[原创] Ngoenz Neix Gou Bae Gauj Sawcuengh (2)[僚人家园]——壮族、布依族、岱侬族共同论坛『Sonhag Sawraeuz 僚文平台』

Maenhak 发表于 2012-7-1 10:13:00

[原创] Ngoenz Neix Gou Bae Gauj Sawcuengh (2)

Ngoenz Neix Bae Gauj   Sawcuengh (2)                                  Ok bau youh sat  ,aen ndang  rox nyinh soengsetset , vaiq haeuj gyauq siz  ra  hauh naengh ndei ,caj  boux gamgauj  fat  gienj  !     Baenz seiq vunz gou cam gya gak cungj gauj si gig lai , gauj sawgun daih hag caemh gauj hauj lai mbat , mbouj miz saek mbat gauj ndaej hwnj , seiz neix  naengh youq ndaw gyauq siz ,aen sim caemh dwg diudeg diudeg !      Vih liux bwh ndei mbat gauj neix ,gou cawz liux dawz bonj  [ Sawcuengh  faen gaep gaujsi daq gangh ]  guh sat  ,lij lienh guh song bien coz vwnz  ,gou dawz bien  ndeu cuengq youq laj neix :          Cozvwenz (30 faen) :  Daezmoeg       Boux  doengzhag nanz mbouj raen naij ndeu        " Vei ,dwg mbanj Gorenh  lwi ? "            "  Dwg a !"       " Ndaw mbanj mwngz  miz dah sau ndeu heuh  Va'gyaeu   lwi ?"       "Dwg a ! "      "  Dah Va'gyaeu haemh lwenz  youq gwnz  roen gai ngaiz ci iq saeg gyaenx  ,soengq  bae  daengz siq Yiyen guh gouq ,gouq mbouj lix ,  ,cingj mbanj sou lingjdauj bae daengq naeuz  ndaw ranz de ,hawj vunz  ndaw ranz de  daeuj  lingx vunz ndang de  bae ma !"          Gou doq dingq denva doq doek saet yatyat  !   Aen uk gyaeuj gou  caemh  ciemhciemh yienq dah  Va'gyaeu  gij ngaeuz ok daeuj  !      Va'gyaeu  daj  caetbi   caeuq gou  caez haeuj hag dangz  doeg saw , caez gauj hwnj cuhcungh gauh cungh . Cig daengz gauh cungh bizyez ,cungj dwg  dang  banh cangj  gou  ,bizyez le ,de gauj ndaej hwnj   daih hag  ,gou gauj mbouj  hwnj ,bae ma ranz ciengx vaiz ndaem raeh ndaem naz !    Bix haenx daengx hag 100 lai boux gauh cungh bizyez ,ngamq gauj ndaej hwnj sam boux ,Vagyaeu  dwg sam boux ndaw de faen soq ceiq sang ,daengx gyoengq doengz hag cungj hoz haenz de hix gyaez  haenh  de ! Gou daj siujhag daengz gauhcungh it cig cungj fug de ,haeuj de ,cij aeu de moix mbat daengq vah gou ,gou couh sik haek bae ciuq guh ,  guh sat rox nyinh sim van raixcaix   .De youq rog caeuq doengzhag wnq  ,coenzcoenz vah gun  ,hoeng ,de caeuq gou ,mbouj miz saek mbat gangj vah gun ,raen naj  couh gangj vah  mbanj  dou !       Doeg gauhcungh yaek bizyez ,miz  cik saeh ndeu ,hawj gou baenz seiq mbouj lumz .  Miz mbat ndeu ,Lauxsae  youq ndaw gyauq siz gangj naeuz : "`Aen minz cuz vunznonx cam gya Gauhgauj ndaej gya faen ,bouxcuengh ndaej gya 20faen ,vunzgun mbouj ndaej gya faen ", daengx ban emq 'vax..'  ,miz mbangj lij bek fwngz dem !     Vagyaeu   mwh haenx dingq sat , ndwn hwnj daeuj  ,de cam laux sae : Laux sae ,Yiengh neix guh dwg mbouj dwg miz yiengh minzcuz yawj ngawz ,doiq vunz gun mbouj goeng bingz ?  Laux sae naeuz : Vunzgun vunz lai ,bibi hwnq guh daih hag lai  ,mbouj yungh gya faen gauj  hwnj  gyoengq vunz cungj gig lai ,vunzgun cunghyoz aen hag ,mbangj aen gauj hwnj daihhag 100% cungj miz  !  Vagyaeu  youh caiq   cam  : "Vih maz  mbouj miz vunzcuengh sawcuengh  daih hag ne ?   Laux sae naeuz :"Gij neix gou mbouj rox !"  Dahva meiq youh  saemh cam "Vunzgun daih hag moix bi daeuj sou aeu vunzcuengh bae doeng daih hag ,  dwg mbouj dwg bibi dingh ndei  vunzsoq ne ?" Lauxsae han : "Gij neix gou rox ,ciu  vunzcuengh haeuj daih hag ,bibi miz vunz soq hamh caeh "   Vagyaeu  youh caiq laebdaeb riengz cam : " Gya ngeih cib faen caemh dwg ciu   bienh neix  vunz ,mbouj gya ngeih cib faen ,caemh ciu   bienh neix   vunz ,yiengh neix ,doiq vunzcuengh raeuz gya faen miz maz yung ne ? " Lauxsae mbouj guh sing ,baenq hangx doq ok gyauq siz bae !  Gou mwh haenx cij rox  : Gauhgauj gya faen dwg youh caq vunzcuengh  raeuz  youh caq aen minzcuz vun noix  lo  !      