僚人家园

标题: [原创]路漫文集：壮文的小说 [打印本页]

作者: 路漫 时间: 2010-5-1 22:44
标题: [原创]路漫文集：壮文的小说

“人生七十古来稀”，当今社会上把这句话当做笑谈了，可以说七八十岁的比比皆是了。本人有幸跨进“古来稀”了，想想日后的日子不多了，应该把自己的文字拿出来“晒晒”，让贝侬们当做“文字”撩撩翻翻，也不失它的“价值”了。贝侬们翻过撩过，有什么话要说，尽量提出来，让我在“盖棺”之前有所了解。谢谢！

这是壮文的小说部分——路漫文集：壮文的小说

1 MEHLAUX
    CAEUQ   RANZHAZ DE
Ranzhaz cix ranzhaz
Goj miz va hai hoengh
Dieg rungh cix dieg rungh
Goj miz fungh mbin sang

Ma lajmbwn guh meh
Doek ceh cix siengj va
Ranzhaz cix ranzhaz
Goj miz va hai hoengh

Ciengx lwg muengh lwg gvai
Ciengx vaiz muengh vaiz noengq
Dieg rungh cix dieg rungh
Goj miz fungh mbin sang

Aen gungx rungh neix, dieg mbouj sam cik bingz,mbwn mbouj sam saux gvangq, hoeng cix miz ranz he ok caet boux gunghcwngzswh.
Danhseih, aen ranz neix mbouj dwg ranz sang ranz laeuz, hix mbouj dwg ranz cien ranz vax, dauq dwg aen ranzhaz vaihvad daemqded.Aenvih bi'ndwen haemq raez, rumz dongj fwn rwed, bangx ciengz daz gij naez gyaux reb haenx gaenq loenq doekbyoeg, loh ok rinreq baenz benq, lumjbaenz naeng mou baenz nengz nei, sawj vunz mbouj gamj yawj.
Seizneix, ndaw mbanj ranz cien ranz vax lumj rangzcin nei daengjsabsab, lij miz vunz hwnj laeuzsang dem. Vahsug naeuz, dahsau cibbet, ngoenz lek gvaq ngoenz. Cwngcwz ndei le, aen mbanj ndaw rungh hix lumj dahsau cibbet nei, ngoenz beij ngoenz lengj lo. Hoeng, “aen ranz gunghcwngzswh”lij nyaenx vaih ne, roxnaeuz gyoengq gunghcwngzswh gyonj senj haeuj singz bae, ndek ranz vut fwz ne?
Mbouj dwg bw! Sou yawj, diuz roen doeng bae bakdou ranz gunghcwngzswh haenx lij seuqset wenjyub ne, ndaw hongh makdauz makndae lij mwncup hw, laj gomak baet ndaej dug mbaw mbouj miz, neix dwg ranz fwz ha?
Dwg lo, ndaw ranz neix lij miz vunz. Seizneix boux he ai youq bangx dou, song da cingq muengh gizgyae, de couh dwg bouxcawjranz, daxmeh gyoengq gunghcwngzswh, bi-neix gaenq ndaej bet cib ngeih bi. Aenvih seizneix de henzndang mbouj miz lan buenx, mbouj hab heuh buz dah byawz daeg byawz, vunz cijndei heuh de guh“mehlaux”.
Mehlaux muengh gizgyae, cingq dwg de siengj lwglan ndaw singz de. Mehlaux miz haj daeg song dah. Vah bouxlaux naeuz,“haj daeg song dah, fuk rum fuk da(hung)”, de mingh ndei li! Haj daeg lwgsai de cungj dwg gunghcwngzswh, song dah lwgmbwk hix haq hawj gunghcwngzswh, caemhcaiq youq ndaw cangj dang“guen”dem, gak boux ndwenndwen ciuq seiz geiq hajcib maenz hawj de. Youq ndaw rungh, ndwen ndaej sam bak haj cib maenz, couh dwg gwn dungx dek bae hix gwn mbouj liux. Hajcib mingh gaet, caetcib mingh gyaeu, mehlaux gaenq betcib ngeih bi, ndigah, vunz ndaw mbanj cungj haenh mehlaux mingh fuk mingh ndei.
Danhseih, hix miz vunz gangj vahrwix naeuz, Mehlaux youq ndaw rungj mbouj ndaej umj lan, ndaw vanj mbouj nohbya (youq ndaw gungx rungh,cawz byaekheu le, nohbya gig noix miz gai, miz ngaenz mbouj dieg yungh), lwnh ngoenz souj aen ranzhaz, suenq maz mingh ndei, suenq yiengj maz fuk!
Aen ranzhaz vaihvad hoengqhangq Mehlaux, gungh miz roek nganx, suenq hwnjdaeuj cukgaeuq miz bak haj bingzfuengmaex. Neix dwg Mehlaux caeuq gvande uengjfeiq simgei guh baenz. Dangco, Menhlaux song gvanbaz cungj naemj naeuz, lwg hung le doegsaw、aeubawx、hwnjranz, yienghyiengh aeu causim, mbaet gwn mbaet yungh, guh dai guh laemx, couh vih hwnjranz diuz neix, aenvih sim hung rengz noix, cuk ndaej ciengz mbouj cienz cawx vax,cix ndei goemq haz, engq camj dwg, gvan de vih dwgrengz lai baenz binghnaek caeuxcaeux dai bae!
Ngoenzneix, vunz bae ranz hoengq, Mehlaux roxnyinh gig siliengz.Yienznaeuz, byawz dang bohmeh mbouj muengh lwg baenz fungh baenz lungz, seizneix gyoengq lwg baenz-caiz lo, guh ndaej bae lo, mbin sang bae gyae lo, cix ndek aen ranz hoengq fwzfwd, hai, caen mbouj rox dwg mingh ndei naeuz mingh yak!

