花山的故事（1）
[这个贴子最后由lozmingz在 2002/11/16 04:59pm 编辑]<br><br> 1. MUNGJGAJ CAEUQ GYOENGQ BINGMAX DE<p>Youq henz Dah Mingzgyangh ,funghgingj gig gyaeundei. Bangx dat aen bya henz dah haenx, veh miz baenz cien boux goengceij*, cungj hoengz rwen fwgfwg. Gij goengceij neix, miz mbangj yaengx caxsoem, miz mbangj gaem nangx , miz mbangj beng naqgung , miz mbangj yot faggiemq , lumjbaenz cingq caepcawq dwk yaek doxhoenx doxgaj nei .<p>Dingqnaeuz, seiz Banzguj hai diendeih, bangx dat hoengqvangvang, caengz miz saek veg, doeklaeng vihmaz miz gij goengcij neix ne? Danghnaeuz mwngz yaek siengj rox gij gaenyouz de, caj gou gangj goj hawj mwngz dingq, gij gojgaeq neix dwg Bouxcuengh daihdaih riuzcienz roengzdaeuj , ndeidingq dangqmaz.<p>Ciuhgonq, cojgoeng Mbanj Byayauq couh dwg youq aen dat haenx doiqnaj dah guh mbanj. Miz haet ndeu, gwnz dingj aen ranzhaz henz mbanj, roeg hemq caca ,fwj geuj foenxfoenx, vunz sim angqlangh. Yienzlaiz, ndaw ranzhaz neix ngamq seng laeq lwgnyez ndeu. Gangj hwnjdaeuj, laeq lwgnyez neix caen mbouj bingzciengz. Boh meh de cungj nienz gvaq seiq cib bi lo, caengz miz lwgnyez . Miz ngoenz ndeu, meh de youq henz dah saeg buh, raen duzfungh ndeu mbin gvaq, ndaw bak de miz aen makdauz doek roengzdaeuj, de nyaeb ma gwn le, cix mizndang lu.Vunz ciengz gangj , Mizndang cib ndwen cix seng lwg , hoeng , laeq neix geizheih lo, gaenq gvaq cib ndwen lij caengz seng, caiq gvaq cib ndwen, yingxyienz caengz seng, itcig mizndang cukcuk ngeih cib ndwen cij seng. Nienz laux cij miz lwg, song gvanyah de baenzlawz mbouj angq ne. <p>Laeq lwgnyez neix gvaigvaetgvaet , meizda ndaemyumyum , naj nduenlumxlumx , gen goeg ga biz, ngamq miz ndaej geij aen seizsaenz, couh rox saeuj fwngz ndengj din, doiq au lungz simj baj caeuq daeggo dahcej riuveuveu. Boh meh de yied yawj yied gyaez, yied ngeix yied ndiep, couh an coh de heuhguh Mungjgaj.<p>Mungjgaj maj ndaej caen vaiq, ngamq song ndwen, couh rox heuh boh heuh meh, ndaej sam ndwen , couh rox buet bae buet dauq. Aen gyaeuj de beij doengzban lwgnyez hung haujlai. Hojsik Mungjgaj ngamq ndaej sam bi, boh de aenvih dwgrengz sonhoj gvaqbouh, bingh mbouj ndei, gvaq- seiq lo. Daj mwh haenx hwnj, mehmaiq lwggyax, engqgya nanz la, naz ndaem mbouj ndaej, couh baengh meh de ngoenznaengz hwnj bya bae cimh fwnz ma gai ciengx mingh.<p>Ngoenz bae ngoenz dauq, doeng gvaq cin daengz. Laeglemx youh gvaqbae cib bi, Mungjgaj hix ciemh ngoenz ciemh hung lo. Miz baez ndeu, de caeuq gyoengq nyezdoih haeuj ndoeng bae gip byaekndoi. Ndaw ndoeng laep haenx, seiqlengq cungj dwg faex hung gaeu geq, lij miz gak cungj gak yiengh roeg caeuq nyaen, lumjbaenz duzfungh、roeggae、duzgaeng、duzlingz、nyaenmak、 ruzraenz ……Deongh gij makndoi haenx ha, engqgya mbouj yungh gangj lo. Maknimsaeq aeujwt, makdumh hoengzfwg, maknimhenj henjrwg, makyid heureux, seiqlengq cungj miz, caen lai raixcaix.