LAJMBANJ SAEH MOQ
Neix dwg Luman lauxsae yungh Sawcuengh ngamq sij baenz,daj 《Vwndiz minjganj aeu Sawraeuz daeuj raiz.》cienq gvaq ma.<br> <br>LAJMBANJ SAEH MOQ <br> Gyaep Rongfaiz <br> Daxmeh bae ndaw singz yawj dahlwg de,dahlwg de youq binhgvanj guh fuzvuyenz. <br> Youq naj dou binhgvanj,dahlwg raen daxmeh daenj aen gyaep rongfaiz he,naj baez nyaeuq naeuz:"Meh,mwngz daenj aen gyaep nyaenx doj,mbouj lau vutnaj Bouxcuengh raeuz ha?" <br> Daxmeh mbouj rox sim dahlwg,ngeizvaeg cam:"Mwngz gangj gijmaz?Aen gyaep neix lij moqsak ne,baenzlawz youh vutnaj!" <br> Song mehlwg cingq gangjvah,geij boux laujvai humx gvaqdaeuj,angqbuepbuep vix gyaep gwnz gyaeuj daxmeh,mbouj rox gangj gijmaz. <br> Daxmeh bibi gyaeuj,naj awwt. <br> Boux laujvai he mbe hai haj lwg fwngz,"gijlij gukluk" hemqyaya. <br> Henz ndang miz vunz hoiz naeuz:"De gangj,haj cib meijyenz yaek cawx aen gyaep mwngz ne." <br> Daxmeh riu lo,coengzyungz duet gyaep roengzdaeuj,doq gangj doq ndenq gyaep gvaqbae:"De caen haengjheiq, soengq hawj de,mbouj ngah cienz." <br> Laujvai coux dawz aen gyaep,angq dwk diuq hwnjdaeuj. <br> Dahlwg raen le,aen naj fwt hoengz,ndaw sim cix angq. <p> Boux Riengzlaeng <br> Sicangj roengz lajmbanj genjcaz gunghcoz,dauqbae seiz yaek bae Namzningz veibau. <br> Lajmbanj coih miz haujlai roen moq,swhgih mbouj rox byaij diuz lawz gyawj di.Daegmingz gag bek aek naeuz guh daiqloh,hoeng iugouz dawz de dang boux riengzlaeng sicangj. <br> Bae daengz Namzningz,haeuj binhgvanj seiz,fuzvuyenz raen dwg sicangj,lienzmuengz angqyangz ciepdaih,anbaiz dauq rug ceiq ndei he hawj sicangj,cix nda nganx fuengz he hawj Daegmingz caeuq swhgih caemh ninz. <br> Sicangj vad fwngz naeuz:"Mbouj lo,sam vunz gyonj ninz dauq rug gou ba." <br> Daegmingz cix naeuz:"Mbouj nyau lingjdauj dem,hix hawj gou hai dauq rug lumj sicangj haenx ba." <br> Fuzvuyenz veiznanz lo,gaeu gyaeuj yawjyawj sicangj. <br> Sicangj doiq Daegmingz riu naeuz:"Rug duh mwngz mbouj ndaej bauqsiu bw." <br> Daegmingz hix riu naeuz:"Mbouj yougaenj,gou gag ok ngaenz." <br> Sicangj geizheih lo,cam:"Mwngz neix dwg......" <br> Daegmingz daekeiq digdig,naeuz:"Mbouj muenz mwngz,gou guh hongnaz baenz byongh ciuhvunz,seizneix yienghyiengh cungj gvaqyinx gvaq lo,cix caengz cimz gvaq dang lingjdauj dwg maz feihdauh,ndigah couh riengzlaeng mwngz daeuj gvaq baez yinx he!" <p> Fatyienh <br> Banhaemh,ndaw singz,daeng rongh yaepmigmig,vava loegloeg,nauhnyied dangqmaz. <br> Vunzlai lumj vaizrouh byaij gwnz gai,ndawde miz dahsau he daenj vunj lienz buh,youq laj daeng rongh daegbied iengjda. <br> Daegmbauq he lumj fatyienh maz nei,song cik da dinghdingh cim gwnz ndang dahsau. <br> Dahsau daengx roengzdaeuj,cienq caekhaex coh Daegmbauq. <br> Daegmbauq lienzmuengz yot bit ceij okdaeuj,fwngz riengjret veh gijmaz. <br> "Mwngz!"Dahsau cienq naj gvaqdaeuj,caengz de,cingq yaek ndaq,aen bak hai le cix mbouj rox hup lo. <br> "Aiyu,dwg mwngz ha,laux doengzhag!"Daegmbauq angq hemq hwnjdaeuj,"Gou youq mbanj dou fuzcanghcangj guh sezgiyenz,dauq vunj mwngz caen lengj,hawj gou maez lo....."Gangj le youh daengx roengzdaeuj cim dahsau,"aiya,doengh bi haenx buh hong seizneix bienqbaenz vunj va vunj moq,gou cix yawj mbouj roxnaj lo." <br> "Ce!Lij lumj gaxgonq ityiengh vad!"Dahsau hix cim yawj daegmbauq hwnjdaeuj,"yu,dangnienz hwnjdangz caeg veh ma veh meuz,seizneix guh sezgi hwnjdaeuj lubw!" <br> Song vunz baez angq,yaengx fwngz doxbek,langh sing riuhaha hwnjdaeuj,nyex ndaej vunz daengx gai cungj nyeux gyaeuj gvaqdaeuj...... <p> Hom Van <br> Baez neix bae lajmbanj,dingqgangj faengx noh mouhom gig ndei gwn,gou couh bae cimzcimz. <br> "Ndei gwn lwi?"Gou ngamq gwn gaemz ndeu,couh miz sing unqnemnem he cam. <br> "Hom,van!"Gou ngiengx gyaeuj baez yawj,ngawz lo:Yo,dwg dah de! <br> Geijlai bi gaxgonq,caemh youq gizneix,gou gaem aen manzdouz he cingq gwn dwk,dahsau iq byombet he song da dinghdingh cim yawj aen manzdouz gou,gou cix mbek dip he faen hawj de,de coux gvaqbae couh oet haeuj bak,lumjnaeuz iek gvaq geij ngoenz...... <br> "Ndei gwn lwi?"Seizhaenx gou hix yienghneix cam de. <br> "Hom,van!"De ndaw bak hamz manzdouz,hamzhuz han gou,youh ngaek gyaeuj deihdeih. <br> "Ndaw singz gijgwn hom van lailai ne.Maj hung le,couh haq bae ndaw singz, yawzyiengh?"Gou seizbienh gangj coenz vahriu he. <br> Seizneix gou cix lau de hix cam gou:"Seiznaix lajmbanj gijgwn hom van lailai ne,mwngz yawz mbouj daeuj neix hwnjdou?" <br> Caeklaiq de nyinh mbouj ok gou daj ndaw singz daeuj,aenvih seizneix ndangdaenj lajmbanj beij gij ndangdaenj ndaw singz mbouj miz maz doxca lo. <br> <br>
页:
[1]