FWEN CIENZYIENGZ
传扬歌
Liengz Dingzvang cingjleix
梁庭望 整理
http://www.gxun.edu.cn/kamtai/chuanyg1.htm
DAIH’IT BOUHFAENH
1.Fwen goek
Gaem bit sij sawceih (cih) Gangj dauhleix cienzyiengz Naih ngeix guh sawfwen Lwnh gwnzbiengz caez rox Haemh haeuj mbonq ma ninz Gag causim gag heiq Gaem bit sij sawceih Gangj dauhleix cienzyiengz Lajmbwn boux sinhoj Dauhleix yaek rox cienz Naih ngeix guh sawfwen Lwnh gwnzbiengz caez rox 2.Lajmbwn mbouj goengbingz (1) Ndaw bya rin gyonj rin Dieg bingz namh gyonj namh Mbwn yax ndi (mbouj )rox ngvanh (naemj) Namh yax mbouj rox faen Dangco laeb diendeih Faen yienghneix mbouj bingz Ndaw bya rin gyonj rin Dieg bingz namh gyonj namh Ok ndit youh roengz fwn Hawj vunz raeuz souh nanh Mbwn yax ndi rox ngvanh Namh yax mbouj rox faen (2) Neix nienzcingz seiqgyaiq Saedcaih aeu siujsim Cib roek leix yienhsingz Dwk ndaw sim cix geiq Bae gyawz ra goengbingz Mbouj singj rox deng haih Neix nienzcingz seiqgyaiq Saedcaih aeu siujsim Mbouj dingq bouxlaux gangj Lau rox famh bonjsin(bonjndang) Cib roek leix yienhsingz Dwk ndaw sim cix geiq (3) Gungz mbouj dwg mbwn dingh Fouq mbouj dwg mingh gvai Bouxhak bet boux daiz (ram) Gwn geijlai bouxsoh Goengdauh mbouj hawj daez Doxbae raeuz yaek singj Gungz mbouj dwg mbwn dingh Fouq mbouj dwg mingh gvai Ranz de miz gwndaenj Yaeuh naeuz mbwn anbaiz Bouxhak bet boux daiz Gwn geijlai bouxsoh (4) Doengzdoih ma lajmbwn Ndi miz gwn ciengx mingh Seiqgyaiq mbouj goengbingz Bouxgungz rim daihloh Gou gwed fwnz byaij laj Vunz gwih max gvaq gwnz Doengzdoih ma lajmbwn Ndi miz gwn ciengx mingh Gwnzmbwn ndi rox gaeuj Dan vei raeuz beksingq Seiqgyaiq mbouj goengbingz Bouxgungz rim daihloh (5) Namh mbouj naek lumj rin Caengh mbouj bingz lumj daengj Deih mbouj bingz beij raemx Miz giz daemq giz sang Langh ndaej gwnz bouj laj Dapdaj faen cix bingz Namh mbouj naek lumj rin Caengh mbouj bingz lumj daengj Bouxboux naj cix sang Ndi boux gyang daeuj caengh Deih mbouj bingz beij raemx Miz giz daemq giz sang 3.Biengz dou bouxcaizcawj (1) Biengz dou bouxcaizcawj Ranz laeuz sang gvaq bya Miz baenz bak doengh naz Aeu sam baz fugsaeh Bungz dieg bingz rin wenj De gyonj laeb miz saw Biengz dou bouxcaizcawj Ranz laeuz sang gvaq bya Rungh gwnz baq mbouj gaeuq Youh ciemq aeu rungh laj Miz baenz bak doengh naz Aeu sam baz fugsaeh (2) Boux miz cienz miz caiz Yahnaix (yahlaux) dangq duzsien Ciengx hoiqnoz geng dienz (cae naz) Miz haeux cien haeux fanh Ngoenzngoenz siengj simsaeh Lau ngaenzleih mbouj lai Boux miz cienz miz caiz Yahnaix dangq duzsien Ngoenz gwn sam baez laeuj Bouxguen haeujlienlien Ciengx hoiqnoz geng dienz Miz haeux cien haeux fanh (3) Ngeih siengqgoeng (bouxguenjgya)guenj ranz Lumj duzfangz aeu hoenz Ngoenz log (caenh )hoiq roengz doengh Hwet gungq baenz laeng liemz Cang guh hak ndaw haw Cih saw ndi rox gangj Ngeih siengqgoeng guenj ranz Lumj duzfangz aeu hoenz Bouxguenjgya sim naeuh Mbouj hawj raeuz soengyoengz Ngoenz log hoiq roengz doengh Hwet gungq baenz laeng liemz (4) Co naz youh cuengq caiq Ngaenz lai hawj ranzlaeuz Seiqcawq hai bakdou Ranzbouq baenz rongzdoq Hek baihgyae daeuj raen Cingq hozhaenz dahraix Co naz youh cuengq caiq Ngaenz lai hawj ranzlaeuz Ndwen gai cien bik baengz Ngoenz ok bak bouxfou(bouxguhfanq) Seiqcawq hai bakdou Ranzbouq baenz rongzdoq (5) De miz cienz cuengq caiq Leih yied lai yied maez Vunz gai lwg gai maex De mbouj gaeq vunz dai Bouxhoj mbouj miz gwn Ndaw sim gag doeknaiq Boux miz cienz cuengq caiq Leih yied lai yied maez Cuengq caiq lumj duzbing Ndoet gwn lwed vunz caez Vunz gai lwg gai maex De mbouj gaeq vunz dai (6) Ciuhvunz ndei seizheiq Cix cawx reih cawx naz Haeux gaeuq moj baenz bya Gwn maz gwn mbouj sied Ciengx daeuzseng yax baenz Haeux doxaemq miz leih Ciuhvunz ndei seizheiq Cix cawx reih cawx naz Bengz de cix gai liengz(haeux) Cienh de cawx haeujma Haeux gaeuq moj baenz bya Gwn maz gwn mbouj sied (7) Guhlaux youh gwn cienz Ien (iendoj) bet liengx buenq gaen Geij gienh raeuz goj raen Miz sawfaenz guh bauj It youh lau yaxmonz Cai hwnjroengz daeuj cienz Guhlaux youh gwn cienz Ien bet liengx buenq gaen Ngeih goenglaux guhboq(guhgyaj) Dan ndaej lox aeu ngaenz Geij gienh raeuz goj raen Miz sawfaenz guh bauj 4．