花山的故事
4. GOJ HOZ DENHFUNG
Cienzgangj Hoz Denhfung seih vunz Ningzmingz Yen Mbanj Yienhgingq. Seiz de ndaej gouj bi, meh de cingj canghrin youq gwnz bya siuq ndaej aen doiqrin hung ndeu, dajsuenq ram ma ranz daem haeux. Haet ndeu, Denhfung hwnj congz le, raen meh de cawj baenz rekvaiz haeuxngaiz, couh cam: “Meh, mwngz cawj baenzlai haeuxngaiz guh maz?” Meh de naeuz: “Gou cingj canghrin siuq ndaej aen doiqrin ndeu, ngoenzneix cingj geij boux lungzau rengz hung daeuj gwn ngaiz, bang ram ma ranz.” Denhfung naeuz: “Aeu baenzlai vunz bae guh maz! Doiqrin youq gyawz? Daiq gou bae yawj. ” Daxmeh daiq de bae daengz giz dieg cuengq doiqrin. Denhfung raen le, yungh fwngz ngauzngauz doiqrin song mbat, couh yaengx de hwnj gwnz gyaeuj bae, dawz bakdoiq goemj roengz gyaeuj bae, lumj daenj mauh ityiengh dawz doiqrin ma ranz lo.
Denhfung ndaej cib caet bet bi seiz, ngoenzngoenz caeuq gyoengq hauxseng ndaw mbanj loengh cax nyingz cienq. De nyingz cienq gig cinj, baez bungz daengz bang lingz daeuj caeg gwn haeuxmaex, de it mbat couh nyingz dai geij duz; gwnzmbwn miz roeg mbin gvaqdaeuj, de mbat cienq couh nyingz doek roengzdaeuj. Denhfung rengz hung gvaq vunz, goengfou ak, seiq fueng bet baih cungj rox caez. Gyoengq hauxseng cungj haengj comz youq ranz de guhdoih, gap lauxgeng. Mwh haenx, ndaw biengz daih luenh, lwgminz souh haemz souh hoj gangj mbouj caenh. Denhfung caeuq gyoengq baengzyoux de souh mbouj ndaej vuengzdaeq doegsieb apbik, gietsim hwnjdaeuj cauhfanj. Gyoengqde itmienh cagaenj lienh goengfou, itmienh baij vunz daengz gak mbanj gak ranz bae ciu bingmax, caj seizhaeuh miz leih couh hengzsaeh.
Hoz Denhfung ciu bingmax cauhfanj gienh saeh neix, gig vaiq couh cienz daengz gingsingz bae. Haet ndeu, vuengzdaeq naengh ciuz, miz boux guen hung ndeu bauqsaenq naeuz, Hoz Denhfung rengz hung goengfou ak, seizneix cingq ciu bingmax cauhfanj, cingj vansei(vunz lajfwngz baenzneix heuh vuengzdaeq) gaem dingh cawjeiq, vaiq di cawz gij huxhaih neix bae. Vuengzdaeq duenh seizgan neix daeuj cingq seih youheiq, vih de naengh mbouj maenh, gwn mbouj van, ninz mbouj onj. Dingq boux guen hung bauq le, couh roengz lingh baij cinhvangz guh dungjsai, daiq geij cien bingmax hwnz ngoenz ganj bae daengz Mbanj Yienhgingq, yaek gaemh gaj Hoz Denhfung.
