2.GIUJSIUH FANJ VUENGZDAEQ
Ciuhlaux, laj goekmbwn miz goengq bya ndeu heuhguh Bya Faenhyiengz, youq gwnz gemhbya miz aen mbanj ndeu heuhguh Mbanj Faenhyiengz, daengx mbanj geij cib ranz vunz cungj seih gij lan gij laenj Vangz Cauz.
Vangz Cauz cauhfanj deng vuengzdaeq siumied bi haenx, couh ce miz aen gung bet bak gaen he caeuq sam ci cienq, ndaw mbanj daj ciuhlaux hwnj, couh daihdaih cienz naeuz: “Mbouj gaj vuengzdaeq dai da mbouj laep, mbouj bauqcaeuz couh beg guh vunz!”
Danhseih, bauqcaeuz couh aeu miz vunz beng ndaej aen gung bet bak gaen cij ndaej. Gyoengqde muengh liux daih dem daih, cigdaengz daihcib daih cij ok boux vunz ndeu beng ndaej aen gung naek neix, boux vunz neix heuhguh Vangz Giujsiuh.
Ngoenz haenx, goengdaeuz ndaw mbanj gyau aen gung hawj Giujsiuh, daengq bae daengq dauq naeuz: “Giujsiuh ha, mwngz cienq daih’it aeu nyingz aen da gvaz vuengzdaeq, cienq daihngeih nyingz da swix de, cienq daihsam conghhoz de, cienqcienq aeu raen lwed. Mboujgvaq mwngz aeu geiq ndei, itdingh caj daengz gofaexdiet gwnz gemh laeng mbanj hai va cij ndaej nyingz, mbouj ne, gungcienq mbouj gaeuq rengz, couh nguh saeh lo.”
Vangz Giujsiuh ndaej gungcienq le, ngoenz muengh haemh muengh, muengh gofaexdiet caeux di hai va, caeux di ndaej nyingz ndaek vuengzdaeq dai bae, vih goengcoj bauqcaeuz.
Danhseih, bi ndeu gvaqbae lo, vanzlij mbouj raen gofaexdiet hai va; song bi gvaqbae lo, vanzlij mbouj raen gofaexdiet hai va; bi daihsam yaek gvaqbae lo, gofaexdiet lijcaengz raen hai va. De caj mbouj naihfanz lo, couh gwed gungcienq hwnj gemh bae, ngauz gofaexdiet yiengjsasa, doq ngauz doq naeuz: “Faexdiet ha faexdiet, mwngz vihmaz sam bi mbouj hai va, nanzdauh hawj gou caj daengz byoem gyaeuj hau bae, caj daengz ndang noh byom bae ha?” De daj gwnz mbaq dawz aen gung roengzdaeuj, yaengx hwnj lienz nyingz sam cienq.
Caen hojsik lo. Ngoenz haenx vuengzdaeq ngamq naengh dangz, sam ci cienq neix rengz mbouj cuk, cij dongj laemx aen boicaz va gwnz daiz, hawj vuengzdaeq ngamq doeksaet di he.
Vuengzdaeq sim dingh le, gaem ci cienq hwnjdaeuj mbat yawj, raen gwnz de deu miz “Faenhyiengz Vuengz geiq” geij aen cih, vuengzdaeq heiq dwk da ok feiz, sikhaek baij vunz bae damcaz, rox dwg vunz daihlaeng Vangz Cauz nyingz, couh baij bing daeuj Faenhyiengz gaeb Vangz Giujsiuh. Laux vuengzdaeq doiq bouxguen daiq bing naeuz: “Hanh mwngz ndwen ndeu gvej aen gyaeuj Giujsiuh ma, mbouj ne couh riuj aen gyaeuj mwngz ma raen gou!”
Couh yienghneix, cib geij fanh bing hai daeuj coh Mbanj Faenhyiengz.
Vah gangj guen bik minz fanj, caengz caj bing vuengzdaeq hai daengz, Giujsiuh ciu ndaej liux geij cien vunz caep rin guh cab, soek faexcuk guh cienq, gietsim caeu vuengzdaeq hoenxciengq.
Giujsiuh cauhfanj sam bi, hoenx ndaej bing vuengzdaeq daej boh hemq meh, seihaiz rim deih, hoenx ndaej laux vuengzdaeq gwn mbouj van, ninz mbouj ndaek.
Miz ngoenz ndeu, Giujsiuh daiq bing gvaq dah, ma daengz Lueg Lwggyoux. Aen lueg neix bak gaeb dungx gvangq, bya sang dat lingq, haz youh sang, bing vuengzdaeq diep cienz hawj hix mbouj gamj haeuj lueg. Ndei ha, youq gizneix yietbaeg geij ngoenz caiq gangj.
Bouxlawz rox Giujsiuh ngamq daiq bing haeuj lueg, bing vuengzdaeq hix riengzlaeng gyaep daengz bak lueg lo. Bouxdaeuz raen ndaw lueg laepcupcup, sim siengj: Cung haeujbae youh lau Giujsiuh maizfuz, mbouj miz loh doiq; mbouj hoenx haeujbae baenzlawz ndaej aen gyaeuj Giujsiuh baema gyau vuengzdaeq ne? De ngeix bae ngeix dauq, couh naemj ok diuz geiq doeg he daeuj:Cuengq feiz coemh!
Caiq gangj Giujsiuh daiq bing haeuj lueg le, mbouj raen bing vuengzdaeq gyaep haeujdaeuj, couh roengz lingh yietbaeg. Gyoengqde ngamq ra dieg ninz, couh dingqnyi baihrog lueg yiengj bibi bobo, de ngeux gyaeuj mbat yawj, raen bak lueg hoenzfodfod, roxdaengz saehcingz mbouj ndei, ngamq siengj daiq bing cung okbae caeuq bing vuengzdaeq buekmingh, danhseih ceiz lo, cingq dwg cibdoeng labnyied, rumz hung haz sauj, gij feizmbaw meb hwnj daengz byongh mbwn. Mbouj geij nanz, coemh ndaej gij bing Giujsiuh cungj remj lumj mbaw faex nei, baenz boux mbin hwnj daeuj nem haeuj bangx dat bae.
Caj daengz feiz ndaep hoenz sanq, bing vuengzdaeq haeuj lueg bae yawj, lienz seihaiz Giujsiuh hix mbouj raen, gyoengqde yied naemj yied yan(lau), sawqmwh dingqnyi seiqcawq hemq gaj hemq moeb, bouxboux cungj naj heu liux, mbouj guenj sm caet ngeih cib it, cienqlaeng couh deuz. Aenvih vunz lai loh gaeb, doxcaij doxdaemh, miz di laemx ndaej ga gvez fwngz raek, miz di ngaiz caij ndaej dungx dek saej rih. Seiz haenx youh dingjlingz fwn hung byajmeb, cib geij fanh bing mbouj saek boux deuz ndaej okbae. Gij lwed deng raemx dongj bae sam bak leix gyae, bienqbaenz diuz Dah Cojgyangh. Gij bing Giujsiuh nem youq bangx dat, bi dam bi, daih dam daih, couh bienqbaenz gij siengq vunz bangx dat neix.(Ciz Hungz、Luz Dwngzgunh cingjleix)
——————摘自[壮侗语言文化网]
| 欢迎光临 僚人家园 (http://bbs.rauz.net.cn/) | Powered by Discuz! X2.5 |