[原创]路漫文集：壮文的散文[僚人家园]——壮族、布依族、岱侬族共同论坛『Sonhag Sawraeuz 僚文平台』

路漫发表于 2010-3-7 22:50:00

[原创]路漫文集：壮文的散文

“人生七十古来稀”，当今社会上把这句话当做笑谈了，可以说七八十岁的比比皆是了。本人有幸跨进“古来稀”了，想想日后的日子不多了，应该把自己的文字拿出来“晒晒”，让贝侬们当做“文字”撩撩翻翻，也不失它的“价值”了。贝侬们翻过撩过，有什么话要说，尽量提出来，让我在“盖棺”之前有所了解。谢谢！这是壮文的散文部分——路漫文集：壮文的散文
1NAUHCUNG DASANG       Daegmingz yaek bae hwnjhag lo,daxmeh daegdaengq hawj de cawx ndaej aen nauhcung he.“Dikdag,dikdag!”Nauhcung“naengh”youq gwnz daizsang,daekeiq dangqmaz.“Ling......”Cijaeu nauhcung baez hemq,Daegmingz couh muengz hwnjdaeuj,mboujnex,couh deng daxboh ndaq lo.Couh naeuz haethaenx ba,rogranz doek fwn sadsad, mbwn ngamq buemxsuemj,rumzbaek cihuhu,byawz youh mbouj siengj ninz gik ninz gvaiz ne.Hoeng,nauhcung mbouj gaenj mbouj menh hemq“Ling......”
lo.Daegmingz fonjfonj ndang,nunu da,caen sij mbouj ndaej liz denz raeuj.“Mingzmingz,nauhcung heuh lo,lij mbouj vaiq hwnjcongz!”Daxboh byaij gvaqdaeuj,baez biengj denz,couh bek caekhaex iq de.“Dikdag,dikdag!”Nauhcung ndawsim gag bemx,naeuz:“Byawz heuh mwngz mbouj dingq gou heuh ne!” Youh miz baez ndeu,Daegmingz banhaemh yawj densi hwnz lai, ninz ndaej cingq van,“Ling.....”nauhcung mbouj vaiq mbouj ceiz youh hemq lo.Daegmingz gikgyanggyang ietiet hwet,rauraurumz, lwgda lij nanz cengq ndaej hai.“Mingzmingz,nauhcung heuh lo,lij mbouj vaiq di, yawj mwngz siengj cizdau ha! ”Daxmeh gipmuengz byaij gvaqdaeuj, doq nambyoebbyoeb doq bang de daenj buh,sousib daehsaw,cig daengz soengq de okdou bae.“Dikdag,dikdag!”Nauhcung daekeiq vauvau,laihnaeuz cihgeij gig vifung,baez heuh vunz couh dingq. Yienghneix,nauhcung gag ngon gag haenh ciemhciemh dasang hwnjdaeuj,couh siengj dawz Daegmingz daeuj saj guhcaemz. Baez he, de daegdaengq daezgonq buenq diemj cung he heuh hwnjdaeuj, loengh ndaej Daegmingz ienq daxmeh heuh hwnjcongz caeux lai, daxmeh youh gvaiq daxboh lumz hwnj lienhcung,daxboh cix ndaq daxmeh hawj cung dinghseiz yawj loek seizgan lo,cix mbouj miz byawz gvaiq nauhcung saek coenz. Nauhcung engq daekeiq fwngfwng lo,hix engq cuengq damj lo, saekseiz heuh vaiq, saekseiz heuh ceiz, loengh ndaej Daegmingz mbouj rox baenzlawz guh.Doeklaeng miz baez ndeu,nauhcung youh heuh ceiz lo, Daegmingz dauqdaej deng cizdau lo.De deng lauxsae bihbingz le, daejfwtfwt dauq ranz gvaiq daxboh,daxboh baez hoj,dawz nauhcung vut ok ranz bae!Daj neix,caiq mbouj raen ngaeuz nauhcung,fwn rwed ndit dak, mbouj nanz couh myaexmyadmyad,ciengxlwenx caeuq cien naeuh fwnz nduk guhdoih.

路漫发表于 2010-3-8 23:11:00

2Rij iq laecetcet
Samnyiedsam Banjsawcuengh ndaej 20 bi lo, couh lumj dahsau ndaej 20 bi he, baenzsau lo, lengjli lo. 20 bi daeuj, diuz loh gumzgumz gaxgax, couh lumj diuz rij ndaw bya, daemj dat dongj hamq, mbouj ndei byaij ha!Diuz rij iq ndaw bya, raemx saw laecetcet. Dah de mbengj vinj he faet youq ndaw raemx, raemxcaw daj gok dat sinz hwnj, youq song ga haumbop gwnzde rouxringx, ronghsiksik sawcingxcingx, gouh haiz he vutvak youq henz raemx……　　Dah de, faj bak hoengzfefe gamz nga rum ndeu, va rum deulingz he fed aen naj loq byom de, de song da mumjgyuemq muengh coh diuz rij lae bae gizgyae.　　Seiqvunz , couh lumj diuz rij iq lae bae cetcet, saekseiz cauznauh, dingding doengdoeng, saekseiz caemnaemj, ngutngut ngeungeu. 　　Dah de, 20 bi, cingq dwg bi’ndwen hwngvuengh hoenghhwd, gadog daeuj daengz aen ndoi fwzfwd, gyaeujndoi ndoqndang……　　Dahsau, hab sienghmuengh gijmaz? Dwg gij lijsiengj mizfuk lij dwg gij mizfuk lijsiengj? Dwg gij gyaez gouzra lij dwg gij goura gyaez……　　De nyapnyuk? De simfanz? De caemnaemj!　　Miz vunz naeuz, gyaeundei, dwg saengyaq dahsau. Dwg ha , de gyaeundei. Danghnaeuz daenj hwnj buhvaq habndang, aen ndang reuzred de sawj vunz haeujmaez. Fouq da ronghliklik de, daegmbauq raen le cungj angq hemq：“Va, caen lengj ha！” Ndaw da de hamz miz cungj saenz ndeu, daegmbauq mbei iq haenx naeuz dwg song fag giemq, daegmbauq naekcingz haenx naeuz dwg song cik fwngz iq, seizseiz coh mwngz vad fwngz.. 　　Danhseih, dah de mbouj siengj gij neix. De gyaez coenz vah neix: Gyaeundei dwg dauqcawq cungj miz. Dug rum henz bak deng gaet goenq lo, va rum riengz raemx lae bae. De gip hwnj gouh haiz, daenj ndei, dugdug byaij lo, yamqdin naekgywd de youq gwnz sadan louz roengz gij gumz laeglaeg, lumj hangz hauhmbaet he, hawj vunz bae naemjngeix lailai. 　　“Makdauz ndei gwn faex nanz ndaem. Ndoi ndoq couh ndoi ndoq lo, lij maqmuengh de ok mbengq lwi？”“Yaek mbouj ma！Danghnaeuz ndaej ok mak, cojcoeng raeuz dwg geihbak ha？”……　　Gangjlwnh, mbouj dwg vahcit vahlai；gvansim，mbouj dwg gangjbyangz gangjbemx. Dah de lumjbaenz yawjraen gij nywj oiq henz rij, gij mbaw doek bangx ndoi.　　Seizneix, bouxvunz gyaeujndoq lij seng ok byoem daeuj, nanzdauh ndoindoq couh mbouj miz yw gouq ha？“Mbouj ne！” De naeuz，“Gizneix cij dwg noix vunz dwk raemx！”　　Yienghneix, de gienj hwnj genbuh, vied hwnj gavaq……　　“Duj vamoq he cap hwnj dong haexvaiz……” Miz vunz raen de yienghneix, yaengyaeng danqheiq　　Dahsau, byawz mbouj miz gag aeunaj？ De sim bibuengq lo, lauheiq ngoenzlaeng miz “daeg” he loeng yawj de. Haexvaiz, geijlai yakdingq ha。　　De daeuj daengz henz rij cuengq byaij, fouzeiq dik doek ndaek rin he, dingjlingz doek roengz geh gyang rij bae. Raemxrij sawqmwh deng dangj, raemx mbat cuenqlouh, swng hwnjdaeuj, gig vaiq couh dumh gvaq gaiq rin, yingzlij lae bae. Caemhcaiq, sing raemx dingdoeng lumj sing gimz, engqgya remcieng, engqgya rwenz rwz. De fwt ngeix singj：Ndaek vunz ngeiz lai dwg mbouj miz mbei ha.　　Seizcin daeuj daengz lo, va dauqdaej yaek aeu hai. Mbouj lau va mbouj miz seizcin, cix lau seizcin mbouj miz va.
Mbouj yungh ceizngeiz，daj va daengz mak, aeu byaij gvaq gij bongzrangj dwgrengz neix　　Danhseih, ciuhvunz, dwg rij iq; rij iq, cungj miz mwh lae daengz daihhaij.　　Yienghneix, raemxhanh de, dikdik rwed youq gwnz ndoindoq; lwedsim de, ndikndik guenq haeuj ndaw namh bae.　　Dauqdaej, youq mwh daengngoenz swng hwnj, go maklwg unqnyieg he did okdaeuj lo. Fanzdwg haidaeuz nanz. Gaenj ciep dwk youh maj ok go daihngeih、go daihsam……ndoqndatndat gwnz ndoindoq haenx, loegsaek soqlai siuj raen haenx baenz nyup baenz nyup maj hwnj lo. Hai da muengh bae, lumjbaenz siujhagseng ngamq hag raiz saw haenx youq gwnz ceij nyouqnyanya haenx, baez daih’it sij roengz gij cozyez mbitmbit mbeujmbeuj. Dwg ha, neix caenhguenj mbouj dwg gijmaz saw mbwk saw hung, hoeng dauqdaej dwg de yungh raemxhanh sij baenz ha.