Bing vuengzdaeq daeujdaengz laj genglaeng Mbanj Yienhgingq, youq naj bya laeng bya caengzcaengz humx gvaqdaeuj, loih (roq) gyong roq laz, daih hemq daih rongx aeu gaemh Hoz Denhfung. Hoz Denhfung cingq caeuq gyoengq beixnuengx loengh cax lienh dau, sawqmwh miz vunz daeuj bauq naeuz bing vuengzdaeq daeuj gaemh de, de couh caeuq gyoengq beixnuengx hwnj gwnz genglaeng bae yawj. Caen dahraix, youq laj bya cungq daengjlieblieb, bingmax cauz swdswd. Hoz Denhfung yawj yaep he, sousou youzyouz gaem gungcienq okdaeuj, laebdaeb nyingz sam cienq. Mbat cienq daih’it nyingz doek mbawgeiz de, mbat cienq daihngeih nyingz dai cib geij boux bing, mbat cienq daihsam nyingz haeuj ndaw dieg cap bing haenx bae, nyingz laemx liux daih buek bingmax. Gyoengq beixnuengx raen Denhfung cienq nyingz ndaej gig cinj, sim cungj hoengz caez, daihgya couh faenfaen rag gung nyingz cienq, nyingz ndaej bing vuengzdaeq sieng dih sieng, dai dih dai, doih cungj luenh liux, bouxboux dodxceng deuzmingh. Bing vuengzdaeq itgungh veizgungh liux sam baez, sam baez cungj deng Denhfungz caeuq gyoengq beixnuengx de hoenx doiq bae, yienghneix itcig genhciz liux sam ndwen.
Doeklaeng, miz ngoenz ndeu byonghhwnz, Hoz Denhfung cingq ninz ndaekfwfw, sawqmwh dingqnyi rog ranz bingmax hemq mbouj dingz, gawqgawq aeu gaemh Hoz Denhfung. Denhfung rox saehcingz mbouj ndei, sikhaek gaem gungcienq cung ok ranz bae. Bing vuengzdaeq humx baenz geij caengz, baihnaj ngamq nyingz dai gyoengq ndeu, baihlaeng youh miz gyoengq ndeu coemj gvaqdaeuj. Denhfung cukcuk hoenx liux haemh he, cung bae cung dauq, cungj cung mbouj ok. Mbwn rongh lo, de raen naj mbanj miz bang bingmax he cung gvaqdaeuj, cingq dwg gyoengq beixnuengx cihgeij, couh cung gvaqbae caeuq gyoenqde gap hwnjdaeuj, gyaep gij bing vuengzdaeq ok genglaeng bae, youq laj bya youh hoenx liux sam hwnz sam ngoenz. Aenvih bing vuengzdaeq mbouj duenh dem lai, Denhfung vunz noix dingj mbouj ndaej, couh doiq bing daengz laj Byaraiz bae. Bing vuengzdaeq mbouj cuengq fwngz, riengz laeng gyaep daeuj, Hoz Denhfung caeuq gyoengq beixnuengx youq laj Byaraiz caeuq bing vuengzdaeq youh daihgaj itciengz. Bing vuengzdaeq vunz lai, Denhfung bingmax noix, boux ndeu dingj cib geij boux bing vuengzdaeq, gaj bae gaj dauq, gyoengq beixnuengx Denhfung cungj dai liux lo, satlaeng cij lw Denhfung boux ndeu. Boux dungjsai bing vuengzdaeq raen Denhfung deuz mbouj duet lo, couh roengz lingh yungx gyoengq bing de: “Cung hwnjbae, gaemh seng!” Denhfung ndwn youq gwnz dat, raen boux dungjsai vuengzdaeq daih swenj daih hemq, couh dawz diuz cienq satlaeng okdaeuj, liuq cinj boux bing daeuz couh nyingz, bouxlawz rox de ok rengz gvaqbouh, gung goenq lo. Boux dungjsai youh hemq hwnjdaeuj: “Gaemh seng de!” Gyoengq bing vuengzdaeq caez cung hwnjdaeuj, Denhfung caj gyoengq de daengz gyawj, daih hemq sing he, swnhfwngz umj dawz geij boux, couh diuq roengz dat bae.
Hoz Denhfung caeuq gyoengq beixnuengx de, vihliux fanjgang boux dungjci, mbouj lau dai, mbouj fug saw. Gyoengqde dai le, couh bienq baenz gij bingmax yaenq youq bangx dat Byaraiz, louz roengz gyoengqde gietsim bauqcaeuz dih ceiqheiq, baenz liux ngoenzneix vunz raeuz raen daengz dih dozveh Byaraiz.(Vuz Lizdwz、Luz Dwngzgunh cingjleix)
——————摘自[壮侗语言文化网]
| 欢迎光临 僚人家园 (http://bbs.rauz.net.cn/) | Powered by Discuz! X2.5 |