FWEN BAZGOH 拔哥山歌 - 僚人家园

CAUHNEIX YAUHGVAI LAI

Go Bwzminz Nazmaj
Geiq vah bae hawj mwngz
Gaeuj dienhah laj mbwn
Vunz gwn vunz daengxlix

Cauhneix yauhgvai lai
Bouxgvai gwn boux vax(huk)
Go Bwzminz Nazmaj
Geiq vah bae hawj mwngz

Ciuq mbwn mbouj baengz mbwn
Dauq guh fwn liux rumz
Gaeuj dienhah laj mbwn
Vunz gwn vunz daengxlix

Cunz biengz ndaej sam bi
Ndaejnyi raen bwzming
Sim ndij cingq Lezningz
Caux gwzming hawj raeuz

Siengj gaiqraeuz beksingq
Riengz gwzming yaek lix
Cunz biengz ndaej sam bi
Ndaejnyi raen gwzming

Majgwzswh hengz ndi(ndei)
Si hawj raeuz bouxminz
Sim ndij cingq Lezningz
Caux gwzming hawj raeuz

Minzgoz cib it nienz
Gijyi hengz gwzming
Gaihvei youq Runghging
Beksingq raeuz doengz riengz

Aiq(guenj) baih mbanj baih raeuh
Doengz dawz cungq daeuj riengz
Minzgoz cib it nienz
Gijyi hengz gwzming

Bouxboux doengz haenqrengz
Raeuz doengz riengz Lezningz
Gaihvei youq Runghging
Beksingq raeuz doengz riengz

Gwzming cih va hai hoengzdoeng
Deng yaz minzcung ndaej yo gyaeuj
Sanhminz cujyi cienz okdaeuj
Ndaej giuq cunghvaz raeuz bouxminz

Cunghsanh cujlij daeuj cujciz
Donzgez gozgai raeuz guh mwn
Gwzming cih va hai hoengzdoeng
Deng yaz minzcung ndaej yo gyaeuj

Law lwed lae hanh yax(cij) cauh baenz
Yauhgiuz bingzdwngj ndij swyouz
Sanhminz cujyi cienz okdaeuj
Ndaej giuq cunghvaz raeuz bouxminz

下面引用由Lajmbwn在 2003/12/05 12:54pm 发表的内容：
民国十一年，在壮语里的习惯表达法仍然是 minzgoz cibit bi（这里之所以叫Minzgoz cib it nienz可能是方言的表达习惯），不过没有见过 bi minzgoz cib it 这样的表达法，容易引起歧义（如‘民国年’ 十一）。

Lezningz gwzming hengz ndaej baenz
Sunh Vwnz bae raen de yax rox
Fangjcau aen cujyi Ngozgoz
Dauq daeuj lienzloz raeuz bouxminz

Seiqgyaiq dauhleix raeuz aeu rox
De ndaej youz goz(guek) de cix raen
Lezningz gwzming hengz ndaej baenz
Sunh Vwnz bae raen de yax rox

Sunh Vwnz mwhgonq de sim ndei
De gyaez bouxminz raeuz vunzsoh
Fangjcau aen cujyi Ngozgoz
Dauq daeuj lienzloz raeuz bouxminz

Cinghdenh bwzyiz monjdi hungz
Haetromh cunghfungh haeuj ndaw nyaz(yazmonz)
Seiqmienh nungzginh raeuz hwnjma
Lezsinh ndaw nyaz deuz banhsanq

Gungjyenz* cunghfungh gvaq roen ndeu
Lezsinh cix deuz mbouj aeu mingh
Cinghdenh bwzyiz monjdi hungz
Haetromh cunghfungh haeuj ndaw nyaz

Beh raeuz nungzginh mbouj vuvei
Cix ndaej lezsinh youq ndaw nyaz
Seiqmienh nungzginh raeuz hwnjma
Lezsinh ndaw nyaz deuz banhsanq

*Gungjyenz: Cwnz Gungjyenz dwg boux canyouj Veiz Bazginz,
1923 nienz nungzginh bae dwk yienhsingz Dungzlanz seiz,de dang
dunghluginh cijveih.

Nungz gungh bingh yoz da lienzhoz
Bouxgig bouxhoj doengz haenqrengz
Digoz ginhfaz hengz mbouj deng
Vunzlai yungh rengz bae duihfanh

Cuzcin gozminz da veiyi
Cijsiuh mbouj bingzdwngj diuzyoz
Nungz gungh bingh yoz da lienzhoz
Bouxgig bouxhoj doengz haenqrengz

Ginghci cinhloz mbouj caengz gaeuq
Youh aeu vujliz yazbwz dem
Digoz ginghfaz hengz mbouj deng
Vunzlai yungh rengz bae duihfangh

Danghgonh lezsinh hengz bozsoz
Mwhgonq bouxhoj daih gwngvei
Nungzminz yezvei yijgingh meiz(miz)
Bouxlawz souh gvei doengzcaez hwnj

Raeuz gwn souh saw byaekhengzhaz
Lezsinh gwn bya youh gwn noh
Danghgonh lezsinh hengz bozsoz
Mwhgonq bouxhoj daih gwngvei

Dajdauj dicuj swhbwnjgyah
Hauhneix baenaj yaek raen ndei
Nungzminz yezvei yijgingh meiz(miz)
Bouxlawz souh gvei doengzcaez hwnj

Youq minzgoz cib ngih(ngeih)
Cujciz dwk Lungzbuj
Faexgyaengh maxdau yizliz dawz
Bae dawz Lungzbuj* mbat ndeu gonq

Doengz dap dinciengz guh maenhmaenh
Baihlaj baihgwnz aeu dungjyiz
Youq minzgoz cib ngih(ngeih)
Cujciz dwk Lungzbuj

Dawz cungq mingzhoj gyaemh daihgaep
Gyanghaet cizhoz youq gyanghaw
Faexgyaengh maxdau yizliz dawz
Bae dawz Lungzbuj mbat ndeu gonq
___________
*Lungzbuj:Veiz Lungzbuj,mwhhaenx de dwg Dunghlanz Yen gozminzdangj dih luzsau donzcungj.