路漫发表于 2010-3-9 22:51:00

楼上的，您提出的要求很好，谢谢您的关心！但是，这样的工作量很大，我可能没有能力做得到，请见谅！

路漫发表于 2010-3-9 22:54:00

<h2 style="MARGIN: 13pt 0cm;">5 Dauqma Seiz Lwgnyez</h2>
Duiyouh ma ranz le,mbouj miz maz ndei guh,baenz ngoenz mbwqmbwtmbwt,ndigah,gou couh siengj hwnj ciengx duzdouq.Liz ranz gou mbouj gyae,miz benq dieg nywj he bingzrwdrwd heuswdswd,seiqhenz lij hwnj rim le gohaz,go’em,gofoed,gou ciengz ciengz bae gizhaenx mbaet aeu nywj mbaw faex ma gueng douq.Moix baez mbaet ndaej baenz rap baenz rap,gij mbaw neix youh heu youh oiq,miz mbangj laj mbaw lij hai va maeqmi homhwd,mboujdanh douq iq ngah gwn gyaez gwn,caemhcaiq hawj ndaw ranz cang ndaej lumj suenva nei,sawj vunz simcingz sangjyauyau.Ngoenz he,miz gyoengq lwgnyez hix daeujdaengz gwnz dieg nywj neix,gyoengqde riuhaha hemqcaca,youq gwnz nywj neix dik cuzgiuz, miz geij byoz nywjoiq sikhaek couh deng caij yungz lo.”Hojsik lai hw!” Gou sim’in dwk youq ndaw hoz hemq hwnjdaeuj.Hoeng,gou mbouj ndei gangj gijmaz,dieg nywj neix dauqdaej mbouj dwg suen gou. Yienznaeuz ndaw hoz nyaenxraixcaix,hoeng ndaw sim cungj miz di mbouj swxcaih.Sawqmwh,henz rwz baez yiengj hwnj “fu” sing he,gou ngeux gyaeuj baez yawj,cijraen miz ndaek nduenndu’ndu he mbin daeuj coh gou.Gou lienz naemj hix mboujmiz seizgan naemj,gingz song fwngz baez rop,laxlawz dwg aen cuzgiuz he!“Ndei ha!””caen ak!””Cunghgozdui itdingh hingz!”Gyoengq lwgnyez hemqhuhu hwnjdaeuj,miz geij laeq lwgnyez buet daeuj coh gou,dawz gou ram hwnjdaeuj,gveng hwnj gwnz mbwn……Laxlawz, gyeongq lwgnyez neix cingq hag gij yiengh “sigaibeih” cuzgiuzsai,gou cingq ngamq ndwn youq baihnaj bakdou cuzgiuz “Cunghgozdui”, dingjlingz ciep ndaej aen giuz neix! Gyoengq lwgnyez dik giuz cingq mizyinx,mbouj hawj gou gejgangj gijmaz,nyengh rag gou bae dang “soujmwnzyenz”.Youq gyoengq lwgnye ndaw neix,gou ceiq sang,miz “gunghcungh youhsi”, dang “soujmwnzyenz” ceiq habsik lo.Baez it seng,baez ngeih sug,lumj miz fangz loengh neix,gou gawqyienz baenz boux cuzgiuz duiyenz he,gyoengq lwgnyez moix baez dik giuz cungj maij heuh gou.Baez ngeih sug,baez sam maez,miz seiz gou lienz ngaiz cungj mbouj gwn couh bae “mbaet nywj douq”, caemhcaiq ciengzciengz maez dik giuz daengz daengngoenz doek bya,lumz le mbaet nywj douq,hoengq fwngz dauq ranz.Yienghneix,gij douq gou couh souhhoj lo,ciengzciengz dwg donq imq donq iek,caiq mbouj raen lumj doengh baez nei diuqekek.Gyoengq lwgnyez haenx mbouj rox baenzlawz rox daengz gienh saeh neix,dik giuz gvaq le couh doxciengj bang gou ciemz nywj mbaet mbaw faex. Yienghneix,gou baez haeuj ranz,couh miz gyoengq lwgnyez he gaenriengz lo,caemhcaiq miz baenzraq baenzraq singriu heux youq ndaw ranz gou,nanznanz mbouj siu.Dwen hwnjdaeuj caen cix geizgvaiq,duiyouh le gou gawqyienz dauqma caeuq lwgnyez guhdoih,aen sim gou hix dauqma daengz seiz lwgnyez lo.

lihlohbu 发表于 2010-3-9 14:42:00

尊敬的“路漫”前辈。你有没有办法让我们看懂你的作品呢！！！为了让更多的初学壮语的人看懂---得以学习你发表的作品能不能多加两个部分。第一：壮文每一个音对应的汉字---首选“意”，没有就找个音。第二：壮文每一句的对应的译文汉语。

路漫发表于 2010-3-22 22:19:00

<h1 style="MARGIN: 0cm 0cm 0pt;">9.Gyaez Ndaw sim soemj ndaw dungx </h1>Lij Cunzbauj sij Lij Faz bienhoizCaen mbouj siengj daengz,bouxbing Cangh Lanzgwnh daj lajmbamj daeuj,gij saeh de caeuq dahsau doxgyaez haenx,hix baenzneix fukcab nyungqluenh,langhsim saedcaih ne,lij miz di lumj vunz gangj sawheiq nei,gou gyaez mwngz ngaemngaem,mwngz gyaez gou guhcaemz……1.
Boihseiz Ha,BouxmizfukDingqnyi Cangh Lanzgwnh yaek gezvwnh,bawxmoq dwg daihhagseng, bizyez le,maxsiengh daeuj budui banh vwnhlij cingj hek.Gyeongq canyouj cungj vih Cangh Lanzgwnh sim’angq,lij hozhaenz de aeu ndaej mehyah baenz ndei.Gangj saedvah,Cangh Lanzgwnh mbouj suenq mbauqndei,naj raez bak na,……vih nienzgeij gvaqbouh mbouj ndaej daez dang ganbu,mbouj nanz couh deng dauq ma lajmbanj guh nazreih lo,gij diuzgen neix caeuq “lwgsau daihhag”doxca lumj mbwn caeuq deih!Bouxboux cungj haenh “lwgsau daihhag”sim ndei,yawj hwnj boux dangbing.Fu cijdaujyenz lij dawz gienh saeh neix cuengq youq byai bak,raen vunz couh gangj:”lwgsau daihhag”ndei,Cangh Lanzgwnh miz fukheiq.Vanzlij cingj donz cwngcibu baij vunz daeuj caijfangj ingj siengq,hawj bauqse bauqlwnh.Byawz rox,ndwen lai gvaqbae lo,”lwgsau daihhag”cungj mbouj raen daeuj.Sij saenq cam yozyau,fuk naeuz bizyez okbae lo.sij saenq cam ndawmbanj,fuk naeuz lienz ngaeuz hix mbouj raen.Youh ndwen lai gvaqbae lo,gozgingcez yaek daengz,gyoengq canyouj cungj muengh “lwgsau daihhag”fwt daeuj caeuq daihgya gvaq ciet nauhnyied,hoeng,di siusik ndeu hix mbouj miz.Cangh Lanzgwnh hix roxnyinh simliengz……Saenq,dauqdaej muengh daeuj lo!Fung saenq dwg daj AF gunghcangj geiq daeuj.Gyoengq canyouj humx gvaqbae,heiq mbouj gamj cuengq, dinghdingh yawj naj Cangh Lanzgwnh,siengj cai dwg hux roxnaeuz fuk. Saenq baenzneix sij:Langwnh dungzci:Sam ndwen neix daeuj,miz gienh saeh ndeu siengj lwnh mwngz youh mbouj gamj gangj,lau hawj mwngz simdot sim’in.Bizyez le gou deng faen bae daengz Sih’anh,dieg seng vunz mbouj sug.Roengz ci le,gou deng song boux bang gou riuj doxgaiq haenx yaeuh lo. Youq laj giuz laepfubfub,song ndaek vunzrwix haenx gaemhgaenx gou, gou deng…..Sam ndwen daeuj gou itcig youq yihyen,yiemj de fatbag! Yihswngh naeuz,mbouj hamj seiq cib bi gou mbouj ndaej gietvan lo, canghsei naeuz “gietvaen dwg diegmoh aicingz”.Mbwn ha,gou lij caengz gietvaen,couh deng soengq haeuj diegmoh……Lanzgwnh dungzci,guh vunz mbouj ndaej ngeixgeiq gaxgonq daeuj gvaq ndwenngoenz.Muengh mwngz lingh ra sau gyaez ba,dawz saeh gaxgonq songraeuz lumz bae ba!……Cihcih miz cingz,coenzcoenz dwg caen.Mbaw ceij ndeu lumj rumzhwx, lumj byaibag,Cangh Lanzgwnh dunzci dangciengz ngunh bae.Seizneix,danghnaeuz song ndaek vunzrwix youq baihnaj,gyoengq canyouj mbouj rox lawz cingjceih song duz cukseng haenx gaijhaemz ha!2.
Hot Fwen’gyaez Maez Vinz NdeuCib geij bi gaxgonq,dah lwgnyez ndeu deng nyezdoih aeu bauq cit mengq,daejnyinyi lo.Laeq Lanzgwnh hwnjbae re de,youh deng nyedoih riu:”De dwg bawxbyok mwngz ha?”Lanzgwnh nyapnyungq ndaq gyoengqde,youh deng gyoengqde moeb…..Cangh Lanzgwnh caeuq dah lwgnyez neix dwg doengzhag,caez bae hagdangz doeg saw,langh hag le,youh caez hwnj ndoi roengz doengh,gip fwnz roz,mbaet baek mou,nyaeb biengzbeih,ra makndoi,bae lawz cungj lumj saivaq doxrangh nei,vunz ngaeuz mbouj liz,gij ndwenngoenz seiznyaeq neix,geijlai vaiqvued,geijlai nanz lumz ha!Mbouj geij nanz songde youh caez gauj hwnj cunghyoz yienhsingz, caemh ban caez naengh aen daiz.Ranz Lanzgwnh miz gyaq danci ndeu, songde hwnj loh bae yozyau seiz,gyaq ci neix song vunz naengh,mwngz dap laeng gou,gou bang mwngz aemq doxgaiq.Doxcaeuq doxbang, doxndei dangqmaz.Cunghyoz bizyez le,seizhaenx daihhag mbouj ciuseng,songde ma daengz ndaw mbanj,Lanzgwnh guh gvaigi,dahsau dang donz cihsuh. Songde lij doengzyiengh doxcaeuq doxndei.Dangj cihsuh lwgda yawj, ndaw dungx rox,couh bae ranz songde guh moiz.Bohmeh songde dingq le,naj hai sim angq,maxsiengh hawj songde dinghvaen lo,songde lij bae yienhsingz ingj mbaw siengq bingz mbaq naengh ndeu……Caet seiq nienz,Cangh Lanzgwnh bae dang bing.Bi daihngeih,dahsau ndaej baujsoengq bae doeg daihhag.Caet loeg nienz gvaq cieng,Cangh Lanzgwnh ma ranz damq caen, ”lwgsau daihhag”hix cuengqgyaj ma ranz.Vunz lajmbanj ceiq gangj saedcaih,meh Lanzgwnh doiq de naeuz:”Dingqnyi vunz gangj,boh de naeuz,mwngz youq budui mbouj ndaej daez dang ganbu,couh mbouj hawj lwgmbwk de caeuq mwngz……”Gangj caengz sat.”lwgsau daihhag”haeuj ranz lo.Songde byaij haeuj rug bae,yiengznaeuz deihdeih sij saenq,seizneix doxraen dauqfanj mbouj rox gangj gijmaz cij ndei.“Mwngz dwg daihhagseng,gou dwg boux dang bing.”Cangh Lanzgwnh ngwngw ngawngaw naeuz,”Dangnaeuz songraeuz mbouj doxhab,cix gaej veiznanz.Raeuz couh dang guh laux doengzhag.Dingq boh mwngz naeuz……”“Boh gou dwg boh gou,gou dwg gou.Gou mbouj rox guh sim mou sim ma……”De raemxda doek lo,”Ngoenzngoenz muengh raen mwngz, siengj mbouj daengz ngamq raennaj,mwngz,mwngz……”De yied gangj yied gikheiq,fwt haeb lwgfwngz,aeu lwed coh ceijhau sij roengz seiq cih hung “dai mbouj bienqsim”.“Dawz bae,hawj mwngz ha……”“Yiengzliengh ba,gou……”Cangh Lanzgwnh ngaezngwdngwd ciep gvaq saw lwed,raemxda doekbyoegbyoeg,”Mwngz cuengqsim,gou itdingh lumj mwngz ityiengh,……”Danghnaeuz seizneix Cangh Lanzgwnh lingh ra youx gyaez,lau “lwgsau daihhag”couh aeu gvej hoz dai lo.Hot fwen gyaez neix geijlai maez vunz ha,seizneix heuh Cangh Lanzgwnh lumz de bae,nanz,hanz ha……