<p>Caezgya yied yawj yied haenh, doq ra doq gip, sawqmwh laeq mbauqbiz raen go faexgai (denhdauz) ndeu, ganj de hung lumj aen doengj nei, gij mak henjrwgrwg, domx dwk nuengqroemroem , bouxboux ngonz le haenh dwk myaiz rih bae. Danhseih caezgya cij gan ngonz ndwi , gofaex neix youh sang youh hung, benz benz mbouj ndaej, caeh caeh mbouj daengz.<p>Yaep he, Mungjgaj baez yaep da, couh vid gen daj hengh, haeuj laj gofaex hung bae. Mbauqbiz cam naeuz : “Mungjgaj, mwngz benz ndaej hwnjbae? ”<p>“Mbouj dwg!”Mungjgaj baenq gyaeuj nwennwen naeuz : “Gou aeu fwngz ngauz! ”<p>“Gijmaz?Aeu fwngz ngauz?”Gyoengq nyezdoih de cungj riu dwk rouxringx lo.<p>Mungjgaj hix mbouj leixlangh gyoengqde, baez duet buh, song fwngz dingj haeuj gofaexgai bae, capmax dwk haenqrengz baez nyoengx, gij mbaw faex yiengjvuvu, caiq doiqlaeng baez rag, gij nye faex doenghyubyub. De lienzdaemh nyoengxnyoengx ragrag, makgai couh loenq roengzdaeuj byoegbyoeg, lumj roengz lwgbag nei. Gyoengq nyezdoih raen Mungjgaj rengz baenz lai, bouxboux iet linx myabmyab, da ngonz mbouj yaep. Yaepyet, doengh aen mak henj cungj loenq liux, cij lw saek geij aen heureureu lo. <p>Roeg haeuj rongz, nyaen ndonj congh, mbwn yaek laep lo. Mungjgaj sim’angq fwngfwng ma daengz ndaw ranz. Meh de raen Mungjgaj dauq, simhai baenz dujva, yinx aen rek gwnz cauq naeuz: “Mungjgaj, dungx iek lai luba, haeuxcuk langh youq ndaw rek neix.”<p>Mungjgaj okbae baenz ngoenz, dungx iek raixcaix, de mbouj cimh vanj, baez dawz aen rek couh ndoetgyatgyat, lumj vaiz lwg gwn raemx nei, yaepyet baenz byongh rek cuk couh gwn liux lo. Hoeng, de lij roxnyinh dungx mbouj caengz imq, riz bak myubmyub. Meh de raen yienghneix, gag nyapnyuk ndaw sim. Mungjgaj cuengq rek, genj aeu aen makgai ceiq hung ceiq henj daeuj ndenq hawj meh de, naeuz: “Meh, mwngz naiq lai lo, gwn aenmak ba, gou ngoenzneix bae gip byaekndoi, ndaej haujlai haujlai mak bw.”Lwg neix geijlai roxsoq, meh de nyaenx mbouj ndaej raemxda rih lo. Mungjgaj raen meh de yienghneix, simgip dangqmaz, vaiq fuz meh de hwnj congz bae, itmienh swk raemxda hawj meh de, itmienh cam naeuz: “Meh, mwngz baenzlawz yiengh la?”