花山的故事(15)
GOJ BYARAIZ<p><br> <p> 15. DAN CWNLUNGZ<p>Daj miz diendeih hwnj, diuz Dah Cojgyangh raemx saw lumj gingq. Song haenz dah gij go’ndoek goyiux baenz hangz, lwggyoij baenz ndoeng, Bouxcuengh saedceij gvaq ndaej an’onj vaiqvued. Doeklaeng, sawqmwh miz duzlungz he daeuj. Duzlungz neix miz haj aen gyaeuj, de mbat nauh rumz nauh fwn, cukcuk nauh liux haj hwnz haj ngoenz, song mbiengj dah mbanjranz reihnaz cungj ngaiz dumh liux, cwz vaiz mou yiengz saetsai mbouj noix. Mbanj vunz caez dawz sam seng bae caeq, ngaeq duzlungz sou yaemgoeng, hawj raemxdumh doiq bae. Lungz hajgyaeuj naeuz: “Doiq raemx yungzheih, danhseih miz aen diuzgienh he, moix bi caetnyied cibseiq, sou aeu senj haj dah lwgsau soengq hawj gou, mbouj ne, gizneix mbouj seih haij baenz vaengz, couh seih baenz bya feiz. ”<p>Daihgya cij ndei nyaenx heiq, dapwngq roengzdaeuj. Daj neix hwnj, moix bi caetnyied cibseiq, seiq gai haj mbanj, vunz ram giuh, daejngungu, dawz haj lwgsau cug ga cug fwngz, baez dah baez dah vut roengz dah bae. Gij boh meh de cungj daej dai daej lix, cibfaen siliengz. <p>Miz boux canghdwknyaen heuhguh Cangh Dahaij, seng ndaej ndang cangq rengz hung, ngauq(ndaek) rin cien gaen de naengz yaengx gvaq gyaeuj, vunz youh gangj ngeihheiq. Ngoenz ndeu, de byaij gvaq haenz dah, raen daengz gij neix, feiciengz ndatheiq, sim siengj: “Duz lungz neix baenzneix hengzmanz doegsieb, mbouj cawz de bae, uengjfeiq gou seih boux yingyungz haujhan.” Yienghneix de dauqma ranz, gaem cax dawz gung cienq, doiq maexyah caeuq laeq lwg Suijbauj de naeuz: “Gou baezneix bae vih vunzraeuz cawz haih, caeuq duzlungz yak doxbuek, ndei yak caengz rox. Daengz binaj samnyied cingmingz, gomoegmienz bakdou danghnaeuz hai va nding, gou couh bingzan fouz saeh; danghnaeuz hai va hau, sou couh gaej caj gou lo.”<p>Suijbauj seiz haenx ngamq ndaej cib sam bi, de caeuq daxmeh de haet muengh haemh muengh, muengh ngoenz dem ngoenz, cungj suenq muengh daengz ndwensam. Cingmingz ngoenz haenx, gomoegmienz bakdou cungj hai rim liux va hau, meh lwg song vunz siengsim daej hwnjdaeuj. Yaephe, Suijbauj uet raemxda naeuz: “Meh, daej hix fouzyungh lo. Seizneix gou couh bae caeuq duzlungz yak buekmingh, vih boh gou bauqcaeuz.” De gaem fag baujgiemq, couh buet ok dou bae. Meh de dangjlanz naeuz: “Duzlungz haj gyaeuj yienghneix ak, mwngz lwgnyez rengz saeq, baenzlawz dig gvaq de. Gaej guh gij saeh yiemj neix ha.” Suijbauj nyengh mbouj dingq, meh lwg cingq doxbeng doxrag, miz goenglaux ndeu byaij haeuj dou daeuj. De byoemgyaeuj hangzmumh cungj hau liux, cingsaenz gig ndei, fwngz gaem faexdwngx, baihlaeng miz duzmaxloeg gaen daeuj. De doiq Suijbauj naeuz: “Meh mwngz gangj ndaej deng ha! Duzlungz haj gyaeuj neix, nyuenz seih doenghaij duzlungz saeq he, aenvih ciengz famh ndaw cug(cuz) gveigawj, ngaiz gyaep okdaeuj, de rox loengh di fapfouz, haj aen gyaeuj de, saedcaih leihhaih. Aen gyaeuj daih’it, cienmonz guenj rumz guenj fwn, de mbat boq heiq couh nauh haj hwnz haj ngoenz rumz fwn; aen gyaeuj daihngeih, cienmonz guenj raemx, de gaemz ndeu ndoet hawq raemx Dah Cojgyangh, danghnaeuz caiq haiz raemx okdaeuj, gwnz deih couh deng raemxdumh; aen gyaeuj daihsam, cienmonz guenj feiz, de mbat boq feiz, seiqhenz mbanjranz caeuq ndoengfaex cungj ngaiz coemh baenz daeuh; aen gyaeuj daihseiq, cienmonz guenj non, de mbat aj bak, gij non gij sip bubu banh okdaeuj, vunz caeuq cukseng cungj ngaiz haeb dai; aen gyaenj daihhaj cij seih caen gyaeujlungz. Gig geng gig leihhaih.”