Bya sang banngoenz dinj, daengngoenz ngamqngamq raeb bya, ndaw rungh gaenq fuemxfwd lo. Mwhlaux geij duz gaeq raizva haeuj rungz caemrwg lo. Mehlaux gven ndei dou rungz, bongxbongx fwngz, song da ciuqyiengh muengh ok gizgyae. Mbwn mongmod, ndaundeiq caengz raen ok, seiqlengq fuemxfi fuemxfub, yienznaeuz mbouj miz maz ndei-yawj, hoeng Mehlaux rox, laj dinmbwn baihhaenx, miz lwg de lan de ne!
Muengh mbwq le, Mehlaux ma daengz ranzding, diemj rongh dang'youz. Aen daeng-youz neix, aeu faexbug guh gaq, deb guh daengbuenz,mbouj rox yungh gvaq geijlai ciuh, youz iemq hoenz loemh, gaenq ndaem ndaej lumj faexnduk ndaw homq. Geij bi gonq, ndaw rungh miz dienh yungh lo, Mehlaux cawx miz denfunghsan、densigih, couh dwg sij mbouj ndaej vut aen daeng'youz neix. Gyoengq bouxlaux ndaw mbanj naeuz, daj lij iq couh dingqnyi banlaux dwen aen daeng'youz neix lo.
Mehlaux dawz daeng'youz cingqcingq cuengq youq laj ham, sijsijsaeqsaeq ut daeng-gaq seuqsat. Liuxle, cix hai densigih, dawz daengqgeg baij cingjcingjcaezcaez, gag bouxdog sohsoh naengh youq bakdou rug, song da cimyawj douhung. Mehlaux cix mbouj yawj densi! Aen densi dwg vih vunz ndaw mbanj cawx, Mehlaux cij aeu ndaw ranz nauhyied. Seizneix ndaw mbanj haujlai vunz gaenq miz cienz, hoeng cungj dwg rom daeuj hwnjranz, densigih lij mbouj sij cawx.
Cunghyanghdaiz bo“sinhvwnz lenzbo”seiz, gyoengq vunz couh byaij daeuj rubrub, gangj riu sing sang gvaq sing, ndaw ranz Mehlaux couh gok hwnjdaeuj lo.
Gyoengq lwgnyez caenx daengz baihnaj Mehlaux, ringx haeuj rungj de bae, caegcaeg oet gaem makndoi he haeuj daeh Mehlaux bae, yienzhaeuh bae ciengj aeu daengq.
Gyoengq dahsau daeuj le, doxciengj bae hawj Mehlaux raix caz、roi gyaeuj、dub hwet.Gyoengqde lumj youq ranz swhgeij nei, caz、roi youq gyawz cungj sug dangqmaz. Gyoengq lwgmbauq daeuj seiz, cix lumj baizdoih nei ndwn youq henz, doq yawj densi, doq caegcaeg cez da yawj dahsau.
“Gaej dangj daxbuz yawj densi ha!”Gyoengq baj liuz haeuj ranz, cungj angq youq dangnaj bouxcoz cangguh banlaux. Doeklaeng couh hawj Mehlaux“veibau”, ndaw mbanj byawz bae haw doek ngaenz, byawz ciengx gaeq dairaq……
“Daxsauj, gwn caengz?”neix dwg doengzban Mehlaux daeuj.
Seizneix, gyoengq ban'oiq cungj gag nyiegh dieg, sanq bae ra daengq naengh.
Doengzban Mehlaux daeuj cix mbouj dwg aeu yawj densi, dwg siengj buenx Mehlaux gangjgoj hane.
Densi lenzsuzgi hai ciengz lo. Gyoengq lwgnyez hemqyaya. Bouxhung couh hongz couh ndaq.
Boux lwgnyez manz haenx mbouj fug, couh dingj naeuz:“ Densi daxbuz, mbouj gven mwngz guenj!”
Ndaw densi sau mbauq doxcup, lwgnyez couh swenj:“Yawj ha, doxdub hwnjdaeuj lo!”“Mbouj dwg ne, dwg doxhaeb hane!”
Lwgmbauq dingq le cix riuhaha, lwgsau yawj le cix goemq naj riuhwhw.
Mehlaux mbouj yawj densi, hoeng hix gaen riu hwnjdaeuj.
Baenzneix simhai, bihaenx Mehlaux youq Sanghaij hix miz gvaq. Dahseiq de haq bae Sanghaij, lwggwiz giem guenj gilozbu, ciengzciengz daiq Mehlaux bae gizhaenx yawj densi, gyoengq gunghyinz hix nyaenx simhai nauhyied. Couh vih di neix, Mehlaux caen mbouj siengj liz Sanghaij. Danhseih, ranz Dahseiq daiq gaeb, song nganx ranz youq song gvanbaz(gyagoeng gyabuz hix caemh youq), song laeq lwg, gyahwnj Mehlaux, lienz naengh hix caekhaex nem caekhaex! Lwggwiz gej naeuz:“Sanghaij dieg bengz, miz cienz hix nanz hwnjranz li!”Mehlaux naeuz:“Daengz diegcoj dou bae, gaiq reih he hwnj ndaej aen ban-gunghlouz lumj duh sou!”Dahseiq miz heiq naeuz:“Lajmbwn hix gvaiq, ndaet cix ndengj ranz lak, soeng cix ndet ranz fwz!”Mehlaux dingqnyi naeuz“ndek ranz fwz”, heiq dwk bwt yaek fan, ngoenzlaeng couh nauh dai nauh lix dauqma Guengjsae.
Seizneix raen dangqnaj gyoengq vunz angqyangzyangz, ndaw sim doengzyiengh angq-vauvau, ndawsim gag naeuz:“Byawz naeuz gou ndek ranz fwz, neix mbouj hix dwg ndengj ranz lak ha?”
Lenzsuzgi sat le, gaujgau aen dam aen bo ok, gyoengq lwgnyez doxdaeuq guhcaemz, gyoengq bouxcoz cix cez da doxyawj, doxyex gangjriu, boux mbeihung haenx caeg lumh caekhaex dauhsau, dahsau najna haenx couh mbwt boiz daegmbauq, daengx ranz hoengh dwk lumj ndaw haw haemhndaep bae.
Lumj doenghbaez nei, Mehlaux couh dawz aen daehman he okdaeuj, cug boux cug boux fat hawj dangznaed. Gyoengq vunz gwn dangz youh hom youh van, ndaw sim Meh-laux caemh youh hom youh van.

Mbwn hwnz le, gyoengq vunz bouxboux rimhoz yaek dauq ranz, doxriengz caeuq Mehlaux doxbiek.
Vunz bae le, ranz couh caem. Gyang ding daengqgeg luenhlab, ceijdangz、gyaeujien rim dieg, lij miz nyouh lwgnding dem.
Mehlaux menhmenh ndwn hwnjdaeuj, dubdub hwet, couh nyaengq baet ranz. Raen gij riz nyouh, Mehlaux miz di mbouj sij ut. De lij geiq ndaej, cingq dwg mup gij heiq nyouh neix, de rungx ok haj boux gunghcwngzswh! Byawz gamj duenq naeuz, lwgnding raix nyouh youq gyang ding neix daengzcog mbouj baenz gunghcwngzswh ne!
Baet seuq gyang ding le, Mehlaux gven dou ndei, dawz daeng'youz haeuj rug bae. Bonjlaiz, siengj ndat raemx swiqswiq naj, raeujraeuj din, hoeng de saedcaih naet lai lo. Seizneix, daeng-youz fwt yap baez he, duj vadaeng ndeiyawj he bauq okdaeuj.
Mehlaux sim baez diuq, raninz mbouj miz lo.
“A, vadaeng!”Duj vadaeng iqiq neix, sawj Menhlaux ngeix daengz bi'ndwen gyae'gyae haenx.
Loeg caet cib bi gaxgonq, bouxsai caeuq mehmbwk lij lau doxgangj, couh dwg song gvanbaz, doengxngoenz hix lumj vunz najseng nei, mehmbwk cij caeuq mehmbwk gangj vah ndaw sim.
Simjvaz, ciuq baizban dwg lwgbawx, hoeng de caeuq Mehlaux cix lumj cejnuengx. Songde boux he bi'gvaq haq daeuj,boux he bineix haq daengz, doengzcaez guh bawxmoq, couh ciengzseiz doxcomz youq laj daeng'youz guh dajnyib.
“Yo, vadaeng!”Simjva baez raen vadaeng bauq, couh daeuq Mehlaux naeuz:“Haemh neix mwngz yaek miz heij lo!”
Mehlaux mbwnj bak riu, ndaw sim caen muengh mizndang dahraix. Dwg ha, youq seiz-haenx, mehmbwk lawz haq vunz guh bawx, mbouj muengh lai seng geij boux lwg ne.
Gangj daeuj hix lingz, couh youq ndwen haenx, mehlaux couh nywnx couh rueg, doeklaeng caen seng daeglwg haumbop bizbwd ndeu.
Doengz yienghneix gangjriu baenz caen, ca mbouj lai bibi lingz, Mehlaux couh yienghneix seng ndaej haj daeg song dah.
Mehlaux dauq ngeix daengz neix, yawjyawj daeng'youz, yiemhfeiz fwt baez diuq, couh ciemhciemh mumq roengzbae.
Mehlaux baez anj, iet hoz bae yawj ndaw daengbuenz, youz yaek hawq lo!
Mehlaux ndaw sim gag siliengz hwnjdaeuj, raemxda dumzsub, de yaek daej yaek daej.
Feiz daeng yienznaeuz iq, hoeng dauqdaej dawz gij raeuj gij rongh vanq rim daengx ranz.Danhseih, daeng'youz saekseiz youz hawq daeng mon, daengx ranz couh laepfub, gijmaz caiq yawj mbouj raen dem.Vunz daeuj lajmbwn, caemh lumj daeng'youz nei, hix rox mon ne.
Mehlaux daengx ndang hwnj naenggaeq, saenzdigdig bae hawj daeng dem youz.
Feiz daeng youh menhmenh rongh hwnjdaeuj, vuengh hwnjdaeuj,sim Mehlaux youh rox-nyinh raeujrib.
Aen daengbuenz neix lij dwg duh Simjvaz, Mehlaux mbouj rox lumz.
Bihaenx, Daegdaih gauj hwnj daihhag, yaek bae Namzningz haeujhag, Namzningz liz mbanj miz geij bak leix gyae, aeu caeuxcaeux okdou, caeuxcaeux ganj daengz yienhsingz dap ci.Haemh haenx, daeng'youz dem sam baez youz, youh diemj hawq bae sam baez, ndaw bingzyouz caiq ndik mbouj ok youz lo.
“Lwg ha, mwngz couh okbae ba, swnh seizneix daeng lij rongh.”Mehlaux mbouj naihhoz naeuz. De gangj“daeng lij rongh”cix mbouj gangj“daeng yaek ndaep”, coenz laeng mbouj gitleih.
“Cej, mbouj ndaej nw.”Simjvaz bungj vanj youzcaz rimrwd ndeu haeuj ranz.De heuh Mehlaux guh cej, cix mbouj ciuq ban lwg de heuh daxbuz, hoeng Mehlaux angq dingq.
“Gaeq ngamq haen sam, gaenj gijmaz!”Simjvaz naeuz.
Raen Simjvaz dem youz le, youh dawz youz ndaw vanj guenq roengz bingzyouz hoengq bae, raemxda Mehlaux hix lumj youz nei ndik roengzdaeuj.
Vunzmbanj miz caigeih, ndaw ranz miz vunz okdou bae gyae, ranzding mbouj ndaej ndaep daeng,caemhcaiq aeu rongh daengz daengngoenz hwnj, neix dwg hawj boux okdou baihnaj ronghsag. Simjvaz “ndaw laep soengq rongh”, Mehlaux baenzlawz mbouj gamjdoengh ne.
“Daxmeh mwngz hawj gijmaz daiq bae?”Simjvaz bae diemj daehhung Daegdaih. De daj daehhung mbon ok geij aen maenz saz, riuhaha naeuz:“Cej, nohma ndei gwn hix mbouj hwnj daiz laeuj ha!”Gangj le, lumj sajbajheiq nei daj ndaw dox dawz ok seiq aen faengx haeuxyangzcid, oet haeuj daehhung bae,“youq baihnaj doengzhag, gwn gijneix.”youh dawz maenz saz cuengq dauq daehhung,“boih laeng doengzhag, gwn gijneix.”
Gaeq haen gvaq haj sauh lo. Mehlaux rap daehhung byaij gonq, Daegdaih aemq daehsaw riengzlaeng, Simjvaz gingz daeng'youz doeklaeng, doxgaen okdou.
Soengq bae ndaw mbanj boux daih'it daihhagseng,geij bi le baenz ndaw mbanj boux daih'it gunghcwngzswh.
Daegdaih mbatneix bae, yied bae yied gyae, bizyez le faenboiq bae Doengbaek,caemh youq haenx aeuyah baenzranz.
Bihaenx, Daegdaih miz lwg iq, coux Mehlaux bae yawj lan. Yaek bae seiz,vunzmbanj riu naeuz:“Doengbaek nit lai hw, dingq gangj oknyouh ret ndongj baenz nae, guh ndaej bien fad vaiz li.”Mehlaux bae daengz baez roengz hojceh, caen dahraix hw, rumzbaek lumj cax heh naj,dot dangqmaz.Mehlaux youq ndaw rungh seizbienh biq myaiz gvenq lo, youq gwnz gai ciuq biq, Daegdaih naeuz de, de vuengzmuengz aeu daejhaiz bae ut, hoeng myaiz gaenq ndongj baenz gingq, ut dai mbouj bae.Banhaemh, yienznaeuz mbonq miz heiqraeuj, hoeng cueng dou gven dwk gyaemzgywd, hoengheiq mwt ndaej yaek siengj rueg.Mehlaux cix daegbied naemj aen ranzhaz de, ranzhaz yienznaeuz doj, hoeng seizndat liengzsubsub,seiznit raeujrubrub.
Yienghneix, Mehlaux youq Doengbaek couh lumj biengzbeih yaeg raemx, mbouj nanz couh dauq gungx rungh ranzhaz de lo.