路漫发表于 2010-3-10 22:34:00

<h2 style="MARGIN: 13pt 0cm;">6 Ngeihcib Bi Gonq Lumj Ngoenzlwenz</h2>
二十年往事如昨Lij
CungzsiNeihcib bi gaxgonq,gou youq Hozciz aen cangj he guhhong, eizhaenx guek raeuz ngamqngamq gaijgwz gaihfang,gak fuengmienh lij doeklaeng,aen cangj gungx bya gou lij mbouj miz densi,caeuq baihrog leinzhaeh gig noix,siengj liujgaij baihrog cingzgvang,cijmiz yawj <Gvangjsih Yizbau>,couh dandan faenh bauq neix lij dwg ok bauq gvaq sam seiq ngoenz cij soengq daengz ndaw cangj.Ngoenz ndeu,gou youq gwnz bauq yawjraen daeng diuz siusik he,naeuz swcigih dangjveij gietdingh dauqfuk doihengz sawjyungh Sawcuengh,gou angq raixcaix.Gvaq mbouj geij nanz,gou rox swcigih yijveij dauqcungz laebbaenz le,sikhaek nda ceij hawj gihyijveij sij saenq,cam mizgven fuk doihengz sawjyungh Sawcuengh cingzgvang. Mbouj geij ngoenz,gihyijveij hawj gou hoizsaenq lo,sij rim song mbaw saenqceij,gaisau Sawcuengh yunghcawq,doeklaeng lij cingj gou bang guh sevei diucaz,caemhcaiq heuh gou sij gaujgen Sawcuengh geiq hawj gyoengqde dem.Doeg gvaq fung saenq neix le,gou baenzlawz angq couh nanz sij okdaeuj lo.Fanjcingq,duenh haenx gou daegbied simhai,gwn ngaiz daegbied van,baenz ngoenz cungj riu mbouj dingz.Bouxwnq raen gou yienghneix,loengh riu cam gou naeuz:”Geij ngoenz neix mwngz gip ndaej gimndaek ha?”Gou hix loenghriu naeuz:”Gip ndaej gimndaek lij mbouj miz nyaenx angq ne,gou miz bouxcaen he,law bae cibhaj bi youh dauq ra dauq lo.”Coenz vah neix eiqsei dwg:<Bauq Sawcuengh> laebbanj le,gou couh hawj de sij gauj Sawcuengh,”vwnzgwz ”baez daeuj,<Bauq Sawcuengh> hix deng “raemj” lo,couh caiq mbouj miz gihvei sij gauj Sawcuengh dem,seizneix gvaq le 15 bi,youh dauq miz gihvei sij gauj Sawcuengh lo,youh ndaej vih Sawcuengh ok di rengz lo,nanzdauh mbouj dwg gek 15 bi dauq ra raen bouxcaen ma!Mbouj geij nanz,gihyijveij bien yaenq ok <Sawcuengh gunghcoz dunghsin>,lij senj daeng gij gauj caeuq gij saenq gou,gou yawjraen le angq dwk diuq hwnjdaeuj.Yawz mbouj angq ne,aenvih gou yawjraen diuz loh doihengz sawjyungh Sawcuengh gaenq ronghsagsag lo.Gvaq ndaej song ndwen lai,<Bauq Sawcuengh> caemh dauqcungz ok bauq lo!Ngoenz he,gou youq bangunghsiz yawj <Bauq Sawcuengh>, dongzsaeh gou raen le naeuz:”Dauqdaej dwg gunghcwngzswh,yawj bauq hix yawj bauq Yinghyij.”Gou dingqnyi le riu naeuz:”Loek lo,loek lo,bauq neix mbouj dwg Yinghyij,dwg Sawcuengh hane!”“Ha,Sawcuengh?”gyoengqvunz gig geizheih,cungj dixcanj humx gvaqdaeuj yawj.Gou mienh doiq daihgya sikhaek eu hot fwenyoux gwnz bauq he okdaeuj.Ndaw cangj gou dingzlai vunz cungj rox gangj Vahcuengh, dangyienz hix rox fwen.Daihgya dingq le riuhoho hwnjdaeuj,miz boux he dangciengz catnaj gou:”Sou gaej hwnjdangq Lijgungh,hot fwen neix dwg de gag ngon ne,gaenbonj mbouj dwg gwnz bauq daeng miz!”Raen daihgya mbouj saenq,gou sikhaek aeu fwngz vix bien dunghsin he doeg hwnjdaeuj.Daihgya raen gou doq vix cihsaw doq doeg,coenzcoenz dwg Vahcuengh swjgeij,da cungj daengx liux.Mbouj caj gou doeg duenh he sat,bouxboux cungj ngaek gyaeuj dwgdwg,saenq lo,fug lo,neix cingqhangq dwg Sawcuengh raeuz!Gvaqlaeng baez ndaejhoengq,couh ciengzciengz miz doengzsaeh daeuj ra gou gangjgoj ndawbingz,eu fwen ndaw biengz.Yienghneix,gou sij gauj couh miz daihbaj daezcaiz lo,sij ok le caemhcaiq lienzdaemh youq gwnz BAUQ SAWCUENGH daeng okdaeuj.Baezdaengz gou dawz bauqyiengh dog hawj daihgya dingq,daihgya couh angq dwk lienzlienz haenh naeuz:”Sawcuengh raeuz,miz yungh,miz yungh!”Cingq dwg ndaej gyoengq doengzsaeh ndatsim bang gou,gou couh lienzlienz miz cozbinj daeng youq BAUQ SAWCUENGH.1982 nienz gou ndaej bingz hwnj youhsiu dunghsinyenz.1983 nienz 11 nyiedlij ndaej iu bae Namzningz camgya gaiq daih’it youhsiu dunghsinyenz daibyauj daihhoih dem.Yienghneix,gou caeuq BAUQ SAWCUENGH gamjcingz yied daeuj yied laeg,caiq hix gat mbouj goenq dem lo.1984 nienz 7 nyied,gou diuh daengz bause Bauq Sawcuengh gunghcoz.Daj neix hwnj,gou couh caeuq gihgai gunghyez doxbiek lo,bienqbaenz boux Sawcuengh conhyez gnghcozcej ndeu,doh gvaq le gij ndwenngoenz byongh ciuh laeng gou.Ngeihcib bi,naeuz raez youh mbouj raez,naeuz dinj youh mbouj dinj,caenda yawjraen <Bauq Sawcuengh> dauqcungz cuzbanj,gaijbanj baenz <Gvangjsih Minzcuz Bau> banj Sawcuengh,daengz seizneix youh yied banh yied ndei,ou fanhfaen ganjgai.Gou siengsaenq,ngoenzlaeng de itdingh banh ndaej ngoenz beij ngoenz engq ndei!

