[原创] Bingjgoj Fwenciengz Ngvanh Naemj ! - 僚人家园

Cieng yied co roek , suen raeuz beixnuengx dox yuk bae Bingzgoj ,gou caemh bae daengz Bingzgoj Vwnzva gvangjcangz yawj Fuen ciengz ,ban laep bet diemj cingq ,Bingzgoj vwnzvaq gvangjcangz aen daizheiq baih naj song henz cungj naengh ndin muenx vunz ,haemh neix ,caen dwg nauh yied lo ! Va ,baenz lai vunz dingq fwen cuengh ! Daeg bied dwg mbat daih it dingq nyi Cimz Siengzcouh yungh sing gyaeugyet caeuq Nyizsanh beixnuengx doiq fwen ,caen dwg hawj sim gou saenq dwddwd ,Vunzcuengh raeuz sawj bak eu fwen vwnzvaq caen dwg laeglum ,mbouj miz cih saw vwnz vaq geij cien bi aen minzcuz vunzcuengh raeuz ,ngengh dwg baengh congh bak cienz roengz ndaej yiengh gyaeu ndei vwnzvaq neix ,gij neix caenh dwg Seigyaiq noix miz a ! Caemh ndaej naeuz aen minzcuz raeuz gyoengq vunz lij dwg miz uk ,cojcienz vwnzva lij dwg mbouj yaez gvaq daih bouh faenh Feihcouh aen buloz minzcuz vwnzvaq di !

Geij cien bi daeuj ,vunzcuengh raeuz mbouj miz cih saw vwnzmingz ,vunz coj raeuz cij dwg baengh congh bak caeuq gig miz vunz rox cih sawndip ma cienz fwen ,hauj lai daizheiq byaujyienj yisuz caeuq eufwen sawj sing sawj yaem yisuz ,caeuq eu fwen neiqyungz ,eu fwen hai sing ciengq yaem fueng mienh gisuz liz dwg gig doeklaeng ,Dangnaeuz haeuj heiqdangz sou cienz bae guh yienj ,mbouj danh dwg cuzwnq mbouj haengj yawj ,lienz bonjcuz vunz raeuz cungjdwg gig noix vunz yietcienz bae yawj bae dingq ! Vih gij maz ? Couh dwg vunzraeuz gag sonhag cienzhag vunzraeuz cojgoeng vunzvaq mbouj ndaej ciep hengz ! Gij fwencuengh raeuz hawj vunz cuzwn dingq hwnj daeuj lij dwg sing seng sing ndip ,cuz bonj faenh dingq hwnjdaeuj lij dwg mbouj miz iyi caeuq yisuz gamjsouh ! gaen mbouj hwnj seizdaih sevei mbe fat ,hauj lai boux eu fwen aeu lienh ndaej lumj Cimz Siengzcouh yiengh neix hawj vunz dingq gij fwen yaem gig cingq ,sing hix gokq hix gyaeu gyet ,neiqyungz hix gyaeundei cij baenz . Doiq gij fwen raeuz yaek baenz lawz ndaej gaen byaij hwnj seigyaiq vwnzvaq mbefat byaijbouh caeuq suzdu ,baengh bak dwg cienz mbouj roengz bae di ,aeu daih daih vunzraeuz aeu cih saw geiq roengzma ,hawj daih laeng bae cungjgez ,guh daengz daih beij daih guh ndaej ndei guh ndaej maenh cij dwg dauh leix !

1 : Doiq fwenciengz daizheiq byaujyienj cujdiz aeu guh dingh ndei , eufwen neiqyungz aeu sien caux ndei bien ndei lienh ndei le menh cij hawj hwnjdaiz ,doiq doq ngvanh doq eu gyoengq gohsouj haenx aeu doiq gij sing de caeuq vah yaem de aeu byauhcinj vahcuengh vutgvaq cij ndaej hawj hwnj daiz ! Vunz raeuz youq bonj dieg bonj mbanj eufwen dangyienz ndaej lula di mbouj youq gaenj ,youq daiz heiq yienj aeu yienj cingqyaem ! Vunz raeuz boux guh vwnzvaq hongsaeh aeu cawqcawq dawz vunzcuengh byauhcinj vwnzvaq yisuz seizseiz bae sienconz bae doigvangq dwg hangh hong daih ik daengz daengx aen vunzcuengh minzcuz hangh hong naek ndeu !

2 : Gyavaiq dawz eufwen yisuz hongsaeh mbefat guh baenz hwngvuengh vunzcuengh laj mbanj vwnzvaq hangh daihsaeh ndeu ,ciengz seiz youq laj mbanj banh gak hangh eufwen AA ci dox beij ,guh fap couh dwg geij aen mbanj dox gaenh haenx dox caez yiet cienz ok daeuj guh fwenciengz dox beij eu fwen ,cingj geij boux guh boux bingz faen ,yawj mbanj lawz eu gij sing eu gij neiq yungz eu ndaej ndei , geij aen mbanj yiet gij cienz haenx 80% gvi gyoengq eu ndaej daih it ,lij lw 20% louz guh mbat laeng banh fwenciengz sawjyungh !

3 : Diegcuengh gak aen vunzvaq bumenz aeu dawz daezsang vunzraeuz canghfwen eufwen suijbingz dang guh hangh hongsaeh naek ndeu bae guh ! Yungh yienhdaih gohyoz fuengfap banggyoengq de lienhsingh lienh yaem ,lienh ngvanh fwen ,lienh eufwen ,lienh bien fwen , daez swng eufwen byaujyienj yisuz suijbingz !