Gaem yaenq cix bouxguen (1) Danq vunz raeuz beksingq Gaem yaenq cix bouxguen Raeuz ciengx mou ciengx yiengz Vih bouxguen suenq leih Ndi miz reih miz naz Aeu gijmaz ciengx mingh Danq vunz raeuz beksingq Gaem yaenq cix bouxguen Bouxhak gwn bouxhoj De suenqsoq cunj nduen Raeuz ciengx mou ciengx yiengz Vih bouxguen suenq leih （2） Vunz raeuz mbouj roxsingj Dienyah cingq bouxvuengz Cib haj sau rim fuengz Ngaenz cuengq nanz cix naeuh Guh saeh raeuz yaek gaeuj Ciuhlaux naeuz sou dingq Vunz raeuz mbouj rox singj Dienyah cingq bouxvuengz Daiq geijlai bingmax Bauj dienyah seiq fueng Cib haj sau rim fuengz Ngaenz cuengq nanz cix naeuh (3) Guh hak lumz guek an① Gyonj mbouj fanz saek gaiq Gaem yaenq youq cwxcaih Guenj vunz dai rox lix Ngoenz ngvanh gwn cienzleih De goj miz di fanz Guh hak lumz guek an Gyonj mbouj fanz saek gaiq Miz goengcai hwnjroengz Gwn ngaenz rox geijlai Gaem yaenq youq cwxcaih Guenj vunz dai rox lix （4） Guh hak sim mbouj cuk Daezdug siengj dang vuengz② Bet fanh bing guh luenh Muengh gemh sang cix hwnj Ngoenz gyaez naengh gyaez ninz Youh naeuz caengz yiengjfuk Guh hak sim mbouj cuk Daezdug siengj dang vuengz Ciemq dieg miz fouzsoq Yax mbouj goq Bouxcuengh Bet fanh bing guh luenh Muengh gemh sang cix hwnj （5） Sienx（ndei）yak cix miz bauq Ciuhlaux naeuz mbouj ca Ciengj aeu maex bouxbax Mbouj baenzgya dahraix Danh gwq siengj doxbae Goj ndi gyaez doxdauq Sienx yak cix miz bauq Ciuhlaux naeuz mbouj ca Ciengj sau vunz guh maex Lau saek seiz deng gaj Ciengj aeu maex bouxbax Mbouj baenzgya dahraix （6） Caih bouxhak bouxdaeuz Bingh haeuj ndang cix naiq sou gaej guh yak lai Aen dai rox gyaez daeuj Cienz cawx mingh mbouj ndaej Vuengzdaeq yax nanz naeuz Caih bouxhak bouxdaeuz Bingh haeuj ndang cix naiq Ngoenz doek fwn hwnj rumz Mbouj lau mwngz leixhaih Sou gaej guh yak lai Aen dai rox gyaez daeuj ①Guek an couh dwg guekgya bingzan. ②Daezdug sawgun dwg Dizduz, cungj guen mingz ndeu, guenj daengj sengj bingmax, daj Mingzciuz daengz Cingciuz laeb miz. 5.Caez gwed geiz caufanj （1） Dwen daengz raeuz bouxhoj Mbouj rox yienghlawz gwn Guh ndi ndaej ha vunz Haemh haeuj ninz youh hoij（doeknaiq) Miz fwngz ndi miz naz Caux gya ndi miz loh Dwen daengz raeuz bouxhoj Haemh haeuj ninz youh hoij (doeknaiq) Haet gaeq haen cix hwnj Siengj ndang unq baenz mungz Guh ndi ndaej ha vunz Haemh haeuj ninz youh hoij （2） Biengz dou hoj lailai Duznou dai gyangdoengh Yax seizneix mbouj doeng Hab gwn gungz gwn cod（doesksad） Ceng bak guh mienhbeiz（naj） Ndi miz diuz buh vaih Biengz dou hoj lailai Duznou dai gyangdoengh Hoj lai hoz yaek goenq Ndi raen ngoenz soengyoengz Yax seizneix mbouj doeng Hab gwn gungz gwn cod （3） Naj ndaem baenz raemxmaeg Gwn byaek daeuj ciengx mingh Bouxhoj cix causim Bouxmiz gwn mbouj gib Dungx gon unq baenz mungz Ciemz rum hanh doek caeg Naj ndaem baenz raemxmaeg Gwn byaek daeuj ciengx mingh Ndit ndat namh hwnj hoenz Ndi miz ngoenz yiet din Bouxhoj cix causim Bouxmiz gwn mbouj gib （4） Seng daeuj mbouj doengzhoz Guh hoiqnoz aen dungx Naihfanz dawz ma vunh（ngeix） Suenq aen dungx dwgrengz Guh naz gwn mbouj gaeuq Bi youh sou haeuxco Seng daeuj mbouj doengzhoz Guh hoiqnoz aen dungx Eij gorum gohaz Go maz mbouj yungh gwn Naihfanz dawz ma vunh Suenq aen dungx dwgrengz （5） Dinfwngz haenvangvang Nanz cengj baenz bohranz Ndwenngeih gap ndwensam Ndaw ranz cix goenq donq Lwgmaenz ndi miz dumq Reih rum youh yaek ganq Dinfwngz haenvangvang Nanz cengj baenz bohranz Lajmbwn doih bouxhoj Siengj lohloh cungj fanz Ndwenngeih gap ndwensam Ndaw ranz cix goenq donq (6) Raeuz guh ciuh yoengxyaengx① Goj langhdangh byaij roen Bi caux cienz caux ngaenz Goj ndi raen miz yiengh Ciengx duzgaeq duzmou Youh dawz bae coq fangz Raeuz guh ciuh yoengxyaengx Goj langhdangh byaij roen Baenz sam daeuz ngeih cangz Youh gag sanqfaenfaen Bi caux cienz caux ngaenz Goj ndi raen miz yiengh (7) Miz bouxguen hwnjdaeuj Raeuz youh deng guh mbwk Nyaenmeuz cang duzguk Gangj coenz dwg coenz ndei Ranz gwnz ciq gaeq gaj Ranz laj ciq swng haeux Miz bouxguen hwnjdaeuj Raeuz youh deng guh mbwk Lau caux hux haeuj ranz Gag dai ndang guh mbwk Nyaenmeuz cang duzguk Gangj coenz dwg coenz ndei （8） Bouxhoj gangj song conz Cix ndi raen hangzdangh② Diendeih baenz neix gvangq Raeuz mbouj dang boux vunz Ndaej gwn saek vanj souh Gaej cang guh siengqgoeng Bouxhoj gangj song coenz Cix ndi raen hangzdangh Boux mbouj rox dailix Iu bouxmiz guh bang Diendeih baenz neix gvangq Raeuz mbouj dang boux vunz （9） Liengh vunz gaej liengh caenh Lau saek faenh rox ndei Ranz cib yiengh cib meiz（miz） Lij miz seiz feiz ndaep Gag bakcauq gag cawj Gag gaem dawh gag aenq Liengh vunz gaej liengh caenh Lau saek faenh rox ndei Cienz ngaenz rim ndaw cang Lij miz mbangj boihseiz Ranz cib yiengh cib meiz Lij miz seiz feiz ndaep (10) Naeuz gyoengqsou bouxndei Yax gaej vei bouxhoj Bouxboux caez lwg boh Bouxhoj ca duzmaz Raeuz caez ma lajmbwn Bouxlawz nyienh boihseiz Naeuz gyoengqsou bouxndei Yax gaej vei bouxhoj Goemz gyaeuj guh hong gwn Caih gwnzmbwn ciuqgoq Bouxboux caez lwg boh Bouxhoj ca duzmaz (11) Naeuz doengz coeng doengz coj Miz bouxhoj bouxndei Ngvanh mbouj doeng dauhleix Caez gwed geiz caufanj Guk laux gwn haeuj singz Vunz Doengging③ yax ndoj Naeuz doengz coeng doengz coj Miz bouxhoj bouxndei Vunz huk ndi rox siengj Yied cienq yied gwnheiq Ngvanh mbouj doeng dauhleix Caez gwed geiz caufanj ①Yoengxyangx, dwg naeuz mbouj miz gwn mbouj miz daenj, mbouj lumj yiengh bouxvunz. ②Hangzdangh: eiqsei dwg gangj bouxhoj gangj mbouj ndaej vah. ③Doengging dwg Sungciuz gozduh Ben- gingh, neix heuh guh Gaihfungh.