路漫发表于 2010-3-11 22:47:00

<h2 style="MARGIN: 13pt 0cm;">7.Gou byaij gvaq……(sei sanjvwnz)</h2>Gou byaij gvaq suen mak cwzyin bae.Vei,gijmaz lumj dienhdaengyaep lwgda,gijmaz lumj daengngoenz iengj rongh haeuj naj?O!Dwg makgam,dwg makdoengj,henjlemlem venj rim gwnz nga,henjrwgrwg giet baenz foengq.Neix venj haenx dwg vandiemz,neix venj haenx dwg vuenyungz ha!Gou byaij gvaq bya cwzyin bae.Vei,gijmaz lumj ndaundei deih nyaennyaen,gijmaz lumj cawnyawh ndongqliklik?O!Dwg makgak,dwg makit.Gaxgonq,gizneix ndoqndatndat,seizneix gizgiz mwncupcup.De yiengq vunzraeuz bauq naeuz:Yienghneix riengz dangj laebdaeb byaij baenaj,saedceij vunzraeuz itdingh yied gvaq yied vuenhoengz,gwndaenj itdingh yied ngoenz yied homvan.Gou byaij gvaq naz cwzyin bae.Vei,gijmaz hwnj langh lumj langhhaij,gijmaz henjrwg lumj gim?O!Dwg haeuxnaz henj lo,rumznamz “gyaez” de riunyumnyum!It hauh vwnzgen fat roengzdaeuj,riengzhaeux angq maj raez gvaq rieng vaiz,naed de hung youh fag,doenghnaz angqyangz fan langhgim.Muengh baihnaj,maengx ndawsim;caiq doxbae,yied byaij yied gvangqlangh,yied yamq yied vuensim!……-----Bauq Sawcuengh B.1984.Nd.10.Ng.27

路漫发表于 2010-3-12 22:42:00

<h1 style="MARGIN: 0cm 0cm 0pt;">8.Song Faen Naz</h1>(song vunz yienjciengq)Lij FazA:Gaej roq laz roq gyong,cingj dingq song coenz fwen;ndi ciengq go eu nuengx,caengz dwen gonq souh hoj.B:Segyau song ndwen neix,saeh ndei lai fouzbeij;baez ndeu ciengq mbouj caez,cingj nuengxbeix gaej gvaiq.A:Mbanj Bangxcai,B:Gizgiz bya,A:Gwn raemx mbouj miz dah,B:Ndaem haeux youh siuj nazA:Gangj sing hag Dacai,B:Gietsim gaij diegbya;A:Sien hai mboq,B:Caiq vat dah.A:Gaijgez raemxgwn youh dwk naz.B:Bouxboux sim hai va.A:Gangj sing naeuz hai mboq,laux coz angq ndaw sim;haetlaeng mbwn buemxsuemj,vunz ok dou goenjdat.B:Cinghnenz buet dangqgonq,ngonz dig guh siepgeiq;hai dah gvaq lawz bae,aeu sijsaeq caemciek.A:Loz Saufaz,yawj baihnaj,lienzmuengz gangj liux vah:Siengj gyawj hai dah soh,yienghneix guh ceiq ndei;danhseih dieg mbouj leih:Sou yawj------B:Gizneix cienz byadat!A:Baenzlawz guh ne?B:Lingh ra ndei banfaz.A:Loz Vazgyangh,angqyangyang,rag bang cinghnenz hai bak gangj:
Hai dah gvaq neix bae,dah mbouj raez dieg bingz;vat naz song faen lingz,Song faen naz,mbouj miz gijmaz law----B:Vaiq doengh fwngz gaij yawj.AB:Hauxseng rengz rim ndang,bak gangj ndang couh guh.bied ga youh duet buh,doxiu diuq roengz naz.A:Gyoengq hauxseng,roengz naz yaek ciemz haeux,duzyenz miz vunz hat sing ndeu:Hwnjdaeuj!B:Ngangx gyaeuj daeuj,coh naj gaeuj,seyenz daeuj goenjouj.A:Guh maz ciemz haeux?B:Loz Vazgyangh,ndaejnyi cam,soeng liux gaemz heiq mahsang han:Gaijbienq raeuz diegbya,coih mboq hai dah dwg daihsaeh----Hai gvaq doeng bungz dat,gvaq sae dah youh raez,gvaq baek ciemq reih,hwnj mbwn mbouj ndaej,mwngz yawj baenzlawz guh ne?----Cijmiz baihnamz dieg bingz dah mbouj raez.A:Ciemz haeux vat naz?B:Song faen naz suenq gijmaz!AB:Cij vih song coenz vah,caezgya lwnhfaenfaen;
Vih hai dah saecingz,aeu nyinhcaen banhleix.A:Goengsam naeuz:Vat naz guh dah,gou yaengx song fwngz cancingz. danhseih neix haeux cingq mwn,ciemz bae sim’in hojsik.B:Vazgyangh han:Song faen naz haeuxmiuz,sou hwnjdaeuj,cungj mbouj gaeuq bak gaen;mbouj hai dah yinx raemx,mbwnrengx haenq,lienz gaen liengz mbouj dauq.A:Boux neix gangj:Gij Vah Vazgyangh,gangj ndaej dauhleix deng lai.Raeuz hag Dacai,aeu gaij diegbya menmau.Dah mboq mbouj gauj,yaek gaij menmau gangj ndwi,song faen naz neix,vat bae guh dah habsuenq.B:Boux de naeuz:Vat naz guh raemxloh,daihgya rox,dwg vat noh gip ndok;raeuz aeu ngeix daengz gueg,ndaw byalueg,nazraemx dieg mbouj lai.A:Vazgyangh mbouj fugheiq,hai bak ceng dauhleix:Coih mboq hai dah,daengzcog naz raemx daihbaj;neix vut di naz,dwg doek cehraz gip gva.B:Binznungz Golog,hai bak youh buek:Nanzdauh cehraz ndi ok youz?Dah youh aeu vat,naz youh aeu louz,daihgya caez naeuz doiq mbouj doiq?A:Gangj ndaej doiq,gangj ndaej ndei,binzhez cujsiz baij dauhleix: Dajlieb fouz nangx nyaen haeb ma,guh hong fouz naz sou gijmaz?Coih mboq hai dah wngdang guh,vihmaz nyegdingh aeu vat naz?B:Vazgyangh caengz fugsaw,hai bak dingj song gawq:Naz dwg dijbauj gou rox daengz,rindat nanz buen raeuz gaej lumz,vat naz guh dah haet ndeu baenz,bag dat guh dah aeu sam ngoenz!A:Vazgyangh mwngz gangj vah,cij raen gaeu mbaw mbouj raen gva;siengj hai dah dinj gvaq baihdoeng,dwg lau gwnrengz siengj soengyungz.Raeuz hag Dacai hag cingsaenz,gamj buek mbwnnamh gamj senj bya.Dacai bag bya daeuj guh naz,raeuz lawz vat naz daeuj guh dah?Song faen nazreih mbouj geij gvangq,it faen it conq dwg daihgya.Vut bae mboujdan haeux caeuq naz,swhsiengj benhcah ceiq youqgaenj.B:Binzhez cujsiz song coenz vah,diemj ndaej daihgya singj gvaqma: Raen nanz suk doxdauq,bungz dat lau rin ndongj,ndi dwg mbouj miz rengz,dwg swhsiengj caengz ngengh.gwzming lau rengz bae,mbouj dwg ndei haujhanq,byaij loh lau oen camx,lawz dang ndaej yinghyungz.B:Swhsiengj doeng,ganging hung.AB:Ceng guh Yizgungh dawz bya ram.A:Hai bauq.B:Geuh dat.A:Buen rin.B:Daeh namh.A:Fwngz hwnj bop,mbouj lau manh,laemx sieng hwnjdaeuj doengzyiengh ganq.AB:Hanh doek dieg ok raemx,sing gok bya yaek fan,daih guh sam hwnzngoenz,hai dah baenz,vunzraeuz naengz senj bya,raemx lae bae sasa,reih baenz naz,diegbya bienq yienghceij.Cijaeu swhsiengj ndongj, gijmaz hong,gonggong guh ndaej daengz;Gyoengqde Bangxcai vunz, yinsiz daengz,vunz swhsiengj daih’it.
----Bauq Sawcuengh 1965.12.18

