韦国清上将主政广西二十年
Vah Bouxbien: 2013 nienz dwg lwg ndei Bouxcuengh、banlaux vuzcanjgaihgiz gwzminggyah、 boux sangcieng hai guek Veiz Gozcingh dungzci doekseng 100 hopbi, daengz seizhaenx, Baekging caeuq Guengjsae yaek gawjhengz mizgven geiqniemh hozdung, doenggvaq gij hozdung neix daeuj sawj vunz ciuhlaeng geiq ndaej gij goenglauz banlaux vuzcanjgaihgiz gwzminggyah, rox gij cingsaenz caeuq cienzgeiz ginglig boux cienglingj hai guek neix, gujvuj vunzlai engq ndei bae guh gij hong swhgeij, nyinhcaen hagsib ciuhgeq gwzming cingsaenz, vih guekgya vih bouxminz guh ok gung’yen engq hung. Vihliux boiqhab hengzguh gij hozdung neix, yungh lai cungj lai yiengh hingzsik daeuj senhconz Veiz Gozcingh cienghginh gij swciz haenx, caenh gij ligliengh swhgeij bae guh mizgven senhconz gunghcoz. Dou daeg’iu bouxhoiz dawz 《Veiz Gozcingh Sangcieng Cawjguenj Guengjsae Ngeihcib Bi》(Hoz Saubangj sij, Ranzoksaw Vwnzyen Cunghyangh oksaw) hoiz baenz Sawcuengh, Daj geiz neix hwnj, youq bonjbauq lienzdaeng. Angqcoux gyoengq beixnuengx yawjdoeg le daez ok gij yigen dijbauj.
1、Boux Swngjcangj Caengz Hwnjnyaemh
Bi 1955 ndwen 2, youq Baez Hoih Daihngeih Hoihhung Daibyauj Bouxminz Gaiq Daih’it Sengj Guengjsae cangyienz gwnzde, 450 boux daibyauj bouxminz gak minzcuz gak gaihcwngz daj daengx sengj gak dieg daeuj daengz haenx, ciuq daih’it bouh Fapmeh Cunghvaz Bouxminz Gunghozgoz, cingqsik senj ok daih’it boux swngjcangj Sengj Guengjsae.
De couhdwg bouxcieng okmingz Cunghgoz Bouxminz Gaijfangginh Veiz Gozcingh.
Seizde, dingzlai bouxdaibyauj bouxminz cungj caengz raen gvaq Veiz Gozcingh, hoeng cungj sug aen coh boux neix.
Youq bi 1954 ndwen 8 seizde, gyoengq daibyauj bouxminz ngeixyaeng senj ok doengh boux vunz daibyauj bae camgya Baez Hoihhung Daengxguek Gaiq Daih’it seiz, couh miz mingzcoh Veiz Gozcingh.
Aen cujsizdonz hoihhung gaisau naeuz, de dwg bouxcieng daj Yienh Doenglanz byaij okbae ndeu, hoenxciengq goenglauz gig daih, seizneix nyaemh boux fuswhling gungh’anh budui.
Baez hoih neix, ciuq cunghyangh doigawj caeuq aen cujsizdonz hoihhung daezmingz, doengh boux daibyauj bouxminz ginggvaq cungfaen yaenglwnh, doeklaeng caez senj de guh boux swngjcangj.
Mboujgvaq, Veiz Gozcingh mbouj bae camgya baez hoih neix. Gvaqlaeng bi lai seizgan ndaw de, de caemh mbouj youq Guengjsae lohnaj.
Boux swngjcangj neix vihmaz baenzlai nanz mbouj caengz daeuj hwnjnyaemh ne? Ganbu caeuq ginzcung Guengjsae mienx mbouj ndaej miz di ngeizvaeg lo.
Vunzlai baelawz rox, Cunghvaz Bouxminz Gunghozgoz ngamq laebbaenz mbouj geij nanz, Cunghgung Cunghyangh caeuq Mauz Cwzdungh cujsiz cix dak Veiz Gozcingh bae banh gienh saeh gig hoj guh youh gig baujmaed ndeu.
