花山的故事(14)
GOJ BYARAIZ<p>花山的故事<br> <p> 14. BELXNUENGX GAEMH LUNGZ<p>Doenghbaez, diuz Dah Mingzgyangh raemx saw lumj aen gingq nei, doeklaeng mbouj rox baenzlawz bibi cungj fat raemxrongz. Moix baez raemxrongz, reihnaz caeuq mbanj henz dah cungj deng dumh, raemx haumyangx gvangq baenz haij nei, vunz dai fouz youq gwnz raemx, cienzngaenz baengzbuh saet sai fouzsoq.<p>Mbanj Dahhaz miz goeng dwk bya ndeu heuhguh Hoz Cangzbwz, de raen lwgminz souh caenh huxnanh, sim gig nanzgvaq. Miz ngoenz ndeu, de ninz loq raen bouxsien lwnh naeuz, diuz dah neix bibi raemx dumh seih aenvih daj Cuhsanh daengz Gauhsanh duenh dah neix miz duzlungz ndaem he, moix bi cungj aeu daengz Sizvandasanh bae caeuq duznuem vuengz beij goengfou. Aenvih aen Dan Dahhaz raemx feuh, duzlungz ndaem youz gvaq bae mbouj ndaej, yienghneix couh heuh rumz heuh fwn, fwn hung raemx couh dumh loh. Aeu ceihfug de, cij miz moeb aen bak de vaih bae, de couh heuh mbouj ndaej rumz fwn lo. Mboujgvaq, moeb bak de vaih mbouj yungzheih, sien aeu camz lwgda de mengz bae. Bouxsien lij lwnh naeuz, bakdou singz duzsaeceij rin de da nding le, duzlungz ndaem couh okdaeuj heuh rumz heuh fwn lo……<p>Daj neix hwnj, Hoz Cangzbwz daiq lwgnyaeq de hwnj bya bae raemj faex gawq benj, doq ruz hung, caj raemx dumh le ndaej gouq vunzlai. Bi haenx ndwenloeg, ruz ngamq doq baenz, lwgda saeceij rin nding la. Caencingq mbouj gvaq sam ngoenz, gwnzmbwn fwj ndaem fan, rumz hung ci hoho, fwnraq lumjbaenz dauj roengz daeuj nei, yaephe ndaw dah raemxlangh baufwedfwed, vunz raen sim cungj saenz. Hoz Cangzbwz song bohlwg vaij aen ruz hung doh vunz caeuq cwzvaiz ndaw mbanj daengz dieg onj bae, youh bae gouq gij doihduz. Doxgaiq caeuq vunz deng bongj youq gyang dah haenx. Dang gyoengqde vaij baenzruz baenzruz doxgaiq、doihduz caeuq vunz soengq daengz dieg ancienz le, daengngoenz yaek roengz bya lo. Song bohlwg baeg ndaej mbouj miz di rengz, cingq siengj caux feiz cawj caeuz, dingjlingz dingqnyi gyang dah miz vunz hemq gouq mingh. Hoz Cangzbwz mbat yawj, raen laeq lwgnyez ndeu youq gwnz boeg fwnz deng bongj daengz gyang dah, de naeuz: “Gouq vunz gouq daengz daej, caiq baeg raeuz lij aeu gouq vunz hwnjdaeuj.”Boh lwg youh vaij ruz bae gouq, mwh haenx laeq lwgnyez neix cungj yaek dai lo.<p>Ranz laeq lwgnyez neix youq aen mbanj goek bya Sizvandasanh, daengx ranz vunz cungj deng raemxhung cung sanq, mbouj rox dai lix. Hoz Cangzbwz dang de baenz boux lwg caen seng ciengx hwnjdaeuj, hawj de an mingzcoh heuhguh Hoz Bingz. Hoz Bingz nienzgeij lai hung gvaq Hoz Anh, baenz daeggo. Hoz Bingz vunz coengmingz, youh gaenx, Hoz Cangzbwz gig gyaez de, daengx ranz vunz doxgyaez doxndiep angqyangyang. <p>Yaep da youh gvaq bi he, diuz dah Mingzgyangh youh fat raemxhung lo. Hoz Cangzbwz sam<p>sam boh lwg youh bae gouq vunz, mbouj ngeix daengz gip ndaej aen habfaex nding ndeu, hai okdaeuj mbat yawj, dwg aen yaenqgim bouxvuengz Goujdoengh. Hoz Cangzbwz doiq song boux lwg naeuz: “Ndaek vunengz neix beizheizq yak raixcaix, danghnaeuz bouxlawz daekcoih de, de couh dawz mwngz bae hawj dahlwg de cuengq ngux gveij, roxnaeuz sawq feihdauh, aeu mwngz dai mbouj ndaej, lix mbouj baenz. Gou yawj, ngoenzcog couh dawz yaenqgim soengq bae hawj de, mienx ndaej caux mazfanz.”