<p>Suijbauj naeuz: “Ciuq mwngz baenzneix gangj, duz lungz neix mbouj miz banhfap sousib de lo? Mwngz gaej dawz de daeuj haep vunz. Gou mbouj saenq, mbouj gaj dai de, gou mbouj suenq vunz.”<p>Goenglaux haha riu hwnjdaeuj, haenh Suijbauj miz ceiqheiq, seih lwglan ndei Bouxcuengh, couh lwnh Suijbauj naeuz: “Mwngz yaek hoenx hingz duzlungz haj gyaeuj neix, couh ndaej bae Sizvandasanh ra goengsien beghag, de son mwngz bonjsaeh gaemh lungz. Mboujgvaq, diuz loh youh gyae youh nanz byaij.” Suijbauj doq naeuz: “Gou mbouj lau, vihliux cawz duzlungz yak neix bae, geijlai hoj gou cungj dingj ndaej!” <p>Goenglaux vix loh hawj Suijbauj, naeuz: “Ndei, mwngz gaen diuz loh neix byaij bae, ciengeiz mbouj ndaej byaij dauqlaeng. Mwngz aeu geiq ndei hw.” Goenglaux gangj sat, gwih hwnj duz maxloeg, yaep da couh mbouj raen lo.<p>Suijbauj cij rox seih bouxsien bang de vix loh, lienzseiz yiengq gwnzmbwn baiq sam mbat, yienzhaeuh gip ndei doxgaiq, caeuq daxmeh doxbiek, hwnj loh lo. De hwnz ngoenz ganj loh, gvaq dah benz lingq, dak ndit rwed raiz, souh hoj mbouj noix, daeujdaengz goekbya Sizvandasanh lo. De ngiengx gyaeuj mbat yawj, raen dingj bya sang daemx mbwn, byongh bya gij mok geuj rim liux. Gwnz bya rum faex mwncupcup. Suijbauj gwj byaij gwj byaij, baihnaj miz diuz rij laeg ndeu, song bangx dwg dat lingqlangq, mbouj miz giuz, song mbiengj miz gouj cib gouj duznuem souj youq, duzduz cungj lumj diuz saeumeh yiengh hung. Gyoengq nuem aj bak iet linx, dangj youq bak loh. Suijbauj mbouj lau saekdi, de cingz sim doiq gyoengq nuem naeuz: “Nuem beixnuengx ha, gou heuhguh Suijbauj, yaek bae ra goengsien beghag, cingj de daeuj bang gaj dai duzlungz haj gyaeuj bae, vih vunzraeuz cawz haih, vih boh gou bauqcaeuz. Hawj gou gvaqbae ba!” Gyoengq nuem dingq le, couh bienq gvaq henz loh bae, duznuem daeuz iet gyaeuj gvaq baihhaenx bae, vang youq gwnz lueg dang diuz giuz, hawj Suijbauj daj gwnz ndang de byaij gvaqbae.<p>Gvaq rij le, youh benz bya, de gwj benz gwj benz, benz daengz byongh bya, sawqmwh miz raq rumz haeu sing he ci gvaqdaeuj, ngiengx gyaeuj mbat yawj, raen miz gouj cib gouj duz guk, aj bak nyon heuj, rongx humhum yaek coemj gvaqdaeuj. Suijbauj mbouj lau, de doiq gyoengq guk naeuz: “Daihcungz beixnuengx ha, gou heuhguh Suijbauj, yaek bae ra goengsien beghag, cingj de daeuj bang cawz duzlungz haj gyaeuj bae, bang vunz raeuz cawz duzlungz haj gyaeuj bae, bang vunz raeuz cawz haih, vih boh gou bauqcaeuz. Hawj gou gvaqbae ba!”Gyoengq guk dingq le, nyiengh diuz loh hawj de, lij hawj de gaem diuz rieng, baez yamq baez yamq rag de hwnj dingj bya