DAIHNGEIH BOUHFAENH 6.Lwg ningq meh cix gyaez (1) Meh dawzvunh (mizndang) gouj ndwen Ndaw sim suen (soemj ) baenz meiq Mbouj rox dai rox leix (lix) Ngoenz gwnheiq causim Haemh ninz gongzlenlen Dwgrengz mbouj ndaej dwen Meh dawzvunh gouj ndwen Ndaw sim suen baenz meiq Lwg lij youq vasan① Boh meh fanz gwnheiq Mbouj rox dai rox leix Ngoenz gwnheiq causim (2) Lwg ningq (iq) meh cix gyaez Gaeqnumh meh cix gyuk Ninz sam ndwen ndaw mbuk Bak cup lwg lingzleih Daengz rim ndwen raen naj Boh gaj mou gaj gaeq Lwg ningq meh cix gyaez Gaeq numh meh cix gyuk Laep lai yawj mbouj raen Diemj daeng coq ndaw rug Ninz sam ndwen ndaw mbuk Bak cup lwg lingzleih (3) Daengz rox ruenz rox naengh Cungj mbouj haengj uq heiz Ganq ndaej song sam bi Giz cug giz goj gyoh Lij ningq meh baek ngaiz Muengh mbwk gvai ndaej baengh Daengz rox ruenz rox naengh Cungj mbouj haengj uq heiz Boh lau ciengx mbouj mbwk Meh lau lwg mbouj ndei Ganq ndaej song sam bi Giz cug giz goj gyoh (4) Bingz bae haw bae rungh Goj ciengz umj lwg oiq Riengz lwg caez guh doih Van baenz oij caeuq dangz Ndi miz goeng miz yah Youh nanz ra vunz rungx Bingz bae haw bae rungh Goj ciengz umj lwg oiq Raen lwg vunz baenz mbauq Youh lau mbouj doxboiq Riengz lwg caez guh doih Van baenz oij caeuq dangz (5) Ndi miz cij ma ciengx Ngaiz ciengz mbouj hawj goenq Daengx rox ruenz rox naengh Boekbinq (fan ndang) youh dwgrengz Ok haw siengj lwg ningq Daeh mbouj bingj cix diengz (dangz) Ndi miz cij ma ciengx Ngaiz ciengz mbouj hawj goenq Caih ruenz raemx ruenz namh Ngoenz vuenh sam bak daenj Daengz rox ruenz rox naengh Boekbinq youh dwgrengz (6) Guenj ngoenz ndit ngoenz fwn Mbouj hawj hwnj hawj roengz Lwg ningq raeuz ndi noengq Cien yiengh doengh simdaeuz Ceng seiqgyaiq hawj lwg Muengh mbwk ndaej baenz vunz Guenj ngoenz ndit ngoenz fwn Mbouj hawj hwnj hawj roengz Meh lau mbouj ha vunz Gyanghwnz cix guh daenj Lwg ningq raeuz ndi noengq Cien yiengh doengh simdaeuz (7) Lwg yaek hung cix ngeix Rox laeng ndei rox vaih Raen geij boux deng gai Siengj gag naiq ma ndang Laux liux deng dangbing Cag gyoet fwngz dawz bae Lwg yaek hung cix ngeix Rox laeng ndei rox vaih Ciengx lwg hung baenz vunz Youh lwnh de hag gvai Raen geij boux deng gai Siengj gag naiq ma ndang ①Seizgonq naeuz lwg caengz doekseng, dwg youq gwnz Bya Vasan caj. 7.Lwg laux rox guh lwg (1) Lwg mehmbwk bouxsai Aen gvai sou yaek geiq Ndi miz naz miz reih Gangj cawjeiq ndi baenz Miz lwg aeu son’gyauq Mbouj caux guh simlai Lwg mehmbwk bouxsai Aen gvai sou yaek geiq Gaej lau ndit lau fwn Miz gwn yax yungzheih Ndi miz naz miz reih Gangj cawjeiq ndi baenz ( 2) Vah beij sang beij daemq Gangj bouxgaenx guhhong Seizneix hoj saek donq Max byom miz ngoenz biz It seiq ma yiengzgan Goj yaek an yienzfaenh Vah beij sang beij daemq Gangj bouxgaenx guhhong Lij ningq gauq boh meh Mbwk le boux gag comz Seizneix hoj saek donq Max byom miz ngoenz biz (3) Lwg laux rox guh lwg Couh dwg swnj gya hung Lwg baihgya fouz yungh Naz rim rungh ce ndwi Raen miz cienz miz reih Lwg cix ndaej yiengj fuk Lwg laux rox guh lwg Couh dwg swnj gya hung Doxsaek de sing sang Caux ranz mbouj vuenyungz Lwg baihgya fouzyungh Naz rim rungh ce ndwi (4) Lwg mbouj dingq boh naeuz Cix vaih gaeu vaih bauj① Lwg luenh ndaej luenh caux Seiqgyaiq lau ndi baenz Lwg luenh ndaej luenh guh Lau caux hux ma raeuz Lwg mbouj dingq boh naeuz Cix vaih gaeu vaih bauj Lwg luenh ndaej luenh hengz Meh goengrengz ndi dauq Lwg luenh ndaej luenh caux Seiqgyaiq lau ndi baenz (5) Son’gyauq doih lwgsai Huk gvai gag rox suenq Raen duzvaiz langhbuengq② Sou gaej luenh bae riengz Raen geijlai bouxbax Lij deng vaq cienzcaiz Son’gyauq doih lwgsai Huk gvai gag rox suenq Lumj iucing hwnj ndang Bouxboux gangj mwngz guengz Raen duzvaiz langhbuengq Sou gaej luenh bae riengz (6) Miuz haeux nda (yaek) haeuj ranz Gaej gwn gonq boiz laeng Caiq saet muenx bonjsaen Ndaw sim raeuz cix luenh Haj loeg nyied fouz dumq Ra vunz ciq haeuxyangz Miuz haeux nda haeuj ranz Gaej gwn gonq boiz laeng Ranz mbouj doeng dauhleix Gya seiq leih yax haengj Caiq saet muenx bonjsaen Ndaw sim raeuz cix luenh (7) Ngoenz gaej youz bae mbanj Raen vanj hoz youh haenz Siengj lox saek can maenz Gvaqlaeng vunz youh gangj Siengj gwn ngaiz gwn noh Haenqrengz goq hongranz Ngoenz gaej youz bae mbanj Raen vanj hoz youh haenz Lumj duzvaiz langhbuengq Rungh cuenh rungh guhcaemz Siengj lox saek can maenz Gvaqlaeng vunz youh gangj (8) Raen geij lwg bouxhoj Aen boq aen gaemgienz③ Danh caeuq max bi rieng Danh caeuq yiengz bi gyaeuj④ Gag guh boux simlai Aen dai goj ndi rox Raen geij lwg bouxhoj Aen boq aen gaemgienz Gwn coq bak laeblaeb Caeuq bouxcaeg doxriengz Danh caeuq max bi rieng Danh caeuq yiengz bi gyaeuj (9) Bouxlawz dungx coengmingz Doeg saw sing gunjoj (nauhnyied) Mbouj lau haemz lau hoj Hag suenq soq rox baenz Daengq sou gak lwgcoz Ndaw hoz yaek roxsingj Bouxlawz dungx coengmingz Doeg saw sing gunjoj Ciuhlaux guh ndi daengz Ciuhlaeng yaek rox yo Mbouj lau haemz lau hoj Hag suenq soq rox baenz ①Neix dwg gawq vahsug, eiqsei dwg mbouj baenz vunz. ②Langhbuengq dwg mbouj guenj, neix dwg naeuz boux vunzvaih. ③Dwg coenz vahsug, dwg gangj guhbyangz. ④Song coenz neix dwg gangj gangj vah mbouj miz maz yungh. 