Cujciz swveidei
Nungzvei itdingh hingz
Bouxcoz caez dang bing
Itdingh hingz gauneix

Bae dawz gozminzdangj
Raeuz fanj itdingh ndaej
Cujciz swveidei
Nungzvei itdingh hingz

Caez sim goz dungzci
Gwzming diq(vih) bouxminz
Bouxcoz caez dang bing
Itdingh hingz gauneix

Dajbo cungjcungj dih mbouj bingz
Bouxminz beksingq yaek raen ndi
Gwzming funghcauz yijgingh miz
Ciuh raeuz raen ndi bae coh geq

Sizhingz gwzming mbouj caengz baenz
Vunzlai doengzcaez bae bingqmingh
Dajbo cungjcungj dih mbouj bingz
Bouxminz beksingq yaek raen ndi

Dajdauj dicuj swhbwnjgyah
Hauhneix baenaj yaek raen ndi
Gwzming funghcauz yijgingh miz
Ciuh raeuz raen ndi bae coh geq

Baeuqcaet Baeuqbet gwn gyaeujgwnz
Dwzcingh Lauxloengz gwn gyaeujlaj*
Lezsinh nizdangj wngdang gaj
Lau mbouj raen naj raeuz cix gungz(suenq)

Gouhgez danhgonh ndij ginhfaz
Danh ndaej raen naj cix cug vunz
Baeuqcaet Baeuqbet gwn gyaeujgwnz
Dwzcingh Lauxloengz gwn gyaeujlaj

Mboujlwnh mbanj laj doengz mbanj gwnz
Bouxlawz miz ngaenz de xix faz(fad)
Lezsinh nizdangj wngdang gaj
Lau mbouj raen naj raeuz cix gungz
_____________
*Baeuqcaet Baeuqbet Dwzcingh Lauxloengz couh dwg Duz Ciz, Duz Baz, Vangz Dwzcingh, Lungz Yenjyinz. Seiq boux vunz cungj dwg seizhaenx Dunghlanz Nguxcienh dih da dujhauz.
Gyaeujgwnz gyaeujlaj dwg duenhgwnz duenhlaj Nguxcienh.

Doengyiz cix luenh ndiz(youq) Binjsanh*
Doenglanz cix lanh ndiz Lungzbuj
Mbouj miz geij lwg lezsinh sou
Biengz mbouj saej fouz baenz daengjneix

Roeksauq Doenglanz vih lawz guj(hoj)
Binjsanh Lungzbuj gwn lwed hanh
Doengyiz cix luenh ndiz Binjsanh
Doenglanz cix lanh ndiz Lungzbuj

Cauhneix gyoengqsou cix naeuz haenq
Miz ngoenz mbwn raen sou geij boux
Mbouj miz geij lwg lezsinh sou
Biengz mbouj saej fouz baenz daengjneix
___________________
*Binjsanh:Cwnz Binjsanh mwhde dwg boux gizdungj Dunghlanz Yen Duhyizgih.

Raih naz gyang doengh gvangq dauq gvangq
Vei doihbangx
Boux cae nazgyang ceiq hozhaemz
Dungx iek hozgan guh hong baenz
Daiq goenq sim
Baen sam* haeuxvaen duj mbouj ndaej

Bouxhoj naih siengj naih ij daej
Daih cizgveih
Lij hawj soengq haeux bae daengz ranz
Raih naz gyang doengh gvangq dauq gvangq
Vei doihbangx
Boux cae nazgyang ceiq hozhaemz

Raeuz daenj buh sik de daenj moq
Bouxboux rox
De gwn laeuj noh raeuz gwn raemz
Dungx iek hozgan guh hong baenz
Daiq goenq sim
Baen sam* haeuxvaen duj mbouj ndaej
_________________
*Baen sam

awz gij haeux baen guh sam faenh,boux nazcawj ndaej song faenh, boux raeqnaz ndaej faenh ndeu.

Gvangjdungh cunghyangh miz yenzcu
Namzningz dangjbu lij bang raeuz
Gozminz gwzming ndaej Hangouj
Beksingq gyoengqraeuz miz liyiz

Ndi lau gaiqraeuz guh mbouj hingz
Vwijyenz daiq bing hwnjdaeuj buj(bujcungh)
Gvangjdungh cunghyangh miz yenzcu
Namzningz dangjbu lij bang raeuz

Daj den bae hawj Vangzveijbai*
Youh daiq swjdan daeuj hawj raeuz
Gozminz gwzming ndaej Hangouj
Beksingq gyoengqraeuz miz liyiz
_________________________
*Vangzveijbai dwg boux dwzbaiyen, daj Gvangjdungh gwzming cwngfuj baij daeuj, de singq vangz.

Swnj Hungzyingh daeuj biengz
Cauh diuz ien neix daeuj
Loengz Coengyiz* sim gaeuz
Hwnjdaeuj duq gamjgaej(gamj Lezningz)

Lungz Yenjyinz* sim yak
Gag nda rap gag guenz(gonz)
Swnj Hungzyingh daeuj biengz
Cauh diuz ien neix daeuj

Dawz veijyenz bae gyaeng
Gangj ngaenz youh mbouj hawj
Loengz Coengyiz sim gaeuz
Hwnjdaeuj duq gamjgaej(gamj Lezningz)
____________________
*Loengz Coengyiz couh dwg Lungz Yenjyinz.

Bouxlawz fanj gwzming
Haemq Dwzcingh Lajgeng*
Ndij Gungh Loz*doengz riengz
Bwnj hengz fanj gwzming

Diuz laux Gungh hwnj ma
Hai cungq yaz(haep) nungzminz
Bouxlawz fanj gwzming
Haemq Dwzcingh Lajgeng

Coemh ranz raeuz beksingq
Diuh bing daeuj Doenglanz
Ndij Gungh Loz doengz riengz
Bwnj hengz fanj gwzming
____________________
*Lajgeng dwg mingz mbanj.Dwzcingh dwg Vangz Dwzcingh,ranz youq Mbanj Lajgeng.
*Gungh Loz:Gungh dwg Gungh Souyi boux ginhfaz donzcangj,Loz dwg Loz Sunghgangh boux ginhfaz yingzcangj,song boux de dwg boux gvaiswjsouj cinyaz Dunghlanz Fungsanh gwzming yundung.

Lezsinh haeuj rungh bae faenz(raemj) haeux,
Haemq sou seng daeuj gwn gaiqmaz?
Beh naeuz dou famh sou cix ra ,
Haeux beu(famh) gaiqmaz hawj sou ndiz?