Daengz laeng , Vagyaeu  Gaujhwnj vunzgun daih hag Sawgun conh yez !  Hoeng gya de loq gungz ,de gauj ndaej hwnj doeg mbouj hwnj ,boh meh de caenh muengh de ma bang guh hong ranz hong naz  . Vagyaeu  de mbouj fug bomz youq ranz ,vunz ndaw mbanj ,ndaw cinq caemh haeuj de bae doeg daih hag ! Ngoenz  de  bae doeg daih hag ,ndaw mbanj hauj lai vunz  cungj yiet  cienz hawj de ,boux haj cib boux bak maenz ,de  caiq bae ndaw Cin Yinzhangz  ciq    fanh maenz  ,yiengh neix ,de cij ndaej doq vuet  raemx da doq bae  ndaw singz doeg  daih hag  ! Daengz laeng ,doeg saw seiq bi ndaw de ,de bibi ma mbanj yawj bohmeh ,dou caemh ndaej dox raen naj  ,de   daih hag  biz yez le  ,gou couh mbouj raen de saek mbat ,dingq nyi naeuz de ndaej faen bae aen Cunghyoz ndeu guh Sawgun laux sae ,guh saek bi  le couh mbouj guh lo . De  laeng Yinzhangz ciq geij fanh maenz bae  doeg daih hag  lij mbouj caengz boiz !     Bi gvaq  ,ndaw mbanj senj gou guh  boux mbanj  fuqcujyin ,gou it cig  haeuj sim de ,yiengh neix couh miz mbat ndeu caeg bae laeng aen cunghyoz Vagyaeu  guh hong  haenx cam  vah .  Goeng Yauqcangj de naeuz gou nyi  : Vagyaeu  gangj vah budungh mbouj byauhcinj ,ngaiz vunzgun hagseng gij boh meh de ndaq naeuz :  Bonj faenh gangj vah budungh mbouj byauhcinj ,baenz lawz ndaej son lwg gou ?  Lwg gou gauj mbouj hwnj daih hag ,vaih lwg gou ,Yaucangj mwngz   boiz  vw    !  Yiengh neix bik dwk Yauqcangj mbouj ndaej aeu vunzcuengh son  sawgun !  Sawgun laux sae deng dwg ngaiz bik  aeu vunzgun  guh liux  !  Vameiq  gik heiq ,couh mbouj guh laux sae lo ,dingq naeuz de seiqlengq gag bae  ra hong  guh  !  Daj  mwh haenx ,gou it cig mbouj rox vagyaeu  youq giz law guh maz hong !     Youh gvaq  bi lai , sawq mwh   ciep daengz aen denvaq neix ,baenz lawz mbouj hawj gou doeksaet yatyat ?     Gou daiq bohmeh Vagyaeu  ,ganj bae daengz siq Yiyenq , Vagyaeu  ninz youq fungh  ranz ,Bouxvunz de ndang sang   miz meij roek haj  gwnlaj  ,mbou biz mbouj byom ,naj loq luenz  soem ,byoem gyaeuj dangq ndaej gig gyaeu ,ciengz seiz song da ronghrongh gyaeugyaeu ,seiz neix gaenq laep da dingh youq ,bak hongz naj faenj ,meix da veh  gim , gok mak miz lwed ,buh de  vwnj de hix dumx  lwed  ,noh fwngz de giz aeuj giz sieng ,yaew raen yiengh ,raemx da gou doq gag doek byoegbyoeg !    Gou ok bak dou , coh bae cam youq henz boux minzgingj :"Gou dwg mbanj lingj dauj ,gou yaek rox de vih maz dai ,cij ndaej ndei coh daengx mbanj beixnuengx gyau daih" ,  Goeng minzgingj naeuz :  " Dah sau neix youq  bouq anmoh  guh hong , de guh  caeg guh geiq gai hangx ,boux sai ndeu haemh lwenz bae  guh de ,guh sat hawj cienz mbouj gouq doq buet ok dou ,dah sau neix riengz buet ok dou bae rumj  de ,buet daengz byongh roen gai ,ngaiz aen ci iq ndeu saeg gyaenx  ,aen ci haenx buet deuz lu ,vunz gvaq  roen  ram de daeuj Yihyenq gip gouq  ,gouq mbouj lix couh dai lo !  Miz  vah  miz saeh  mwngz daj  denva  caeuq gou gangj ",de hawj gou mbaw mingzbenq ,couh byaij ok bae  lo !    Gou mwh haenx doq  bienq  mazmwnhsaengsaeng ,dingh ndin youq raerae ,boh meh de caenh cij rox youq henz ndang  Vagyaeu  daej nganga mbouj dingz !    Boux nanz mbouj raen naj doengzhag   ,seizneix raen naj de  gaenq mbouj ndaej dox gangj vah lu !             Va'gyaeu sawq mwh biek raeuz bae ,              Caemh lumj ndaundaeq  vag gvaq mbwn ;              Cibbi doengz hag dox caeuq mbwn(bwn)  ,              Rumz fwn  bongx dawz doq doek dan !      Gou naengh youq gyauq siz caj fat gyienj seiz ,doq ngeix ,dangnaeuz ok diuz daez moeg baih gwnz neix ,gou dawz de boih cau roengz gienj ,bien neix  it dingh ndaej faen soq sang !

页: [1]

僚人家园's Archiver

[原创] Ngoenz Neix Gou Bae Gauj Sawcuengh (2)