8.Din fwngz caux raemxmboq (1) Ngoenz caeuq namh doxdingj Boux mbouj singj yax nanz Haemh haeuj ma daengz ranz Yaek gag ngvanh coq sim Hai cieng cix dajndaem Hoj haemz gvaq seizcin Ngoenz caeuq namh doxdingj Boux mbouj singj yax nanz Caux miuz ndi ma fwngz Mbouj ndaej gwn cix fanz Haemh haeuj ma daengz ranz Yaek gag ngvanh coq sim (2) Ndwencieng gap ndwenngeih Dau reih liux cix ndaem Miuz doekgonq cix baenz Miuz doeklaeng mbouj sou Cibnyied daengz seizdoeng Haeuj bya ndoeng vuet reih Ndwencieng gap ndwenngeih Dau reih liux cix ndaem Boux giklanx ndi rox Gvaq loh sou cix raen Miuz doekgonq cix baenz Miuz doeklaeng mbouj sou (3) Hawxsij gyau gingcig Ngoenz bae giblimlim Samnyiecd gyau cingmingz Lwgminz yaek caux nyied Cien yiengh boh meh ngeix Gaenx hong seih daih’it Hawxsij gyau gingcig Ngoenz bae giblimlim Doengnienz daengz cietheiq Muengh gyapceij roengz fwn Samnyied gyau cingmingz Lwgminz yaek caux nyieb (4) Boux guh ndaem guh naz De cix caz gohaeux Hongliengz daengz gwnzgyaeuj Ndaem gonq haeux cix baenz Samnyied mbouj caux goek Loegnyied bae lawz ra Boux guh ndaem guh naz De cix caz gohaeux Langh raeuz ndaem doeklaeng Mbouj baenz yienghlawz sou Hongliengz daengz gwnzgyaeuj Ndaem gonq haeux cix baenz (5) Vunz guh raeuz yax guh Gaej siengj youq bienzngeiz Haj loeg nyied dungxgei (dungxiek) Gongz mbouj miz boux gyoh Reih bingz cix ndaem naz Reih bya cix doek duh Vunz guh raeuz yax guh Gaej siengj youq bienzngeiz Ndaem haeux lumj gohaz Ndaej dawz ma dwkfeiz Haj loeg nyied dungxgei Gongz mbouj miz boux gyoh (6) Yinzseiz cix gwn ngaiz Dauz cwz vaiz laj riengh Mauxseiz ranz cij rongh Gvan gonq maex cimh laeng Ndwenngoenz mboj caj vunz Boux hwnj caeux cix gvai Yinzseiz cix gwn ngaiz Dauz cwz vaiz laj riengh Haemh laep cix ma ranz Gaeq haen ganj hwnj romh Mauxseiz ranz cix rongh Gvan gonq maex cimh laeng (7) Cib faen ndi miz naz Haeuj bya bae vet reih Miuz maz yax guh deiq Bonjsaeh gaej ce ndwi Hwnz ngoenz cien yiengh ngeix Yax goj vih daihlaj (daihlaeng) Cib faen ndi miz naz Haeuj bya bae vet reih Ranz haemzhoj daeuj daengz Ndwen caeuq ngoenz goj heiq Miuz maz yax guh deiq Bonjsaeh gaej ce ndwi (8) Reihnaz guh mbouj gaeuq Ce mingh haeuj sanlimz (ndoeng) Hwnz ngoengz gag causim Lax (ra) deiq gwn goj daeuj Guhhong mbouj lau rum Dinfwngz caux gohaeux Reihnaz guh mbouj gaeuq Ce mingh haeuj sanlimz Haeuj ndaw bya bae caux Raemj faex laux aeu bingz Hwnz ngoenz gag causim Lax deiq gwn goj daeuj (9) Dinfwngz caux raemxmboq Boh meh caux raemxrongz① Boux giklanx guh hong Dungx gon ndi boux gyoh Mbouj rox suenq rox baen Ngoenzlaeng liux cix hoj Dinfwngz caux raemxmboq Boh meh caux raemxrongz Raen geij boux mbouj dingq Ranz fanh gim yax gyoeng Boux giklanx guh hong Dungx gon ndi boux gyoh (10) Boux gik hong gaej gyoh Ciengz bae lox vunz aeu Caiq saet muenx gwnz gyaeuj Simdaeuz ndi rox fanz Langh lax ndaej saek maenz Song ngoenz youh cawx noh Boux giklanx gaej gyoh Ciengz bae lox vunz aeu Yied dawzcaiq yied boek Leih goek sang lumj laeuz Caiq saet muenx gwnz gyaeuj Simdaeuz ndi rox fanz (11) Gwn haeux youq gyangdoengh Gaej yungh dam vuenyungz Giklanx reih cix rum Miz gwn ok lawz daeuj Bouxlawz miz gij gwn Lij cingj mwngz daeuj coengh Gwn haeux youq gyangdoengh Gaej yungh dam vuenyungz Ngoenz youq ranz gaxnyax (youq ndwi) Bak goj lax gij gwn Giklanx reih cix rum Miz gwn ok lawz daeuj ①Dinfwngz caux ndaej okdaeuj, lumj raemxmboq mbouj mboek; bohmeh caux cienzcaiz ce hawj raeuz, lumj raemxrongz gvaqbae cix liux, son vunz raeuz yaek gauq cihgeij, mbouj gauq bohmeh. 9.Danq ok lwg dojcienz (1) Danq ok lwg dojcienz Boh dungxliengz hoznyah (hozgaemz) Mbouj naeuz yawj mbouj gvaq Yaek daj youh vanzfwngz Mbouj dingq gangj dingq naeuz Bae caux caeuz caux ien Danq ok lwg dojcienz Boh dungxliengz hoznyah Lij ningq lau mbouj hung Haicieng muengh laebhah Mbouj naeuz yawj mbouj gvaq Yaek daj youh vanzfwngz (2) Lwg dojcienz guhcaeg Boh yaek gat hozlaemz Dawz daengz yaxmonz saemj Ma laeng ra boh meh Lwg iq mbouj son’gyauq Daengz laux ninz ndi ndaek Lwg dojcienz guhcaeg Boh yaek gat hozlaemz Lij iq faex gutgungq Daengz hung yied mbouj baenz Dawz daengz yaxmonz saemj Ma laeng ra boh meh (3) Daengq lwgcoz hauxseng Gaej luenh hengz luenh gauj Guh hong couh baenz bauj Guhcaeg caux ien’gya Mbouj miz haeux gwn byaek Guhcaeg cix mbouj deng Daengq lwgcoz hauxseng Gaej luenh hengz luenh gauj Guh seng’eiq ndaej dem Goengrengz bae cix dauq Guh hong couh baenz bauj Guhcaeg caux ien’gya
(4) Boux sinhoj ranz gungz Gyanghwnz gaej guhcaeg Raen gohaeux go’byaek Gaej bae mbaet duh vunz Ranz raeuz gungz cixbah Caengz bae ra vunz gwn Boux sinhoj ranz gungz Gyanghwnz gaej guhcaeg Ndaej saek di bienzngeiz Deng dawz seih coih naek Raen gohaeux go’byaek Gaej bae mbaet duh vunz