Duz vunz seng daeuj youq laj mbwn,
Swz ndeu mbouj gwn mbouj ndaej daeuz(dingj).
Lezsinh haeuj rungh bae faenz(raemj) haeux,
Haemq sou seng daeuj gwn gaiqmaz?

Dou youq geh rungh gyang ndoengfaex
Sou miz bonjsaeh cix hwnj bya.
Beh naeuz dou famh sou cix ra ,
Haeux beu(famh) gaiqmaz hawj sou ndiz?

Vangz Cujyi* yenjgyangj
De gyajcang gwzming
Daeuj gyanggai gaem inq
Naeuz beksingq mbouj diuz(deng)

De youq swngj dangjbu
Naeuz yenzcu Doenglanz
Vangz Cujyi yenjgyangj
De gyajcang gwzming

Gouhgez Vangz Mingzyenj*
De hengz sim mbouj cingq
Daeuj gyanggai gaem inq
Naeuz beksingq mbouj diuz
______________________
*Vangz Cujyi 1926 nienz youq Doenglanz dang vei yencangj.
*Vangz Mingzyenj,dwg ginhfaz yingzcangj,dwg cinyaz Dungh-Fung nungzminz gwzming yindung dih gvaiswjsouj.

Sunying sigai dih cauzliuz
Naih ciuq(yawj) ciuhneix yax(hix) mbouj doengz
Gwzming gijyi youq Guengjdoeng
Daengzlaeng baenzgoeng sou yax rox

Gizgiz gwzming cienz daeujdaengz
Gaiqboux daengzlaeng sou guenj ciuq
Sunying sigai dih cauzliuz
Naih ciuq ciuhneix yax mbouj doengz

Gaiqraeuz cienghlaiz ndaej fanhsinh
Bouxlaux bouxnding caez vuenyungz
Gwzming gijyi youq Guengjdoeng
Daengzlaeng baenzgoeng sou yax rox

Gijcuh Ngozgoz hengz gwzming
Biengz de yinzminz ndaej raen ndi(ndei)
Gwzming funghcauz gizgiz miz
Gyoengqraeuz raen ndi bae coh geq

Cijsiuh yizcez mbouj bingzdwngj
Gyoengqraeuz da raen yax couh sinq
Gijcuh Ngozgoz hengz gwzming
Biengz de yinzminz ndaej raen ndi

Daihgya caezsim hengz gwzming
Cienghlaiz itdingh doengz raen ndi
Gwzming funghcauz gizgiz miz
Gyoengqraeuz raen ndi bae coh geq

Beh Sunh Cunghsanh mboujcaengz dai
Bineix gyanggai mbouj baenz nix
Beh Sunh Cunghsanh goj lij lix
Cauhnix biengzdih mbouj saej fouz

Minzgoz cib sam hengz gwzming
Yienghyiengh sinhoj suenq raeuz lai
Beh Sunh Cunghsanh mboujcaengz dai
Bineix gyanggai mbouj baenz nix

De naeuz gwzming caengz daengz giz
Gozgai donzdij caez nujliz
Beh Sunh Cunghsanh goj lij lix
Cauhnix biengzdih mbouj saej fouz

Giuh bouq (Du Baz) roengz gai bae loek mumh
Naih ciuq gutgungq lumj duzma
Lumj duz vuhgveih daenj buhsa
Daenj mauh yumhya dawz gingqfaex

Aeu faex dang gen caemh dang ga
Guh(cix) lumj duzma dam(vangh) gyaengh ndugq
Giuh bouq roengz gai bae loek mumh
Naih ciuq gutgungq lumj duzma

Aeu gi(gei) guh giuh hawj de naengh
Ngoenzneix najdaemq lumj duzma
Lumj duz vuhgveih daenj buhsa
Daenj mauh yumhya dawz gingqfaex

Dajdauj digoz ij ginhfaz
Banhgonh dujba mbat ndeu ciz(cawz)
Dajbo gyangzgenz caemh dicij
Cauhneix goeng yez mbouj cinj heuh

Caemh gaiq lezsinh dih coujgouj
Bouxlawz famh mbaeu cix ce naj
Dajdauj digoz ij ginhfaz
Banhgonh dujba mbat ndeu ciz

Gizlawz lezsinh aeu caengz ndaej
Laeb nungzminzvei youq lai giz
Dajbo gyangzgenz caemh dicij
Cauhneix goeng yez mbouj cinj heuh

Caetyez ndij Betyez*
Ndij Cwnyij* guh gyoengq
Duza ndij duzlaemh
Doengz guh gyoengq ndeu mbim

Gwn yinzminz lwedhanh
Ngoenz lauh mbanj gak giz
Caetyez ndij Betyez
Ndij Cwnyij guh gyoengq

Gwn vunz daengz noh nding
Dienz mbouj rim ndaw roengq
Duza ndij duzlaemh
Doengz guh gyoengq ndeu mbim

Nduj raeuz cix luenh ndij Lungzbuj
Vih de gwn du(dou) boux beksingq
Gyaeb(gyaep) Mungz Yenzcaij* cix liux mingh
Dajdauj lezsinh dingh ndaej hingz

Vih Mungz Yenzliengz* dih(bang) de suenq
Vih Loz Sunggangh biengz cix fouz
Nduj raeuz cix luenh ndij Lungzbuj
Vih de gwn du boux beksingq

Raeuz yaek youq ndei gyaemh(youh) soengzyoengz
Caez sim doengzcoengz fanj lezsin
Gyaeb(gyaep) Mungz Yenzcaij cix liux mingh
Dajdauj lezsinh dingh ndaej hingz
___________________________
*Mungz Yenzcaij Mungz Yenzliengz dwg mingz vunz.