<p>Meh de han naeuz: “Lwg ha, mbouj miz gijmaz law. Mwngz ciemh hung lo, sim gou angq raixcaix. Cij gah ndang gou mbouj ndei, ngoenz mbouj yawx ngoenz, nienz geq da raiz. Ngoenzneix bae gai fwnz dauq, mbouj saeqsim baez saemxsax, deng doek roengz Dah Mingzgyangh bae, fatbingh lo. Lwg ga, raeuz baengh gai fwnz led bak, noix ngoenz mbouj gai fwnz, couh mbouj miz haeux roengz rek. Mwngz yied ngoenz yied ak gwn, ngoenzcog meh mbouj ndaej hwnj bya bae aeu fwnz, rek couh laeh roengzdaeuj lo, guh meh baenzlawz mbouj nyapnyuk ni? ”Gangj sat, daxmeh raemxda roengzbyoegbyoeg.<p>Mungjgaj dingq le, ngot ndwn hwnjdaeuj naeuz: “Meh, mwngz gaej heiq, gou gwn ndaej couh guh ndaej. Daj ngoenzcog hwnj, gou hwnj bya bae cimh fwnz ma gai ciengx mwngz!”<p>Meh de cij ngeiz naeuz bouxlwg gangj vah nai, vanzlij simnyap sisi.<p>Haetlaeng ranz ngamq buemxsuemj, Mungjgaj caen hwnj bya bae cimh fwnz lo. Fagfouj meh de muz dwk raehfwdfwd. Mungjgaj baez vad mbat fouj ndeu, gofaex baenz boggen hung couh raek; song mbat fouj, go hung baenz goekga hix raekbyoep, caengz daengz banringz couh raemj ndaej baenz dong fwnz. De benz hwnj bangx dat bae cimh gaeu ma cug fwnz, yawhbienh rap ma ranz. Danhseih, baez rap hwnj mbaq, faexhanz couh raekbyoep. Yienzlaiz rap fwnz de daiq naek lai, vunz hung song rap hix mbouj dangq de gonz ndeu, baenzlawz naeuz diuz faexhanz meh de mbouj raek ne? Yienghneix, de cij ndaej haeuj ndaw ndoeng bae, raemj gofaexyienq geq ndeu ma dingj faexhanz, rap fwnz bae haw gai.<p>Ngoenz haenx, de gai fwnz cawx haeux ma ranz, beij meh de baeznaegz ndaej dih lij lai sam seiq boix. Meh de raen bouxlwg baenzneix ak, gij angq de ha caen mbouj rox baenzlawz gangj lo.<p>Ngoenz gvaq ngoenz, bi gvaq bi, saedceij gvaq ndaej caen vaiq, youh gvaqbae cib lai bi lo. <p>Mungjgaj ndaej cib roek caet bi, gaenq maj baenz boux vunzhung, youh cangq youh rengz. De lij dwg boux nyingz naq naengzsouj, duzroegga mbin gwnzmbwn, de dwk ndaej deng da; duzmui saet bangx bya, de nyingz ndaej deng gyaeuj.<p>Bi haenx, miz goeng hakdoj ndeu ngamq hwnjnyaemh, de dam cienz dam caiz, siengj youq henz Dah Mingzgyangh guh aen singz ndei he, couh yiengq beksingq liemx cienz sou suiq, dauqcawq gaemh bing rag fou, lij bik vunz mbanj soengq doxgaiq, moix hoh it bi aeu soengq duzgaeng ndaem he, haj hoh caemh soengq song fouq din mui. Bouxlawz mbouj soengq, couh ngaiz rag aeu vaiz, gaemh at reihnaz. Aeu doengh gijneix mbouj suenq, vanzlij ngaiz fad guh sam bi hong cai. Yienghneix, lwgminz yienzlaiz bingzan vaiqvued, daj neix hwnj gij saedcij neix mbouj miz lo, nauh dwk bouxboux ienq mbwn daen deih, seiqlengq gyangz dai gyangz lix.<p>Miz ngoenz ndeu, Mungjgaj bae dwk nyaen. De benz bya sang, ndonj ndoeng nyaengq, hix cimh mbouj raen saek duzgaeng, mbouj roeb saek duzmui, gij gaeng mui neix, miz mbangj ngaiz vunz dwk, miz mbangj linj deuz dai lo. De gan baet fwngz ma hoengq.