花山的故事
11. GAMJ GOENGSIEN
Doxcienz youq gouj cien gouj bak gouj cib gouj bi gaxgonq, gwnzmbwn goengsien Nanzgiz, youq bya sien mbwq lo. Miz ngoenz ndeu, de gwih duzroeg he roengz laj deih daeuj youz. Gvaq bya sang, hamj dah gvangq, gumj yawj doenghnaz bingz lumj gingq, dieg gvangq mbouj miz haenz, bouxsai gaenx guh naz, vunzbaz angq daemj baengz, gwndaenj ndei, bouxlaux lwgnyez cungj vuenyungz. Goengsien yawjraen lajdeih vunz raeuz yienghneix gyaeundei, simcingz hailangh, riu yumyum, aeu fwngz rub gij mumh hau de laemxdaemh haenh ndei.
Roegsien roengz baihnamz, mbin vaiq lumj rumz, rem baenz dienh, baez yaepda couh daengz Cungzcoj Dozluz giz dieg neix. Goengsien raen gizneix dieg ndongj ndoi fwz, gya gungz vunz iek, dauqcawq siliengz yietyiet, roxnyinh gig mbouj goengbingz, couh dauq hwnj mbwn bae, aeu fag giemq caeuq aen gyong le, dauqma baihnamz, daengz congh gamj Bya Miuhlaeng bae youq. Goengsien ciemz aeu dug bwn rieng duzroeg de gwih haenx le, couh hawj roegsien baema lo.
Daengz haemh, goengsien dawz faggiemq de baez mbongq roengz laj namh bae, fag giemq haenx couh lumj naq liz gung nei, duet okbae dwk bywx, rin byoengq namh loem, gijmaz cungj laengz mbouj ndaej. Itcig mbongq bae ngeih cib leix gyae, mbongq daengz Cojgyangh, yienzhaeuh cij swnh roen gaeuq dauqlaeng, yinx raemx DahCojgyangh gvaqdaeuj sawdikdik. Ngamq haemh ndeu, doengh gij cingj hawq ndaw mbanj raemx cungj rim liux. Doeklaeng, goengsien youh hwnj gwnz dingj bya bae, dawz dug bwn rieng roeg haenx baez vad, yiengj dwk fux, din mbwn fwj laep couh fanfoedfoed; caiq roq mbat gyong, sikhaek byajraez rumrum. Yaep he, fwn doek soebsoeb, dauqcawq miz raemx lo.
Goengsien banh sat sam gienh saeh neix le, dawz sam gienh fapbauj yo haeuj ndaw gamj bae, couh naengh youq yietbaeg. De gag ngeix: gou aeu caen da raen gyoengq vunz neix gvaq ndei saedceij le cij hwnj mbwn bae.
Giz dieg ndongj dieg byom neix, ndaej daengz goengsien bangcoh, soucingz bienq ndei, yienghyiengh fungsou. Hoeng, caizcawj Fanh lauxyez swngzseiq bozsoz beksingq, caetnyied, Fanh lauxyez couh dauqcawq sou co lo. Song boux lwg Fanh lauxyez ngamq cib geij bi, raen boh de ok rog bae, hix caemh caegcaeg riq hwnj bya bae boenq roegraeu. Roegraeu lek dwk mbin deuz “byubyu”, gyoengqde couh gaenlaeng boenq bae. Boenq gwnz dawz laj, raen congh gamj le, couh ndonj haeujbae.
Seiz haenx, goengsien cingq youq ndaw gamj yietndang, raen miz vunz daeuj, couh vaq guh geu hoenzou he, biu ok rog bae. Song laeq lwgnyez ruenz daengz ndaw gamj, raen gwnz baj rinheu baij miz haeuxvanj, baenz deb gaubingj caeuq makdauz, lumj nengznyaen raen lwed nei, couh gvaengz gvaqbae doxciengj gwn byoebbyoeb. Liuh mbouj daengz, gij vanj deb coux bingj caeuq makdauz haenx, gwn liux youh dauq rim boiz. Song lwg neix laemxdaemh gwn liux geij baez, lwglwg cungj gwn dwk dungx yaek dek. Daegnuengx naeuz: “Gizneix lumj baenz conghgamj bouxsien nei, doengh gij bingj mak ndaw vanj haenx, dwg gijgwn bouxsien dem. Raeuz vaiq deuz ba, caj yaep bouxsien rox le ngaiz mboengj caekhaex bw. ” Gangj sat, song laeq lwgnyez couh coemxcangh roengz laj bya ma lo. Daeggo lij daengq nuengx de naeuz : “Ma ranz gaej lwnh hawj bouxwnq nyi bw.”
