花山的故事(12)
[这个贴子最后由lozmingz在 2002/11/17 10:22am 编辑]<br><br>GOJ BYARAIZ<p>花山的故事<br> <p> 12. BYA BEGHAG<p>Laj Bya Beghag miz aen mbanj ndeu heuhguh Mbanj Beghag, Youq baihdoeng neix miz ranz singq Vuengz ndeu, ranz de cij miz song gvanbaz caeuq laeq lwgnyez dog, laeq lwgnyez neix heuhguh Vuengz Caiz, lij iq couh ndaengj lai, mbouj daih dingq boh meh gangj, iqyetyet couh hag guhdoj lo, boh meh doiq de mbouj miz banhfap <p>Vuengz Caiz ndaej cib bi, miz ngoenz ndeu, de okbae ra vunz dojcienz. De ngamq byaij daengz henz dah, laeglwnh ndaejnyi vunz riu hahaha ok baihlaeng daeuj, de ngeux gyaeuj dauqlaeng yawj, yienzlaiz dwg boux daenj buh hoengz ndeu riengzlaeng de daeuj, boux neix ndaej sam seiq cib bi lo.De raen Vuengz Caiz couh naeuz: “Vei, riengz gou doj ba! ” Vuengz Caiz cam; “Mwngz dwg bouxlawz?” Boux de dap: “Gou daj ndaw rungh daeuj ha.” <p>Vuengz Caiz naemj, vunz ndaw rungh mbouj daih rox guhdoj, riengz de doj, itdingh ndaej hingz, couh naeuz: “Sien gangj dingh, bouxlawz doj saw, mbouj cinj fannaj.”<p>Boux daenj buh hoengz naeuz: “Gangj dingh leu, mbouj ndaej fannaj.”<p>De song vunz couh haeuj henz bya ndaw ndoeng bae, youq gwnz rin veh buenz geiz ndeu, doiq naj caez naengh dwk geiz hwnjdaeuj lo. Boux daenj buh hoengz haenx naeuz: “Ndei lo, raeuz beij dwk geiz, bouxlawz dwk saw le, couh bae ranz aeu ngaenz daeuj, mbouj miz ngaenz, couh aeu doxgaiq daeuj dingj.”<p>Daj seiz haenx hwnj, Vuengz Caiz ngoenzngoenz cungj daeuj gix guhdoj. Gangj daeuj caen geizheih, moix baez Vuengz Caiz cungj ndaej gwn gij geiz de yaek liux, couh yaek hingz lo, boux daenj buh hoengz mbat doengh aen geiz, yaep he, Vuengz Caiz couh saw lo. <p>Vuengz Caiz yied doj yied mbouj fugheiq, doj bae doj dauq, de cungj mbouj caengz hingz saek mbat. Yienghneix, de vanzlij doj, boh meh naeuz de cungj mbouj dingq. Vuengz Caiz ndaej ngeih cib bi seiz, gaenq dawzgyadangq de doj bae dingzlai lo. Bi de, boh de yaek gvaqseiq lo, gyangznaek doiq de naeuz: “Lwg ha, mwngz mbouj yungh guhdoj lo, caiq doj roengzbae, gyadangq raeuz couh aeu saw ndoq la, seizhaenx, mwngz baenzlawz gvaq saedceij ne!”<p>Vuengz Caiz mbouj dawz gij vah boh de hwnj rwz. Boh de dai le, de vanzlij caeuq boux daenj buh hoengz haenx doj, doj ha, doj ha, dawz gij cienzngaenz ndaw ranz doj ndoq liux, youh dangq daemznaz doj. De ndaej sam cib bi seiz, gij gyadangq de cungj doj saw liux lo, caenh lw mbenq reih iq youh hex youh gyae vunz mbouj haengj aeu, ndaw ranz gungz ndoq lumj raemx riengx nei, gijmaz cungj mbouj miz lo. <p>Youq bi haenx, meh de bingh naek yaek dai lo, doiq de naeuz: “Lwg ha, mwngz mbouj yungh caiq guhdoj la! Ndaw ranz raeuz ban neix cij miz gaiq reih genz iq gwnz ndoi la, boh mwngz lij lix seiz, dawz haujlai gimngaenz bae ndaw de moek, mwngz yaek gvaq saedceij ndei, couh bae ndaw de gud ma yungh, cienfanh mbouj yungh caiq guhdoj lo. ”<p>Meh de dai le, Vuengz Caiz ndaw ranz fwzngeungeu, aen ranz de seiq hamq doeng rumz liengzsuebsueb, hoj dwk venj rek hwnj bangxciengz bae, iek dwk dungx nem haeuj saej bae, de mbouj miz banhfap caiq bae guhdoj lo. Seiz haenx, de siengj daengz gij vah meh de, couh gwed gvak bae mbenq reih iq de gud gim ngaenz. De gud ha, gud ha, gud liux sam hwnz sam ngoenz, gud mbenq reih iq de laeg sam cik youh sam conq, caq bae youh caq dauq, caq mboeng lumj daeuh nei, vanzlij gijmaz cungj ra mbouj ndaej. De gig siengsim, song fwngz got gyaeuj daejrwirwi, couh aeu deng dai iek la, mbouj miz banhfap, de cix dawz daeuj ndaem haeuxyangz.