<p>Mungjgaj ma daengz bak mbanj, raen gyoengq beixnuengx ndaw mbanj comz youq laj gorungz hung, miz mbangj caengz da, miz mbangj najsaep satsat, miz mbangj gyangz naek gyangz mbaeu, miz mbangj got gyaeuj daejngoegngoeg. Mbauqbiz hix haeb bak maenjrwenrwen. Munggjgaj gvaq bae cam Mbauqbiz: “Ok gijmaz saeh la?”<p>Mbauqbiz ndatheiq digdig han naeuz: “Vanz mbouj dwg ndaek hak mageq neix haih vunz. Aenvih mbanj raeuz mbouj miz duzgaeng caeuq din mui soengq hawj de, couh baij bing daeuj rag daengx mbanj vaiz bae liux lo. Lij haep naeuz, danghnaeuz caiq mbouj gyau, daengx mbanj bouxsai cungj yaek ngaiz gaemh bae fad guh sam bi hong cai.” Mbauqbiz gangj le, yinx roengz Dah Mingzgyangh naeuz : “Mwngz yawj, gyoengq mageq haenx cingq boenq vaiz gvaq dah hw.”<p>Mungjgaj ngiengx gyaeuj baez yawj, raen bang binggeq dawz cax gaem faex, cingq boenq vaiz gvaq dah bae. De ndatheiq dwk da ok feiz, gyaeuj hwnj oenq, beng fwngz Mbauqbiz naeuz: “Bang neix caen yakdoeg, vaiq bae dued aeu gij vaiz raeuz dauq!”<p>Mbauqbiz ngaezsaengsaeng: “Gyoengqde gaem cax dawz faex, baenzlawz dued ndaej?”<p>“Raeuz miz gaemxgienz, miz rin, lau gijmaz!”<p>Daengxmbanj hauxseng youz Mungjgaj daiqlingx, bouxboux haebmaenj rwenrwen, caezsim cung bae daengz henz dah. Danhseih nguh bae lo, gyoengq bing gaenq boenq vaiz gvaq dah le. Mungjgaj yied yawj yied ndatheiq, raen henz dah miz ngauq rinmuh ndeu, dwg vunz an daeuj guh saeg, de couh vax dawz hwnjdaeuj baez fwx, ngauq rinmuh haenx couh mbinfwfw gvaq baih haenx dah bae.<p>Mwh haenx, bang bing hak mageq daekeiq suemsuem, doq hat vaiz doq ciengq go. Sawqmwh, raen ngauq rinmuh ndeu doek roengz dangqnaj daeuj daekboeb, namh loemq roengzbae baenz cik laeg, ndaekndaek hwk dwk da mbotgyugyu, ga unqrwdrwd, youh raen raemxdah sinxbyoenbyoen, gyoengq vunz lumj lungz bag gvaq baih dah daeuj, bouxboux saenz dwk daep haw mbei lek, noh henj baenz namh, vutvek gij vaiz buet deuz dai.<p>Mungjgaj caeuq daengxcungq hauxseng dued ndaej vaiz dauqma, caezgya angq vauvau, laemxdaemh haeuj mbanj bae lo. Danhseih, Mungjgaj dauqfanj naengh youq gwnz ngauq rin henz dah, gag ngeixsaegsaeg. Mbwn laep le, ronghndwen hwnjdaeuj lo, ndaundeiq cingxdikdik, Mungjgaj vanzlij naengh youq giz haenx mbouj doengh saek di. De ngeix gijmaz ne?Yienzlaiz de hix mbouj nyienh souh bang mageq haenx apbik, hix mbouj saenxsim hawj beksingq souh haemz souh hoj, de naebsim hwnjdaeuj caufanj, vih vunzgungz hoenx dienyah. Hoeng, song mbiengj Dah Mingzgyangh, dieg bienbik, bya fwxfwd, vunz youh noix, bae gizlawz conz liengz cienz bingmax?