Goengsien raen song laeq neix dwg lwgnyez, hix mbouj leixlangh baenzlai, cij dawz di va nywj daeuj goemq bak gamj sat lo.
Ngoenz gvaq ngoenz yietyiet, ciet gvaq ciet youyou. Baez vaenqveq youh daengz batnyied cib ngux lo. Nyawhdaeq gwnzmbwn heuh goengsien Nanzgiz hwnj mbwn bae gwn laeuj, goengsien angq raixcaix, sikhaek roemx fwj bongh bae.
Ciet ndei gwn hoengh, batnyied cibngux ngoenz haenx, ranz Fanh lauxyez guh haujlai gaubingj. Bouxlawz rox, daegnuengx lwnh coenz vah he: “Dou youq ndaw gamj bouxsien gwn gij gau haenx cij ndei ne!” Daeg godaih gosam caeuq cejngeih de dingq le, sikhaek saemh cam dwg gijmaz saeh. Daegseiq Daegngux roxdaengz saehcingz muenz mbouj gvaq lo, couh ciuq soh lwnh hawj gyoengqde nyi. Daeggo dingq le, naeuz: “Caen ngawz, sou vihmaz mbouj senq gangj? Ndaw gamj bouxsien itdingh miz fapbauj, bouxlawz ndaej gij fapbauj haenx, boux de couh dwg lajmbwn boux ceiq miz cienz lo. Ngoenzcog raeuz caezgya dauq hwnj bya bae cimh.”
Ngoenzlaeng daihcaeux, haj beixnuengx muenz boh meh de caegcaeg hwnj bya bae lo. Song daeg nuengx ndaej bae gvaq couh guh boux yinx roen. Haujlai nanz cij cimh daengz bak gamj. Gyoengqde ndonj haeujbae, raen gwnz baj rinheu haenx vanzlij baij miz gaubingj caeuq makdauz. Haj beixnuengx iek lumj guk nei, doxciengj vax gwn naemq dig. Cejngeih de lij naeuz: “Ndaw ranz raeuz yienz miz baenzlai gij gwn, hoeng cungj mbouj beij ndaej gij gaubingj caeuq makdauz neix ndeigwn.” Gosam hix naeuz: “Doengh gij vanj gij deb neix caen dijbauj, gij bingj mak ndaw de gwn liux caiq miz, cungj mbouj rox caenh.” Caezgya dingq le, roxnyinh miz dauhleix, couh it boux vax it aen yo haeuj ndaw buh bae. Daeggodaih naeuz: “Caezgya caiq cimh yawj, mbangjbaez vanzlij miz gij doxgaiq engqgya dijbauj dem li.” Yienghneix, haj beixnuengx mbangj benz sang, mbangj geuh rin, guh dwk yungjfoedfoed, song laeq haemq iq haenx, benz sang mbouj ndaej, geuh rin hix mbouj miz rengz, hoeng gwn dwk dungx raeng le, youq ndwi fouz saeh, couh set nyouh haeuj gij vanj deb dawz mbouj liux haenx bae.
Daeggo vunz sang fwngz raez, doeng yaek sae mbon, youq ndaw congh bangx gamj raen miz fag giemq he, migmyagmyag, youh raen aen gyong he gig gyaeundei, vanzlij miz dug bwn rieng roeg he, wenj gim yubyub. De maengx dwk hemq hwnjdaeuj: “Cimhraen lo, cimhraen lo!” De ngonz dwk da byaengq bak aj, vah gangj mbouj ok bak, caenh youq dwk ngon’dwddwd. Daegsam raen gij yienghsiengq de miz di lau he, naeuz: “Raeuz aeu gij doxgaiq bouxsien, de ndaej cuengq gvaq raeuz la?” Daeggo daekeiq han naeuz: “Caen mbei saeq! Bouxsien lij lau vunz ni! Raeuz fatcaiz lo!” Cejngeih de angq dwk saet hwnjdaeuj, dawz dug bwn roeg haenx luenh foux luenh hemq. Daeggo hix raek fag giemq youq gwnz ndang, youh roq aen gyong yiengj dungdung, song daeg nuengx de ga sang ga daemq, swnh gij sing gyong diuq foux hwnjdaeuj. Daegsam ndwn henz de yaep he, hix gaen foux hwnjdaeuj lo, nauh dwk ndaw gamj hemqgyadgyad.