Lungzbuj sou cienz guh gaiqmaz
De aeu song baz caemh sam maex
Bouxhoj boux ndeu dauq mbouj ndaej
Lungzbuj aeu maex rim gyangranz

Cug dez cug meh coq goek saeu
Lezsinh coujgouj wngdang gaj
Lungzbuj sou cienz guh gaiqmaz
De aeu song baz caemh sam maex

Lezsinh cit ranz caemh gaj vunz
Bouxminz ienq de cien nienz daej
Bouxhoj boux ndeu dauq mbouj ndaej
Lungzbuj aeu maex rim gyangranz

Song fwngz bangxij(dengcug) bae lizlinz
Meh heuh daengh din mbouj ndaej caj
Gaeb aeu lwgdog dawz bae gaj
Coq cien ngaenz gyaq duh mbouj i

Rag gen mbouj bae bien youh fad
Aeu faex hamh bak cungq ma nyingz
Song fwngz bangxij(dengcug) bae lizlinz
Meh heuh daengh din mbouj ndaej caj

Gaeb aeu lwgdog dawz bae gyaeng
Raemxda meh roengz rim benq naj
Gaeb aeu lwgdog dawz bae gaj
Coq cien ngaenz gyaq duh mbouj i

Minzgoz cib seiq lab ngeih sam
Laux Gung* cit ranz bae cib mbanj
Gyahvuz mozsouh ciz saujgvangh
Lwglan banhsanq mbouj miz ranz

Gaj vunz cit ranz bouxminz liux
Heuhnaeuz gyoengq caiq(raeuz) gveih Bazdangj*
Minzgoz cib seiq lab ngeih sam
Laux Gung cit ranz bae cib mbanj

Youh bae Sanhsiz diuh aeu bing
Cit ranz bouxminz bae cib mbanj
Gyahvuz mozsouh ciz saujgvangh
Lwglan banhsanq mbouj miz ranz
____________________________
*Laux Gung dwg Gungh Souyi.
*Bazdangj couh dwg Bazgoh dih dangj.

Bouxlawz gyau yez fei
Lingh aeu gvae
De yaek ndaej raeq naz
Raeuz dawz duz hwnjma
Caengz daengz naz
Bing cix ma duet ek

Ce gyangdoengh hwnj em
Caem(saw) ngaenz cienz
Ce naz bingz hwnj faex
Bouxlawz gyau yez fei
Lingh aeu gvae
De yaek ndaej raeq naz

Hwnjma bing hix laeh(gyaep)
Lingx aeu fei
Raeuz caiz ndei bae naz
Raeuz dawz duz hwnjma
Caengz daengz naz
Bing cix ma duet ek
_________________
*1928 nienz,bingcaeg youq Nguxcienh gauj cizcunghyingz,bik bouxminz Dunghlij Nazlez bae daengz mbanj Bahyoz gyonjyouq,vut nazreih mbouj ndaej raeq.Bazgoh youq mwhhaenx yawjraen yienghneix couh sij ok diuz go neix hawj vunz ciengq.

Gaj gaeq gwn lwed gyaemh vix mbwn
Gag mwngz Hizsungj* naeuz mbouj saenq
Gonq gangj boux dai boux cunz(vanz) mingh
Mbouj ngeix Yunlinz* dauq hengz fanj

Bouxlawz fanjdui mbwn lawz rox
Cungq deng gyaeujhoq ram coq mbung(lazhaeux)
Gaj gaeq gwn lwed gyaemh vix mbwn
Gag mwngz Hizsungj naeuz mbouj saenq

Gonq gangj beixnuengx mbouj doxce
Cungq deng ga gvez cauz(couh) roxnyinh
Gonq gangj boux dai boux cunz(vanz) mingh
Mbouj ngeix Yunlinz dauq hengz fanj
_______________________________
*Hizsungj Yunlinz gyonj dwg mingz boux vunz ndeu,de caeuq Bazgoh gaj gaeq gwn lwed vix mbwn gvaq,doeklaeng guh banduz deng raeuz nungzginh dwk sieng.

Veiz Meijbangh* Mbanjbyau
Ndi lau sou cix ngveh(nyiengh)
Gwzming hwnj ndwedfeh(nauhyied)
Sou yaek ngveh guh lawz

I gaiq mwh bi'gvaq
Maexyah naeuz mbouj lau
Veiz Meijbangh Mbanjbyau
Ndi lau sou cix ngveh

I gaiq sou hingzseiz
Mbouj ngeix deuz hwnj ceh (dingj bya)
Gwzming hwnj ndwedfeh
Sou yaek ngveh guh lawz

Sou gwn nohlab dauq seih van
Cauhneix deuz ranz ce mbouj yuq
Veih gyoengq hawgwnz bang ranz Du
Deuz ce mbouj yuq guh mbanj fwz

Gyoengqsou haeuj rungh vunz cix daej
Gaeb aeu bit gaeq gyaemh cit ranz
Sou gwn nohlab dauq seih van
Cauhneix deuz ranz ce mbouj yuq

Gonq sou hengz oz(yak) gwn cienzngaenz
Cauhneix mbwn raen sou geij bux
Veih gyoengq hawgwnz bang ranz Du
Deuz ce mbouj yuq guh mbanj fwz

Daengx biengz caez hut Vangz Soujsenh
De daeuj Nguxcienh gwn bouxminz
Ciq Liuz Vazdangz* geij bak bing
Cukcaij(caudab)bouxminz raeuz guh luenh

De lij dok dongh youq Dunghlanz
Duzma raeuq canz caen lij ienq
Daengx biengz caez hut Vangz Soujsenh
De daeuj Nguxcienh gwn bouxminz

Buen(dwen) de bouxhak dauq lij gungz
Dauq aeu bouxwnq daeuj guh cin
Ciq Liuz Vazdangz geij bak bing
Cukcaij(caudab)bouxminz raeuz guh luenh
___________________________________
* Liuz Vazdangz dwg lijcangj bingcaeg.

Huzcamj gaihgiz gwzmingdangj
Bwnjce(sij ndaej) niujranz mbouj sangzsuenq
Gaiqboux youjcanj simdaeuz luenh
Raen raeuz hingzswenq(gwzming) de hozhaenz

Dungzci naek sim hengz gwzming
Mbouj yungh gwj siengj dauq bae ranz
Huzcamj gaihgiz gwzmingdangj
Bwnjce niujranz mbouj sangzsuenq

Liuzyez hihswngh dih(lawh) bouxminz
Raeuz doengz caez sim byaij bae gonq
Gaiqboux youjcanj simdaeuz luenh
Raen raeuz hingzswenq de hozhaenz

Sizhingz Gungcanjdangj
Minz boux an boux faenh
Naz sang daz(boiq) naz daemq
Doengz miz faenh guh caez

Dujdi baen bingzginh
Mbouj cinj boux douhlanj
Sizhingz Gungcanjdangj
Minz boux an boux faenh

Baen reih gyaemh baen naz
Miz gaiqmaz cwnghlwn
Naz sang daz naz daemq
Doengz miz faenh guh caez