<p>Hoz Bingz naeuz: “Gou rox gangj vah Goujdoengh, yaenqgim hawj gou soengq bae ba.”<p>Hoz Cangzbwz ngaek gyaeuj naeuz : “Ndei ha, mwngz coengmingz lingzleih, gienh saeh neix itdingh banh ndaej ndei.”<p>Hoz Bingz mbat bae couh sam bi, mbouj miz saenq dauq. Ngoenz ndeu, Hoz Cangzbwz doiq Hoz Anh naeuz: “Daeggo mwngz bae le, gou ngoenzngoenz ngeix youq ndaw sim, mbouj rox saeh ndei saeh yak, yaek hawj mwngz bae yawj, youh lau mwngz vunz saeq mbouj roxsoq, mbouj cuengq sim.”Hoz Anh naeuz: “Boh ha, mwngz cuengqsim, gou mbouj suenq saeq lo, ok dou gyae ndaej lo. Ngoenzcog gou lawh mwngz haeuj singz bae ra daeggo.”<p>Hoz Anh byaij liux caet ngoenz caet hwnz, bae daengz vuengzsingz. De byaij gyawj vangzgungh, ngamq bungq boux cienghginh coz ndeu gwih duzmax youh hung youh sang daeuj coh vangzgungh, de byaengq da mbat yawj, yenzlaiz seih Daeggo, couh gvaqbae lanz max, hemq naeuz: “Daeggo.” Hoz Bingz raen daegnuengx daeuj daengz, sim angq dwk heuh naeuz: “Hai, mwngz baenzlawz daeuj gizneix ha?” Gangj sat, diuq roengz max daeuj, daiq Hoz Anh haeuj vangzgungh bae, doxlwnh beixnuengx doxbiek le gag boux baenzlawz yiengh,. Hoz Anh caiq gangjmingz baezneix vihmaz daeuj ra daeggo. Hoz Bingz naeuz: “Gou yienzbonj dajsuenq gyau yaenqgim le couh ma ranz, bouxlawz rox gozvangz niemh gou miz goeng, couh aeu gou guh lwggwiz de, hawj gou dang bouxdaeuz daiq bing souj gingsingz.” Hoz Anh sim angq dwk naeuz: “Mwngz laihnaeuz gou simmaez goengmingz ma? Geij bi neix daeuj, sim gou cungj niemh daxboh, gij aencingz de gou caengz ndaej bauqdap ne. Aenvih gou guh boux baujvei gozvangz, sim itdingh aeu coengsaed. Sojyij, geij bi neix daeuj, lienz saenq cungj mbouj gamj sij saek fung hawj ranz.” Hoz Anh naeuz: “Daxboh miz gou fugsaeh, mwngz mbouj yungh you. Seizneix daxboh lij diepsim gienh saeh he, couh dwg duzlungz ndaem caengz ndaej cawz bae, gou ha, youh mbouj cengheiq, hag liux geij bi dwk gienz, loengh cax cungj hag mbouj sug. ” Hoz Bingz miz di ndatheiq naeuz: “Duzlungz ndaem neix nyengh aeu cawz bae cij ndaej! Daj haeuj vangzgungh daeuj, gou hwnz ngoenz lienh cax, couh vih miz saek ngoenz gaj dai duz iucing neix bae.” Hoz Anh angq dwk diuq hwnjdaeuj: “Ngoenzcog mwngz caeuq gou baema gaj dai duzlungz ndaem neix, baenzlawz yiengh?” Hoz Bingz baenq gyaeuj naeuz: “Mbouj ndaej, gou seih boux nemndang baujre gozvangz, mboujdanh liz mbouj ndaej, couh seih sim miz di doengh, lienz mingh hix nanz bauj ha.” Hoz Anh naj naeuq dwk naeuz: “Baenzlawz guh ne?” Hoz bingz naemj yaep he, naeuz: “Ndei! Ndei!” <p>Caiq gangj miz ngoenz ndeu, Hoz Cangzbwz naenghyouq laj go faexnganx bakdou san muengx, miz duz roeggeuq ndeu youq byaifaex hemq song sing: “Hozbwz Hozbwz, miz saenq, miz saenq.” De ngiengx gyaeuj yawj, dingjlingz miz mbaw ceij doek roengzdaeuj, de gip hwnjdaeuj mbat yawj, yienzlaiz dwg daeg lwg nyaeq sij saenq ma. Ndaw saenq lwnh naeuz, de haeuj singz ra raen daeggo lo, daeggo guh lwggwiz gozvangz. Mbouj siengj daengz daeggo lau