作者: 勒丁布壮 时间: 2010-5-2 02:22

Lohmanh lauxsae dwgrengz lo!

Gij faenzcieng neix dwg bauj!

Gyo'mbaiq!

作者: dong126888 时间: 2010-5-2 09:53
goengsae lohmanh,mwngz dwg rengz lo

作者: 路漫 时间: 2010-5-4 22:53
docih gwnzlaeuz beixnuengx!sawcuenh neix gou lij laebdaeb sij ......

作者: 路漫 时间: 2010-5-4 22:57

Vahsug naeuz, bouxlaux ninz noix, bouxoiq ninz raez. Youq ndaw mbanj,Mehlaux ceiq geq, hwnq hix ceiq caeux. Guhhong gvenq le, couh mbouj sij yiet. Mehlaux haetnaengz hwnq le couh byaij haeuj ranz hoengq, neix miz seiq nganx ranz hoengq, yienzbonj dwg bwh hawj lwg aeubawx hane, byawz rox, seizneix daegdaeg lwg doxciengj youq ndaw singz aeuyah, ndet ranz hawj daxmeh haethaet bae baet.

Ranz ing bya hwnj,canz daj byongh bya iet okbae, vunz ndwn youq gwnz canz,lumjbaenz ndaw singz youq gwnz laeuz ngeih cib caengz nei,yawj baihlaj raen yienhsag.

Sawqmwh, bya baihhaenx cauz gijmaz, Mehlaux byaengq da muengh gvaqbae.

O, dwg Daegvaz, lwgdog Simjvaz, aenvih mbouj miz dieg ciengx nonsei, bae byongh bya ciemq aen Gamjvumzvauz,gyaep gyoengq vumzvauz banh rim bangx bya.

“Gyoh lai ho, vumzvauz hix dwg diuz mingh ha!”Mehlaux din daemq din sang buet bae baihhaenx, coenz raez coenz dinj hemq.

“Cej,mingh mbouj doengz mingh ha.”Simjvaz hix youq gyaenx, cingq bungj sam ndoengj non lwg,“mingh hoj cix ndonj gamj, mingh ndei canh dahoengz.”

Simjvaz dwg gangj vahbyonj, gangj vahndat, ndaw vah miz vah.

Geij ngoenz gonq, Daegvaz vih ciengx nonsei, bae“suenq”gvaq ranz Mehlaux.

“Gou geq lo, lij youq ndaej geij nanz?Daengz ngoenz de, haj cik dieg couh gaeuq lo.”Mehlaux dangseiz doiq Daegvaz naeuz,“cijdwg gij ranz neix dwg mingzfaenh gyoengq au mwngz, ndaej hawj gyoengqde ngaekgyaeuj cij hab.Caiq gangj, ndaw ranz lij miz lozyieng goengcoengj……”

“Daxbuz,gaej gangj lo.”Daegvaz dingq yaem rox vah.

Vahsug naeuz: Ningznyienh gai nazgoek,mbouj ndaej yoek ranz coj; vunz bae cien leix gyae, mbouj lei(liz) ndaej lozyeing.

“Vaz, dingq gou gangj.”Mehlaux hix rox Daegvaz hoj ranz dangqmaz.

Dangco, Simjvaz hix miz sam nganx ranz hung, cij miz Daegvaz lwgdog, ranz gaeuq youq raeuh. Byawz rox, Daegvaz aeuyah le, “vadaeng”cix maedmaed bauq,doeklaeng lumj Mehlaux nei, hix seng haj daeg song dah! Seizneix lwg hung gaenq baenz coz, cib boux vunz caenx youq sam nganx ranz, ndaet ndaej ciengz yaek dek.

“Yienghneix ba.”Mehlaux caensim naeuz,“heuh gyoengq lwg mwngz buen gvaqdaeuj, buenx gou guh nauhyied. Yawzyiengh?”

Danhseih,Daegvaz riuriu, youh bibi gyaeuj.

Mehlaux cix lumz lo,vahsug caemh naeuz:Ningznyienh guh gaujvaq,mbouj bae lah vunz youq; ndaw ranz hoj cix hoj, lwg mbouj goq hawj vunz.

Yawj!Mwngz miz leix baenz ndoengj, gou miz leix baenz mboeng.Song mbiengj boux aeu-naj gvaq boux.

Aeunaj cixbah, ceiq lai gag boux goq gag boux, hix daihgya bingzan.Mbouj siengj daengz, Simjvaz ndwnj mbouj roengz gaemz heiq neix:Mehlaux mwngz hix hoj gvaq, gou Simjvaz baenz-lawz daih mwngz?Hoeng,ngoenzneix……

“Saw yied doeg yied huk, guk yied raiz yied doeg.”Simjvaz dauq ranz couh ndaq gyoengq lan ok heiq,gizsaed de dwg ndaq hawj Mehlaux nyi,“ranz bouxwnq dwg naengh gwnz raem duzlungz, gviq lai hw!Ranz raeuz cienh, sou cungj baenz huk,lauxlauxsaedsaed huk youq ranz, ciengx lwg miz lan seng laenj.Gou dai le, ndaej dingq sou ndaej nauhyied.Gaej hag bouxwnq doegsaw gvai haenx, sanq bae gyaegyae bae, dai seiz lienz ngaeuz lan hix mbouj raen!”

Dingqnyi geij coenz vah neix, Mehlaux heiq ndaej sam hwnz sam ngoenz ninz mbouj ndaek, danghnaeuz guh ndaej daengz,de itdingh lienz haemh dawz caet boux lwg de cienzbouh gyaep ma ranz.Mboujgvaq, heiq cix heiq, daengz haemh daengqgeg ciuq baij, densi ciuq hai, cijdwg Mehlaux mbouj caiq naengh dou rug, cix ninz youq gwnz congz.

Daengx mbanj vunz cungj rox:Mehlaux bingh lo.

Haidaeuz song ngoenz, vunz yawj densi lij rimrwd, cix dwg mbouj gamj cuengq sing riu daih sing cauz lo, ciemhciemh, daeuj yawj densi yied ngoenz yied noix lo.

“Mbouj miz vunz daeuj yawj densi ha?”Mehlaux cam Daegvaz.