(5) Gyonj doengzdoih bouxhoj Ok loh gaej dam caiz Bingz raen cwz raen vaiz Dam caiz mbouj gvaq ciuh Boux bok gwn vunzlai Ngoenz dai ndi boux gyoh Gyonj doengzdoih bouxhoj Ok loh gaej dam caiz Raen vunz miz ngveih haeux Mwngz haeuj gaej gwn ngaiz Bingz raen cwz raen vaiz Dam caiz mbouj gvaq ciuh (6) Raen doengzdoih bouxsai Vaih haujlai bouxcoz Suenqgeiq gwn bouxsoh Lau vunz rox mbouj yungz Bonjfaenh faen mbouj doh Bokloh ra cienzcaiz Raen doengzdoih bouxsai Vaih haujlai bouxcoz Guhlox vaih liengzsim Haih lwgminz fouzsoq Suenqgeiq gwn bouxsoh Lau vunz rox mbouj yungz (7) Mwngz gvai baenz duzlingz Cix bonjsingq nanz gaij Raen geij dingz leixhaih Lij gauj vaih gyaranz Beij byaleix ndaw daemz Saeng haeuj daengz cix sing① Mwngz gvai baenz duzlingz Cix bonjsingq nanz gaij Daengngoenz ok ronghcang Duzfangz yax lau dai Raen geij dingz leixhaih Lij gauj vaih gyaranz (8) Caen bonjfaenh duh raeuz Fwngz gaem gaeu gaej cuengq Vunz miz fanh miz cien Da mbouj lienh saek baez Gimcien doek baihnaj Gou yax mbouj bae aeu Caen bonjfaenh duh raeuz Fwngz gaem gaeu gaej cuengq Guhdoj vunz cix baeg Guhcaeg vunz cix cienh Vunz miz fanh miz cien Da mbouj lienh saek baez ①Bya dai cix sing, neix dwg gangj dai. 10.Gyau vunz yaek gyau sim (1) Langh lwg lawz rox siengj Ndaw dungx cienqvanvan Bouxhek daeuj daengz ranz Cix mbouj fanz bouxboh Bingz hek gyae hek gyawj Raeuz aeu hawj fuengbienh Langh lwg lawz rox siengj Ndaw dungx cienqvanvan Ok rog gap baengzyoux Boux nyiengh boux cij sang Bouxhek daeuj daengz ranz Cix mbouj fanz bouxboh (2) Lwg gvai dungx mingzbeg Rox nyiengh hek naengh daiz Soengz baihlaeng daek ngaiz Daiz cug daiz goj ganq Laeuj sied cix dwk laeuj Daek haeux cix dem byaek Lwg gvai dungx mingzbeg Rox nyiengh hek naengh daiz Hek haenh miz gya’gyauq Gingqlaux caen hozhaih Soengz baihlaeng daek ngaiz Daiz cug daiz goj ganq (3) Miz duzlwg bouxsai Aen gvai ndi miz faenh Bae caeuq vunz caez naengh Vunz haemq ndi rox han Langh miz hek ma daeuj Cingq rox coux vanj ngaiz Miz duzlwg bouxsai Aen gvai ndi miz faenh Raen bouxgeq ndi dongx Raen beixnuengx ndi daengq Bae caeuq vunz caez naengh Vunz haemq ndi rox han (4) Bae ranz vunz naengh daiz Yaek aeu lai haeujsim Nyiengh bouxlaux naengh gwnz Vunz riuzmingz gvaq mbanj Baengzyoux iu ndoet laeuj Gaej goemz gyaeuj bauz ngaiz Bae ranz vunz naengh daiz Yaek aeu lai haeujsim Ndoet laeuj gaej yungh ngveiz Byaek ndei gaej dam gwn Nyiengh bouxlaux naengh gwnz Vunz riuzmingz gvaq mbanj (5) Gyau vunz yaek gyau sim Naek baenz rin dahraix Yungh saek di cienzcaiz Bouxgvai dungx cix gvangq Ok rog baengh duzmaz Cingzngeih naek gvaq gim Gyau vunz yaek gyau sim Naek baenz rin dahraix Song din byaij doh biengz Boux nyiengh boux cix gvai Yungh saek di cienzcaiz Bouxgvai dungx cix gvangq (6) Yienznaeuz dwg bouxhoj Dawz soh mbouj dawz gaeuz Miz leih cix doxnaeuz Caeuq baengzyoux caez faen Vah gaej gig doengzban Caez doxbang doxgoq Yienznaeuz dwg bouxhoj Dawz soh mbouj dawz gaeuz Ranz mbouj miz cixbah Raemxcaz gingq baengzyoux Miz leih cix doxnaeuz Caeuq baengzyoux caez faen 11.Geiq aencingz duh boh (1) Geiq aencingz duh boh Sinhoj ciengx lwg hung Seizneix sou baenz vunz Yaek hauqswnh boh meh Boh dajgoeng dawzrap Meh mbaet bak haiz hoz Geiq aencingz duh boh Sinhoj ciengx lwg hung Haemz boh dan gyaez baz Cienh baenz ma gutgungq Seizneix sou baenz vunz Yaek hauqswnh boh meh (2) Guhbawx dungx yaek doeng Gaej haemz goeng caeuq yah Lwg laux yaek aeunaj Ndaej baz gaej lumz aen Ciengx lwg hung miznaj Mwngz cix haq hwnjroengz Guhbawx dungx yaek doeng Gaej haemz goeng caeuq yah Yiengz ra meh gwn cij Song hoq gvih gaxnyax Lwg laux yaek aeunaj Ndaej baz gaej lumz aen (3) Miz lwg ndaej swnj ranz Cix mbouj fanz mbouj heiq Geq liux de fugsaeh Engq vuenheij ndaw sim Lwg laux ndaej lawh boh Faex soh ndaej guh hanz Miz lwg ndaej swnj ranz Cix mbouj fanz mbouj heiq Daihlaeng yaek cunghauq Daj ciuhlaux yienghneix Geq liux de fugsaeh Engq vuenheij ndaw sim (4) Ndaej gwn baengh hauxseng Goengrengz caux gyadangq Mbouj gingq mbwn caeuq namh Mbouj lau fangz de yak Raemx ciengz riuz mouj haeu Lwg dingq naeuz cix bengz Ndaej gwn baengh hauxseng Goengrengz caux gyadangq Danh lwg hung baenz lungz Mbouj lau ngoenz daihhanx(dai) Mbouj gingq mbwn caeuq namh Mbouj lau fangz de yak (5) Boh bingh rox ganq bingh Goj ndi nyinh dwgrengz Yied ngoenz bingh yied dem Goengrengz cix roengz namh Haemh ganq mbouj ndaej ninz Ndi ndaej gwn donq imq Boh bingh rox ganq bingh Goj ndi nyinh dwgrengz Cienz ngaenz yungh lwnh bak Gyonj mbouj ged daeuzseng Yied ngoenz bingh yied dem Goengrengz cix roengz namh (6) Meh bingh rox ganq bingh Gaej yungh nyinh goengrengz Langh lwg lumj cukseng Cix sien ceng gyadangq Mbouj lau gyuek lau haeu Danh lau gaeuj mbouj hingz Meh bingh rox ganq bingh Gaej yungh nyinh goengrengz Meh mbouj caengz goenq heiq Sien suenqgeiq doxceng Langh lwg lumj cukseng Cix sien ceng gyadangq (7) Seng lwg mbouj souh gyauq Boh dauq vaih mingzsing Ndaej maex mbouj liengzsim Cix vei cingz boh meh Faex gaeuz goj faex gaeuz Naeuz maz yax mbouj dauq Seng lwg mbouj souh gyauq Boh dauq vaih mingzsing Lij ningq boh meh ciengx Mbwk liux muenz aencingz Ndaej maex mbouj liengzsim Cix vei cingz boh meh (8) Lwg hung ndi rox siengj Lumj ciengx yeingz langh bya Mbouj naeuz cix mbouj ndaq De gag ra ngoenz deuz Dan gyaez maex baenzsau Song laux de mbouj ciengx Lwg laux ndi rox siengj Lumj ciengx yiengz langh bya Caeuq lwg maex gunjoj(nauhnyied) Ce boh meh lingh gya Mbouj naeuz cix mbouj ndaq De gag ra ngoenz deuz 12.Raeuz caez guh mbanjriengh (1) Seizcin yaek ndaem naz Aeu vaiz ma doxcoengh Ranz ndij ranz roengz doengh Doxcoengh bae ndaem gyaj Ciq cwz mbouj lau dai Youngh baez naih duzmaz Seizcin yeak ndaem naz Aeu vaiz ma doxcoengh Gag ranz cix gag goq Ciuh boh yax mbouj coengz Ranz ndij ranz roengz doengh Doxcoengh bae ndaem gyaj (2) Vunz caux miuz guh goek Vaiz coek gaej langhbuengq Caij gomiuz beixuengx Mbanjriengh (ranzmbanj) cix mbouj yungz Gaej hawj yiengz haeuj reih Duz neix mbouj miz boek Vunz caux miuz guh goek Vaiz coek gaej langhbuengq Doihduz haeuj reihnaz Yaepda gwn baenz luengq Caij gomiuz beixnuengx