nemz=粘；ndoengj=簸箕）[doxdoengz]
Vunz doxcanj ndaem gve （gve=gva=西瓜）[mij miz"gve"]
Gyaez dangq ceiz nemz lad （lad=筛子）[doxdoengz]
Doq hamj ceux la cwz （hamj=跨过；ceux=cagceux=牛绳）[doxdoengz]
Maizmingz gwn maksaep （maksaep=没成熟的果，很涩，叫maksaep)[mij miz]
Unqriegrieg dangq coeng (unqriegrieg=软绵绵；coeng=葱）[doxdoengz]
Vaiz biek meh cix mboeng （mboeng=soeng 松，这里指长得茁壮）["mboeng" = 松, ndoengq =茁壮]
Ndaenq duzgaeq neix heuh （ndaenq=haemz=haenq=恨）["haemz" doxdoengz]
Vih goengq bya neix raemh （raemh=荫蔽）[mij miz]
Seiq dip benj roengz gumz（dip=块；benj=木版）[mij miz]
| 欢迎光临 僚人家园 (http://bbs.rauz.net.cn/) | Powered by Discuz! X2.5 |