[推荐]一篇好文章《BYA BEGHAG》 - 僚人家园

Laj Bya Beghag miz aen mbanj ndeu heuhguh Mbanj Beghag.Youq mbanj baihdoeng neix miz ranz singq Vueng ndeu,ranz de cij miz song gvanbaz caeuq laeq lwgnyez dog,laeq lwgnyez neix heuhguh Vuengz caiz,lij iq couh ndaengj lai,mbouj daih dingq boh meh gangj,iqyaetyaet couh hag guhdoj lo,boh neh doiq de mbouj miz banhfap.

Vuengz caiz ndaej cib bi,miz ngoenz ndeu,de okbae ra vunz dojcienz.De ngamqbyaij daengz henz dah,laeglwnh ndaejnyi vunz riu ha ha ha ok baihlaeg daeuj,de ngeux gyaeuj dauqlaeg yawj,yienzlaiz dwg boux daenj buh hoengz ndeu riengzlaeg de daeuj,boux neix ndaej sam cib bi lo.De raen Vuengz Caiz couh naeuz:“Vei,riengz gou doj ba!”Vuengz caiz cam:“Mwngz dwg bouxlawz?”Bouxde naeuz:“Gou daj ndaw rungh daeuj ha.”

Vuengz Caiz naemj,vunz ndaw rungh mbouj daih rox guhdoj, riengz de doj, itdingh ndaej hingz,couh naeuz:“Sien gangj dingh,bouxlawz doj saw,mbouj cinj fannaj.”

De song vunz couh haeuj henz bya ndaw ndoeng bae,youq gwnz rin veh buenz geiz ndeu,doiq naj caez naengh dwk geiz hwnjdaeuj lo.Boux daenj buh hoengz haenx naeuz:“Ndei lo,raeuz beij dwk giz,bouxlawz dwk saw le,couh bae ranz aeu ngaenz daeuj,mbouj miz ngaenz,couh aeu doxgaiq daeuj dingj.”

Daj seiz haenx hwnj,Vuengz Caiz ngoenzngoenz cungj daeuj gix guhdoj.Gangj daeuj caen geizheih,moix baez Vuengz Caiz cungj ndaej gwn gij geiz de yaek liux,couh yaek hingz lo,boux daenj buh hoengz mbat doengh aen geiz,yaep he,Vuengz Caiz couh saw lo.

Vuengz Caiz yied doj yaet mbouj fugheiq,doj bae doj dauq,de cungj mbouj caengz hingz saek mbat.Yienghneix,de vanjlij doj,boh meh naeuz de cungj mbouj dingq.Vuengz Caiz ndaej ngeih cib bi seiz,gaenz dawz gyadangq de doj bae dingz lai lo.Bi de ,boh de yaek gvaq swiq lo,gyangz naek doiq de naeuz:“Lwg ha,mwngz mbouj yungh guhdoj lo,caiq doj yoengzbae,gyadangq raeuz couh aeu saw ndoq la,seizhaenx,mwngz baenzlawz gvaq saedceij ne!”

Vuengz Caizmbouj dawz gij vah boh de hwnj rwz.Boh de dai le,de vanjlij caeuq boux daenj buh hoengz haenx doj,doj ha,doj ha,dawz gij cienzngaenz ndaw ranz doj ndoq liux,youh dangq daemznaz doj.De ndaej sam cib bi seiz,gij gyadangq de cungj doj saw liux lo,caenh lw mbenq reih iq youh hex youh gyae vunz mbouj haengj aeu,ndaw ranz gungz ndoq lumj raemx riengx neix,gijmaz cungj mbouj miz lo.

Youq bi haenx,meh de bingh naek yaek dai lo,doiq de naeuz:“Lwg ha,mwngz mbouj yungh caiq guhdoj la!Ndaw ranz raeuz ban neix,cij miz gaiq reih genz iq gwnz ndoi la,boh mwngz lij lix seiz,dawz haulai gimngaenz bae ndaw de moeb,mwngz yaek gvaq saedceij ndei,couh bae ndaw de gud ma yungh,cienfanh mbouj yungh caiq guhdoj lo.”

Meh de dai le,Vuengz Caiz ndaw ranz fwzngeungeu,aen ranz de hamq doeng yumz liengz suebsueb,hoj dwk venj rek hwnj bangx ciengz bae,iek dwk dungx nem haeuj saej bae,de mbouj minz banhfap caiq bae guhdoj lo,seiz haenx,de siengj daengz gij vah meh de,couh gwed gvat mbenq reih iq de gud gim ngaenz.de gud ha,gud ha,gud liux sam hwnz sam ngoenz,gud mbenq reih iq de laeg sam cik youh sam cunq,caq bae youh caq dauq,caq mboeng lumj daeuh nei,vanjlij gijmaz cungj ra mbouj ndaej.De gig siengsim,song fwngz got gyaeuj daej rwirwi,cou aeu deng dai iek lo,mbouj miz banhfap,de cix dawz daeuj ndaem haeuxyangz.

Gangj daeuj geizheiq,bi de,de ndaem haeuxyangz lai baenz gvaq daengxcungq,sou ndaej geij cib rap,de couh baengh gij haeuxyangz neix ciengx mingh lo.