Mbanjriengh cix mbouj yungz (3) Vih duzgaeq duzmou Gaej doxdaeuq doxdaj Guh vunz lumj duzma Dienyah cix riuzmingz Vih gofaex go’byaek Gaej doxdwk doxsaeux Vih duzgaeq duzmou Gaej doxdaeuq doxdaj Raeuz caez guh mbanjriengh Boux nyiengh boux hwnjda Guh vunz lumj duzma Dienyah cix riuzmingz (4) Ngoenz gaej gangjyaya Cunz ranz laj ranz gwnz Baklai mbouj baenz vunz Ngoenz caeuq hwnz aeuqheiq Gaej yoekyau doengzsauh Hawj de caux ien’gya Ngoenz gaej gangjyaya Cunz ranz laj ranz gwnz Langh miz seiz doxdingj Roxsingj nyiengh song coenz Baklai mbouj baenz vunz Ngoenz caeuq hwnz aeuqheiq (5) Vunz miz noh miz laeuj Sou gaej gaeuj dahoengz Raeuz gwn byaek gvaq ngoenz Yax guh vunz doengzdoih Gwn mbanjranz yaek doh Ok loh de cix naeuz Vunz miz noh miz laeuj Sou gaej gaeuj dahoengz Mbouj guh lwg gaujvaq Gag caux ma cix baenz Raeuz gwn byaek gvaq ngoenz Yax guh vunz doengzdoih (6) Dienyah ok iucing Loegcin① de yax naih Mbanjranz lau dahraix Raen de byaij cix deuz Gwn bouxgungz bouxsoh Riuz doh mbanj doh singz Dienyah ok iucing Loegcin de yax naih Lwnh Bouxcuengh Bouxgun Gven dou gwn haeuxngaiz Mbanjranz lau dahraix Raen de byaij cix deuz (7) Lingh singq mbanj doengzgungh Ndaw dungx yaek guh ndei Guh ndaej gwn ndaej bae Yax gaej vei mbanjriengh Lwnh ranz gwnz ranz laj Ngoenz ma goj doxbungz Lingh singq mbanj doengzgungh Ndaw dungx yaek guh ndei Miz saeh cix doxbang Gaej yungh gangj bienzngeiz Guh ndaej gwn ndaej bae Yax gaej vei mbanjriengh ①Loegcin couh dwg beixnuengx caencik. DAIHSAM BOUHFAENH 13.Youh danq daengz mehmbwk (1) Youh danq daengz mehmbwk Bouxhuk dam bienzngeiz Siengj haq doek ranz ndei Biengz nanz miz geij boux Ngaenz ndaek cix caen ngaenz Mbouj dwg doengz caeuq sik Youh danq daengz mehmbwk Bouxhuk dam bienzngeiz Ndei couj song fwngz caux Boux gik lai mbouj miz Siengj haq doek ranz ndei Biengz nanz miz geij boux (2) Yawj yiengh goj baenzsau Naj hau mbouj rox ngeix Ra ndaej doek ranz ndei Va dangqseiz yax haih Nyienh bae guh yahnoix Mbouj aeu boiq doengzsauh Yawj yiengh goj baenzsau Naj hau mbouj rox ngeix Va’ngaeux cap haexvaiz Caen dahraix boihseiz Ra ndaej doek ranz ndei Va dangqseiz yax haih (3) Naeuz sou doengh dahnuengx Yaek gag liengh simdaeuz Vunzsoh sou mbouj aeu Nyienh ra gaeu cug fwngz Bouxgvai dap bouxbax Bae lax vaiz langhbuengq Naeuz sou doengh dahnuengx Yaek gag liengh simdaeuz Ra ndaej lwg guhdoj Haet haemh goj doxdaeuq Vunzsoh sou mbouj aeu Nyienh ra gaeu cug fwngz (4) Sam cib ndi miz gvan Rox fanz geijlai heiq Uengjfeiq ma seiq neix Gag ngeix hoj guh vunz Bae rog raen doengzsaemq Vunz haemq mbouj gyaez han Sam cib ndi miz gvan Rox fanz geijlai heiq Haemh ninz byongh aen congz Mbiengj raeuj mbiengj giet nae Uengjfeiq ma seiq neix Gag ngeix hoj guh vunz (5) Miz lwg haq hawj vunz Ranz de gungz cixbah Gaej lingh dawz bae haq Lau rox lax aen dai Raen giz gwnz giz laj Lwggyax dauq baenz vunz Miz lwg haq hawj vunz Ranz de gungz cixbah Gangj ndaej lwg doengzban Mbouj yungh cam cienzgyaq Gaej lingh dawz bae haq Lau rox lax aen dai (6) Lwg hung bae cauxcin Gaej yiemz binz (hoj) aiq fouq Bingz ranz ndei ranz couj Yax duh sou aencingz Raen geij boux yiemz hoj Gangj lohloh mbouj hingz Lwg hung bae cauxcin Gaej yiemz binz aiq fouq Sai mbwk hab hoenyienz Yaek doxlienz daengz gyaeuj Bingz ranz ndei ranz couj Yax duh sou aencingz (7) Lwg mehmbwk bae haq Yaek bae naj caux ranz Ndaej gwiz ndei guh gvan Van baenz diengz baenz oij Baihndaw rox daemj rok Baihrog rox guh naz Lwg mehmbwk bae haq Yaek bae naj caux ranz Ranz ndei raeuz cix haq Caux gya yax mbouj nanz Ndaej gwiz ndei guh gvan Van baenz diengz baenz oij (8) Dah ndaej daeg lingzleih Vuenheij caux hong ranz Siengj lohloh cix van Gyaez bouxgvan mbouj imq Roeg guh rongz gyang nga Haet haemh ma byai faex Dah ndaej daeg lingzleih Vuenheij caux hong ranz Doxnauh liux cix gvaq Gaej guhnyah bae nanz Siengj lohloh cix van Gyaez bouxgvan mbouj imq (9) Dah ndaej daeg vunzbax Miz gijmaz vuenyungz Siengj lohloh cix gungz Gwn heiq dungx yax imq Gaemh aen mauh yaek bae Daengz gyaeuj lae youh ma Dah ndaej daeg vunzbax Miz gijmaz vuenyungz Duzmeuz caeuq duzma Caemh gya lau doxbungz Siengj lohloh cix gungz Gwn heiq dungx yax imq 14.Boux ndaej maex dungxdoeng (1) Boux ndaej maex dungxdoeng Rox ciengx goeng ciengx yah Riunyumj mbouj guhnyah Coenz vah van baenz dangz Miz coenzhauq coq dungx Rox dawz hwnj dawz roengz Boux ndaej maex dungxdoeng Rox ciengx goeng ciengx yah Langh miz saek coenz gaeuz Doxnaeuz liux cix gvaq Riunyumj mbouj guhnyah Coenz vah van baenz dangz
(2) Maex dungx rongh lumj daeng Ciuq raen laeng raen naj Gizgiz guh ndaej ha Gawq vah dang liengx ngaenz