“Daeuj ha, vunz naengh ndaet ne.”Daxmeh heiq dwk Mehlaux baenz bingh, Daegvaz liengzsim gvaq mbouj bae, cix gangj vahgyaj nai Mehlaux.

“Guh maz baenz caem?”

Daegvaz lienzmuengz senj vahdaez, cam:“Gou daj dienhvah heuh gyoengq au ma baez he?”

“Mbouj!Gou baeg, mbouj dwg bingh.”Mehlaux cang cingsaenz hwnjdaeuj,“couh suenq miz bingh,gyoengqde youh mbouj dwg canghyw.”

“Gyoengq au haujlai bi mbouj ma ranz lo, raenraennaj hix ngamj.”

“Mbouj ndaej!Gyoengqde dwg vunz guekgya, yawz lumj raeuz baenz seizbienh!”

Mehlaux dwg swnhbak gangj, Daegvaz dingq hwnjdaeuj cix coegrwz. De naemjwg mwngz dwg vunz guekgya, gou cix dwg vunz byawz? Gvaiqndaej daxmeh gou vet mwngz, laxlawz mwngz caensim yawj cienh gou!Mwngz miz bingh,“vunz guekgya” mbouj daeuj ciuqgoq mwngz, dauq dwg “vunz ngawz”hab daeuj fugseih mwngz ha!

Haetlaeng, Daegvaz buet bae yienhsing, hawj Daegsam Mehlaux(de youq Namzningz gunghcoz, liz ranz ceiq gyawj) daj dienhvah:“Daxmeh mwngz ndang mbouj ndei, vaiq dauq.”Gangj sat coenz neix, Daegvaz couh ndek dienhvah.

“Vunz guekgya”dauqma dahraix lo, caemhcaiq miz baizciengz“guekgya”, aen ci iq he vifung dangqmaz buet haeuj rungh daeuj, lienz gvaq homq vaiz hix yat gvaqbae, saedcaih daekeiq, raen vaiz、raen mou、raen ma、raen gaeq, cungj geizheih dwk aeu vahgun heuh“didi(nuengx)——”, lumj yawj mbouj hwnj vunz nei cig bongh daengz laj go'nganx bakdou Mehlaux.

Dou ci yaengyaeng hai, Daegsam daenj buh“daehndaij”sien roengz, bawxsam byoem nyungq lumj ruggaeq riengzlaeng, yienzhaeuh umj roengz laeq lwgnyez got cunghfunghciengh he.

Ci iq daeuj ndaw rungh, dwg daj ciuhlaux daeuj baez daih'it. Ndaw mbanj sai mbwk laux coz doxcanj ciuz daeuj, lumjbaenz yawj heiq nei humx ndaet aen ci iq.

Gyoengq vunz doxciengj bae dongx Daegsam, fajfaj naj riunyumnyum, lumj gvaq cieng nyaenx angq.

Gyoengq vunz dauq lumz Mehlaux bae lo, dingqnyi rogdou cauzhuhu, Mehlaux daz haizgieg byaij ok dou daeuj. Dang raen naj dou gyoengq vunz angqyangzyangz seiz, Mehlaux ndaw sim vansisi,diemzdwddwd, bingh hix sikhaek ndei haujlai haujlai lo.

“Meh!”Daegsam cung ok ndaw gyoengq vunz, rex yah yien lwg coh Mehlaux byaij bae.

Mehlaux cij goq ajbak riu, itseiz dawz mbouj dingh cawjeiq, dwg sien caeuq lwg gangjvah, roxnaeuz sien dongx bawx, lij dwg sien bae umj lan. De daiq angq lo, angq ndaej lumj fiz nei.

“Meh, mwngz……”Daegsam ngeiz lo, daxmeh lumjbaenz mbouj miz bingh ha.

“W,w……”Mehlaux lij riu ndaej gangj mbouj baenz vah, de iet song fwngz lumj gaeqmeh aj fwed rungx gaeqlwg nei dawz lwg、bawx、lan rex haeuj ranz bae.

“Meh, gou oknyouh!”Ngamq haeuj ranz, daegniq couh swenjyaya.

Bawxsam yawjyawj Daegsam, eiqsei dwg cam:Veiswnghgenh youq gyawz, gou dwg baez daih'it daeuj ranz mwngz bw.

Daegsam veiznanz lo. De rox, lajmbanj ndaw ranz mbouj miz veiswnghgenh, okhaex oknyouh cungj bae diengzhaex rog ranz……

“Daeuj, hawj daxbuz siq!”Mehlaux riengjret bae umj daeglan ok hongh, myonx vaq roengzdaeuj, duzroeg'iq daegniq couh lienghsiengq youq gyoengq vunz baihnaj.

Gyoengq vunz riu dwk gokhu, nyaenq ndaej daegniq nyouh hix ndup hwnjdaeuj.

Mehlaux nyaenx guh, it dwg gyaez lan, ngeih dwg hawj gyoengq vunz yawjyawj, Mehlaux gou hix miz lan, lij dwg lan sai dem, byawz naeuz gou dwg“buz dog”!

Daegniq daj ndaw rungj Mehlaux ndengj okdaeuj, naep vaq le buet daengz henz ndang Daegsam, vix dingj ranz cam:“Bah, neix dwg ranzhaz douhfouh lwi?”Daegsam bae gvaq Cwngzduh, youq baihnaj Du Fuj Caujdangz ingj gvaq siengq, daeglwg youq ndaw siengq raen gvaq Du Fu Caujdangz.

Gyoengq vunz nyi le riu sisa hwnjdaeuj.

Bawxsam cix ngiengx gyaeuj yawjyawj dingj ranz, meizda baez nyaeuq, ndaw sim naeuz:Geij boux lwg cungj dang gunghcwngzswh lo, meh lij youq cungj ranz vaih neix! Cienz geiq ma guh maz bae lo?

Mehlaux mbouj haeujsim gijneix, dawz daehman okdaeuj angqvauvau hawj gyoengq vun fat dangz. Song naed dangzndongj ndenq hawj daegniq, daihgaiq dangznaed yo daiq nanz lo, gwnz ceijdangz nem miz haujlai“mba”, mbouj rox dwg faenx roxnaeuz dwg mba dangz?

Bawxsam lienzmuengz daj ndaw fwngz daeglwg dued dawz dangznaed,“Daxbuz hawj, gaejbah gwn.”Sikhaek bae hai loengxnaeng, aeu gyaujgwzlizdangz okdaeuj, ndenq hawj lwg:“Bae, hawj daxbuz!”

Mehlaux ciep aeu,raen dangz aeu ceijgim suek, yawj gwnz yawj laj mbouj rox baenzlawz gwn, cijguenj ajbak riu hwhw, riu ndaej beij gwn dangz lij van.

Mehlaux geizheih dwk mbouj miz bingh lo, hoeng bawxsam ndaw sim dauq miz“bingh”ne.

Bawxsam naemj:Caet boux lwg,boux ndwen hajcib maenz, caet haj sam bak haj, haengj-dingh noix mbouj bae.Danhseih,daj haemhneix yawj, Mehlaux ndwen yungh mbouj daengz sam cib haj maenz!

Lumj naeuz, daegniq loengh doek gaiq noh he, de gip hwnjdaeuj aeu bak baez boq, youh cuengq haeuj deb bae,haih ndaej bawxsam caiq mbouj gamj nip deb noh haenx. Daegsam naeuz:“Doek uq lo, gaej aeu dem.”De riuriu naeuz:“Mbouj ngaih,boq baez dangq swiq sam baez.”

Lumj naeuz,ndaw deb byaek gwn liux lo, lw di raemxdang he, de lij aeu raemx daeuj riengx, guh dang ndoet.Daegsam naeuz:“Meh,mwngz yaek gwn dang, caiq cawj ha!”De bibi gyaeuj:“Mbouj dwg siengj gwn raemxdang,cix dwg hojsik ndaw raemx byaek miz youz.”

Lumj naeuz,ndaw ranz gaenq daz miz dienh,cang miz dienhdaeng, hoeng de lij maij diemj aen daeg'youz mumqmumq haenx.Cam de, de gangj hix miz leix:“Yungh dienh sai cienz lai.”

Lumj naeuz,daegniq bae hongh oknyouh, de lienzmuengz hemq:“Daegniq,menh!”Cix gip-muengz bae aeu mboknyouh daeuj, lij son lan naeuz:“Bwnh dwg bauj hane, hawj daxbuz rwed byaek, ndei gvaq cawx vafeiz dwk li.”

Lumj naeuz……

Hai, bawxsam haeuj ranz ngamq geij diemjcung, couh miz baenzlai“lumj naeuz”, caen sawj bawxsam loengh mbouj mingzbeg.