Gonq dou gwn cieng mboujcaengz net
Ndwenlab ngeih bet cauz(cij) ndaej mwngz
Ndaej youq Nguxaiq sauq baihgwnz
Beh baenj(caeuz) ndaej mwngz cix mbouj lix

Cit ranz guh faenh gyaemh guh cien
Ngoenzneix boiz ien mwngz bouqbet
Gonq dou gwn cieng mboujcaengz net
Ndwenlab ngeih bet cauz ndaej mwngz

Sizhingz Sanhgvangh ceiq cix oz
Gaj mwngz gwn noh liux yaek lumz
Ndaej youq Nguxaiq sauq baihgwnz
Beh baenj ndaej mwngz cix mbouj lix

Swyouz gezvwnh cinh siuhsaj
Cuizyi lwgda raeuz gag leh
Gauneix mbouj aeu coenz bouxgeq
Haemq dez haemq meh guh gaiqmaz

Gonq sou vanzging cin ozlez
Mbanj ranz boux geq ddoengz daeuj yaz
Swyouz gezvwnh cinh siuhsaj
Cuizyi lwgda raeuz gag leh

Mwh gonq gyaeqeh(gyaeqnding) dingh cix aeu
Gauneix mbouj yungh ei boh meh
Gauneix mbouj aeu coenz bouxgeq
Haemq dez haemq meh guh gaiqmaz

Gonq nduj lwnzlij dingh mbouj ndi
Vihliux funij mbouj miz gienz
Gyangzbwz vwnhyinh guh ndaej bemz(cied)
Naih siengj ngougi coq ciuh vunz

Dawz guh cwz vaiz daeuj gandai
Baenz boux doeknaiq ndij souhgvi
Gonq nduj lwnzlij dingh mbouj ndi
Vihliux funij mbouj miz gienz

Dez meh danhdoh ndaej ngaenz cienz
Gai deng mbouj deng de mbouj siengj
Gyangzbwz vwnhyinh guh ndaej bemz
Naih siengj ngougi coq ciuh vunz

Gonq nduj dez meh haq cix bae
Cib bouxlae gouj boux ienq
Dawz lwg mehmbwk guh lanhcienh
Ngaemx yienq sawmingh hawj gaiqvunz

Danh ndaej boux vunz de lingzbienq
Dez meh mbouj siengj raeuz hix gyaez
Gonq nduj dez meh haq cix bae
Cib bouxlae gouj boux ienq

Raeuz hengz swyouz raeuz gag ra
Ndaej mbouj dwgda raeuz mbouj ienq
Dawz lwg mehmbwk guh lanhcienh
Ngaemx yienq sawmingh hawj gaiqvunz

下面引用由lwgyungh在 2004/01/22 02:28pm 发表的内容：
Cib bouxlae gouj boux ienq
...

Gonq cij fuz(dungx) veiz vwnh
Miz ngoenzlawz soengyoengz
Saenq dez meh gangj coenz
Baenz ciuh vunz ngougi

Mouj roxyiuj gyaeuj bi
Iq bouxmoiz daeuj dwnq(yaeuh)
Gonq cij fuz(dungx) veiz vwnh
Miz ngoenzlawz soengyoengz

Maij baenz dawh ndaw gok(gyok)
Dog cix ndaej hawj yinz
Saenq dez meh gangj coenz
Baenz ciuh vunz ngougi

Song coiq(raeuz) funij daeuj senhconz
Si hawj beixnuengx gyaemh boh'au
Dajbo giu lijgyau
Goengdauh youq funij

Dez meh gaemh(bik) mbouj i(ei)
Hawj funij miz gienz
Song coiq funij daeuj senhconz
Si hawj beixnuengx gyaemh boh'au

Dez meh gaemh roengzbae
Dingh mbouj bae nauqnauq
Dajbo giu lijgyau
Goengdauh youq funij

Cauhneix yauzyouj ndaej gaijfang
Caez haeuj hagdangz bae doeg saw
Yunghdi minzcuz raeuz gahrwz(dingqgangj)
Doengzcaez hwnj haw bae gwih max

Miz rap miz yom(ram) cix gag dawz
Bouxlawz cingj hu(fou) cix duihfanh
Cauhneix yauzyouj ndaej gaijfang
Caez haeuj hagdangz bae doeg saw

Mbouj bae dawz giuh hawj lezsinh
Mbouj guh sanj dingh mbouj guh hu
Yunghdi minzcuz raeuz gahrwz
Doengzcaez hwnj haw bae gwih max

Aangh(docih) mbanj neix sim ndi
Mouj si(gangj) bouxlawz rox
Dawz Canghswngh* bae yo
Lox naeuz bwnj(cungj) mbouj raen

Bae diemj daeng youzgyaeuq
Yaeuh de ndaej sam bi
Aangh mbanj neix sim ndi
Mouj si bouxlawz rox

Daengx mbanj vunz sim ndi
Mbouj si vunz mbouj rox
Dawz Canghswngh* bae yo
Lox naeuz bwnj mbouj raen

Canghswngh daeuj neix yuq(youq)
Buxbux(boux) doengz miz sim
Dawz de diem guh ngaenz
Ngwn(nyengh) naeuz de mbouj yuq

Angh(docih) beixnaeungx mbanj ranz
Caez daeuj bang caugu
Canghswngh daeuj neix yuq(youq)
Buxbux doengz miz sim

Angh gyoengqde doengz meh
Bouxgeq doengz miz sim
Dawz de diem guh ngaenz
Ngwn naeuz de mbouj yuq
_______________________
*1927 nienz caet nyied daengz 1928 nienz seiq nyied mwh gwzming dihcauzhaenx,boux canyouj Veiz Bazginz heuh Cwnz Soujhoz(mingzhauh heuh Canghswngh,doeklaeng de banben)daeuj daengz Fungsanh Bonzyangz yangh mbanj Bahbonz ndoj youq, aenvih ndaej vunz ndaw mbanj yo de,cij mienj deng haih.Gwzming hingzsi cienq ndei le,Veiz Bazginz daiq cib lai boux dungzci bae mbanj Bahbonz guh gunghcoz,couh youq gizhaenx bien fwen hawj senhconzyenz yienjciengq,docih vunzlai yenjhu."MBANJ NEIX VUNZ SIM NDI"caeuq"BOUXBOUX DOENGZ MIZ SIM"couh dwg ndawde dih song hot fwen.