<p>Cingqdang de naemj mbouj ok cawjeiq seiz, cij roxnnyinh baihnaj da ronghsag, ngiengx gyaeuj baez yawj, yienzlaiz miz goenglaux ndeu, byoem hau naj nomj, naengh duzfungh gim daj gwnzmbwn roengz dangqnaj de daeuj. Ndaw bak duzfungh gim haenx, lij gamz hoh doengz faexcuk ndeu ni.<p>Goenglaux raen Mungjgaj simnyap sisi, couh cam de vih gijmaz saeh. Mungjgaj raen goenglaux neix sim ndei, miz ngeihheiq, couh gangj hawj de nyi. Goenglaux dingq le, rubrub gij mumh hau de, ngaek gyaeuj swgswg nai Mungjgaj naeuz: “Mungjgaj, mwngz caen dwg hauxseng ndei Bouxcuengh. Neix mbouj suenq maz nanz saeh, gou dem mwngz siengj banhfap.”Gangj sat, de ngaem haeuj henz rwz Mungjgaj bae yumzyumz gangj yaep he, mbon aeu ngauq rin hoengz saeq ndeu, youh dawz hoh faexcuk duzfungh gamz haenx, itheij ndenq hawj Mungjgaj. Mungjgaj ciep aeu doxgaiq, cingq yaek docih goenglaux, ngeux gyaeuj baez yawj, goenglaux caeuq duzfungh gim cungj mbouj raen lo.<p>Mungjgaj madaengz ndaw ranz, diemj yuih daeuj sijsaeq yawj hoh faexcuk haenx. Yienznaeuz hoh faexcuk mbouj miz goek, hix mbouj miz byai, gojlij heusisi, giz duq de lij did ok nyez daeuj baenz conq lai raez. De cimh dawz vengq man meh de daemj haenx daeuj, aeu gij rin hoengz goenglaux hawj haenx daeuj veh bing veh max, veh cax veh nangx hwnjbae. Youh dawz hoh faexcuk ven aen congh saeq he, oet gij man haeuj ndaw de bae. Yienghneix guh le, Mungjgaj couh bamq daiz ninz gyaen od’od lo.Gvaq yaep he, de sawqmwh doeksaet yat. Dingqnyi cien bing fanh max doxhoenx doxgaj, ngiengx gyaeuj yawj, mbouj raen saek gaiq. De ganjnaeuz fangzhwnzloq, youh bamq ninz youq. Ngamq yaepyet he, gij sing doxhoenx doxgaj youh gingsingj de. De roxnyinh geizheih, mbouj gamj caiq ninz lo, gan naengh youq caj ranzrongh.<p>Baihdoeng ngamq wenj, Mungjgaj couh dawz hoh faexcuk bae ndaw suen laeng ranz ndaem. Ngamq moek namh, caengz rwed raemx, go de couh hwnj nyez soemsoem, bienqbaenz noeg rangz maj hwnjdaeuj ngotngot, ngamq byonghngoenz, couh hwhj dwk mwncupcup, baenz aen ndoeng faexcuk lo.<p>Meh de raen le, roxnyinh gig geizheih, cam naeuz: “Lwg ha, ranz raeuz youh mbouj rox luih duk dajsan, mwngz ndaem gij faexcuk neix guh gijmaz?”<p>Mungjgaj han: “Meh, mwngz ciengeiz mbouj ndaej dek gij faexcuk neix saek nye saek mbaw, caj gvaq bak ngoenz le mwngz couh rox lo.”<p>Daengngoenz doek youh hwnj, aenndwen mbanq youh luenz. Gij faexcuk Mungjgaj ndaem haenx, ciemh ngoenz ciemh hoengh, lij langh va dwk hauswkswk. Miz ngoenz ndeu, boux gvaq loh yawj raen le, cam Mungjgaj naeuz: “Mungjgaj, bouxlaux cienz gangj, go faexcuk langh va , guekgya vuenh ciuzdaih, bi neix dwg mbouj dwg seiqgyaiq yaek bienq la?”Mungjgaj dingq le caenh rox riu, mbouj han saek coenz vah.