Gienh saeh nangq daengz dangseiz guekcaeq doucwngh neix, seizneix gaenq baenz lizsij lo. Daengx seiqgyaiq caeux gaenq rox, Veiz Gozcingh dwg boux donzcangj aen Guvwndonz Hongbing Cungguek cwngfuj wngq Yeznanz Minzcuj Gunghozgoz cingjgouz cix baijok haenx, aen mingzcoh de caeuq baez Ciengqhingz Denbenhfuj saenqdoengh daengx seiqgyaiq haenx doxlienz youq itheij ne.
Hoeng, gienh saeh neix youq seizde dwg gienh saeh gig baujmaed ndeu. Mauz Cwzdungh daengj bouxdaeuz cunghyangh gyaudaih hongguh seiz lai baez daengq naeuz: Gij saeh guvwndonz itdingh yaek baujmaed, danghnaeuz digozcujyi rox raeuz baij ok guvwn, dingh daihguh faenzcieng. Yienghneix, sou okbae gaej caeuq baihrog gangj, hix gaej（接上期）lwnh hawj vunzranz baengzyoux nyi.
Yienghneix, Cungguek moq ngamq laebbaenz geij bi duenh neix, Veiz Gozcingh guh gijmaz hong, swhyienz gig noix miz vunz rox. De ndaej nyaemhmingh guh boux fuswhling gungh’anh budui, vunzlai cungj nyinhnaeuz de dwg bouxbangfwngz Loz Suigingh swhlingyenz, gizsaed de mbouj youq gizde guh geijlai saedcaeq gunghcoz.
Veiz Gozcingh ciuhneix hoenx gvaq cien bak baez ciengq, goenglauz gvaekgvaek, de bi 1948 ndwen 3 guh boux swhlingyenz Bingduenz Suhbwz Bingdoihyejcan Vazdungh, bi 1949 ndwen 2 guh boux cwng’veij Daih 10 Bingduenz Daih 3 Bingdoihyejcan. Seizco laebguek, cingq dwg seizhoengh de. Aenvih de bi 1946 gaenq guh gvaq Hongbing Diuzcawq Saedhengzbu Cizcouh Saedhengz Siujcuj boux Cunghgung soujsiz daihbyauj, caeuq vunz Meijgoz、Gozminzdangj daj gyaudauh gvaq, mbei hung uk lingz, dwg boux vunzcaiz vaigyauh cujciz haeujeiq ndeu. Seizde, cunghyangh yaek daj ndaw bingdoih cou buet ganbu gaepbingduenz okdaeuj gauj hong vaigyauh, bi 1950 ndwen it, de daj Fuzgen cenzsen diuh daengz soujduh, yaek bae guh gij hong youqgaenj vaigyauh lo.
Baez daengz Baekging, Veiz Gozcingh caeuq mehyah de Hij Gizgen hainduj bae camgya hagsib vaigyauh conhyez gocwngz lo. Byawz rox, mbwn miz fwjrumz nanz cai, Veiz Gozcingh ngamq siengj cienqsim hag sib vaigyauh yezvu seiz, de baenz binghsaejgungz lo, mbouj ndaej mbouj haeuj yihyen bae guh soujsuz, aenvih nguh seiz, youh fat naek baenz bingh’idungx. Mwh de lij youq yihyen, hangh hong saenzmaed ndeu cingq yiengq de vad fwngz coh daeuj lo.
Laxlawz, nienzco Mauz Cwzdungh、Couh Wnhlaiz bae cunz Suhlenz, boux cujsiz Yeznanz Minzcuj Gunghozgoz Huz Cimingz caemh bae lo. Huz Cimingz youq gizhaenx caeuq Swhdalinz、Mauz Cwzdungh、Couh Wnhlaiz doxyaeng liux gij saeh Yeznanz gwzming. Mauz Cwzdungh、Couh Wnhlaiz cunz Suhlenz dauqma Cungguek seiz, Huz Cimingz caemh guhdoih dauqma, de cawzliux iugouz Cungguek bang de yienh’ok gij doxgaiq hoenxciengq le, vanzlij iugouz Cungguek baij aen guvwndonz hongbing bae Yeznanz.
