花山的故事(10)
GOJ BYARAIZ<p>花山的故事<br> <p> 10. RUQMOU RIN<p>Mwhgonq, daj Byayiengz daengz Mbanj Ruqmou, gemh lingq loh gaeb, vunz gvaq neix bae ganj haw dajcunz, cib boux byaij gouj boux laemx, mbangj deng ga sieng fwngz raek, haujlai vunz mbouj gamj byaij lo. <p>Doeklaeng, geij mbanj vunz caez siengliengz, gap cienz cingj bak boux canghrin bae coih loh. <p>Loh ngamq coih ndaej geij ngoenz, couh ok gienh saeh geizheih ndeu: Moix ngoenz miz bak boux vunz okhong, mbat daengz seiz gwn ngaiz, cij miz gouj cib seiq boux, miz roek boux mbouj rox gvaq gyawz bae?<p>Loh coih daengz laj gemh, aeu siuq rinbenq demh loh. Danhseih rinbenq youh raez youh naek, song boux ram mbouj hwnj, seiq boux ram loh youh gaeb, mbouj rox yienghlawz cij ndei. Bouxboux cungj mbouj rox baenzlawz guh. Bouxlawz rox, haetlaeng caezgya baedaengz laj gemh mbat yawj, bouxboux da cungj byaengq liux:Rinbenq baij rim gwnz namh, gij rin neix lumj aen ruqmou nei, seiqseiq cingqcingq, youh lwenj youh raeuz, mbaeumbiengmbieng, song boux ram couh ndaej lo. Gyoengde ram mbouj geij nanz, loh couh bu ndei lo. <p>Gij hong neix dwg bouxlawz caeg guh ne? Daengz haemh, sou hong gwn caeuz le, laux goengdaeuz naj hix mbouj swiq, couh hwnj congz bae ninz, yaep he couh gyaenfofo lo. Mwngz laihnaeuz de caen ninz ndaek dahraix ha? Mbouj seih ne, caengz daengz gaeq haen sam sauh, de couh cacoemj hwnj congz, caegcaeg baedaengz laj Byayiengz. <p>Ngamq daengz laj gemh, de nyeng rwz mbat dingq, ndaejnyi gwnz gemh yiengj dokdok dekdek. Laux goengdaeuz caeg angq naeuz: “Mbat neix hawj gou ndaej dawz luba!” Haemhneix ngamq seih haemh cib bet, ronghndwen ronghsagsag. Laux goengdaeuz caegcaeg byaij gvaqbae. Ha! Geij cib boux vunz bingzbaiz naengh youq, gaem fouj dih gaem fouj, dawz siuq dih dawz siuq, guggug gaggag siuq ruqmou. Laux goengdaeuz siengj: “Sou mbat neix lij deuz gvaq gyawz bae dem!” De doq byaij doq hemq: “Boihseiz sou duj ndei, byonghhwnz samgeng caeg ma guh hong hix mbouj iu vunz!”Caj de ngamq buet daengz, geij cib boux vunz cungj mbouj raen ngaeuz lo. Laux goengdaeuz moenghmangh naengh youq gwnz rin, yied siengj yied roxnyinh geizheih. Seiz haenx, mbwn rongh lo, gyoengq canghrin hix daeuj guhhong lo. Laux goendaeuz couh lwnh hawj gyoengqde nyi. Gyoengq canghrin cungj mbouj saenq. Laux goengdaeuz couh caeuq gyoengqde bae daengz dat Byayiengz yawj. Caezgya seiqcawq ra, haiya! Youq gwnz dat miz geij cib boux vunz gaem fouj dawz siuq, naengh youq ngaek gyaeuj riunyumnyum. Mbouj rox gvaq liux geijlai cien bak bi, couh bienqbaenz bizva.<p>Demh ndei loh le, lij lw geij aen ruqmou rin, miz di vunz dawz bae ranz gueng mou, mou maj ndaej vaiq, aeu bae gueng gaeq, gaeq biz miz gyaeq lai. Daj seiz haenx hwnj, giz dieg neix couh heuhguh Mbanj Ruqmou. (Fungz Cwnglenz、Vangz Caizswnh、Ciz Hungz、Luz Dwngzgunh cingjleix)<p> ——————摘自[壮侗语言文化网] <p><br>
页:
[1]