<p>Daengz liux gouj cib gouj ngoenz, ranz caengz rongh cingx, Mungjgaj couh hwnj bya bae cimh fwnz lo. Meh de youq ndaw suen dap canz duhnit, dingjlingz ca diuz faex ndeu. De ngonz raen ndoeng faexcuk mwncupcup, sim naemj: “Neix gaenq ndaej gouj cib gouj ngoenz lo, mbouj ceng saek haemh byongh ngoenz ba, caiq gangj caenh raemj saek nga hix mbouj ngaih maz saeh.” Yienghneix, couh vax fag cax bae raemj aeu nga faexcuk ndeu. Bouxlawz rox, nga faexcuk raemj goenq le, mbouj dwg doek roengz lajnamh, dauqfanj bienqbaenz diuz naq he, mbin hwnj mbwn bae fifi, baez yaep da cix mbouj raen lo.<p>Nga faexcuk baenzlawz bienqbaenz diuz naq bae ne? Meh de cingq ngeizvaeg, sawqmwh dingqnyi baihlaeng yiengj “bibi boebboeb”. Veq gyaeuj baez yawj, raen baenzcaz faexcuk cungj dek liux, gij bingmax daj ndaw hoh faexcuk diuq okdaeuj, gaem cax dawz nangx, max cix saeroebroeb. Hoeng, gij bingmax neix cungj caengz maj hung, lij unqnamnam. Ndaem faexcuk bienqbaenz bingmax, meh de engqgya moengzloengz lo.<p>Gangj daengz bang hak mageq ndaw singz, ngamq hwnj aen gunghden ndeu, veh lungz deu fungh, doh gim sieng ngaenz. Bang hak mageq cingq youq ndaw haenx caeuq gij yah gij doih de doq gwn laeuj, doq angq yawj diuqfoux. Gyong laz ndeidingq, yah foux gyaeundei, loengh dwk bang mageq haenx mbouj rox hwnz ngoenz. Cingqdang ndaek hak ma yak yaek loengh dahsau diuqfoux seiz, sawqmwh baihlaeng dotngubngub, lumjbaenz deng cax ndaemq nei. Ndaek hak ma neix swenj hwnjdaeuj: “Miz boux ndaemq vunz, vaiq gaemh!” Gyoengq veibingh de baenz bang baenz bang haeuj gunghden daeuj, yahfoux caeuq boux ndaek gyonglaz cungj deng boenq deuz liux, ndawndaw rogrog neb sam baez, hoeng cungj mbouj raen saek gaiq. Ndaek hak ma haenx ciemz fag ndaemq baihlaeng de ma yawj, yienzlaiz dwg diuz naq ndeu, gwnz de gaek miz geij yiengh geiqhauh.<p>Yienzlaiz diuz naq neix, couh dwg meh Mungjgaj raemj nga faexcuk haenx bienqbaenz. Hojsik caengz daengz seiz, mbouj dwk ndaej dai ndaek hak mageq haenx.<p>Bang bing hak mageq haenx baez caz, cij rox dwg gyoengq bingmax Mungjgaj nyingz naq.<p>Hak ma in dwk swenj cam: “Mungjgaj dwg gijmaz vunz, ranz youq gizlawz? ”<p>Goeng saeyez saenz gvaqbae naeuz: “Mungjgaj dwg boux dwk fwnz, ranz youq Mbanj Byayauq, mbat dued aeu vaiz dauq haenx couh dwg de daiqdaeuz.”<p>“Hw, vaizlwg mbouj rox naj guk, mbei laux gvaq mbwn bae! Sou gaen gou bae Mbanj Byayauq, gaemh dawz Mungjgaj ma. ”<p>Hak mageq haebheuj gywdgywd, daiq baenz bang bingmax buet bae Mbanj Byayauq.