路漫发表于 2010-3-25 22:33:00

<h1 style="MARGIN: 0cm 0cm 0pt;">Ngoenz Ndei Laeuj Diemz</h1>Cangh Lanzgwnh caeuq Cau Aiyingh doeng saenq lo,hoeng de lij gig simnyungq.De dawz saenq caeuq mbaw siengq Aiyingh hawj fu cijdaujyenz yawj.”Beij ‘lwgsau daihhag’ lij ndei yawj.Hoeng,lwgsau gyaeundei lai sim de engq nanz mo ha!”Fu cijdaujyenz mbouj miz saekdi vah haenh,”gou lau mwngz youh deng doek gumz……”Caen ha,Cangh Lanzgwnh hix miz di lau ne!Ndaw saenq Aiyingh vah yied sij yied ndatsim vunz:”…… Lanzgwnh ,gvaqciuh lumj byaij loh,dang mwngz deng conj laemx seiz,gou nyienh caeuq mwngz baengh mbaq byaij.Cijaeu raeuz ngiengx gyaeuj byaij,ndaenngoenz couh van beij laeuj diemz!……”Hoeng,vah gangj ndaej yied ndei,Cangh lanzgwnh couh yied ndeilau.Doeng saenq buenq bi le,Aiyingh daeuj budui lo.Songde sim doiq sim “doxyaeng”:”Mbouj yaeuh mwngz,gou caen mbouj ndaej daez dang ganbu lo.”Cangh Lanzgwnh naengh lumj faex daengj,cingqging naeuz.“Aiya,coenz vah neix gou dingq ndaej rwz yaek nuk lo!”Aiyingh da liuq Cangh Lanzgwnh,riugekgek gangj vah diubeiz,”Mwngz gaej lumj vunzbag nei,nyaengz vunz couh nam:’Caen ha,gou caen huk.Gou cij rox mbouj daezganq de hix gyaez gou,mbouj rox……’”“Mwngz hix rox cwngcwz,fuzyenz le gou cij ndaej ma lajmban.”“Dauqma lajmbanj youh lawzyiengh?Guek raeuz miz bet ik vunz youq lajmbanj,nanzdauh gyoengqde couh mbouj miz haeux gwn?Ranz raeuz ciuhciuh daihdaih hix dwg guh hongnaz.”Dingz yaep he,de gangj coenz vahnaek naeuz,”Lanzgwnh,miz coenz vah mbouj ndei dingq ndeu,gou sien gangj ok naj:Mwngz fuzyenz le gaej ra boh gou aeu ganbu dang.Gij saeh ra gunghcoz,lienz gou caeuq nuengx gou de hix mbouj guenj.De gyaez mwngz,hoeng de coengzlaiz banhsaeh mbouj hai gvaq ‘doulaeng’.”“Cingq siengj daengz song raeuz boux youq lajmbanj boux youq ndaw singz,cij cingj mwngz lai siengjngeix ngoenzlaeng mbouj ndei banh.”“Gou youh mbouj dwg vunz moeglaet,mbouj siengj gvaq ha?Gangj daeuj hix ndei banh.Henz yienhsingz dou miz mbanj,fuzyenz le mwngz senj bae gizhaenx aeu hugouj.Ngoenznaengz mwngz guh hongnaz mwngz,gou guh lauxsae gou.”Aiyingh muengh Cangh Lanzgwnh dwk da mbouj yaep,vah ndawsim raix ok bak daeuj,”Mboujne danghnaeuz ranz mwngz gangj ‘hwnjranz’ mbouj ndei dingq,gou couh haq meuz riengz meuz,haq ma riengz ma,haq bae ranz mwngz youq,ndei luba?”Coenzcoenz vah ndawsim,gawqgawq vah ndaw dungx.Aiyingh ha,sim mwngz geijlai caen,cingz mwngz geijlai naek.Lanzgwnh ha,mwngz miz gijmaz vah dem!Song duz roegfek doxhaen baenz doiq lo!Gyoengq canyouj vih songde sim ndeu cingz naek caez sim’angq!Lwgsau simsang gyaez cawnyawh ndongq da,lwgsau simseuq gyaez simndongq angj vunz.Cau Aiyingh ra gyaez Cangh Lanzgwnh , hawj vunzraeuz rox daengz,simseuq simcingh,cij sawj aiqcingz ndongqgywggywg!Geij ndwen gvaq le,gyoengqde youq lienzdoih banh vaenlaex lo,gyeongq canyouj hix angqyangzyangz,lumj gvaq ciet nei.Haemh haenx,Cangh Lanzgwnh sim raeujrubrub,ngaezngwgngwg yawj bawxmoq,naeuz:”Mwngz caen gyaeundei,beij gou ngam raen mwngz seiz lij……”“Miz coenz vah ndeu naeuz,’vunz mbouj dwg gyaeundei cij ndeigyaez,dauqfanj dwg ndeigyaez le cij gyaeundei!’”“Hix lumj ndaw lienz gyeongq canyouj naeuz----”“Gyoengqde gangj gijmaz?”“Cien miz fuk,fanh miz fuk,mbouj beij gou Cangh Lanzgwnh……”“Mbouj lumj mwngz lawzyiengh?”“Mbouj lumj gou aeu ndaej boux bawx ndeindindi!”“Yawj mwngz angq dwk ha……”1.
Nyienh Boux Haenx Hiz Miz FukCangh Lanzgwnh youh baenz boux miz fuk lo.De caeuq Aiyingh gietvaen le,guh gunghcoz caez doxbang,gvaq saedceij caez doxgyaez, song gvanyah caengz hwngqnaj gvaq,doxgingq doxndiep.Seizneix songde gaenq miz laeq lwgnyez ndeigyaez ndeu lo.Engq mizyinx dwg Lanzgwnh caeuq Aiyingh doxgap sij ndaej song bien siujsoz,bien ndeu heuh YAH NDEI,daeng youq gwnz NEI MUNGZGOJ VWNZYI,sij lwgbawx gingq goengyah,daihgaiq Aiyingh couh dwg vunz yiengh ndaw saw ba.Lingh bien heuh GOJ GINHVEIH, daeng youq gwnz SANHSIH YIZBAU,sij aen goj song gvanyah lawz son lwg.Lanzgwnh caeuq Aiyingh mbouj dwg muenghsang dang cozgyah,hoeng youq seizhoengq gvan heuh yah buenx sij di saw,songde mbouj engqgya simsangj engq saedcaih ha?Youq gwnzbiengz lij miz gijmaz beij gij aiqcingz caez haemz doengz van neix engq moqndongq engq hawj vunz hozhaenz ne!Lij siengj lwnh daihgya dwg,Lanzgwnh caeuq Aiyingh gietvaen gvaq laeng,’’lwgsau daihhag” youh hawj Cangh Lanzgwnh sij saenq,de lij dauqma ranz caeuq bohmeh Cangh Lanzgwnh nauh ciengz ndeu,bak swenj yaek caeuq Cangh Lanzgwnh fuk doxndei.Laizyouz dwg Cangh Lanzgwnh daengz seizneix lij caengz fuzyenz,haengjdingh senq couh daez dang ganbu lo,yaeuh de lo!Gij saeh neix heuh vunz nanz siengj ndaej doeng,Nyiengh boux sij saw bang Cangh Lanzgwnh gangj saedsaeh ba.Gangj deng lo,bi ndeu gaxgonq,Cangh Lanzgwnh diuh bae donz cwngcibu,dang baudaujyenz. De fat haenq roengzrengz,gaenq youq gak giz bauganh,dendaiz fatbiuj gvaq haj cib geij bien gauj.Yienznaeuz budui gig aeuyungh boux cansw miz dungxcaiz neix,hoeng nienzgeij gvaq lo mbouj ndaej daezganq, seizneix de lij dwg boux bing bingzciengz ndeu!Cangh Lanzgwnh dingqnyi “lwgsau daihhag” lienh’aiq youh deng “daemjndaet”,ndawsim hix di mbouj onj.Danhseih,heuh de gangj gijmaz ndei ne?De cijndaej youq ndawsim daj gyae nyienh boux baengzyoux seiz lwgnyez, boux doengzhag caez doeg cunghyoz haenx,naengz sim cingq bae damqra lawz guh vunz,ndaej dawz fukheiq!

黄胜祥 发表于 2010-3-25 23:16:00

Deé gèrn hoo        Năq mê mì án dỉ lèc, mì oóq gèrn hoo, gèrn laái jĩu deé mì kern tá. oóq deé loôq gâ se poóq jì poóq pạn léc. deé pại loô nì gèrn xàq pĩ naài deé. mì qòn lèc deé yǒu đáe án mỉu lèc xaàq tán yâ gèrn geě lèc tá râm, deé yoôq gâ nam mặg boòg yá đái yâ gèrn geě tá đái lecu loò. yâ gèrn geě kaàn sěc deé laái,doǒ here deé án dâi lèc--aăi hòrq poóq parn ló...      Deé tàg gâ dâi dêcu rèn, dêri loô gèrn jĩu tán gâ dâi deé dârn rại, pĩ naài dêrd dêrd...gèrn háe tín, deé dêcu térq rèn lecu kái gâ dâi ǒrg mà jĩu--dâu geém đáe dâi nì mòb yạg yạg, đáe gâ dâi nì doǒ cêre geém cêcq !