Caez hwnjdaeuj lenzloz
Raek bozgoz coq ndamg
Laeh caeg ok Doenglanz
Menh caux ranz raeuz youq

Laux Gung daeuj cit ranz
Hwnj bya sang bae ndoj
Caez hwnjdaeuj lenzloz
Raek bozgoz coq ndamg

Beixnuengx mbouj yungh hiq(heiq)
Lij miz gungcanjdangj
Laeh caeg ok Doenglanz
Menh caux ranz raeuz youq

Daengq goz yangh daibyauj
Mbouj yungh lau dizyinz
Lez sinh aih boq singz
Raeuz itdingh hingz ndaej

Raeuz ninz geh baqlingq
Vih gwzming goenglauz
Daengq goz yangh daibyauj
Mbouj yungh lau dizyinz

Lezsinh aiq naeuz haenq
De miz ngoenz liux mingh
Lez sinh aih boq singz
Raeuz itdingh hingz ndaej

Ndwencieng bae cib haj
Lox beix caj gaungoenz
Nuwngx miz gaiqmaz haen(gaenj)
Miz coenz mbouj hawj rox

Laep daengz Gemhgoraeu
Ban mwhcaeuz cix caj
Ndwencieng bae cib haj
Lox beix caj gaungoenz

Ngoenzde beix gag youq
Ngix(siengj) youx raemxda roengz
Nuwngx miz gaiqmaz haen
Miz coenz mbouj hawj rox

Beh(danghnaeuz) nuengx ndaej gaiqbix(beix)
Swh(lumj) duz(boux) meh ndeu seng
Daeuj dawz dog(nuengx) guh bengz
Ngoenz gaem gen liuh mbanj

Duz vunz ciengx duz vunz
Amh gwn baenz mbouj hiq(heiq)
Beh nuengx ndaej gaiqbix
Swh duz meh ndeu seng

Swz mingh coq dij loengx
Swh boux coengq cangyenz
Daeuj dawz dog guh bengz
Ngoenz gaem gen liuh mbanj

Doengz naengh fwngz gaem fwngz
Doengz soengz(ndwen) gen banq mbaq
Beh ndaej nuengx guh yah
Swh boux vax daengngoenz

Ndaej ndij nuengx guh huh(baenz doiq)
Beix goj net liux gim
Doengz naengh fwngz gaem fwngz
Doengz soengz gen banq mbaq

Coenz vah naeuz baerix(yienghneix)
Giq(geiq) coq dungx nuengx daz(gyaez)
Beh ndaej nuengx guh yah
Swh boux vax daengngoenz

Bet nyied cib haj raemx dumh yaemh(haenzdah)
Song raeuz doengz naengh mbouj hawj liz
Dez meh ngwn gaj bae dawzndij(hixndei)
Song raeuz doxliz baen mbouj ndaej

Ngoenzlawz doiqbangx roengzdaeuj cunz
Lumj baenz duzdoengz roengz gwn raemx
Bet nyied cib haj raemx dumh yaemh
Song raeuz doengz naengh mbouj hawj liz

Song raeuz doengz naengh mbouj hawj sanq
Doengz saemh doiqbangx mbouj hawj liz
Dez meh ngwn gaj bae dawzndij
Song raeuz doxliz baen mbouj ndaej

Bazgoh:Buenq(danghnaeuz) beix ok rog bae langhbuengq
Gyoh daengz mwngz nuengx cix dauqma
Mbouj dwg gyoh daemz rox gyoh naz
Go yaeng dauqma daengz biengzneix

Beh youq gizlawz hix lajmbwn
Beh gwn gizlawz hix beixnuengx
Buenq beix ok rog bae langhbuengq
Gyoh daengz mwngz nuengx cix dauqma

Beix aih(suihyenz) ok rog bae guh guen
Sim swh lij cuenh(niemh) daengz nuengx daz
Mbouj dwg gyoh daemz rox gyoh naz
Go yaeng dauqma daengz biengzneix

Song raeuz doengz youq swz suenq swz
Swh boux roengz haw bae guhbuenq
Liz mwngz byag mwngz liux goz nuengx
Ra boux muengh beix hix mbouj miz

Song raeuz guhcaemz laj dienhah
Dwen daengz nuengxdaz sim cix fuz(fouz)
Song raeuz doengz youq swz suenq swz
Swh boux roengz haw bae guhbuenq

Ij ndij nuengx dox caux ranz gwn
Lajndang beix lwnz bouxlawz muengh
Liz mwngz byag mwngz liux goz nuengx
Ra boux muengh beix hix mbouj miz

Aih deuz hoj deuz bing
Dwen gim simdaeuz luenh
Youq gizlawz liux buengh(nuengx)
Siengj daengz beix rox miz

Deuz caeg sim aih luenh
Lij cuenq daengz nuengx gim
Aih deuz hoj deuz bing
Dwen gim simdaeuz luenh

Youq gizlawz ij gyaez
Bae gizlawz ij muengh
Youq gizlawz liux buengh
Siengj daengz beix rox miz

Bazgoh:Mouj saenq dungx lwgfwz(bouxwnq)
Vaen ndwq lox naeux ngaiz
Mbouj saenq dungx nuengxgvai
Biq naiz lox naeuz ndaej

Mbouj saenq doengh fag liemz
Ciuq(yaepndeu) gvej em gvej nywj
Mouj saenq dungx lwgfwz
Vaen ndwq lox naeux ngaiz

Mbouj saenq dungx guh dawh
Ciuq nyaep souh nyaep ngaiz
Mbouj saenq dungx nuengxgvai
Biq naiz lox naeuz ndaej

Cinz Caijyez:Beh beix mbouj saenq saem(sim)
Ndaep daeng hawj go ciuq
Raemj yieng doiq naj miuh
Beh diuh(vut) cix dai liux

Beh bix naeuz mbouj sinq
Dingh ndij beix raemj ngaenz
Beh beix mbouj saenq saem
Ndaep daeng hawj go ciuq

Beh mbouj gyaez beixgvai
Nuengx dingh dai lauqciuh
Raemj yieng doiq naj miuh
Beh diuh cix dai liux

Ngoenz beix naengh ranz baenz doeknaiq
Youh bae bingzsaih(henzdah) ciuq va meuz
Gonq gangj dinghciuh gaiq(hawj) song raeuz
Mbouj ngiz daengz laeng aeu mbouj ndaej