Yeznanz gaxgonq dwg gaiq dieg cizminzdi Fazgoz, baez daihngeih seiqgyaiq ciengqhaenq geizgan, Fazgoz deng Dwzgoz hangzciemq, Yizbwnj hah liux Yeznanz. Yizbwnj hoenxciengq baih le, bi 1945 ndwen 9 ngoenz 2 hauh, Huz Cimingz youq Hoznei senhbu laebbaenz Yeznanz Minzcuj Gunghozgoz. Mbouj geij nanz, Fazgoz youh dauqfuk hangzciemq Yeznanz, sojmiz gij singz、sok youqgaenj、ciengzfeihgih caeuq roen youqgaenj ceng mbouj geijlai cungj deng Fazgoz ciemq liux, Fazgoz mboujduenh hoenx gij dieggoek Huz Cimingz dazyinx haenx, vanzlij fungsuj liux henzgyaiq Cungguek nem Yeznanz, sawj Yeznanz Minzcuj Gunghozgoz haeuj daengz gij diegdeih gannanz raixcaix bae.
Daj guek raeuz daih’it baez dagwzming hwnj, Huz Cimingz caeuq mbangj ganbu Yeznanz cix gonqgonq laenglaeng daeuj camgya Cungguek gwzming doucwngh, miz mbangj lij vih Cungguek Gwzming yienh’ok gij sengmingh dijbauj de. Cungguek gwzmingz ndaej hingz, caeuq baengzyoux guekcaeq dingjrengz faen mbouj hai. Huz Cimingz daez ok gij iugouz neix, Cungguek cwngfuj yawz mbouj dawz haeujsim? Cunghgung Cunghyangh ginggvaq haeujsim naemjngeix, mboujgoq seizde guek raeuz ngamq hoenxciengq sat、yienghyiengh gyonj deng buqvaih caez、aeu dauq hwnjguh gij cingzgvang neix, gig vaiq guh’ok gietdingh: soengq gij cungqbauq caeuq gij doxgaiq bingdoih yungh haenx hawj Yeznanz, caemhcaiq baij ok aen guvwndonz hongbing bang Bingdoih Bouxminz Yeznanz hoenxciengq caeuq hwnqguh.
Baij aen guvwndonz bae aen guek doxrangh huzndei, gienh saeh neix gig youqgaenj. Bouxdaeuz cunghyangh daj bang cancieng mingzdan ndawde genj ok Veiz Gozcingh boux youh ak hoenxciengq youh ak guh hong cwngci neix daeuj guh gij hong gwnz neix.
Bi 1950 ndwen 4 co, Veiz Gozcingh ngamq ok yihyen, sikhaek deng heuh haeuj Cunghnanzhaij bae, Liuz Saugiz fucujsiz caeuq de naeuz, Mauz Cujsiz、Cungjswhling、Wnhlaiz dungzci caeuq gou doxyaeng gvaq, dapwngq gij iugouz Huz Cimingz cujsiz, baujmaed dwk baij aen guvwn donz bae Yeznanz, youz mwngz bae dang donzcangj. Dou nyinhnaeuz mwngz lai ngamj aen hong neix, dwkciengq、hangdangz bingdoih, couh mbouj yungh gangj lo, aen siujcuj damzbuenq mwngz hix gauj gvaq, caeuq vunz Meijgoz doxgyau gvaq. Mwngz youh dwg vunz Guengjsae,Dangnian zhou zhongli yao ba kejiaren huaguiwei shaoshu minzu, Yejianying yuanshuai qianglie fandui cai meiyou gaocheng.Veiz Gozcingh Sangcieng jiu buxing le,zili tai qian, fandui buliao a.
Gáu jǐu mèi dǎrq rou gee lári bèr,
gáu joo rou Vêi Go Ceeq cêre gèrn Dorq Larn xeên dorg~
Deé vêi Guàrq Si ràu hàd gá ráq leu ,rà yi bǔ tín~
Yǒu Guàrq Si dárq gún ,
rà yeên vêi deé eéq gárq vêi dêi ràu hàd goóq jǎq térq ~!
Rà báo mũq gèrn ărg gèrn kérq loom Vêi Gô Ceeq nì ,yǒu Guàrq Si ràu ǒrg lári técm ~xeên nì,Guàrq Si ràu jì mèi héi mũq loò~!
| 欢迎光临 僚人家园 (http://bbs.rauz.net.cn/) | Powered by Discuz! X2.5 |