路漫发表于 2010-3-23 23:13:00

<h1 style="MARGIN: 0cm 0cm 0pt;">Lawz Miz Cik Dag Sim</h1>Aiqcingz lumj fag cik ndeu,mbauqsau doxgyaez,danghnaeuz boux neix miz nanh,boux haenx lawz siengj lawz guh,couh dag rox aen sim de lo,”lwgsau daihhag”deng vunzrwix gaemh gvaq,Cangh lanzgwnh baenzlawz siengj ne?“Gou itdingh mbouj ndek de,mboujguenj de souh nanh baenzlawz naek,gou caj de daengz dai!”Cangh Lanzgwnh doiq fu cijdaujyenz cingznaek gwdgwd naeuz.“Mwngz gangj ndaej deng!”fu cijdaujyenz simgyoh naeuz,”De sim baenzneix seuq,youh baenzneix gyaez mwngz,raeuz mbouj ndaej yungh funghgen swhsiengj naeuz de ndang mbouj ‘seuq’……”Cangh Lanzgwnh lienz hwnz sij fung saenq ndeu,duzyou doeg le hix simcieg!Budui hix hawj gunghcangj fat saenq,cazcam “lwgsau daihhag” cingzgvang,muengh deihfueng dangjcujciz vaiq di fuk saenq.Gvaq caet ngoenz le,gunghcangj dangjveij bangunghsiz fuk saenq gangj,gaenbonj mbouj miz “vunzrwix gaemh”gienh saeh neix,”lwgsau daihhag”hix mbouj ninz gvaq yihyen,de cij dwgliengz yiet gvaq song ngoenz,senq ndei gvaq,seizneix simhai dangqmaz!Cangh Lanzgwnh hix ciep ndaej “lwgsau daihhag”hoiz saenq,saenq sij naeuz:Bingh de yw ndei lo,gaej aeu vunz daeuj yawj de.Lij naeuz:Ndang de lij louz bingh goek,mbouj ndaej gietvaen,heuh Cangh Lanzgwnh lingh ra sau. Dauqdaej baenz gijmaz bingh,de cih ndeu mbouj sij.Cangh Lanzgwnh siengj mbouj doeng,gyoengq canyouj hix moengxdoengj lo.“Seizneix damz lienh’aiq,lwgsau angq daeuqloengh lwgmbauq,gou lau de yaek gaujniemh mwngz bw.”Fu cijdaujyenz heuh Cangh Lanzgwnh ganjgip sij saenq bae gyausim.Cangh Lanzgwnh bibi gyaeuj,ndawsim naek lumj hang nei.Songde daj nyaeq doxndei daengz hung,lij miz gijmaz ndei gaujniemh ne?Couhcinj dwg gaujniemh,hix mbouj wng luenh loengh!Cangh Lanzgwnh youh sij saenq hawj de.Mbouj nanz,sou ndaej de geiq aen Sanghaij soujbiu dauq,lienz cih saw ndeu hix mbouj raen ngaeuz!A!Soujbiu yienznaeuz saeq cingzngeih naek ha!Bihaenx de hwnj daihhag,Cangh lanzgwnh vih bienh de hwnjdangz,gwn ninz,moix ndwen fat cienzcinhdez,louz maenz ndeu cawx genj caeuq ngazgau le,faen ndeu mbouj sij luenh yungh,gyonj rom hwnjdaeuj,cob cienz daeuj cawx ndaej aen biu neix……Seizneix,aen biu neix youq gwnz fwngz,yiengj “dikdag dikdag”,couh lumj byaicim diuq digdig camx sim Cangh Lanzgwnh ha!Cangh Lanzgwnh youh lienz haemh sij geij fung saenq bae.Mbouj nanz,de fuk saenq daeuj fannaj lo,lohganghgangh naeuz:Siengj caeuq de gietvaen,itdingh aeu guh daengz lajneix diuz ndeu:Daez dang ganbu,cenjyez bae Sih’anh;roxnaeuz ma ndaw yienh dangsaeh. Youqgaenj dwg ndaej gwn haeux guekgya!”Doiq Cangh Lanzgwnh daeuj gangj,yiengh ndeu cungj guh mbouj daengz……A,gaxgonq ndaw saw lwed cihcih van gvaq dangz,seizneix ndaw saenq coenzcoenz soemj gvaq meiq!1.
Miz Cingz Cien Leix Ndaej DoxraenAiqcingz bonjlaiz dwg dujva moq,seizneix bienq baenz vengq vaj sangx.Cangh Lanzgwnh sim’in ha,hoeng de dwg boux cansw,dwg boux bing simgeng ndeu.Yaek daengz cieng lo,budui anbaiz de ma ranz damqcaen.Youq hwnj ci seiz,de raen miz boux laux dungzci ndeu,dawz doxgaiq naek,ga youh mbouj bienh,couh fuz de hwnjci,nyiengh diegnaengh hawj de naengh.Boux vunzlaux neix heuh Cau Cunghhoz,1943 nienz guh gwzming, heonxciengq seiz gagoek deng sieng naek gvaq,ndaw hwet lij miz gipbikmax,dang gvaq yienh yinzvujbu bucangj,gaenq lizyouh. Soeng vunz doxgangj,dingq vah haemq sug,baez cam,yienzlaiz mbanjranz yienh doxgyawj,cungj youq Funghswng Cehcan roengz ci.Baenzneix,soeng vunz yied gangj yied sug,laux bucangj cam Cangh Lanzgwnh geijlai bi,baenzranz caengz……Cangh Lanzgwnh raen laux bucangj gig gvensim vunz,couh dawz gij saeh de caeuq “lwgsau daihhag” haenx rubrab gangj ok goekbyai,laux bucangj danqheiq naeuz:”Mwngz baezneix baema,dajsuenq baenzlawz banh?”“Mbouj ceng mbouj ndaq,gonq ndei baenzneix ndei biek.”Cangh Lanzgwnh loq ngeix le gangj,”Gou bouxbing neix couh yaek dauqma lajmbanj guh naz,de dwg daihhagseng,aeu de caeuq gou baenzranz,de hix miz duh de hojnanz ha……”Daengz Funghswng Cehcan lo,songde roengz ci le,Cangh Lanzgwnh sien bang laux bucangj cawx cibiuq,youh soengq de hwnj heiqci. Seizhaenx laux bucangj heuh de:”Siuj Cangh,bang vunz bang daengz sat,mwngz soengq gou daengz ranz bae,ndei lwi?”Cangh Lanzgwnh rox laux bucangj vunz laux ga mbouj bienh,couh cawx cibiuq soengq de daengz ranz.Haeuj ranz le,laux bucangj caeuq yah de huphap geij coenz,daengx ranz vunz couh nyaengq hwnjdaeuj lo.Gwn caeuz seiz,nohbyaek rim daiz,lij miz laeuj dem.Laux bucangj heuh lwgmbwk de daeuj caez gwn,cij dingqnyi singriu hihihaha mbouj raen vunz,yaek he dahsam gaex dahngeih Cau Aiyingh daeuj guh daibyauj,Aiyingh naj hoengzfegfeg doi naeuz bae cawj raemxdang,raeb ndonj deuz lo.Cangh Lanzgwnh ndawsim roxsingj,najnyaenq ngaem gyaeuj gwn geij gaemz ngaiz,couh riuj hingzlij bae lijse.Hoeng lijcaengz banh ndei soujsuz,dahngeih caeuq dahsam couh gyaep daeuj lo.“Siuj Cangh,boh gou naeuz ndaw ranz gvangq,heuh mwngz itdingh ma ranz youq.”Aiyingh gangj.Cangh Lanzgwnh naj nding daengz goekrwz bae cingqsiengj guhhek, boux fuzvuyenz naeuz:”Youq ranz caencik ceiq ndei ha!”Cangh Lanzgwnh mbouj rox lawz gangj lo.Dahsam yawjyawj Cangh Lanzgwnh,youh doiq Aiyingh yaepda naeuz:”Cejngeih,gou bae gonq lo……”Dahsam baez yawj baez yaepda baez riu,Cangh Lanzgwnh ndawsim rox seuqsat lo,nyaenq dwk mbouj gamj yawj Aiyingh,……Haetlaeng,laux bucangj rag Cangh Lanzgwnh haeuj rug bae,baij mingz baij beg naeuz:”Vunz naeuz meh ngawz haenh lwg gvai,gou hix gag haenh lwgmbwk gou lo.Mwngz yawj-----”De vix gwnz ciengz geij mbaw ciengj naeuz,”Aiyingh dwg cunghyoz lauxsae,laebdaeb bingz ndaej youhsiu lauxsae,beij mwngz oiq sam bi.Sou hix raennaj lo,danghnaeuz mwngz nyinhnaeuz hab,sou couh sij saenq doxlienz ba.”Cangh Lanzgwnh caen mbouj gamj saenq,de ngam daj fangzhwnz singj dauq,ndawsim doiq cih “gyaez” lij simyup,seizneix boux cunghyoz lauxsae youh gyaeundei youh simsoh neix,gingqyienz nyienh gyaez de…..