de bae ciengj aeu goengmingz, couh fannaj laih de dwg vunzvaih, dawz de gyaeng haeuj lauz laep bae, diuzmingh nanz bauj lo. Muengh daxboh vaiqvaiq daeuj ndaw vangzgungh gauq……<p>Hoz Cangzbwz yawj saenq le gaek dwk mumh daengj bae, ndaq naeuz: “Hoz Bingz ha Hoz Bingz, gou yawj mwngz dangq boux lwg caenseng, mwngz ndaej fukloeg fouqgveiq le, dauq aeu caeuz daeuj bauq gou, mwngz ndaek lumz cingz lumz aen neix, gou mbouj fan gij dungx haex mwngz okdaeuj couh mbouj suenq vunz!” De sikhaek ganj bae gingsingz. <p>Hoz Cangzbwz bae daengz vangzgungh, dawz Hoz bingz dam goeng lingx ciengj caeuq maeuzhaih daegnuengx doengh gij saeh neix, baez diuz baez diuz lwnh hawj gozvangz nyi, Gozvangz dingq le, naj saepsat naeuz: “Cungj lwg neix, mbouj hab youq ndaw ciuzdingz guh saeh.” De cienq naj doiq naengh youq henz boux hak geq naeuz: “Saeyez, aen anq saeh neix, mwngz bae saemj leix, danghnaeuz dwg caen, wnggai ciuq guekfap banh, mbouj ndaej fwngz unq.” Gozvangz gangj le, baet gen doiq dangz.<p>Saeyez sikhaek hai dangz saemj Hoz Bingz, mbouj ngeix daengz saeyez cungj mboujcaengz bek daiz, Hoz Bingz couh nyinh soh gangj lo. Saeyez raen de nyinh coih ndei, buenq coih lai mbaeu, cij gekcawz de baema ranz guh naz, moeb caekhaex ngeih cib mbat, couh gyaep ok vangzgungh bae. Hoz Cangzbwz raen buenq anq goengbingz, haenh saeyez geij coenz le, couh bae ndaw lauz lingx Hoz Anh okdaeuj, song boh lwg vuenvuen heijheij doiq ok vangzgungh ma. <p>Hoz Cangzbwz boh lwg byaij daengz ndaw gai couh haeuj hekdiemq bae ra dieg ninz, dingjlingz Hoz Bingz caemh youq gizhaenx. Hoz Anh hemq sing“daeggo”, caeuq Hoz Bingz doxgot hwnjdaeuj. Hoz Cangzbwz hoz ndat dwk ndaq naeuz: “Hoz Anh, mwngz baenzneix fouzyungh, bae bagiet boux iencaeuz? Vaihnaj!” Hoz Anh naeuz: “Daxboh, de mbouj dwg boux caeuz, de dwg lwgnyaeq ndei mwngz.” Hoz Cangzbwz de dwg lwgnyaeq ndei mwngz.” Hoz Cangzbwz engqgya hozndat, hat naeuz: “Mwngz hawj fangz maez sim la? Mwngz vaiq dauqma!” Hoz Anh daengz seizneix cij ngeix hwnj, de lij caengz gangj gij geiqmaeuz de hawj daxboh nyi. Yenzlaiz, ngoenz haenx Hoz Bingz ok diuz geiqmaeuz ndei neix, dwg gya diuz coih hawj Hoz Anh, dawz de gyaeng haeuj lauz bae, caiq youz Hoz Anh sij saenq gyaj hawj duz roeggeuq soengq ma ranz, youz Hoz Cangzbwz haeuj vangzgungh daeuj gauq Hoz Bingz. Ciuq Goujdoengh vuengzfap, fanzseih hak cai ndaw guek famh coih naek couh deng gyaeng ngaiz gaj, coih mbaeu couh ngaiz gekcawz baema ranz, Hoz Bingz famh coih seih byangz aeu goengmingz, seih coih mbaeu, ngaiz gekcawz baema, yienghneix cingq hab lo. <p>Hoz Cangzbwz dingq le, gikdoengh dwk doiq Hoz Bingz naeuz: “Lwg ha, mwngz souh hoj la.” Hoz Bingz naeuz: “Mbouj, boh ha, daegnuengx beij gou lij hoj.”<p>Hoz Anh gangj: “Cij aeu daengx ranz vunz ndaej caez youq giz ndeu, vih beixnuengx ndaw mbanj siucawz huxnanh, souh di haemzhoj mbouj suenq gijmaz. ”<p>Sam boh lwg gangj mbouj rox liux, gangj daengz byongh hwnz cij ninz.