<p>Gangj daeuj caemh geizheih, bi de, de ndaem haeuxyangz lai baenz gvaq daengxcungq, sou ndaej geij cib rap, de couh baengh gij haeuxyangz neix ciengx mingh lo. <p>Vuengz Caiz hoj lo, couh mbouj miz sim caiq bae guhdoj, boux daenj buh hoengz haenx caemh mbouj daeuj ra de doj, de ngoenzngoenz youq ndaw reih haeuxyangz ciemz rum haz, bibi gij haeuxyangz de daegbied ndei. Gogo hung lumj gaenz cax nei, go miz song faek sam faek, faekfaek raengmbwngmbwng, naednaed gyaeugywdgywd, vunz gvaq loh raen le, bouxboux cungj haenh. <p>Ngoenz ndeu, de cingq sou haeuxyangz, boux daenj buh hoengz haenx daeuj lo, mbouj ngeix daengz de dwg daeuj bang Vuengz Caiz sou haeuxyangz. Sou liux, de doiq Vuengz Caiz naeuz: “Raeuz haujlai nanz mbouj doj lo, mwngz caemh sou ndaej haujlai haeuxyangz, couh doj gij haeuxyangz neix ba.”<p>Vuengz Caiz siengj: “Gij haeuxyangz neix gou sinhoj dwgrengz guh cij ndaej daeuj, dangh-<p>naeuz dawz bae doj saw liux, lienz haeux cungj mbouj miz gwn, gou mbouj dai iek ha?” De couh naeuz: “Mbouj doj lo. ” De yienghneix gangj, boux daenj buh hoengz riu sam sing“hahaha”, bae lo.<p>Daj seiz de hwnj, Vuengz Caiz caen rox daengz: Cij miz baengh bonjfaenh roengzrengz guh hong, het ndaej haeux gwn. De cungj ansim youq mbenq reih iq henz ndoi de guh hong, haet romh haemh laep, song gyaeuj raen ndaundeiq. <p>Gvaq song sam bi, Vuengz caiz mbouj you gwn, mbouj you daenj, saedceij menhmenh ndei hwnjdaeuj lo. Danhseih, gwndaenj vanzlij beij mbouj hwnj boh meh de youq seiq seiz yienghhaenx ndei. De bi beij bi gaenx, bibi cungj geng laeg, mbak laeg. Mbat ndeu, de vat ndaej aen gang iq ndeu, baez hai yawj, ndaw de cungj dwg gij doenghyiengh de dojsaw hawj boux daenj buh hoengz, lienz gij buhvaq de lij iq daenj haenx, cungj daeb ndaej ndaetndaet cuengq youq ndaw de. Raen doengh gijneix, Vuengz Caiz cungj ngaengh bae, aen gang baenz iq, cang ndaej baenzlai doxgaiq, gij doxgaiq neix daj gizlawz daeuj ne?<p>Miz ngoenz ndeu, Vuengz Caiz gwed hanz hwnj ndoi bae aeu fwnz. De byaij ha, byaij ha, byaij gvaq laj Bya Beghag, Gizneix bya heu raemx saw, ndoengfaex mwncupcup, funghgingj caen ndei ha. De yawj dwk maez bae. Sawqmwh miz vunz heuh coh de: “Vuengz Caiz……” De ngangx gyaeuj yawj seiqhenz, cungj mbouj raen miz saek boux vunz, bouxlawz hemq ne? De ngeizvaeg lo, youh ndaejnyi sing riu “hahaha ”ok ndaw ndoengfaex daeuj. De baez nyeng rwz dingq, gij sing riu neix lumjbaenz youq gizlawz dingq gvaq, caen sug lo! Yo! Dwg bouxlawz caeuq gou guh yahndoj ne? Siengj mbouj hwnjdaeuj. Seiz haenx, de mbat ngangx gyaeuj muengh haeuj bangx dat Bya Beghag bae, yawjraen bangx dat miz haujlai siengq vunz, ndaw de miz boux he lumj boux daenj buh hoengz nei, de uet da yawj, youh byaij daengz laj dat bae yawj, cam: “Dwg mwngz heuh gou ma?” Ndaek siengq de mbouj han mbouj doengh. Vuengz Caiz miz di lau, youq ndaw ndoeng ra rap fwnz ndeu couh dauqma lo. Danhseih, de rap fwnz roengz lueg mbouj geijlai gyae, youh ndaejnyi gij sing riu boux daenj buh hoengz daj baihlaeng cienzdaeuj, Vuengz Caiz menh ngeix menh siengj, youh ngeixdaengz gij doxgaiq ndaw gang, vaeg singj gvaqdaeuj: gij neix itdingh dwg bouxsien sonyinx de. Daj mbat de hwnj, de engq haenqrengz guhhong. Mbouj ndaej geij bi, gaxgonq de doj saw gij doxgaiq gaenq cawx dauq caez, doj saw gij daemznaz haenx rouh dauqma seuqset. Gvaqlaeng, Vuengz Caiz caemh aeu yah lo, miz daeglwg ndeu, Vuengz Caiz son de gaej lumj gaxgonq bonjfaenh guhdoj lo. (Hungz Boh、Singh Yenz cingleix)<p> ——————摘自[壮侗语言文化网] <p>
页:
[1]