Caih miz saeh miz maz Gvan baz caez doxyaeng Maex dungx rongh lumj daeng Ciuq raen laeng raen naj Ganq ranz cix ndeindaet Mbouj miz saek di ca Gizgiz guh ndaej ha Gawq vah dang liengx ngaenz (3) Maex dungx gvai rox vunh (siengj) Raen vunz de rox haemq Guh hong youh guh daenj Haet haemh mbouj dam ninz Miz beixnuengx hwnjroengz Ndaw dungx cuenq baenz rumz① Maex dungx gvai rox vunh Raen vunz de rox haemq Haeuj ok rox cangndang Yax mbouj sang mbouj daemq Guh hong youh guh daenj Haet haemh mbouj dam ninz (4) Boux ndaej maex caixhangz Sim’angq caux baenz gya Boux ndaej maex vunzbax Cix lumj ma caeuq meuz Ok doengh rox ndaem gyaj Haeuj ma rox hong ranz Boux ndaej maex caixhangz Sim’angq caux baenz gya Gvan coenz maex youh coenz Ngoenzngoenz rox doxdaj Boux ndaej maex vunzbax Cix lumj ma caeuq meuz (5) Maex gwnboih bouxlaux Itdingh dauq vaih gya Ngoenz mbouj siengj gaiqmaz Cix rox bya caeuq noh Naeuz coenz han song coenz Song ngoenz youh doxnauh Maex gwnboih bouxlaux Itdingh dauq vaih gya Danh bouxgvan roengz doengh Mougoeng de yax gaj Ngoenz mbouj siengj gaiqmaz Cix rox bya caeuq noh (6) Maex lawz gangjyaya Daenj buh vaih vaq baengz Ngoenz lieb mbanj gvaq ngoenz Haet guhcaemz daengz haemh Daenj saek geu buh baengz Fong baihlaeng baihnaj Maex lawz gangjyaya Daenj buh vaih vaq baengz Gvan naeuz youh guhnyah Cix vaih naj vaih ndaeng Ngoenz lieb mbanj gvaq ngoenz Haet guhcaemz daengz haemh (7) De mbouj dwen dozfaiq Cingq leixhaih ninz ngoenz Vunz daemj rok caengcaeng De caengz faen faiqngveih Haet haemh langh okdaeuj Lumj duzbauq ndang raiz De mbouj dwen dozfaiq Cix leixhaih ninz ngoenz Diuz buh sam caengz vaj Diuz vaq sam caengz baengz Vunz daemj rok caengcaeng De caengz faen faiqngveih (8) Cuengq gaiqneix dauq laeng Cix daengq sou mehmbwk Danghnaeuz guh simnduk Lumj duzguk ndaw ndoeng Gaej luenh ceng seiqgyaiq Gaej haengj vaih najndaeng Cuengq gaiqneix dauq laeng Cix daengq sou mihmbwk Gaej guh maex simlai Bouxgvai sim cix cuk Danghnaeuz guh simnduk Lumj duzguk ndaw ndoeng ①Coenz neix dwg gangj boux vunz doeng- heiq. 15.Gou gvan mwngz cix naex (1) Seiqneix ma lajmbwn Hab hoenyienz baez neix Gou gvan mwngz cix maex Gvaq it seiq doxbang Miz vah caez siengliengz Caux maenzcienz rox hwnj Seiqneix ma lajmwn Hab hoenyienz baez neix Boh meh sou caez gingq Lwg ningq sou caez gyaez Gou gvan mwngz cix maex Gvaq it seiq doxbang (2) Gvan baz cungj caixhangz Caux gyaranz gunjdat(hoengh) Lwgrenz bienqbaenz mak Ranz yak bienq ranz ndei Bingz saeh iq saeh hung Doxyaeng cix mbouj fanz Gvan baz cungj caixhangz Caux gyaranz gunjdat Doxgyaez ndi rox gaeuq Mbouj doxdaeuq doxdat Lwgrenz bienqbaenz mak Ranz yak bienq ranz ndei (3) Gyaez haeux cix cunz naz Gyaez baz cix cunz daiq Doxnaeuz caux seiqgyaiq Yahdaiq sim vuenyungz Ma yak cix haeb gaeq Gvan ndei mbouj dub baz Gyaez haeux cix cunz naz Gyaez baz cix cunz daiq Doxbaengh youq lajbiengz Va ciengxlwenx mbouj haih Doxnaeuz caux seiqgyaiq Yahdaiq sim vuenyungz (4) Dah mbouj miz gya’gyauq Ngoenzlaeng dauq simlai Gvan baenz bingh yaek dai De bae maij boux rog Gaeurenz hai sam nga Heux go maz daengz laux Dah mbouj miz gya’gyauq Ngoenzlaeng dauq simlai Vunz mbouj lau saetnaj Cienh baenz max caeuq vaiz Gvan baenz bingh yaek dai De bae maij boux rog (5) Raeuz sij cih sawfaenz Daengq mbanj gwnz mbanj laj Ciuh neix guh gvanbaz Lumj dujva mbouj loenq Hab hoenyienz baenz sueng Seiqneix suenq cingzaen Raeuz sij cih sawfaenz Daengq mbanj gwnz mbanj laj Song raeuz gyaeu bak bi Yaemfouj lij caemh gya Ciuh neix guh gvanbaz Lumj dujva mbouj loenq 16.Guhdoih song bajliuz (1) Guhdoih song bajliuz Caez gangjriu caemh loh Boux dungxdoeng dungxrox Caemh loh cix doxndei Caez caemh vanj gwn byaek Doxsaek cix dauq riu Guhdoih song bajliuz Caez gangjriu caemh loh Caemh ranz cix beixnuengx Yaek doxnyiengh doxgoq Boux dungxdoeng dungxrox Caemh loh cix doxndei (2) Hongloh caez doxnaeuz Gaej doxdaeuq simsuen Dah guh yaek caez suenq Gaej yungh ienq baznangz Gyonj aeu doeng dauhleix Gaej cengheiq roegraeuz① Hongloh caez doxnaeuz Gaej doxdaeuq simsuen Ngoenz caez gangj caez riu Vunz couh riuz bae yienh Dah guh yaek caez suenq Gaej yungh ienq baznangz (3) Bajliuz cingq suenq cin Caez miz cingz miz eiq Guh beixnuengz ranz ndei Cingq seiq neix doxbungz Daeuj naj cix rox naj Yaek gangj vah goengbingz Bajliuz cingq suenq cin Caez miz cingz miz eiq Gyangngoenz caez roengz doengh Gyanghaemh caez dozmae Guh beixnuengx ranz ndei Cingq seiq neix doxbungz (4) Gag boux goq gag gvan Haeuj ranz cix mbit gyaeuj Ndaw cang miz ngveih haeux Loengh daeuj gwn mbouj diemz Lwg gou cix duzlungz Lwg mwngz cix duzdangh Gag boux goq gag gvan Haeuj ranz cix mbit gyaeuj Ngoenz doxceng doxnauh Caux maz yax ndi daeuj Ndaw cang miz ngveih haeux Loengh daeuj gwn mbouj diemz (5) Bajliuz mbouj hab yienz Caux maenz cienz nanz daeuj Beixnuengx mbouj hab haeuj Baengzyoux gaeuq lij ndei Caih najnuengx najbeix Caez hab’eiq siengliengz Bajliuz mbouj hab yienz Caux maenz cienz nanz daeuj Gangj bouxboux doengzsim Namh bienq gim okdaeuj Beixnuengx mbouj hab haeuj Baengzyoux gaeuq lij ndei ①Coenz vah gangj bae youh gangj dauq heuh guh roegraeuz. 17.Cax faenz raemx mbouj goenq (1) Faex laux cix faen nga Gya laux cix faen ranz Faen liux boux gag ganq Gyonj caux ranz gunjdat Miz max cix miz an Miz gvan cix miz baz Faex laux cix faen nga Gya laux cix faen ranz Boh caeuq mwngz caez gya Meh ma gou caemh ranz Faen liux boux gag ganq Gyonj caux ranz gunjdat (2) Faen ranz mbouj caez youq Gag boux gag caux gya Boh faen reih faen naz Gag boux ra ciengx mingh Bajliuz cix doxnyiengh Beixnuengx cix doxgouq Faen ranz mbouj caez youq Gag boux gag caux gya Caez hab’eiq dahraix Gag cunz daiq cunz da Boh faen reih faen naz Gag boux ra ciengx mingh (3) Maex dungx huk saej loet Gangj coenz saek bouxgvan De yaek suenq lingh ranz Vah cix camz coq yah Suenq yienghlawz mbouj doeng Cix naeuz goeng guhcaeg Maex dungx huk saej loet Gangj coenz saek bouxgvan Ranz gwnz gangjyaya Ranz laj gangjcancan De yaek suenq lingh ranz Vah cix camz coq yah (4) Sou faen ranz cixbah Goengyah bouxlawz ciengx Bajliuz