bae. <p>Suijbauj bae daengz dingj bya, raen ndaw ndoengfaex coengzbek miz aen miuh he, youq bakdou miuh miz gouj cib gouj duz saeceij, vangvang raehraeh ninz ndaek, gyaenndaeng lumj byajraez nei. Suijbauj mbouj lau, de yemjyemj daj henz ndang saeceij byaij haeuj bae. Suijbauj youq ndaw miuh ra raen goengsien beghag, nyuenzlaiz goengsien beghag couh seih goenglaux vix loh hawj de. Suijbauj ndaej goengsien beghag gyauq le, gig vaiq couh hag rox caet cib ngeih loh goengfou. Yaek ma ranz seiz, goengsien beghag soengq haj fag cienq、faggiemq dem hawj de, lij lwnh de haujlai geiqmaeuz.<p>Suijbauj ganj daengz haenz dah, couh hemq naeuz: “Duzlungz haj gyaeuj, vaiqvaiq okdaeuj nyinhcoih, gou couh yiuz diuz minghma mwngz!” Sing gok lumj byajraez nei, duzlungz haj gyaeuj doeksaet hwnjdaeuj, yo gyaeuj ok raemx daeuj yawj, raen seih boux lwgnyez ndeu, couh ndatheiq naeuz: “Mwngz seih lwg bouxlawz, gamj daengz neix daeuj ning gou?” Suijbauj naeuz: “Gou seih lwg boux canghdwknyaen Cangh Dahaij, ngoenzneix daeuj aeu aen gyaeuj mwngz!” Doq gangj doq yaengx fag giemq couh raemj. Duzlungz haj gyaeuj gig ndatheiq, cingq dajsuenq loenghfap, Suijbauj sikhaek nyingz ok mbat cienq ndeu, nyingz byoengq aen gyaeuj lungz daih’it, duzlungz haj gyaeuj in ndaej swenjnganga, Suijbauj youh laebdaeb nyingz sam cienq, nyingz byoengq liux raemx feiz、 non、rumz geij aen gyaeuj lungz, cij lw aen gyaeuj caen daihhaj lo. Suijbauj yunghcaenh rengz beng gung, itsim aeu nyingz de dai bae. Mboujliuh, dingqnyi“baek” sing he, gung beng raek lo. Duzlungz raen le, couh coemj gvaqdaeuj, Suijbauj vut gungcienq bae, fwngz gvaz gaem fag baujgiemq fwngz swix gaem diuz dwngxgang, caeuq duzlungz doxbuek hwnjdaeuj. Gaj ndaej cax giemq doxbungq yiengjganggang, yep feiz yagyag. Cukcuk hoenx liux gouj cib gouj buenz goengfou, duzlungz dingj mbouj ndaej lo, dajsuenq deuz bae. Suijbauj mbat dwngx moeb gvaqbae, daenz duzlungz youq gwnz dan. Duzlungz buek dai sangj (cak), fan hwnj raemxlangh geij ciengh sang. Suijbauj mbat diuq, couh ndwn youq gwnz diuz dwngxgang, sikhaek bienqbaenz ndaek rin hung ndeu, daengj youq gwnz dan, youq gwnz rin couh yienh ok Suijbauj gaemh lungz gij siengq daeuj lo. Daj neix hwnj, song bangx dah Bouxcuengh youh ndaej gvaq saedceij an’onj lo. Vihliux geiqniemh Suijbauj gaemh lungz miz goeng, vungzraeuz couh heuh gizneix guh Cwnlungzdanh, hix heuhguh Suijbaujdanh. Daengz Mingzciuz, youq gwnz ndaek rin hung neix hwnj aen baujdap ndeu, ciengxlwenx geiqniemh Suijbauj.(Veiz Binh、Gvei Ginz、Luz Dwngzgunh cingjleix)<p><br>*Bonj saw《Goj Byaraiz》youz Vangz Yizcangh、Dwng Yungjlungz bien, Gvangjsih Minzcuz Cuzbanjse 1983nienz 4 nyied cuzbanj)<br> <br> ——————摘自[壮侗语言文化网] <br> lozmingz贝侬，你一次性转发了十几篇壮文帖，我们这种壮文水平消化不了的。简短一点的、浅显一点的，大家兴趣可能还大些。你说呢？ 是啊，强烈要求先贴一些短小的文章，壮汉对照，最好还有注释。 Ndi dwg gou ndi siengj,dwg ra ndi daengz ah!!! 简短的壮汉文对译文章是必要的，我也支持沙南贝侬和季人贝侬的想法。但是这样的长篇壮文作品也应该搜集到社区里来。毕竟壮文作品还不多，我们可以慢慢消化。谢谢lozmingz贝侬。 在我的印象中好象壮文的文章就只局限于这些深化传说故事等等，好象没有什么经典？ 《布洛陀经诗》就是经典之一。 Liux caengz???完了没有，是不是只到15点为此。。我下载到手机呢，有空慢慢看。
页:
[1]