Haemh haenx, bawxsam yaek buenx Mehlaux ninz, leixyouz dwg congz gaeb lai,sam vunz ninz ndaet(lajmbanj congz dwg gaeb di), gizsaed dwg siengj caeuq Mehlaux gangjgoj, damqdamq Mehlaux dawz ngaenz yungh gyawz bae.

Ciuq laehgaeuq, bawx hab buenx gvan ninz, lawz ndei buenx buz ne, hoeng Mehlaux mbouj guhsing, ndaw sim cix van cix raeuj.

Haeuj mbonq seiz, bawxsam rox Mehlaux gig nyen cienz, couh yaek ndaep daeng'youz bae.

“Ae, gaej ndaep daeng!”Mehlaux bae laengz bawxsam, hoeng mbouj gib dem,daeng'youz gaenq lw dug hoenz geuj nyeunyeu lo.

Mehlaux hwnj ndang gaek dawz habfeiz, caiq diemj rongh daeng'youz.

“Rongh dienhdaeng lo, lij diemj daeng'youz, mbouj engq sai cienz ma?”

“Mwngz yungh dienhdaeng,gou yungh daeng'youz mbou sai hane.”

Bawxsam fwt siengj daengz aen vahriu he, mboujyouz gag riu ndaw dungx. Vahriu naeuz, nou haeb mboeng vaih haeujbae caeg haeux gwn,congh nou miz aen hung aen iq,bouxcawj dawz congh iq fung caez,cix mbouj leix congh hung,miz vunz raen le cam vih maz mbouj fung congh hung,bouxcawj han:“Duznou mbouj miz nyaenx hung.”

“Mehlaux caen laux baenz huzdoz la?”Bawxsam ndaw sim engq ngeiz lo.

Bawxsam mbouj ndei caiq gangj gijmaz, cix gag goq aeu meijyungzgauh daeuj cat naj.

“Mwngz?……”Mehlaux sijsaeq cimyawj naj bawx,gag naemj:Aen naj baenz hau baenz oiq,mbouj hwnj nyan hix mbouj baenz caeuz, cat yw guh maz ne?

“Meh,mwngz hix cat di he?”Bawxsam dawz meijyungzgauh ndenq hawj Mehlaux.

Neix dwg bingz iq he,ndang bingz hauseksek,fa bingz hoengzfefe,lij diep mbaw dozveh dahsau gyaeundei dem,youh giuj youh ndeiyawj,caen dwggyaez.

Mehlaux siujsim digdig coux gvaqbae,siujsim digdig hai fa,siujsim digdig coh ndaw bingz yawjyawj、mupmup,“O,hom yaek dai ho!”

“Cang lengj yungh?”Mehlaux siujsim digdig cam.

“Hoh naj, hix suenq cang lengj ba.”Bawxsam han naeuz.

Mehlaux ngaekgyaeuj degdeg,ndawsim gag danqheiq swhgeij dang dahsau seiz mbouj miz gijneix.De dauqdaej nyaenx mbouj ndaej gij heiq hom,iet byai fwngz siujsim digdig yaeg didi he,menhmenh dawz daeuj nu byai ndaeng.

“Meh,hawj mwngz yungh ba,gou dauq Namzningz caiq cawx.”Bawxsam lauxsaed naeuz.

“Mbouj,mbouj!”Mehlaux lumj deng byaengj rad nei,gipmuengz dawz dauq boiz bawx.

Buz bawx caemh gyaeuj ninz roengz,raqraq heiq hom oet haeuj ndaeng daeuj,Mehlaux roxnyinh swhgeij hix oiq haujlai,mboujyouz yied naemj yied gyaeanghnaeuz seizcoz miz gij hom neix,boh Daegsam mbouj maez gou dai cix gvaiq!

“Meh,meijyungzgauh mbouj geijlai ngaenz,gou dauq Namzningz cawx le geiq hawj mwngz.”Bawxsam youh siengj damq Mehlaux caen in cienz roxnaeuz gyaj in,“seizneix doxgaiq bengz lo, danghnaeuz cienz mbouj gaeuq yungh cix gangj bo,dou gibseiz geiq hawj mwngz.”

“Ngw.”Mehlaux hamzhamzhuzhuz w sing he.

Bawxsam baez anj:Nanzdauh miz byawz mbouj ciuqseiz hawj de geiq cienz?Ndigah couh swnh gaeu vet lwgmaenz:“Meh,gyoengq beixnuengx cungj geiq cienz ma ba?”

“Ngo……ngo……”Mehlaux fwt ninz gyaen hwnjdaeuj.

Mbouj rox Mehlaux dwg caen gyaen roxnaeuz gyaj gyaen,fanjcingq caiq cam hix mbouj han lo,bawxsam cijndei laep da ninz.

Haetlaeng,Mehlaux caeuxcaeux couh hwnqcongz.Lau deng ndiu bawx,de lumh laep bae daengz bakcauq cij diemj rongh daeng'youz,nda'nduengq cawj haeuxromh.

Ndaw rungh mbouj miz faenjdan,engq mbouj miz fanden,yaek gwn gijmaz cungj baengh swhgeij gag cawj.Mehlaux bingzseiz boux dog bak ndeu,mbouj haeujsim cawx maz doxgaiq yo yungh.Coeng oiq,ndaw suen miz;gyaeqgaeq,ndaw ringj miz;seizlawz gwn seizlawz aeu;lij miz haeuxsuen moq,beij ndaw singz gai gij haeux haenx unq haj boix,hom cib boix!Haemhlwenz bawxsam gwn seiz couh nyaenx haenh li.

Gwnz cauq souh haeuxsuen goenj lo,heiq hom mbin rim daengx ranz,dawz bawxsam oenq ndiu lo.Bawxsam benz hwnj congz, byaij daeuj daengz bakcauq.

Mehlaux dajcawj coemh haz,sien dawz haz hot guh ndaek,yienzhaeuh cug ndaek cug ndaek ronx haeuj cauq.Gij haz ndaek neix,yawj cix soeng'yoengq,dawz haeuj fwngz cix haemq saed,gej mbouj hai,baeuh mbouj yoengq.Seizneix dwg Mehlaux hot haz,bawxsam dwk feiz.

“Meh,mwngz bouxlaux he gag youq gig mbouj bienh,bae riengz dou youq ba.”

“Mwngz caemh dou gwn,gyoengq beixnuengx geiq cienz hawj mwngz,lij gvi mwngz gag yungh.”Bawxsam youh yaek damq gij cienz Mehlaux.

Mehlaux gamjdoengh lo,ngaem gyaeuj danq gaemz heiq he,gangj vah ndaw sim lo:“Ciengx lwg,couh dwg you saek ngoenz doengh mbouj ning ne.Hoeng meh mbouj miz faenh fukheiq neix!Sou geij beixnuengx,byawz gou mbouj bae riengz gvaq?Cix gvaiq meh mbouj miz vwnzva,vunz ndaw singz gangjvah,gou lumj duzvaiz dingq boq dig,mbouj rox gangj‘de——’lij dwg gangj‘da——’.Mboujguenq byawz cam gou,gou cij rox han‘mij dungj(mbouj rox)’!Caiq gangj,diegcoj diegrungh youq gvenq lo,godaih mwngz dieg Doengbaek haenx,nit ndaej gou rwz yaek loenq.Daegngeih youq Sanhdungh,lwnh ngoenz gwn mienh,haih dwk dungx baenz ngoenz ciengqheiq.Namzningz sou ndat dwk baenz ngoenz dumz hanh.Dahseiq ma,Sanghaij dieg bengz gvaq gim,gyagoeng gyabuz caenx gizndeu,diuqgah dangqmaz.Dahloeg youq Sinhgyangh,gyae daengz dinmbwn bae lo,dai le baenz fangz ra roen dauq hix nanz.Daeghaj youq Yinznanz loq ndei,hoeng bawxhaj……hai,suenq lo,mbouj gangj cixbah.Fanjcingq,meh yaek roengz namh lo,riengz byawz youq,baez yaep da couh bae,oet haeuj feiz bae coemh,dwglau lai!Lij dwg ninz youq lajnamh onjdangq,baenz fangz lij miz ndaeng miz da ha.”

Bawxsam siengj mbouj daengz,cih“cienz”ndeu Mehlaux cungj mbouj dwen,dauq gangj baenz doi vah neix,couh mbouj caiq guhsing dem.

Souh gyaeq cawj ndei lo,mbwn hix rongh lo,ndaw cauq feiz hix ndaep lo.Seizneix,daeng-youz fwt bauq duj vadaeng he.

Mehlaux sim'angq yawjyawj bawxsam,ndaw sim amqamq vuenheij hwnjdaeuj.

“Sou louz lanniq hawj gou,baema Namzningz caiq seng boux lwg he!”Mehlaux dinghdingh dwk yawj aendungx daxbawx,gangj ndaej gig loh.