Gonq gangj ciuhnamh boiq ciuhrin
Daengz laeng gimcingz boiq hazgyaiq
Ngoenz beix naengh ranz baenz doeknaiq
Youh bae bingzsaihciuq va meuz

Gwnaeuz(laihnaeuz) guenyaem mbouj siuseq(seiq)
Lox naeuz dez meh mbouj hawj aeu
Gonq gangj dinghciuh gaiq song raeuz
Mbouj ngiz daengz laeng aeu mbouj ndaej

Caijyez:Mbouj gyaez duj mauxdan
Miuh bya sang dingh gyaiq
Beh ce(ndek) mwngz dahraix
Miuh samgaiq dingh dawz

Aeu gim ngaenz guh dwngx
Vaij(gvaq) laj inq bouxyongz
Mbouj gyaez duj mauxdan
Miuh bya sang dingh gyaiq

Beh nuengx ce beix gim
Miuhlawz raen cix gvaiq
Beh ce mwngz dahraix
Miuh samgaiq dingh dawz

Bazgoh:Haiz guhlawz mbouj bweng(mbongq)
Laep ndwen go cix byaij
Haiz guhlawz mbouj vaih
Vih beix byaij gyanghwnz

Vunz yaek vaij(gvaq) lohlaux
Lau ginhdui rox cuengq(nyangz)
Bazgoh:Haiz guhlawz mbouj bweng
Laep ndwen go cix byaij

Fwn doek beix lawh(hix) bae
Byaijraez go lawh byaij
Haiz guhlawz mbouj vaih
Vih beix byaij gyanghwnz

Bing(dangbing) beix roengzlaj bae Namzningz
Mboujcaengz daengz ging go cix muengh
Yaek siengj dauq ranz raen mwngz nuengx
Gyauyenz mbouj cuengq beix lawh gungz(gunnanz)

Beix aih ok rog bae guh guen
Sim swz lij cuenq daengz nuengx gim
Bing beix roengzlaj bae Namzningz
Mboujcaengz daengz ging go cix muengh

Beix aih ok rog beix bae gyae
Dwen daengz nuengxgyaez simdaeuz luenh
Yaek siengj dauq ranz raen mwngz nuengx
Gyauyenz mbouj cuengq beix lawh gungz

Lanzfwnh:Beh beix bae sengj nuengx bae riengz
Go bae deuz biengz sau bae ndij
Vih nangz doxgyaez daengz cauhneix
Dingh ndij Youxngeih(coh'iq Bazgoh) caux ndeu ranz

Danh ndaej ndij go mwngz doengz naengh
Dez meh aih daengq mbouj dauq biengz
Beh beix bae sengj nuengx bae riengz
Go bae deuz biengz sau bae ndij

Meh sau haq sau hix mbouj bae
Simhoz lij gyaez ndij Youxngeih
Vih nangz doxgyaez daengz cauhneix
Dingh ndij Youxngeih caux ndeu ranz

Cin duz meh seng gou cix geq
Cienbuen yizcez ce gaiq mwngz
Ninzndaek roxnyinh gaiq yungh lumz
Ganq guh ranz mwn caj gou dauq

Yizcuj Yizcungh* lij lwgnyez
Haet haemh son de gaiq yungh leh
Cin duz meh seng gou cix geq
Cienbuen yizcez ce gaiq mwngz

Hong reih hong naz ce mwngz ganq
Liuh* bae hagdangz ce gaiq mwngz
Cin duz meh seng gou cix geq
Cienbuen yizcez ce gaiq mwngz
______________________
*Yizcuj Yizcungh dwg lwg yah gonq Bazgoh.
*Liuh dwg Veiz Cinh,nuengx Bazgoh.

Liz duz nuengxgvai ndaej geij ndwen
Haet haemh gwj dwen simdaeuz get
Gaeuj saenq baenz lengq sim mbouj net
Guhlawz sim get baenz neix lai

Gwnz mbwn boux sien huh(sueng) doiq huh
Laj deih loengznawx yuenz doiq yuenz
Liz duz nuengxgvai ndaej geij ndwen
Haet haemh gwj dwen simdaeuz get

Rox mwngz youq ndei mbouj youq ndei
Beix gag ndaejnyi simdaeuz get
Gaeuj saenq baenz lengq sim mbouj net
Guhlawz sim get baenz neix lai

Buen beix ok rog bae dang bing
Daengq mwngz nuengx gim youq ranz caj
Daengq mwngz youq ranz gaej yungh nyaz(heiq)
Ganq bouq ganq yah guh ndeindei

Yizcuj Yizcungh yax lij iq
Manh(menh) goeng naiq guenj lwg gim
Buen beix ok rog bae dang bing
Daengq mwngz nuengx gim youq ranz caj

Beh beix ok rog liz bae gyae
Bae ndaej geij bi yaek vuiz vah
Daengq mwngz youq ranz gaej yungh nyaz
Ganq bouq ganq yah guh ndeindei

Ok rog sim cix van
Ndij gonhcangj guh gyoengq
Roengz doengh bae coh doengh
Dingh aeu byoengq daengz giz

Baih naj roen aih hoj
Mbouj gyoh daengz baih ranz
Ok rog sim cix van
Ndij gonhcangj guh gyoengq

Aih byaij loh roen gyae
Ndij vunzndei guh gyoengq
Roengz doengh bae coh doengh
Dingh aeu byoengq daengz giz

Dajdingh raemx dumh mbwn
Fwngz gaem fwngz mbouj cuengq
Doxgyaez lumj beixnuengx
Rox guh yienghlawz lumz

Guenyaem ndij saenzfuz(baed)
Bux(boux) baengh bux guh vunz
Dajdingh raemx dumh mbwn
Fwngz gaem fwngz mbouj cuengq

Lij nding goengh bau ien
Doxyien(raen) mbouj gyaez cuengq
Doxgyaez lumj beixnuengx
Rox guh yienghlawz lumz

Beix naeuz cinjdingh cix cinjdingh
Song raeuz vuenh saenq coq ndawhoz
Gaiq yungh uengjfeiq lwg bouxcoz
Hot vah ndawhoz mbouj hawj lumz

It daengq ngeih daengq duz nuengx bengz
Coenz vah bouxhenz gaiq yungh saenq
Beix naeuz cinjdingh cix cinjdingh
Song raeuz vuenh saenq coq ndawhoz