路漫发表于 2010-3-24 22:54:00

<h1 style="MARGIN: 0cm 0cm 0pt;">Aen Sim Cansw Cingh Gvaq Raemxmboq</h1>Cangh Lanzgwnh ma daengz ranz le,dingqnyi “lwgsau daihhag”daiq lwgmbauq daihhag ndeu caez ma.Vunz ndaw mbanj naeuz miz cit heiq ndeu yawj lo.Cangh Lanzgwnh miz gihvei boizhaemz lo.Doiq naj heuh de boiz cienz,hableix;haeuj ranz bae ndaq ciengz ndeu,hix habcingz. Hoeng,Cangh Lanzgwnh gig insik cansw aen cwnghhau neix,De yienzlaiz dajsuenq caeuq “lwgsau daihhag”raen baez naj,gangj geij coenz “vahsat”,seizneix miz boux lwgmbauq daihhag caez ma,de doxraen hix citcangcang lo.“Cangh Lanzgwnh daiq lauxsaed lai,bienzngeiz meh huqcienh haenx!”“Danghnaeuz Lanzgwnh mbouj bae dangbing,bonjlaiz couh baujsoengq Lanzgwnh bae doeg daihhag.””Dangbing gvaq couh mbouj doengz,guh saeh hawj vunz simfug.”Cungqvunz yaengswgswg,gangj vah cungj ndwn youq Cangh Lanzgwnh mbiengj neix.“Lwgsau daihhag”dwg siengj damqyawj ne,roxnaeuz ndawsim fuebfueb mbouj onj?De youq ranz caj ,daengq Cangh Lanzgwnh daeuj raennaj.“Gij saeh raeuz,sim gou lijcaengz bienq.”De sim miz di vueng,hoeng youh lumj boux ciengqheiq nei guh heiq,”danghnaeuz mwngz ra ndaej saeh dang,raeuz couh baenz.”“Mingh gou cawqdingh mbouj ndaej gwn haeux guekgya.”Cangh Lanzgwnh ndaw vah miz vah naeuz,”danghnaeuz ndaej gwn ne,boux lwgmbauq mwngz daiq ma haenx baenzlawz guh?”“De dwg doengzsaeh gou,gvaq cieng cuengqgyaj ok rog lijyouz,swnh loh daeuj neix guhcaemz.”“Raeuz mbouj dwg lwgnyez lo,gangj byangz mbouj roxnyinh najmong.”Cangh Lanzgwnh ndawsim seuqsat naeuz,”cuengqsim ba,gou mbouj rox bae ngaih mwngz gouzra fukfaenh.Song ngoenz neix gou dingqnyi naeuz bohmeh mwngz lau gou ci boiz cienzdingh,cingq nyaengq bae ciq cienz.Cingj mwngz lwnh song boux vunzlaux,heuh songde cuengqsim gvaq ndei cieng.Gvaqlaeng,gou Cangh Lanzgwnh itdingh mbouj hawj song bouxlaux veiznanz,Couh baenzneix lo,caiqraen luba,laux doengzhag!”1.
Dauzdwz Bengz Gvaq Gim HaNgoenz haemhndaep,Cangh Lanzgwnh cingq bang daxmeh nyaengq gvaq cieng,boux lwgmbauq daihhag fwt haeuj ranz daeuj.Danghnaeuz youq ciuhgonq,lij laihnaeuz de daeuj caeuq Cangh Lanzgwnh doxmoeb ne.Hoeng,seizneix de dawz fwngz Cangh Lanzgwnh gaem ndaetndaet dwk.“Gaijfangginh dungzci,mwngz yienzliengh gou ba,gou doiq mbouj hwnj mwngz!”“Mwngz,mwngz baenzlawz rox……”“Dangjcihsuh gyonj lwnh gou lo.Gou saedcaih mbouj rox.De doiq gou gangj,de coengzlaiz mbouj damz gvaq lienh’aiq.Hai,gou yiemj di baenz vunzcienh lo.”“Gij saeh gou caeuq de.cij ciuq laehgaeuq dinghlaex gvaq,Gangj hwnjdaeuj cij dwg caemh mbanj doengzhag.De geiqyienz gyaez mwngz,gou hoh sou miz fukheiq!”“Fukheiq?Ngoenzgonq vih mwngz mbouj ndaej daez dang ganbu de couh vut mwngz,ngoenzlaeng danghnaeuz gou miz saek di boihseiz,de doengzyiengh ndek gou,neix dwg gijmaz fukheiq!”“Aen sim de miz di mbouj ndei.Vunz youq lajmbwn hix nanz mbouj miz saekdi loengca.Sou caemh gvaq ndwenngoenz le,mwngz lij ndaej bang de ha!”“Gaijfangginh ceiq rox guh swhsiengj gunghcoz,sou lij mbouj ndaej dawz de son gvaqdaeuj,gou dwg boux doegsaw,engq mbouj miz banhfap lo.”Gangj le,de yot bit okdaeuj caeuq Cangh Lanzgwnh doxgeiq diegyouq,muengh Cangh Lanzgwnh gvaq laeng miz seizgan bae ranz de guhhek.De heuh “caiq raen” couh riuj daehbau baema Sih’anh lo.Cangh Lanzgwnh roxnyinh raemxda iemq okdaeuj.Daudwz bengz gvaq gim ha!De doiq boux lwgmbauq daihhag neix caengz gaeuq sug,hoeng daj gienh saeh neix,de rox daengz bouxcoz sim maengx neix,doiqdaih cihgeij geijlai yiemz!Baengzyoux ha,cingj mwngz gaej lumz bae youq ndaw guekcoj gyaeundei raeuz,lij miz vwnzmingz daudwz aen caizfouq dijbauj neix!Dangjcihsuh gonq guh moiz haenx doiq “lwgsau daihhag” gienq bae gienq dauq daengz myaiz hawq hoz sauj,bohmeh de hix daej fwtfwt naeuz ndek mbouj ndaej,muengh lwgmbwk dauq cienq sim ma. Seizhaenx,danghnaeuz “lwgsau daihhag”ndaej singh gvaqdaeuj,gienh saeh neix hojnaengz lij dwg gaiqgingq vaih dauq hop baenz ndei.Danhseih,lawz gienq lawz gangj cungh mbouj miz yungh.De youq naj bouxlaux ndaw mbanj doiq Cangh Lanzgwnh rongx:”Gou nyienh haq hawj goenggeq roekcib bi,hix dingh mbouj haq mwngz Cangh Lanzgwnh! ”Boux haeb lwgfwngz sij sawlwed haenx ha,sim mwngz baenzlawz bienq ndaej nyaenx haenq,dai bae nyaenx ndongj?

admin 发表于 2010-4-4 23:24:00

<h1 style="MARGIN: 0cm 0cm 0pt;">10.Raemxrij Hix Baenz Langh</h1>Laj faex,raemxrij laecetcet.Vengq vunj he lumj geizbya youq ndaw raemxrij vad bae vad dauq.Raemz sinz hwnj gwnz ga haumbupmbup haenx ringx roengz laj bae,sawliklik.Gouh giujhaiz sang he gveng youq haenz rij……Dahsau,naengh youq henz haenx,bak hoengzfe de gamz dug nywjnyinz he,va nywj led aen bak luenz de,song da ngaezngwd dinghdingh yawj raemxrij lae bae cancan..Ciuh vunz,hix lumj raemxrij nei,miz seiz saetsaet diuqdiuq,angqangq yangzyangz;miz seiz hawhaw moengxmoengx,ngutngut ngeungeu. Gungjfuhswj gangj ndaej deng:Saedceij lumj raemx lae!Dahsau,cib bet bi,cingq oiqup,rengzhwd.Hoeng,gauj daihhag,dah doek buengj lo.Senq rox baenzneix,hozbiet dangco.Dah ienqhoij seiz lwgnyez begbeg sai bae.Dahsau,wnggai muengh gijmaz?Dwg gij sim siengj yiengjfuk roxnaeuz gij yiengjfuk sim siengj?Dwg gyaez vunz gouzra roxnaeuz gouzra vunz gyaez?……de nyap,de aw,de naemj.Miz vunz naeuz:Lengj,dahsau cix bengz.Dwg bw,dah gig lengj,daenj dauq buh hab ndang he,aen ndang reuxreng,bizbaed,sawj vunz maez bae.Fouq da ndongq haenx,hauxseng raen le nyaenx mbouj ndaej hemq:”Yo,lengj lai lo!”Ndaw da de miz cungj saenzheiq he,daeg mbeisiuj haenx naeuz da de lumj song fag giemq,daeg cingznaek haenx naeuz da de lumj song cik fwngz oiq,”lumh” dwk mwngz sim haenz. Dwgmiq,cij aeu dah haengj han,haenghdingh miz vunz bau dah gvaq saedceij soengsoeng yungzyungz.Danjseih,dah mbouj siengj daengz gij neix.Dah nyinhdingh coenz vah neix:Ndei,gizgiz cungj ra ndaej.Dug nywjnyinz ndaw bak de deng gaet goenq lo,va’nywj doek roengz raemx,riengz raemx dongj bae.Dah gip hwnj gouh haiz giuj sang,daenj hwnj din,dugdug yaij bae lo.Yamq din naekgywdgywd,youq gwnz sadan caij ok gij riz din laeglemlem,lumj hangz sanhcezhau he,hawj vunz siengj mbouj sat naemj mbouj duenx.Ngoenz he,dah raen miz mbaw bauqceij ndeu,doeg ha doeg ha,roxnyinh najsug youh haemq seng,naeuz dwg najseng youh haemq sug.Dah da rongh lo,sim doengh lo.Dahsau yienznaeuz simlaeg,hix haemq simmbwk.Danghnaeuz ndaw sim miz aen cung he,de cij mbouj luenh haengj roq,baez roq couh daegbied sek.Miz coenz vah he naeuz:Simngeiz lai vunz couh mbouj lanh.Dah dawz bit mbe ceij,sij,sij,hangz youh hangz,mbaw youh mbaw,sij ok gij vah ndawsim,gij coenz ndaw dungx……sij le,cang haeuj byuksaen,geiq okbae!Hwnj rumzcin,va cungj dwg aeu hai.Va mbouj lau mbouj miz seizcin,lau cix lau seizcin mbouj miz va.Mbouj geij nanz,fung saenq he soengz daengz fwngz de,mbouj na,hoeng dah roxnyinh caem,roxnyinh naek.Fwn ndei rox seizciet.Ndawsim dah did ok gij ngaz mizmuengh.Saw baenz daeb,ceij baenz dab,dah maez haeujbae lo.Miz ndaem cix miz sou,yienznaeuz aeu okrengz,aeu ndik hanh,miz seiz lij gig baeg,gig dwgrengz.Hoeng,ciuhvunz lumj raemxrij;dwg raemxrij,cungj miz ngoenz he lae daengz ndaw haij,baenz ciuz baenz langh……Gwnz Minzcuz Bauq daeng bien siujsoz he,yungh Sawcuengh sij, bouxsij dwg mingzcoh dah.Dah riu lo,riu ndaej haemq van.Yienznaeuz mbouj dwg daihbouhdaeuz, hoeng dauqdaej dwg cunijcoz duh de.Gvangjsih Minzcuz Bau 1986 8 6

路漫发表于 2010-4-6 11:46:00

gangjdoj 发表于 2011-3-27 11:14:00

看不懂，应加强你的壮文读书能力。。

路漫发表于 2013-2-12 17:07:10

yaengyaeng doeg ,menhmenh couh rox lo.