<p>Haetlaeng, mbwn ngamq rongh, sam boh lwg cingq dajsuenq okdou, gunghcuj fwedfwed ganj daeuj daengz lo. De caeuq Hoz Bingz gangj haujlai vah doxbiek, gvanbaz cingzngeih naek, gyau hawj Hoz Bingz aen ndungq aen mbok caeuq bog caxgang he, lwnh Hoz Bingz naeuz, ndaw mbok caeng nyouh gungqsou, gij lwgda vunz caeuq cukseng deng uq couh mengz; aen ndungq neix youq yungyiemj seiz, bag de, couh an’onj fouz saeh. Gunghcuj gangj le, raemxda ndik yagyag, cungj mbouj sij caeuq Hoz Bingz doxbiek.<p>Hoz Bingz caeuq Hoz Anh ma daengz ranz le, roxdaengz duzlungz ndaem youh yaek heuh rumz heuh fwn lo, ngoenz itmienh dwk bya, itmienh lienh goengfou. Hoz Bingz bau moeb aenbak duzlungz ndaem vaih, Hoz Anh bau cingj lwgda de mengz, song beixnuengx daengz aen dan Dahhoz daeuj lienh foux, yungh fiengz cugbaenz aen gyaeuj lungz, Hoz Bingz ndwn youq gwnz dat bangx dah, yiengq aen baj cuengq feidau, Hoz Anh yungh mbok guh baenz cungqraemx sat aen da de, dwkdaengz aen baj yungzlanh liux cij dingzfwngz.<p>Song beixnuengx mboujduenh lienh foux, loengh cax loengh cienq gig sug gig cinj. Mbouj geij nanz, couh raen aen da duzsaeceij bakdou singz bienq nding lo, Hoz Bingz caeuq Hoz Anh daeuj daengz henz dah, caj duzlungz ndaem daeuj, Hoz Bingz ndwn youq bangx dah, gwnz hwet de naep miz cib fag feidau, cibcuk miz vi. Hoz Anh gaem cungqraemx, ndaw de guenq miz nyouh gungqsou, Hoz Cangzbwz aemq aen ndungq gunghcuj soengq haenx ndwn youq henz, song mbiengj dah lij ndwn miz haujlai vunz mbanj, gyoengqde caez daeuj bang rengz. Cij raen aen vaengz laeg baihlaj dan miz sok raemx langh he goenj hoho, ndaek gyaeuj lungz hung lumj bak loz nei loh ok naj raemx daeuj, de caengz da aj bak, siengj nauh rumz nauh fwn, cingq youq seiz haenx, Hoz Anh da raeh fwngz riengj, yaengx aen cungqraemx doiq cinj aen da duzlungz ndaem gwq sat, da de hai mbouj ndaej lo. Gaendaeuj Hoz Bingz laebdaeb cuengq ok feidau, gij feidau yiengjfwfw baengq haeuj bak duzlungz ndaem bae, laj hangz de ngaiz mbongq vaih lo. Gyoengq vunz angq dwk hemq hwnjdaeuj: “Moeb ndaej ndei!”<p>Duzlungz ndaem sieng haenq lai, danhseih lij caengz dai, de yiedfat guengz lo, lumj duzma bag nei, luenh cung luenh sangj, raemxdah fanhoho lumj haijciuz nei, song bangx dah mbanj ranz yaek deng dumh. Hoz Bingz doiq boh de naeuz: “Vaiq bag ndungqfaex!” Hoz Cangzbwz sikhaek bag hai aen ndungq, baenz gyoengq bingmax daj ndaw de mbin okdaeuj. Gyoengq bingmax neix mbin daengz gwnz gyaeuj duzlungz ndaem, couh beng gung nyingz cienq, cien fanh diuz cienq caez baek haeuj gwnz ndang duzlungz, de caiq sangj mbouj ndaej lo. Gyoengq bingmax cij faen song loh mbin hwnj bangx dat Dahhoz bae, nem youq gwnz dat, souj hen duenh dah neix, hawj vunz henz dah ndaej an’onj.<p>Duzlungz ndaem cengqmingh bongh daengz gaebgyawj gwnz sadan goenqheiq lo, seizgan nanz le, couh bienqbaenz duzlungz rin. Vunz ndaw mbanj moix ngoenz gvaq dah guh naz, cungj aeu daj gwnz ndang de byaij gvaq, sojyij couh heuh aen mbanj neix guh Mbanjbanhlungz.<p>Aenvih Hoz Bingz caeuq Hoz Anh youq aen Mbanj Dahhoz ceihfug duzlungz ndaem, vunzraeuz niemh de song beixnuengx miz goenglauz, couh heuh aen dan neix guh Lungzgaeb, eiqsei naeuz youq gizneix gaeb dawz duzlungz iu. (Luz Dwngzgunh cingjleix)<br> ——————摘自[壮侗语言文化网] <br>
页:
[1]