<p>Seizhaenx, Mungjgaj cingq youq gwnz bya raemj fwnz. Sawqmwh raen diuz naq he daj ndaw mbanj mbin hwnj mbwn bae, gvaq yaep he, baenz bang bing hak buet coh aen mbanj daeuj. De rox ok saeh lo, couh vax dawz faexhanz, buekmingh saet baema ranz.<p>De buet haeuj laeng suen, raen gij faexcuk cungj dek liux, saet okdaeuj dih bingmax, nod youq gwnznamh ruenzremrem, meh de ndwn youq henz haenx mbwng yauyau, mbouj rox baenzlawz guh ndei.<p>Seizneix, daengx mbanj gaenq ngaiz bing hak humx lo. Mungjgaj ciuq gij vah goeng vunzlaux daengq haenx, nam mo hwnjdaeuj. De baez nam, gij bingmax couh menhmenh maj hung lumj caen vunz caen max nei. Mungjgaj baez haenq sing hat, daiq gyoengq bingmax de cung okbae hoenx bang bin hak haenx.<p>Mbatneix hoenx ndaej caen naemq, daj doengxhaet hoenx daengz banringz, youh daj banringz hoenx daengz banhaemh, cungj caengz faen sawhingz. Aenvih gij bingmax Mungjgaj bi’ndwen caengz gaeuq, rengz lij naiq, hoenx daengz gaenlaeng, cungj mbouj miz rengz lo.<p>Cingq youq mwh haenx, miz duzfungh gim ndeu, daj gwnzmbwn mbin daeuj, set di fwn hwnj gwnz ndang gyoengq bingmax Mungjgaj bae. Gij bingmax neix sikhaek rengzgaenggaeng, remrangrang. Mbat maenjrum, bang bing hak cungj deng boenq roengz dah bae liux. Goeng saeyez mageq haenx ni, hix ngaiz Mungjgaj vengh mbat faexhanz ndeu, doek roengz dah bae dwkcum lo. Ndaek hak mageq haenx me, hix deng Mungjgaj mbat naq ndeu, soep gvaq aen simdaeuz de, vunz lienz max cungj doek roengz dah bae gueng bya ciengx gungq lo.<p>Cawz liux bing hak, gyoengq bingmax Mungjgaj youh saemxsaemx saxsax unq naknak lo. Mungjgaj cingq simgip dwk mbouj miz banhfap, sawqmwh, duzfungh gim haenx bienqbaenz diuz saidoengz he, van youq gwnz dah. Mungjgaj caeuq gij bingmax de, couh ndij diuz giuz saidoengz neix, menhmenh raih hwnj bangx dat goengq bya hamq Dah Mingzyangh bae lo.<p>Daj mwh haenx daeuj, bangx dat gwnzbya yienh’ok haujlai haujlai fuk“goengceij”. Vunz raeuz cungj gangj naeuz: “Haenx dwg Mungjgaj daiq gij bingmax de cap youq gizneix, fuk doz ceiq hung de, couh dwg Mungjgaj. ” Vunz raeuz vanzlij gangj naeuz: “Danghnaeuz song hamq Dah Mingz-<p>gyangh caiq miz doengh ndaek hak mageq doegsieb ne, de yaek aeu louzsim bw, aenvih Mungjgaj couh yaek daiq bingmax bae aeu mingh de!” (Dwng Yungjlungz、Vangz Sauvuj、Luz Dwngzgunh、Vangz Cujyungz、Luz Yingh cingjleix)<p>*Goengceij: youq gwnz dat veg vunz heuhguh goengceij.<p> ——————摘自[壮侗语言文化网] <p> 太长了，看起来很吃力。各位贝侬，看得懂吗？看得懂一小部分也蛮好的呀。 可以看明白大部分。随便翻译前几句。<p>1. MUNGJGAJ CAEUQ GYOENGQ BINGMAX DE ----Mungjgaj和他的军队<p>Youq henz Dah Mingzgyangh ,funghgingj gig gyaeundei. 明江两岸，风景如画。<br>Bangx dat aen bya henz dah haenx, 在这沿江的山崖上<br>veh miz baenz cien boux goengceij*, 画有成千个小人<br>cungj hoengz rwen fwgfwg. 