路漫发表于 2013-2-20 22:46:50

Ngoenzneix ngoenzseng gou
Ngoenzneix gou ndaej cibhaj bi.Vunz lajmbanj doagsaw ceiz,youh deng louzgaep gvaq( Meh gou mbouj gangj louzgaep,gangj dwg dauqdoeg) Haha,Baenzbaenz gou baenz vunzhung lo!Gvaqlaeng gou aeu gag guenj cihgeij, gag guhcawj cihgeij,gag henhah cihgeij lo.
Danghnaeuz youq ciuhlaux,dahsau lumj gou baenz hung,ndaej hawj vunz guh bawx lo.Hoeng,gou mbouj! Guh bawx deng vunz guenj,miz maz ndei,hawj guh bawx bae raen fangz ba!
Lajmbanj mbouj guh ngoenzseng,daxboh daxmeh mbouj gvaq ngoenzseng,daxgoeng daxbuz lij youq seiz hix mbouj gvaq ngoenzseng,ndigah mboujmiz vunz hawj gou gvaq ngoenzseng,gou di he mbouj doeknaiq.Ndaw ban gou miz di doengzhag ranz youq ndaw singz,gyoengqde gvaq ngoenzseng heuh gou bae caez angq,gou naemj mboujmiz maz doxgaiq citgeiz guh saenzcingz soengq hawj gyoengqde,couh gyaih naeuz miz saeh mbouj ndaej bae.Miz maz banhfap ne,vunz caeuq vunz mbouj doengz ha!
Mbouj gvaq ngoenzseng hix ndei,mbaet cienz mbouj gangj,mbouj dem nyaengq cuh soengswt lo.Daxmeh gou gangj ndaej ndei:Lumzlangh bi’ndwen,ciengzlwenx lij coz!
Siengj guh daengz “ciengzlwenx lij coz”.couh aeu guh daengz ciengzlwenx mbouj guh bawx,ciengzlwenx mbouj hawj gvan guenj,ciengzlwenx mbouj nyaengq hongraanz,ciengzlwenx gag bae gag dauq,soengsoeng dwtdwt!
Dangyienz,gou maqmuengh miz vunz daeuj gyaez,hix maqmuengh bae gyaez vunz.hoeng gyaez vunz mbouj daengj dwg bae haq vunz,lajmbwn cungj aeu miz gyaez, bouxboux cungj maqmuengh ndaej gij gyaez raeujrub, hoeng lwgsau mbouj dwg dandan bae gyaez boux lwgsai he,aeu gyaez doh sai mbwk laux iq------vunz daengx lajmbwn.

路漫发表于 2013-3-5 23:39:25

Miz Lwgnyez Ndeilau Lai
Geiz dahheiz hung gvaq gou yaek miz ngeihcib bi.Lij doeg siujhag seiz,gou caeuq de dwg ranznden.Seizhaenx de miz dah lwg ndeu gig ndeigyaez,gou raen de nyaengq, bang de umj dahniq,daeuq dahniq guhcaemz.Dahniq angq,gou hix angq,Geiz dahheiz swhyienz hix angq. Ngoenz neix,Geiz dahheiz fut raen gou,Naeuz:”gou gig cit ha,guh gijmaz cungj mboujmiz rengz……”
Gou raen de sim mbouj ndei,laihnaeuz dwg gunghcoz nyaengq lai.De daihhag bizyez le,itcig dwg vih vunz dajgoeng.Yienghnex gou couh nai naeuz:”Ansim ba,cij aeu genhciz,rinhang hix rox fatrongh.Doiq mwngz daeuj gangj,miz aen ranz raeujrub he,cij dwg ndei ne.
Siengj mbouj daengz,de sikhaek naeuz:”Gou couh vih dahlwg gou,Cij roengzrengz guhhong ha.Dah neix bingh lai,cienz yw lai hw.Dah neix gwn mbouj rox maj,gig byaet.”
Gou vih de simgip lo,muengz cam:”Dwg mbouj dwg gamcik?””Mbouj dwg,gamcik gaenq yw gvaq geij baez lo.Gou vih neix mbouj bang vunz guhhong lo,Cienmonz dajleix de.”
Gou cwz lwg mbouj roxnaj guk:Mwngz ndaej lai seng laeq he,lai boux he lai……”
De naeuz “Mbouj seng lo,sojmiz gij gyaez cungj hawj de lo,Lij rom cienz hawj de yw bingh dem.”
Gou mboj rox gangj vah vunzhung,miz maz gangj maz: ”Lwgnyez bingh laicoengmingz hw,mwngz lij dwg ndeindei bae beizyangj de ba.”
De hixnaengz fatheiq lo,dawz vah gangj gvaq lingh mbiengq bae”Gou bae lo.”
Gou naemj,danghnaeuz Geiz daxheiz mbouj miz lwgnyez,dandan dwg gietvaen,hix caemh miz fukheiq. Dingq daxmeh naeuz,gvan de gig gyaez de,ngoenznaengz haethaemh roengzban,cungj aeu hai ci daengz bakdou danvih deq ciep de……hoeng hojsik……

路漫发表于 2013-3-16 10:20:15

Duznou Caeuq Daxmeh
Aeu aen daezmoeg neix,cix mbouj dwg daegdaengq mieng daxmeh gou.Daxmeh dauqdaej dwg daxmeh,caemhcaiq youq gwnz seiq cij miz daxmeh ndeu,mbouj ndaej mbouj nyinh!Seng gou ciengx gou rungx gou,vih gou lae hanh lae lwed!
Dawz daxmeh caeuq duznou cuengq youq giz ndeu,aenvih songde miz di gig lumj.
Lwgmbwk cungj gyaez va,gyaez va couh ndaem va.Hoeng doek ceh,senj ndaem,ngoenzneix nhamq guh, haetlaeng okdaeuj baez yawj,duznou yakdoeg neix couh hawj mwngz gaet dwk di he mbouj lw!Yienghneix couh yungh haujlai fuengfap gaj nou,hoeng cungj dwg sai rengz!Duznou ma,couh dwg guhcaeg,dwghaemz yaek dai!
Daxmeh cix guh “caeg”.Mboujgvaq:Daxmeh mbouj caeg bouzwnq,dandan “caeg” duh gou!
Lumj naeuz,mwngz ndaem va,deng de naeuz mbouj bonj faenh,giz duznou guh mbouj daengz haenx,de guh ndaej engq haenq,dawz gij va ngamqngamq ndiu haenx beuj bae seuqsatsat!Youh lumj naeuz,miz di doenghag sij saenq hawj gou,gou cuengq youq laj daiz doengjgvih, daxmeh itdingh caegcaeg “saemj”baez he,aenvih mbouj miz maz,de hix mbouj guhsing,couh dangq mbouj yawj gvaq nei.
Hoeng,hawj gou nyinx mbouj ndaej cix dwg,de lij caeg yawj ngoenzgeiq gou!Ngoenzgeiq,noix mbouj miz di “vah ndaw sim”,de couh ciq vah aeu vah,daj rik gangj neix,daj neix gangj haenx,ciq ma ndaq meuz “son” gou baez ndeu.aenvih de mbouj mingz gangj dwg gou,gou hix mbouj leixlangh,couh dangq de “ma raeuq ronghndwen”!
Danjseih,engq dwgcaengz dwg,gou youq ndaw ngoenz geiq “goenghai” gangj daengz daxmeh mbouj dwg,nem doiq lwgmbwk gangj neix gangj haenx,daxmeh caeg yawj gvaq le,couh caeg bae lo.Hoeng de mbouj gangj, gou hix mbouj cam,song boux couh dang mbouj miz maz ityiengh!
Mboujgvaq,gou mbat neix hag gvai lo,Mwngz dawz ngoenzgeiq gou bae?Ndei,gou sij ngoenzgeiq aeu Saw cuengh ------Yawj sou naeuz Sawcuengh mbouj miz yungh?
Cingq naeuz miz saet itdingh miz ndaej,gou caeuq daxmeh “doxdwk” couh suenq liux lo.

页: [1] 2

僚人家园's Archiver

[原创]路漫文集：壮文的散文