僚人家园

标题: SAWCUENGH SON GOU BAENZ GVAI（壮文教我乖）——罗铁 [打印本页]

作者: 红棉树 时间: 2004-3-18 16:01
标题: SAWCUENGH SON GOU BAENZ GVAI（壮文教我乖）——罗铁
（这原本是作者在壮族在线文学篇里的一个投稿，因主题符合僚人家园相应版块，特此转载——红棉树）壮文教我乖SAWCUENGH SON GOU BAENZ GVAI——罗铁
Gou dajiq maj youq lajmbanj,hoeng souh daengz baihrog yingjyangj,mbanj gou maij gangj vahgun Liujcouh,ndigah gou cix dajiq gvenq gangj vahgun Liujcouh,youq ndaw ranz caemh yienghneix.Danhseih,aenvih bohmeh caeuq daxbuz gou haengj gangj vahcuengh,ndgah gou dingq ndaej rox vahcuengh bonjdieg,cix dwg gangj mbouj sug.Doeklaeng bae hagdangz doegsaw,gangj vahcuengh engq noix lo,gou ca mbouj lai lumz vahcuengh bae lo.
Cuhcungh bizyez le,gou gaujhwnj Gvangjsih Cangvwnz Yozyau,dingq naeuz dwg hag Sawcuengh,gou ndawsim gig mbouj angq.Daeuj daengz henz dah mbouj ndaej mbouj gvaq giuz,vihliux aeu ndaej cingzcik ndei ceng'aeu ciengjyozginh,gou couh gietsim aeu hag ndei sawcuengh,cibfaen roengzrengz bae hag.
Ngeih nenzgiz seiz,gou ndaej yungh sawcuengh daeuj sij faenzcieng lo,caemhcaiq ndaej youq gwnz sam nyied sam banj Sawcuengh fazbiuj dem.Miz ngoenz ndeu, benhcizbu daeuj cujgauj,gou doiq boux benhciz haenx naeuz,daengzcog gou itdingh aeu sawcuengh daeuj sij siujsoz.Vihliux coenz vah neix,gou engq roengzrengz aeu sawcuengh daeuj sij faenzcieng lo.Aenvih gou gaenq loq lumz vahcuengh gvaq, gyahwnj vahcuengh bonjdieg caeuq vahcuengh byauhcunj mbouj daih doxdoengz,sij hwnjdaeuj saedseih nanz,yienghneix gou couh dawz song bonj CANGHAN SWZVEI HANCANG SWZVEI daeuj, ca mbouj lai sij mbouj rim coenz couh aeu caz song bonj saw neix,cig daengz roxnyinh sij deng cij soeng heiq.
Goengfou mbouj vi boux mizsim,faenxcieng gou couh ndaej laebdaeb fazbyauj okdaeuj lo.Daj neix le,gou maij hwnj Sawcuengh lo,sij faenzcieng Sawcuengh hix mizyinx lo,doeklaeng ndaej fazbiuj siujsoz dahraix lo.
Cangyau bizyez le,gou deng faen bae aen siujyoz gungx ndoi ndeu.Aen siujyoz neix mbouj hai sawcuenghban,gou deng bae hwnj hanyijvwnz,gou cix doeknaiq lo.Dangz daih'it gou hwnjdangz gangj bujdunghva,gyoengq lwgnyez dingq le couh riu hwnjdaeuj. Gou cam gyoengqde sou riu gijmaz,miz vunz ndwn hwnjdaeuj han naeuz: Mwngz gangj "buzdungjva" dou ndi rox.Gou dingq le najhoengz liux,mbouj rox de dwg gangj gou gangj bujdunghva mbouj cinj ne roxnaeuz de caen dingq mbouj rox bujdunghva.
Gvaqlaeng,gou siengj hwnj youq yozyau gangj gvaq song'yij gyauyoz,gijfaz gou yungh song cungj vah daeuj sonhag.Yienghneix, yienznaeuz gou son hanyij yijvwnz,gejgangj seiz couh daeg'eiq aeu vahcuengh daeuj gangj,caemhcaiq seiz mbouj seiz aeu Sawcuengh daeuj bang gej dem,gezgoj yaugoj gig ndei.Youq aen siujyoz neix, aenvih gou son aen ban haenx cingzcik gig ndei,caengz rim sam bi,yangh gyauyuzcuj couh diuh gou bae ndaw yangh aen cuhcungh he guh lauxsae.
Song bi neix,iugouz lauxsae aeu gauj hanyij bujdunghva dwngjgiz,aenvih gou hag gvaq Sawcuengh,fatyaem rox faencing gij cihmeh vahcuengh caeuq vahgun miz maz mbouj doengz,gangj hanyij bujdunghva gou couh dingh yaemh ndaej gig cinj,gauj baez daih'it couh doenggvaq lo,doengzdoih gou gig nda'nding gou ndaej hag gvaq Sawcuengh.
Seizneix siengj hwnjdaeuj,danghnaeuz gou mbouj dwg ndaej hag gvaq sawcuengh, ngoenzneix couh nanz ndaej baenzlai cinbu,ndgah gou gamj naeuz dwg Sawcuengh son gou baenz gvai,dwg Sawcuengh hawj gou guh ok cingzcik,gou caensim docih Sawcuengh!

作者: lannie1013 时间: 2004-5-18 21:24
到今天才看这篇文章写得很不错啊！

欢迎光临僚人家园 (http://bbs.rauz.net.cn/)