Vuengz Caiz hoj,couh mbouj miz sim caiq bae guhdoj,boux daenj buh hoengz haenx caemh mbouj ra de doj,de ngoenz ngoenz youq ndaw reih haeuxyangz ciemz run haz,bibi gij haeuxyangz de daegbied ndei.Gogo hung lumj gaenz cax nei,go miz song faek,faekfaek raeng mbwngmbwng,naednaed gyaeugywdgywd,vunz gvaq loh raen le,bouxboux cungj haenh.

Ngoenz ndeu,de cingq sou haeuxgangz,boux daenj buh hoengz haenx daeuj lo,mbouj ngeix daengz de dwg daeuj bang Vuengz Caiz sou haeuxyangz.Sou liux,de doiq vuengz caiz naeuz:“raeuz haulai nanz mbouj doj lo,mwngz caemh sou ndaej haulai haeuxyangz,couh doj gij haeuxyangz neix ba.”

Vuengz caiz siengj:“gij haeuxyangz neix gou sinhoj dwgrengz guh cij ndaej,danghnaeuz dawz bae doj saw liux,lienz haeux cungj mbouj miz gwn,gou mbouj dai iek ha?”De couh naeuz:“Mbouj doj lo.”De yienghneix gangj,boux daenj buh hoengz haenx riu sam sing“ha ha ha”,bae lo.

Daj seiz de hwnj,Vuengz Caiz caen rox daengz:cij miz baengh bonjfaenh nengz rengz guh hong,het ndaej haeux gwn.Decungj ansim youq mbenq reih iq henz ndoi de guh hong,haet romh haemh laep,song gyaeuj raen ndaundeiq.

Gvaq song sam bi,Vueng Caizmbouj you gwn,mbouj you daenj,saedceij menhmenh ndei hwnjdaeuj lo.Danhseih,gwn daenj vanjlij beij mbouj hwnj boh meh de youq seiq seiz yiengh haenx ndei.Debi beij bi gaenx,bibi cungj geng laeg,mbak laeg.mbat ndeu,de vat ndaej aen gang iq ndeu,baez hai yawj,ndaw de cungj dwg gij doenghyiengh de saw hwnj boux daenj buh hoengz,lienz gij buhvaq de lij iq daenj haenx,cungjdaeb ndaej ndaetndaet cuengq youq ndaw de.Raen doengh gijneix,Vuengz Caiz cungj ngaengh bae,aen gang baenz iq,cng ndaej baenzlai doxgaiq,gij doxgaiq neix daj gizlawz daeuj ne?

Miz ngoenz ndeu,vuengz Caiz gwed hanz hwnj ndoi bae aeu fwnz.De byaij ha, byaij ha,byaij gvaq laj Bya beghag.Gizneix bya heu raemx saw,ndoengfaex mwncupcup,funghgingj caen ndei ha.De yawj dwk maez bae.Sawqmwh miz vunz heuh coh de:“Vuengz Caiz……”De ngangx gyaeuj yawj seiqhenz,conj mbouj raen miz saek boux vunz,bouxlawz hemq ne?De ngeizvaeg lo,youh ndaejnyi sing riu“ha ha ha”ok ndaw ndoengfaex daeuj,de baez ngeng rwz dingq,gij sing riu neix lumj baenz youq gizlawz dingq gvaq,caen sug lo!dwg bouxlawz caeuq gou guh yahndoj ne?Siengj mbouj hwnj daeuj.Seiz haenx,de mbat ngangx gyaeuj muengh haeuj bangx dat Bya bghag bae,yawjraen bangx dat miz haulai siengq vunz,ndaw de miz boux he lumj boux daenj buh hoengz nei,de uet de yawj, youh byaij daengz laj dat bae yawj,cam:“Dwg mwngz heuh gou ma?”Ndaek siengq de mbouj han.De caiq can:“Dwg mwngz heuh gou ma?”Lienz cam sam mbat,gij siengq neix cungj mbouj han mbouj doengh.Vuengz Caiz miz di lau,youq ndaw ndoeng ra rap fwnz ndeu couh dauq ma lo.Danhseih,de rap fwnz roengz lueg mbouj geijlai gyae youh ndaejnyi gij sing riu boux daenj buh hoengz daj baihlaeg cienz daeuj,Vuengz Caiz menh ngeix menh siengj,youh ngeix daengz gij doxgaiq ndaw gang,vaeg singj gvaqdaeuj:geij neix itdingh dwg bouxsien son yinx de.Daj mbat de hwnj,de engq haenqrengz guh hoeng.Mbouj ndaej geij bi,gaxgonq de doj saw gij doxgaiq gaenq cawx dauq caez,doj saw gij daemznaz haen youh dauq ma seuq set,Gvaqlaeg,Vuengz Caiz caemh aeu yah lo,miz doeglwg ndeu,Vuengz Caiz son de gaej limj gaxgonq bonjfaenh guhdoj lo.

以下是引用一知半解在2008-6-7 18:41:32的发言：

de ngeux gyaeuj dauqlaeg yawj,dwg mbouj dwg loeng?

dauqlaeg wngdang dwg dauq laeng.