Goengsien Nanzgiz youq gwnzmbwn gwn laeuj, sawqmwh roxnyinh gyaeuj dot da raiz, couh rox daengz miz vunz loengh gij bwn rieng roeg de; sawqmwh youh roxnyinh sim genxngwdngwd, in baenz raq baenz raq, couh roxnaeuz miz vunz roq aen gyong de. “Mbouj ndei lo!” De baez naeuz coenz neix le, couh gipmuengz mbin roengz lajdeih vunz raeuz daeuj. Ma daengz bak gamj, yawj raen geij boux doengzdaeg doengzdah cingq youq ndaw gamj luenh hemq luenh foux, goengsien ndatheiq raixcaix, de caen nyaenx mbouj ndaej lo, couh baez vad genbuh, cij raen raq rumz hung he daj lajnamh gienj hwnjdaeuj foedfoed, bongj haeuj ndaw conghgamj bae, haj beixnuengx haenx, mazmwnh saegsaeg, lij caengz roxnaeuz dwg gijmaz saeh, couh bixlix baengxlaengx ngaiz bongj hwnj bangx gamj bae, aen ndang nem youq gwnz haenx gaenjdwtdwt, caih mwngz baenzlawz cak hix mbouj miz yungh. Goengsien ngeix daengz vih gyauyin caizcawj Fanh lauxyez, daegdingh diuh gyaenh ndang daegsam hawj de, youh youq gwnz namh sij miz “yak miz yak bauq” yienghneix seiq cih saw.
Fanh lauxyez geij ngoenz mbouj raen naj lwg de, simyap dwk haeux mbouj gwn, ninz mbouj ndaek, couh baij bang guenjgya mageq de seiqlengq bae cimh. Doeklaeng cimh daengz aen gamj neix. Haeuj ndaw gamj bae, roxnyinh yaemyietyiet, liengzsumsum. Fanh lauxyez nyengh naenggyaeuj mo haeujbae, raen gwnz namh miz donh seihaiz he, byaengq da baez yawj, yienzlaiz dwg gyaengh ndang Daegsam bonjfaenh, youh raen henz de sij miz seiq cih saw haenx, sim doeksaet yat. De ngiengx gyaeuj bae yawj, youh raen seiq boux byongh ngumhngaeuz vunz nem youq bangx gamj, cungj dwg gij lwg bonjfaenh liux. Fanh lauxyez rongx sing daejngongngong, muenhluenh liux, ram donh seihaiz daegsam de saemxsaemx saxsax roengz laj bya ma lo.
Fanh lauxyez ma daengz ndaw ranz, youh naiq youh iek, yied ngeix yied lau, baenz bingh ninz roengz congz bae hwnj mbouj ndaej lo, henz rwz cungj caenh yiengj naeuz: “Yak miz yak bauq”, caj daengz seiz haeuxlaeng baenz sou, de couh dai lo. Fanh lauxyez baez dai, gyoengq yahlaux yahnoix caeuq gyoengq mageq de, boux deuz doeng deuz sae, siksinz sanqdanh liux.
Daj seiz haenx daeuj, beksingq mbouj yungh caiq gyau co boiz caiq, gag guh gag gwn, bouxboux angqyangz, an’onj gvaq saedceij. Goengsien Nanzgiz vih lajmbwn beksingq guh saeh ndei le, roxnyinh mbouj yungh youq ndaw gamj nanz lai, couh roemx fwj gyangh mok hwnj mbwn baema lo.
Vunzseiq daih cienz daih, diendeih ngoenz bienq ngoenz, hoeng ndaw gamj seiq boux byongh ngumhngaeuz vunz haenx cungj bienq mbouj ndaej. Seizneix, mwngz daengz Cungzcoj Yen Dozluz Gunghse Nazban dadui bae, sijsaeq yawj ndaw gamj Bya Miuhlaeng, gij yiengh vunz bangx gamj vanzlij raen cingxyaeyae. (Ciz Ciningz、Luz Yingh cingjleix)
——————摘自[壮侗语言文化网]
| 欢迎光临 僚人家园 (http://bbs.rauz.net.cn/) | Powered by Discuz! X2.5 |