都是鲜红的颜色。<br>Gij goengceij neix, miz mbangj yaengx caxsoem, 这些人形，有些拿着尖刀，<br>……<p> 有没有中文版的啊 <P>花山的故事(1)<br><a href="http://www.rauz.net/bbs/dispbbs.asp?boardID=20&ID=2000" target="_blank" >http://www.rauz.net/bbs/dispbbs.asp?boardID=20&ID=2000</A></P><P>花山的故事(2)<br><a href="http://www.rauz.net/bbs/dispbbs.asp?boardID=20&ID=1975" target="_blank" >http://www.rauz.net/bbs/dispbbs.asp?boardID=20&ID=1975</A></P>
<P>花山的故事(3)<br><a href="http://www.rauz.net/bbs/dispbbs.asp?boardID=20&ID=1976" target="_blank" >http://www.rauz.net/bbs/dispbbs.asp?boardID=20&ID=1976</A></P>
<P>花山的故事(4)<br><a href="http://www.rauz.net/bbs/dispbbs.asp?boardID=20&ID=1977" target="_blank" >http://www.rauz.net/bbs/dispbbs.asp?boardID=20&ID=1977</A></P>
<P>花山的故事(5)<br><a href="http://www.rauz.net/bbs/dispbbs.asp?boardID=20&ID=1978" target="_blank" >http://www.rauz.net/bbs/dispbbs.asp?boardID=20&ID=1978</A></P>
<P>花山的故事(6)<br><a href="http://www.rauz.net/bbs/dispbbs.asp?boardID=20&ID=1979" target="_blank" >http://www.rauz.net/bbs/dispbbs.asp?boardID=20&ID=1979</A></P>
<P>花山的故事(7)<br><a href="http://www.rauz.net/bbs/dispbbs.asp?boardID=20&ID=1980" target="_blank" >http://www.rauz.net/bbs/dispbbs.asp?boardID=20&ID=1980</A></P>
<P>花山的故事(8)<br><a href="http://www.rauz.net/bbs/dispbbs.asp?boardID=20&ID=1982" target="_blank" >http://www.rauz.net/bbs/dispbbs.asp?boardID=20&ID=1982</A></P>
<P>花山的故事(9)<br><a href="http://www.rauz.net/bbs/dispbbs.asp?boardID=20&ID=1981" target="_blank" >http://www.rauz.net/bbs/dispbbs.asp?boardID=20&ID=1981</A></P>
<P>花山的故事(10)<br><a href="http://www.rauz.net/bbs/dispbbs.asp?boardID=20&ID=1983" target="_blank" >http://www.rauz.net/bbs/dispbbs.asp?boardID=20&ID=1983</A></P>
<P>花山的故事(11)<br><a href="http://www.rauz.net/bbs/dispbbs.asp?boardID=20&ID=1984" target="_blank" >http://www.rauz.net/bbs/dispbbs.asp?boardID=20&ID=1984</A></P>
<P>花山的故事(12)<br><a href="http://www.rauz.net/bbs/dispbbs.asp?boardID=20&ID=1985" target="_blank" >http://www.rauz.net/bbs/dispbbs.asp?boardID=20&ID=1985</A></P>
<P>花山的故事(13)<br><a href="http://www.rauz.net/bbs/dispbbs.asp?boardID=20&ID=1986" target="_blank" >http://www.rauz.net/bbs/dispbbs.asp?boardID=20&ID=1986</A></P>
<P>花山的故事(14)<br><a href="http://www.rauz.net/bbs/dispbbs.asp?boardID=20&ID=1987" target="_blank" >http://www.rauz.net/bbs/dispbbs.asp?boardID=20&ID=1987</A></P>
<P>花山的故事(15)<br><a href="http://www.rauz.net/bbs/dispbbs.asp?boardID=20&ID=1998" target="_blank" >http://www.rauz.net/bbs/dispbbs.asp?boardID=20&ID=1998</A></P>
<P>[为顺应版块调整、保证有效链接，原帖子地址中的“boardID=21”都改成了“boardID=20”]</P>
[此贴子已经被作者于2005-7-7 2:11:23编辑过]
页:
[1]