“Meh,mwngz luenh gangj gijmaz!”Bawxsam hwk dwk yaek laemx.

“Youq ndaw gungx rungh,seng song sam lwg mbouj geiz ne.”Mehlaux cienq naj gvaqbae,vix duj vadaeng naeuz,“Mwngz yawj,lengj lai hw!Gaxgonq gou……lingz raixcaix li!”

Bawxsam dauqdaej dwg banlaeng,youh dwg baez daih'it nem Mehlaux,mbouj ndei caeuq de dingjbak,cix gyaij bak naeuz:“Meh,gou bae yawj daegniq ndiu caengz.”

Gangj coenz neix ngamq sat,daegniq couh diuqyaet diuqyed buet haeuj bakcauq,coemj haeuj rungj bawxsam bae:“Meh,haemhlwenz duznou caeuq gou ninz!”

“A!”Bawxsam hwk dwk diuq hwnjdaeuj.

“Meh,mwngz yawj!”Daegniq dawz fwngz mbon haeuj daehbuh,sam lwgfwng daj congh vaih iet okdaeuj.Laxlawz,aen daehbuh haemhlwenz coux dangznaed Mehlaux hawj haenx,byongh hwnz deng duznou gaet daeh vaih gwn dangz bae lo.

“Meh!”Daegsam hix riengz daengz bakcauq,“ciuq gou naeuz,ranz youq mbouj daengz,hixnaengz gai bae suenq lo.”

“Gijmaz!Mwngz caiq gangj coenz dem!”Mehlaux heiq ndaej yat hwnjdaeuj,vix Daegsam couh ndaq:“Mwngz mbouj bonjsaeh hwnj ranzmoq,lij siengj gai ranzcoj,baihgya!”

Vih dauj ranzhaz hwnj ranzmoq,Mehlaux gaxgonq gaenq gienq gvaq gyoengq lwg ok cienz.Hoeng,gyoengqde cungj bi gyaeuj,sawj Mehlaux gig saetmuengh,couh ndaq gyoengqde“lumz diegcoj”,mbouj“hauqswnh”,mbouj ngeix vih daihlaeng causim,cij goq swhgeij vaiqvued.Daj neix,Mehlaux haeb bak nyinhdingh,baengh lwg hwnj ranzmoq dwg loq fangzhwnz!

“Meh,mwngz yawj mwngz!”Daegsam siengj youq naj yah cangguh bouxsai danggya,naeuz:“Gou caen naemj mbouj doeng,ranz mbouj haengj gai,dauq haengj hawj duznou youq!Vah bouxlaux naeuz,ranzcoj cienz lwgsai,cawqleix gij ranz hoengq haenx,gou miz gienz gangjvah!”

“Ndei ha!mwngz gyonj gai liux bae,gou mbouj dwg meh mwngz,gou bae ndaw gamj youq!”Mehlaux heiqdegdeg byaij ok dou ranz.

作者: 路漫 时间: 2010-5-7 23:49

Byongh bya,ndaw gamj cienz ok sing daej siliengz dangqmaz.

Mok gyuemluemz bak gamj,lumj goemq caengz baengzriep he,engq sawj vunz roxnyinh dwglau.Daengngoenz ndoj ndaw fwjndaem,mbanj bya daegbied yaemywd,lumjbaenz cimq youq ndaw raemxdai nei.

Raemxraiz rwed dumz gavaq Mehlaux,sawj de roxnyinh saenznit,de haenqrengz benz hwnj bak gamj.Bae daengz bak gamj,de aeu genbuh bongx gij mok deuz.

Ndaw gamj miz aen daeng'youz mumqmwt,ciuq ndaej mok engq raen na.Simjvaz maeuq youq gwnz dat,song fwngz got aen gyaeuj byombet de.Genbuh gvangqlangh de cw roengzdaeuj,goemq song cik ga rozred,lumj duzfangz daenj buhraez ndaem nei.

Daegvaz goz hwet,fwngz gvaz bang meh de dub hwet,fwngz swix hawj meh de ut raemxda.

Mehlaux da raen cingz seng,siengj hwnj haxbaenh Daegsam siengsim de,danqheiq naemj naeuz:“Lij dwg lwgdog ndei ha!Lwg gaej aeu lai,lwg lai lwg mbouj gvai!”

“Nuengx ha.”Mehlaux saemxsax byaij haeuj ndaw gamj.

“Daxbuz,menh yamq di ho!”Daegvaz sawqmwh hemq hwnjdaeuj.

Mehlaux fwt dingz din,yawjyawj lajdeih,baenz benq haumomo.Dwg gijmaz?Mehlaux maeuq roengzdaeuj,sijsaeq bae yawjaxlawz dwg nonsei.

Mehlaux menhmenh byaengq da muengh gvaqbae,cib geij aen ndoengj boek neix fan haenx,nonsei lwg haunyonyo rim dieg cungj dwg,lumjbaenz ndaundeiq deihnyaennyaen.Aen loz coux mbaw sangh hix boek lo,mbaw sangh heuswdswd vanq rim geh dat,giz daemq lumj haz heu,giz sang lumj faex loeg,muengh gvaqbae lumjbaenz fuk veh youzva he.

“Gijneix……”Mehlaux mbouj rox ok maz saeh lo.

“Duznou ndoeng dwgcaengz haenx!”Daegvaz hujdengdeng naeuz.

“Banhaemh mbouj miz vunz daeuj souj yawj?”

“Daeuj la.Mbwn buemxsuemj gou baema heuh daxmeh daeuj lawh,couh……”

“Daegvaz,gaej dwen dem.”Simjvaz ndwn hwnjdaeuj,aeu mbengqbuh ut raemxda.

Mehlaux roxnyinh daengz,ndaw gamj mboujdanh laep,caemhcaiq dumz,lauheiq gij mok baenz ngoenz mbouj sanq ndaej bae.Dieg neix duzfangz cij hab youq!Mbouj naeuz ciengx nonsei,couh dwg vunz baenz ngoenz ut youq,ndok lauheiq cungj aeu aemq nduk!

“Daegvaz!”Mehlaux hemq hwnjdaeuj,sing hap ndaw gamj yiengj humhum,“dawz nonsei buen okbae,senj bae ranz gou!”Mehlaux mboujguenj Daegvaz Simjvaz coengz mbouj coengz,gag goz hwet bae baez duz baez duz gip nonsei,cuengq haeuj ndoengj bae.

Nonsei daihgaiq yaek gyaengj lo,duzduz gienj hwnjdaeuj,youq ndaw ndoengj ning hix mbouj ning,lumj naednaed duhhau deng raemx cimq yaek naeuh nei.

“Hojlienz ha,cauxcoih ha,danghnaeuz meh duzde yawjraen……”Mehlaux doq gip dox hongz.

Daegvaz mehlwg mbouj ndaej mbouj riengz bae gip nonsei,hoeng cix mbouj w saek sing.

Gip ndaej daengz cungj gip liux lo,lij miz haujlai doek ndaw geh dat,aeu nga faex diu okdaeuj hix dwg non dai,couh “cangq” gyoengqde youq gizneix ba.

“Lix ndaej gvaqdaeuj lwi?”Mehlaux vix non ndaw ndoengj cam Daegvaz.

Daegvaz mehlwg ngaezngwdngwd yawj haeuj ndoengj,lwgda daengxdwd.

“Hai!”Mehlaux gyangznaek sing he,bid genbuh gvangqlangh de hwnjdaeuj,“sou mbouj buen gou buen!”De goz roengz diuz hwet gaenq loq goz haenx,nda song gen bae umj doi ndoengj daeb baenz cik lai sang haenx……

“Mbouj ha!”Daegvaz gipmuengz byaij gvaqbae.

“Cej!”Simjvaz daj baihlaeng bae got Mehlaux,vah gangj mbouj ok,raemxda sien lae.

Dang Daegsam caeuq yah de vih daxmeh fatheiq deuz okbae boux gvaiq boux seiz,Mehlaux byaij gonq,Daegvaz rap ndoengj non gaenlaeng,Simjvaz riengz laeng,yamq hung byaij haeuj ranz.

“Nonsei baujboiq!”Daegniq raen nonsei hauseksek angq dwk hemqyaya.

Mehlaux umj lan hwnjdaeuj,coh Daegsam minghlingh naeuz:“Mwngz haemhneix ninz ranz ding,aen rug haenx cuengq nonsei!”

Simjvaz veiznanz dwk bengbeng dinbuh Mehlaux,doq rwz naeuz:“Cej,lij dwg……”

“Lij dwg gijmaz?Ranz hoengq ndwi mbouj yungh,dauq hawj duznou……”Mehlaux bonjlaiz siengj aeu vah Daegsam daeuj boizhaemz de,hoeng baez daez daengz duznou,heiq youh hwnj,cix ndwnj vah roengz dungx.