yaek doxnyiengh Beixnuengx aeu dawz bingz Aeu gvan mbouj aeu goeng Aeu loengx mbouj aeu yah Sou faen ranz cixbah Goengyah bouxlawz ciengx Cax faenz raemx mbouj goenq Giemq gat hoenz mbouj duenh Bajliuz yaek doxnyiengh Beixnuengx aeu dawz bingz 18.Youh danq daengz guhmaiq (1) Cuengq duenh gwnz dauq laeng Youh danq daengz guhmaiq Youz mehmbwk bouxsai Baenz maiq cix dwgrengz Gag ngeix yiengh laeb yiengh Sim siengj caengz laeb caengz Cuengq duenh gwnz dauq laeng Youh danq daengz guhmaiq Ndaej baenz yah baenz goeng Cix soengyungz dahraix Youz mihmbwk bouxsai Baenz maiq cix dwgrengz (2) Bouxsai raeuz guhmaiq Siengj dahraix yax gungz Miz haeux ndi rox loengh Raen vunz youh gag daej Boux miz cienz miz naz Lingh bae ra yahdaiq Bouxsai raeuz guhmaiq Siengj dahraix yax gungz Gaeqboux rungx gaeqndoq (gaeqgyax) Ndi rox gyuk roengz doengh Miz haeux ndi rox loengh Raen vunz youh gag daej (3) Boux mehmbwk guhmaiq Yax dahraix simliengz Lwg iq caengz rox siengj Niemh daengz gvan youh daej Cietheiq raen vunz gwn Lwg haeb fwngz ndwnj myaiz Boux mehmbwk guhmaiq Yax dahraix simliengz Cawj byaek mbouj gyu youz Lwg mbouj gwn cix ienq Lwg iq caengz rox siengj Niemh daengz gvan youh daej (4) Vunz fouq miz cienzciaiz Maex dai ra yah’iq Souh vei cod ciuh vunz Gag cingj moiz bae ra Bingz aeu ma aeu vaiz Vunz fouq miz cienzcaiz Maex dai ra yah’iq Lwggaet ndi boux ding Lwg ningq ndi boux cij Gyaranz gungz mbouj dij Souh vei cod ciuh vunz (5) Ciuh neix cingq caux hoj Ndi miz loh giuz aen Rungx lwg noix gou baenz Rox dauq raen ha doih It youh siuj aen gwn Ngeih guh vunz souh hoj Ciuh neix cingq caux hoj Ndi miz loh giuz aen Siuj aen gwn cixbah Youh baenz baz dansaen(ndang dog) Rungx lwg noix gou baenz Rox dauq raen ha doih (6) Liengh seiq neix mbouj baenz Loeg cib daengz bae liux Langh nienzgeij lij siuj Cix guhciuh dauq hoiz Gyoh lwggyax sinhoj Yienghyiengh goq ndaej daengz Liengh seiq neix mbouj baenz Loeg cib daengz bae liux Bi doek bi dem laux Lwg baenz mbauq roxyiuj Langh nienzgeij lij siuj Cix guhciuh dauq hoiz (7) Ngoenzneix mbouj baenz ndei Cix it seiq dwgrengz Danh lwg gou baenz bengz Dwgrengz yax mbouj ienq Baengh goengrengz daeuj ciengx Mbouj ienq mbwn caeuq deih Ngoenzneix mbouj baenz ndei Cix it seiq dwgrengz Danh lwg gou baenz vunz Mbouj lwnh bae goengrengz Danh lwg gou baenz bengz Dwgrengz yax mbouj ienq 19.Danq boux guh mehlaeng (1) Danq boux guh mehlaeng Yaek cibfaen daihdungx (daihliengh) Ganq lwg gonq ndaej hung Yax lumj lwg bonjfaenh Langh ngoenzgoenz doxnauh Yax vaih bauj vaih ndang Danq boux guh mehlaeng Yaek cibfaen daihdungx Lwg meh gonq guhgyax Rungx de maj baenz vunz Ganq lwg gonq ndaej hung Yax lumj lwg bonjfaenh (2) Mehlaeng lwg yaek nyiengh Gaej doxmieng doxnaeuz Seiqgyaiq neix duh raeuz Mbouj you hux you nanh Mehlaeng yax meh raeuz Goj yaek aeu ma ciengx Mehlaeng lwg yaek nyiengh Gaej doxmieng doxnaeuz Ciuhlaux daengq yienghneix Sou yaek geiq simdaeuz Seiqgyaiq neix duh raeuz Mbouj you hux you nanh (3) Lwg yax rox guh lwg Vah gaej gig mehlaeng Miz maz saeh caez yaeng Nyiengh song coenz najmeh Gangj vah cix gangj cin Daj ndaw sim raeuz fug Lwg yax rox guh lwg Vah gaej gig mehlaeng Raeuz saet meh cixbah Guh gyax gingq mehlaeng Miz maz saeh caez yaeng Nyiengh song coenz najmeh (4) Daengq doengh boux mehlaeng Gaej haemz lwg mehgaeuq Aeu goengbingz gvaq gyaeuj Mbouj hawj bouxlawz vei Langh miz bya miz noh Aeu itloh caez faen Daengq doengh boux mehlaeng Gaej haemz lwg mehgaeuq Ndaw sim raeuz goj maengx Doxcaengz ok lawz daeuj Aeu goengbingz gvaq gyaeuj Mbouj hawj bouxlawz vei (5) Mehlaeng boh hix laeng Gangj coenz caengz coenz ndaq Langh rox gyoh lwggyax Dienyah cingq riuzmingz Meh gyaez boh yax gyaez Gangj coenz ndei coenz maengx Bohlaeng meh hix laeng Gangj coenz caengz coenz ndaq Ndaw dungx rongh baenz caw De cix dawz ndaej gvaq Langh rox gyoh lwggyax Dienyah cingq riuzmingz (6) Lwggyax cix siliengz Haemh gag ienq gag daej Meh aeu hoz bae gyaez Lwg cix geiq cod ciuh Gaeqndoq caengz miz bwn Gag haeuj rum ra nengz Lwggyax cix siliengz Haemh gag ienq gag daej Soujhauq ndwenngoenz rim Ndaw sim gyoet baenz nae Meh aeu hoz bae gyaez Lwg cix geiq cod ciuh 20.Fwen byai (1) Caux song gawq sawfaenz Ce daihlaeng daihnaj Lwnh bouxgvai bouxbax Sou dawz ma gag nyimz Ciuhgeq byaij daeuj gvaq Coenz vah dangq liengx ngaenz Caux song gawq sawfaenz Ce daihlaeng daihnaj Ciuh vunz gyaeu bak bi Mbouj miz di gangj gyaj Lwnh bouxgvai bouxbax Sou dawz ma gag nyimz (2) Lajmbwn cien diuz loh Miz diuz soh diuz gaeuz Cawjeiq sou gag aeu Geiqmaeuz sou gag ngvanh Seng raeuz ma lajmbwn Yaek guh vunz simsoh Lajmbwn cien diuz loh Miz diuz soh diuz gaeuz Rungh miz sang miz laeg Saeh miz naek miz mbaeu Cawjeiq sou gag aeu Geiqmaeuz sou gag ngvanh *Bonj sawfwen neix Gvangjsih Minzcuz Cuzbanjse 1984 nienz 10 nyied cuzbanj.
Miz vunz naeuz Fwen Cienzyiengz dwg bouh Dauqdwzgingh Bouxcuengh raeuz, gou naeuz it di mbouj loek. Dwg ha, de son raeuz haujlai haujlai dauhleix baenzlawz guh vunzseiq, doeg le hawj vunz ngeixnaemj gig lai gig lai, caen dwg yawj liux ngvanh mbouj sat ha. Coenz vah ndeu:
Ciuhlaux byaij daeuj gvaq ,
Coenz vah dangq liengx gim ;
Dangh mwngz dawz haeuj sim ,
Dij cien gim fanh luij .
Gyoengq beixnuengx doih, gij baujboiq Bouxcuengh raeuz cien'geiz mboujndaej vut ha!!!
| 欢迎光临 僚人家园 (http://bbs.rauz.net.cn/) | Powered by Discuz! X2.5 |