Go lumj lwgbya youq dahlaux
Go lumj lwgnyauh ndaw raemx mboq
Gaiq yungh uengjfeiq lwg bouxcoz
Hot vah ndawhoz mbouj hawj lumz

Beh beix vid(vut) namh cix vid mbwm
Beh beix vid mwngz cix vid meh
Song fwngz vix mbwn hawj mwngz deq(yawj)
Song baih siuzsij(mieng) bet cib nienz

Song raeuz raiz saw coq gyaeujhoq
Youh raiz mingzcoh coq gyangfwngz
Beh beix vid namh cix vid mbwm
Beh beix vid mwngz cix vid meh

Beix aih bae gyawj gyaemh bae gyae
Yax lij gyaez mwngz lumj dez meh
Song fwngz vix mbwn hawj mwngz deq
Song baih siuzsij bet cib nienz

Song raeuz doxgoengh siuj deihfueng
Doxliz gij ndwen mbouj raen naj
Ndwen sam cib ngoenz dauq ndi gvaq
Hot vah doxdaengq mbouj hawj lumz

Mbouj un goengh canz(liengzdaiz) gyaemh goengh cangq(cuengq)
Danh ndaej goengh mbanj gyaemh goengh biengz
Song raeuz doxgoengh siuj deihfueng
Doxliz gij ndwen mbouj raen naj

Nuengx swh roeg'enq mbin gvaq bya
Beix swh roegya mbin gvaq baq(ndoi)
Ndwen sam cib ngoenz dauq ndi gvaq
Hot vah doxdaengq mbouj hawj lumz

Beix yaek bae hagdangz
Nuengx manh dawz sim bingz
Byaij Gyauzyenz* bae dingz
Ngeix daengz mwngz goz nuengx

Ndaem va coq gwnz singz
Muengh rumz gim bae ganq
Beix yaek bae hagdangz
Nuengx manh dawz sim bingz

It daengq ngeih youh daengq
Youzcaih raemx faen bingz
Byaij Gyauzyenz bae dingz
Ngeix daengz mwngz goz nuengx
___________________
*mingz aenbya.

Beix ok rog bae nanz
Sim lij van lij gyoh
Roen gyae cien leix loh
Gyoh geiq saenq nanz daengz

Ngux nyied dauq baih neix
Beix dingh dauq bae ranz
Beix ok rog bae nanz
Sim lij van lij gyoh

Roen gyae loh youh gyae
Beix gyaez mwngz mbouj rox
Roen gyae cien leix loh
Gyoh geiq saenq nanz daengz

Beix ngoenz byaij gwnz youh byaij laj
Dohse nuengxdaz hab guenyaem
Youq ranz geij bi mbouj bienq sim
Guhcaemz gouj cin mbouj hawj duenh

Raeuz ndaej cib bet cix gangj cin
Manh giet diuzcingz naek baenaj
Beix ngoenz byaij gwnz youh byaij laj
Dohse nuengxdaz hab guenyaem

Nuengx ndaej daeuj goq cix daeuj goq
Gaej guh dazfouh lanh daej bwnz
Youq ranz geij bi mbouj bienq sim
Guhcaemz gouj cin mbouj hawj duenh

Nuengx gaq giuzrin hawj beix raih
Haethaemh ndaej byaij cunz nuengx ranz
Raemx lae roengz dah bya rongz dan
Sim beix bonjsuenq daeuj boiq mwngz

Yijgaiq sim gyoh hoz youh gyaez
Siengj ndij nuengx bae doengz gip vaiq
Nuengx gaq giuzrin hawj beix raih
Haethaemh ndaej byaij cunz nuengx ranz

Ndij nuengx doengz soengz gwnz giuzrin
Song baih aencingz mbouj hawj sanq
Raemx lae roengz dah bya rongz dan
Sim beix bonjsuenq daeuj boiq mwngz

Gaeuj youh gaeuj mbouj raen
Mwh lawz daengz liux nuengx
Ce gaiqmaz gwq conq(niengh)
Gwq muengh youh mbouj raen

Ce gaiqmaz gwq ciuq(muengh)
Heuh youh heuh mbouj daengz
Gaeuj youh gaeuj mbouj raen
Mwh lawz daengz liux nuengx

Ce gaiqmaz gwq siengj
Buenz muengh mwngz guh nuengx
Ce gaiqmaz gwq conq
Gwq muengh youh mbouj raen

Liz duz saihoz* ndaej cib ndwen
Haethaemh baez dwen simdaeuz get
Youh aeu coenz vah mwngz daeuj ndiep
Beix naengh laj ndiep raemxda roengz

Mbouj fug dauq bae hawj vunz guenj
Youh lingh dauq suenq ndaej geij ndwen
Liz duz saihoz ndaej cib ndwen
Haethaemh baez dwen simdaeuz get

Gyanghaemh baenzhwnz raen ndeigyaez
Mbouj beij doengz gyaez sim yax net
Youh aeu coenz vah mwngz daeuj ndiep
Beix naengh laj ndiep raemxda roengz
____________________________
*Youq neix dwg naeuz maexyah dwggyaez de.

Uengjfeiq bouqyah(gvanbaz) raeuz souhgvei
Raeuz doengz hengz ndei hawj vunz haenh
Ei gaiq coenz vah raeuz doxdaengq
Swzswz niemh daengz gaej hawj lumz

Raeuz gaej yungh saenq coenz bouxwnq
Baih fwz hozhwn fwz cix si(gangj)
Uengjfeiq bouqyah raeuz souhgvei
Raeuz doengz hengz ndei hawj vunz haenh

Mbouj miz mingzyi swh boux dai
Daengq duz nuengxgvai dawz sim maenh
Ei gaiq coenz vah raeuz doxdaengq
Swzswz niemh daengz gaej hawj lumz

Ndwencieng co sam bing cix ndaej
Yangzhau lij coi dawz bae gyaeng
Ngeix gaiq baenznyaenx daiq goenq saem
Nuengx bae ciengx nyungz gyaemh gwn namh

Bouxcaeg vaijdaeuj raeuz hwnj bya
Hwnj bae byalawz de hix laeh
Ndwencieng co sam bing cix ndaej
Yangzhau lij coi dawz bae gyaeng

Bawx Cwnz Suswnh daeuj soengq souh
Gyanggai miz boux lij dacaengz
Ngeix gaiq baenznyaenx daiq goenq saem
Nuengx bae ciengx nyungz gyaemh gwn namh