“Daxbuz,cij gvaiq gou mbouj bonjsaeh.Gij non neix mbouj rox lix ndaej dauq geijlai,fanj-cingq mbouj miz cienz cawx non moq dem,ciengx di neix mbouj maz mingzdangz,hixnaengz dawz bae gueng gaeq suenq lo.”Daegvaz veiznanz dangqmaz naeuz.

“O?”Mehlaux ceizngeiz yaep he,couh byaij haeuj rug bae,caemh dawz dou rug haep ndei.

Daihgya boux yawj boux,cai mbouj rox Mehlaux yaek guh maz.

Daegvaz yawjyawj meh de,naeuz:“Meh,suenq luba?”

Simjvaz ngaekngaek gyaeuj,han:“Suenq lu!”

“Suenq,aeu suenq!”Mehlaux fwt gaex dou okdaeuj,ndaw fwngz dawz daeb ngaenz mbaw cib maenz nanwt he,“Daegvaz,gou caeuq mwngz gapfaenh ciengx nonsei,neix dwg cienzbonj gou.Ranz ciengx non couh cuengq youq ranzding,densigih senj bae aen ranz hoengq haenx!”

Daihgya cungj anj liux,itseiz uk cienq mbouj gvaqdaeuj,lumj moegyou nei ngaezngwd,mbouj rox gangj maz ndei.Cijmiz bawxsam song da cim daeb ngaenz ndaw fwngz Mehlaux,ndaw uk yienh'ok aenaen vwnhauoengz gij cienz neix,de dauqdaej lij miz geijlai?

Daegsam yaek baema seiz,Mehlaux daegdeih heuh louz lan roengzdaeuj buenx de,siu lozyieng.Danhseih,Daegsam song gvanbaz mbouj soeng bak saek di couh dwg mbouj coengz.

Mehlaux haemz dangqmaz,ndaw sim ndaq naeuz:Seizneix bancoz mbouj rox gwn deng maz yw, couh rox gaenx doxgot gaet naj,cix dwg gik seng lwg!

Mboujgvaq,Daegsam okdou baema seiz,Mehlaux ciuqyiengh diemj rongh daeg'youz, caemhcaiq rongh daengz daengngoenz veq.

Densigih buen bae ranz hoengq lo,haemhnaengz daeuj yawj densi lij haemq nauhyied.Hoeng Mehlaux mbouj caiq bae baij daengqgeg,mbouj caiq bae fat dangz,mbouj caiq bae baet ranz.Gijneix cienzbouh youz ndaw mbanj bouxcoz lwnz daeuj guh.Nyaemh sou yawj densi nauh dwk ranz lak bae,Mehlaux cix naengh youq ranz ding onjdwt.Cijaeu ndaej dingqnyi vunz daeuj goksad,de couh rimhoz lo.

Ndaw ranzding baij sam rad dangqraez,gwnzde nda ndoengj.Gyaeq nonsei ok youq gwnz ceij,baenz hangz baenz hangz,caezcaezcingjcingj,henjoiq henjoiq yaep migmig,ndeiyawj dangq-maz.Ngoenz he,Daegvaz lwnh Mehlaux:nonlwg did lo.Mehlaux gipmuengz daenj hwnj gingqda,naj yaek daemx bien ndoengj bae,cij raen gwnz ceij raizndaem raizndaem,lij laihnaeuz dwg doek faenx,aeu bak bae boq,caeklaiq heuj vangq,mboujne couh dawz nonlwg boq deuz lo.

Daegvaz aeu bwn bit yaengyaeng dawz nonlwg baet roengz ndoengj moq,Mehlaux lij dwg maz hix mbouj raen,couh laih Daegvaz yaeuh de.Hoeng cij gek ngoenz he,Mehlaux couh fatyienh ndaw ndoengj mbaw sangh vangq lo;caiq gek ngoenz dem,Mehlaux couh yawjraen nonlwg lo.Daj neix,Mehlaux couh heux aenaen ndoengj cienq,nonsei hix ngoenzngoenz raen maj.

Banhaemh,ranzding diemj rongh song canj dienhdaeng,ronghsagsag sawj Mehlaux dalwenq bae.

Haemhhaemh,Daegvaz dem mbaw sangh le couh baema lo.Mehlaux boux dog gag yawj nonsei gwn mbaw sangh.Nonsei gwn seiz aen gyaeuj iq baez ngaek baez ngaek,gwn ndaej feihdauh dangqmaz.Neix lumj gijmaz?Deng lo,doengh bi haenx,lwg youq ndaw rungj ndoet cij,caemh lumj yienghneix!Mehlaux haengj yawj nonsei gwn mbaw sangh,sasasa,gig lumj fwn seiz-cin deihdeih vanq roengz nazgyaj.

Vahsug naeuz,sim'angq ndei gvaq gwn ywbouj.Daj ciengx nonsei le,Mehlaux yienznaeuz mbouj gya yingzyangj,doengxhaemh youh ngauz hwnz,hoeng cingsaenz dauq vuengh hwnjdaeuj,naj hoengzgigi,bungz vunz cungj riunyumnyum.

Nonsei mboujduenj maj hung,mboujduenh faen ndoengj,da yawj yaek aeu hwnj gaq daz sei lo.Ranzding cuengq mbouj roengz,doeklaeng mbouj ndaej mbouj buen bae ranz hoengq.ranz hoengq miz seiq nganx,beij ranz ding gvangq seiq boix.

Densigih youh buen ma ranzding.

Danhseih,Daegvaz miz di mbouj cuengqsim:Ranz hoengq geij cib bi mbouj coih lo,nou youh lai youh guengz,miz saek ngoenz lauheiq……

“Daxbuz,”Daegvaz daez genyi naeuz,“raeuz vuenh dingj ranz ranz hoengq bae,ndei lwi?”

“Cek ranz?……”Mehlaux baez anj,youh gag naemj naeuz:Ranz neix caeux hab hwnj moq lo.Goengcoj louz roengzdaeuj,nanzdauh youq ndaw fwngz gou bienq vaihvad caiq cienz hawj daihlaeng?Danhseih,cienz ne?

“Daegvaz,gaij hwnj sam nganx ranz,aeu yungh geijlai cienz?”

“O……”Daegvaz saedcaih mbouj siengj daengz diemj neix,couh laep da hwnjdaeuj aeu sim daeuj suenq,yaep he naeuz:“Ciengznamh goemq vax,daihgaiq aeu bet cien,ciengzcien goemq vax,mbouj miz fanh haj mbouj baenz.”

“Ngw.”Mehlaux da baez rongh,sikhaek cam:“Raeuz ndaej gai buek sei neix,boux faen ndaej geijlai cienz?”

“Daxbuz!”Daegvaz miz di ndeiriu,couh suenq buek sei neix gai ndaej gyaq sang,ceiq lai cij mbougvaq seiq haj bak maenz,yawz gangj daengz hwnj ranzmoq bae!Yienghneix,de hawj Mehlaux ok cawjeiq:“Yienghneix ndei mbouj ndei,gou siengj banhfap couz cienz,raeuz sien vuenh haz guh vax,caj miz cienz le,caiq hwnj ranzmoq.”

“Mbouj ndaej!”Mehlaux caegcaeg hemq hwnjdaeuj,“ciq cienz hwnj ranz,daengz gou dai bae yaem,yawz miz naj raen cojgoeng!”Hoeng de mbouj dawz coenz vah neix gangj ok bak.De cimyawj naj Daegvaz,ngeiz de ciq cienz vuenh dingj ranz,daengcog couh swnh fwngz yien yiengz ciemq ranz bae,dwglau lai hw!

Mehlaux doeklaeng cij naeuz:“Non yaek hwnj gaq lo,caj sou sei gvaq caiq gangj ba.”

Danhseih,mbwn mbouj youz vunz naemj,nonsei ngamq buen bae ranz hoengq ngoenz daih-seiq,byongh hwnz,raq rumz laux fwn hung he,dawz ranz hoengq dongj fan lo!Faex raek haz nduk lumj bang caeglanh nei,dawz nonsei haumbup bizbod haenx nyoegnyamx ndaej da mbouj gamj yawj……

Mehlaux ninz congz song hwnz song ngoenz.Vunzraeuz nauh mbouj cing de dwg ndatheiq ne roxnaeuz siengsim baenz bingh.Daihgya haeujhaeujokok bae yawj de,de cungj dwg naengh hwnjdaeuj,coenz vah he gyaep vunz deuz:“Gou baeg lai,sou gaej daeuj cauz gou,hawj gou ninz onj di,ndei lwi?”

Haujlai vunz saenq gij vah de lo,hix cuengqsim lo,hoeng ndawsim dauqdaej miz di ndonndet.

“Dwg baeg dahraix li,haujlai haemh mbouj sij ndaej ninz.”

“Bet cib geij bi lo,yawz dingj ndaej ngauz hwnz!”

“Hix gvaiq,ndwenndwen miz cienz geiq ma,beij guekgya ganbu lij onj,de lij doz gijmaz?”

“Cienz duzfangz neix ha,yied miz yied dam,lumj cit ien hwnj yinx nei,vut mingh hix aeu cit!”

……

Cij miz Daegvaz mbouj saenq gij vah Mehlaux,hix ceiq mbouj cuengqsim.De yawj ok najsaek Mehlaux mbouj ndei,cehda miz di myox.Ndigah de yaek hawj Mehlaux cingj canghyw,Mehlaux rox le cix ndaq de donq he:“Mwngz mbouj dwg simndei,mwngz muengh gou dai vaiq di!Mbouj,gou nyengh mbouj dai!Mwngz heiq lwi?Mwngz da'nding lwi?Baema lwnh daxmeh mwngz,cej de mbouj miz bingh,byawz hix mbouj siengj daeuj suenq aen ranz gou!Gij nonsei haenx,gouq ndaej lix cix itdingh aeu ciengx ndei,danghnaeuz caiq noix saek duz,gou mbouj nyiuz mwngz!”

gyoengq vunz cungj mbouj gamj daeuj raen de lo,de youh roxnyinh daebied caem daegbied mbwq,de gig siengj bae yawjyawj nonsei.Dingq Daegvaz naeuz,fwnraq gvaq le,lij gouq ndaej seiq dingz nonsei.Hoeng de mbouj gamj bae.Nonsei ndeigyoh haenx seng roengzdaeuj couh mbouj miz meh.Mehlaux yienznaeuz miz haj daeg song dah,neix cix sanq bae gyaegyae,siengj gyaez gyoengqde hix nanz.Dwg daxmeh mingh yak lai lwi?

Gvaq geij ngoenz,Mehlaux youh lumj doenghbaez ityiengh,youq daengngoenz yaek raeb bya,couh ing bangx dou muengh gizgyae,ndaw sim nam:“Lwglan gou,sou ndei!”liuxle ma daengz ranzding,diemj daeng'youz cuengq youq laj ham,sijsijsaeqsaeq ut gaqdaeng seuqset.Yienzhaeuh,baet seuq ranzding,baij ndei daengqgeg.Doeklaeng cix hai densigih,coux gyoengq vunz daeuj yawj densi gokhumhum.

Lumjbaenz heiq gaeuq dauq ciengq,Mehlaux naengh gwnz daengqgeg,sohsoh hawj dahsau bang roi gyaeuj、dub hwet,ansim dingq vunz gangjgoj.

Danhseih,boux saeqsim haenx fatyienh,Mehlaux riu mbouj beij doenghbaez swhyienz、haisim lo.Lij miz,lenzsuzgi sat boq gvangjgau seiz,de caiq mbouj fat dangz,cij dwg naengh gwnz daengqgeg laep da raninz.

Gyoengq vunz yawj densi sat le,Mehlaux ciengzciengz“cang ninz ndaek”mbouj ndiu.Gyoengq vunz hix mbouj nyienh gauz ndiu de,cix sien baet ranz seuq cingj doxgaiq ndei bae,cij heuh ndiu de,rex de hwnj congz ninz.Mehlaux hix lumj boux lwgnyez dingqvah nei,lauxlaux-saedsaed haeuj mbonq,naeuz coenz he“sou ndei byaij”,couh laep da ninz faenh de.Yienghneix,daihgya couh yaemjdin byaij ok rug,ndaep dienhdaeng(ciengeiz gaej ndaep daeng'youz),okdou dawz dou haep ndei.

Doeklaeng,Mehlaux“cang ninz”yied ngoenz yied raez lo,haujlai vunz roxnyinh Mehlaux yaek miz maz lo,hoeng cix mbouj gamj gangj ok bak,engq mbouj gamj cam de,cungj lau de vet vunz.

Ngoenz he,Cunghyangh Densidaiz“sinhvwnz lenzbo”daengz lo,densigih Mehlaux lij caemrwg,ndaw ranzding de lij laepngauq!

Daengx mbanj vunz cungj simgaep hwnjdaeuj,gipmuengz bae heuh Daegvaz.

Daegvaz byaij gonq,cungqvunz riengzlaeng,mbaet sing mbaet heiq byaij haeuj rug Mehlaux.

Mehlaux sohsoh ninz dwk,cij miz aen daeng'youz mumqmumq le gulingzlingz buenx de.

“Daxbuz!”Dagvaz coemj gvaqbae,gvih roengzdaeuj bae rop fwngz de.

“Dwg Daegvaz ha?”Mehlaux menhmenh hai da,“gou cingq yaek raen mwngz.”

Cungqvunz doengzcaez rau gaemz heiq raezraez he.

“Mwngz bouxlaux……”Daegvaz utut raemxda.

“Gaej……”Mehlaux dwgrengz dwk fonj ndang,dwgrengz dwk veq gyaeuj gvaqdaeuj,yaek siengj dawz gyaeujswiz beng ok.

“Mwngz ndeindei ninz.”Daegvaz iet song fwngz bae rex de.

Gyaeuj Mehlaux youh daenz roengz gyaeujswiz,de rau gaemz heiq he,daengq Daegvaz naeuz:“Dingq gou naeuz,dawz swiz gou beng okbae!”

Yawjraen Daegvaz dawz swiz diem okbae,gwnz naj Mehlaux loh ok rizriu,de naiqnieg naeuz:“Ndawde,fanh caet maenz,mwngz bang gou……hwnj ranzmoq.Mbouj gaeuq,cix hwnj haj nganx gonq,ce roengz……aen rug dog neix duh gou.”

“Daxbuz!”Daegvaz itseiz mbouj rox baenzlawz gangj ndei.Aen swiz youq ndaw fwngz,Daegvaz roxnyinh ndawde yo miz ngaenz,miz mbaw hung mbaw iq,miz ngaenz gak ngaenz faen,mbouj rox rom ndaej geijlai bi lo.Daegvaz mbouj nyaenxsim dawz gij cienz neix,caiq gangj,Mehlaux boux dog he,hwnj baenzlai ranzmoq guh maz……

“Lij miz……”Mehlaux youh naeuz,“ranzmoq hwnj ndei le……gaej lumz……an ndei lozyieng……daeng'youz……densi、aeu……ciengz hai……”

“Cej!”Simjvaz mbouj rox seizlawz daeuj daengz,de caenx gvaqbae,gaemq ndaet fwngz Mehlaux,“mwngz gaej doeng siengj sae ngeix!”

“Nuengx ha,”Mehlaux hix gaem ndaet fwngz Simjvaz,“gou mbouj miz gijmaz……louz hawj gyoengq lan mwngz,gai sei ndaej cienz……couh hawj gyoengqde……”

“Gaej gangj gijneix!Mwngz ndeindei ciengx ndang,ngoenzcog daj dienhvah heuh ausam ma.”

“Mbouj lo.Gou haj daeg……song dah,couh de boux ndeu……ndaej ma……”raemxda daj gok da Mehlaux ringx roengzdaeuj,“gouz sou……ranzmoq itdingh……hwnj ndei,mbaw doek goek faex,daengcog……gyoengq lwglan gou……cungj aeu ma……ranzcoj……”

Daengx rug vunz ndaw sim baez saenq,lumj miz ndaek rinnaek he dimz youq ndaw aek, haujlai vunz doek raemxda lo,ngaem gyaeuj daejfwtfwt.

“Hawj gou……diemj rongh……daeng'youz.”Mehlaux song da fwt fat rongh,gingz fwngz vix aen daeng'youz mumqmumq haenx,“youz……dem youz!”

Daegvaz aeu huzyouz daeuj,dem youz haeuj daengbuenz.Feiz daeng menhmenh swng hwnjdaeuj,rongh hwnjdaeuj,ciuq rongh naj Mehlaux,ciuq rongh naj cungqvunz.

Sawqmwh,yiemhfeiz“fub”baez ndeu,duj vadaeng hoengzgigi he bauq okdaeuj.

Mehlaux yawjraen vadaeng,aen naj riunyumnyum.Yienzhaeuh,song da menhmenh laep.Sawqmwh,cik fwngz vix daeng'youz haenx fwt unqrieg duiq roengzdaeuj!

“Daxbuz!”“Cej!”“Naihnaih!”……Cungqvunz sim baez saenq caezsing swenj hwnjdaeuj!

Mehlaux mbouj han,caemhcaiq ciengxlwenx mbouj rox han lo.

Gwnz naj Mehlaux gij riz riu gingyenz mbouj siu bae……